Tubig nga Makahatag ug Kinabuhing Walay Kataposan
“Bisan kinsa nga magainom sa tubig nga akong igahatag kaniya dili na gayod pagauhawon pa, hinuon ang tubig nga akong igahatag kaniya mahimong usa ka tuboran sa tubig diha kaniya nga magabugwak aron mohatag ug kinabuhing walay kataposan.”—JUAN 4:14.
“SA KALIT lang, luyo sa lingin nga bulan, . . . migimaw ang naggilakgilak nga asul ug puti nga mutya, . . . ug hinayhinayng misaka nga samag gamayng perlas diha sa naglugitom nga kangitngit.”—Edgar Mitchell, astronot nga naghubit sa yuta sa dihang nakita niya kini gikan sa kawanangan.
Unsay nakapanindot sa kolor sa atong planeta nga natukmod man ang astronot sa pagsulti ug ingon niana? Kini mao ang tubig nga nagtabon sa halos 75 porsiyento sa nawong sa yuta. Sa pagkatinuod, gawas nga ang tubig naghatag ug katahom sa yuta, kini nakatabang usab nga mabuhi ang mga linalang sa yuta. Gani, mga 65 porsiyento sa lawas sa tawo maoy tubig. Busa, bahin sa tubig, ang Encyclopædia Britannica nag-ingon: “Kini mahinungdanon sa halos tanang bahin sa pagtubo sa mga tanom ug sa mga mananap.”
Tungod sa maayong sistema sa pagresiklo, ang suplay sa tubig dili na kinahanglang dugangan. “Halos tanang tubig nga atong gigamit mobalik sa dagat,” nagpatin-aw ang The World Book Encyclopedia. “Didto, kini moalisngaw tungod sa kainit sa adlaw. Dayon mobalik sa yuta ingong ulan. Ang tubig balikbalik nga gigamit. Kini walay pagkahurot.” Kining maong talagsaong proseso gihubit sa Bibliya mga 3,000 ka tuig kanhi: “Ang tanang suba sa tingtugnaw mopadulong sa dagat, apan ang dagat wala mapuno. Sa dapit diin ang suba sa tingtugnaw mopadulong, didto kini mobalik.” Katingalahan gayod nga lalang ang siklo sa tubig!—Ecclesiastes 1:7.
Tungod sa kahinungdanon sa tubig sa pagpatunhay sa kinabuhi ug sa kahibulongang paagi nga kini gitagana, dili ikatingala nga kini gihisgotan sa Bibliya kapin sa 700 ka beses. Sa Bibliya sagad nga gamiton ang talagsaong katakos sa tubig—ilabina ang katakos niini sa paghinlo ug pagpatunhay sa kinabuhi—sa pagsimbolo sa mga butang maylabot sa atong pagsimba sa Diyos.—Isaias 58:11; Juan 4:14.
Ang Katakos sa Bibliya sa Paghinlo
Ang mga Israelitas mahinlo gayod tungod kay sila kanunayng maligo ug manghugas. Naandan na nila nga manghimasa sa dili pa mosulod sa balay aron mokaon. (Lucas 7:44) Gawas nga huptang hinlo ang ilang lawas ug mga butang, ang mga Israelitas mogamit usab ug tubig aron mamentinar ang seremonyal nga kahinlo. Ang mga saserdote nga nag-alagad diha sa tabernakulo kinahanglang manghugas kanunay sa ilang kamot ug tiil ug maglaba sa ilang besti. (Exodo 30:18-21) Sa ulahi, si Solomon naghimo ug usa ka “inumol nga dagatdagat” didto sa templo sa Jerusalem. Kini hinimo sa tumbaga nga kasagarang masudlan ug kapin sa 44,000 ka litrong tubig, nga igong magamit sa pagpanghinlo nga gisugo sa Balaod. (2 Cronicas 4:2, 6) Unsay kahulogan niana nga paggamit sa tubig alang sa mga Kristohanon karon?
Si apostol Pablo nagpatin-aw nga ang Kristohanong kongregasyon gihugasan ni Jesus ug “tubig pinaagi sa pulong.” Sama sa tubig, nga makahugas o makahinlo sa lawas, ang kamatuoran sa Pulong sa Diyos adunay katakos sa paghinlo kanato sa moral ug espirituwal nga paagi. Kini nga paghinlo maghimo sa mga tinun-an ni Kristo nga “balaan ug walay lama.” (Efeso 5:25-27) Busa, ang tanan nga gustong uyonan sa Diyos maningkamot sa pagpabiling “walay buling ug walay lama” sa moral ug espirituwal. (2 Pedro 3:11, 14) Sa unsang paagi ang Pulong sa Diyos makatabang kanila sa paghimo niini?
