Tabangi Sila nga Mobalik Dayon sa Pag-alagad!
“Kang kinsa man kami moadto? Ikaw mao ang may mga pulong mahitungod sa kinabuhing walay kataposan.”—JUAN 6:68.
1. Unsay gisulti ni Pedro sa dihang daghan sa mga tinun-an mibiya kang Jesus?
DIHAY higayon nga daghan sa mga tinun-an ni Jesu-Kristo ang mibiya kaniya kay wala nila maangayi ang usa sa iyang gitudlo. Siya nangutana sa mga apostoles: “Buot ba usab ninyong mobiya?” Si Pedro mitubag: “Ginoo, kang kinsa man kami moadto? Ikaw mao ang may mga pulong mahitungod sa kinabuhing walay kataposan.” (Juan 6:51-69) Sila walay laing kaadtoan. Ang Hudaismo kaniadto wala magbaton sa “mga pulong mahitungod sa kinabuhing walay kataposan,” ug ingon usab niana ang kahimtang karon sa Dakong Babilonya—ang tibuok-kalibotang imperyo sa bakak nga relihiyon. Alang niadtong mibiya sa kongregasyon nga gustong mopahimuot kang Jehova, ‘takna na aron momata’ ug mobalik sa kongregasyon sa Diyos.—Roma 13:11.
2. Unsay angayng hinumdoman bahin sa hudisyal o kompidensiyal nga mga butang?
2 Si Jehova interesado sa nawalang karnero sa Israel. (Basaha ang Ezequiel 34:15, 16.) Sa susama, ang mga ansiyano nagtinguha gayod nga tabangan ang usa ka karnero nga mibiya sa panon, ug ilang katungdanan ang pagbuhat niana. Kon sila mag-asayn ug usa ka magmamantala sa pagdumalag pagtuon sa usa ka di-aktibo nga gustong matabangan, unsay himoon sa maong magmamantala kon iyang mahibaloan nga ang iyang gitabangan nakahimo diayg seryosong sala? Inay motambag bahin sa hudisyal o kompidensiyal nga mga butang, ang magmamantala angayng mosugyot nga moduol siya sa mga ansiyano. Kon dili kana himoon sa di-aktibo, ang magmamantala maoy mosulti sa mga ansiyano.—Lev. 5:1; Gal. 6:1.
3. Unsay gihimo sa tawo nga adunay 100 ka karnero sa dihang iyang nakaplagan ang usa nga nawala?
3 Ang nag-unang artikulo naghisgot sa ilustrasyon ni Jesus bahin sa usa ka tawo nga adunay 100 ka karnero. Sa dihang nawala ang usa niini, iyang gibiyaan ang 99 aron pangitaon ang maong karnero. Pagkakaplag niya niini, siya nalipay gayod! (Luc. 15:4-7) Ingon usab niana ang atong bation kon mobalik ang usa nga mibiya sa kongregasyon. Tungod sa gugma, ang mga ansiyano ug ang ubang mga magmamantala lagmit miduaw na sa di-aktibo nga igsoon. Buot nila nga mobalik siya sa kongregasyon aron makapahimulos sa tabang, proteksiyon, ug panalangin sa Diyos. (Deut. 33:27; Sal. 91:14; Prov. 10:22) Kon sila makahimo sa pagtabang, unsay angay nilang buhaton?
4. Unsay atong masabtan sa Galacia 6:2, 5?
4 Lagmit ila siyang madasig nga mobalik sa kongregasyon kon maluloton nilang ipakita kaniya nga si Jehova nahigugma sa Iyang mga karnero ug ang Iyang gipangayo mao lamang ang mga butang nga atong mahimo, sama sa pagtuon sa Kasulatan, pagtambong sa mga tigom, ug pagsangyaw sa maayong balita sa Gingharian. Lagmit haom nga basahon ang Galacia 6:2, 5 ug hisgotan nga makahimo ang mga Kristohanon sa pagpas-an sa kaakohan sa uban, apan maylabot sa espirituwal nga mga butang, “ang matag usa magpas-an sa iyang kaugalingong luwan.” Dili mahimo nga ang uban maoy moalagad sa Diyos alang kanato.
