Barog nga Malig-on Alang sa Hinatag-sa-Diyos nga Kagawasan!
“Alang sa maong kagawasan kita gipahigawas ni Kristo. Busa barog kamo nga malig-on, ug ayaw na kamo pagpasangon pag-usab sa yugo sa pagkaulipon.”—GALACIA 5:1.
1, 2. Sa unsang paagi nawala ang hinatag-sa-Diyos nga kagawasan?
ANG katawhan ni Jehova may kagawasan. Apan sila dili mangitag kagawasan gikan sa Diyos, kay kana magkahulogan sa pagkahimong ulipon ni Satanas. Ilang gimahal ang ilang suod nga relasyon uban kang Jehova ug masadyaon sa kagawasan nga iyang gihatag kanila.
2 Ang atong unang mga ginikanan, si Adan ug Eva, nawad-an sa hinatag-sa-Diyos nga kagawasan pinaagi sa pagpakasala ug nahimong mga ulipon sa sala, kamatayon, ug sa Yawa. (Genesis 3:1-19; Roma 5:12) Gani, gibutang ni Satanas ang tibuok kalibotan diha sa makasasalang dalan ngadto sa kalaglagan! Apan kadtong nagabarog nga malig-on alang sa hinatag-sa-Diyos nga kagawasan nagalakaw diha sa dalan sa kinabuhing walay kataposan.—Mateo 7:13, 14; 1 Juan 5:19.
Kagawasan Gikan sa Pagkaulipon
3. Unsang paglaom ang gitanyag sa Diyos sa Eden?
3 Maoy katuyoan ni Jehova nga ang mga tawo nga nagabalaan sa iyang ngalan may kagawasan sa pagkaulipon ni Satanas, sala, ug kamatayon. Kana nga paglaom gitanyag sa dihang gisultihan sa Diyos ang bitin nga gigamit ni Satanas sa Eden: “Ibutang ko ang panagkaaway sa taliwala mo ug sa babaye ug sa taliwala sa imong binhi ug sa iyang binhi. Siya magasamad sa imong ulo ug ikaw magasamad sa iyang tikod.” (Genesis 3:14, 15) Si Jesu-Kristo, ang Binhi nga gikan sa langitnong organisasyon ni Jehova, nag-antos ug samad sa tikod sa dihang siya namatay diha sa kahoy, apan ang Diyos nagtagana ug usa ka halad lukat sa paglibre sa magtutuong katawhan gikan sa sala ug kamatayon. (Mateo 20:28; Juan 3:16) Sa kataposan, si Jesus mosamad sa ulo ni Satanas, ang orihinal nga Bitin.—Pinadayag 12:9.
4. Unsang kagawasan ang gitagamtam ni Abraham, ug unsay gisaad ni Jehova kaniya?
4 Sa mga 2,000 ka tuig human sa saad nga gihatag didto sa Eden, ang “higala ni Jehova” nga si Abraham misugot sa Diyos ug mibiya sa siyudad sa Ur paingon sa laing dapit. (Santiago 2:23; Hebreohanon 11:8) Sa ingon siya nakadawat sa hinatag-sa-Diyos nga kagawasan ug wala na magkinabuhi ingong ulipon sa kang Satanas nga kalibotan sa bakak nga relihiyon, dunot nga politika, ug hakog nga komersiyo. Bahin sa tagna sa Eden, ang Diyos dugang misaad nga ang tanang mga pamilya ug kanasoran pagapanalanginan pinaagi ni Abraham ug sa iyang Binhi. (Genesis 12:3; 22:17, 18) Si Abraham wala mailalom sa pagkahinukman sa silot tungod kay ‘siya mituo kang Jehova, nga nag-isip niini nga iyang pagkamatarong.’ (Genesis 15:6) Karong adlawa, ang suod nga relasyon uban kang Jehova samang mohatag ug hinatag-sa-Diyos nga kagawasan gikan sa pagkahinukman sa silot ug gikan sa pagkaulipon sa kalibotan nga nailalom sa gahom ni Satanas.
