Haing Diyos ang Imong Ginasimba?

SA TIBUOK nga kalibotan, ang mga tawo motubag nianang pangutanaha sa daghang lainlaing paagi. Si apostol Pablo miingon: “Adunay daghang ‘mga diyos’ ug daghang ‘mga ginoo,’” ug karong adlawa ang mga diyos nga gisimba makaabot sa milyonmilyon. (1 Corinto 8:5) Ugaling, nasayod ba mo nga daghang tawo nagasimba sa usa ka lahing diyos gikan sa usa nga gihunahuna nila nga ilang ginasimba? Ug nakaamgo ka ba nga daghang ateyista labaw pang debotado kay niadtong nagtuo sa usa ka diyos? Sa unsang paagi?

Aw, usa ka kahulogan sa pagsimba mao “ang pagtagad uban ang dako, bisan sa hinobrang pagtahod, pasidungog, o debosyon.” Sa orihinal nga mga pinulongan sa Bibliya, ang mga pulong alang sa pagsimba nagadala sa ideya sa pag-alagad o pagyukbo atubangan sa lain. Uban niini sa hunahuna, atong tan-awon sa unsang paagi masayop ang mga tawo bahin sa kon kinsa o unsa ang tinuod nilang ginasimba.

Gisagol nga Pagsimba

Tagda ang panig-ingnan sa karaang mga Samaritanhon. Daghan kanila sa sinugdan mga dumuloong nga gipasulod sa mga taga-Asirya ngadto sa Palestina aron sa pagpuli sa nadistiyerong napulo ka amihanang tribo sa Israel. Sa nangagi, sila nagsunod sa paganong mga diyos, apan sa maong panahon naningkamot sila nga makakat-on bahin kang Jehova, ang Diyos sa Israel. Unya gibiyaan ba nila ang ilang daang relihiyon? Wala. Ang Bibliya nagtaho: “Maoy sumala sa ilang kanhing relihiyon nga sila nagbuhat. Ug ang maong mga nasod nahimong mga mahadlokon kang Jehova, apan ang ilang kaugalingong kinulit nga mga larawan mao ang ilang gialagaran.” (2 Hari 17:40, 41) Busa ang mga Samaritanhon, bisan tuod sa ngalan nag-ila kang Jehova, nag-alagad gihapon sa ilang karaang mga diyos, sa ingon nagtuman sa usa ka matang sa gisagol nga relihiyon.

Ang butang susama nahitabo sa dihang gipailaila sa mga misyonaryo ang Romano Katolisismo sa Amerika del Sur. Ilang nakombertir ang kadaghanan sa katawhan, apan sama sa karaang mga Samaritanhon, ang katawhan wala makalimot sa ilang kanhing mga diyos. Busa, sa Brazil ang paganong mga rituwal sa voodoo gituman gihapon sa “mga Kristohanon,” maingon man ang mga saulog nga nagapasidungog sa karaang mga diyos, sama sa diyosang si Iemanjá. Ang susamang mga butang nahitabo sa ubang kayutaan sa Amerika del Sur.

Dugang pa, ang relihiyon nga gipailaila sa maong mga misyonaryo ngadto sa Amerika del Sur sa kaugalingon maoy usa ka gisagol nga relihiyon. Daghan sa mga doktrina niini, sama sa Trinidad, impiyernong-kalayo, ug ang imortalidad sa kalag, naggikan sa karaang paganong mga relihiyon ug mga pilosopiya. Sila tinong dili makita sa Bibliya. Sa susama, ang iyang mga pangilin—apil ang Pasko ug Easter—maoy dili-Kristohanon ug sinugdanan.a Posible ba ang pagsaulog nianang paganong mga pangilin ug pagtuo sa maong dili-Kristohanong mga doktrina ug sa gihapon magasimba sa Diyos sa Bibliya, kinsa miingon: “Dili kamo magbaton ug laing mga diyos sa atubangan ko”? (Exodo 20:3) Tinong dili!

“Magbantay Kamo sa mga Diyosdiyos”

Tagda ang laing paagi nga ang mga tawo malimbongan kon bahin sa pagsimba. Si apostol Juan misulat: “Gagmay nga mga anak, magbantay kamo sa mga diyosdiyos.” (1 Juan 5:21) Duolan sa usa ka libo ka milyong tawo ang nalista ingon nga sakop sa Kakristiyanohan, ug kini nag-angkon nga nagasimba sa Diyos mismo nga gisimba ni Juan. Bisan pa niana, ginatos ka milyon kanila nagayukbo sa mga imahen sa “mga santos,” ni Jesus, ug ni birhin Maria.

