Ikaw ba Makabaton ug Kaayohan Gikan sa Dili-Takos nga Kalulot?

“SA NAGDUGANG ang akong nahibaloan mahitungod sa mga sukdanan sa Diyos diha sa Bibliya, dugang nga mibati ako nga dili-takos sa iyang pag-uyon ug panalangin,” miingon si ­Frank. Ang iyang interes sa Bibliya napukaw samtang didto siya sulod sa bilanggoan tungod sa mga sala sa droga. Iyang nabasa ang usa ka kopya sa librong Ang Kamatuoran nga Motultol sa Kinabuhing Walay Kataposan,a mibati nga ang gipamulong niini mao gayod ang kamatuoran, ug, human nga nakagawas sa bilanggoan, nakigkita sa mga Saksi ni Jehova aron magtuon pag dugang bahin sa kamatuoran.

Nganong ang pagtuon sa Bibliya mipabati kaniyang dili-takos? Tungod kay ang iyang daang estilo-sa-kinabuhi nahasupak sa daghang mga prinsipyo sa Bibliya. Pag-abuso sa droga, pag-abuso sa alkohol, ug ubang nagkalainlaing makauulaw nga mga batasan nga nagnudnod kaniya sa ubos nga sa usa ka higayon giingnan siya sa usa ka polis: “Mahimo bang tug-anan mo ako kon hain ka nagpuyo? Gusto lang akong mahibalo kon asa ko ipadala ang imong patayng lawas!”

Ang labaw nga mipabati kaniyang dili-takos, hinunoa, mao nga bisan giunsa niya pagpaningkamot, nalisdan kaayo siya sa pagbuntog niining nakagamot nang mahugawng mga batasan. Ang makauulaw nga pagkagiyan sa alkohol, pananglitan, halos nakapildi kaniya. “Napakyas ako kanunay ug nasubo sa hilabihan,” matud pa niya. “Ako mosurender na unta, mibati nga wala na akoy paglaom.”

Ang uban tingali walay kasinatian nga sama kang Frank. Apan, hayan nga sila mibati ug dakong kakulangan. Kini tingali tungod kay sila nagbutang ug dili makataronganon hataas nga mga sukdanan sa ilang kaugalingon samtang sila nagapaningkamot sa pagkinabuhi nga ilang gibati nga maoy gipangayo sa Diyos. Sa dihang mapakyas sila, sila mobati nga sad-an. “Ang pagbating sad-an mahimong makalilisang,” miingon si Dr. Claire ­Weekes sa iyang librong Self-Help for Your Nerves, “ilabina kanilang naningkamot sa pagbutang ug hataas nga sukdanan sa ilang kaugalingon.” Unsay buhaton sa usa ka Kristohanon kon siya naapektohan niana nga pagbati sa pagkawalay-bili?

Pabilhi ang Dili-Takos nga Kalulot

“Ang usa ka butang nga nakatabang kanakog dako,” miingon si ­Frank, “mao ang pagpabili sa giingon sa Bibliya sa Hebreohanon 4:15, 16.” Si apostol Pablo dinhi nagpahinumdom kanato nga si Jesus maoy usa ka matinagdanong magtatabang kinsa “motabang kanato sa atong mga kahuyangan” ug naghimo niining posible alang kanato nga “makabatog kaluoy ug makakaplag sa dili-takos nga kalulot ingong tabang sa hustong panahon.”