Usa ka Makaiikag nga Simbolikong Drama
5. Ang pagkatawo ni Isaac gilangkit uban sa unsang mga sirkumstansiya?
5 Aron si Abraham makabaton ug usa ka kaliwat, gihatag sa iyang dili-makaanak nga asawa, si Sarah, ang iyang ulipon nga babaye, si Hagar, ingong tig-anak. Pinaagi kaniya, si Abraham nahimong amahan ni Ismael, apan siya wala pilia sa Diyos ingon nga mao ang gisaad nga Binhi. Hinunoa, sa dihang 100 na ang edad ni Abraham ug si Sarah 90, gipahinabo ni Jehova nga sila makabaton ug anak nga ginganlag Isaac. Sa dihang gibugalbugalan ni Ismael si Isaac, si Hagar ug ang iyang anak gipalayas, nga naghimo sa anak sa may-kagawasang babaye nga si Sarah ingong dili-malalis nga binhi ni Abraham. Sama kang Abraham, si Isaac usab nagpakitag pagtuo ug nakatagamtam sa hinatag-sa-Diyos nga kagawasan.—Genesis 16:1-16; 21:1-21; 25:5-11.
6, 7. Bahin sa unsa nga gidani sa bakak nga mga magtutudlo ang pipila ka Kristohanon sa Galacia, apan unsay gipatin-aw ni Pablo?
6 Kining mga hitaboa naglandong sa mga butang nga hinungdanon kaayo sa mga mahigugmaon sa hinatag-sa-Diyos nga kagawasan. Kini ang gipahayag diha sulat ni apostol Pablo ngadto sa mga kongregasyon sa Galacia sa mga 50 ngadto sa 52 K.P. Niadtong panahona ang nagamandong lawas naghukom nga dili na kinahanglan ang sirkunsisyon alang sa mga Kristohanon. Apan gidani sa bakak nga mga magtutudlo ang ubang mga taga Galacia nga kadto maoy usa ka hinungdanong bahin sa Kristiyanidad.
7 Gisultihan ni Pablo ang mga taga Galacia: Ang usa ka tawo ipahayag nga matarong pinaagi sa pagtuo kang Kristo, dili sa mga buhat sa Moisesnong Kasugoan. (1:1–3:14) Ang Kasugoan wala magpakawang sa saad nga nalangkit sa pakigtugon kang Abraham apan nagpadayag sa mga kalapasan ug nahimong mag-aagak ngadto kang Kristo. (3:15-25) Pinaagi sa iyang kamatayon, gipagawas ni Jesus ang mga nailalom sa Kasugoan, nga nagpahimo kanila nga mga anak sa Diyos. Busa, ang pagbalik ngadto sa usa ka kahikayan sa pagbantay sa mga adlaw, sa mga bulan, sa mga panahon, ug mga tuig nagkahulogan sa pagbalik ngadto sa pagkaulipon. (4:1-20) Unya si Pablo misulat:
8, 9. (a) Sa inyong kaugalingong mga pulong, ipatin-aw sa mubo kon unsa ang giingon ni Pablo sa Galacia 4:21-26. (b) Niining simbolikong drama, kinsa o unsay gihulagwayan ni Abraham ug Sarah, ug kinsa ang gisaad nga Binhi?
8 “Sultihi ako, kamo nga buot magpailalom sa kasugoan, Wala ba kamo makabati sa Kasugoan? Pananglitan, nahisulat niini nga si Abraham may duha ka anak nga lalaki, ang usa [Ismael] sa babayeng ulipon [Hagar] ug ang usa [Isaac] sa babayeng may kagawasan [Sarah]; apan ang anak sa babayeng ulipon natawo sumala sa paagi sa kinaiya, samtang ang anak sa babayeng may kagawasan natawo pinaagi sa saad. Kining mga butanga maoy usa ka simbolikong drama; kay kining mga babayehana mao ang duha ka pakigsaad, ang usa [ang Kasugoan sa pakigtugon] gikan sa Bukid sa Sinai [sa dapit nga gisugdan sa Diyos kana nga pakigtugon uban sa mga Israelinhon], nagpasanay ug mga anak alang sa kaulipnan, nga mao si Hagar. [Ang lain nga pakigtugon mao ang usa nga gihimo ni Abraham labot sa iyang Binhi.] Karon kining si Hagar mao ang Bukid sa Sinai, usa ka bukid sa Arabia, ug siya katugbang sa Jerusalem karon, tungod kay siya naulipon man karon kauban sa iyang mga anak [mga kaliwat ni Abraham, Isaac, ug Jacob]. Apan ang Jerusalem nga anaa sa itaas may kagawasan, ug siya mao ang atong inahan.”—Galacia 4:21-26.
