Ayaw Tugoting May Mobabag Kanimo sa Paghupot ug Himaya

1, 2. (a) Unsay gipaila sa Hebreohanong mga pulong nga gihubad nga “himaya”? (b) Unsang mga pangutana ang tubagon niining artikuloha?

DIHANG makadungog sa pulong “himaya,” unsay imong mahunahunaan? Ang katahom sa kalalangan? (Sal. 19:1) Ang pagdayeg ug kadungganan nga ginahatag ngadto sa mga adunahan, maalamon, o malamposon? Sa Kasulatan, ang Hebreohanong mga pulong alang sa “himaya” nagpaila ug kabug-at. Kaniadto, ang salapi gama sa bulawan o plata. Kon mas bug-at ang sensilyo, mas dako ang bili niini. Mao nga ang mga pulong nga nagpaila ug kabug-at gigamit sa paghubit sa butang nga bililhon o dalayegon kaayo.

² Kita sagad modayeg sa gahom, posisyon, o dungog sa uban. Apan unsay basehanan sa Diyos sa paghatag sa tawo ug himaya? Ang Proverbio 22:4 nag-ingon: “Ang sangpotanan sa pagpaubos ug pagkahadlok kang Jehova maoy bahandi ug himaya ug kinabuhi.” Ug ang tinun-ang si Santiago misulat: “Ipaubos ninyo ang inyong kaugalingon sa mga mata ni Jehova, ug kamo iyang pagabayawon.” (Sant. 4:10) Unsa ang himaya nga ginahatag ni Jehova sa mga tawo? Unsay makababag kanato sa paghupot niana? Ug sa unsang paagi kita makatabang sa uban sa paghupot niana?

3-5. Sa unsang paagi kita gihatagan ni Jehova ug himaya?

³ Gipahayag sa salmista ang iyang pagsalig nga si Jehova magkupot sa iyang tuong kamot ug dad-on siya ngadto sa tinuod nga himaya. (Basaha ang Salmo 73:23, 24.) Sa unsang paagi kini ginahimo ni Jehova? Iyang gipasidunggan ang iyang mapainubsanong mga alagad sa daghang paagi. Pananglitan, gitabangan niya sila nga masabtan ang iyang kabubut-on. (1 Cor. 2:7) Gitugotan usab niya kadtong mamati ug motuman sa iyang mga sugo nga makabatog suod nga relasyon kaniya.​—Sant. 4:8.

⁴ Gisalig usab ni Jehova sa iyang mga alagad ang usa ka mahimayaong bahandi, ang Kristohanong ministeryo. (2 Cor. 4:1, 7) Kini nga ministeryo motultol ngadto sa himaya. Alang niadtong nakigbahin niini aron madayeg si Jehova ug matabangan ang uban, siya misaad: “Silang nagpasidungog kanako akong pasidunggan.” (1 Sam. 2:30) Sila gipasidunggan kay ilang nabatonan ang maayong ngalan atubangan ni Jehova ug sa ubang alagad sa Diyos.​—Prov. 11:16; 22:1.

⁵ Unsay kaugmaon niadtong ‘naglaom kang Jehova ug nagbantay sa iyang dalan’? Sila gisaaran: “Siya [Jehova] magabayaw kanimo aron sa pagpanag-iya sa yuta. Sa dihang pagalaglagon ang mga daotan, ikaw makakita niana.” (Sal. 37:34) Sila naghinamhinam sa dili ikatanding himaya, ang pagdawat ug kinabuhing walay kataposan.​—Sal. 37:29.

6, 7. Nganong daghan ang wala motuo kang Jesus?

⁶ Unsay makababag sa atong pagdawat sa himaya nga gikan kang Jehova? Usa niini ang paghatag ug sobrang importansiya sa opinyon sa mga tawong walay pag-uyon sa Diyos. Matikdi ang gisulat ni apostol Juan bahin sa pipila ka lider sa adlaw ni Jesus: “Daghan bisan gani sa mga magmamando ang nagbutang usab ug pagtuo [kang Jesus], apan tungod sa mga Pariseo wala nila ipahayag siya, aron sila dili mapalagpot gikan sa sinagoga; kay labi pa nilang gihigugma ang himaya sa mga tawo kay sa himaya sa Diyos.” (Juan 12:42, 43) Nakabenepisyo unta ang maong mga lider kon wala pa nila hatagig sobrang importansiya ang opinyon sa mga Pariseo.

