Unsay Gikinahanglan Aron Magmalipayon

SI Jehova, ang “malipayong Diyos,” ug si Jesu-Kristo, ang “malipayon ug bugtong Magmamando,” mao ang labing nahibalo sa tanan kon unsay makahatag ug kalipay. (1 Timoteo 1:11; 6:15) Busa, dili ikahibulong nga ang yawi sa kalipay makaplagan diha sa Pulong sa Diyos, ang Bibliya.—Pinadayag 1:3; 22:7.

Diha sa iyang gibantog nga Wali sa Bukid, gibatbat ni Jesus kon unsay gikinahanglan aron magmalipayon. Siya miingon: “Malipayon kadtong” (1) mahunahunaon sa ilang espirituwal nga panginahanglan, (2) nagbangotan, (3) malumog-buot, (4) gigutom ug giuhaw sa pagkamatarong, (5) maluluy-on, (6) putli sa kasingkasing, (7) makigdaiton, (8) ginalutos tungod sa pagkamatarong, ug (9) pakaulawan ug pagalutoson tungod kaniya.—Mateo 5:3-11.a

Tukma ba ang mga Pulong ni Jesus?

Dili na kinahanglang isaysay pa kon unsa ka tinuod ang mga pulong ni Jesus. Kinsay makapangulipas nga ang malumog-buot, maluluy-on, ug makigdaiton nga tawo nga gipalihok sa usa ka putli nga kasingkasing mas malipayon kay sa masuk-anon, palaaway, dili-maluluy-on nga tawo?

Apan, tingali kita mahibulong kon sa unsang paagi ang mga tawo nga gigutom ug giuhaw sa pagkamatarong o nagbangotan matawag nga malipayon. Kining maong mga indibiduwal dunay realistikanhon nga panglantaw sa mga kahimtang sa kalibotan. Sila “nagapanghupaw ug nagaagulo tungod sa tanang dulumtanang mga butang nga ginahimo” sa atong adlaw. (Ezequiel 9:4) Kana mismo dili makahatag kanila ug kalipay. Apan, sa dihang sila mahibalo sa katuyoan sa Diyos nga ipasig-uli ang matarong nga mga kahimtang sa yuta ug ang hustisya ngadto sa mga gidaogdaog, ang ilang kalipay dili matukib.—Isaias 11:4.

Tungod usab sa ilang paghigugma sa pagkamatarong, kini nga mga indibiduwal maguol sa ilang kapakyasan sa pagbuhat sa kon unsa ang matarong. Busa sila mahunahunaon sa ilang espirituwal nga panginahanglan. Kining mga tawhana andam nga modangop sa Diyos alang sa giya tungod kay sila nahibalo nga siya lamang ang makatabang sa mga tawo sa pagbuntog sa ilang mga kahuyangon.—Proverbio 16:3, 9; 20:24.

Ang mga tawo nga nagbangotan, gigutom ug giuhaw sa pagkamatarong, ug mahunahunaon sa ilang espirituwal nga mga panginahanglan nahibalo nga hinungdanon ang pagbaton ug maayong relasyon uban sa Maglalalang. Ang maayong relasyon uban sa mga tawo makapalipay, apan labaw nang makapalipay ang maayong relasyon uban sa Diyos. Oo, ang seryoso-ug-panghunahuna nga mga mahigugmaon sa matarong, kinsa andam modawat sa paggiya sa Diyos, matawag gayod nga malipayon.

Apan, tingali dili ka makatuo nga mahimong magmalipayon ang tawo nga gilutos ug gibiaybiay. Apan, tinuod gayod kana, kay gisulti man kana mismo ni Jesus. Busa, unsay buot ipasabot sa iyang mga pulong?

Ginalutos Apan Malipayon—Sa Unsang Paagi?

Matikdi nga si Jesus wala mag-ingon nga ang pagbiaybiay ug paglutos makahatag ug kalipay. Siya miingon: “Malipayon kadtong ginalutos tungod sa pagkamatarong, . . . sa dihang pakaulawan kamo sa mga tawo ug pagalutoson kamo . . . tungod kanako.” (Mateo 5:10, 11) Busa ang kalipay mabatonan lamang kon ang tawo nag-antos sa pagbiaybiay tungod sa pagkahimong sumusunod ni Kristo ug tungod sa pagsubay sa matarong nga mga prinsipyo nga gitudlo ni Jesus.