Buot ba nimo ang sekreto sa pagbuntog sa pagbati sa pagkawalay-bili? Mao kini: Hinumdomi nga si Jehova nga Diyos ug si Jesu-Kristo nahibalo nga kita mahuyang tungod sa napanunod nga pagkadili-hingpit. Sila nakasabot nga dili kita makaabot sa hingpit sa matarong nga mga sukdanan. (Salmo 51:5; Roma 3:23; 5:12, 18; Santiago 3:2) Busa sila wala magpaabot ug labaw kanato kay sa atong mahatag. Sila nagtan-aw kanato sa atong maayong mga hiyas, dili sa atong mga kahuyangan. Nangutana ang salmista: “Kon sa kasal-anan kami imong ginabantayan, Oh Jah, Oh Jehova, kinsa ang makabarog?” (Salmo 130:3) Imong makita nga walay usa kanato ang makabarog. Pinaagi sa halad lukat ni Jesu-Kristo, hinunoa, si Jehova maluloy-ong mohatag kanato ug hinlo nga baroganan bisan pa sa atong mga kahuyangan. (1 Juan 2:2; 4:9, 10) Kita makabaton “sa kapasayloan sa atong mga kasal-anan”—ug busa matabangan sa pagbuntog sa bisan unsang pagbati sa kawalay-bili—“sumala sa kadagaya sa iyang dili-takos nga kalulot.”—Efeso 1:7.

Tan-awa kini niining paagiha. Ang mga tawong nahigugma sa mga buhat sa arte maningkamot gayod sa pag-ayo sa nadaot pag-ayong mga dibuho o ubang mga buhat sa arte. Pananglitan, didto sa Nasyonal nga Galeriya sa London, Inglaterra, sa dihang giposil sa usa ka tawo ang dibuho ni Leonardo da Vinci nga mokantidad ug £20 ka milyon (duolan sa $32 milyones, U.S.) walay usa ang misugyot sa paglabay niini sanglit daot na man karon ang dibuho. Ang trabaho sa pagpasig-uli sa 487-anyos nga obra-maestra gisugdan dihadiha. Ngano? Tungod kay kadto bililhon sa mga mata sa mga mahigugmaon sa arte.

Dili ba ikaw mas labaw pag bili kay sa usa ka dibuho nga tisa ug lapis? Sa mga mata sa Diyos ikaw gayod labaw pa—bisag unsa pa ikaw nga pagkadaot tungod sa napanunod nga sala. (Salmo 72:12-14; Mateo 20:28) Si Jehova nga Diyos, ang batid orihinal nga Maglalalang sa tawhanong pamilya, mobuhat kon unsay gikinahanglan aron mapasig-uli sa kahingpitan ang mga membro niana nga pamilya kinsa andam nga mosanong sa iyang mahigugmaong pagtagad.—Itandi ang Buhat 3:21; Roma 8:20-22.

Sanong sa Dili-Takos nga Kalulot

Sunda ang panig-ingnan ni apostol Pablo. Iyang gipabilhan ug dako ang kalulot sa Diyos nga maluloy-ong nagpasaylo kaniya sa iyang mga kasal-anan sa miagi ug kanunay nga pagpaluyo kaniya sa iyang paningkamot sa pagbuntog sa nagbalik-balik nga mga kahuyangan. (Roma 7:15-25; 1 Corinto 15:9, 10) Gitul-id ni Pablo ang iyang paagi sa kinabuhi ug ‘gipanton ang iyang lawas ug giulipon kini’ aron makapabilin diha sa dalan nga giuyonan sa Diyos. (1 Corinto 9:27) Wala niya pasagdi nga ang iyang lawas, uban sa makasasala pisikal ug emosyonal nga mga kiling niini, moulipon kaniya.

Dawata ang dili-takos nga kalulot sa Diyos, ug tugoti nga kini moagak kanimo sa paghinulsol. (Roma 2:4; 2 Corinto 6:1) Kon natugaw ka sa miaging mga kasal-anan, tul-ira kana ug unya tuohi ang pasalig ni Jehova nga ikaw iyang gipasaylo. (Isaias 1:16-18; Buhat 2:38) Kon gihasol ka kanunay sa mga kahuyangan, padayon sa pakigbugno niana. Kinasingkasing nga moampo alang sa tabang ni Jehova sa pagbuntog niana samtang sa samang higayon isalig kaniya ang iyang kaluoy. (Salmo 55:22) Gipunting ang iyang kaugalingong kasinatian, si ­Frank mitambag: “Kon adunay usa nga mapakyas sa iyang pakigbugno batok sa pipila ka daotang batasan, dili niya lantawon kana ingong bug-os, kataposang kapakyasan kondili, hinunoa, usa ka temporaryong kakulian.” Kon ang uban nakadugang sa imong suliran pinaagi sa pagpangayog daghan pa gikan kanimo kay sa imong mahatag, hinumdomi nga ang Diyos ang imong gipaningkamotan nga mapahimut-an, dili ang mga tawo.—Galacia 1:10.

