“Isul-ob ang Bug-os nga Hinagiban sa Diyos”

MGA Kristohanon magsul-ob ug hinagiban? Nganong magsul-ob man sila ug ingon niana nga kahimanan sa gubat? Dili ba mga mahigugmaon man sila sa kalinaw? (2 Timoteo 2:24) Oo, sila mahigugmaon sa kalinaw. Bisan pa, ang tanang matuod nga mga Kristohanon nagapakig-away​—usa nga ilang gipaningkamotan, dili sa pagpatay, kondili sa pagdaog.

Kon wala pa morebelde si Satanas, ang maong pakig-away dili na unta kinahanglan. Apan siya mirebelde, ug iyang gipahisalaag sila Adan ug Eva sa pagduyog kaniya sa iyang rebelyon. Sukad niadto ang sistema sa kalibotan nga miugmad nailalom sa gahom “sa usa nga daotan,” si Satanas nga Yawa. (1 Juan 5:19) Kadtong mopasakop sa may-katungod nga Soberano, si Jehova, kinahanglang mosukol sa impluwensiya sa kalibotan ug sa magmamando niini. Sila kinahanglang makig-away alang sa ilang espirituwal nga mga kinabuhi. Alang niana, gitambagan ang mga Kristohanon: “Isul-ob ninyo ang bug-os nga hinagiban sa Diyos aron kamo makabarog nga malig-on batok sa mga kaugdahan sa Yawa.”​—Efeso 6:11.

Ang Isul-ob nga Hinagiban

Matikdi nga atong gikinahanglan “ang bug-os nga hinagiban sa Diyos” kon buot natong sa husto mapanalipdan. Nan, atong tan-awon ang matag usa ka bahin niini nga hinagiban ingon sa gihubit ni apostol Pablo ug himoon ang matinud-anong pagsusi sa atong kaugalingon sa pagtino kon kita ba bug-os nasangkapan alang sa espirituwal nga pakiggubat.​—Efeso 6:14-17.

“Busa, barog nga malig-on nga ang inyong mga hawak binaksan sa kamatuoran.” (Efeso 6:14a) Sa panahon sa Bibliya ang mga sundalo nagsul-ob ug panit nga bakus nga moabot ug 15 sentimetros ang kalapad. Kining bakusa makatabang sa pagpanalipod sa bat-ang. Sa dihang hugtan sa sundalo ang iyang bakus, kini mopaila sa iyang pagkaandam sa gubat.

Nan, pagkahaom nga ang balaang kamatuoran gipakasama sa usa ka bakus sa sundalo! Kini maayong nagailustrar nga kinahanglang atong huptan ang kamatuoran sa Pulong sa Diyos nga suod kaayo kanato, nga samag gibaksan niana. Kinahanglang atong palandongon pag-ayo ang diwa sa Pulong sa Diyos. Kini mopanalipod kanato nga mahisalaag sa kabakakan ug mga panglimbong. Dugang pa, ang mga pulong ni Jehova mopaluyo ug mopalig-on kanato sa espirituwal ug moabag sa atong pagkamaunongon.

“Masul-oban sa kotamaya sa pagkamatarong.” (Efeso 6:14b) Ang kotamaya sa sundalo nagapanalipod sa usa ka hinungdanong organo sa lawas​—ang kasingkasing. Nan, diha sa atong hinatag-sa-Diyos espirituwal nga hinagiban, ang pagkamatarong mopanalipod sa atong kasingkasing. Sa Kasulatan, ang kasingkasing maoy haom nga simbolo sa kon unsa kita sa sulod​—atong mga pagbati, mga hunahuna, ug mga tinguha. Sanglit ang Bibliya usab nag-ingon man nga ang kasingkasing kiling sa pagkadaotan, hinungdanon nga atong ugmaron ang determinasyon sa paghupot sa sukdanan ni Jehova sa pagkamatarong. (Jeremias 17:9) Ang pagkamasinugtanon sa Diyos kinahanglang dili minaut nga pagpasundayag sa gawas; kini kinahanglang nagagikan sa sulod. Kini nagkinahanglan nga atong ugmaron ang malig-ong gugma sa pagkamatarong ug ang malig-ong pagdumot sa pagkadaotan. (Salmo 45:7) Sa ingon ang atong kasingkasing mapanalipdan.