Giilustrar kini sa nahitabo sa unang mga Kristohanon. Ang mga membro sa Sanhedrin, nga hataas nga hukmanang Hudiyohanon, ‘nagpatawag sa mga apostoles, nagbunal kanila, ug nagmando kanila sa paghunong na sa pagsulti pinasukad sa ngalan ni Jesus, ug nagbuhi kanila.’ Unsay reaksiyon sa mga apostoles? “Busa, sila milakaw gikan sa atubangan sa Sanhedrin, nga nagmaya tungod kay giisip sila nga takos pakaulawan tungod sa iyang ngalan. Ug matag adlaw diha sa templo ug sa balay ug balay sila wala mohunong sa pagpanudlo ug sa pagpahayag sa maayong balita bahin kang Kristo, si Jesus.”—Buhat 5:40-42; 13:50-52.

Si apostol Pedro naghatag ug dugang katin-awan sa koneksiyon sa pagbiaybiay ug sa kalipay. Siya nagsulat: “Kon kamo gipakaulawan tungod sa ngalan ni Kristo, kamo malipayon, tungod kay ang espiritu sa himaya, bisan ang espiritu sa Diyos, anaa kaninyo.” (1 Pedro 4:14) Oo, ang pag-antos ingong Kristohanon tungod sa pagbuhat sa matarong, bisan pag ang pag-antos dili maayo, makahatag ug kalipay nga maoy resulta sa pagkahibalo nga ang usa makadawat sa balaang espiritu sa Diyos. Sa unsang paagi ang espiritu sa Diyos nalangkit sa kalipay?

Mga Buhat ba sa Unod o Bunga sa Espiritu?

Ang balaang espiritu sa Diyos mabatonan lamang sa mga tawo nga nagsugot sa Diyos ingong magmamando. (Buhat 5:32) Si Jehova dili mohatag sa iyang espiritu ngadto sa mga tawo nga nagabatasan sa “mga buhat sa unod.” Kini nga mga buhat mao ang “pakighilawas, kahugawan, malaw-ayng panggawi, idolatriya, pagbuhat sa espiritismo, mga pagdumtanay, panag-away, pangabugho, mga pagsinta sa kasuko, mga pakigtigi, mga pagkabahinbahin, mga sekta, mga kasina, mga paghuboghubog, mga hudyaka, ug mga butang nga sama niini.” (Galacia 5:19-21) Tinuod, komon na niining kalibotan karon ang “mga buhat sa unod.” Bisan pa niana, kadtong nagabuhat niini dili makatagamtam ug tinuod ug malungtarong kalipay. Hinunoa, ang pagbuhat nianang mga butanga makadaot sa maayong relasyon sa mga paryente, mga higala, ug mga kaila. Dugang pa, ang Pulong sa Diyos nag-ingon nga kadtong “nagabuhat sa maong mga butang dili makapanunod sa Gingharian sa Diyos.”

Sa kasukwahi, ang Diyos mohatag sa iyang espiritu ngadto sa mga tawo nga nagaugmad sa “bunga sa espiritu.” Ang mga hiyas nga naglangkob niini nga bunga mao ang “gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, pagpugong-sa-kaugalingon.” (Galacia 5:22, 23) Kon atong ipasundayag kining mga hiyasa, kita makapatungha ug mga kahimtang aron mahuptan ang makigdaiton nga mga relasyon sa uban ug sa Diyos, nga mobunga ug tinuod nga kalipay. (Tan-awa ang kahon.) Labawng hinungdanon, pinaagi sa pagpakitag gugma, kalulot, pagkamaayo, ug ubang diyosnong mga hiyas, atong mapahimut-an si Jehova ug makabaton ug malipayong paglaom nga kinabuhing walay kataposan diha sa bag-ong kalibotan sa Diyos sa pagkamatarong.

