Ang Langitnong Karo ni Jehova Nagaabante
“Mahitungod sa mga ligid, gitawag sila sa akong nabati,
‘O mga ligid nga nagatuyok!’”—EZEKIEL 10:13.
1. Unsang matanga sa sakyanan ang nabatonan ni Jehova?
KARONG panahona sa tulin kaayong mga ayroplanong jet, ang mga lider sa kalibotan mobati nga ila nang natagamtam ang kinamaayohang paagi sa pagbiyahe. Apan, 2,600 ka tuig kanhi, gipadayag ni Jehova nga Diyos nga siya may kinalabwang matang sa sakyanan, ang matang nga wala pa makita sukad sa mga inhenyero. Kini mao ang dako, kahibulongang karo! Katingad-anan ba nga ang Maglalalang sa uniberso mosakay diha sa usa ka samag-karo nga sakyanan? Dili, kay ang langitnong sakyanan ni Jehova lahi kaayo gikan sa bisan unsang sakyanan nga naimbento sa tawo.
2. Giunsa paglarawan sa Ezekiel kapitulo 1 ang langitnong karo ni Jehova, ug ngadto kang kinsa gikuha sa propeta ang atong unang pagtagad?
2 Diha sa kapitulo 1 sa tagna ni Ezekiel, si Jehova gihulagway nga nagsakay diha sa usa ka dako langitnong karo. Kining kahibulongang upat-ug-ligid nga sakyanan gipadagan sa kaugalingon ug makabuhat ug katingalahang mga butang. Nakita ni Ezekiel kining langitnong karo diha sa panan-awon niadtong 613 W.K.P., sa dihang siya diha sa usa ka daplin sa suba sa karaang Babilonya. Unang gikuha sa propeta ang atong pagtagad ngadto kanilang nag-atinder sa langitnong karo ni Jehova. Samtang magabasa kita, atong handurawon ang nakita ni Ezekiel.
Upat ka Buhing Binuhat
3. Unsay gipaila sa upat ka dagway sa matag usa sa upat ka kerubin?
3 Si Ezekiel mitaho: “Ug ako mitan-aw, ug, tan-awa! ang usa ka unos migula gikan sa amihanan, usa ka bagang panganod uban ang nagaulbo-ulbong kalayo, ug usa ka kahayag nga nagalibot diha niana . . . Ug gikan sa taliwala sa unos dihay migula nga may-ong sa upat ka buhing binuhat.” (Ezekiel 1:4, 5) Ang matag usa niining upat ka buhing binuhat, o mga kerubin, adunay upat ka pako ug upat ka dagway. Sila may usa ka dagway sa liyon, nga nagpaila sa hustisya ni Jehova; usa ka dagway sa torong baka, nga naghawas sa gahom sa Diyos; ug usa ka dagway sa agila, nga nagkahulogan sa Iyang kaalam. Sila usab may usa ka dagway sa usa ka tawo, nga nagpasabot sa gugma ni Jehova.—Deuteronomio 32:4; Job 12:13; Isaias 40:26; Ezekiel 1:10; 1 Juan 4:8.
4. Nganong ang mga kerubin adunay upat ka dagway, ug unsa ka tulin ang mga kerubin?
4 Ang matag kerubin may usa ka dagway nga nagtan-aw sa usa sa upat ka direksiyon. Busa, ang mga kerubin makausab sa direksiyon dihadiha ug sundon ang dagway nga nagtan-aw sa gitinguhang direksiyon. Apan sama sa unsa ang gikusgon sa pagdagan sa maong mga kerubin? Aw, sila makadagan sama sa gikusgon sa kilat! (Ezekiel 1:14) Wala pay hinimog tawo nga sakyanan ang nakaabot niana nga gikusgon.
