Natagbaw Ka ba sa Espirituwal nga mga Tagana ni Jehova?

“‘Palihog, sulayi ninyo ako niining bahina,’ nagaingon si Jehova sa mga panon, ‘kong dili ba buksan ko kaninyo ang mga tamboanan sa mga langit ug buboan ko kamo sa panalangin hangtod nga wala nay kawalad-on.’”—MALAKIAS 3:10.

KON dili ka na moginhawa, ikaw mamatay sa pila ka minutos. Kon dili ka na moinom ug tubig, ikaw mamatay sa pila ka adlaw. Kon dili ka na mokaon, ikaw mamatay sa pila ka semana. Kon dili ka na mokaon sa espirituwal nga mga tagana ni Jehova, nan ikaw mamatay sa walay kataposan. Si Jehova nagatagana sa hangin, tubig, ug pagkaon nga gikinahanglan sa tanang buhing linalang. Busa, kang Jehova ang salmista nagaingon: “Imong ginabuklad ang imong kamot ug ginatagbaw ang tinguha sa tanang buhing butang.” (Salmo 145:16) Ang tinguha sa kadaghanang buhing butang matagbaw sa materyal nga mga tagana. Apan kini dili matuod sa tawhanong mga linalang.

2. Unsa ang tinguha sa kasingkasing sa tawo, ug unsang taganaha ang gikinahanglan sa pagtagbaw niini?

² Gipunting kini ni Jesus sa miingon siya: “Ang tawo mabuhi, dili lamang sa tinapay, kondili sa matag pulong nga nagagula sa baba ni Jehova.” (Mateo 4:4) Ang ubos nga mga linalang walay ideya bahin sa kawalay-kataposan, apan ang tawo duna, sumala sa ginaingon sa Ecclesiastes 3:11: “Iyang gibutang sa ilang kasingkasing ang panahong walay katinoan.” O sumala sa paghubad niini sa Revised Standard Version: “Iyang gibutang ang panahong dayon sa hunahuna sa tawo.” Busa, ang kinasingkasing nga tinguha sa tawo mao ang mabuhi sa panahong walay katinoan, bisan sa walay kataposan. Ang hangin, tubig, ug tinapay lamang dili igo alang niana. Ang pagkabuhi sa walay kataposan nagkinahanglan sa espirituwal nga mga tagana nga gipasukad sa “matag pulong nga nagagula sa baba ni Jehova.” Karong adlawa, kana makaplagan sa usa ka basahon, ang Bibliya, ug ang suplay dili mahurot​—ang tanang imong gikinahanglan, nga labaw kay sa imong mahakop. Kining aparadora dili gayod mawad-ag sulod.

3. Unsay gipaila ni Jesus ingong labing hinungdanon, ug unsang sekreto ang nakat-onan ni Pablo?

³ Si Jesus nagtudlo kanato sa pag-ampo alang sa gikinahanglang materyal nga pagkaon: “Ihatag namo ang kalan-on namo alang niining adlawa.” Apan sa taudtaod iyang gibutang ang espirituwal nga mga butang sa unang dapit sa miingon siya: “Nan, ipadayon ninyo ang pagpangita pag-una sa gingharian ug sa iyang pagkamatarong.” (Mateo 6:11, 33) Ang materyal nga pagkaon nagabuhi kanato sa usa ka adlaw sa usa ka panahon; ang padayong pagkaon sa espirituwal makabuhi kanato sa tibuok kinabuhi, ug bisan sa walay kataposan. Busa ayaw pagkabalaka sa materyal nga mga butang. Si Pablo wala mabalaka. Siya naghisgot sa espirituwal nga kahinguhaan nga nakapaarang niya sa pagkatagbaw bisan unsa ang materyal nga kahimtang, nga miingon: “Ako nakatuon sa sekreto sa unsang paagi mabusog ug sa unsang paagi gutomon, sa unsang paagi magbaton sa kadagaya ug sa unsang paagi mag-antos sa kawalad-on. Alang sa tanang butang ako adunay kusog tungod kaniya nga nagahatag kanako sa kusog.”​—Filipos 4:12, 13.