Kadtong gusto nga pahimut-an si Jehova nga Diyos kinahanglang moinom sa simbolikong tubig pinaagi sa regular nga pagtuon sa Bibliya. Sa dihang ang kahibalo nga ilang nakat-onan magtukbil sa ilang hunahuna ug kasingkasing, kini magtukmod kanila sa pagbuhat sa gisugo sa Bibliya: “Mag-usab kamo pinaagi sa pagbag-o sa inyong hunahuna, aron inyong ikapamatuod sa inyong kaugalingon ang maayo ug dalawaton ug hingpit nga kabubut-on sa Diyos.”—Roma 12:2.
Ang tukmang kahibalo sa kabubut-on sa Diyos makatabang sa maong mga tawo nga makita ang mga buling ug lama diha sa ilang hunahuna ug binuhatan. Kon padayon nilang iaplikar ang mga prinsipyo sa Bibliya diha sa ilang kinabuhi, ang Pulong sa Diyos, nga sama sa tubig, motabang kanila sa ‘paghugas’ bisan sa bug-at nga sala.—1 Corinto 6:9-11.
Tagda kon sa unsang paagi ang usa ka batan-on sa Espanya nakasinati niini nga kausaban. “Sa nag-edad ako ug 18, dili malipayon ang akong kinabuhi,” matod pa ni Alfonso. Nahimo siyang adik sa droga ug lunod-patay nga kriminal. “Gihugawan ko sa akong kaugalingon tungod sa pag-abuso nako sa akong lawas ug pagdagmal nako sa uban.”
“Sa eskuylahan, namatikdan nako ang usa ka batan-ong babaye nga parehas nakog edad. Siya lahi sa ubang estudyante kay siya mahinlo ug buotan. Tungod sa maayong sulondan nga iyang gipakita, ako naaghat sa pagkinabuhing hinlo sama kaniya. Kay iya man akong gidapit, ako mitambong sa tigom sa mga Saksi ni Jehova. Wala madugay, ako nagsugod sa pagtuon sa Bibliya ug sa pagpakighigala sa Diyos. Sulod sa usa ka tuig, akong nahinlo ang akong kinabuhi ug ako nahimong bawtismadong Saksi. Tungod niining dako nga kausaban, daghang ginikanan sa among dapit ang moadto sa among balay ug mohangyo nga tabangan nako ang ilang tin-edyer nga mga anak nga naggiyan sa droga.”
Tubig nga Makahatag ug Kinabuhing Walay Kataposan
Kas-a gisultian ni Jesus ang usa ka babayeng Samarianhon nga nagkalos ug tubig sa atabay ni Jacob bahin sa “buhi nga tubig.” Siya miingon: “Bisan kinsa nga magainom sa tubig nga akong igahatag kaniya dili na gayod pagauhawon pa, hinuon ang tubig nga akong igahatag kaniya mahimong usa ka tuboran sa tubig diha kaniya nga magabugwak aron mohatag ug kinabuhing walay kataposan.” (Juan 4:10, 14) Masabtan sa mga pulong ni Jesus nga ang “buhi nga tubig” nagsimbolo sa mga tagana sa Diyos alang sa kinabuhi, sumala sa gipatin-aw sa iyang Pulong, ang Bibliya. Pinaagi niini, ang tawo mabuhi hangtod sa hangtod. Usa sa hinungdanong bahin niining masambingayong tubig mao ang halad lukat ni Kristo Jesus. “Gihigugma pag-ayo sa Diyos ang kalibotan,” pamulong ni Jesus, “nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.”—Juan 3:16.
Gipabilhan pag-ayo ni Alfonso, nga gihisgotan ganina, ang “buhi nga tubig” gikan sa Diyos. Bahin niadtong padayong nagkinabuhi nga kriminal ug adik, siya miingon: “Ang akong magulang nga lalaki ug kaubanan kaniadto patay na. Giluwas ako sa kahibalo sa Pulong sa Diyos gikan sa kamatayon. Tungod sa espirituwal nga mga tagana ni Jehova, ako buhi.” Dugang pa, nakat-onan ni Alfonso diha sa Pulong sa Diyos nga siya may paglaom nga magkalipay sa kinabuhing dayon diha sa bag-ong kalibotan nga gisaad sa Diyos.—2 Pedro 3:13.
