Padayon sa Paglakaw Diha sa Dalan ni Jehova

“Paglaom kang Jehova ug pagbantay sa iyang dalan, ug siya magabayaw kanimo sa pagpanunod sa yuta.”​—SALMO 37:34.

1, 2. Unsay nalangkit sa paglakaw diha sa dalan ni Jehova alang kang Haring David, ug unsay gikinahanglan niini alang kanato karon?

“IPAHIBALO kanako ang dalan nga akong pagalaktan, kay kanimo gibayaw ko ang akong kalag.” (Salmo 143:8) Ang mga Kristohanon karon bug-os-kalag nga nagsubli nianang mga pulonga ni Haring David. Sila sinserong nagtinguha sa pagpahimuot kang Jehova ug paglakaw diha sa iyang dalan. Unsay nalangkit niini? Alang kang David, nagkahulogan kini ug pagbantay sa balaod sa Diyos. Naglangkit kini ug pagsalig kang Jehova inay kay sa pagpakig-alyansa sa mga nasod. Oo, ug kini nagkahulogan ug maunongong pag-alagad kang Jehova, dili sa mga diyos sa silingang mga katawhan. Alang sa mga Kristohanon, ang paglakaw diha sa dalan ni Jehova naglangkit ug labaw pa.

² Sa usa ka bahin, ang paglakaw diha sa dalan ni Jehova karong adlawa nagkahulogan ug pagpasundayag ug pagtuo sa halad lukat ni Jesu-Kristo, nga nag-ila kaniya ingong “ang dalan ug ang kamatuoran ug ang kinabuhi.” (Juan 3:16; 14:6; Hebreohanon 5:9) Dugang pa, nagkahulogan kini ug pagtuman sa “balaod sa Kristo,” nga naglakip sa pagpakita ug gugma sa usag usa, ilabina ngadto sa dinihogang mga igsoon ni Jesus. (Galacia 6:2; Mateo 25:34-40) Kadtong nagalakaw diha sa dalan ni Jehova nahigugma sa iyang mga prinsipyo ug mga sugo. (Salmo 119:97; Proverbio 4:5, 6) Ilang gipabilhan ang ilang bililhong pribilehiyo sa pagpakig-ambit sa Kristohanong ministeryo. (Colosas 4:17; 2 Timoteo 4:5) Ang pag-ampo maoy regular nga bahin sa ilang kinabuhi. (Roma 12:12) Ug sila ‘padayong nagbantay pag-ayo nga ang ilang paglakaw dili ingon sa dili-maalamon kondili ingon sa maalamon nga mga tawo.’ (Efeso 5:15) Sila tinong wala magsakripisyo sa espirituwal nga mga bahandi alang sa temporaryong materyal nga mga bentaha o gidili nga unodnong mga kalipay. (Mateo 6:19, 20; 1 Juan 2:15-17) Lain pa, ang pagkamaunongon kang Jehova ug pagsalig kaniya hinungdanon. (2 Corinto 1:9; 10:5; Efeso 4:24) Ngano man? Tungod kay ang atong kahimtang susama nianang sa karaang Israel.