9 Niining simboliko nga drama, si Abraham mao ang larawan ni Jehova. “Ang babayeng may kagawasan,” si Sarah, naghulagway sa “babaye” sa Diyos, o ang balaan unibersohanong organisasyon. Kini nanganak kang Kristo, ang Binhi sa maong simbolikong babaye ug sa Dakong Abraham. (Galacia 3:16) Sa pagpakita sa katawhan sa dalan sa kagawasan gikan sa mahugaw nga pagsimba, sala, ug Satanas, gitudlo ni Jesus ang kamatuoran ug giyagyag ang bakak nga relihiyon, apan ang Jerusalem ug ang iyang mga anak nagpabilin sa relihiyosong kaulipnan tungod kay sila wala modawat kaniya. (Mateo 23:37, 38) Ang Hudiyohanong mga sumusunod ni Jesus nakagawas gikan sa Kasugoan, nga nagpakita sa ilang pagkaulipon sa pagkadili-hingpit, sala, ug kamatayon. May kagawasan tinuod ang tanang katawhan nga modawat kang Jesus ingon nga mao ang Usa nga gipatungha sa “babaye” sa Diyos aron mahimong Mesiyanikong Hari ug ang Manunubos nga ‘nagamantala sa kagawasan sa mga binihag’!—Isaias 61:1, 2; Lucas 4:18, 19.
Likayi ang Yugo sa Kaulipnan
10, 11. Gikan sa unsang yugo sa pagkaulipon nga gipagawas ni Kristo ang iyang mga sumusunod, ug unsang mga katumbas ang makuha karong adlawa?
10 Kadtong nagalangkob sa binhi ni Abraham uban kang Kristo, ang Dakong Isaac, si Pablo nag-ingon: “Ang Jerusalem nga anaa sa itaas may kagawasan, ug siya ang atong inahan. . . . Kita, mga igsoon, ingon kang Isaac maoy mga anak sa saad. Apan maingon nga kaniadtong panahona kadtong natawo sumala sa paagi sa kinaiya [Ismael] milutos niadtong natawo sumala sa espiritu [Isaac], mao man usab karon. . . . Kita mga anak, dili sa babayeng ulipon, kondili sa babayeng may kagawasan. Alang sa kagawasan [gikan sa Kasugoan] kita gipahigawas ni Kristo. Busa barog kamo nga malig-on, ug ayaw na kamo pagpasangon pag-usab sa yugo sa pagkaulipon.”—Galacia 4:26–5:1.
11 Ang bisan kinsang mga sumusunod ni Jesus mapasangon unta diha sa yugo sa pagkaulipon kon sila nagpasakop pa sa Kasugoan. Ang bakak nga relihiyon mao ang presenteng makapaulipon nga yugo, ug ang Kakristiyanohan mao ang katugbang sa karaang Jerusalem ug sa iyang mga anak. Apan ang mga dinihogan maoy mga anak sa Jerusalem nga anaa sa itaas, ang may kagawasan langitnong organisasyon ni Jehova. Sila ug ang kaubang mga magtutuo nga may yutan-ong paglaom dili bahin niining kalibotana ug wala maulipon kang Satanas. (Juan 14:30; 15:19; 17:14, 16) Nahatagan ug kagawasan sa kamatuoran ug sa halad ni Jesus, mobarog kitang malig-on alang sa atong hinatag-sa-Diyos nga kagawasan.
