Mga Pangutana Gikan sa mga Magbabasa

Si Jesus nag-ingon: “Kon inyong pasayloon ang mga sala ni bisan kinsang mga tawo, kini mapinasaylo kanila; kon inyong ipabilin kadtong ila ni bisan kinsang mga tawo, kini sila magpabilin.” Kini bang mga pulonga nagpasabot nga ang mga Kristohanon makapasaylo ug mga sala?

Walay Kasulatanhong pasikaran sa paghinapos nga ang mga Kristohanon sa linangkob, o bisan ang tinudlong mga ansiano sa mga kongregasyon, awtorisado sa Diyos nga magapasaylo ug mga sala. Apan, ang gisulti ni Jesus ngadto sa iyang mga tinun-an sa Juan 20:23, nga gikutlo sa itaas, nagpaila nga gihatagan sa Diyos ang mga apostol ug linaing mga gahom niining bahina. Ug ang pahayag ni Jesus didto mahimong may kalabotan sa iyang giingon sa Mateo 18:18 mahitungod sa langitnong mga desisyon.

Ang mga Kristohanon makapasaylo ug pipila ka sala, uyon sa tambag ni apostol Pablo nga natala sa Efeso 4:32: “Magmaluloton ngadto sa usag usa, magmabination uban ang kalumo, bukas nga magapasaylo sa usag usa maingon nga ang Diyos usab pinaagi kang Kristo bukas nga mipasaylo kaninyo.” Dinhi si Pablo naghisgot bahin sa personal nga mga suliran taliwala sa mga Kristohanon, sama sa dili-mabinantayong sinultihan. Kinahanglang maningkamot sila sa paghusay niining mga butanga, nga magpasaylo sa usag usa. Hinumdomi ang mga pulong ni Jesus: “Nan, kon ikaw magdala sa imong gasa sa halaran ug didto mahinumdom ka nga ang imong igsoon may unsa mang butang batok kanimo, biyai ang imong gasa atubangan sa halaran, ug lakaw; pakigdait una sa imong igsoon, ug unya, sa makabalik ka na, itanyag ang imong gasa.”​—Mateo 5:23, 24; 1 Pedro 4:8.

Hinunoa, ang konteksto sa Juan 20:23 nagsugyot nga si Jesus nagtumong sa mas seryosong mga sala, ingon sa gipasabot sa uban niyang gipanulti alang niining espesipikong mamiminaw. Atong tan-awon kon ngano.

Sa adlaw nga siya gibanhaw, si Jesus mipakita sa mga tinun-an sa usa ka nakandadohang lawak sa Jerusalem. Ang asoy nag-ingon: “Busa, si Jesus miingon kanila pag-usab: ‘Hinaot nga kamo adunay kalinaw. Maingon nga ang Amahan nagpadala kanako, ako usab magapadala kaninyo.’ Ug human niya masulti kini iyang gihuypan sila ug miingon kanila: ‘Panagdawat kamo ug balaang espiritu. Kon inyong pasayloon ang mga sala ni bisan kinsang mga tawo, kini mapinasaylo kanila; kon inyong ipabilin kadtong ila ni bisan kinsang mga tawo, kini sila magpabilin.’”​—Juan 20:21-23.

Malagmit, ang mga tinun-an nga gihisgotan sa dakong bahin mao ang matinumanong mga apostoles. (Itandi ang bersikulo 24.) Pinaagi sa paghuyop kanila ug sa pag-ingon, “Panagdawat kamo ug balaang espiritu,” si Jesus sa simbolikong paagi nagpahibalo kanila nga sa dili magdugay ang balaang espiritu igabubo kanila. Si Jesus mipadayon sa pagsulti nga sila makabaton ug awtoridad may kalabotan sa pagpasaylo sa mga sala. Makataronganon, ang iyang duha ka pahayag konektado, ang usa nagtultol ngadto sa sunod.