Ang Panginahanglan sa Pagsalig ug Pagkamaunongon

 3. Nganong ang pagkamaunongon, pagtuo, ug pagsalig motabang kanato nga magpadayong magalakaw diha sa dalan ni Jehova?

³ Ang Israel maoy gamay nga nasod nga gilibotan sa dili-mahigalaong mga silingan nga nalangkit sa mahilayong mga seremonyas sa pagsimba sa mga diyosdiyos. (1 Cronicas 16:26) Ang Israel lamang ang nagsimba sa bugtong matuod ug dili-makitang Diyos, si Jehova, ug siya nagbaod nga ilang huptan ang hataas nga moral nga mga sukdanan. (Deuteronomio 6:4) Susama karong adlawa, pipila ka milyon lamang nga mga tawo ang nagsimba kang Jehova, ug sila nagpuyo sa usa ka kalibotan nga duolan sa unom ka bilyong tawo kansang mga sukdanan ug relihiyosong panglantaw lahi kaayo sa ilaha. Kon nalakip kita nianang pipila ka milyon, kinahanglang magbantay kita nga dili maimpluwensiyahan sa sayop nga paagi. Sa unsang paagi? Ang pagkamaunongon ngadto kang Jehova nga Diyos, pagtuo kaniya, ug lig-ong pagsalig nga tumanon niya ang iyang mga saad makatabang. (Hebreohanon 11:6) Kini magpugong kanato sa pagsalig sa mga butang nga gilaoman sa kalibotan.​—Proverbio 20:22; 1 Timoteo 6:17.

 4. Nganong ang mga nasod “anaa sa kangitngit sa kaisipan”?

⁴ Gipakita ni apostol Pablo kon unsa gayod ka lahi ang mga Kristohanon gikan sa kalibotan sa dihang misulat siya: “Busa, kini akong isulti ug ipanaksi diha sa Ginoo, nga kamo dili na magpadayon sa paglakaw sama usab sa paglakaw sa kanasoran diha sa pagkawalay-pulos sa ilang mga kaisipan, samtang sila anaa sa kangitngit sa kaisipan, ug nahimulag gikan sa kinabuhi nga iya sa Diyos, tungod sa kawalay-alamag nga anaa kanila, tungod sa pagkakubol sa ilang mga kasingkasing.” (Efeso 4:17, 18) Si Jesus mao “ang matuod nga kahayag.” (Juan 1:9) Si bisan kinsa nga nagsalikway kaniya o nag-angkon nga nagtuo kaniya apan dili motuman sa “balaod sa Kristo” “anaa sa kangitngit sa kaisipan.” Imbes magalakaw diha sa dalan ni Jehova, sila “nahimulag gikan sa kinabuhi nga iya sa Diyos.” Bisag gihunahuna pa nilang maalamon sila sa kalibotanong paagi, sila ‘walay-alamag diha kanila’ mahitungod sa bugtong kahibalo nga motultol sa kinabuhi, kanang bahin kang Jehova nga Diyos ug kang Jesu-Kristo.​—Juan 17:3; 1 Corinto 3:19.

 5. Bisan tuod ang kahayag sa kamatuoran nagasidlak diha sa kalibotan, nganong daghang kasingkasing ang dili-masanongon?

⁵ Bisan pa niana, ang kahayag sa kamatuoran nagasidlak diha sa kalibotan! (Salmo 43:3; Filipos 2:15) “Ang matuod nga kaalam mismo nagasinggit nga makusog sa kadalanan.” (Proverbio 1:20) Sa miaging tuig ang mga Saksi ni Jehova migugol ug kapin sa usa ka bilyong oras sa pagsulti sa ilang mga silingan mahitungod kang Jehova nga Diyos ug kang Jesu-Kristo. Gatosan ka libo ang misanong. Apan, kita ba matingala nga daghang uban pa ang wala mosanong? Dili. Si Pablo naghisgot bahin sa “pagkakubol sa ilang mga kasingkasing.” Ang uban dunay dili-masanongong kasingkasing tungod sa kahakog o gugma sa salapi. Ang uban naimpluwensiyahan sa bakak nga relihiyon o sa sekular nga panglantaw nga kaylap kaayo karong adlawa. Ang malisod nga mga kasinatian sa kinabuhi mitultol sa daghan sa pagtalikod sa Diyos. Ang uban dili gustong mokab-ot sa hataas nga moral nga mga sukdanan ni Jehova. (Juan 3:20) Ang kasingkasing ba sa usa nga nagalakaw diha sa dalan ni Jehova mahimong dili-sensitibo nianang bahina?

6, 7. Bisan tuod magsisimba sila ni Jehova nga Diyos, sa unsang mga higayon nga ang mga Israelinhon nangahulog, ug ngano?

