Pasidunggi Kadtong Gihatagan ug Awtoridad Ibabaw Ninyo
“Pasidunggi ang tanang matang sa tawo, pagbaton ug gugma alang sa tibuok kapunongan sa mga igsoon, magmahadlokon sa Diyos, magmapasidunggon sa hari.”—1 PEDRO 2:17.
1, 2. Unsay pag-isip sa mga tawo karon bahin sa awtoridad? Ngano?
“ANAA sa mga bata ang tanang katungod. Wala na ang pagtahod alang sa mga ginikanan,” mulo sa usa ka inahan. “Lalisa ang Awtoridad” matod sa usa ka sticker nga gitaod sa bamper sa sakyanan. Kana maoy duha lamang ka banaag sa kahimtang nga naglungtad karong adlawa, ingon nga imong nasayran gayod. Ang malangkobong kakulang sa pagtahod alang sa mga ginikanan, sa mga magtutudlo, sa mga amo, ug sa opisyales sa gobyerno maoy kasagaran sa tibuok kalibotan.
2 Ang pipila mopakibo lang tingali sa ilang mga abaga ug moingon, ‘Aw, kadtong naghupot ug mga katungdanang may awtoridad dili angayan sa akong pagtahod.’ Usahay, kana lisod tingaling ipanghimakak. Nag-atubang kita sa samag-bahang mga balita mahitungod sa mahiphipan nga opisyales sa gobyerno, hakog nga mga amo, walay-katakos nga mga magtutudlo, ug abusadong mga ginikanan. Makalilipay, maihap ra sa tudlo ang mga Kristohanon nga adunay samang tinamdan bahin niadtong may awtoridad sa kongregasyon.—Mateo 24:45-47.
3, 4. Nganong ang mga Kristohanon angayng magpakitag pagtahod alang niadtong anaa sa mga katungdanang may awtoridad?
3 Ingon nga mga Kristohanon, kita adunay “mapugsanong katarungan” sa pagtahod niadtong nakabaton ug sekular nga awtoridad. Si apostol Pablo nagtambag sa mga Kristohanon nga “magpasakop sa labaw nga mga awtoridad, kay walay awtoridad gawas nga pinaagi sa Diyos; ang nagalungtad nga mga awtoridad napahimutang diha sa ilang relatibong mga posisyon pinaagi sa Diyos.” (Roma 13:1, 2, 5; 1 Pedro 2:13-15) Gipakita usab ni Pablo ang usa ka balidong katarongan nga sundon ang mga awtoridad diha sa pamilya: “Kamong mga asawa, magpasakop sa inyong mga bana, sanglit kini nahiangay diha sa Ginoo. Kamong mga anak, magmasinugtanon sa inyong mga ginikanan sa tanang butang, kay kini makapahimuot pag-ayo diha sa Ginoo.” (Colosas 3:18, 20) Ang mga ansiyano sa kongregasyon takos sa atong pasidungog tungod kay ‘sila gitudlo sa balaang espiritu nga mga magtatan-aw, aron magbantay sa kongregasyon sa Diyos.’ (Buhat 20:28) Gumikan sa pagtahod kang Jehova kita angayng magpasidungog sa tawhanong mga awtoridad. Siyempre, ang pagpasidungog sa awtoridad ni Jehova pagaunahon kanunay diha sa atong mga kinabuhi.—Buhat 5:29.
4 Nga anaa sa hunahuna ang labaw nga awtoridad ni Jehova, hisgotan nato ang mga panig-ingnan sa pipila nga wala motahod niadtong anaa sa mga katungdanang may awtoridad ug sa pipila nga nagtahod.