Katalagman Modangat sa mga Dili Matagbawon

4. Unsang mga tagana ang dili pa igo alang sa unang magtiayon, ug unsa pa ang ilang gitinguha?

⁴ Ugaling, daghan ang dili matagbawon sa mga tagana ni Jehova. Ang una natong mga ginikanan wala matagbaw. Sila nagpuyo na sa paraisong tanaman​—ang maanindot nga talan-awon naglingaw sa ilang mga mata, ang humot nga kabulakan nagpahumot sa hangin nga ilang giginhawa, ang lamiang mga pagkaon nagpalihok sa ilang gana, ang mga honi sa kalanggaman nagharana sa ilang mga igdulongog. Dugang pa, sila nagbaton sa makawiwiling buluhaton sa pag-atiman sa maong tanaman, gawas pa sa panalangin sa pagpuno sa yuta sa hingpit nga mga anak. Apan sila hakog. Ang gihatag sa Diyos dili pa igo. Gusto nila ang dugang pa. Gusto nilang mohukom sa ilang kaugalingon kon unsay matarong ug kon unsay daotan. Mao nga gibuhat nila kana, ug ang una mismong desisyon nga ilang gihimo nahimong katalagman, nga misangpot sa pagkawala sa tanang butang, alang sa ilang kaugalingon ug alang sa ilang mga anak.​—Genesis 3:1-7, 16-19.

5. Ang mga Israelinhon gipanalanginan ni Jehova sa unsa, ug unsa ang ilang reaksiyon?

⁵ Gisuhid sa mga Israelinhon ang ilang daotang panig-ingnan. Ang Diyos nagluwas kanila gikan sa pagkaulipon sa Ehipto, naghimo kanila nga usa ka nasod, naghatag kanilag hingpit nga Kasugoan, naggiya kanila sa ilang mga panaw sa kamingawan, nagtagana kanilag biste nga wala gayod madunot, ug milagrosong nagbuhi kanila pinaagi sa manna nga nahulog gikan sa langit ug tubig nga mibugwak gikan sa usa ka bato. Apan sila wala matagbaw sa mga tagana ni Jehova. (1 Corinto 10:1-5) Samtang sila nagpanaw latas sa kamingawan, sila nagsigeg reklamo.​—Exodo 13:21, 22; Numeros 11:1-6; Deuteronomio 29:5.

6. Unsang binuhatan ang nagdalag kalaglagan sa mga Israelinhon ingong usa ka nasod?

⁶ Sila nagbagulbol pa tapos sila mapahiluna sa Yutang Saad​—usa ka tabunok, maayong-pagkatubig nga yuta “nga nagaagay sa gatas ug dugos.” Sila, kay dili gihapon mapasalamaton, wala matagbaw sa mga tagana ni Jehova, mibulag sa pagsimba kaniya, miliso ngadto sa idolatrosong pagsimba sa sekso, naghalad sa ilang mga anak ngadto kang Molech, ug nagdalag kalaglagan sa ilang kaugalingon ingong usa ka nasod. Kay napasig-uli gikan sa pagkabihag sa Babilonya, sila nagsunod sa binaba nga kabilinbilin nga nagpakawalay-bili sa Pulong sa Diyos. Sila misangpot sa pagpatay sa ilang sinaad nga Mesiyas, si Kristo Jesus.​—Deuteronomio 6:3; 8:7-9; Mga Maghuhukom 10:6; 1 Hari 14:22-24; 2 Hari 21:1-16; Isaias 24:1-6; Mateo 15:3-9; 27:17-26.

7. Sa unsang paagi ang klero sa Kakristiyanohan karong adlawa nagsubay sa samang binuhatan sa dili-matinumanong mga saserdote sa panahon ni Malakias?

⁷ Hangtod niining adlawa ang katawhan sa katibuk-an nagpadayon sa pagpalabi sa bakak relihiyosong mga tinuohan. Ang klero nagatamay sa ngalan ni Jehova, nga wala gani magagamit niana. Sila nagapakaulaw niana pinaagi sa dili-kasulatanhong mga pagtulon-an sama sa Trinidad, dili-mamatay nga kalag, ug walay-kataposang pagsakit sa impiyernong-kalayo. Ang ilang mga doktrina dili lamang nahugawan sa kabakakan nga gikuha gikan sa karaang Babilonya ug Ehipto, kondili sa daghang kaso usab, nahiloan sa dili pagtuo sa halad-lukat ni Kristo ug sa pagtuo sa ebolusyon. Ilang gikawatan si Jehova sa iyang takos nga pagdayeg, sama sa gibuhat sa mga saserdote sa adlaw ni Malakias.​—Malakias 1:6-8; 3:7-9.