“Ang inyong mga tiil masinapinan sa kasangkapan sa maayong balita sa pakigdait.” (Efeso 6:15) Ang imong mga tiil ba nasapinan niining paagiha? Ginadala ka ba niini kanunay sa pag-alagad sa kanataran aron isangyaw ang maayong balita? Ikaw ba naningkamot nga mouswag ang kalidad sa imong mga buluhaton sa pagsangyaw ug sa pagpanudlo? Tinuod, ang pipila ka teritoryo dili-masanongon. Ang mga indibiduwal tingali di-manumbaling, way-pagtagad, o masupakon. Ang atong pagsangyaw tingali mohatag pa ug paglutos kanato. Apan pinaagi sa pagpadayon, maugmad sa mga Kristohanon ang paglahutay, usa ka hiyas nga mohatag panalipod batok sa mga atake ni Satanas. Bisag gilutos, si Pablo maoy usa ka masibotong magsasangyaw, ug kita gidasig nga ‘mahimong manunundog kaniya, ingon nga siya misundog kang Kristo.’​—1 Corinto 11:1.

Ang pagkahimong puliki sa buluhaton sa pagsangyaw-sa-Gingharian mopalig-on sa atong pagsalig diha sa maayong balita. Dugang pa, kini magtugot sa espiritu ni Jehova nga molihok diha kanato aron matuman ang iyang kabubut-on. Ngani, ang maong kalihokan naghimo kanatong isigkamagbubuhat uban sa mga manulonda​—bisan kang Jehova nga Diyos mismo. (1 Corinto 3:9; Pinadayag 14:6) Ug ang ‘pagbaton ug daghang buluhaton diha sa Ginoo’ mopahimo kanatong “malig-on, dili-matarog.” (1 Corinto 15:58) Unsa ka kahibulongang proteksiyon ang itagana niini!

“Dad-a ang dakong kalasag sa pagtuo.” (Efeso 6:16) Uban ang dakong kalasag, ang sundalo sa karaang panahon mapanalipdan sa iyang kaugalingon gikan sa mga bangkaw ug mga pana. Kon siya dili mogamit ug kalasag, siya mahimong masamdan nga grabe o kaha mamatay pa. Ang mga Kristohanon nagaatubang ug mas makamatay pang mga hinagiban​—“ang nagakalayong mga udyong sa usa nga daotan.” Kini naglakip sa tanang butang nga gigamit ni Satanas aron paluyahon ang atong pagtuo ug mopatay kanato sa espirituwal. Kini naglakip sa paglutos, kabakakan, malimbongong mga pilosopiya sa kalibotan, mga pangdani sa materyal, ug ang tentasyon sa pagbuhat sa imoralidad. Aron mapanalipdan kita batok niining tanan, atong gikinahanglan ang dakong kalasag. Walay bahin kanato nga pasagdang walay panalipod.

Si Abraham ug ang iyang asawa, si Sarah, dunay malig-ong pagtuo. Sa dihang lapas na sa edad sa pagpanganak, misalig sila sa saad sa Diyos nga ang usa ka binhi igapanganak pinaagi kanila. Sa ulahi, gipakita ni Abraham ang talagsaong pagtuo sa dihang siya misugot sa panawag sa paghalad kang Isaac, ang iyang bugtong anak nga lalaki pinaagi sa iyang hinigugmang si Sarah. Gipugngan ni Jehova ang kamot ni Abraham ug mitagana ug kapuli nga halad. Apan si Abraham andam sa pagsunod. Ngano? Tungod kay siya dunay bug-os nga pagtuo nga banhawon ni Jehova ang iyang anak ug tumanon ang mga gisaad mahitungod kaniya.​—Roma 4:16-21; Hebreohanon 11:11, 12, 17-19.

