Salig sa Atong Aktibong Lider​—Ang Kristo

1, 2. Unsa ang bug-at nga responsibilidad ni Josue human sa kamatayon ni Moises?

MORAG madungog pa ni Josue ang giingon ni Jehova: “Si Moises nga akong alagad patay na; ug karon tindog, tabok niining Jordan, ikaw ug kining tibuok katawhan, ngadto sa yuta nga ihatag ko kanila.” (Jos. 1:1, 2) Dako gyod ning kausaban para kang Josue, nga alagad ni Moises sa halos 40 ka tuig!

² Kay si Moises ang lider sa Israel sa taas kaayong panahon, naghunahuna tingali si Josue kon sundon ba nila ang iyang pagpanguna. (Deut. 34:8, 10-12) Usa ka reperensiya sa Bibliya ang nag-ingon bahin sa Josue 1:1, 2: “Kaniadto ug karon ang pag-ilis ug lider maoy usa sa peligroso kaayong panahon para sa usa ka nasod.”

3, 4. Giunsa nato pagkahibalo nga wala masayop si Josue sa pagsalig sa Diyos, ug unsay atong ikapangutana sa kaugalingon?

³ Lagmit may katarongan si Josue nga mabalaka, pero sulod sa pipila ka adlaw milihok dayon siya. (Jos. 1:9-11) Wala gyod masayop si Josue sa pagsalig Diyos. Sumala sa gipakita sa Bibliya, gigiyahan ni Jehova si Josue ug ang Iyang katawhan, ang Israel, pinaagi sa usa ka anghel. Makataronganon ang paghunahuna nga kini nga anghel mao ang Pulong, ang panganayng Anak sa Diyos.​—Ex. 23:20-23; Juan 1:1.

⁴ Sa tabang ni Jehova, ang Israel nakaadyas sa kausaban sa pagpanguna​—gikan kang Moises ngadto kang Josue. Karon, daghan sab ang dagkong kausaban, ug basin makapangutana ta, ‘Samtang paspas nga nagauswag ang organisasyon sa Diyos, makasalig ba gihapon ta kang Jesus ingong atong Pangulo, o Lider?’ (Basaha ang Mateo 23:10.) Aw, konsiderahon nato kon giunsa pagpanguna ni Jehova ang iyang katawhan kaniadto panahon sa kausaban.

 5. Unsay naeksperyensiyahan ni Josue duol sa Jerico? (Tan-awa ang hulagway sa sinugdan sa artikulo.)

⁵ Wala madugay human motabok ang Israel sa Jordan, may wala damhang eksperyensiya si Josue. Duol sa Jerico, nakasugat siyag tawo nga nagdalag espada. Kay wala mahibalo si Josue kon kinsa kadto, siya nangutana: “Dapig ka ba kanamo o sa among mga kaaway?” Nasorpresa si Josue dihang nagpaila ang maong manggugubat. Siya diay ang “prinsipe [o, pangulo] sa kasundalohan ni Jehova,” kinsa andam manalipod sa katawhan sa Diyos. (Basaha ang Josue 5:13-15.) Bisag giingon sa ubang teksto nga si Jehova direktang nakig-estorya kang Josue, seguradong pinaagi ni sa usa ka anghel, nga sagad niyang gibuhat sa ubang higayon.​—Ex. 3:2-4; Jos. 4:1, 15; 5:2, 9; Buh. 7:38; Gal. 3:19.

6-8. (a) Nganong ang pipila ka instruksiyon ni Jehova morag makapatingala sa tawhanong panglantaw? (b) Nganong makaingon ta nga maalamon ug tukma sa panahon ang maong mga instruksiyon? (Tan-awa usab ang footnote.)