Sa imong pakigbugno sa pagbuhat ug matarong, pagbantay batok sa “malalangong mga buhat” ni Satanas, nga mahimong tawgong “ang daotang mga lipat-lipat sa Yawa.” (Efeso 6:11, Reference Bible, potnot; Today’s English Version) Palandonga ang duha ka “daotang mga lipat-lipat” nga iyang gamiton sa pagsulay sa paghikaw kanimo sa mga kaayohan sa dili-takos nga kalulot.

“Ang Daotang mga Lipat-lipat” ni Satanas

Pahimuslan sa Yawa ang pagbati sa pagkawalay-bili sa pagsulay kanimo nga mahilayo sa Diyos. Sa Satanas mao ang tuboran sa sala nga nagdaot kanimo. Karon iyang sulayan nga mapukaw ang pagbati nga ikaw walay-bili sa mga mata sa Diyos, sama sa gipaningkamotang buhaton ni Bildad kang Job. (Job 25:4-6; Juan 8:44) Pagkadaghan sa napilding mga gubat tungod kay nawad-an nag kadasig ang mga sundalo nga nakiggubat! Busa, ayaw tugoting si Satanas mopaluya kanimo. (Efeso 6:10-13) Ang pagkasayod sa mga lit-ag ni Satanas angay modasig kanimo sa dugang nga pakigbugno sa pagbuhat kon unsa ang matarong.—2 Corinto 2:11.

Sa higayon nga ikaw masubo sa mga kapakyasan sa usa ka matang o sa lain, tinoa nga ikaw dili ‘madaog sa hilabihan nga kasubo.’ (2 Corinto 2:7) Si Dr. Claire ­Weekes mikomento bahin niining kiling sa pipila nga nagtugot sa nangaging mga kahuyangan nga mopiog kanila: “Magun-obon nga pagkinabuhi ang pagtugot sa nangaging kasal-anan nga moparalisar sa presente nga kalihokan.”—Tan-awa ang Buhat 3:19.

Kon hingpit natong makab-ot ang tanang mga kinahanglanon sa Diyos, kini maoy takos nga kalulot alang kaniya sa paghatag kanato ug mga panalangin nga iyang gisaad. Apan si Jehova nga Diyos ug si Jesu-Kristo nagpakita kanato ug kalulot nga “dili-takos.” Ang A Greek-English Lexicon of the New Testament, ni J. H. Thayer, nagpatin-aw sa kahulogan sa pulong nga gigamit ni apostol Pablo sa pagbatbat niini nga hiyas sa Diyos: “Ang pulong [khaʹris] adunay ideya sa kalulot nga ihatag sa usa ka tawo nga dili siya takos.” Walay atong mga buhat nga takos sa panalangin sa Diyos. Kini maoy, sumala sa giingon ni Pablo, dili-takos nga kalulot. Kon ikaw sinsero nga nagabuhat kutob sa imong mahimo sa pagtuman sa imong mga obligasyon sa Diyos, magkalipay sa pagbuhat niana. Si Jehova dili na mangayo pa kanimo.

Sayri, hinunoa, ang laing “daotang mga lipat-lipat” ni Satanas. Iyang ginapahisalaag ang pipila sa paghunahuna nga sila makapahimulos sa dili-takos nga kalulot sa Diyos, nga sila makadahom sa iyang kaluoy. Si Jehova mahigugmaong mopasaylo sa atong mga kahuyangan, apan kana wala magkahulogan nga kita mohunong sa pagbuntog niana. Gihubit ni Pablo ang pipila kinsa “nagayatak sa Anak sa Diyos ug . . . nagapanamastamas sa espiritu sa dili-takos nga kalulot.” (Hebreohanon 10:29) Sila nagpakita nga walay pagtahod sa matarong nga mga prinsipyo ug nagayubit sa mga kasugoan sa Diyos, nga naghimo sa ilang kaugalingon nga dili na mapasig-uli. Ang igsoon ni Jesus sa inahan nga si Judas, nga nakakita sa kapeligrohan nga mahatag sa mga piyon ni Satanas, misulat: “May mga tawong nga nakasulod sa [mga kongregasyon], . . . mga tawong dili-diyosnon, nga naghimo sa dili-takos nga kalulot sa Diyos ingong pasumangil sa haluag nga paggawi.”—Judas 4.