5. Giunsa paghubit ni Ezekiel ang mga ligid ug mga yantas sa karo?
5 Sa kalit, nakita ang mga ligid sa karo. Pagkatalagsaon nila! Ang mga bersikulo 16 ug 18 nag-ingon: “Ang ilang dagway ug ang ilang pagkagama nahisama sa usa ka ligid nga anaa sa sulod sa usa ka ligid. Ug mahitungod sa ilang mga yantas, kini hatag-as kaayo ug makalilisang; ug kining upat may mga yantas nga puno sa mga mata nga nagalibot.” Ang usa ka ligid sa tupad sa matag kerubin maoy upat ka ligid diha sa upat ka dapit sa duol. Ang mga ligid midan-ag samag krisolito, nga sihag o lapsag nga dalag o berdeng bato. Kini nakadugang sa kahayag ug katahom sa maong mahimayaong panan-awon. Sanglit ang mga yantas sa mga ligid “puno sa mga mata nga nagalibot,” sila dili magapangapkap diha sa bisan asang direksiyon. Ug ang mga ligid hatag-as kaayo, sa ingon makapanaw ug halayong distansiya sa usa lamang ka pagtuyok. Sila, sama sa upat ka kerubin, makalihok sama sa gikusgon sa kilat.
Mga Ligid Sulod sa mga Ligid
6. (a) Sa unsang paagi nga ang karo may mga ligid sulod sa mga ligid? (b) Ngadto sa unsa ang mga ligid nagasunod sa direksiyon sa ilang paglihok?
6 Aduna pay laing butang nga talagsaon. Ang matag ligid adunay usa ka ligid sa sulod niana—usa nga samag diametro nga mihaom pababag diha sa gisal-otang ligid. Niini nga paagi lamang ikasulting ang mga ligid “nagapanaw paingon sa ilang upat ka direksiyon.” (Bersikulo 17) Dihadiha, ang mga ligid makabalhin ug laing direksiyon tungod kay adunay usa ka bahin sa ligid nga nag-atubang sa matag direksiyon. Ang mga ligid mosunod sa ilang direksiyon sa paglihok sa upat ka kerubin. Diha sa upat ka ligid, ang lawas sa karo sa Diyos nakatongtong sa dili makitang kusganong sakyanan nga gisangga sa hangin samtang kini nagadagan ibabaw sa tubig.
7. Diin magkuha ug gahom ang mga ligid?
7 Diin kuhaa sa mga ligid kining gahoma sa pagsunod sa tanang mga lihok sa upat ka kerubin? Gikan sa balaang espiritu sa Diyos nga Labing Gamhanan. Ang bersikulo 20 nag-ingon: “Bisan asa ang espiritu moadto, sila moadto . . . Ang espiritu sa buhing binuhat anaa sa mga ligid.” Ang mao gihapong dili-makitang aktibong puwersa sa Diyos nga anaa sulod sa mga kerubin anaa sa maong mga ligid.
8. Unsay ngalan ang gihatag sa mga ligid, ug ngano?
8 Ang mga ligid gipunting sa terminong “nagatuyok.” (Ezekiel 10:13) Kini dayag nga nagpahigayon sa lihok sa matag ligid. Kini nagabiyo o nagatuyok. Ang paghisgot niining bahina sa langitnong karo sa maong paagi naghatag ug pagtagad sa gikusgon sa pagdagan sa langitnong karo. Bisag kusog kaayong motuyok ang mga ligid, ilang makita gayod ang ilang dalan tungod kay sila puno sa mga mata.
9. Sa unsang paagi gihubit ni Ezekiel kanang anaa sa ibabaw sa kusog modagang upat ug ligid nga karo?
9 Apan karon atong tan-awon ug sud-ongon kon unsay anaa sa ibabaw nianang makalilisang nga gitas-on, kusog-modagang upat ka ligid. Ang bersikulo 22 sa Ezekiel kapitulo 1 nag-ingon: “Ug ibabaw sa ulo sa buhing binuhat didto ang may-ong sa hawan sama sa makalilisang nagagilak-gilak nga tubig nga nanibug-ok, nga binuklad ibabaw sa ilang mga ulo sa itaas.” Ang hawan, bisag tibuok, maoy sihag, “sama sa makalilisang nagagilak-gilak nga tubig nga nanibug-ok.” Kini nagagilak-gilak samag libolibong diamante sa dihang madan-agan sila sa kahayag sa adlaw. Pagkamakalilisang gayod!
