Tagamtama ang Katagbawan Pinaagi sa Pagpadapat sa mga Prinsipyo sa Bibliya

SA WALAY duhaduha nakakita ka na ug iring nga nagluko ug nagdaguok—usa ka talan-awon sa dayag nga katagbawan. Pagkanindot nga maanaa sa iyang kahimtang ug magtagamtam sa samang katagbawan! Apan, alang sa daghan ang katagbawan lisod matagamtam, ug kini lumalabay lamang. Nganong ingon man niini?

Tungod kay kita subsob nga masayop tungod sa atong pagkadili-hingpit, ug kinahanglang antoson usab nato ang mga kasaypanan sa uban. Dugang pa, kita nagkinabuhi sa yugto sa panahon nga gitawag sa Bibliya ug “kataposang mga adlaw,” nga gitiman-an sa “makuyaw nga mga panahong lisod sagubangon.” (2 Timoteo 3:1-5) Bisan pag kita mibatig katagbawan sa mga bata pa kita, kadaghanan kanato karon nakaagom sa hilabihang kapit-os tungod niining ‘makuyaw nga mga panahon.’ Posible ba nga makatagamtam ug katagbawan niining panahona?

Matikdi nga ang Kasulatan nag-ingon nga kining makuyaw nga mga panahon, dili imposibleng sagubangon, kondili lisod sagubangon. Masagubang nato kana pinaagi sa pagpadapat sa mga prinsipyo sa Bibliya. Tingali dili nato kanunayng masulbad ang atong mga problema, apan kita makatagamtam ug usa ka sukod sa katagbawan. Susihon nato ang tulo nianang maong mga prinsipyo.

Hupti ang Realistikong Panglantaw

Aron makatagamtam ug katagbawan, kinahanglang huptan nato ang realistikong panglantaw sa atong kaugalingong mga limitasyon ug nianang sa uban. Sa iyang sulat ngadto sa mga taga-Roma, si apostol Pablo nag-ingon: “Ang tanan nakasala ug wala makaabot sa himaya sa Diyos.” (Roma 3:23) Daghang bahin sa himaya ni Jehova ang dili gayod nato masabtan. Ang usa ka pananglitan mao ang yanong kamatuoran nga giingon sa Genesis 1:31: “Nakita sa Diyos ang tanan nga iyang gibuhat ug, tan-awa! kadto maayo kaayo.” Bisan kanus-a nga gustong hinumdoman ni Jehova ang iyang nabuhat, siya kanunayng makaingon nga “kadto maayo kaayo.” Walay tawo nga kanunayng makapangangkon niana. Ang pag-ila sa atong mga limitasyon mao ang unang lakang sa pagbaton ug katagbawan. Apan, adunay laing gikinahanglan. Kinahanglan nga atong masabtan ug dawaton ang panglantaw ni Jehova sa mga butang.

Ang Gregong pulong nga gihubad ug “sala” naggikan sa lintunganayng pulong nga nagkahulogang “nasipyat sa marka.” (Roma 3:9, potnot sa New World Translation—With References) Sa pag-ilustrar: Handurawa ang usa ka tawo nga nagdahom nga makadaog ug ganti pinaagi sa pag-igo sa target ginamit ang pana. Duna siyay tulo ka pana. Iyang gitira ang una ug nasipyat siyag usa ka metros. Maarang-arang ang iyang pagtira sa ikaduhang pana apan nasipyat gihapon siya ug 30 sentimetros. Nga gitutokan pag-ayo ang target, iyang gitira ang kataposang pana ug nasipyat siya ug usa lang ka pulgada. Diriyot na niyang maigo ang target, apan nasipyat gihapon siya.

Kitang tanan nahisama nianang nahigawad nga magpapana. Usahay morag dako ang atong ‘pagkasipyat sa marka.’ May mga panahon nga gamay na lang unta ug kulang maigo na nato ang marka apan nasipyat gihapon kita. Nahigawad kita tungod kay kita naningkamot pag-ayo, apan dili pa gayod kadto igo. Karon, hisgotan nato pag-usab ang magpapana.

Hinayhinay siyang mitalikod, nga nasubo tungod kay gusto gayod niyang makuha ang maong premyo. Sa wala damha, gitawag siya sa tagdumala sa indigay ug gitunol kaniya ang premyo, nga nag-ingon: “Gusto nakong ihatag kini kanimo tungod kay nakaangay ako kanimo, ug nakita nako nga naningkamot ka gayod pag-ayo.” Nalipay kaayo ang magpapana!