Ang Pagkadili-Matinahuron Mosangpot sa Pagkadili-Inuyonan
5. Unsang dili-matinahurong tinamdan ang gipakita ni Mikal ngadto kang David, ug unsay miresulta niana?
5 Gikan sa kasaysayan ni Haring David, masabtan nato kon unsay pag-isip ni Jehova niadtong motamay sa hinatag-sa-Diyos nga awtoridad. Sa gipadala ni David ang arka sa pakigsaad ngadto sa Jerusalem, ang iyang asawang si Mikal ‘nakakita kang Haring David nga nagluksolukso ug nagsayaw sa atubangan ni Jehova; ug siya nagtamay kaniya sulod sa iyang kasingkasing.’ Angay unta nga ilhon ni Mikal si David dili lamang ingon nga ulo sa pamilya kondili ingon nga hari usab sa nasod. Ugaling lang, gipahayag niya ang iyang mga pagbati nga makantalitahon: “Pagkamahimayaon sa hari sa Israel niining adlawa nga naghubo atubangan sa mga mata sa mga ulipong babaye sa iyang mga sulugoon, sama sa usa sa mga tawong kulangkulang nga naghubo sa iyang kaugalingon!” Ingong resulta si Mikal wala gayod makabaton ug mga anak.—2 Samuel 6:14-23.
6. Giunsa pag-isip ni Jehova ang dili pagtahod ni Kore sa Iyang dinihogan?
6 Ang usa ka mangil-ad nga panig-ingnan sa dili pagpasidungog sa tinudlo-sa-Diyos nga teokratikanhong pagpangulo mao ang kang Kore. Ingon nga Kohatnon, pagkatalagsaong pribilehiyo sa pag-alagad kang Jehova ang iyang gipahimuslan diha sa tabernakulo! Bisan pa niana, siya nagsaway kang Moises ug kang Aaron, ang mga pangulo sa mga Israelinhon nga maoy dinihogan sa Diyos. Gitigom ni Kore ang ubang mga pangulo sa Israel ug sa kalampingasan giingnan si Moises ug si Aaron: “Ang tibuok katigoman balaan ang tanan ug si Jehova anaa sa ilang taliwala. Nan, nganong gibayaw ninyo ang inyong kaugalingon nga labaw sa kongregasyon ni Jehova?” Unsay pag-isip ni Jehova sa tinamdan ni Kore ug sa iyang mga tigpaluyo? Giisip sa Diyos ang ilang gihimo ingon nga dili mapasidunggon kang Jehova mismo. Human makakita nga kadtong tanan nga midapig kanila gilamoy sa yuta, si Kore ug ang 250 ka pangulo gilaglag sa kalayo nga gikan ni Jehova.—Numeros 16:1-3, 28-35.
7. Ang “maayong-laki nga mga apostol” may katarongan ba sa pagsaway sa awtoridad ni Pablo?
7 Sa Kristohanong kongregasyon sa unang siglo, diha kadtong walay pagtahod sa teokratikanhong awtoridad. Ang “maayong-laki nga mga apostol” sa kongregasyon sa Corinto may dili-matinahurong tinamdan kang Pablo. Gisaway nila ang iyang katakos sa pagpanulti, nga miingon: “Ang iyang pagkaania sa personal maoy maluya ug ang iyang pagpamulong talamayon.” (2 Corinto 10:10; 11:5) Kon si Pablo maoy maayong mamumulong o dili ba, siya takos sa pagtahod ingon nga usa ka apostol. Apan ang pagpanulti ni Pablo tinuod ba nga talamayon? Ang iyang mga pakigpulong publiko nga nasulat diha sa Bibliya magpamatuod nga siya usa ka makapakombinsir nga mamumulong. Gani, ingong resulta sa makadiyot nga pagpakigsulti kang Herodes Agripa II, nga usa ka “batid sa tanan . . . nga mga lantugi taliwala sa mga Hudiyo,” si Pablo nakapadangat sa hari sa punto nga nakaingon: “Sa mubong panahon makombinser mo ako nga mahimong Kristohanon”! (Buhat 13:15-43; 17:22-34; 26:1-28) Bisan pa niana, ang maayong-laki nga mga apostol sa Corinto nag-akusar kaniya ingon nga talamayon sa iyang pagpanulti! Unsay pag-isip ni Jehova sa ilang tinamdan? Sa usa ka mensahe alang sa mga magtatan-aw sa kongregasyon sa Efeso, si Jesu-Kristo naghisgot nga nagdayeg sa mga tawo nga wala magpakabig niadtong ‘miingon nga sila mga apostol, apan dili diay.’—Pinadayag 2:2.