⁶ Ang anghel naghatag kang Josue ug klarong instruksiyon kon unsaon pagsakop ang siyudad sa Jerico. Sa sinugdan, ang pipila ka instruksiyon morag dili maayong estratehiya. Pananglitan, nagsugo si Jehova nga tulion ang tanang lalaki. Magpasabot ni nga dili sila makapakiggubat ug pipila ka adlaw. Mao ba gyod to ang hustong panahon nga tulion ang maong mga lalaki?​—Gen. 34:24, 25; Jos. 5:2, 8.

⁷ Lagmit, naghunahuna ang maong mga sundalo kon unsaon nila pagpanalipod ang ilang pamilya kon sulngon sa mga kaaway ang ilang kampo nga luya na man sila. Apan sa kalit lang, nabalitaan nila nga ang Jerico “tinakpan pag-ayo tungod sa mga anak sa Israel.” (Jos. 6:1) Seguradong napalig-on nianang wala damhang panghitabo ang ilang pagsalig sa giya sa Diyos!

⁸ Dugang pa, giingnan ang mga Israelinhon nga dili nila atakehon ang Jerico. Hinunoa, momartsa sila libot sa siyudad kas-a kada adlaw sulod sa unom ka adlaw ug kapito sa ikapitong adlaw. Tingali may mga sundalong naghunahuna, ‘Usik-usik ra man nâ sa panahon ug hagohago lang!’ Pero ang dili makitang Lider sa Israel nahibalo gyod sa iyang gibuhat. Ang iyang estratehiya nakapalig-on sa pagtuo sa mga Israelinhon ug dili na sila kinahanglang makig-away sa gamhanang kasundalohan sa Jerico.​—Jos. 6:2-5; Heb. 11:30.a

 9. Nganong angay natong sundon ang mga instruksiyon sa organisasyon? Paghatag ug pananglitan.

⁹ Unsay atong makat-onan niini? Usahay, dili nato bug-os masabtan ang mga rason sa bag-ong mga kahikayan sa organisasyon. Pananglitan, sa sinugdan gikuwestiyon tingali nato ang paggamit ug mga gadyet sa personal nga pagtuon, pagsangyaw, ug sa tigom. Karon, lagmit nakita nato ang mga kaayohan sa paggamit niana kon posible. Kon makita nato ang positibong resulta sa maong mga pag-uswag bisan pa sa mga pagduhaduha, molig-on ang atong pagtuo ug mas mahiusa ta.

10. Kinsa gyoy naggiya sa importanteng miting sa nagamandong lawas didto sa Jerusalem?

¹⁰ Mga 13 ka tuig human sa pagkakombertir ni Cornelio, ang pipila ka Hudiyong magtutuo nag-ingon gihapon nga kinahanglanon ang pagpatuli. (Buh. 15:1, 2) Dihang nahitabo ang panaglalis didto sa Antioquia, gihimo ang kahikayan nga moadto si Pablo sa nagamandong lawas sa Jerusalem aron mangutana bahin niana. Pero kinsay naggiya sa maong kahikayan? Si Pablo miingon: “Mitungas ako tungod sa usa ka pinadayag.” Klaro nga ang Kristo ang naggiya aron husayon sa nagamandong lawas ang maong problema.​—Gal. 2:1-3.

11. (a) Unsay padayong gituohan sa Hudiyong mga Kristohanon bahin sa pagpatuli? (b) Giunsa pagpakita ni Pablo nga mapaubsanon niyang gipaluyohan ang mga ansiyano sa Jerusalem? (Tan-awa usab ang footnote.)