Ang Mahimayaong Nagsakay sa Karo
10. (a) Giunsa paghubit ang trono ug ang Usa nga naglingkod sa trono? (b) Unsay gipaila sa kamatuoran nga ang Nagsakay sa karo napalibotan sa himaya?
10 Dayag, ang karo mihunong aron ang Nagsakay niini makasulti kang Ezekiel. Ibabaw sa hawan, dihay kaamgid sa usa ka trono, ingon sa panagway sa usa ka bato nga sapiro, o luto nga asul. Diha sa trono, dihay Usa kansang dagway kaamgid sa usa ka tawo. Ang tawhanong dagway nakatabang ug dako kang Ezekiel sa pagsabot niining kapadayagan sa Diyos. Apan ang maong tawhanong dagway napalibotan sa himaya, mao nga kini nagasidlak samag ambar, usa ka sinawon sinubong sa salapi ug bulawan. Pagkamakapakurog nga katahom! Gikan sa hawak niining dagway nga samag-tawo, kining matahom nga himaya miabot gikan sa itaas ug sa ubos. Ang tibuok dagway sa ingon napalibotan sa himaya. Kini nagpaila nga dili-matukib ang pagkamahimayaon ni Jehova. Dugang pa, ang Nagsakay sa karo giubanan sa usa ka matahom nga balangaw. Unsa ka hilom ug ka malinawon ang ginapadayag sa usa ka matahom nga balangaw human sa usa ka bagyo! Kay nakabaton niana nga ka kalma, gihuptan ni Jehova ang iyang mga hiyas sa kaalam, hustisya, gahom, ug gugma nga hingpit nga pagkatimbang.
11. Sa unsang paagi naapektohan si Ezekiel sa panan-awon sa karo ug sa trono ni Jehova?
11 Ang karo ug trono ni Jehova gilibotan sa kahayag ug matahom nga mga kolor. Pagkalahi niini kang Satanas, ang prinsipe sa kangitngit ug sa okulto! Ug sa unsang paagi naapektohan si Ezekiel niining tanan? “Ug sa diha nga nakita ko kini,” siya miingon, “unya ako miyaob ug nadungog ko ang usa ka tingog sa usa nga nagsulti.”—Ezekiel 1:28.
Ang Gihulagwayan sa Karo
12. Unsay gihulagwayan sa langitnong karo ni Jehova?
12 Unsay gihulagwayan niining katingalahang karo? Ang langitnong organisasyon ni Jehova nga Diyos. Kini gilangkoban sa tanan sa iyang balaang espiritu nga mga linalang diha sa dili-makitang gingharian—mga serapin, kerubin, ug mga manulonda. Sanglit si Jehova mao man ang Labing Hataas nga Diyos, ang iyang tanang espiritu nga mga linalang nagpasakop kaniya, ug siya nagsakay kanila sa paagi sa malulotong pagmando kanila ug nagagamit kanila sumala sa iyang katuyoan.—Salmo 103:20.
13. (a) Nganong ikaingon nga si Jehova nagsakay sa iyang organisasyon? (b) Sa unsang paagi nakaapektar kanimo ang panan-awon sa nagatuyok upat-ug-ligid nga langitnong karo ni Jehova?
13 Si Jehova nagsakay niining organisasyona samag diha sa usa ka karo, nagpalihok niini bisan asa nga direksiyon nga ipaadto kini sa iyang espiritu. Kini wala magdagan nga walay-direksiyon, walay nagdumala o intelihenting pagtultol. Ang Diyos wala magtugot niining organisasyona nga molihok sa bisan asang direksiyon nga buot niini. Hinunoa, kini nagasunod sa iyang mga direksiyon. Sa dungan, ang tanan hiusang nagaduyog sa kalihokan ngadto sa bug-os nga katumanan sa mga katuyoan sa Diyos. Unsa ka kahibulongan langitnong organisasyon ang gibutyag niini nga panan-awon sa upat-ug-ligid nagaabante nga langitnong karo ni Jehova! Nahiuyon niini, ang organisasyon ni Jehova gihawasan ingong upat ka kuwadrado, nga hingpit nga pagkatimbang.