Kalim-an ka adlaw gikan sa iyang pagkabanhaw, sa adlaw sa Pentekostes, gibubo ni Jesus ang balaang espiritu. Unsay nalampos niana? Ang usa ka kalamposan mao, kadtong nakadawat sa espiritu natawo pag-usab ingong espirituwal nga mga anak sa Diyos uban sa paglaom nga mahimong mga isigkamagmamando ni Kristo sa langit. (Juan 3:3-5; Roma 8:15-17; 2 Corinto 1:22) Apan kanang maong pagbubo sa espiritu labaw pa ug nahimo. Ang pila ka nakadawat nakabaton ug milagrosong mga gahom. Pinaagi niana ang pila makasulti ug langyaw nga mga pinulongan nga wala nila mahibaloi. Ang uban makapanagna. Ang uban pa makaayo ug sakit o makabanhaw ug patay.​—1 Corinto 12:4-11.

Sanglit ang mga pulong ni Jesus sa Juan 20:22 nagtumong niining pagbubo sa balaang espiritu sa mga tinun-an, ang iyang nalangkit nga mga pulong mahitungod sa pagpasaylo ug mga sala daw nagpasabot nga ang mga apostol pinaagi sa paglihok sa espiritu gihatagan sa Diyos ug talagsaong awtoridad nga magpasaylo o dili magpasaylo sa mga sala.​—Tan-awa ang The Watchtower, Marso 1, 1949, panid 78.

Ang Bibliya wala maghatag kanato ug kompletong asoy sa matag higayon nga gigamit sa mga apostol ang maong awtoridad, apan wala usab kini magtala sa matag kaso nga sila migamit sa milagrosong gasa sa pagsulti sa mga dila, sa pagpanagna, o sa pagpanambal.​—2 Corinto 12:12; Galacia 3:5; Hebreohanon 2:4.

Usa ka kaso nga naglangkit sa awtoridad sa mga apostol sa pagpasaylo o dili pagpasaylo sa mga sala naglangkit kang Ananias ug Safira, nga namakak sa espiritu. Si Pedro, nga nakadungog kang Jesus nga nagsulti sa atong mabasa sa Juan 20:22, 23, miyagyag kang Ananias ug Safira. Unang giatubang ni Pedro si Ananias, nga namatay dihadiha. Sa dihang sa ulahi miabot si Safira ug nagpadayon sa pagpamakak, gipahayag ni Pedro ang iyang hukom. Wala pasayloa ni Pedro ang iyang sala apan miingon: “Tan-awa! Ang mga tiil nilang naglubong sa imong bana anaa sa pultahan, ug sila magadala kanimo sa gawas.” Siya usab namatay dihadiha.​—Buhat 5:1-11.

Niining higayona gigamit ni apostol Pedro ang linaing awtoridad sa pagpahayag sa tinong pagpabilin sa sala, usa ka milagrosong kahibalo nga wala pasayloa sa Diyos ang sala ni Ananias ug Safira. Ang mga apostol usab dayag nga nakabaton ug labaw-tawhanong pagsabot bahin sa mga kaso diin segurado sila nga ang mga sala gipasaylo pinasikad sa halad ni Kristo. Busa kadtong mga apostol nga gihatagan ug gahom sa espiritu makapahayag ug pagpasaylo o pagpabilin sa mga sala.a

Wala kini magpasabot nga ang tanang dinihogan sa espiritu nga mga ansiano balik kaniadto may samang milagrosong awtoridad. Atong makita kana gikan sa giingon ni apostol Pablo mahitungod sa lalaki nga gipalagpot sa kongregasyon sa Corinto. Si Pablo wala mag-ingon, ‘Ako nang gipasaylo ang sala nianang tawhana’ o bisan, ‘Nasayod ako nga kanang tawhana gipasaylo na sa langit, busa dawata siyag balik.’ Hinunoa, giawhag ni Pablo ang tibuok kongregasyon nga pasayloon kining gidawat ug balik nga Kristohanon ug pakitaan siya ug gugma. Si Pablo midugang: “Bisan unsa nga inyong malulotong ipasaylo kang bisan kinsa, pasayloon ko usab.”​—2 Corinto 2:5-11.