Mibiya ba Sila Tungod sa “mga Kabalaka sa Kinabuhi”?
5, 6. (a) Nganong hinungdanon nga kita mamati pag-ayo sa isulti sa mga di-aktibo? (b) Unsaon nimo pagpasabot sa mga di-aktibo nga ang ilang pagbiya sa pag-alagad nakadaot sa ilang espirituwalidad?
5 Aron masabtan sa mga ansiyano ug sa ubang hamtong nga mga igsoon kon unsaon pagtabang ang mga di-aktibo, kinahanglan silang mamati pag-ayo kon unsay isulti sa maong mga indibiduwal. Ibutang ta nga ikaw usa ka ansiyano nga miduaw sa usa ka magtiayon nga wala na mag-alagad tungod sa “mga kabalaka sa kinabuhi.” (Luc. 21:34) Ang magtiayon lagmit nahimong di-aktibo tungod sa kalisod sa pinansiyal o sa nagkadakong kaakohan sa pamilya. Gibati tingali nila nga mogaan ang ilang kahimtang kon moundang una sila sa pag-alagad, apan mahimo nimo silang sultihan nga dili kana maoy solusyon sa ilang problema. (Basaha ang Proverbio 18:1.) Sa mataktikanhong paagi, mahimo nimo silang pangutan-on: “Mas malipayon ba ang inyong kinabuhi sukad nga miundang mo sa pagtambong sa mga tigom? Miarang-arang ba ang kahimtang sa inyong pamilya? Gibati pa ba ninyo ang kalipay sama kaniadto sa nag-alagad pa kamo kang Jehova?”—Neh. 8:10.
6 Pinaagi sa maong mga pangutana, ang mga di-aktibo makaamgo nga sila naluya diay sa espirituwal ug nawad-ag kalipay tungod kay sila mibiya sa kongregasyon. (Mat. 5:3; Heb. 10:24, 25) Mahimong ipaamgo usab kanila nga nakaamot sa pagkawala sa ilang kalipay ang ilang paghunong sa pagsangyaw. (Mat. 28:19, 20) Busa unsay maalamong buhaton sa mga di-aktibo?
7. Unsay atong ikadasig nga himoon niadtong mibiya sa kongregasyon?
7 Si Jesus miingon: “Bantayi ang inyong kaugalingon nga ang inyong mga kasingkasing dili mabug-atan sa pagpalabig kaon ug sa pagpalabig inom ug sa mga kabalaka sa kinabuhi . . . Nan, magpadayon sa pagtukaw, nga sa tanang panahon magapangamuyo aron molampos kamo sa pag-ikyas niining tanang butanga nga gitakdang mahitabo.” (Luc. 21:34-36) Kadtong mibiya sa kongregasyon nga gustong mabalik ang ilang kalipay kaniadto mahimong dasigon nga mag-ampo alang sa tabang sa Diyos ug sa balaang espiritu ug dasigon usab nga molihok sumala sa ilang giampo.—Luc. 11:13.
Sila ba Napandol?
8, 9. Unsay mahimong isulti sa ansiyano ngadto sa usa nga napandol?
8 Tungod kay ang tawo dili hingpit, motungha usahay ang panagbingkil ug mahimo kining makapandol. Ang pipila napandol tungod kay adunay tinahod nga igsoon sa kongregasyon nga nakabuhat ug supak sa prinsipyo sa Bibliya. Kon kanay hinungdan nga mibiya ang usa, ang ansiyano nga moduaw kaniya mahimong mosulti nga si Jehova dili maoy hinungdan sa iyang pagkapandol. Busa nganong biyaan man niya ang Diyos ug ang kongregasyon? Dili ba angay nga siya magpadayon sa pag-alagad sa Diyos, ug mosalig nga “ang Maghuhukom sa tibuok yuta” nahibalo sa nahitabo ug molihok sa pagsulbad niana? (Gen. 18:25; Col. 3:23-25) Kon ang usa ka tawo literal nga mapandol ug matumba, motindog gayod siya, dili ba?