Gitudlo Ingong Usa ka Magbalantay
14. Kinsa ang gihulagwayan sa propeta nga si Ezekiel?
14 Apan kinsa ang gihulagwayan sa propeta nga si Ezekiel? Gikan sa kamatuoran sa kasaysayan, dayag nga ang lawas sa dinihogan sa espiritu nga mga Saksi ni Jehova nalangkit sa langitnong karo ni Jehova. Busa, si Ezekiel maayong pagkahulagway sa dinihogang nahibilin sa mga Saksi ni Jehova sukad sa 1919. Sa espirituwal nga paagi, ang langitnong organisasyon sa Diyos nakiglabot sa dinihogang nahibilin sa maong tuig, nagapasig-uli kanila ingong mga Saksi ni Jehova alang sa tibuok kalibotan. (Itandi ang Pinadayag 11:1-12.) Ang maong samag-karo nga organisasyon sa maong panahon nagaabante na, hangtod karong adlawa. Ngani, ang mga ligid niini sa pag-uswag labi pang mikusog sa pagdagan. Si Jehova tulin nga nagsakay paabante!
15. Unsay gipamulong sa tingog sa Nagsakay sa langitnong karo, ug unsang buluhaton ang nadawat ni Ezekiel?
15 Si Ezekiel buot mahibalo kon nganong ang langitnong karo ni Jehova miduol ug mihunong sa atubangan niya. Iyang nasayran sa dihang ang tingog miabot kaniya gikan sa Usa nga naglingkod sa karo. Nahupngan niining kahibulongang talan-awon, si Ezekiel miluhod. Pamati samtang ang tingog sa Nagsakay sa langitnong karo miingon: “Anak sa tawo, tindog kay ako makigsulti kanimo.” (Ezekiel 2:1) Unya gisugo ni Jehova si Ezekiel nga mahimong usa ka magbalantay aron sa pagpasidaan sa rebelyosong banay sa Israel. Siya gisugo pa gani sa pagsulti diha sa balaang ngalan. Ang ngalan ni Ezekiel nagkahulogang “Ang Diyos Nagpalig-on.” Sa ingon gipalig-on sa Diyos ang Ezekiel nga matang ug gipadala sila, nagtudlo kanila ingong magbalantay sa Kakristiyanohan.
16, 17. (a) Sa unsang paagi nakahatag kaayohan kang Ezekiel ang panan-awon sa langitnong karo? (b) Sa atong adlaw, sa unsang paagi nakaapektar ang pagsabot sa panan-awon sa langitnong karo sa Ezekiel nga matang ug sa dakong panon?
16 Ang panan-awon sa langitnong karo maugdang ug kahibulongan alang kang Ezekiel, apan kadto nag-andam usab kaniya alang sa iyang buluhaton ingong usa ka magbalantay aron ipalanog ang pasidaan sa umaabot nga kalaglagan sa Jerusalem. Matuod usab kana sa magbalantay nga matang karong adlawa. Ang ilang pagsabot sa panan-awon sa langitnong karo ni Jehova nga nagaabante naghatag dako nga epekto sa dinihogang nahibilin. Sa 1931 sila nakabaton ug dugang pang kahibalo mahitungod sa panan-awon ni Ezekiel, ingon sa gibutyag sa Vindication, Book One. Sila sa maong panahon napuno sa maugdang nga pagsabot gikan sa isyu sa Oktubre 15, 1931, hangtod sa Agosto 1, 1950, ang desinyo sa unang panid sa The Watchtower diha sa itaas tuong bahin niini makita ang ideya sa nagdibuho may labot sa langitnong karo sa panan-awon ni Ezekiel. Busa, ang Ezekiel nga matang milihok sa buluhaton nga gihatag kanila, ug sila nag-alagad ingong magbalantay, nagpalanog sa balaang pasidaan. Ang panahon alang sa kalayonhong kalaglagan sa Kakristiyanohan nga gikan kang Jehova nga nagsakay sa iyang langitnong karo haduol na kaayo!