⁶ Nahitabo gayod kini sa karaang Israel, sumala sa gipakita ni Pablo. Siya misulat: “Kining mga butanga nahimong atong mga panig-ingnan, aron dili kita mahimong mga tawong nagatinguha sa makadaot nga mga butang, ingon sa ilang pagtinguha niini. Ni mahimong mga tigsimbag idolo, ingon sa gihimo sa pipila kanila; maingon sa nahisulat: ‘Ang katawhan milingkod aron mokaon ug moinom, ug sila nanindog aron maglipaylipay.’ Ni kita magapakighilawas, ingon sa pipila kanilang nakighilawas, aron lamang mangapukan, kaluhaag-tulo ka libo kanila sa usa ka adlaw.”​—1 Corinto 10:6-8.

⁷ Si Pablo unang nagtumong sa higayon dihang ang Israel nagsimba ug bulawang nating baka diha sa tiilan sa Bukid sa Sinai. (Exodo 32:5, 6) Kini maoy laktod nga pagsupak sa sugo sa Diyos nga giuyonan nilang sugton pipila lamang ka semana una pa niana. (Exodo 20:4-6; 24:3) Unya, si Pablo nagtumong sa panahon dihang ang Israel miyukbo ngadto kang Baal uban sa mga anak nga babaye sa Moab. (Numeros 25:1-9) Ang pagsimba sa nating baka nailhan pinaagi sa sobrang pagpatuyang sa kaugalingon, ‘paglipaylipay.’a Ang pagsimba kang Baal giduyogan sa dayag kaayong seksuwal nga imoralidad. (Pinadayag 2:14) Nganong ang mga Israelinhon nakahimo niini nga mga sala? Tungod kay ilang gitugotan ang ilang kasingkasing nga ‘magtinguha sa makadaot nga mga butang’​—ang idolatriya man o ang mahilayong mga buhat nga miduyog niana.

 8. Unsay atong makat-onan gikan sa mga kasinatian sa Israel?

⁸ Gipakita ni Pablo nga kinahanglang makakat-on kita gikan niining mga hitaboa. Makakat-on sa unsa? Ang usa ka Kristohanon dili tingali moyukbo sa usa ka bulawang nating baka o sa karaang Moabinhong diyos. Apan komosta ang imoralidad o walay-pugong nga pagpatuyang-sa-kaugalingon? Komon kini karong adlawa, ug kon tugotan nato ang tinguha alang niana nga motubo diha sa atong kasingkasing, kini magpahilayo kanato gikan kang Jehova. Ang resulta susama ra nga kita nakahimog idolatriya​—mahilayo gikan sa Diyos. (Itandi ang Colosas 3:5; Filipos 3:19.) Sa pagkatinuod, si Pablo nagtapos sa iyang paghisgot nianang mga hitaboa pinaagi sa pag-awhag sa kaubang mga magtutuo: “Kalagiw gikan sa idolatriya.”​—1 Corinto 10:14.

Tabang sa Paglakaw Diha sa Iya sa Diyos nga Dalan

 9. (a) Unsang tabang ang atong madawat aron magpadayon kita sa paglakaw sa dalan ni Jehova? (b) Unsay usa ka paagi nga madungog nato ang ‘pulong sa atong likod’?