Nagabarog Alang sa Hinatag-sa-Diyos nga Kagawasan
12. Unsang dalan ang gikuha sa mga magtutuo, ug unsa karon ang pagahisgotan?
12 Milyon-milyon karon ang nagatagamtam sa matuod nga kagawasan ingong mga Saksi ni Jehova. Ginahimo ang mga pagtuon sa Bibliya uban sa laing minilyon, ang kadaghanan kanila maoy “mahiligon sa pagkamatarong alang sa kinabuhing dayon.” Sa pagkahimong mga magtutuo, sila magabarog alang sa hinatag-sa-Diyos nga kagawasan pinaagi ug pagpabawtismo. (Buhat 13:48; 18:8) Apan unsang mga lakang ang nagauna sa dili pa ang Kristohanong bawtismo?
13. Unsay relasyon sa kahibalo ug sa bawtismo?
13 Sa dili pa magpabawtismo, ang usa ka tawo kinahanglang magbaton ug molihok diha sa tukmang kahibalo sa Kasulatan. (Efeso 4:13) Busa, giingnan ni Jesus ang iyang mga sumusunod: “Panglakaw kamo . . . ug himoa ninyong mga tinun-an ang tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagtuman sa tanang mga butang nga gisugo ko kaninyo.”—Mateo 28:19, 20.
14. Ang pagkamabawtismohan diha sa ngalan sa Amahan, sa Anak, ug sa balaang espiritu nagkinahanglan ug unsang kahibalo?
14 Ang pagkanabawtismohan diha sa ngalan sa Amahan nagpasabot sa pagdawat sa katungod ug sa awtoridad ni Jehova ingong Diyos, Maglalalang, ug Magmamando sa Uniberso. (Genesis 17:1; 2 Hari 19:15; Pinadayag 4:11) Ang bawtismo diha sa ngalan sa Anak nagkinahanglan sa pag-ila sa katungod ug awtoridad ni Kristo ingong usa ka binayaw espiritung linalang, ang Mesiyanikong Hari, ug ang usa pinaagi kang kinsa ang Diyos mitagana ug “usa ka katumbas nga lukat.” (1 Timoteo 2:5, 6; Daniel 7:13, 14; Filipos 2:9-11) Ang usa ka tawo nga nabawtismohan diha sa ngalan sa espiritu nakaamgo nga kini maoy aktibong gahom sa Diyos nga gigamit ni Jehova sa paglalang ug sa pagdasig sa mga magsusulat sa Bibliya, maingon man usab sa ubang mga paagi. (Genesis 1:2; 2 Pedro 1:21) Siyempre, dunay daghan pa nga mahibaloan mahitungod sa Diyos, kang Kristo, ug sa balaang espiritu.
15. Nganong ang usa ka tawo magpakitag pagtuo sa dili pa bawtismohan?
15 Una pa magpabawtismo, ang usa ka tawo kinahanglang magatuo pinasukad sa tukmang kahibalo. “Kay kon walay pagtuo dili gayod mahimo ang pagpahimuot kang [Jehova].” (Hebreohanon 11:6) Ang indibiduwal nga nagatuo sa Diyos, kang Kristo, ug sa balaang katuyoan buot nga mahimong usa sa mga Saksi ni Jehova, nga nagkinabuhi nga uyon sa Pulong sa Diyos ug adunay makahuloganong pakig-ambit diha sa pagsangyaw sa maayong balita. Siya magasulti mahitungod sa kahalangdon sa pagkahari ni Jehova.—Salmo 145:10-13; Mateo 24:14.
