Ang Relihiyon ba Makatagbaw sa Atong mga Panginahanglan?
UNSAY atong pagakan-on? Unsay atong pagaimnon? Unsay atong igasul-ob? Dunay pagkadinalian niining mga pangutanaha, ilabina kon malisod mabatonan ang pangunang mga kinahanglanon sa kinabuhi. Apan, matikdi kon unsay giingon ni Jesu-Kristo: “Ayaw na kamo pagkabalaka bahin sa inyong kinabuhi kon unsay inyong kan-on o unsay inyong imnon, o bahin sa inyong mga lawas kon unsay inyong ibesti.” (Mateo 6:25) Katingalahan ba kanang pamation? Gawas pa, kon may nagkulang ug kalan-on, sapot, ug puloy-anan, ang iyang gikinahanglan mao ang praktikal nga tabang, dili kanang gilantaw sa uban nga sum-ol nang relihiyosong mga pahayag.
Dili kay dili maluloy-on si Jesus, ni naglikay siya sa isyu. Siya nahibalo sa mga panginahanglan sa tawo. Bisan pa, nasayod usab siya sa tinuod nga kapeligrohan. Kon bahin na sa pagtagbaw sa atong mga panginahanglan, dali kaayong isentro nato ang atong kinabuhi sa materyal nga mga butang o sa paghunahuna nga dili-importante ang Diyos. Busa, kinahanglan unahon nato ang importanteng mga butang.
Atong ginauna ang importanteng mga butang kon atong sundon ang tambag ni Jesus: “Busa, padayon sa pagpangita pag-una sa gingharian ug sa pagkamatarong [sa Diyos], ug unya kining tanang mga butanga igadugang ra kaninyo.” (Mateo 6:33) Kon sundon nato kining tambaga, ang relihiyon—ang tinuod nga relihiyon binase sa mga kamatuoran sa Bibliya—makatagbaw sa atong mga panginahanglan.
Apan, dili kay dili realistiko si Jesus sa pagsugyot, nga ang pagkahimong usa sa iyang mga disipulo ug ang pagsunod sa iyang relihiyosong mga pagtulon-an makasulbad dayon sa tanan natong mga problema, ni nagpasabot usab siya nga ang iyang mga disipulo maglingkod lang ug maghulat nga tagan-an sila sa Diyos sa milagrosong paagi. Aw, ang tanan mahimong Kristohanon kon nagkahulogan kana ug dihadihang kagawasan gikan sa tanang mga kalisdanan sa kinabuhi! Ang gipasabot ni Jesus mao nga ang iyang Amahan, si Jehova nga Diyos, nagatagana sa tanang butang nga gikinahanglan sa pagtagbaw sa tanan natong mga panginahanglan. Maoy hinungdan nga si Jesus miingon usab: “Ang inyong langitnong Amahan nahibalo nga nagkinahanglan kamo niining mga butanga.”—Mateo 6:32.
Tagbawon usab ni Jehova ang hinungdanon natong espirituwal nga mga panginahanglan. Pinaagi sa iyang Balaang Kasulatan, kita iyang gihatagan ug dinasig nga giya aron sa pag-agak sa atong mga kinabuhi diha sa labing maayong paagi. (Isaias 48:17) Ang Diyos nagtukod ug pag-ubanay sa mga magsisimba nga mohatag ug tabang kon gikinahanglan. (Buhat 4:34) Mangilabot usab siya sa pagtabang sa iyang mga alagad pinaagi sa iyang balaang espiritu, o aktibong gahom. (Lucas 11:13; Galacia 5:22-25) Dugang pa, ang Diyos mihatag ug tagana sa pagpasig-uli sa Paraiso sa yuta.—Lucas 23:43; Pinadayag 21:1-4.