Ang Kalipay Maoy Usa ka Desisyon

Sa dihang si Wolfgang ug Brigitte, usa ka magtiayon nga nagpuyo sa Alemanya, nagsugod sa matinud-anong pagtuon sa Bibliya, daghan kaayo sila ug materyal nga mga butang nga gituohan sa mga tawo nga makahatag ug kalipay. Sila batan-on ug maayog panglawas. Mahalon ang ilang mga besti, nagpuyo sila sa matahom nga pagkaadorno nga balay, ug dunay malamposon nga negosyo. Ang kadaghanan sa ilang panahon gigugol sa pagpangagpas ug daghan pang materyal nga mga butang, apan wala kana makahatag kanila ug tinuod nga kalipay. Apan, sa ulahi si Wolfgang ug si Brigitte mihimo ug hinungdanon kaayo nga desisyon. Sila nagsugod sa paggugol ug dugang panahon ug paningkamot sa pagpangagpas sa espirituwal nga mga butang ug nangitag mga paagi aron masuod pa kang Jehova. Ang ilang desisyon sa ulahi nakapabag-o sa ilang tinamdan, nga sa baylo, nagpalihok kanila sa pagpayano sa ilang kinabuhi ug sa pag-alagad ingong mga payunir, o bug-os-panahong mga magwawali sa Gingharian. Karon, sila nag-alagad ingong mga boluntaryo sa sangang buhatan sa mga Saksi ni Jehova sa Alemanya. Dugang pa, sila nagtuon ug pinulongan sa Asia aron makatabang sa mga langyaw nga makahibalo sa kamatuoran nga makita diha sa Pulong sa Diyos, ang Bibliya.

Nakaplagan ba niining magtiayona ang tinuod nga kalipay? Si Wolfgang miingon: “Sukad nga mas puliki kami sa pagpangagpas sa espirituwal nga mga butang, kami mas malipayon ug mas matagbawon. Ang pag-alagad kang Jehova sa bug-os-kasingkasing nakapalig-on usab sa among kaminyoon. Malipayon ang among kaminyoon kaniadto, apan may mga obligasyon ug mga interes kami nga nagbutad kanamo sa magkalahi nga mga direksiyon. Karon kami hiusang nangagpas sa usa ra ka tumong.”

Unsay Gikinahanglan Aron Magmalipayon?

Sa laktod: Likayi ang “mga buhat sa unod,” ug ugmara ang “bunga sa espiritu” sa Diyos. Aron magmalipayon, kinahanglang pangandoyon sa usa ang suod nga relasyon uban sa Diyos. Ang tawo nga maningkamot sa pagkab-ot niini mohaom sa hubit ni Jesus bahin sa usa ka malipayong tawo.

Busa, ayaw pagbaton ug sayop nga panghunahuna nga ang kalipay dili nimo maabot. Tinuod, sa pagkakaron tingali dili maayo ang imong panglawas o tingali ikaw dunay problema sa imong kaminyoon. Tingali dili ka na posibleng makabaton pa ug mga anak, o tingali naningkamot ka sa pagpangitag malamposong karera. Lagmit wala ka na kaayoy kuwarta kay sa kaniadto. Bisan pa niana, magmaisog; ikaw walay katarongan nga maguol! Sulbaron sa pagmando sa Gingharian sa Diyos kining maong mga problemaha ug gatosan pang mga problema. Sa pagkatinuod, tumanon ni Jehova nga Diyos sa dili madugay ang iyang saad nga gipahayag pinaagi sa salmista: “Ang imong pagkahari maoy pagkahari hangtod sa tanang panahong walay tino . . . Imong gibukhad ang imong kamot ug ginatagbaw ang tinguha sa tanang buhing butang.” (Salmo 145:13, 16) Ang minilyong mga alagad ni Jehova sa tibuok kalibotan makapamatuod nga ang pagsilsil diha sa hunahuna niining makapahupayng saad ni Jehova makahatag ug dakong kalipay kanimo karon.—Pinadayag 21:3.

[Footnote]

[Kahon/Hulagway sa panid 6]

Mga Butang nga Makahatag ug Kalipay

Ang gugma magpalihok sa uban sa paghigugma usab kanimo.

Ang kalipay mohatag kanimo ug kalig-on sa pagsagubang sa mga problema.

Ang pakigdait motabang kanimo nga dili makig-away sa uban.

Ang hataas-nga-pailob maghimo kanimo nga kanunayng malipayon bisan ikaw ginasulayan.

Ang kalulot maghimo kanimo nga madanihon sa uban.

Ang imong pagkamaayo magpalihok sa uban sa pagtabang kanimo kon magkinahanglan ka niini.

Ang pagtuo magpasalig kanimo sa mahigugmaong pagtultol sa Diyos.

Ang kalumo maghatag kanimo ug kalmado nga kasingkasing, hunahuna, ug lawas.

Ang pagpugong-sa-kaugalingon magkahulogan nga mas menos ang imong mahimo nga mga sayop.

[Mga hulagway sa panid 7]

Aron magmalipayon, kinahanglang imong tagan-an ang imong espirituwal nga mga panginahanglan