⁹ Kon determinado kita nga magpadayon sa paglakaw diha sa dalan ni Jehova, dili kita pasagdan nga walay tabang. Si Isaias mitagna: “Ang imong mga igdulungog makadungog ug pulong sa imong likod nga nagaingon: ‘Kini mao ang dalan. Lakaw diha niana, katawhan ko,’ kon kamo moliko sa tuo o kon kamo moliko sa wala.” (Isaias 30:21) Sa unsang paagi ang ‘atong igdulungog’ makadungog nianang ‘pulong sa atong likod’? Aw, walay tawo karon nga makadungog ug literal nga tingog o makadawat ug personal nga mensahe gikan sa Diyos. Ang “pulong” nga madungog modangat kanatong tanan sa samang paagi. Una ug labing hinungdanon, kini modangat pinaagi sa dinasig nga Kasulatan, ang Bibliya, nga naundan sa mga hunahuna sa Diyos ug usa ka talaan sa iyang mga pakiglabot sa mga tawo. Sanglit sa adlaw-adlaw naladlad kita sa propaganda gikan sa mga tuboran nga “nahimulag gikan sa kinabuhi nga iya sa Diyos,” aron mabatonan ang maayong espirituwal nga panglawas, kinahanglang mobasa kita sa Bibliya ug mamalandong niana kanunay. Kini motabang kanato sa paglikay sa “kawang nga mga butang” ug mahimong “bug-os makasarang, kompleto nga masinangkapan alang sa tanang maayong buhat.” (Buhat 14:14, 15; 2 Timoteo 3:16, 17) Kini maghatag kanatog kusog, magpalig-on kanato, ug motabang kanato ‘sa paghimo sa atong dalan nga malamposon.’ (Josue 1:7, 8) Busa, ang Pulong ni Jehova nag-awhag: “Karon, Oh mga anak, pamati kanako; oo, malipayon kadtong nagabantay sa akong mga dalan. Pamatia ang disiplina ug magmaalamon, ug ayaw kini isalikway.”​—Proverbio 8:32, 33.

10. Unsa ang ikaduhang paagi nga madungog nato ang ‘pulong sa atong likod’?

¹⁰ Ang ‘pulong sa atong likod’ modangat usab pinaagi sa “kasaligan ug mabuot nga ulipon,” kinsa nagtagana ug “pagkaon sa hustong panahon.” (Mateo 24:45-47) Usa ka paagi nga kining pagkaona gitagana maoy diha sa pinatik nga binase-sa-Bibliya nga mga publikasyon, ug sa di pa dugayng katuigan dagaya kining maong tagana sa pagkaon. Pananglitan, pinaagi sa magasing Bantayanang Torre, ang atong pagsabot sa tagna miuswag. Niining magasina, gidasig kita sa paglahutay diha sa buluhaton nga pagsangyaw ug paghimog tinun-an bisan pa sa nagauswag nga kawalay-pagtagad, gitabangan kita sa paglikay sa mga laang, ug giawhag kita sa pag-ugmad sa maayong Kristohanong mga hiyas. Pagkadako sa atong pagpabili sa maong pagkaon sa hustong panahon!

11. Isaysay ang ikatulong paagi nga madungog nato ang ‘pulong sa atong likod.’

¹¹ Ang kasaligan ug mabuot nga ulipon nagtagana usab ug pagkaon pinaagi sa atong regular nga mga tigom. Naglakip kini sa lokal nga mga tigom sa kongregasyon, kaduha sa usa ka tuig nga mga tigom diha sa mga sirkitong asembliya, ug sa mas dagko nga tinuig nga mga kombensiyon. Kinsang matinumanong Kristohanon ang dili magpabili nianang maong mga panagkatigom? Kini maoy hinungdanong tabang sa pagpaluyo kanato sa paglakaw diha sa dalan ni Jehova. Sanglit daghan ang kinahanglang mogugol ug daghang panahon sa trabaho o sa eskuylahan duyog niadtong dili nila samag pagtuo, ang regular nga Kristohanong pakig-uban literal nga makaluwas ug kinabuhi. Ang mga tigom maghatag kanato ug maayong kahigayonan sa ‘pagpasibot sa usag usa sa paghigugma ug sa maayong mga buhat.’ (Hebreohanon 10:24) Gihigugma nato ang atong mga igsoon, ug gusto natong makig-uban kanila.​—Salmo 133:1.