8. (a) Unsang pagdapit ang gisalikway sa mga saserdote sa adlaw ni Malakias ug sa relihiyosong mga pangulo karong adlawa? (b) Kinsay midawat sa pagdapit, ug unsay sangpotanan?

⁸ Ang mga Israelinhon niadtong panahona gidasig sa paghinlo sa ilang kaugalingon ug pagbalik kang Jehova. “Bumalik kamo kanako, ug ako mobalik kaninyo,” matud ni Jehova. Siya midapit kanila sa dugang: “‘Sulayi ako, palihog, niining bahina,’ si Jehova sa mga panon nag-ingon, ‘kon dili ko ba pagabuksan alang kaninyo ang mga tamboanan sa mga langit ug igabubo ko diha kaninyo ang panalangin hangtod nga wala nay kawalad-on.’” (Malakias 3:7, 10) Ang usa lang ka nahibilin sa Hudiyong nasod ang mibalik; karong adlawa, ang matinumanong nahibilin sa espirituwal nga Israel nanggula sa bakak nga mga relihiyon niining kalibotana. Sila, uban sa nagatubong dakong panon sa ubang samag-karnero nga mga magsisimba, nagadayeg kang Jehova ingong iyang mga Saksi. (Juan 10:16) Alang kanila, si Jehova nagtuman sa iyang saad ug ‘nagbukas sa mga tamboanan sa langit ug nagbubo diha kanila sa mga panalangin hangtod nga wala nay kawalad-on’​—usa gayod ka kombira sa espirituwal nga pagkaon!​—Isaias 25:6.

Dagayang Espirituwal nga Pagkaon

9. Unsang espirituwal nga mga tagana ang mabatonan karong adlawa, pinaagi sa unsa, ug unsay sangpotanan?

⁹ “Ang matinumanon ug maalamong ulipon” nga gitagna ni Jesus alang sa atong adlaw nagakapuliki sa pagtaganag dagayang espirituwal nga pagkaon. (Mateo 24:45) Sa usang tuig lamang, sa 208 ka kayutaan ug kapuloan sa dagat, ug sa mga 200 ka pinulongan, kapin sa tulo ka milyong Saksi ni Jehova ang nagtanyag sa maong espirituwal nga mga tagana pinaagi sa balay-balay nga mga pagduaw ug pagpanagtag sa ginatos ka milyong libro, magasin, ug mga Bibliya. Daghan ang mipahimulos niining espirituwal nga pagkaon ug natagbaw: Kapin sa 225,000 ka bag-ohan ang nabawtismohan sa usa ka tuig!

10. Unsang mga tagana ang mabatonan tungod sa pagsunod sa tambag ni Pablo sa pagpakigtigom?

¹⁰ Ang espirituwal nga mga pagkaon ni Jehova gitagana usab pinaagig distritong mga kombensiyon, mga asembliya sirkito, ug lima ka senemanang tigom nga regular ginahimo diha sa mga 52,000 ka kongregasyon sa mga Saksi ni Jehova​—ang tanan sa pagsugot sa tambag ni Pablo sa Hebreohanon 10:25 nga ‘dili biyaan ang atong panagkatigom.’

11. Unsay nagailustrar sa maayong paagi sa pag-andam sa espirituwal nga pagkaon?

¹¹ Dihang ang usa ka babaye mangimbitar ug mga bisita alang sa usa ka pagkaon, dili lamang niya lat-an ang usa ka hiwang karne ug ibutang kana sa plato. Iyang gamiton ang mga lamas ug sarsa aron mahimong mas lamian ug adornohan kana aron makadani sa mata. Ang dagway ug kahumot lamang niini igo na nga magpalaway ug moagos ang gastric juices. Kana mao ang pagkaandam sa espirituwal nga mga pagkaon ni Jehova​—dili ang walay-lahay, ensiklopedia nga estilo, kondili sa lamiang paagi sa paglipay sa kaisipan ug pagtandog sa kasingkasing. Ang matag usa ka Kristohanon angay mosunod sa maong panig-ingnan. “Dili ba ang igdulongog magasulay sa mga pulong ingon nga ang lingagngag magatilaw sa pagkaon?”​—Job 12:11.