Pagkadako sa iyang kalipay! Ingon niana ang bation ni bisan kinsa nga makadawat sa “gasa” gikan sa Diyos nga kinabuhing walay kataposan diha sa kahingpitan. (Roma 6:23) Human niana, ang tanan nga ilang buhaton maayo na—dili na gayod sila masipyat pa sa marka. Sila makatagamtam na ug bug-os nga katagbawan. Sa kasamtangan, kon atong huptan kining maong panglantaw, moarang-arang ang atong paghunahuna sa atong kaugalingon ug niadtong anaa sa atong palibot.

Ilha nga ang mga Butang Nagkinahanglag Panahon

Tinuod gayod nga ang tanan nagkinahanglan ug panahon. Apan, namatikdan ba nimo kon unsa ka lisod nga mobatig katagbawan sa dihang ang imong gipaabot morag mas dugayng miabot kay sa gidahom o sa dihang ang dili-maayong kahimtang morag dugay kaayong nawala kay sa imong gidahom? Bisan pa niana, ang uban nagmatagbawon gihapon sa maong mga kahimtang. Tagda ang panig-ingnan ni Jesus.

Sa wala pa moanhi sa yuta, si Jesus maoy sumbanan sa pagkamasinugtanon didto sa langit. Apan, dinhi sa yuta nga siya ‘nakakat-on sa pagkamasinugtanon.’ Sa unsang paagi? “Gikan sa mga butang nga iyang giantos.” Sa didto pa sa langit, iyang nakita ang pag-antos apan wala pa gayod niya kini maeksperyensiyahi. Sa dinhi na sa yuta, ilabina sukad sa pagbawtismo kaniya didto sa Jordan hangtod sa iyang kamatayon sa Golgotha, siya nakaagom ug daghang kalisdanan. Wala kita masayod sa tanang detalye kon sa unsang paagi si Jesus ‘nahingpit’ niining bahina, apan nasayod kita nga kana nagkinahanglag panahon.—Hebreohanon 5:8, 9.

Si Jesus milampos tungod kay siya namalandong “sa kalipay nga gibutang sa iyang atubangan,” ang ganti sa iyang pagkamatinumanon. (Hebreohanon 12:2) Bisan pa niana, may mga panahon nga siya “naghimog mga pangamuyo ug mga pangaliya . . . uban ang makusog nga mga pagtuaw ug mga luha.” (Hebreohanon 5:7) Usahay mag-ampo tingali kita ug sama niana. Unsay panglantaw ni Jehova niini? Ang mao gihapong bersikulo nagpakita nga gipatalinghogan ni Jehova si Jesus nga “may pag-uyon.” Patalinghogan usab kita sa Diyos. Ngano man?

Tungod kay si Jehova nahibalo sa atong mga limitasyon, ug siya motabang kanato. Ang tanan adunay limitasyon kon asa kutob ang iyang maantos. Ang mga tawo sa Benin, Aprika, moingon: “Ang mga baki sa ngadtongadto malumos ra kon sobra ka daghan ang tubig.” Si Jehova mas nahibalo kay kanato kon asa kutob ang atong mga limitasyon. Siya mahigugmaong magpakita ug “kaluoy ug . . . dili-takos nga kalulot ingong tabang sa hustong panahon.” (Hebreohanon 4:16) Gihimo niya kini para kang Jesus, ug gihimo niya kini alang sa daghan pa. Tagda kon sa unsang paagi naeksperyensiyahan kini ni Monika.

Si Monika nagdako nga wala kaayoy mga problema, lagsik, ug malipayon. Sa 1968, sa dihang siya kapin pa lang sa 20 anyos, siya nakurat sa pagkahibalo nga siya adunay multiple sclerosis, usa ka sakit nga subsob mosangpot sa pagkaparalisar sa usa ka bahin sa lawas. Kini bug-os nga nag-usab sa iyang kinabuhi ug nagkinahanglan ug dagkong kausaban diha sa iyang bug-os-panahong ministeryo. Naamgohan ni Monika nga kini maoy usa ka laygay nga sakit. Napulog-unom ka tuig sa ulahi, siya miingon: “Ang akong sakit wala gihapoy kaayohan ug lagmit dili na gayod maayo pa hangtod ang bag-ong sistema sa mga butang sa Diyos magbag-o sa tanang butang.” Siya miangkon nga dili sayon ang iyang kahimtang: “Bisan tuod ang akong mga higala moingon nga ako malipayon ug masanagon gihapon ug panglantaw, . . . ang akong kinasuorang mga higala nahibalo nga usahay ako mohilak pag-ayo.”