¹¹ Gigiyahan sa Kristo ang nagamandong lawas sa pagpatin-aw nga dili kinahanglang tulion ang dili Hudiyong mga Kristohanon. (Buh. 15:19, 20) Pero paglabay sa katuigan, daghang Hudiyong Kristohanon ang nagpatuli gihapon sa ilang mga anak. Dihang nabalitaan sa mga ansiyano sa Jerusalem nga may hulungihong bahin kang Pablo, nga wala siya magsunod sa Moisesnong Balaod, gihatagan nila siya ug wala damhang instruksiyon.b (Buh. 21:20-26) Giingnan nila siya nga magdalag upat ka lalaki ngadto sa templo aron makaingon ang mga tawo nga si Pablo “nagasunod sa Balaod.” Puwedeng kuwestiyonon ni Pablo ang ilang gipabuhat, nga moingong ang may problema mao ang Hudiyong mga Kristohanon nga wala kaayo makasabot sa isyu bahin sa pagpatuli. Pero, aron ipakita ang iyang pagpaluyo sa tinguha sa mga ansiyano nga magkahiusa ang mga magtutuo, si Pablo mapaubsanong misunod sa gipabuhat kaniya. Pero, makapangutana tingali ta, ‘Nganong gitugotan man ni Jesus nga dugayng mahusay ang maong isyu nga giwagtang na man unta ang Moisesnong Balaod tungod sa iyang kamatayon?’​—Col. 2:13, 14.

12. Ngano kahang gitugot sa Kristo nga molabay ang panahon una mahusay ang isyu bahin sa pagpatuli?

¹² Para sa pipila, nagkinahanglag panahon ang pag-adyas sa bag-ong pagsabot. Ang Hudiyong mga Kristohanon nagkinahanglag igong panahon sa pag-usab sa ilang panglantaw. (Juan 16:12) Ang pipila nalisdan sa pagdawat nga ang pagpatuli dili na ilhanan sa usa ka espesyal nga relasyon uban sa Diyos. (Gen. 17:9-12) Ang uban nahadlok nga basig lutoson sila diha sa Hudiyong mga komunidad kay lahi na ang ilang baroganan. (Gal. 6:12) Apan sa ngadtongadto, ang Kristo nagtaganag dugang giya pinaagi sa mga sulat ni Pablo.​—Roma 2:28, 29; Gal. 3:23-25.

13. Unsay makatabang nato aron maapresyar ang pagpanguna sa Kristo karon?

¹³ Kon dili nato bug-os masabtan ang mga rason sa pipila ka kausaban sa organisasyon, maayong palandongon nato kon giunsa pagpanguna sa Kristo ang katawhan sa Diyos kaniadto. Sa adlaw ni Josue o sa unang siglo, ang Kristo kanunayng nagtaganag maalamong giya aron mapanalipdan ang katawhan sa Diyos, mapalig-on ang ilang pagtuo, ug magpabilin silang nahiusa.​—Heb. 13:8.

14-16. Sa unsang paagi ang instruksiyon gikan sa “matinumanon ug maalamong ulipon” klarong nagpakita nga naghunahuna ang Kristo sa atong espirituwalidad?

¹⁴ Ang tukma sa panahong giya nga gihatag sa “matinumanon ug maalamong ulipon” klarong nagpakita nga mahigugmaong naghunahuna si Jesus sa atong espirituwalidad. (Mat. 24:45) Si Marc, nga may upat ka anak, nag-ingon: “Naningkamot si Satanas nga pahuyangon ang mga kongregasyon pinaagi sa pag-atake sa mga pamilya. Karon nga gidasig ang pagdumalag pamilyahanong pagsimba kada semana, klaro ang mensahe para sa mga ulo sa pamilya​—panalipdi ang inyong pamilya!”

¹⁵ Dihang masabtan nato kon giunsa ta paggiya sa Kristo, atong makita nga gusto gyod niyang mouswag ta sa espirituwal. Si Patrick, nga usa ka ansiyano, nag-ingon: “Sa sinugdan, dili madasig ang pipila dihang magtigom sila sa ginagmayng grupo sa pagsangyaw sa Sabado ug Dominggo. Pero ang usa sa pangunang mga hiyas ni Jesus​—ang iyang interes sa ordinaryong mga tawo—​klarong makita niini nga kahikayan. Ang maulawon o dili kaayo hinangyaw nga mga igsoon mibating mas giapresyar ug mapuslanon. Tungod niini, miuswag sila sa espirituwal.”

