Ang Pulong ni Jehova Buhi
Mga Pangunang Punto sa mga Sulat Ngadto sa mga Taga-Galacia, Efeso, Filipos, ug Colosas
SA PAGKADUNGOG ni Pablo nga ang pipila ka Kristohanon mibiya na sa putli nga pagsimba kay naimpluwensiyahan sa mga sumusunod sa Judaismo, siya misulat ug usa ka bug-at nga mensahe ngadto sa “mga kongregasyon sa Galacia.” (Gal. 1:2) Kini gisulat sa mga 50-52 K.P., ug naundan kinig prangka nga mga tambag.
Mga napulo ka tuig sa ulahi samtang didto sa Roma ingong “binilanggo ni Kristo Jesus,” gisulatan ni Pablo ang mga kongregasyon sa Efeso, Filipos, ug Colosas, nga mahigugmaong nagtambag ug nagdasig kanila. (Efe. 3:1) Kita makabenepisyo kon atong tagdon ug ipadapat ang mensahe sa mga basahon sa Bibliya nga Galacia, Efeso, Filipos, ug Colosas.—Heb. 4:12.
‘GIPAHAYAG NGA MATARONG’—SA UNSANG PAAGI?
Kay naningkamot man ang mga sumusunod sa Judaismo sa pagdaot kang Pablo, iyang gidepensahan ang iyang pagkaapostol pinaagi sa paghatag ug tinong mga impormasyon bahin sa iyang kaugalingon. (Gal. 1:11–2:14) Sa pagpanghimakak sa ilang mga pagtulon-an, si Pablo miingon: “Ang tawo mapahayag nga matarong, dili gumikan sa mga buhat sa balaod, kondili pinaagi lamang sa pagtuo kang Kristo Jesus.”—Gal. 2:16.
Si Kristo ‘nagpagawas pinaagi sa pagpalit niadtong nailalom sa balaod’ aron ilang mapahimuslan ang Kristohanong kagawasan, matod ni Pablo. Prangka niyang gitambagan ang mga taga-Galacia: “Barog nga malig-on, ug ayaw tugoting kamo mabilanggo pag-usab sa yugo sa pagkaulipon.”—Gal. 4:4, 5; 5:1.
Tubag sa mga Pangutana Bahin sa Kasulatan:
3:16-18, 28, 29—Nagpadayon ba gihapon ang pakigsaad kang Abraham? Oo. Ang pakigsaad sa Balaod maoy dugang ug dili kapuli sa pakigsaad sa Diyos uban kang Abraham. Busa, ang pakigsaad kang Abraham nagpadayon gihapon human ‘mahanaw’ ang Balaod. (Efe. 2:15) Ang mga saad niini gipasa ngadto sa matuod nga “binhi” ni Abraham—si Kristo Jesus, nga mao ang pangunang binhi, ug niadtong “iya ni Kristo.”
6:2—Unsa ang “balaod ni Kristo”? Kining balaora naundan sa tanang gitudlo ug gisugo ni Jesus. Kini ilabinang naglakip sa sugo nga “maghigugmaay sa usag usa.”—Juan 13:34.
6:8—Sa unsang paagi kita ‘magapugas alang sa espiritu’? Kita magahimo niini kon atong tugotan ang espiritu sa Diyos sa paggiya kanato. Ang pagpugas alang sa espiritu naglakip sa bug-os-kasingkasing nga pagpakigbahin sa mga kalihokan diin dagaya ang pag-agos sa espiritu.
Mga Leksiyon Alang Kanato:
1:6-9. Kinahanglang molihok dayon ang mga ansiyano kon may motunghang mga problema sa kongregasyon. Ila dayong mapanghimakak ang sayop nga pangatarongan kon ilang gamiton ang Kasulatan ug mangatarongan pinasukad niana.
2:20. Ang lukat maoy usa ka personal nga gasa sa Diyos kanato. Kana ang angay natong pag-isip sa lukat.—Juan 3:16.
5:7-9. Ang daotang mga kauban ‘makababag kanato sa pagsunod sa kamatuoran.’ Maalamong likayan nato sila.
6:1, 2, 5. Kadtong may “espirituwal nga mga katakos” makatabang kanato sa pagpas-an sa usa ka problema, sama sa pagdumalag usa ka malisod nga kahimtang tungod sa sayop nga lakang nga wala nato tuyoa. Apan kon bahin sa atong espirituwal nga mga kaakohan, kita mismo maoy mopas-an niana.
‘PAGTIGOM SA TANANG BUTANG DIHA KANG KRISTO’
Sa pagpasiugda sa Kristohanong panaghiusa ingong tema sa iyang sulat ngadto sa mga taga-Efeso, si Pablo naghisgot ug “usa ka pagdumala inig-abot sa kinutoban sa tinudlong kapanahonan . . . aron tigomon pag-usab ang tanang butang diha kang Kristo, ang mga butang sa mga langit ug ang mga butang sa yuta.” Si Kristo naghatag ug “mga gasa nga mga lalaki” sa pagtabang sa tanan nga “makadangat sa pagkausa sa pagtuo.”—Efe. 1:10; 4:8, 13.