17 Karong adlawa, “usa ka dakong panon” sa samag-karnero nga katawhan nakig-uban sa dinihogang nahibilin. (Pinadayag 7:9) Sa dungan, ilang gipalanog ang pasidaan sa umaabot nga kalaglagan sa Kakristiyanohan ug niining tibuok yawan-ong sistema sa mga butang. Kanang buluhatona sa pagpasidaan ginapadali, ug sumala sa gipakita sa Pinadayag 14:6, 7, ang mga manulonda nagpaluyo niini.
Pag-abante Duyog sa Langitnong Karo
18. Unsay kinahanglang buhaton aron mabatonan ang padayong pagpaluyo sa mga manulonda, ug ngadto sa unsa nga kita angay nga mosanong?
18 Ang mapasakopong mga manulonda duyog nga nagalihok ingong bahin sa langitnong organisasyon samtang nagapaluyo sa yutan-ong mga alagad ni Jehova sa pagtuman sa ilang buluhaton sa pagmantala sa mga pasidaan sa balaang paghukom. Kon gitinguha nato ang padayong panalipod ug paggiya niining kusganon manulondaong mga alagad sa Diyos, kita usab kinahanglan moduyog sa paglihok ug moabay sa simbolikong pagtuyok. Dugang pa, ingong bahin sa makitang organisasyon ni Jehova nga nagaabay uban sa iyang langitnong karo, kita kinahanglang magmasanongon sa mga pagtultol sa espiritu sa Diyos. (Itandi ang Filipos 2:13.) Kon kita mga Saksi ni Jehova, kita molihok sa samang direksiyon sa langitnong karo. Kita dili gayod molihok nga sukwahi sa katuyoan niini. Kon hatagag direksiyon sa dalan nga atong pagalaktan, atong sundon kini. Sa ingon, ang kongregasyon dili magkabahin-bahin.—1 Corinto 1:10.
19. (a) Sama nga ang mga ligid sa langitnong karo adunay mga mata nga naglibot kanila, ngadto sa unsa kinahanglang magmaalisto ang katawhan ni Jehova? (b) Unsay angay natong himoon niining magubot nga mga panahon?
19 Ang mga mata nga naglibot sa mga ligid sa karo sa Diyos nagpaila sa pagkaalisto. Sama nga ang langitnong organisasyon alisto, sa ingon kita magmaalisto sa pagpaluyo sa yutan-ong organisasyon ni Jehova. Diha sa kongregasyon, atong ikapakita kanang maong pagpaluyo pinaagi sa pagkooperar sa lokal nga mga ansiano. (Hebreohanon 13:17) Ug niining magubot nga panahon, ang mga Kristohanon kinahanglang magpabiling suod sa organisasyon ni Jehova. Dili kita mohatag ug atong kaugalingong interprestasyon sa mga hitabo, kay sa ingon kita wala moduyog sa paglihok sa langitnong karo ni Jehova. Kanunay natong pangutan-on ang atong kaugalingon, ‘Diin bang direksiyona nagapadulong ang langitnong karo?’ Kon moduyog kita sa kalihokan sa makitang organisasyon ni Jehova, kita usab nagaduyog sa kalihokan sa dili-makitang organisasyon.
20. Unsang maayong tambag ang gihatag ni apostol Pablo sa Filipos 3:13-16?
20 Niining bahina, si Pablo misulat: “Mga igsoon, wala ako maghunahuna nga nakab-ot ko na ang akong gitinguha; hinoon gihimo ko ang usa ka butang: Akong gikalimtan ang nangagi ug nagadasdas ako alang sa kon unsay anaa sa unahan, ako nagapadayon paingon sa dag-anan ngadto sa ganti nga mao ang langitnong pagtawag kanato sa Diyos pinaagi kang Kristo Jesus. Nan, pasagdi nga kitang tanan nga mga hamtong na sa pagtuo, magabaton sa samang hunahuna; ug kon ugaling kamo lahi man ug hunahuna, kini igapadayag ra kaninyo sa Diyos. Apan, kon unsa may atong nahimong pag-uswag, magpadayon kita sa paglakaw subay sa samang rotina.”—Filipos 3:13-16.