Pagtahod Bisan pa sa Pagkadili-Hingpit
8. Giunsa pagpakita ni David nga iyang gipasidunggan ang awtoridad nga gihatag ni Jehova kang Saul?
8 Adunay daghang panig-ingnan sa Bibliya niadtong nagpasidungog sa mga tawong anaa sa awtoridad, bisan pag sila sayop nga nagagamit o nag-abuso kaha sa ilang awtoridad. Si David usa sa maong maayong panig-ingnan. Si Haring Saul, nga ubos kaniya siya nag-alagad, nasina sa mga nahimo ni David ug nagtinguha sa pagpatay kaniya. (1 Samuel 18:8-12; 19:9-11; 23:26) Bisan pa niana, bisan pag may mga kahigayonan sa pagpatay kang Saul, si David miingon: “Halayo ra kana alang kanako, gikan sa panglantaw ni Jehova, sa pagbakyaw sa akong kamot batok sa dinihogan ni Jehova!” (1 Samuel 24:3-6; 26:7-13) Nahibalo si David nga sayop si Saul, apan gitugyan niya kang Jehova ang paghukom kaniya. (1 Samuel 24:12, 15; 26:22-24) Wala siya magsulti ug pasipala bahin o ngadto kang Saul.
9. (a) Unsay gibati ni David samtang gimaltratar ni Saul? (b) Sa unsang paagi mailhan nato nga ang pagtahod ni David alang kang Saul maoy tiunay?
9 Naguol ba si David samtang gimaltratar siya? “Adunay . . . mga malupigon nga nagatinguha sa akong kalag,” si David mituaw kang Jehova. (Salmo 54:3) Gipahayag niya sa bug-os kang Jehova ang sulod sa iyang kasingkasing: “Luwasa ako gikan sa akong mga kaaway, Oh Diyos ko . . . Ang mga kusgan miatake kanako, dili tungod sa pagsukol sa akong bahin, ni bisan unsa nga sala, Oh Jehova. Bisan ug walay kasaypanan, sila nanalagan ug nangandam. Pagmata sa akong pagtawag ug tan-awa.” (Salmo 59:1-4) Gibati mo ba sukad ang ingon—nga bisag wala ka makahimog sala ngadto sa usa ka tawong anaa sa awtoridad, siya naglisodlisod kanunay kanimo? Si David wala mapakyas sa pagpakitag pagtahod kang Saul. Sa pagkamatay ni Saul, inay mohugyaw sa kalipay, si David mikomposo ug usa ka balak sa pagbangotan: “Si Saul ug si Jonathan, ang mga hiligugmaon ug kahimut-anan panahon sa ilang kinabuhi . . . Mas tulin sila kay sa mga agila, mas kusgan sila kay sa mga leyon. Kamong mga anak nga babaye sa Israel, panghilak kamo tungod kang Saul.” (2 Samuel 1:23, 24) Pagkatalagsaong panig-ingnan sa tiunay nga pagtahod alang sa dinihogan ni Jehova, bisan pag si David gibuhatag daotan ni Saul!
10. Unsang maayong panig-ingnan ang gihatag ni Pablo sa pagpasidungog sa hinatag-sa-Diyos nga awtoridad sa nagamandong lawas, ug unsay miresulta niana?