12. Unsang determinasyon ang nabatonan sa mga Saksi ni Jehova, ug giunsa nila kini pagpahayag di pa dugay?

¹² Napalig-on sa maong espirituwal nga pagkaon, halos unom ka milyong tawo karong adlawa ang nagalakaw diha sa dalan ni Jehova, ug minilyong uban pa ang nagtuon sa Bibliya aron sa pagkat-on kon sa unsang paagi mahimo kana. Sila ba nabugnaw o naluya sa kamatuoran nga sila diyutay ra kon itandi sa binilyon nga molupyo sa yuta? Wala gayod! Sila determinado sa pagpadayon sa pagtuman sa ‘pulong sa ilang likod,’ nga maunongong nagabuhat sa kabubut-on ni Jehova. Ingong publikong pagpasundayag niining maong determinasyon, panahon sa 1998/​99 nga “Iya sa Diyos nga Dalan sa Kinabuhi” nga Distrito ug Internasyonal nga mga Kombensiyon, ang mga delegado misagop sa usa ka resolusyon nga nagpahayag sa ilang kinasingkasing nga baroganan. Ang mosunod mao ang unod nianang maong resolusyon.

Resolusyon

13, 14. Unsang realistikanhong panglantaw sa kahimtang sa kalibotan ang nabatonan sa mga Saksi ni Jehova?

¹³ “Kita, ingong mga Saksi ni Jehova nga nagkatigom sa ‘Iya sa Diyos nga Dalan sa Kinabuhi’ nga Kombensiyon, tibuok-kasingkasing nga miuyon nga ang iya sa Diyos nga dalan mao ang labing maayong dalan sa kinabuhi. Apan, atong giila nga lahi ang gibati sa kinabag-an sa katawhan karon. Ang tawhanong katilingban nakasulay na sa daghang ideya, mga pilosopiya, ug relihiyosong mga ideya bahin sa kon unsay naglangkob sa labing maayong dalan sa kinabuhi. Ang matinud-anong pagsusi sa kasaysayan sa tawo ug sa mga kahimtang sa kalibotan karon nagpamatuod sa pagkakatuohan sa gipahayag sa Diyos nga nasulat sa Jeremias 10:23: ‘Dili iya sa tawo nga nagalakaw bisan ang pagtultol sa iyang lakang.’

¹⁴ “Kada adlaw makita nato ang dugang ebidensiya nga nagpamatuod sa pagkakatuohan niining mga pulonga. Sa kinadak-ang bahin, ang tawhanong katilingban nagsalikway sa iya sa Diyos nga dalan sa kinabuhi. Ang mga tawo nangagpas kon unsay morag matarong sa ilang panan-aw. Ang mga resulta makapaguol​—ang pagkabungkag sa pamilyahanong kinabuhi, nga naghimo sa mga anak nga walay giya; ang kaylap nga pagpangagpas sa materyalismo, nga natapos diha sa kahaw-ang ug kahigawad; ang binuang nga krimen ug kapintasan, nga mikalas ug daghang biktima; ang etnikong panagbangi ug mga gubat, nga mihunos ug hilabihan ka daghang tawhanong kinabuhi; ang nagdagsang nga imoralidad, nga nagpasamot sa epidemya sa mga sakit nga mapasa pinaagi sa pakigsekso. Kini maoy pipila lamang sa daghang komplikadong mga suliran nga mibalda sa pagpangagpas sa kalipay, pakigdait, ug kasegurohan.

15, 16. Mahitungod sa iya sa Diyos nga dalan sa kinabuhi, unsang determinasyon ang gipahayag diha sa resolusyon?

¹⁵ “Tungod sa makaluluoy nga kahimtang sa katawhan ug sa pagkaduol na sa ‘gubat sa dakong adlaw sa Diyos nga Labing-Gamhanan,’ nga gitawag ug Armagedon (Pinadayag 16:14, 16), kita ingong mga Saksi ni Jehova mihukom nga:

¹⁶ “Una: Gilantaw nato ang atong kaugalingon ingong iya ni Jehova nga Diyos, nga sa tagsatagsa nagpahinungod sa atong kaugalingon ngadto kaniya nga walay-pag-ukon-ukon, ug atong huptan ang dili-matarog nga pagtuo sa tagana ni Jehova nga lukat pinaagi sa iyang Anak, si Jesu-Kristo. Kita determinado nga molakaw diha sa iya sa Diyos nga dalan sa kinabuhi, nga mag-alagad ingong iyang mga Saksi ug magpasakop sa iyang pagkasoberano nga gipahayag pinaagi sa pagmando ni Jesu-Kristo.