12. Unsang mga paning-ingnan ang atong nabatonan sa lamiang pagkaandam espirituwal nga pagkaon?

¹² Ang Giya sa Tunghaan sa Teokratikanhong Ministeryo sa unang pagtulon-an niini nagapasiugda sa paggamit sa kahimut-anang mga pulong. (Ecclesiastes 12:10) Ang Salmo 45:2 nagtagna mahitungod sa Mesiyas, si Jesu-Kristo: “Ang katahom gibubo sa imong mga ngabil.” Kana nahimong tinuod. Ang iyang mga mamiminaw nahibulong “sa madanihong mga pulong nga migula sa iyang baba.” Sila nagpadayon sa pagsunod kaniya aron maminaw kaniya, nangabot ug sayo sa templo aron magpatalinghog kaniya, namati kaniyang malipayon, nahingangha sa iyang paagi sa pagtudlo. Ang mga polis nga gisugo sa pagdakop kaniya nagpahayag: “Wala pa sukad nga may tawong nagpahayag nga sama niini.” (Lucas 4:22; 19:48; 21:38; Marcos 12:37; Mateo 7:28; Juan 7:46) Ang Giya gitagana sa pagtabang kanato sa pagpahayag sa kahimut-anang mga pulong sa kamatuoran. Gigamit ba nimo kini sa bug-os?

13. Unsa ka mapasiugdahon ang Efeso 5:15-17 bahin sa ‘pagpalit sa panahon,’ ug nganong kini gipasiugda?

¹³ Ang Efeso 5:15-17 nagatambag kanato: “Magbantay kamo nga ang inyong paggawi dili sama sa dili-maalamon kondili sama sa mga tawong maalamon, nga magapalit sa angay nga panahon alang sa inyong kaugalingon, tungod kay ang mga adlaw daotan. Tungod niini hunong na kamo sa pagkahimong dili makataronganon, kondili magpadayon sa pagsabot kon unsa ang kabubut-on ni Jehova.” Ang Gregong pulong nga gihubad dinhing “panahon” wala magkahulogan sa panahon sa malangkobong diwa kondili nagpasabot sa tinudlong panahon, usa ka yugto sa panahon alang sa ispisipikong katuyoan. Ang Gregong berbo nga gihubad nga “magapalit” anaa sa intensibong dagway, ug “niining kontekstoha kini lagmit nagkahulogang ‘pagpalit sa bug-os’; sama pananglit, sa pagsakmit sa tanang higayon nga moabot.”a Ikaw ba nagasakmit sa panahon gikan sa imong eskedyul aron ikaw magmaalamon pinaagi sa pag-ambit sa espirituwal nga mga tagana ni Jehova? Angay nimong buhaton kana. Kitang tanan angay nga magbuhat niana. Ngano? “Kay ang mga adlaw daotan.”

Gikan sa Espirituwal nga Desyerto Ngadto sa Espirituwal nga Paraiso

14. Unsang bersikulo sa Bibliya ang nagasilbing panig-ingnan sa unsang hiyas sa atong Ingles-ug-pinulongang New World Translation Reference Bible?

¹⁴ Ang usa ka talagsaong espirituwal nga tagana mao ang atong New World Translation of the Holy Scriptures​—With References, nga giluwatan sa 1984. Kini daghag mga hiyas nga makapaposible sa paggamit sa ‘pinalit nga panahon’ sa pagpauswag sa atong kahibalo.b Usa ka pananglitan mao ang cross-references niini. Tagda ang Salmo 1:3, nga nagahisgot sa kahimtang sa tawo nga mamalandong sa kasugoan sa Diyos sa adlaw ug sa gabii. Kanang bersikuloha mabasa: “Siya mahisama sa usa ka kahoy nga natanom sa daplin sa mga sapa sa tubig, nga nagahatag sa iyang bunga sa iyang panahon ug kansang dahon dili malaya, ug ang tanang iyang pagabuhaton molampos.” Adunay labaw, labaw pa gayod, sa maong bersikulo kay sa makita sa mata sa magbabasa nga daling magabasa niana ug mopadayon sa unahan.