16. Unsa ang paghinulsol, ug sa unsang paagi kini nalangkit sa Kristohanong bawtismo?
16 Ang paghinulsol maoy laing kinahanglanon alang sa pagbawtismo. Ang paghinulsol nagkahulogan sa “pagbag-o sa hunahuna sa usa maylabot sa miaging (o tinuyo) nga buhat, o paggawi, tungod sa pagbasol o kawalay-katagbawan,” o “mobatig pagbasol, kasubo, o kasakit alang sa nabuhat sa usa o sa wala mabuhat.” Ang unang-siglong mga Hudiyo nagkinahanglang maghinulsol sa ilang mga sala batok kang Jesu-Kristo. (Buhat 3:11-26) Ang pipila ka mga magtutuo sa Corinto naghinulsol sa pakighilawas, idolatriya, panapaw, homoseksuwalidad, pagpangawat, kadalo, paghuboghubog, pagpasipala, ug panikas. Ingong resulta, sila “nahinloan na” sa dugo ni Jesus, “nabalaan na” ingong nahalain alang sa pag-alagad kang Jehova, ug “gipahayag nga matarong” diha sa ngalan ni Jesu-Kristo ug sa espiritu sa Diyos. (1 Corinto 6:9-11) Busa ang paghinulsol maoy usa ka lakang ngadto sa pagbaton ug usa ka maayong tanlag ug sa hinatag-sa-Diyos nga kagawasan tungod sa pagtulisok sa tanlag tungod sa sala.—1 Pedro 3:21.
17. Ang pagbag-o nagkahulogan ug unsa, ug unsay gikinahanglan niini diha sa usa nga nagaplano nga magpabawtismo?
17 Ang pagbag-o kinahanglang mahitabo usab una pa ang usa ka tawo mabawtismohan ingong usa sa mga Saksi ni Jehova. Ang pagbag-o sa nagahinulsol nga indibiduwal mahitabo human nga iyang biyaan ang iyang daotang dalan ug determinado na sa pagbuhat kon unsa ang matarong. Ang Hebreohanon ug Gregong berbo nga nalangkit sa pagbag-o nagkahulogan nga “mobali, moliso, o mobalik.” Kon gamiton diha sa usa ka maayong espirituwal nga diwa, kini nagatumong sa pagbalik ngadto sa Diyos gikan sa usa ka sayop nga dalan. (1 Hari 8:33, 34) Ang pagbag-o nanginahanglan sa “mga buhat nga takos sa paghinulsol,” nga buhaton nato ang mga gisugo sa Diyos, isalikway ang bakak nga relihiyon, ug itumong ang atong kasingkasing nga diretso ngadto kang Jehova aron sa pag-alagad diha kaniya lamang. (Buhat 26:20; Deuteronomio 30:2, 8, 10; 1 Samuel 7:3) Kini nagkinahanglag “usa ka bag-ong kasingkasing ug usa ka bag-ong espiritu,” alang sa nausab nga panghunahuna, disposisyon, ug tumong sa kinabuhi. (Ezekiel 18:31) Ang mosangpot nga bag-ong personalidad maoy mopuli sa dili-diyosnong kinaiya uban sa diyosnong mga hiyas. (Colosas 3:5-14) Oo, ang matuod nga paghinulsol sa pagkatinuod mopahinabo sa usa nga “mobalik.”—Buhat 3:19.
18. Nganong mohimog pagpahinungod ngadto sa Diyos diha sa pag-ampo, ug unsay kahulogan niining lakanga?
18 Ang pagpahinungod ngadto sa Diyos diha sa pag-ampo kinahanglang magauna sa bawtismo. (Itandi ang Lucas 3:21, 22.) Ang pagpahinungod nagkahulogan nga magpahilain alang sa usa ka sagradong katuyoan. Hinungdanon kaayo kining lakanga nga angay natong ipahayag ngadto sa Diyos diha sa pag-ampo ang atong desisyon nga hatagan siya ug eksklusibong debosyon ug mag-alagad kaniya sa walay kataposan. (Deuteronomio 5:8, 9; 1 Cronicas 29:10-13) Siyempre, ang atong pagpahinungod dili alang sa usa ka trabaho kondili alang sa Diyos mismo. Kanang puntoha gipatin-aw diha sa paglubong sa unang presidente sa Watch Tower Society, nga si Charles Taze Russell. Niadtong higayona sa 1916, ang sekretaryo-tresurero sa Sosyedad, nga si W. E. Van Amburgh, miingon: “Kining dako tibuok-yutang buluhaton dili trabaho sa usa ka tawo lamang. Kini labi pa gayod ka dako alang niana. Kini maoy buluhaton sa Diyos ug kini dili mausab. Ang Diyos migamit ug daghang mga alagad sa miagi ug Siya sa walay duhaduha mogamit ug daghan usab sa umaabot. Ang atong konsagrasyon [pagpahinungod] dili maoy alang sa usa ka tawo, o sa buluhaton sa usa ka tawo, kondili maoy alang sa pagbuhat sa kabubut-on sa Diyos, ingon nga ipadayag Niya kini nganhi kanato pinaagi sa Iyang Pulong ug sa langitnong mga pagtultol. Ang Diyos sa gihapon ang nagapaigo.” Apan unsa pa ang kinahanglang buhaton mahitungod sa atong pagpahinungod sa Diyos?
