Gikan sa Among mga Magbabasa

Dagatonon Ako diyes anyos ug buot ko kamong pasalamatan sa bahin nga “Dagatonon” diha sa “Pagpaniid sa Kalibotan.” (Enero 22, 1996) Akong gisulayan ang mga sugyot diha sa artikulo, ug kini misaler! Palihog padayon sa pagpatik sa maong mga artikulo.

J. C. S., Brazil

Pag-ungaw sa Kamatayon Ako nagsulat mahitungod sa artikulong “Mga Doktor Nakakat-on Gikan sa Akong Pag-ungaw sa Kamatayon.” (Disyembre 22, 1995) Dili ba ang erythropoietin nga gisagolan ug diyutayng porsiyento sa albumin, usa ka protina sa dugo?

R. P., Tinipong Bansa

Sa pipila ka kahimtang, oo, ug ang matag Kristohanon kinahanglang personal nga mohukom kon kaha modawat o dili ug mga tambal nga adunay diyutayng albumin. Alang sa detalyadong panaghisgot, palihog tan-awa ang “Mga Pangutana Gikan sa mga Magbabasa” sa Oktubre 1, 1994, ug Hunyo 1, 1990, mga isyu sa “Ang Bantayanang Torre.”​—ED.

Linog Akong gibasa ang artikulong “Ang Kalit nga Katalagman sa Hapon​—Giunsa Pagsagubang sa Katawhan.” (Agosto 22, 1995) Ako nahibulong kon nganong sa mga Saksi lamang kamo nanghatag ug hinabang? Ang usa maghunahuna nga ang mga Saksi parehong magpakitag gugma ngadto sa mga Saksi ug mga dili-Saksi.

V. C. E., Nigeria

Sa pagkatinuod, daghang dili-Saksi ang natabangan. Kasagaran, ang pag-apod-apod sa mga suplay sa hinabang pinaagi sa mga kongregasyon sa mga Saksi ni Jehova napamatud-ang labing dali nga paagi sa pagpaabot sa mga abiyo ngadto sa mga nanginahanglan. Sa usa ka kaso duha ka van nga puno sa mga abiyo sa pagkaon ang gipadala ngadto sa usa ka lokal nga sentro sa mga kagiw. Daghang susamang mga pananglitan ang mahimong hisgotan. Natural, unahon sa mga Saksi ang mga membro sa kongregasyon, sanglit sa Bibliya kami gitambagan: “Buhaton ang maayo ngadto sa tanan, apan ilabina kanilang iglabot nato sa pagtuo.” (Galacia 6:10)​—ED.

Indigay sa mga Esport Ang inyong artikulong “Daotan ba ang Indigay sa mga Esport?” (Disyembre 8, 1995) nakapalibog kaayo kanako, tungod kay migamit kini sa Galacia 5:26. Unsay kalabotan sa basahon sa Galacia sa mga esport ug mga dula? Si Pablo naghisgot mahitungod sa espiritu batok sa unod ug sa kagawasan batok sa pagkaulipon. Ang King James Version naghubad sa maong bersikulo: “Dili kita magmatinguhaon sa kawang nga himaya, nga magpasuko sa usag usa.”

P. O., Tinipong Bansa

Tinuod nga ang apostol sa espesipikong paagi wala maghunahuna sa atletikong indigay sa dihang gisulat niya kadtong mga pulonga. Apan, ang pipila ka Kristohanon dayag nga naghimog dili-makataronganong mga pagtandiay sa usag usa. Kini nagpatungha sa ‘unodnon’ nga mga tinamdan sama sa ‘panagdumtanay, panag-away, pangabugho, mga pakigtigi, ug mga panagkabahin.’ (Galacia 5:20, 21; 6:​3, 4) Busa si Pablo nagpasidaan sa mga Kristohanon nga dili “magaaghat ug panag-indigay sa usag usa.” Sumala sa “The New Thayer’s Greek-English Lexicon,” ang Gregong pulong nga gihubad ug “indigay” nagkahulogang “manghagit ug sambunot o lumba sa usa ka tawo.” Kining prinsipyoha tinong mapadapat sa mga kalihokan sa mga esport o sa bisan unsang kalihokan nga makapahinabo sa usa ka Kristohanon sa pag-indigay sa usag usa diha sa dili-maayong paagi.​—ED.

Kawalay-Interes sa Pagbasa Akong nabasa ang artikulong “Pagbantay Batok sa Kawalay-Interes sa Pagbasa” (Enero 22, 1996) ug nalingaw kaayo niana nga ako natukmod sa pagsulat ug pagpasalamat kaninyo tungod sa impormatibong basahon nga inyong gitagana. Ang pagbasa naghatag kanatog kahigayonan nga makaila sa Maglalalang sa uniberso pinaagi sa iyang bililhong Pulong, ang Bibliya. Busa adunay koneksiyon tali sa espirituwal nga kaluya ug sa kawalay-interes sa pagbasa.

R. R., Tinipong Bansa

Bisan tuod ako usa ka bawtismadong Kristohanon sulod sa 28 ka tuig ug usa ka regular nga magbabasa sa mga publikasyon sa Sosyedad, ako mag-unya-unya ug akong gibati nga ako nawad-ag gana sa pagbasa. Ang inyong artikulo nagpaila sa akong suliran! Ang inyong pangatarongan niining ulohana nag-aghat kanakong mobasa aron mabenepisyohan ang akong kaugalingon.

A. O., Canada