10 Sa Kristohanong panahon, kita makakaplag usab ug talagsaong mga panig-ingnan niadtong nagapasidungog sa hinatag-sa-Diyos nga mga awtoridad. Pananglitan, tagda si Pablo. Siya nagpakitag pagtahod alang sa mga desisyon sa unang-siglong nagamandong lawas sa Kristohanong kongregasyon. Panahon sa kataposang pagduaw ni Pablo sa Jerusalem, gitambagan siya sa nagamandong lawas nga maghinlo sa iyang kaugalingon sa seremonyal nga paagi aron ipakita sa uban nga siya walay daotang hunahuna bahin sa Moisesnong Balaod. Si Pablo makapangatarongan unta: ‘Kanang mga igsoona kaniadto nagsugo kanako sa pagbiya sa Jerusalem sa dihang nameligro ang akong kinabuhi. Karon buot nilang ipasundayag ko sa dayag nga ako nagatahod sa Moisesnong Balaod. Ako nakasulat na ngadto sa mga taga-Galacia nga nagtambag kanila nga magpabiling nalingkawas sa pagtuman sa Balaod. Kon ako moadto sa templo, basin ang akong himoon hisaypan pagsabot sa uban, kay maghunahuna nga nagpahiuyon ako niadtong mga sakop sa may-sirkunsisyon nga matang.’ Hinunoa, dayag wala mangatarongan sa ingon si Pablo. Sanglit walay nalangkit nga pagkompromiso sa Kristohanong mga prinsipyo, siya nagtahod ug misunod sa tambag sa unang-siglong nagamandong lawas. Ang dihadihang resulta mao nga si Pablo kinahanglang luwason gikan sa magubtanong panon sa mga Hudiyo, ug human niadto siya migugol ug duha ka tuig sa bilanggoan. Sa kataposan, ang kabubut-on sa Diyos maoy natuman. Si Pablo nakapamatuod atubangan sa hatag-as nga opisyales sa Cesarea ug unya nga gigastohan sa kagamhanan siya gidala ngadto sa Roma aron makapamatuod atubangan kang Cesar mismo.—Buhat 9:26-30; 21:20-26; 23:11; 24:27; Galacia 2:12; 4:9, 10.
Ikaw ba Nagapakitag Pagtahod?
11. Sa unsang paagi makapakita kitag pagtahod alang sa sekular nga awtoridad?
11 Ikaw ba nagapakitag angay nga pagtahod alang niadtong anaa sa awtoridad? Ang mga Kristohanon gisugo nga “ibayad ngadto sa tanan ang mga nahiangay kanila, . . . kaniya nga mangayog dungog, ang maong dungog.” Sa pagkatinuod, ang pagpasakop nato sa “labaw nga mga awtoridad” maglakip dili lamang nga bayran nato ang atong mga buluhisan kondili nga pasidunggan usab nato ang mga awtoridad pinaagi sa atong pamatasan ug sinultihan. (Roma 13:1-7) Kon moatubang sa opisyales sa gobyerno nga tingali mapintason, unsay atong sanong? Sa Chiapas State, Mexico, sa usa ka komunidad ang mga awtoridad nagkuha sa umahan nga iya sa 57 ka pamilyang mga Saksi ni Jehova tungod kay ang maong mga Kristohanon dili mosalmot sa pipila ka relihiyosong mga pista. Panahon sa mga miting nga gihimo aron pagsulbad niana, ang mga Saksi, nga hinlo ug hapsayg pamiste, sa kanunay nagsulti uban ang dignidad ug pagtahod. Kapig usa ka tuig sa ulahi, ang desisyon gipakanaog nga pabor kanila. Tungod sa ilang tinamdan naangkon ang pagtahod sa pipila ka maniniid sa puntong buot usab nilang mahimo nga mga Saksi ni Jehova!