19. (a) Sa unsang paagi ang indibiduwal nagahatag ug publikong pamatuod sa pagpahinungod ngadto kang Jehova? (b) Unsay gisimbolohan sa bawtismo sa tubig?
19 Ang publikong kapadayagan sa pagpahinungod kang Jehova gitagana sa dihang ang usa ka tawo pagabawtismohan. Ang bawtismo maoy simbolo nga nagpaila nga ang tawong igatuslob sa tubig mihimog walay kondisyong pagpahinungod ngadto kang Jehova nga Diyos pinaagi ni Jesu-Kristo. (Itandi ang Mateo 16:24.) Sa dihang ang kandidato sa bawtismo ituslob diha sa tubig ug unya haw-ason gikan niana, siya namatay nga mahulagwayon sa iyang kanhing paagi sa kinabuhi ug gibangon ngadto sa usa ka bag-ong paagi sa kinabuhi, aron sa pagbuhat karon sa kabubut-on sa Diyos sa bug-os. (Itandi ang Roma 6:4-6.) Sa dihang si Jesus gibawtismohan, iyang gitanyag ang iyang kaugalingon ngadto sa iyang langitnong Amahan diha sa usa ka di-kinutohang paagi. (Mateo 3:13-17) Ug ang Kasulatan masubsob nga nagpakita nga ang kuwalipikadong mga magtutuo kinahanglang magpabawtismo. (Buhat 8:13; 16:27-34; 18:8) Busa, aron mahimong usa sa mga Saksi ni Jehova karon, ang usa ka tawo kinahanglang usa ka magtutuo kinsa sa pagkamatuod may pagtuo ug magpabawtismo.—Itandi ang Buhat 8:26-39.
Barog nga Malig-on!
20. Unsa ang pipila ka mga pananglitan sa Bibliya nga nagpamatuod nga kita pagapanalanginan tungod sa pagbarog alang sa hinatag-sa-Diyos nga kagawasan ingong bawtismadong mga Saksi ni Jehova?
20 Kon ikaw nakabarog na nga malig-on alang sa hinatag-sa-Diyos nga kagawasan pinaagi sa pagkahimong usa ka bawtismadong Saksi ni Jehova, siya magapanalangin kanimo sama sa iyang pagpanalangin sa iyang mga alagad kanhi. Pananglitan, gipanalanginan ni Jehova ang tigulang na nga Abraham ug Sarah pinaagi sa usa ka mahadlokon-sa-Diyos nga anak nga lalaki, nga si Isaac. Pinaagi sa pagtuo ang propetang si Moises mipili sa pag-antos sa pagdagmal uban sa katawhan sa Diyos “kay sa pagpahimulos sa lumalabayng kalipay sa pagpakasala, tungod kay iyang giisip ang pasipala [pagkahimong karaang hulagway] ni Kristo [o Dinihogang Usa sa Diyos] ingon nga labi pa ka dakong bahandi kay sa mga bahandi sa Ehipto.” (Hebreohanon 11:24-26) Si Moises nakapribilehiyo sa paggamit kaniya ni Jehova sa pag-agak sa mga Israelinhon gawas sa pagkaulipon sa Ehipto. Dugang pa, tungod kay siya nag-alagad sa Diyos nga matinumanon, siya unya pagabanhawon ug mag-alagad ingong usa sa “mga prinsipe sa tibuok nga yuta” ubos sa mas Dakong Moises, si Jesu-Kristo.—Salmo 45:16; Deuteronomio 18:17-19.