Aron mapasidunggan ang Diyos ug mahuptan ang panaghiusa, ang mga Kristohanon angayng “magsul-ob sa bag-ong pagkatawo” ug “magpasakop sa usag usa diha sa kahadlok kang Kristo.” Sila usab kinahanglang ‘mobarog nga malig-on batok sa malipatlipatong mga kaugdahan sa Yawa’ pinaagi sa pagsul-ob sa kompletong espirituwal nga armadura.—Efe. 4:24; 5:21; 6:11.
Tubag sa mga Pangutana Bahin sa Kasulatan:
1:4-7—Sa unsang paagi ang dinihogang mga Kristohanon gimbut-an daan sa wala pa sila matawo? Sila gimbut-an daan ingong usa ka grupo o matang, dili ingong indibiduwal. Kini nahitabo sa wala pa mopatunghag makasasalang mga anak ang atong unang mga ginikanan. Ang tagna sa Genesis 3:15, nga gipahayag sa wala pay gisamkon nga makasasala, naglakip sa katuyoan sa Diyos nga ang pipila sa mga sumusunod ni Kristo magmando uban kaniya sa langit.—Gal. 3:16, 29.
2:2—Sa unsang paagi nahisama sa hangin ang espiritu sa kalibotan, ug sa unsang paagi kini nakabaton ug awtoridad ibabaw sa kalibotan? “Ang espiritu sa kalibotan”—ang espiritu sa independensiya ug pagkadili-masinugtanon—anaa bisan asa sama sa hangin nga atong gihanggab. (1 Cor. 2:12) Kini nakabaton ug awtoridad o gahom ibabaw sa kalibotan tungod sa kusganon ug makanunayon nga impluwensiya niini.
2:6—Sa unsang paagi mahiadto sa “langitnong mga dapit” ang dinihogang mga Kristohanon bisag ania pa sila sa yuta? Ang pamulong nga “langitnong mga dapit” dinhi wala magtumong sa langitnong panulondon nga gisaad kanila. Kini nagtumong hinuon sa ilang binayaw nga baroganan uban sa Diyos tungod kay sila “gitimbrehan sa gisaad nga balaang espiritu.”—Efe. 1:13, 14.
Mga Leksiyon Alang Kanato:
4:8, 11-15. Si Jesu-Kristo “nagdala ug mga binihag,” buot ingnon, nagdalag mga tawo gikan sa pagkontrolar ni Satanas ug naggamit kanila ingong mga gasa alang sa pagpalig-on sa Kristohanong kongregasyon. Kita ‘magatubo diha sa tanang butang pinaagi sa gugma ngadto kang Kristo’ pinaagi sa pagkamasinugtanon ug pagkamapinasakopon sa mga nagapanguna kanato ug sa pagpaluyo sa mga kahikayan sa kongregasyon.—Heb. 13:7, 17.
5:22-24, 33. Ang asawa dili lang magpasakop sa iyang bana kondili magtahod usab kaniya. Iyang buhaton kini pinaagi sa pagpasundayag ug “malinawon ug malumong espiritu” ug sa pagpaningkamot nga pasidunggan ang iyang bana pinaagi sa pagdayeg ug pagpaluyo sa iyang mga desisyon aron kini molampos.—1 Ped. 3:3, 4; Tito 2:3-5.
5:25, 28, 29. Kinahanglang tagan-an sa bana ang pisikal, emosyonal, ug espirituwal nga mga panginahanglan sa iyang asawa sama sa iyang ‘pagpakaon’ sa iyang kaugalingon. Panggaon usab niya ang iyang asawa pinaagi sa paggahin ug igong panahon uban kaniya ug pagtratar kaniya uban ang malumong sinultihan ug panggawi.
6:10-13. Sa pagsukol sa mga demonyo, kinahanglang isul-ob gayod nato ang kompletong espirituwal nga armadura gikan sa Diyos.
“MAGPADAYON KITA SA PAGLAKAW NGA MAHUSAY”
Gipasiugda ni Pablo ang gugma diha sa iyang sulat ngadto sa mga taga-Filipos. “Kini ang padayon ko nga ginaampo,” matod niya, “nga ang inyong gugma mosamot pa sa pagdagaya uban ang tukmang kahibalo ug bug-os nga katakos sa pag-ila.” Sa pagtabang kanila nga makalikay sa lit-ag sa sobrang pagsalig sa kaugalingon, siya nagtambag: “Magpadayon kamo sa pagpanlimbasog sa inyong kaugalingong kaluwasan uban ang kahadlok ug pagpangurog.”—Filip. 1:9; 2:12.
Gidasig ni Pablo ang mga hamtong sa pagpangagpas sa “tumong alang sa ganti nga pagkatinawag sa Diyos ngadto sa itaas.” Siya miingon: “Sa unsa mang sukod nga kita nakahimo na ug pag-uswag, magpadayon kita sa paglakaw nga mahusay niining samang rutina.”—Filip. 3:14-16.