Pagtagbaw sa Atong Materyal nga mga Panginahanglan
Palandonga karon ang pila ka mga prinsipyo sa Bibliya nga nakatabang sa mga tawo sa pagtagbaw sa ilang materyal nga mga panginahanglan. Ang Kristohanong apostol Pablo misulat:
“Hinloan ta ang atong kaugalingon gikan sa tanang kahugaw sa lawas ug sa espiritu.” (2 Corinto 7:1)
Palandonga ang tanang mga problema nga atong maikyasan kon atong likayan ang kahugaw pinaagi sa tabako, ilegal nga mga droga, ug ubang mga butang nga makahugaw sa lawas. Ug mas maarang-arang ang atong pagkabutang kon dili nato usik-usikan ang atong salapi, panahon, ug hunahuna diha sa imoral nga basahon ug kalingawan nga makahugaw sa atong espiritu!
Ang Kasulatan nag-ingon usab:
“Ayaw pagtipon taliwala sa mga palainom sa bino, taliwala sa mga ulitan nga kumakaon sa unod. Kay ang mga palahubog ug ang ulitan modangat sa kawalad-on, ug ang pagkahingatulog magapasapot sa usa ka tawo sa mga nuog.” (Proverbio 23:20, 21)
Matikdi ang sangpotan sa pagkapalahubog ug pagkaulitan—kawalad-on ug mga nuog. Daghan karon—bisan relihiyoso kaayong mga tawo—kabos gihapon tungod kay naghinobra sila sa alkoholikong mga ilimon o giyanon sa mga butang nga makahugaw sa lawas. Ang paglikay niining mga butanga aron makasunod sa mga sukdanan sa Bibliya dako kaayog mahimo sa pagtabang kanato sa pagtagbaw sa atong mga panginahanglan sa pagkaon, sapot, ug puloy-anan.
Laing prinsipyo nga nakatabang sa mga Kristohanon sa pagtagbaw sa ilang mga panginahanglan makita diha sa mga pulong ni apostol Pablo:
“Kami masaligon nga kami nagabaton ug maayong kaisipan, nga nagatinguha sa pagkinabuhi nga dungganon sa tanang butang.” (Hebreohanon 13:18)
Ang pagkamatinuoron diha sa tanan nilang mga pakig-atubang nakahimo sa daghang mga Kristohanon sa pagtaganag maayo alang sa ilang kaugalingon ug sa ilang mga pamilya. Kini nakahatag kanilag maayong dungog, ug ang uban mas kiling sa pakignegosyo kanila. Ang tawong matinuoron tingali dili makabaton ug daghan sa materyal nga paagi, apan nabatonan niya ang pangunang mga kinahanglanon sa kinabuhi ug makatipig sa iyang pagtahod sa kaugalingon.
Suod nga nalangkit niini mao ang tambag:
“Ang kawatan kinahanglan dili na magpangawat, kondili magbudlay hinoon siya, nga magbuhat sa mga maayong butang pinaagi sa iyang mga kamot.” (Efeso 4:28)
Ang pagpadapat niining prinsipyoha nakatabang sa daghan sa pagbaton ug sa paghawid sa trabaho tungod kay sila kasaligan. Busa, sila makatagana alang sa ilang kaugalingon ug sa ilang mga pamilya. Inay magpatakod sa espiritu niining kalibotana, nga mopabuta sa mga mata sa daghang linimbong nga mga buhat, ang mga Kristohanon matinud-anon, ug kini mohatag ug maayong mga resulta.
Sa pag-ilustrar: Ang usa sa mga Saksi ni Jehova sa Japan gustong motrabaho ug pila lang ka oras sa usa ka semana aron makagugol ug dugang panahon alang sa espirituwal nga mga tumong. Apan, dihang mihangyo siya, gipapahawa siya sa iyang amo sa iyang trabaho. Ug, ang inahan sa amo nangutana: “Gipapahawa ba nimo ang labing kasaligang tawo?” Misamot pa ang kahimtang sa Saksi dihang naaksidente ang iyang likod samtang nagtrabaho sa laing trabaho. Wala magdugay tapos niadto, iyang nakasugat ang iyang amo kanhi, nga nasuko tungod kay nahibaloan niya nga ang usa sa iyang mga trabahante nagapangawat ug bulawan, platinum, ug mga singsing gikan sa iyang kompaniya sa alahas. Gihangyo gilayon sa amo ang Saksi sa pagbalik sa trabaho, ning higayona sa kaugalingong mga kondisyon sa Saksi. Nangita ang tawo ug matinud-anong trabahante.