12. Nganong hinungdanon nga ang usa magbaton ug “halawom nga pagtahod” alang sa iyang dili-matinuohong bana?
12 Sa unsang paagi ikapakita nimo ang pagtahod alang sa hinatag-sa-Diyos nga awtoridad diha sa pamilya? Human sa paghisgot sa panig-ingnan ni Jesus sa pag-antos sa daotan, si apostol Pedro miingon: “Sa samang paagi, kamong mga asawa, magpasakop sa inyong kaugalingong mga bana, aron nga, kon aduna may dili masinugtanon sa pulong, sila mangakabig nga walay pulong pinaagi sa panggawi sa ilang mga asawa, ingon nga mga saksing-nakakita sa inyong putli nga panggawi inubanan sa halawom nga pagtahod.” (1 Pedro 3:1, 2; Efeso 5:22-24) Si Pedro nagpasiugda dinhi sa pagkahinungdanon nga magpasakop ang usa ka asawa sa iyang bana uban ang “halawom nga pagtahod,” bisan pag ang pipila ka bana tingali gamay rag ginahimo sa pagkahimong takos sa maong pagtahod. Ang matinahurong tinamdan sa usa ka asawa mahimong makakabig sa kasingkasing sa iyang dili-matinuohong bana.
13. Sa unsang paagi ang mga asawa makapasidungog sa ilang mga bana?
13 Sa konteksto niining mga kasulatana, si Pedro nagdala sa atong pagtagad sa panig-ingnan ni Sara, kansang bana, si Abraham, maoy talagsaong panig-ingnan sa pagtuo. (Roma 4:16, 17; Galacia 3:6-9; 1 Pedro 3:6) Ang mga asawang may matinuohong mga bana angay bang maghatag kanilag menos nga pasidungog kay sa igahatag sa mga asawang may dili-matinuohong mga kapikas ngadto sa ilang mga bana? Unsa na man kon ikaw dili mouyon sa imong bana bahin sa usa ka butang? Si Jesus mihatag ug tambag nga ikapadapat sa malangkobong paagi dinhi: “Kon ang usa nga ilalom sa awtoridad magpugos kanimo nga moalagad ug usa ka milya, adto uban kaniya ug duha ka milya.” (Mateo 5:41) Ginapasidunggan mo ba ang imong bana pinaagi sa pag-uyon sa iyang mga kagustohan? Kon kini morag lisod kaayo, ipahibalo kaniya ang imong mga gibati. Ayaw hunahunaa nga siya nasayod kon unsay imong gibati. Apan kon imong ipahibalo kaniya ang imong kagustohan, himoa kana sa matinahurong paagi. Ang Bibliya nagtambag kanato: “Himoa ang inyong pamulong nga kanunay may pagkamadanihon, tinimplahan ug asin, aron mahibaloan kon sa unsang paagi angay kamo magahatag ug tubag ngadto sa matag usa.”—Colosas 4:6.
14. Unsay nalangkit sa pagpakitag pasidungog sa mga ginikanan?
14 Komosta ba kamong mga anak? Ang Pulong sa Diyos nagsugo: “Mga anak, magmasinugtanon sa inyong mga ginikanan kahiusa sa Ginoo, kay kini maoy matarong: ‘Pasidunggi ang imong amahan ug ang imong inahan’; nga maoy unang sugo nga may saad.” (Efeso 6:1-3) Matikdi nga ang pagkamasinugtanon ngadto sa inyong mga ginikanan giisip nga samag kahulogan sa ‘pagpasidungog sa imong amahan ug imong inahan.’ Ang Gregong pulong nga gihubad nga “pasidunggi” may kahulogan nga “paghatag ug bili” o “pagtino sa bili sa.” Busa, ang pagkamasinugtanon nagkinahanglan dili lamang sa nagpanukong pagsunod sa mga lagda sa ginikanan nga tingalig dili makataronganon alang kanimo. Ang Diyos nagsugo nga tamdon mo pag-ayo ang imong mga ginikanan ug pabilhan ang ilang giya.—Proverbio 15:5.