⁷ Sa sinugdanan sa iyang ministeryo, gipatin-aw ni Jesus kon nganong daghan ang dili modawat ug motuo kaniya. (Basaha ang Juan 5:39-44.) Ang nasod sa Israel gatosan ka tuig nang nagpaabot sa Mesiyas. Dihang si Jesus nagsugod sa pagpanudlo, lagmit nasabtan na sa pipila gikan sa tagna ni Daniel nga miabot na ang tinudlong panahon sa pagtungha sa Mesiyas. Gani, pipila ka bulan sa miagi dihang nagsangyaw si Juan nga Tigbawtismo, daghan ang miingon: “Siya na ba kaha ang Kristo?” (Luc. 3:15) Apan dihang mitungha ang dugay nang gipaabot nga Mesiyas, ang mga batid sa Balaod wala motuo kaniya. Gipunting ni Jesus ang rason dihang siya nangutana kanila: “Unsaon man ninyo sa pagtuo, dihang nagadawat kamo ug himaya gikan sa usag usa ug wala ninyo tinguhaa ang himaya nga gikan sa bugtong nga Diyos?”

8, 9. Iilustrar kon sa unsang paagi ang himaya sa tawo mahimong makasapaw sa himaya sa Diyos.

⁸ Ang himaya sa tawo mahimong makasapaw sa himaya sa Diyos. Sa pag-ilustrar, atong itandi ang himaya ngadto sa kahayag. Ang atong uniberso mahimayaon gayod tungod sa naggilak-gilak nga mga kahayag niini. Nahinumdom ka ba dihang nagsud-ong sa tin-aw nga kalangitan panahon sa kagabhion ug nakita ang libolibong bituon? Makapahingangha gayod “ang himaya sa mga bituon.” (1 Cor. 15:40, 41) Apan, komosta kon magsud-ong ka sa kalangitan diha sa siyudad nga punog suga? Aw, halos dili na nato makita ang kahayag sa mga bituon! Tungod ba kay mas hayag o mas nindot ang suga sa kadalanan, estadyum, ug mga bilding kay sa kahayag sa mga bituon? Dili! Tungod kini kay mas duol kita sa kahayag sa mga suga sa siyudad ug nasapawan niini ang kahayag sa mga bituon. Aron makita ang kanindot sa kalangitan, kinahanglang mopalayo kita gikan sa maong artipisyal nga mga kahayag.

⁹ Sa susama, kon mas duol sa atong kasingkasing ang sayop nga matang sa himaya, basin makababag kini sa atong pagpabili ug pagtinguha sa himaya nga andam ihatag ni Jehova. Daghan ang dili modawat sa mensahe sa Gingharian kay nahadlok sila sa hunahunaon sa ilang mga higala o membro sa pamilya. Apan posible ba usab kining mahitabo sa dedikadong mga alagad sa Diyos? Ibutang ta nga ang usa ka batan-ong brader giasayn sa pagsangyaw sa teritoryo diin daghan ang nakaila niya apan wala pa mahibalo nga siya Saksi ni Jehova. Mahadlok ba siya ug dili na lang mosangyaw? O komosta kon ang usa biaybiayon tungod sa iyang teokratikanhong mga tumong? Magpaimpluwensiya ba siya niadtong walay pagpabili sa pag-alagad kang Jehova? O tingali ang usa ka Kristohanon nakahimog seryosong sala. Tagoan ba niya kini tungod sa kahadlok nga madaot ang iyang reputasyon diha sa kongregasyon o masakitan ang iyang mga minahal? Kon gusto niyang mapasig-uli ang iyang relasyon kang Jehova, “magpatawag siyag mga ansiyano sa kongregasyon” ug mangayog tabang.​—Basaha ang Santiago 5:14-16.

10. (a) Unsay lagmit mahitabo kon sobra kitang mabalaka sa hunahunaon sa uban kanato? (b) Unsay gipasalig kanato kon kita mapainubsanon?

¹⁰ Tingali nagauswag na kita sa espirituwal apan dunay isigkamagtutuo nga nagtambag kanato. Makabenepisyo kita sa iyang tambag kon dili nato kini balewalaon tungod sa garbo, kahadlok nga maulawan, o sa tinguha nga ipakamatarong ang kaugalingon. Komosta kon duna kay proyekto uban sa usa ka igsoon? Mabalaka ka ba nga basin siya ang dayegon sa imong maayong mga ideya ug mga paghago? Kon maanaa ka sa maong mga situwasyon, hinumdomi nga “siya nga mapainubsanon sa espiritu makahupot ug himaya.”​—Prov. 29:23.