21. Pinaagi sa pagsunod sa unsang rotina nga posible ang pag-uswag sa espirituwal uban sa organisasyon sa Diyos?
21 Dinhi ang pulong “rotina” wala magpasabot sa naandan daotang paagi nga diin kita dili makabulag. Ang mga alagad sa Diyos adunay usa ka maayong rotina nga pinaagi niini sila naghimog espirituwal nga kauswagan. Kini mao ang rotina sa paghimog personal nga pagtuon sa Bibliya, pagtambong sa mga tigom sa kongregasyon, regular nga pagsangyaw sa maayong balita sa Gingharian, ug sa pagpabanaag sa mga hiyas sa langitnong organisasyon sa Diyos. Ang maong rotina nagpaarang kanila sa pagsunod sa mga pagtultol sa langitnon samag-karo nga organisasyon ni Jehova. Pinaagi sa paglahutay niining bahina, atong makab-ot ang atong tumong, kon may kalabotan man kini sa ganti nga walay kamatayong kinabuhi sa langit o walay kataposang kinabuhi diha sa usa ka paraisong yuta.
22. (a) Aron maorganisar nga hiusa ang dinihogang nahibilin ug ang dakong panon sa ubang mga karnero, unsay kinahanglang buhaton? (b) Unsay dili makaikyas sa pagmatikod ni Jehova?
22 Sumala sa gipadayag sa Juan 10:16, ang “ubang mga karnero” ug ang Ezekiel nga matang hiusa nga maorganisar. Busa, hinungdanon nga ang tanan nga anaa sa organisasyon ni Jehova makasabot sa bug-os nga kahulogan ug bili sa panan-awon nga gitala sa Ezekiel kapitulo 1 kon sila buot molihok duyog sa langitnong karo ni Jehova. Ang panan-awon niini motabang kanato sa pag-apresyar nga kita kinahanglan moduyog sa paglihok uban sa makita ug dili-makitang organisasyon ni Jehova. Hinumdomi, usab, nga ang mga mata ni Jehova “nagatan-aw sa tibuok yuta aron sa pagpakita sa iyang kaugalingon nga makusganon alang kanila nga may kasingkasing nga hingpit nganha kaniya.” (2 Cronicas 16:9) Walay bisan usa ka butang ang makaikyas sa pagmatikod ni Jehova, ilabina sa mga butang may kalabotan sa iyang katuyoan sa pagbayaw sa iyang kaugalingon ingong Soberano sa Uniberso.
23. Uban sa nagaabante nga langitnong karo ni Jehova, unsay kinahanglan natong buhaton?
23 Ang langitnong karo ni Jehova tinong nagaabante karong adlawa. Sa dili madugay ang tanan modangat sa kahimayaan kaharmoniya uban sa Usa nga mahimayaong nagsakay sa karo—ang tanan maoy sa kabayawan kaniya ingong Soberanong Ginoo sa uniberso. Ang iyang mga serapin, kerubin, ug mga manulonda nagpaluyo kanato diha sa atong dako tibuok-yuta nga buluhatong pagsangyaw. Nan, kita kinahanglang mag-uswag, uban sa langitnong organisasyon ni Jehova. Apan sa unsang paagi kita padayong makaabay sa tulin nga nagadagang langitnong karo?
Unsaon Nimo sa Pagtubag?
◻ Unsang mga hiyas ang gihawasan sa upat ka buhing binuhat nga nakita ni Ezekiel?
◻ Unsay gihulagwayan sa langitnong karo ni Jehova?
◻ Kinsay gihulagwayan sa propeta sa Diyos nga si Ezekiel?
◻ Sa unsang paagi nakaapektar ang pagsabot sa panan-awon sa langitnong karo ni Jehova sa Ezekiel nga matang ug sa dakong panon?