Gidapit ang Tanan
Sa kataposang basahon sa Bibliya, gihubit kanato ang “usa ka suba sa tubig sa kinabuhi, ingon katin-aw sa kristal, nga nagaagos gikan sa trono sa Diyos ug sa Kordero.” (Pinadayag 22:1) Ang suba nagsimbolo sa mga tagana sa Diyos nga sa ngadtongadto magpasig-uli sa mga tawo ngadto sa kahingpitan nga nabatonan ni Adan ug Eva sa sinugdan sa kasaysayan sa tawo.
Human hubita ang suba, ang asoy nagpadayon sa pag-ingon: “Si bisan kinsa nga giuhaw paaria; si bisan kinsa nga may tinguha paimna sa tubig sa kinabuhi nga walay bayad.” (Pinadayag 22:17) Karong panahona, ang tanang tawo sa tibuok kalibotan gidapit sa pag-inom nianang tubiga. Matag tuig, ang mga Saksi ni Jehova sa kapig 235 ka kayutaan naggugol ug kapin sa usa ka bilyong oras sa pagtabang sa mga tawo sa pagkuhag kahibalo sa Bibliya nga makahatag ug kinabuhing walay kataposan.
Gusto ka bang moinom sa tubig sa kinabuhi? Pinaagi sa pag-inom sa tubig nga sama katin-aw sa kristal, sa ato pa, pinaagi sa pagkat-on ug paggamit sa mga tagana sa atong Maglalalang, ikaw mahiapil usab niadtong “maampingong magtipig alang sa ilang kaugalingon ug usa ka maayong patukoranan alang sa umalabot, aron sila makapangupot pag-ayo sa tinuod nga kinabuhi.”—1 Timoteo 6:19.
[Blurb sa panid 14]
Sama sa tubig, nga makahinlo sa lawas, ang kamatuoran sa Bibliya adunay katakos sa paghinlo kanato sa moral ug espirituwal nga paagi
[Kahon/Mga hulagway sa panid 15]
SUPLAY SA TUBIG PANAHON SA BIBLIYA
Sa panahon sa Bibliya, ang mga tawo nagkugi sa pagpangitag tinubdan sa tubig nga dili mahubsan. Si Abraham ug Isaac nagkalot ug mga atabay duol sa Beer-seba aron adunay tubig nga magamit sa ilang panimalay ug ipainom sa ilang panon sa mga hayop.—Genesis 21:30, 31; 26:18.
Ang mabaw nga mga atabay dali rang mahubsan panahon sa dugayng ting-init. Aron dili kini mahubsan, kinahanglang lalom ang atabay. (Proverbio 20:5) Ang usa ka atabay sa Lakis moabot ug 144 ka piye ang giladmon. Ang laing atabay, nga makita sa Gibeon, mosukod ug kapin sa 80 ka piye ang giladmon ug 35 ka piye ang gilapdon. Aron makalot ang ingon niana ka lawom nga atabay, kinahanglang mahabwa ang mga 3,000 ka toneladang bato. Ang babayeng Samarianhon nga miabot aron sa pagkalos ug tubig sa atabay ni Jacob miingon kang Jesus: “Lawom ang atabay.” Ang giladmon niini lagmit moabot ug 75 ka piye.—Juan 4:11.
Ang laing tinubdan sa tubig sa karaang Tungang Sidlakan mao ang mga biawan o dagkong pondohanag tubig sa ilalom sa yuta. Dinhi niini nga mga pondohanan moagos ang tubig gikan sa ulan nga magsugod sa Oktubre hangtod sa Abril. Ang mga tawo didto naghimog mga kanal-kanal diha sa daplin sa bungtod aron modagayday ang tubig sa ulan ngadto sa mga biawan. Ang mga Israelitas nagkubkob ug dagkong mga biawan aron kapondohan ug tubig.—2 Cronicas 26:10.
Lisod ang pagkalos ug tubig sa mga atabay ug biawan bisan hangtod karon. Busa, dili gayod lalim ang gihimo sa mga babaye sama ni Rebeca ug sa mga anak ni Jetro nga nagkalos ug tubig kada adlaw alang sa ilang mga pamilya ug sa mga hayop.—Genesis 24:15-20; Exodo 2:16.
[Hulagway sa panid 15]
Si Alfonso karon, nagwali sa Pulong sa Diyos