Nahinumdom Ka Ba?
Gipabilhan mo ba ang pagbasa sa bag-ong mga gula sa Ang Bantayanang Torre? Buweno, sulayi kon makatubag ka ba sa mosunod nga mga pangutana:
• Kanus-a giduaw sa mga astrologo si Jesus?
Ang usa ka edisyon sa Bibliya mikomento: “Ang mga Mago wala moduaw kang Jesus sa pasungan sa gabii nga siya natawo, dili sama sa mga magbalantay sa karnero. Sila miduaw pipila ka bulan sa ulahi.” Nianang tungora si Jesus usa na ka “bata” ug nagpuyo sa usa ka balay. (Mat. 2:7-11) Kon gigasahan pa si Jesus ug bulawan ug mahalong mga gasa sa gabii nga siya natawo, nan nganong duha ra man ka langgam ang gihalad ni Maria didto sa templo 40 ka adlaw sa ulahi?—1/1, panid 31.
• Unsay mahimo sa daghan aron mapalambo ang ilang kinabuhi?
Makapangutana tingali ang usa, ‘Mausab ko ba ang akong mga kahimtang ug mapayano ang akong pagkinabuhi?’ Kanay gihimo ni Amy. Siya dato apan dili malipayon. Siya nakaamgo nga ang pagpangagpas ug usa ka karera niining kalibotana diriyot nang nakapahisalaag kaniya gikan sa pagtuo. Busa, mihukom siya sa pag-una sa intereses sa Gingharian ug nagpayunir sulod sa pipila ka panahon. Si Amy miingon, “Mibati na ako karon ug katagbawan nga wala gayod nako mapahimusli dihang akong gigugol ang kadaghanan sa akong panahon sa pagtrabaho alang sa kalibotan.”—1/15, panid 19.
• Unsay makatabang sa mga inahan sa pagkaplag ug katagbawan?
Daghang inahan ang nanarbaho. Gihimo kini sa uban aron matagan-an ang pangunang mga panginahanglan sa pamilya, ug ang uban naghimo niini aron makabaton ug pinansiyal nga kagawasan o aron ilang matagbaw ang ilang mga luho. Ang uban usab nagtrabaho tungod kay sila nagmalipayon sa ilang trabaho. Ang Kristohanong mga inahan adunay hinungdanon kaayong papel diha sa panimalay—ilabina samtang gagmay pa ang mga bata. Ang pipila nagtrabaho na lang nga partaym o miundang sa ilang sekular nga trabaho aron mahatagan nilag mas dakong pagtagad ang pamilya, ug ingong resulta sila mibatig dakong katagbawan.—2/1, panid 28-31.
• Unsang “kaliwatan” ang gitumong ni Jesus diha sa iyang mga pulong nga natala sa Mateo 24:34?
Si Jesus subsob naggamit sa pulong “kaliwatan” sa negatibong paagi sa dihang nagtumong o naghisgot bahin sa daotang mga tawo. Apan dili kini mao ang iyang gitumong sa dihang nakig-estorya siya sa iyang mga tinun-an, kinsa wala madugay human niadto gidihogan sa balaang espiritu. Sila gayod ang makahimog mga konklusyon nga gihisgotan diha sa Mateo 24:32, 33. Busa si Jesus lagmit nagtumong sa iyang dinihogang mga sumusunod bahin sa kapadapatan sa iyang mga pulong sa unang siglo ug sa atong modernong panahon.—2/15, panid 23-4.
• Sa unsang paagi ang Balaod nahimong usa ka mag-aagak, sumala sa gihisgotan sa Galacia 3:24?
Kasagaran, ang usa ka mag-aagak sa karaang panahon maoy usa ka gisaligan nga ulipon nga magseguro sa kaluwasan sa usa ka bata ug iya gayong sundon ang mga gipanugon sa amahan niini. Sa samang paagi, ang Balaod nanalipod sa mga Hudiyo gikan sa makadaot nga mga impluwensiya, sama sa pagpakigminyo sa mga pagano. Apan ingong mag-aagak sa usa ka bata, ang Balaod maoy temporaryo, nga nag-alagad hangtod miabot si Kristo.—3/1, panid 18-21.
• Uyon sa Santiago 3:17, unsang mga hiyas ang angay natong ipasundayag?
Tungod kay kita putli, kinahanglan natong isalikway dihadiha ang daotang mga butang. (Gen. 39:7-9) Kita angayng magmakigdaiton usab, nga maglikay sa pagkaagresibo o sa mga lihok nga makatugaw sa kalinaw. Busa maayong pangutan-on sa matag usa kanato ang iyang kaugalingon: ‘Nailhan ba akong makigdaiton o magubtanon? Kanunay ba akong may gikabangi? Dali ra ba akong masilo, o kanunay ba akong makapasilo sa uban? O ako ba andam sa pagpasaylo ug dili dayon ipamugos ang akong personal nga mga sukdanan nga mao gayoy sundon?’—3/15, panid 24-5.
• Nganong inanay mang giayo ni Jesus ang usa ka tawong buta? (Mar. 8:22-26)
Ang Bibliya wala maghatag ug espesipikong katin-awan. Apan lagmit nga niining higayona inanayng giayo ni Jesus ang buta aron makapasibo ang iyang mata sa bag-o niyang kahimtang. Kini nagpakita sa mahigugmaong kahingawa ni Jesus alang sa tawong buta.—4/1, panid 30.