15. Sa unsang paagi mapatunhay sa mga anak ang ilang pagtahod bisan pag mobati sila nga nasayop ang ilang mga ginikanan?
15 Kon ang imong mga ginikanan may himoon nga lagmit makapamenos sa imong pagtahod kanila, nan unsa man? Sulayi nga isipon kana gikan sa ilang punto de bista. Dili ba sila man ang “nagpahinabo sa imong pagkatawo” ug nagtagana sa imong mga panginahanglan? (Proverbio 23:22) Dili ba sila gipalihok sa gugma alang kanimo? (Hebreohanon 12:7-11) Pakigsulti nga matinahuron sa imong mga ginikanan, nga isaysay diha sa espiritu sa kalumo kon unsay imong gibati. Bisan kon mosanong sila sa paaging dili nimo gusto, likayi ang pagsulti nga dili matinahuron kanila. (Proverbio 24:29) Hinumdomi kon giunsa pagpatunhay ni David ang iyang pagtahod alang kang Saul bisan pag ang hari mibulag gikan sa pagsunod sa tambag sa Diyos. Pangayo ug tabang kang Jehova aron masagubang nimo ang imong mga gibati. “Sa iyang atubangan ipahayag sa bug-os ang anaa sa imong kasingkasing,” matod ni David. “Ang Diyos maoy atong dalangpanan.”—Salmo 62:8; Lamentaciones 3:25-27.
Pasidunggi Kadtong Nagapanguna
16. Unsay atong matun-an gikan sa mga panig-ingnan sa bakak nga mga magtutudlo ug sa mga manulonda?
16 Ang mga ansiyano sa kongregasyon maoy tinudlo sa balaang espiritu, apan sila dili pa hingpit ug makahimog mga sayop. (Salmo 130:3; Ecclesiastes 7:20; Buhat 20:28; Santiago 3:2) Ingong resulta, ang pipila diha sa kongregasyon basin dili mahimuot sa mga ansiyano. Sa unsang paagi mosanong kita sa dihang kita mobati nga diha sa kongregasyon adunay butang nga wala madumala sa hustong paagi, o sa labing menos mopatim-awng ingon niana? Matikdi ang kalainan tali sa unang-siglong bakak nga mga magtutudlo ug sa mga manulonda: “Mapangahason, mabuoton sa kaugalingon, sila [bakak nga mga magtutudlo] walay pagpangurog sa mga mahimayaon hinunoa nagapamulong nga inabusar, samtang ang mga anghel, bisan tuod sila labaw sa kusog ug gahom, wala magapadangat ug sumbong batok kanila sa maabusohong mga pulong, wala magabuhat sa ingon gumikan sa pagtahod kang Jehova.” (2 Pedro 2:10-13) Bisan pag ang bakak nga mga magtutudlo nagsulti nga mapasipalahon bahin sa “mga mahimayaon”—ang mga ansiyano nga gihatagan ug awtoridad sa unang-siglong Kristohanong kongregasyon—ang mga manulonda wala magsulting mapasipalahon bahin sa bakak nga mga magtutudlo nga nagpahinabog pagkabahinbahin taliwala sa mga igsoon. Ang mga manulonda, kay anaa sa labaw nga katungdanan ug may mas hait nga sentido sa hustisya kay sa mga tawo, nahibalo kon unsay nahitabo diha sa kongregasyon. Bisan pa niana, “gumikan sa pagtahod kang Jehova,” gitugyan nila sa Diyos ang paghukom.—Hebreohanon 2:6, 7; Judas 9.
17. Sa unsang paagi nalangkit ang imong pagtuo sa dihang magdumala sa mga suliran diin gibati nimo nga nasayop ang mga ansiyano?
