ISRAEL SA DIYOS

Kini nga ekspresyon nga makita lamang kausa diha sa Kasulatan nagtumong sa espirituwal nga Israel imbes nga sa unodnong mga kaliwat ni Jacob, kansang ngalan giilisdan ug Israel. (Gen 32:22-28) Ang Bibliya naghisgot sa “Israel nga unodnon” (1Co 10:18), ingon man sa espirituwal nga Israel nga gilangkoban niadtong kinsa ang pagkakaliwat ni Abraham dili na kinahanglan. (Mat 3:9) Si apostol Pablo, sa dihang migamit sa ekspresyon nga “Israel sa Diyos,” nagpakita nga kini wala mag-agad kon ang usa ba tinuli nga kaliwat ni Abraham o dili.​—Gal 6:​15, 16.

Ang manalagnang si Oseas mitagna nga ang Diyos, sa pagsalikway sa nasod sa kinaiyanhong Israel dapig niining espirituwal nga nasod, nga naglakip sa mga Hentil, moingon “kanila nga dili akong katawhan: ‘Kamo akong katawhan.’” (Os 2:23; Rom 9:22-25) Sa gitakdang panahon ang Gingharian sa Diyos gikuha gikan sa nasod sa kinaiyanhong mga Hudiyo ug gihatag ngadto sa usa ka espirituwal nga nasod nga nagpatunghag mga bunga sa Gingharian. (Mat 21:43) Siyempre, ang kinaiyanhong mga Hudiyo maoy lakip sa espirituwal nga Israel. Ang mga apostoles ug ang uban nga nakadawat sa balaang espiritu sa Pentekostes 33 K.P. (mga 120), kadtong nadugang niadtong adlawa (mga 3,000), ug kadtong sa ulahi nga nadugang sa gidaghanon sa mga lalaki lamang nga mikabat ug mga 5,000 tanan maoy mga Hudiyo ug mga kinabig. (Buh 1:13-15; 2:41; 4:4) Apan bisan pa niana, ingon sa paghubit kanila ni Isaias, sila maoy “usa ka nahibilin lamang” nga giluwas gikan sa maong nasod nga gisalikway.​—Isa 10:​21, 22; Rom 9:27.

Ang ubang mga teksto nagpatin-aw niining butanga. Sa dihang giputol ang pipila ka “kinaiyanhong mga sanga” gikan sa mahulagwayong kahoy nga olibo, gisumpay ang “ihalas” nga mga dili-Israelinhon, mao nga walay pagpihig sa rasa o matang taliwala niadtong “sa pagkatinuod binhi ni Abraham, mga manununod maylabot sa usa ka saad.” (Rom 11:17-24; Gal 3:​28, 29) “Dili ang tanan nga nagsumikad sa Israel tinuod nga ‘Israel.’” “Kay siya dili Hudiyo sa gawas lamang, ni ang pagkatinuli diha sa unod sa gawas lamang. Apan siya Hudiyo sa sulod, ug ang iyang pagkatinuli maoy sa kasingkasing pinaagi sa espiritu.” (Rom 9:6; 2:​28, 29) Wala mapatungha sa kinaiyanhong Israel ang gikinahanglang gidaghanon, mao nga ang Diyos ‘miliso sa iyang pagtagad ngadto sa kanasoran aron sa pagkuha gikan kanila ug usa ka katawhan alang sa iyang ngalan’ (Buh 15:14), nga labot kanila kini giingon, “Kanhi kamo dili usa ka katawhan, apan karon kamo maoy katawhan sa Diyos.” (1Pe 2:10) Gikutlo ni apostol Pedro ang giingon ngadto sa kinaiyanhong Israel ug gipadapat kini ngadto niining espirituwal nga Israel sa Diyos, nga nag-ingong kini sa pagkatinuod maoy “usa ka piniling rasa, usa ka harianong pagkasaserdote, usa ka balaang nasod, usa ka katawhan alang sa linaing pagpanag-iya.”​—Ex 19:​5, 6; 1Pe 2:9.

Ang 12 ka tribo nga gihisgotan sa Pinadayag kapitulo 7 nagtumong gayod niining espirituwal nga Israel tungod sa ubay-ubayng balido nga mga rason. Ang talaan dili pareho nianang sa kinaiyanhong Israel sa Numeros kapitulo 1. Dugang pa, ang templo sa Jerusalem ug ang pagkasaserdote ug ang tanang rekord sa mga tribo sa kinaiyanhong Israel bug-os nga nalaglag ug nahanaw dugay na sa wala pa si Juan makadawat ug panan-awon niadtong 96 K.P. Apan labing hinungdanon, nadawat ni Juan ang iyang panan-awon pinasukad sa gihisgotan nang mga panghitabo sukad ug pagkatapos sa Pentekostes 33 K.P. Pinasukad sa maong mga panghitabo, ang panan-awon ni Juan bahin niadtong nagbarog sa langitnong Bukid sa Zion uban sa Kordero (kinsa gisalikway sa kinaiyanhong Israel) nagpadayag sa gidaghanon niining espirituwal nga Israel sa Diyos nga maoy 144,000 nga “gipalit gikan sa katawhan.”​—Pin 7:4; 14:​1, 4.