Apan, siya miingon: “Ako nakakat-on sa pagpailob ug sa pagmaya bisan sa kinagamyang timailhan nga miarang-arang ang akong panglawas. Ang akong personal nga relasyon kang Jehova napalig-on sa akong pagkaamgo nga ang tawo wala gayoy mahimo sa iyang pagpakigbugno batok sa sakit. Si Jehova lamang ang makapahinabo ug bug-os nga pagkaayo.” Sa tabang ni Jehova, nahuptan ni Monika ang katagbawan ug karon mahandom niya ang kapin sa 40 ka tuig nga bug-os-panahong pag-alagad.

Tinuod, ang mga kahimtang nga sama kang Monika dili sayon sagubangon. Apan segurado nga mas matagbawon ka kon imong ilhon nga ang pipila ka butang nagkinahanglan tingali ug taas-taas nga panahon kay sa imong gidahom. Sama kang Monika, makaseguro ka usab sa ‘tabang ni Jehova sa tukmang panahon.’

Ayaw Pagtandi-tandi—Paghimo ug Makataronganong mga Tumong

Ikaw talagsaon gayod. Walay usa nga sama gayod kanimo. Usa ka panultihon sa Aprikanhong Gun nga pinulongan nagpahayag niining maong kamatuoran sa yanong paagi: “Ang mga tudlo dili managsamag gitas-on.” Usa ka kabuangan nga itandi ang usa ka tudlo sa lain. Dili nimo gusto nga itandi ka ni Jehova sa laing tawo, ug dili gayod niya buhaton kana. Apan, taliwala sa mga tawo ang kiling sa pagtandi-tandi kasagaran kaayo ug makaiban sa katagbawan sa usa. Matikdi kon unsa ka epektibo ang pag-ilustrar niini ni Jesus, samtang atong basahon ang Mateo 20:1-16.

Si Jesus naghisgot sa usa ka “agalon” nga nangitag mga mamumuo sa iyang parasan. Nakakita siyag mga tawo nga walay trabaho ug gipatrabaho sila ‘sayo sa buntag,’ lagmit sa alas 6:00 s.b. Sila miuyon sa naandan nga inadlawng suhol niadtong panahona, usa ka denario alang sa 12-oras nga trabaho. Sa walay duhaduha ang mga tawo nalipay nga nakakita ug trabaho sa naandang suhol. Sa ulahi, ang agalon nakakita ug laing mga grupo sa mga tawo nga walay trabaho ug gipatrabaho sila—sa alas 9:00 s.b., alas 12:00 sa udto, alas 3:00 s.h., ug bisan sa alas 5:00 s.h. Walay usa niining mga grupoha ang nagtrabaho ug entero adlaw. Kon bahin sa suhol, gisaaran sila sa agalon nga hatagan “kon unsa ang nahiangay,” ug ang mga mamumuo miuyon.

Pagkilumkilom na, gisugo sa agalon ang iyang tagdumala nga manuhol na. Iyang giingnan ang tagdumala nga tawgon ang mga mamumuo ug unahon pagsuhol kadtong kinaulahiang gipatrabaho. Sila nakatrabaho lamang ug usa ka oras, apan katingad-an nga sila nakadawat ug suhol nga para sa entero adlaw nga trabaho. Atong mahanduraw kon unsa ka init ang ilang diskusyon. Kadtong nagtrabaho ug 12-oras naghunahuna nga makadawat silag labaw pa. Apan, sila nakadawat sa mao ra gihapong kantidad.

Unsa may ilang reaksiyon? “Sa pagkadawat niini sila nagbagulbol batok sa tagbalay ug miingon, ‘Kining mga naulahi nagtrabahog usa ka takna; bisan pa niana gihimo mo silang tumbas kanamo nga maoy nag-abaga sa kabug-at sa tibuok adlaw ug sa naglagiting nga kainit!’”