¹⁶ Gawas pa sa pag-atiman sa atong espirituwalidad, gitabangan ta sa Kristo nga magpokus sa labing importanteng buluhaton karon. (Basaha ang Marcos 13:10.) Si André, nga usa ka bag-ong ansiyano, kanunayng naningkamot sa pagsunod sa bag-ong mga instruksiyon gikan sa organisasyon. Siya miingon: “Ang pag-iban ug mga boluntaryo sa sangang buhatan nagpahinumdom nato sa pagkadinalian sa panahon ug sa panginahanglan nga magpokus ta sa pagsangyaw.”

17, 18. Nganong angay natong hunahunaon ang mga kaayohan sa pagsunod sa mga kausaban?

¹⁷ Ingon sa gipakita sa iyang aktibong paggiya, ang atong naentronong Hari, si Jesu-Kristo, naglantaw gyod sa umaabot. Busa, maglipay ta sa mga kaayohan nga atong madawat tungod sa pagsunod sa bag-ong mga kausaban. Madasig mo dihang inyong hisgotan sa pamilyahanong pagsimba kon sa unsang paagi nakabenepisyo mo sa mga kausaban sa senemanang panagkatigom o sa ministeryo.

¹⁸ Kon atong masabtan ang rason ug kaayohan sa mga instruksiyon nga atong madawat gikan sa organisasyon ni Jehova, lagmit malipay tang mosunod niana. Seguradong nasabtan nato nga nakadaginot tag kuwarta kay gimenosan ang gidaghanon sa literaturang giimprenta ug migamit tag bag-ong teknolohiya. Nakatabang pod ni nga mas daghan ang atong masangyawan. Kon hinumdoman ni nato, kanunay natong gamiton ang electronic nga mga publikasyon ug ang media kon posible. Pinaagi niini, gisundog nato ang hunahuna ni Jesus nga gamiton sa maalamong paagi ang kuwarta ug kabtangan sa organisasyon.

19. Nganong sundon nato ang giya sa Kristo?

¹⁹ Kon maningkamot ta sa pagsunod sa giya ni Jesu-Kristo, mapalig-on nato ang pagtuo sa uban ug mas mahiusa ta. Bahin sa pag-iban ug mga Bethelite sa tibuok kalibotan, si André miingon: “Tungod sa maayong ehemplo sa kanhing mga Bethelite nga misunod sa maong mga kausaban, mas naugmad nako ang pagsalig ug pagtahod. Kay nagmalipayon sila sa bisan unsang asaynment nga gihatag kanila, ilang gipakita nga miduyog sila sa pag-abante sa karo ni Jehova.”

20, 21. (a) Nganong makasalig ta sa Kristo, ang atong Lider? (b) Unsang pangutana ang atong hisgotan sa sunod nga artikulo?

²⁰ Ang atong Lider, si Jesu-Kristo, hapit nang ‘magtapos sa iyang pagpangdaog’ ug maghimog makapahinganghang mga butang. (Pin. 6:2; Sal. 45:4) Sa pagkakaron, iyang giandam ang katawhan sa Diyos para sa kinabuhi sa bag-ong kalibotan diin atong tudloan ang mga binanhaw ug motabang ta sa paghimo sa yuta nga paraiso.

²¹ Ang atong Hari molampos sa paggiya nato ngadto sa bag-ong kalibotan, basta padayon tang mosalig niya bisan pa sa nag-usab-usab nga kahimtang. (Basaha ang Salmo 46:1-3.) Usahay, malisdan ta sa pagsunod sa kausaban, ilabina kon kalit ning mahitabo nato. Nan, sa unsang paagi magpabilin ang atong kalinaw sa hunahuna ug lig-ong pagtuo kang Jehova? Hisgotan kana sa sunod nga artikulo.