Sumala kang apostol Pablo, ang Kristohanon angay “magbudlay” aron makatagana dili lang alang sa iyang kaugalingon kondili aron “may ikahatag usab siya ngadto sa nagakinahanglan.” (Efeso 4:28) Sa panahon sa kawalad-on, ang tinuod nga mga Kristohanon andam kanunay sa pagtabang sa uban. Mao kini ang naeksperyensiyahan sa usa ka pamilya sa Fiji sa dihang ang ilang balay naguba tungod sa bagyo samtang nanambong sila sa Kristohanong kombensiyon. Sa pagpauli sa balay, ilang nakita ang kalumpagan. Apan ilang nakita usab ang isigkamagtutuo nga malipayong migamit usab sa ilang kahinguhaan aron sa pagtagana sa pamilya ug puloy-anan ug hinabang aron makatukod pag-usab sa ilang balay. “Makalipay,” miingon ang amahan, “ang pagkasayod nga adunay mga Kristohanon nga tinuod nga nagatagad kanimo.”
Maluloy-on kaayo si Jesu-Kristo sa mga nagkinahanglan. Sa daghang mga okasyon, siya mismo mitabang sa nagkinahanglan sa usa ka paagi. Siyempre, si Jesus nahibalo basta gitugotan pa kining dunot nga sistema sa mga butang sa paglungtad, ang kawalad-on ug ubang sosyal nga mga problema magpabilin. (Juan 12:8) Busa, bisan ug daghan siyag natabang sa mga tawo sa materyal nga paagi, ang tinuod nga gipasiugda sa iyang ministeryo mao ang pagtagbaw sa ilang espirituwal nga mga panginahanglan.
Dihang napatagbaw ang kagutom sa panon sa katawhan nga misunod kang Jesus sa Capernaum, siya mihatag niining makahuloganong komento: “Kamo nangita kanako, dili tungod kay kamo nakakita sa mga milagro, kondili tungod kay kamo nakakaon man ug nangabusog sa tinapay. Ayaw paghagoi ang kalan-on nga mawagtang ra, kondili mao hinooy hagoi ninyo kanang kalan-on nga molungtad ngadto sa kinabuhing dayon, nga igahatag kaninyo sa Anak sa tawo.” (Juan 6:26, 27) Unsay buot ipasabot ni Jesus niana?
Ang gipasabot ni Jesus mao nga adunay kapeligrohan nga makig-uban ang mga tawo kaniya ug sa iyang mga disipulo tungod lamang sa materyal nga mga bentaha. Apan siya nahibalo nga kini dili mohatag ug malungtarong mga kaayohan. Busa siya miingon: “Malipayon ang mahunahunaon sa ilang espirituwal nga panginahanglan, kay ila ang gingharian sa langit. Malipayon ang gigutom ug giuhaw sa pagkamatarong, kay sila pagabusgon.”—Mateo 5:3, 6.
Gawas pa sa kagutom alang sa materyal nga pagkaon, adunay kagutom alang sa kamatuoran ug espirituwal nga katumanan. Ang tinuod nga kalipay moresulta dihang mapatagbaw kining espirituwal nga kagutom. Ang Kakristiyanohan nakapatunghag materyalistikong katilingban. Ang mga relihiyon sa sidlakan nagbutang sa mga tawo sa espirituwal nga kangitngit. Apan ang tinuod nga pagsimba—ang relihiyon ni Jesu-Kristo—nakatagbaw sa espirituwal nga mga panginahanglan sa mga tawo. Sama ang mahimo niini diha kanimo. Imong mabatonan kining maong mga tagana kon imong pahimuslan kini.