Sa dihang nakabalik pag-usab ang maong lalaki sa kongregasyon, ang tanang Kristohanong igsoong mga lalaki ug mga babaye mahimong makapasaylo sa diwa nga dili magdumot kaniya tungod sa iyang nahimo. Una, hinunoa, kinahanglang maghinulsol siya ug ibalik pag-usab. Sa unsang paagi kana mahitabo?

Adunay seryosong mga sala nga kinahanglang dumalahon sa mga ansiano sa kongregasyon, sama sa pagpangawat, pagpamakak, o grabeng imoralidad. Maningkamot sila sa pagtul-id ug pagbadlong sa maong mga malapason, nga palihokon sila sa paghinulsol. Apan kon ang usa dili-mahinulsolong magbatasan sa grabeng sala, ipadapat niining mga ansianoha ang direksiyon gikan sa Diyos sa pagpalagpot sa malapason. (1 Corinto 5:1-5, 11-13) Ang giingon ni Jesus sa Juan 20:23 dili mapadapat sa maong mga kaso. Kining mga ansianoha walay milagrosong mga gasa sa espiritu, sama sa katakos sa pagtambal sa masakiton sa pisikal o sa pagbanhaw sa patay; kadtong maong mga gasa nagsilbi sa ilang katuyoan niadtong unang siglo ug dayon natapos. (1 Corinto 13:8-10) Dugang pa, ang mga ansiano karon walay awtoridad gikan sa Diyos sa pagpasaylo ug seryosong mga sala sa diwa nga ipahayag ang usa ka nakasala ug seryosong sala nga hinlo sa mga mata ni Jehova. Kining maong matang sa pagpasaylo kinahanglang pinasikad sa halad lukat, ug si Jehova lamang ang makapasaylo sumala nianang maong pasikaran.​—Salmo 32:5; Mateo 6:9, 12; 1 Juan 1:9.

Sama sa kaso sa lalaki sa kanhing Corinto, sa dihang ang makasala ug grabe dili maghinulsol, kinahanglan siyang palagpoton. Kon sa ulahi siya maghinulsol ug magpatunghag mga buhat nga nahiangay sa paghinulsol, ang kapasayloan gikan sa langit mahimong posible. (Buhat 26:20) Sa maong kahimtang, ang Kasulatan naghatag sa mga ansiano ug katarongan sa pagtuo nga si Jehova sa pagkatinuod nagpasaylo sa makasasala. Dayon, sa dihang ang maong tawo dawaton ug balik, ang mga ansiano makatabang kaniya sa espirituwal nga paagi aron mahimong lig-on sa pagtuo. Ang uban diha sa kongregasyon makapasaylo sa susamang paagi nga ang mga Kristohanon sa Corinto mipasaylo sa napalagpot nga lalaki nga gidawat ug balik kaniadto.

Sa pagdumala sa mga butang niining paagiha, ang mga ansiano dili maghimog ilang kaugalingong mga sukdanan sa paghukom. Ilang ipadapat ang mga prinsipyo sa Bibliya ug mosunod gayod sa Kasulatanhong mga paagi nga gihatag ni Jehova. Busa, ang bisan unsang pagpasaylo o dili pagpasaylo sa bahin sa mga ansiano kinahanglang mahiuyon sa diwa sa mga pulong ni Jesus sa Mateo 18:18: “Sa pagkamatuod ako magaingon kaninyo, Bisan unsang mga butang nga inyong gaposon sa yuta mamaoy mga butang nga ginapos sa langit, ug bisan unsang mga butang nga inyong badbaran sa yuta mamaoy mga butang nga binadbaran sa langit.” Ang ilang mga lihok magpabanaag lamang sa panglantaw ni Jehova sa mga butang ingon sa gipresentar diha sa Bibliya.

Busa, ang giingon ni Jesus, sumala sa natala sa Juan 20:23, wala magkasumpaki sa ubang bahin sa Kasulatan, apan kini nagpaila nga ang mga apostol adunay linaing awtorisasyon may kalabotan sa pagpasaylo, subay sa ilang linaing papel sa bata pa ang Kristohanong kongregasyon.

[Footnote]