15. Unsang mga pangutana ang gipatungha mahitungod sa kahoy sa Salmo 1:3, ug unsang kalamdagan ang ginahatag sa Isaias 44:4?

¹⁵ Palihog matikdi: Ang kahoy gitanom. Kinsay nagtanom niana? Kini anaa sa daplin sa mga sapa, nga plural. Ang usa ba ka kahoy motubo sa mga pangpang sa daghang sapa? Dili. Busa magmausisaon. Unsa ba kining kahoya? Ang cross-references magabukas sa mga mata sa atong kaisipan. Sila mao ang Isaias 44:4, 61:3, ug Jeremias 17:8. Ang Isaias 44:4 nagaingon nga ang iyang katawhan mahisama sa mga kahoy “sa daplin sa mga kanal sa tubig.” Daghang kanal sa tubig? Oo! Ang mga sapa maoy mga kanal sa irigasyon nga nagapatubig sa kakahoyan sa usa ka prutasan!

16. Unsang dugang katin-awan ang gihatag sa Isaias 61:3 ug Jeremias 17:8?

¹⁶ Ang Isaias 61:3 nagatawag sa pipila niining mga kahoya “mga dagkong kahoy sa pagkamatarong, ang tinanom ni Jehova, aron siya patahomon.” Si Jehova mao ang nagatanom ug nagapatubig niini, ug siya mao ang patahomon sa mga bunga nga ginabunga sa mga kahoy! Ang Jeremias 17:8 nagapanig-ingon sa tawo nga nagapalandong sa kasugoan sa Diyos sa adlaw ug sa gabii sa “usa ka kahoy nga natanom sa daplin sa mga tubig, nga magapakatag sa iyang mga gamot sa daplin mismo sa suba; ug siya dili makakita sa dihang moabot ang kainit, apan ang iyang dahon magmalunhawon. Ug sa tuig sa hulaw siya dili magmabalak-on, ni mohunong siya sa paghatag ug bunga.” Ang iyang dahon dili malaya; ang tanang iyang pagabuhaton molampos!

¹⁷ Karon ang atong mga mata natin-awan! Ang Salmo 1:3 nagahulad sa usa ka matahom nga hulagway. Kadtong nagapalandong sa kasugoan ni Jehova sa adlaw ug sa gabii nahisama sa mga kahoy nga gitanom sa daplin sa dili-mahubas nga tuboran sa tubig. Sila dili na bahin sa uga-sa-espirituwal kalibotanong mga organisasyon kondili karon nakig-uban na sa organisasyon sa Diyos nga dagayang gitagan-an sa makahupay nga katubigan sa kamatuoran. Sa pagkamatuod, sila anaa sa espirituwal nga paraiso, nahupayan sa espirituwal, ug nagapamungag espirituwal nga bunga sa kadayegan ni Jehova. Ug hunahunaa lamang! Ang Diyos nagagamit sa iyang mga Saksi sa pag-agak sa mga tawo pahilayo sa uga, napagba, kalibotanong mga organisasyon paingon niining makapahupay, maayong-pagkatubig espirituwal nga paraiso.

18. Unsa ang reaksiyon sa pipila inigkakita nila nga ang uban maayo kaayo sa pagsangyaw, ug ngano kahang sila nakulangan?