Pananglitan, usa ka Kristohanon nga nakigbahin sa pagsangyaw sa kadalanan, ang usa ka batan-on sa Mauritius midawat ug mga kopya sa Ang Bantayanang Torre ug sa kaubang basahon niini nga Pagmata! Sa pagkasunod semana, mibalik siya nga nangitag dugang mga magasin. Siya misaysay nga nagplano siya sa paghikog tungod sa iyang pinansiyal nga mga problema, apan natabangan siya sa mga magasin sa pagkahibalo nga adunay Diyos nga nagatagad kanato. Ang espirituwal nga kagutom sa batan-ong lalaki gisugdan sa pagtagbaw.
Makakita pa ba kaha kita ug panahon dihang bug-os mapatagbaw ang tanan natong mga panginahanglan? Ang Bibliya nagsaad nga kita makakita. Tinuod, ang mga tawo gikapoy na sa pagpamati sa daghang mga saad sa mas maayong butang sa umaabot. Sila makadaghan nang gipakyas. Apan makasalig kita sa mga saad sa Bibliya. Ang Awtor niini, si Jehova nga Diyos, magatuman sa tanang saad nga iyang gihimo. Maayo kaayong pagkapahayag kini ni Josue dihang iyang gipahinumdoman ang iyang kaubang mga Israelinhon: “Kamo nahibalo sa bug-os ninyong mga kasingkasing ug sa bug-os ninyong mga kalag nga walay usa ka butang nga nakawang sa tanang mga maayong butang nga gisulti ni Jehova, nga inyong Diyos, mahitungod kaninyo. Ang tanan nahitabo kaninyo. Walay usa ka butang niana nga nakawang.”—Josue 23:14.
Ang tinuod nga solusyon sa tanan natong mga problema nahasandig sa katumanan sa katingalahang mga saad sa Diyos sa paghinlo sa tibuok yuta. (Pinadayag 11:18) Ang tanan natong mga panginahanglan pagatagbawon sa dihang ipasig-uli sa iyang Gingharian ang Paraiso sa yuta, sa katumanan sa iyang orihinal nga katuyoan alang sa katawhan. (Mateo 6:9, 10) Dayon dili na unya kita makadungog sa ‘tingog sa pagbakho ug sa tingog sa paghilak’ gikan sa katawhan kansang mga panginahanglan dili mapatagbaw. Pinaagi sa matinud-anong pagtrabaho ug pinaagi sa pagpadapat sa diyosnong mga prinsipyo, ilang tagamtamon ang bug-os, makatagbawng kinabuhi.—Isaias 65:17-25.
Si Maria, ang Katolikong madre niadto nga gihisgotan sa sinugdan, nakabaton niini nga pagsalig. Iyang naamgohan nga siya nagkinabuhi sa espirituwal nga kangitngit sa daghang katuigan, nga gihampak sa mga kahadlok alang sa umaabot ug wala-makakita sa tinuod nga kahulogan sa kinabuhi. Apan nausab kanang tanan dihang nakat-onan niya ang kamatuoran sa Bibliya. “Gikan ako sa kangitngit paingon ngadto sa nagakasidlak nga kahayag,” siya miingon. (Salmo 43:3; Proverbio 4:18) Kini wala lamang nakatabang kaniya sa pagkab-ot sa iyang dihadiha nga mga panginahanglan sa materyal kondili napatagbaw usab ang iyang espirituwal nga kagutom ug kauhaw. Oo, ang relihiyon—tinuod nga relihiyon—makatagbaw sa atong mga panginahanglan.
[Hulagway sa panid 7]
Ang tinuod nga relihiyon motagbaw sa atong tanang panginahanglan