9 Aron siya matabangan, mahimo usab nga sultihan siya sa ansiyano nga malimtan ra niya ang nakapandol kaniya paglabay sa panahon, sama sa nasinati sa ubang mga igsoon. Gani, basin nawala na ang hinungdan sa iyang pagkapandol. Kon ang usa napandol tungod kay siya gidisiplina, ang pag-ampo ug pagpamalandong makatabang kaniya sa pagkaamgo nga nahiangay ang maong disiplina ug dili gayod unta angay nga mapandol siya.—Sal. 119:165; Heb. 12:5-13.
Aduna bay Pagtulon-an nga Wala Nila Mauyoni?
10, 11. Unsang pangatarongan ang lagmit epektibo sa pagtabang niadtong lahig panglantaw sa pipila ka pagtulon-an sa Bibliya?
10 Ang uban mibiya sa panon sa Diyos tungod kay adunay pagtulon-an nga wala nila mauyoni. Ang mga Israelinhon nga giluwas sa Diyos gikan sa Ehipto ‘nakalimot sa gibuhat sa Diyos’ ug ‘wala maghulat sa iyang tambag.’ (Sal. 106:13) Lagmit makatabang ang pagpahinumdom sa di-aktibo nga ang “matinumanon ug maalamong ulipon” nagtaganag makapahimsog nga espirituwal nga pagkaon. (Mat. 24:45) Mao kanay hinungdan nga siya nakakat-on sa kamatuoran. Busa nganong dili siya molakaw pag-usab sa dalan sa kamatuoran?—2 Juan 4.
11 Sa dihang tabangan sa ansiyano kadtong mibiya sa panon sa Diyos, mahimo niyang hisgotan nga dihay mga tinun-an nga mibiya kang Jesus tungod kay ilang gisalikway ang usa sa iyang mga pagtulon-an. (Juan 6:53, 66) Tungod kay mihunong sila sa pagpakig-uban kang Jesus ug sa iyang matinumanong mga sumusunod, sila nawad-an sa ilang espirituwalidad ug kalipay. Kon bahin kanilang mibiya sa kongregasyon, nakakaplag ba silag laing organisasyon nga nagtaganag abundang espirituwal nga pagkaon? Wala gayod tungod kay walay laing organisasyon nga nagtagana niana!
Tungod ba sa Ilang Nahimong Sala?
12, 13. Kon ang usa nga mibiya sa kongregasyon motug-an nga siya nakahimog seryosong sala, sa unsang paagi siya matabangan?
12 Adunay mga indibiduwal nga mihunong sa pagsangyaw ug pagtambong sa mga tigom tungod kay nakahimo silag seryosong sala. Lagmit naghunahuna sila nga kon motug-an sila sa mga ansiyano, sila mapalagpot sa kongregasyon. Apan dili sila mapalagpot kon miundang na sila sa pagbuhat sa maong sala ug kon sila tinuod gayod nga naghinulsol. (2 Cor. 7:10, 11) Sila dawaton sa kongregasyon, ug ang mga ansiyano motabang nga mapasig-uli ang ilang maayong relasyon sa Diyos.
13 Kon ikaw usa ka hamtong nga magmamantala nga giasayn sa pagtabang sa usa ka di-aktibo, unsay imong buhaton kon sultihan ka niya nga siya nakahimog seryosong sala? Sumala sa nahisgotan na, dili ka mangilabot niana, kondili imo siyang sultihan nga moduol sa mga ansiyano. Kon dili siya gustong mobuhat niana, imong mapanalipdan ang ngalan ni Jehova ug ang kongregasyon pinaagi sa pagtuman sa sugo sa Diyos maylabot sa maong butang. (Basaha ang Levitico 5:1.) Ang mga ansiyano nahibalo kon unsaon pagtabang kadtong gustong mobalik sa pag-alagad ug magkinabuhi uyon sa kabubut-on sa Diyos. Lagmit nga magpahamtang silag mahigugmaong disiplina. (Heb. 12:7-11) Kon iyang ilhon nga siya nakasala sa Diyos, miundang na sa pagbuhat ug sala, ug sinserong naghinulsol, ang mga ansiyano motabang kaniya, ug siya pasayloon sa Diyos.—Isa. 1:18; 55:7; Sant. 5:13-16.