Si Satanas makalimbong kanila sa paghunahuna nga sila kapin kun kulang makahimog tinuyo nga pagpakasala ug unya mangayo sa Diyos nga pasayloon ang ilang mga sala. Apan si Jehova dili mopasaylo sa mga tawo nga mituyo sa paglapas sa iyang mga kasugoan. Siya “dagaya sa mahigugmaong-kalulot” kanila nga naningkamot sa pag-alagad kaniya sa ilang labing maarangan bisan pa sa ilang mga dili-kahingpitan. “Apan dili gayod magpanuko sa pagsilot” kon kini gikinahanglan.—Exodo 34:6, 7.

Ikaw Makabaton ug Kaayohan Gikan sa Dili-Takos nga Kalulot

Makalipayng masayod nga si Jehova wala maglantaw kanimo sa imong dili-hingpit, nadaot nga kahimtang. Siya nasayod kon unsa ikaw sa dihang ang makapasig-uling mga gahom sa halad lukat ni Jesus sa bug-os ikapatuman. Busa, pag-ampo nga may pagsalig kang Jehova, sama sa gihimo ni salmistang David. “Maluoy ka kanako, Oh Diyos,” miingon si David, “sumala sa imong mahigugmaong-kalulot. Sumala sa kadaghanon sa imong malumong mga kaluoy palaa ang akong mga kalapasan. Hugasan mo ako pag-ayo gikan sa akong kasal-anan, ug hinloan mo ako gikan sa akong sala. Kay naila ko ang akong mga kalapasan, ug ang akong sala sa gihapon ania sa akong atubangan. Tagoa ang imong nawong gikan sa akong mga sala, ug palaa ang tanan ko nga kasal-anan. . . . Ang usa ka nadugmok ug usa ka mahinulsolong kasingkasing, Oh Diyos, dili mo pagatamayon.”—Salmo 51:1-3; 9, 17.

Ang imong mga kalapasan ug mga kapakyasan tingali anaa kanunay sa imong atubangan. Usahay imong bation nga sama sa usikan nga anak nga gihubit ni Jesus. Sa diha nga kining batan-ona mipauli sa balay human nga makauulawng giwaldas niya ang iyang kabilin sa halayong mga dapit, siya miingon sa iyang amahan: “Dili na ako takos nga pagatawgon pa nga imong anak”! (Lucas 15:21) Bisan pa, kini nga batan-on adunay maayong tinamdan. Wala niya isalikway ang kalulot sa iyang amahan ni nagpaabot niana. Busa mahigugmaong gidawat siya pag-usab sa iyang Amahan sa iyang panimalay. (Lucas 15:20-24) Si Jehova malipay sa pagbuhat sa ingon karong adlawa alang sa iyang makasasalang katawhan nga kinasingkasing naningkamot sa pagbuhat sa iyang kabubut-on.—Salmo 103:8-14; Isaias 55:7.

Wala tugoti ni Frank ang pagbating pagkawalay-bili nga mopiog kaniya. Siya misanong sa dili-takos nga kalulot sa Diyos, ug siya karon nag-alagad na ingong ministeryal nga alagad diha sa usa ka kongregasyon sa mga Saksi ni Jehova. “Ako karon milukso sa kalipay,” miingon siya, “sa dihang palandongon ko ang nabuhat ni Jehova nga Diyos ug ni Jesu-Kristo ug pagabuhaton pa nila alang kanato!”

[Footnote]