Tubag sa mga Pangutana Bahin sa Kasulatan:
1:23—Unsang “duha ka butang” ang nagpit-os kang Pablo, ug unsang “pagkagawas” ang iyang gitinguha? Tungod sa mga kahimtang nga iyang gisagubang, si Pablo napit-os sa duha ka kapilian: kinabuhi o kamatayon. (Filip. 1:21) Bisag wala niya isulti kon unsay iyang pilion, iyang gipahayag ang iyang gitinguha—“ang pagkagawas ug ang pagkahimong kauban ni Kristo.” (Filip. 3:20, 21; 1 Tes. 4:16) Kini nga “pagkagawas” panahon sa presensiya ni Kristo moresulta sa pagkadawat ni Pablo sa ganti nga giandam ni Jehova alang kaniya.—Mat. 24:3.
2:12, 13—Sa unsang paagi ang Diyos nagpahinabo kanato nga “magtinguha ug ingon man mobuhat”? Ang balaang espiritu ni Jehova makaimpluwensiya sa atong kasingkasing ug hunahuna nga tinguhaon pa gayod ang pagbuhat sa atong kinamaayohan sa pag-alagad kaniya. Busa, kita adunay tabang samtang kita ‘nagapanlimbasog sa kaugalingon natong kaluwasan.’
Mga Leksiyon Alang Kanato:
1:3-5. Bisag pobre sila sa materyal, ang mga taga-Filipos naghatag ug maayong panig-ingnan kanato sa pagkamanggihatagon.—2 Cor. 8:1-6.
2:5-11. Sama sa gipakitang panig-ingnan ni Jesus, ang pagkamapainubsanon dili kahuyangan kondili moral nga kalig-on. Dugang pa, si Jehova nagabayaw sa mga mapainubsanon.—Prov. 22:4.
3:13. “Ang mga butang sa luyo” tingali naglakip sa dakog-suweldo nga trabaho, sa kasegurohan ingong membro sa adunahang pamilya, o bisan sa seryosong mga sala sa nangagi nga ato nang gihinulsolan mao nga kita “nahugasan na.” (1 Cor. 6:11) Kinahanglang kalimtan na nato kining mga butanga, buot ingnon, dili na nato kini kabalak-an pa, ug atong ‘kab-oton ang mga butang sa unahan.’
“GINAPALIG-ON DIHA SA PAGTUO”
Sa iyang sulat ngadto sa mga taga-Colosas, giyagyag ni Pablo ang sayop nga mga panghunahuna sa mini nga mga magtutudlo. Siya nangatarongan nga ang kaluwasan nagdepende sa ‘pagpadayon diha sa pagtuo,’ dili sa mga kinahanglanon sa Balaod. Gidasig ni Pablo ang mga taga-Colosas nga “magpadayon sa paglakaw nga nahiusa [kang Kristo], nga gipagamot ug ginatukod diha kaniya ug ginapalig-on diha sa pagtuo.” Sa unsang paagi makaapektar kanila ang pagpalig-on diha sa pagtuo?—Col. 1:23; 2:6, 7.
“Gawas pa niining tanang butanga,” misulat si Pablo, “isul-ob ninyo ang gugma, kay kini maoy usa ka hingpit nga bugkos sa panaghiusa. Dugang pa, paharia ang kalinaw ni Kristo diha sa inyong mga kasingkasing.” Gisultihan sila sa apostol: “Bisan unsay inyong ginabuhat, buhata kini nga tibuok-kalag ingon nga alang kang Jehova, ug dili alang sa mga tawo.” Mahitungod sa mga dili membro sa kongregasyon, siya miingon: “Magpadayon sa paglakaw sa kaalam ngadto” kanila.—Col. 3:14, 15, 23; 4:5.
Tubag sa mga Pangutana Bahin sa Kasulatan:
2:8—Unsa ang “paninugdang mga butang sa kalibotan” nga gipasidaan ni Pablo? Kini ang mga elemento sa kalibotan ni Satanas—paninugdang mga butang o prinsipyo nga nagmugna, naggiya, o nagpalihok niini. (1 Juan 2:16) Lakip niini ang pilosopiya, materyalismo, ug bakak nga mga relihiyon niining kalibotana.
4:16—Nganong wala malakip sa Bibliya ang sulat ngadto sa mga taga-Laodicea? Kini tungod kay ang maong sulat lagmit walay impormasyon nga atong gikinahanglan karon. O tingali ang unod niini anaa na sa ubang mga sulat nga nalakip sa Bibliya.
Mga Leksiyon Alang Kanato:
1:2, 20. Ang lukat, nga gitagana sa Diyos tungod sa iyang dili-takos nga kalulot, makahinlo sa atong sad-an nga tanlag ug makahatag kanato ug kalinaw sa hunahuna.
2:18, 23. Ang “pakaaron-ingnon nga pagpaubos”—ang sinalingkapaw nga pagpaubos aron dayegon sa uban tingali pinaagi sa pagbiya sa ilang materyal nga kabtangan o pagsakit sa kaugalingong lawas—maoy usa ka timailhan nga ang usa ‘nagpaburot tungod sa iyang unodnon nga kaisipan.’