11. Unsay angay natong bation dihang makadawat ug komendasyon, ug ngano?

¹¹ Ang mga magtatan-aw ug kadtong ‘nagapangab-ot’ sa maong katungdanan angay usab magbantay nga dili magtinguhag pagdayeg gikan sa tawo. (1 Tim. 3:1; 1 Tes. 2:6) Unsay angayng bation sa usa ka brader dihang komendahan sa iyang maayong nahimo? Siyempre, dili siya magtukod ug monyumento alang sa iyang kaugalingon, sama sa gihimo ni Haring Saul. (1 Sam. 15:12) Apan isipon ba niya nga ang iyang kalamposan maoy tungod sa dili takos nga kalulot ni Jehova, ug nga ang iyang mga kalamposan sa umaabot nagdepende gihapon sa panalangin ug tabang sa Diyos? (1 Ped. 4:11) Ang atong bation dihang dayegon magpadayag kon unsang matanga sa himaya ang atong gitinguha.​—Prov. 27:21.

12. Nganong wala mamati kang Jesus ang pipila ka Hudiyo?

¹² Ang laing butang nga makababag sa atong paghupot ug himaya gikan sa Diyos mao ang sayop nga mga tinguha. Kini makapugong kanato sa pagdawat sa kamatuoran. (Basaha ang Juan 8:43-47.) Giingnan ni Jesus ang pipila ka Hudiyo nga wala sila mamati sa iyang mensahe kay ‘buot nilang buhaton ang mga tinguha sa ilang amahan nga mao ang Yawa.’

13, 14. (a) Unsay giingon sa mga tigdukiduki bahin sa atong utok ug sa pagpaminaw sa tingog sa tawo? (b) Ang atong pilion nga paminawon nagdepende sa unsa?

¹³ Usahay, ang atong paminawon kadto lang gusto natong madunggan. (2 Ped. 3:5) Kita gidisenyo ni Jehova nga may talagsaong katakos nga balewalaon ang ubang kabanha. Hunong kadiyot ug paminaw. Pila ka tingog ang imong nadunggan karon? Lagmit ganina wala nimo mamatikdi ang pipila niini. Ang limbic system sa atong utok motabang kanato sa pagpokus sa usa lang ka tingog bisag madungog ang ubang tingog. Apan nadiskobrehan sa mga tigdukiduki nga mas lisod kini himoon kon ang tingog gikan sa mga tawong nagsulti. Sa ato pa, kon magdungan ug sulti ang duha ka tawo, kinahanglang mopili ka kon kinsay imong paminawon. Siyempre, pilion nimo ang imong gustong paminawon. Ang mga Hudiyo nga buot mobuhat sa tinguha sa ilang amahan, ang Yawa, wala mamati kang Jesus.

¹⁴ Ang Bibliya nag-ingon nga ang “kaalam” ug ‘kahungog’ samag mga tingog nga kanunayng nagdapit kanato sa pagpamati sa ilang mga mensahe. (Prov. 9:1-5, 13-17) Hinunoa, kita makapili. Kinsay atong paminawon? Nagdepende kana kon kinsay buot natong pahimut-an. Ang mga karnero ni Jesus mamati sa iyang tingog ug mosunod kaniya. (Juan 10:16, 27) Sila “dapig sa kamatuoran.” (Juan 18:37) “Wala sila makaila sa tingog sa mga estranyo.” (Juan 10:5) Ang maong mga mapainubsanon nagahupot ug himaya.​—Prov. 3:13, 16; 8:1, 18.

15. Sa unsang paagi ang mga kasakitan ni Pablo ‘nagkahulogan ug himaya’ alang sa uban?

¹⁵ Ang atong pagkamalahutayon sa pagbuhat sa kabubut-on ni Jehova makatabang sa uban sa paghupot ug himaya. Si Pablo misulat ngadto sa kongregasyon sa Efeso: “Ako nagahangyo kaninyo nga dili moangka tungod sa akong mga kasakitan alang kaninyo, kay kini nagkahulogan man ug himaya alang kaninyo.” (Efe. 3:13) Sa unsang diwa ang mga kasakitan ni Pablo ‘nagkahulogan ug himaya’ alang sa mga taga-Efeso? Ang pagkaandam ni Pablo sa pag-alagad kanila bisan pa sa mga pagsulay nagtudlo sa mga taga-Efeso nga ang pag-alagad sa Diyos mao ang labing bililhon alang sa mga Kristohanon. Kon mihunong pa si Pablo tungod sa mga pagsulay, basig hunahunaon sa mga igsoon nga ang ilang relasyon kang Jehova, ilang ministeryo, ug ang ilang paglaom dili importante. Pinaagi sa paglahutay ni Pablo, iyang gipakita nga ang pagkahimong sumusunod ni Jesus takos sa bisan unsang sakripisyo.