17, 18. Unsang baroganan ang padayong huptan sa mga Saksi ni Jehova mahitungod sa moral nga mga sukdanan ug sa Kristohanong panag-igsoonay?

¹⁷ “Ikaduha: Magpadayon kita sa pagsunod sa hataas nga moral ug espirituwal nga mga sukdanan sa Bibliya. Kita determinado nga molikay sa paglakaw ingon sa mga nasod nga nagalakaw diha sa kawalay-pulos sa ilang mga kaisipan. (Efeso 4:17-19) Kita mihukom sa pagpabiling hinlo atubangan ni Jehova ug walay buling gikan niining kalibotana.​—Santiago 1:27.

¹⁸ “Ikatulo: Lig-on kitang manghawid sa atong Kasulatanhong baroganan ingong tibuok-kalibotang Kristohanong panag-igsoonay. Atong huptan ang Kristohanong neyutralidad taliwala sa mga nasod, nga dili tugotan ang atong kaugalingon nga malit-agan sa rasanhon, nasodnon, o etnikong pagdumtanay o pagkabahinbahin.

19, 20. (a) Unsay buhaton sa Kristohanong mga ginikanan? (b) Sa unsang paagi ang tanang matuod nga mga Kristohanon magpadayon sa pagpaila sa ilang kaugalingon ingong mga tinun-an ni Kristo?

¹⁹ “Ikaupat: Kitang mga ginikanan magtisok sa iya sa Diyos nga dalan diha sa atong mga anak. Magpakita kita ug panig-ingnan sa Kristohanong pagkinabuhi, nga naglakip sa regular nga pagbasa sa Bibliya, pagtuon sa pamilya, ug bug-os-kalag nga pagpakig-ambit diha sa Kristohanong kongregasyon ug sa ministeryo sa kanataran.

²⁰ “Ikalima: Kitang tanan maningkamot sa pag-ugmad sa diyosnong mga hiyas nga gipasundayag sa atong Maglalalang, ug maningkamot kita nga sundogon ang iyang personalidad ug ang iyang mga dalan, sama sa gibuhat ni Jesus. (Efeso 5:1) Kita mihukom nga himoon ang tanan natong mga kalihokan uban ang gugma, sa ingon nagpaila sa atong kaugalingon ingong mga tinun-an ni Kristo.​—Juan 13:35.

21-23. Unsay padayong buhaton sa mga Saksi ni Jehova, ug kombinsido sila sa unsa?

²¹ “Ikaunom: Nga walay hunong magpadayon kita sa pagsangyaw sa maayong balita sa Gingharian sa Diyos, sa paghimog mga tinun-an, ug tudloan nato sila sa iya sa Diyos nga dalan sa kinabuhi ug dasigon sila nga makadawat ug dugang pagbansay diha sa mga tigom sa kongregasyon.​—Mateo 24:14; 28:19, 20; Hebreohanon 10:24, 25.

²² “Ikapito: Ingong mga indibiduwal ug ingong relihiyosong organisasyon, magpadayon kita sa pag-una sa kabubut-on sa Diyos diha sa atong kinabuhi. Naggamit sa iyang Pulong, ang Bibliya, ingong atong giya, dili kita motipas sa tuo o sa wala, sa ingon nagpamatuod nga ang iya sa Diyos nga dalan labaw kaayo sa mga dalan sa kalibotan. Kita determinado nga mosubay sa iya sa Diyos nga dalan sa kinabuhi​—lig-on ug maunongon, karon ug sa walay-kataposan!