Kalipay Tungod sa Pagbalik sa Anak
14. Sa imong kaugalingong pulong, iasoy ang sambingay ni Jesus bahin sa mausikong anak.
14 Aron matabangan ang igsoon nga nahisalaag, ang usa nga giasayn sa pagtabang mahimong maghisgot sa sambingay ni Jesus nga nasulat sa Lucas 15:11-24. Sa maong sambingay, giusikan sa usa ka batan-ong lalaki ang iyang panulondon pinaagi sa pagkinabuhi nga mapatuyangon. Sa ngadtongadto, nakasinati siyag grabeng kalisod ug nagbasol siya sa iyang gibuhat. Wala na siyay makaon ug gimingaw siya sa ila, mao nga midesisyon siya sa pagpauli. Bisag layo pa siya, nakita na siya sa iyang amahan. Sa kalipay sa amahan, siya midagan sa pagtagbo sa iyang anak, ug iyang gigakos ug gihagkan kini. Kon pamalandongon kini sa usa ka di-aktibo, siya lagmit matukmod sa pagbalik sa pag-alagad. Kay hapit nang laglagon ang presenteng sistema sa mga butang, siya kinahanglang mopauli, buot ingnon, mobalik dayon sa pag-alagad.
15. Nganong ang pipila mibiya sa kongregasyon?
15 Kadaghanan niadtong nahimong di-aktibo wala mobiyag kalit sama sa mausikong anak. Ang pipila hinayhinay nga mipahilayo, sama sa usa ka sakayan nga hinayhinayng naanod pahilayo sa baybayon. Ang uban nabug-atan pag-ayo sa mga problema mao nga napasagdan nila ang ilang espirituwalidad. Ang uban usab napandol sa mga igsoon sa kongregasyon, o mibiya tungod kay wala nila mauyoni ang usa ka pagtulon-an sa Bibliya. Aduna usay pipila nga nakasala. Bisan pa niana, ang mga punto nga gihisgotan dinhi makatabang kanimo sa pagtabang sa mga di-aktibo nga mobalik sa pag-alagad sa dili pa ulahi ang tanan.
“Nalipay Mi nga Mibalik Ka!”
16-18. (a) Sa unsang paagi gitabangan sa usa ka ansiyano ang igsoon nga nahimong di-aktibo sulod sa daghang katuigan? (b) Nganong nahimong di-aktibo ang maong igsoon, sa unsang paagi siya natabangan, ug unsay gibati sa kongregasyon?
16 Ang usa ka ansiyano miingon: “Ang lawas sa mga ansiyano sa among kongregasyon naningkamot pag-ayo sa pagduaw sa mga di-aktibo. Ako nahinumdom sa usa ka brader nga akong nadumalahan ug pagtuon ug natabangan nga makakat-on sa kamatuoran. Siya miundang sa pag-alagad sulod sa 25 ka tuig ug nakasinatig dakong problema, mao nga gisaysayan ko siya kon sa unsang paagi makatabang kaniya ang pagpadapat sa mga prinsipyo sa Bibliya. Sa ngadtongadto, siya mitambong pag-usab sa Kingdom Hall ug misugot nga dumalahan ug pagtuon sa Bibliya aron siya mapalagsik pag-usab sa pag-alagad.”
17 Nganong nahimong di-aktibo ang maong igsoon? Siya miadmitir: “Mas gihatagan nakog pagtagad ang kalibotanong mga butang kay sa espirituwal. Wala na koy personal nga pagtuon, ug wala na sab ko mosangyaw ug motambong sa mga tigom, hangtod nga miundang ko sa pag-alagad. Apan nakabalik ko tungod sa kinasingkasing nga interes sa usa ka ansiyano kanako.” Ang problema niining igsoona hinayhinay nga nasulbad sa dihang misugot siya nga dumalahag pagtuon sa Bibliya. Siya miingon, “Ako nakaamgo nga ang kulang diay sa akong kinabuhi mao ang gugma ug paggiya ni Jehova ug sa iyang organisasyon.”