16. Unsang kasakitan ang nasinati ni Pablo sa Listra?

¹⁶ Hunahunaa ang epekto sa kadasig ug pagkamalahutayon ni Pablo ngadto sa uban. Ang Buhat 14:19, 20 nag-ingon: “Ang mga Hudiyo nangabot gikan sa Antioquia ug Iconio ug nangombinsir sa mga panon sa katawhan, ug ilang gibato si Pablo ug giguyod siya gawas sa siyudad [sa Listra], nga naghunahunang siya patay na. Apan, sa dihang ang mga tinun-an mialirong kaniya, siya mitindog ug misulod ngadto sa siyudad. Ug sa pagkasunod nga adlaw siya migikan uban kang Bernabe paingon sa Derbe.” Hunahunaa kon unsa ka lisod para kang Pablo nga magbaktas ug 100 kilometros human siya gibato nga hapit niyang ikamatay!

17, 18. (a) Sa unsang diwa gisundan pag-ayo ni Timoteo ang pag-antos ni Pablo sa Listra? (b) Unsay epekto kang Timoteo sa pagkamalahutayon ni Pablo?

¹⁷ Usa ba si Timoteo sa “mga tinun-an” nga mitabang kang Pablo? Walay giingon ang basahon sa Mga Buhat, apan posible kini. Matikdi ang giingon ni Pablo sa iyang ikaduhang sulat kang Timoteo: “Imong gisunod pag-ayo ang akong gitudlo, ang akong paagi sa pagkinabuhi, . . . ang mga butang nga nahitabo kanako didto sa Antioquia [gipalayas sa siyudad], sa Iconio [gisulayang batoon], sa Listra [gibato], ang matang sa mga paglutos nga akong giantos; apan gikan niining tanan giluwas ako sa Ginoo.”​—2 Tim. 3:10, 11; Buh. 13:50; 14:5, 19.

¹⁸ ‘Gisundan pag-ayo’ ni Timoteo ang maong mga hitabo sa diwa nga nasayod siya pag-ayo sa pagkamalahutayon ni Pablo. Daghag nakat-onan si Timoteo sa panig-ingnan ni Pablo. Sa pagduaw ni Pablo sa Listra, iyang nakita nga si Timoteo maoy usa ka sulondang Kristohanon, diin “ang mga igsoon sa Listra ug Iconio may maayong panghimatuod kaniya.” (Buh. 16:1, 2) Sa ulahi, si Timoteo mikuwalipikar sa pagdawat ug bug-at nga mga responsabilidad.​—Filip. 2:19, 20; 1 Tim. 1:3.

19. Unsay epekto sa atong pagkamalahutayon ngadto sa uban?

¹⁹ Kon padayon natong buhaton ang kabubut-on sa Diyos, ang atong panig-ingnan makatabang ilabina sa mga batan-on nga mahimong bililhon kaayong mga alagad sa Diyos. Ang mga batan-on dili lamang maniid ug makakat-on sa atong paagi sa pagpakig-estorya diha sa ministeryo, kondili makabenepisyo usab sila sa pagkakita kon giunsa nato pag-atubang ang mga kalisdanan sa kinabuhi. Si Pablo ‘padayong nag-antos sa tanang butang’ aron ang tanan nga magpabiling matinumanon ‘makabaton sa kaluwasan uban ang walay kataposang himaya.’​—2 Tim. 2:10.

20. Nganong padayon natong tinguhaon ang himaya nga gikan sa Diyos?

²⁰ Dili ba angay natong ipadayon ang ‘pagtinguha sa himaya nga gikan sa bugtong nga Diyos’? (Juan 5:44; 7:18) Kana gayod ang angay natong buhaton! (Basaha ang Roma 2:6, 7.) Si Jehova maghatag ug ‘kinabuhing walay kataposan niadtong nagapangitag himaya.’ Dugang pa, ang atong ‘paglahutay sa pagbuhat ug maayo’ magdasig sa uban nga magpabiling matinumanon, sa ingon makabenepisyo sa walay kataposan. Busa ayaw tugoting may mobabag kanimo sa paghupot sa himaya nga gikan sa Diyos.