²³ “Gihimo nato kini nga resolusyon tungod kay kita bug-os nga nagsalig sa mahigugmaong saad ni Jehova nga siya nga nagabuhat sa kabubut-on sa Diyos magpabilin sa walay kataposan. Gihimo nato kini nga resolusyon tungod kay kombinsido kita nga ang pagkinabuhi sumala sa mga prinsipyo, tambag, ug pasidaan sa Kasulatan mosangpot sa labing maayong dalan sa kinabuhi karong adlawa ug magpahiluna ug maayong patukoranan alang sa umaabot, aron kita hugot nga makahawid sa tinuod nga kinabuhi. (1 Timoteo 6:19; 2 Timoteo 4:7b, 8) Labaw sa tanan, gihimo nato kini nga resolusyon tungod kay nahigugma kita kang Jehova nga Diyos uban sa tibuok natong kasingkasing, kalag, hunahuna, ug kusog!

24, 25. Unsa ang sanong sa giduso nga resolusyon, ug unsa ang determinasyon niadtong nagalakaw diha sa dalan ni Jehova?

²⁴ “Ang tanang nanambong niini nga kombensiyon nga mouyon sa pagsagop niini nga resolusyon, palihog moingon ug OO!”

²⁵ Gatosang natad-dulaanan ug mga estadyum sa tibuok kalibotan ang milanog samtang ang tanan nga nanambong mitubag pinaagig masipang “OO!” Ang mga Saksi ni Jehova wala magduhaduha nga sila magpadayon sa paglakaw diha sa dalan ni Jehova. Sila dunay bug-os nga pagsalig kang Jehova ug pagtuo nga iyang tumanon ang iyang mga saad. Sila magpabiling maunongon kaniya, bisan unsay dangatan. Ug sila determinado nga motuman sa iyang kabubut-on.

“Ang Diyos Dapig Kanato”

26. Unsa ang malipayong kahimtang niadtong nagalakaw diha sa dalan ni Jehova?

²⁶ Ang mga Saksi ni Jehova nahinumdom sa tambag sa salmista: “Paglaom kang Jehova ug pagbantay sa iyang dalan, ug siya magabayaw kanimo sa pagpanunod sa yuta.” (Salmo 37:34) Wala sila malimot sa makapadasig nga mga pulong ni Pablo: “Kon ang Diyos dapig kanato, kinsa ang mahimong batok kanato? Siya kinsa wala gani magpalingkawas sa iyang kaugalingong Anak apan nagtugyan kaniya alang kanatong tanan, nganong siya dili usab uban kaniya malulotong maghatag kanato sa tanang ubang butang?” (Roma 8:31, 32) Oo, kon magpadayon kita sa paglakaw diha sa dalan ni Jehova, siya magtagana kanato sa “tanang butang nga dagaya alang sa atong kalipayan.” (1 Timoteo 6:17) Wala nay labi pang maayong dapit kay sa atong nahimutangan​—nagalakaw diha sa dalan ni Jehova, duyog sa atong minahal nga mga igsoong lalaki ug babaye. Uban kang Jehova sa atong kiliran, magmadeterminado kita sa pagpabilin diha niana ug sa paglahutay hangtod sa kataposan, nga bug-os nga masaligon nga sa iyang gitakdang panahon, makita nato nga tumanon niya ang tanan niyang mga saad.​—Tito 1:2.

[Footnote]

Nahinumdom Ka Ba?

◻ Unsay gikinahanglan aron ang usa ka Kristohanon makalakaw diha sa dalan ni Jehova?

◻ Nganong kinahanglang ugmaron nato ang pagsalig kang Jehova ug pagkamaunongon ngadto kaniya?

◻ Unsang tabang ang mabatonan samtang kita magalakaw diha sa dalan ni Jehova?

◻ Ihatag ang pipila ka hinungdanong mga punto sa resolusyon nga gisagop panahon sa “Iya sa Diyos nga Dalan sa Kinabuhi” nga mga Kombensiyon.

[Mga hulagway sa panid 18]

Usa ka hinungdanong resolusyon ang gisagop sa “Iya sa Diyos nga Dalan sa Kinabuhi” nga Distrito ug Internasyonal nga mga Kombensiyon