18 Unsay gibati sa kongregasyon sa dihang mibalik siya sa pag-alagad? Siya miingon: “Nahisama ako sa mausikong anak nga gihisgotan ni Jesu-Kristo. Usa sa tigulang nga mga sister nga kauban nako sa kongregasyon 30 ka tuig na ang milabay, nga aktibo pa gihapon, miingon kanako, ‘Nalipay mi nga mibalik ka!’ Natandog pag-ayo ang akong kasingkasing. Maayo gyod nga mibalik ko. Buot kong pasalamatan ang gugma, mainitong pagtagad, pailob, ug interes nga gipakita sa maong ansiyano ug sa tibuok kongregasyon. Ang ilang gugma kang Jehova ug sa isigkatawo nakatabang kanako nga mobalik sa kongregasyon.”
Awhaga Sila nga Molihok Dayon!
19, 20. Sa unsang paagi imong madasig ang mga di-aktibo nga mobalik dayon sa kongregasyon, ug sa unsang paagi imong ikapakita nga ang Diyos wala mangayo kanato ug labaw sa atong maarangan?
19 Kita nagkinabuhi sa kataposang mga adlaw, ug hapit nang laglagon ang presenteng sistema sa mga butang. Busa, dasiga ang mga di-aktibo sa pagtambong sa mga tigom. Awhaga sila nga dili maglangan sa pagbuhat niana. Pahinumdomi sila nga si Satanas naningkamot sa pagdaot sa ilang relasyon sa Diyos ug nagsilsil diha sa ilang hunahuna nga mahupayan sila sa mga kabug-at sa kinabuhi kon ilang biyaan ang matuod nga pagsimba. Sultihi sila nga matagamtam nila ang tinuod nga kahupayan pinaagi lamang sa pagkahimong matinumanong sumusunod ni Jesus.—Basaha ang Mateo 11:28-30.
20 Pahinumdomi ang mga di-aktibo nga ang Diyos wala mangayo ug labaw sa atong maarangan. Pananglitan, sa dihang hapit nang mamatay si Jesus, gibubo ni Maria sa ulo ni Jesus ang mahalon nga lana. Tungod niana, ang uban nagsaway kaniya, apan si Jesus miingon: “Pasagdi lang siya. . . . Gibuhat niya ang iyang maarangan.” (Mar. 14:6-8) Gidayeg usab ni Jesus ang kabos nga babayeng balo nga naghulog ug gamay kaayong donasyon sa templo. Sama kang Maria, gibuhat niya ang iyang maarangan. (Luc. 21:1-4) Kadaghanan kanato makahimo sa pagtambong sa mga tigom ug sa pagsangyaw sa Gingharian. Sa tabang ni Jehova, daghan sa mga di-aktibo karon makahimo usab niana.
21, 22. Unsay atong ikapasalig niadtong mobalik sa pag-alagad kang Jehova?
21 Kon ang usa ka igsoon nga mibiya sa kongregasyon maulaw na sa pagpakig-uban sa mga igsoon, mahimo nimong ipahinumdom kaniya nga sa dihang mipauli ang mausikong anak, dihay kasadya sa panimalay. Ingon usab niana ang bation sa kongregasyon kon siya mobalik. Dasiga sila nga molihok dayon aron ilang masuklan ang Yawa, ug aron sila masuod sa Diyos.—Sant. 4:7, 8.
22 Kadtong mobalik kang Jehova dawaton gayod uban ang kalipay. (Lam. 3:40) Sila mibatig dakong kalipay kaniadto sa dihang sila nag-alagad pa. Matagamtam gayod nila ang daghang panalangin kon sila mobalik dayon sa pag-alagad!
Unsay Imong Tubag?
• Sa unsang paagi imong matabangan ang igsoon nga napandol ug nahimong di-aktibo?
• Alang niadtong miundang sa pag-alagad kay wala makaangay sa usa ka pagtulon-an sa Bibliya, unsay mahimo natong isulti sa pagtabang kanila?
• Sa unsang paagi matabangan ang usa nga nagpanuko sa pagbalik sa kongregasyon?
[Hulagway sa panid 13]
Pamati pag-ayo kon unsay isulti sa di-aktibo
[Hulagway sa panid 15]
Ang pagpamalandong sa sambingay ni Jesus bahin sa mausikong anak lagmit magpalihok sa pipila nga mobalik sa kongregasyon