Adunay ubang malalangong mga dagway sa pagsimbag diyosdiyos. Sa tuig 44 K.P., si Haring Herodes Agripa midiskurso sa publiko, ug ang mga tawo naukyaban nga sila naninggit: “Tingog sa usa ka diyos, ug dili sa tawo!” (Buhat 12:21, 22) 0o, gisimba nila si Herodes, nga naghimo kaniya nga usa ka diyos. Ang susamang mga butang nahitabo karong adlawa. Sa mauswagong mga adlaw sa dihang ang Nazismo nagkagamhanan sa Uropa, ang singgit nga “Heil Hitler!” maoy singgit gayod sa pagdayeg. Daghan ang andam makig-away ug mamatay alang sa Führer nga daw siya usa ka diyos, ang manluluwas sa nasod. Bisan pa niana, kadaghanan niadtong naghatag sa maong pagsimba maoy mga membro sa mga simbahan sa Kakristiyanohan!

Sa wala pa ug tapos kang Hitler, ang ubang politikanhong lider susamang nagpasiugda sa ilang kaugalingon ingong mga manluluwas ug nangayog linaing debosyon. Kadtong mipahiuyon naghimo sa maong mga tawo nga mga diyos, walay sapayan kon unsang pormal nga relihiyon ang gipasakopan sa “mga magsisimba” o bisan pag sila nag-angkong mga ateyista. Ang pagsimba nga nadawat sa karismatik nga mga bituon sa dula, mga bituon sa pelikula, ug ubang maglilingaw gikan sa ilang mga dumadayeg kaamgid usab sa pagsimba.

Pagsimba sa Salapi

Dugang pa, hunahunaa ang mga ipasabot sa mga pulong ni Jesus sa miingon siya: “Walay makapaulipon alang sa duha ka agalon; kay mahimong pagadumtan niya ang usa ug higugmaon ang lain, o mounong siya sa usa ug magatamay sa lain. Dili kamo makapaulipon sa Diyos ug sa Bahandi.” (Mateo 6:24) May nailhan ka ba nga sakop sa usa ka relihiyon apan kansang pangunang interes sa kinabuhi mao ang pagpanapi? Nan, kinsa ang tinuod ginaalagaran sa maong tawo, ang Diyos o ang bahandi? Pila ka magtutuo ang imong nailhan nga nasakpan sa malisangon nga pangagpas sa salapi? Tino, sila usab mga magsisimba sa salapi, tingali mas madasigon pa kay sa daghang magtutuo.

Gipatin-aw ni apostol Pablo ang susamang prinsipyo sa misulat siya: “Busa, patya ninyo ang mga sangkap sa inyong lawas nga anaa sa yuta kon bahin sa pakighilawas, kahugawan, gana sa sekso, makadaot nga tinguha, ug pagkaibog, nga maoy pagsimba sa diyosdiyos.” (Colosas 3:5) Kon maibog kaayo kita sa usa ka butang nga atong himoon ang tanan natong paningkamot sa pagbaton niana, tingali lapason pa ang balaod sa lakaw niana, nan alang kanato ang maong butang maoy usa ka idolo, usa ka diyos. (Efeso 5:5) Sa laing sulat, si Pablo misulat bahin sa pila ka mamumuhat sa daotan: “Ang ilang diyos mao ang ilang tiyan.” (Filipos 3:19) Kon ang tibuok natong katuyoan sa kinabuhi mao ang pagpahimuot sa atong kaugalingon, nga busgon ang atong tiyan ingnon ta, nan kita maoy kaugalingong diyos. Pila ba ang imong nailhan nga nagasimba niining matanga sa diyos?

Oo, sumala sa gisulat ni apostol Pablo: “Adunay daghang ‘mga diyos’ ug daghang ‘mga ginoo.’” Ug sa daghang kaso, ang ilang mga magsisimba maoy sama sa karaang mga Samaritanhon, nga nagaalagad sa usa ka diyos pinaagi sa ilang mga pulong ug ang lain pinaagi sa ilang mga binuhatan. Sa pagkamatuod, hinunoa, adunay usa lamang ka Diyos nga takos sa atong pagsimba. Nakaila ka ba kon kinsa siya? Dugang pa, adunay usa ka butang nga magahiusa sa pagsimba sa tanan ubang diyos nga gawas kaniya. Unsa ba kana? Tan-awon nato sa mosunod nga artikulo.

[Footnote]