Si Moises may sama usab nga pagtuo nga atong gikinahanglan. Iyang gisalikway ang bahandi sa Ehipto, nagpalabi hinunoa sa pag-antos sa pagdagmal uban sa katawhan sa Diyos. Ngano? Tungod kay siya adunay pagtuo nga si Jehova naglungtad ug moluwas sa mga Israelinhon. Ingon niana kalig-on ang pagtuo ni Moises nga “siya nagpadayong malig-on sama nga nakakita sa Usa nga dili-makita.”​—Hebreohanon 11:6, 24-27.

Kita ba may samang pagtuo diha kang Jehova? Ang ato bang relasyon kang Jehova suod kaayo ingon nga daw ato siyang makita? Andam ba kitang mohimog bisan unsang pagsakripisyo o sa paglahutay sa bisan unsang kalisdanan aron maampingan ang atong relasyon sa Diyos? Duna ba kitay bug-os nga pagtuo kang Jehova? (Hebreohanon 11:1) Kon mao, ang nagakalayong mga udyong ni Satanas dili makalagbas sa atong kalasag sa pagtuo.

“Isul-ob ang salukot sa kaluwasan.” (Efeso 6:17a) Ang salukot sa sundalo mopanalipod sa iyang ulo ug sa ingon sa utok​—ang organo sa koordinasyon sa sistema nerbiyos ug sa hunahuna. Ang Kristohanong paglaom sa kaluwasan gipakasama sa usa ka salukot tungod kay kini mopanalipod sa atong hunahuna. Ang panghunahuna sa usa ka Kristohanon ginabag-o pinaagi sa tukmang kahibalo, apan kini iya gihapon sa mahuyang ug sa dili-hingpit nga indibiduwal. (Roma 7:18; 12:2) Kon atong tugotan ang atong hunahuna sa pagkaon sa nagadaot-sa-pagtuo hugaw nga panghunahuna nga ginapatungha sa espiritu niining kalibotana, ang atong pagsalig sa kaluwasan magakawala ug sa kataposan mamatay. Sa laing bahin, kon ato kanunayng pakan-on ang atong hunahuna sa nagapalig-ong mga pulong sa Diyos, ang atong paglaom magpabiling mahayag ug tin-aw. Imo bang padayong gipahaom pag-ayo ang imong salukot sa kaluwasan?

“Ang espada sa espiritu, nga mao, ang pulong sa Diyos.” (Efeso 6:17b) Ang panultihong ang labing maayong depensa mao ang usa ka maayong pag-atake matuod diha sa Kristohanong pagpakiggubat. Samtang ang atong mga tiil, nga nasapinan sa maayong balita sa pakigdait, nagadala kanato ngadto sa mga dili-magtutuo, kita wala pasagding walay-hinagiban. Ang Pulong sa Diyos, ang Bibliya, nagalihok ingong usa ka gamhanang espada nga mohiwa sa espirituwal nga kabakakan ug sayop nga mga pagsabot ug sa pagtabang sa matarong ug kasingkasing nga mga indibiduwal sa pagkakaplag ug espirituwal nga kagawasan.​—Juan 8:31, 32.

Gipakita ni Jesus ang gahom niini nga hinagiban sa dihang, siya nakig-away kang Satanas nga Yawa. Sa dihang gitental diha sa kamingawan, gipanalipdan ni Jesus ang iyang kaugalingon batok sa tulo ka pag-atake ni Satanas pinaagi sa epektibong paggamit sa Pulong sa Diyos ug miingon: “Nahisulat na.” (Mateo 4:1-11) Kon kita makakat-on sa paggamit niini nga espada sa mahanason, matabangan nato ang mga maaghop nga makagawas gikan sa gahom ni Satanas. Dayon, usab, gamiton sa mga ansiano sa kongregasyon ang Pulong sa Diyos sa pagpanalipod sa panon gikan sa mga indibiduwal nga mosulay sa pagpukan sa pagtuo sa mga mahuyang.​—Buhat 20:28-30.