21. Unsang makapadasig nga mga panig-ingnan ang gihatag maylabot sa diyosnong mga babaye sa karaang mga panahon?
21 Ang dedikadong mga alagad sa Diyos karon madasig usab pinaagi sa pagpalandong sa mga babayeng kinsa sa pagkatinuod nahimong gawasnon ug malipayon. Lakip kanila mao ang Moabitang si Ruth, kinsa nakasinati sa kasakit sa pagkabalo ug sa kalipay sa hinatag-sa-Diyos nga kagawasan gikan sa bakak nga relihiyon. Gitalikdan ang iyang katawhan ug ang iyang Diyos, siya nagpabilin sa iyang balo nga ugangang babaye, nga si Naomi. “Bisan asa ikaw moadto ako moadto,” miingon si Ruth, “ug bisan asa ikaw mopalabay sa kagabhion ako adto usab mopalabay sa kagabhion. Ang imong katawhan mahimong akong katawhan, ug ang imong Diyos mahimong akong Diyos.” (Ruth 1:16) Ingong asawa ni Boaz, si Ruth nahimong inahan sa apohan ni David nga si Obed. (Ruth 4:13-17) Aw, gihatagan ni Jehova kining mapaubsanon di-Hudiyong babaye sa “usa ka hingpit nga balos” pinaagi sa pagtugot kaniya nga mahimong usa sa mga kagikanan nga babaye ni Jesus ang Mesiyas! (Ruth 2:12) Pagkamalipayon unya ni Ruth sa dihang siya pagabanhawon ug masayod nga siya aduna niana nga pribilehiyo! Ang susama nga kalipay sa walay duhaduha magpuno sa mga kasingkasing sa mabanhaw nga bigaon kanhi nga si Rahab, kinsa nahigawas gikan sa imoralidad ug sa bakak nga pagsimba, maingon man sa nakasala apan mahinulsolong si Bathseba, kay sila usab mahibalo nga si Jehova nagtugot kanila nga mahimong kagikanan nga mga babaye ni Jesu-Kristo.—Mateo 1:1-6, 16.
22. Unsay pagahisgotan sa sunod nga artikulo?
22 Ang paghisgot bahin sa mga umalambit sa hinatag-sa-Diyos nga kagawasan dili-matapos. Pananglitan, ang ilang gidaghanon naglakip sa mga lalaki ug mga babaye nga may pagtuo nga gihisgotan diha sa Hebreohanon kapitulo 11. Ilang giantos ang kasakitan ug mga pagdagmal, “ug ang kalibotan dili takos kanila.” Idugang sa ilang gidaghanon mao ang maunongon unang-siglong mga sumusunod ni Kristo ug ubang mga matinumanon sukad niadto, lakip sa minilyon karong nagaalagad kang Jehova ingong iyang mga Saksi. Ingon sa atong sunod nga makita, kon ikaw nagabarog duyog kanila alang sa hinatag-sa-Diyos nga kagawasan, ikaw dunay daghang mga katarongan nga magmalipayon.
Unsaon Nimo Pagtubag?
◻ Unsa nga paglaom ang gitanyag sa Diyos sa dihang nawala ang hinatag-sa-Diyos nga kagawasan?
◻ Gikan sa unsang “yugo sa pagkaulipon” nga gipagawas ni Kristo ang iyang mga sumusunod?
◻ Unsang mga lakang ang pagahimoon sa dili pa ang bawtismo ingong usa sa mga Saksi ni Jehova?
◻ Unsang mga pananglitan sa Bibliya nga nagpamatuod nga kita pagapanalanginan tungod sa pagbarog alang sa hinatag-sa-Diyos nga kagawasan?
[Hulagway sa panid 16]
Nasayod ka ba kon unsang mga lakang ang pagahimoon sa dili pa ang bawtismo ingong usa sa mga Saksi ni Jehova?