Apan, ang agalon lahi ug panglantaw sa maong situwasyon. Iyang gipunting nga sila nakadawat sa ilang giuyonan nga madawat, wala kana menosi. Kon bahin sa uban, nakahukom siya sa paghatag kanila sa suhol nga para sa entero adlaw, sa walay duhaduha labaw kay sa ilang gidahom. Sa pagkatinuod, walay usa nga nakadawat ug menos kay sa gikasabotan; gani, daghan ang nakadawat ug labaw pa kay sa ilang gidahom. Busa agig konklusyon, ang agalon misukna: “Dili ba diay subay sa balaod nga akong buhaton ang buot ko sa akong kaugalingong mga butang?”

Karon handurawa kon giuna pagsuhol sa tagdumala ang unang grupo ug sila nanglakaw dayon. Makontento ra unta sila. Ang pagkadiskontento mitungha lamang sa dihang ilang nakita nga ang uban nakadawat sa samang suhol bisan pag kadiyot rang nagtrabaho. Tungod niini, sila nangasuko, nga nagbagulbol pa gani batok sa agalon, ang usa nga takos unta nilang pasalamatan ug dako tungod kay siya naghatag kanila ug trabaho.

Kini nag-ilustrar kon unsay mahitabo kon kita magtandi-tandi. Kon ikaw mamalandong sa imong personal nga relasyon kang Jehova ug magmapasalamaton sa iyang pagpanalangin kanimo, ikaw magmatagbawon. Ayawg itandi ang imong kahimtang sa uban. Kon si Jehova nakahukom sa paghatag ug dugang panalangin sa uban, magmalipayon alang kanila ug duyog sa ilang kalipay.

Apan, dunay gidahom si Jehova kanimo. Unsa man kana? Ang Galacia 6:4 nag-ingon: “Pasulaya ang matag usa sa iyang kaugalingong binuhatan, ug niana siya may hinungdan sa pagsadya labot sa iyang kaugalingon lamang, ug dili sa pagtandi sa laing tawo.” Sa ato pa, paghimog makataronganong mga tumong para sa imong kaugalingon. Planoha kon unsay imong maarangang buhaton ug buhata kana. Kon ang tumong makataronganon ug makab-ot nimo kini, ikaw may “hinungdan sa pagsadya.” Imong matagamtam ang katagbawan.

Aduna Unyay mga Ganti

Ang tulo ka prinsipyo nga atong nahisgotan nagpakita nga ang pagpadapat sa mga prinsipyo sa Bibliya makatabang gayod kanato nga matagamtam ang katagbawan bisan niining kataposang mga adlaw ug bisan pa sa pagkadili-hingpit. Sa imong adlaw-adlaw nga pagbasa sa Bibliya, nganong dili pangitaon kanang mga prinsipyoha, nga klarong gipahayag o kaha gipasumbingay diha sa mga asoy ug mga ilustrasyon?

Kon gibati nimo nga daw dili ka na kontento, paningkamoti sa pagtino kon unsay tinuod nga hinungdan. Dayon pangitag mga prinsipyo nga mapadapat nimo aron matul-id ang maong situwasyon. Pananglitan, mahimong susihon nimo ang mga panid 110-11 sa librong “Ang Tibuok Kasulatan Dinasig sa Diyos ug Mapuslanon.”a Gihisgotan diha niana ang basahon sa Proverbio, ug imong makaplagan ang nagkalainlaing mga prinsipyo ug tambag nga gilista ilalom sa 12 ka ulohan. Ang The Watch Tower Publications Index* ug ang Watchtower Library sa CD-ROM* maoy maayo kaayong mga tuboran sa impormasyon. Pinaagi sa kanunayng paggamit niana, ikaw mahanas sa pagpangita ug mapadapat nga mga prinsipyo.

Nagsingabot na ang panahon sa dihang ihatag ni Jehova sa mga tawong takos niana ang kinabuhing walay kataposan sa kahingpitan diha sa paraisong yuta. Ang ilang kinabuhi bug-os na unyang matugob sa katagbawan.

[Footnote]

[Blurb sa panid 12]

“Ang tanan nakasala ug wala makaabot sa himaya sa Diyos.”—Roma 3:23

[Blurb sa panid 13]

Si Jesus ‘nakakat-on sa pagkamasinugtanon gikan sa mga butang nga iyang giantos.’—Hebreohanon 5:8, 9

[Blurb sa panid 15]

“Siya may hinungdan sa pagsadya labot sa iyang kaugalingon lamang, ug dili sa pagtandi sa laing tawo.”—Galacia 6:4