¹⁸ Sa pagtuman nga epektibo niining buluhatona, kinahanglang atong disiplinahon ang atong mga kaisipan ug mga kasingkasing aron sa pagpahimulos sa tanang espirituwal nga tagana ni Jehova. Ang pipila makadungog sa uban nga magapatin-aw sa mga teksto sa Bibliya ug dayon moingon: “Hinaot untag ang akong kahibalo sa Bibliya sama sa iya!” Apan kon sila magadisiplina sa ilang kaugalingon sa pagtuon sa Bibliya, sila makapauswag usab sa kahibalo sa Bibliya. Ang pipila makadungog sa uban nga magasangyaw sa mga ganghaan ug dayon moingon: “Hinaot untag ako makasangyaw sa mga ganghaan sama kaniya!” Apan kon ilang disiplinahon ang ilang kaugalingon sa pag-apil kanunay sa pagsangyaw sa kanataran, nga magagamit sa librong Nangatarongan Pinasukad sa Kasulatan, sila usab mahimong mas hanas nga mga Saksi. Ang pipila makadungog sa uban nga magahatag ug mga pahayag sa Bibliya ug dayon moingon: “Hinaot untag ako makahatag ug mga pakigpulong sama kaniya.” Apan, sa makausa pa, kon sila magadisiplina sa ilang kaugalingon sa pagpangandam pag-ayo sa ilang mga asaynment sa pakigpulong, nga magasabot sa mga pagtulon-an sa Giya sa Tunghaan sa Teokratikanhong Ministeryo, sila mouswag usab sa katakos sa pagpakigpulong.

19. Unsa ang yawi sa pag-ugmad sa atong mga natagong-katakos sa pagsangyaw?

¹⁹ Karon, ang paghinaot maayo man, apan ang paghinaot nga walay pagbuhat dili makapatapos sa trabaho. Ang pagbuhat mao ang makapatuman sa paghinaot. Disiplinaha ang imong kaugalingon sa pagpalit sa panahon, ug buhata ang trabaho nga makapatuman sa paghinaot. Kon dili nimo gamiton ang kaunoran, kini manguyos. Kon dili nimo gamiton ang usa ka kahanas, kini mawala. Kon dili nimo gamiton ang imong hunahuna, malawos ang katakos sa panghunahuna. Kon dili nimo gamiton ang kahibalo, ikaw mawad-an sa imong nabatonan. Sa matag kaso, ang lagda mao, “Gamita kana o mawad-an ka niana.” Maoy ‘pinaagi sa paggamit nga ang mga gahom sa pag-ila mabansay.’ Unya “ang katakos sa panghunahuna magabantay kanimo, ang katakos sa pag-ila magapanalipod kanimo.”​—Hebreohanon 5:14; Proverbio 2:11.

20. Pinaagi sa pagpahimulos sa espirituwal nga mga tagana ni Jehova, unsay atong malikayan, ug unsay atong mabatonang kaayohan?

²⁰ Busa gamita ang espirituwal nga mga tagana ni Jehova. Paglipay duyog sa iyang mga tawong matagbawon. Ikyas sa kagutmanan nga gitagna ni Amos: “‘Tan-awa! Umaabot ang mga adlaw,’ mao ang ginaingon sa Soberano Ginoong Jehova, ‘ug akong ipadala ang usa ka kagutmanan sa yuta, usa ka kagutmanan, dili sa tinapay, ug sa kauhaw, dili sa tubig, kondili sa pagpatalinghog sa mga pulong ni Jehova.’” (Amos 8:11) Duyog niadtong nagakaon ug nagakalipay, dili niadtong nagasalikway sa pagkaon ug naulawan: “Kini mao ang ginaingon sa Soberano Ginoong Jehova: ‘Ania karon! Ang akong mga alagad magakaon, apan kamo mismo pagagutomon. Ania karon! Ang akong mga alagad magainom, apan kamo pagauhawon. Ania karon! Ang akong mga alagad magakalipay, apan kamo pagapakaulawan.”—Isaias 65:13.

[Mga footnote]

Nahinumdom Ka Ba?

◻ Sa unsang paagi gipakita sa nasod sa Israel ang pagkadili-tagbaw niini sa mga tagana ni Jehova?

◻ Sa unsang paagi ang Malakias 3:10 natuman sa mga Saksi ni Jehova?

◻ Unsa ang nagpahiping kahulogan sa Salmo 1:3?

◻ Nganong kinahanglanon ang paggamit sa mga butang nakat-onan pinaagi sa espirituwal nga mga tagana ni Jehova?

1. Ang kadaghanang buhing linalang natagbaw na sa unsang mga tagana?

17. Unsang hulagway ang karon mogawas mahitungod sa Salmo 1:3, ug unsa ang atong bahin niini?

[Hulagway sa panid 15]

Kadtong nagapalandong sa kasugoan ni Jehova nahisama sa mga kahoy nga natanom sa daplin sa dili-mahubas nga tuboran sa tubig