17 Bisan kon may butang nga wala madumala sumala sa angay unta niana, dili ba angay nga magbaton kitag pagtuo kang Jesu-Kristo ingon nga buhing Ulo sa Kristohanong kongregasyon? Wala ba diay siya mahibalo kon unsay nagakahitabo diha sa iyang kaugalingong tibuok-kalibotan nga kongregasyon? Dili ba angay nga tahoron nato ang iyang paagi sa pagdumala sa kahimtang ug ilhon ang iyang katakos sa pagpaigo sa mga butang? Sa pagkatinuod, ‘kinsa ba kita nga pagahukman nato ang atong silingan?’ (Santiago 4:12; 1 Corinto 11:3; Colosas 1:18) Nganong dili isulti ang imong mga kabalaka kang Jehova diha sa imong mga pag-ampo?
18, 19. Unsay imong mahimo kon gibati nimo nga nasayop ang usa ka ansiyano?
18 Tungod sa tawhanong pagkadili-hingpit, ang mga kabingkilan o mga suliran mahimong motungha. Mahimong adunay mga higayon nga masayop ang usa ka ansiyano, nga magpahinabo nga ang pipila matugaw. Ang madalidalion natong paglihok ubos nianang mga kahimtanga dili makapausob sa kahimtang. Basin makapagrabe lamang kana sa suliran. Kadtong adunay espirituwal nga pag-ila mohulat nga tul-iron ni Jehova ang mga butang ug ipadapat ang disiplina nga gikinahanglan tingali sa iyang kaugalingong panahon ug paagi.—2 Timoteo 3:16; Hebreohanon 12:7-11.
19 Unsa na man kon ikaw naguol tungod sa usa ka butang? Inay isulti sa uban diha sa kongregasyon, nganong dili moduol sa matinahurong paagi sa mga ansiyano alang sa tabang? Nga dili mahimong hinawayon, isaysay kon sa unsang paagi naapektahan ka. Batoni kanunay ang ‘pagbinatiay’ alang kanila, ug hupti ang pagtahod samtang mosugilon ka kanila. (1 Pedro 3:8) Ayaw pagkahimong makantalitahon, kondili salig sa ilang Kristohanong kahamtong. Pabilhi ang Kasulatanhong pagdasig nga tingali maluloton nilang ihatag. Ug kon mopatim-aw nga gikinahanglan ang ubang mga lakang sa pagtul-id, magmasaligon nga giyahan ni Jehova ang mga ansiyano aron buhaton kon unsay maayo ug matarong.—Galacia 6:10; 2 Tesalonica 3:13.
20. Unsay atong pagahisgotan sa sunod artikulo?
20 Bisan pa niana, adunay lain pang bahin nga pagatagdon may labot sa pagpasidungog ug pagtahod niadtong anaa sa awtoridad. Dili ba angay nga kadtong gibutang sa katungdanang may awtoridad magtahod sa mga tawong gipaatiman kanila? Susihon nato kana sa sunod artikulo.
Unsaon Nimo Pagtubag?
• Unsang maayong katarongan ang atong nabatonan sa pagpasidungog niadtong adunay awtoridad?
• Unsay pag-isip ni Jehova ug ni Jesus niadtong dili motahod sa hinatag-sa-Diyos nga awtoridad?
• Unsang maayong mga panig-ingnan ang atong nabatonan niadtong nagpasidungog sa mga tawong gihatagan ug awtoridad?
• Unsay atong mahimo kon ang usa nga adunay awtoridad ibabaw nato morag nasayop?
[Hulagway sa panid 12]
Si Sara sa halawom nagtahod sa awtoridad ni Abraham ug nagmalipayon
[Hulagway sa panid 13]
Si Mikal napakyas sa pagtahod sa awtoridad ni David ingon nga ulo sa pamilya ug hari
[Hulagway sa panid 15]
“Halayo ra kana alang kanako, . . . sa pagbakyaw sa akong kamot batok sa dinihogan ni Jehova!”
[Hulagway sa panid 16]
Nganong dili isulti ang imong mga kabalaka kang Jehova diha sa imong mga pag-ampo?