Barog nga Malig-on Diha sa Kristohanong Kagawasan!
Mga Pangunang Punto Gikan sa Galacia
SI Jehova maoy Diyos sa kagawasan. (2 Corinto 3:17) Ang iyang Anak, si Jesu-Kristo, nag-ingon: “Kamo mahibalo sa kamatuoran, ug ang kamatuoran magahatag kaninyo ug kagawasan.” (Juan 8:32) Ug sa pagsundog kang Kristo, si apostol Pablo nagsangyaw sa maayong balita sa kagawasan.—Roma 6:18; 8:21.
Pinaagi sa pagmantala nianang nagahatag-kagawasan nga balita, si Pablo nakatukod ug mga kongregasyon sa Galacia (usa ka Romanong lalawigan sa Asia Minor) sa panahon sa iyang unang misyonaryong panaw (47-48 K.P.). Ang mga taga Galacia nahibalo sa desisyon sa nagamandong lawas nga ang sirkunsisyon dili kinahanglanon alang sa mga Kristohanon. (Buhat 15:22-29) Apan ang mga tumutuon sa Hudaismo nagtinguha sa pagdala kanila ngadto sa pagkaulipon pinaagi sa pag-insistir nga sila magpasirkunsisyon. Busa gipasiugda ni Pablo ang Kristohanong kagawasan diha sa sulat nga iyang gisulat ngadto sa mga taga Galacia gikan sa Corinto o sa Antioquia sa Syria sa mga 50-52 K.P. Pananglitan, siya miingon: “Alang . . . sa kagawasan kita gipahigawas ni Kristo. Busa bumarog kamo nga malig-on, ug ayaw na kamo pagpasangon pag-usab sa yugo sa pagkaulipon.”—Galacia 5:1.
Gidepensahan ni Pablo ang Iyang Pagkaapostol
Una gipakita ni Pablo nga ang iyang pagkaapostol maoy “pinaagi ni Jesu-Kristo ug sa Diyos.” (1:1–2:14) Tungod sa usa ka pinadayag, si Pablo (uban kang Bernabe ug Tito) miadto sa Jerusalem mahitungod sa isyu sa sirkunsisyon. Didto si Santiago, si Cepas (Pedro), ug Juan miila nga siya gitugahan nga mahimong usa ka apostol ngadto sa mga nasod. Ug sa dihang si Pedro sa ulahi mibulag gikan sa mga magtutuong Hentil sa Antioquia tungod kay siya nahadlok sa Hudiyong mga Kristohanon gikan sa Jerusalem, gibadlong siya ni Pablo.
Sa Unsang Paagi Gipahayag nga Matarong?
Ang apostol usab mihimog kusganong punto nga pinaagi lamang sa pagtuo kang Jesu-Kristo ang usa mapahayag nga matarong. (2:15–3:29) Ang mga taga Galacia nakadawat sa espiritu sa Diyos, dili tungod sa mga buhat sa kasugoan, kondili tungod sa pagdawat sa maayong balita diha sa pagtuo. Ang matuod nga mga anak ni Abraham may pagtuo, apan ang mga indibiduwal nga naningkamot nga pamatud-an ang ilang kaugalingon nga matarong pinaagi sa “mga buhat sa kasugoan nailalom sa tunglo.” Ngano? Tungod kay sila dili hingpit makatuman sa Kasugoan. Sa pagkatinuod, ang Kasugoan nagpahimo sa mga kalapasan nga madayag ug maoy usa ka “magtutultol padulong kang Kristo.”
Barog nga Malig-on!
Pinaagi sa iyang kamatayon, si Kristo ‘nagpagawas niadtong nailalom sa Kasugoan.’ Apan ang iyang mga sumusunod kinahanglang mobarog nga malig-on diha sa Kristohanong kagawasan. (4:1–6:18) Busa ang mga taga Galacia kinahanglang mosukol kang bisan kinsa nga naningkamot sa pagdaldal kanila sa pagdawat sa yugo sa pagkaulipon. Dugang pa, dili nila angay abusohan ang ilang kagawasan apan kinahanglang maglikay sa “mga buhat sa unod” ug magpasundayag sa mga bunga sa espiritu sa Diyos. Kadtong nagtinguha sa pagdala kanila ngadto sa pagkaulipon sa Kasugoan buot “maghimog maayong pasundayag sa lawas,” naglikay sa paglutos, ug may hinungdan sa pagpasigarbo. Bisan pa niana, gipakita ni Pablo nga dili ang pagkamay-sirkunsisyon o ang pagkawalay-sirkunsisyon ang hinungdanon. Hinunoa, ang “usa ka bag-ong pagkatawo ang hinungdanon.” Ang kalinaw ug kaluoy maoy iyang giampo nga maanaa unta sa espirituwal nga Israel, ug niadtong bag-ong pagkabinuhat.
Ang sulat ni Pablo ngadto sa mga taga Galacia nagtabang kanila sa pagsukol niadtong naningkamot sa pagpaulipon kanila sa espirituwal. Hinaot nga kini usab motabang kanato nga ipasundayag ang mga bunga sa espiritu ug mobarog nga malig-on diha sa Kristohanong kagawasan.
[Kahon/Hulagway sa panid 23]
Mga Timaang Marka: “Manghinaot ako nga wala na untay mosamok kanako,” misulat si Pablo, “kay ako nagadala sa akong lawas sa mga timaang marka sa usa ka ulipon ni Jesus.” (Galacia 6:17) Taliwala sa pipila sa karaang mga pagano, ang mga ulipon patikan sa pagpaila sa ilang mga tag-iya. Piho, ang daghang pisikal nga mga pag-abuso nga gipahamtang diha sa lawas ni Pablo tungod sa iyang Kristohanong pag-alagad nagbilin ug pipila ka ulat, nga nagpamatuod sa iyang pangangkon ingong usa ka matinumanong ulipon ni Kristo, usa ka ulipon nga gilutos tungod ug alang Kaniya. (2 Corinto 11:23-27) Tingali kini mao “ang mga timaang marka” nga gihisgotan ni Pablo, o tingali maoy anaa sa iyang hunahuna ang kinabuhi nga iyang gisubay ingong usa ka Kristohanon, nagpasundayag sa mga bunga sa espiritu sa Diyos ug nagtuman sa iyang ministeryo.
[Hulagway]
Ang Romanong mga ulipon napugos sa pag-alagad sa ilang mga agalon, apan si Pablo maoy usa ka mainandamon ug malipayong ulipon ni Jesu-Kristo