Ang kahanas sa usa ka sundalo sa paggamit ug espada dili masayon. Ang pagbansay ug hataas, dedikadong pagpraktis gikinahanglan sa paggamit niini nga mahanason. Sa susama, diha sa espirituwal nga pagpakiggubat nagkinahanglag dakong pagtuon ug regular nga pagpraktis diha sa ministeryo aron mahimong hanas nga tiggamit sa Pulong sa Diyos. Sa tino, kinahanglang maningkamot kita aron mahimong hanas nga mga tiggamit sa espirituwal nga espada, takos sa “paggamit sa hustong paagi sa pulong sa kamatuoran.”​—2 Timoteo 2:15.

Padayon sa Pag-ampo, Barog nga Malig-on

Ang tanang bahin sa atong espirituwal nga hinagiban hinungdanon aron makapabiling maunongon sa Diyos. Apan sa unsang paagi maampingan nato kining mga hinagibana? Ang regular nga pagtuon sa Bibliya, pagpangandam nga abante sa Kristohanong mga tigom, ug unya maminaw pag-ayo ug aktibong makigbahin niana makatabang kanato nga maampingan ang atong hinagiban. (2 Timoteo 3:16; Hebreohanon 10:24, 25) Ang regular ug masiboton nga pag-alagad sa kanataran uban sa maayong Kristohanong pag-ubanay motabang usab nga maampingan ang atong pang-atake ug pangdepensa nga espirituwal nga hinagiban diha sa maayong kondisyon.​—Proverbio 13:20; Roma 15:15, 16; 1 Corinto 15:33.

Ang pag-ugmad sa hustong tinamdan sa hunahuna hinungdanon usab. Dili gayod nato tugotang ang mga pangagni niining kalibotana mobalda kanato. Hinunoa, atong ugmaron ang ‘yanong mata.’ (Mateo 6:19-24) Sa pagsundog kang Jesu-Kristo, kinahanglang makakat-on usab kita sa paghigugma sa pagkamatarong ug dumtan ang pagkadaotan. (Hebreohanon 1:9) Kining tanang mga butanga motabang kanato nga maampingan ang atong hinatag-sa-Diyos nga espirituwal nga hinagiban.

Human sa paghisgot sa matag bahin sa espirituwal nga hinagiban, si Pablo mihinapos pinaagi sa pag-ingon: “Uban sa tanang matang sa pag-ampo ug pangamuyo . . . magpadayon kamo sa pag-ampo diha sa tanang panahon pinaagi sa espiritu. Ug alang niini magtukaw kamo uban sa bug-os nga pagkamapinadayonon ug pangamuyo kamo alang sa tanang mga balaan.” (Efeso 6:18) Ang maunongong mga sundalo padayong makigkomunikar sa mga hedkuwarter sa kasundalohan ug mosunod sa mga mando. Ingong Kristohanong mga sundalo, kita kinahanglang makigkomunikar kanunay sa atong Soberano, si Jehova nga Diyos, pinaagi sa iyang dakong “komandante sa nasodnong mga grupo,” si Jesu-Kristo. (Isaias 55:4) Kini mahimo, dili pinaagi sa salingkapaw nga pag-ampo, kondili pinaagi sa kinasingkasing nga pangamuyo nga mopabanaag sa kasuod ug sa halalom nga debosyon kang Jehova. Pinaagi sa regular nga pakigkomunikar kang Jehova, kita makadawat ug kalig-on matag adlaw nga mopalahutay kanato sa pagpakiggubat.

Si Jesus miingon: “Nadaog ko ang kalibotan.” (Juan 16:33) Buot usab ni Jehova nga kita magmadaogon. Sa nagkaduol na ang kamatayon ni apostol Pablo, siya nakaingon: “Nakigbugno na ako sa maayong pakigbugno, natapos ko ang lumba, akong gibantayan ang pagtuo.” (2 Timoteo 4:7) Hinaot makapahayag kita sa samang ekspresyon mahitungod sa atong bahin diha sa pagpakiggubat. Kon kita nagatinguha gayod niini, kinahanglan kitang “mobarog nga malig-on batok sa mga kaugdahan sa Yawa” pinaagi sa pagsul-ob sa bug-os nga hinagiban sa Diyos.​—Efeso 6:11.