LEKSIYON 09
Pakigsuod sa Diyos Pinaagi sa Pag-ampo
Mibati ba ka sukad nga nagkinahanglan ka ug giya sa kinabuhi? Naa ba kay importanteng mga pangutana nga gusto nimong matubag? Nagkinahanglan ba ka ug paghupay o pasalig? Gusto ba kang mas masuod kang Jehova? Ang pag-ampo makatabang nimo niining tanan. Pero unsa man ang hustong paagi sa pag-ampo? Paminawon ba sa Diyos ang tanang pag-ampo? Unsay imong himoon aron maseguro nga dunggon niya ang imong mga pag-ampo? Atong sayron.
1. Kang kinsa ta angayng moampo, ug unsay puwede natong iampo?
Si Jesus nagtudlo nga sa atong langitnong Amahan lang ta angayng moampo. Si Jesus mismo miampo kang Jehova. Siya miingon: “Busa, mag-ampo kamo niining paagiha: ‘Amahan namo nga anaa sa mga langit . . . ’” (Mateo 6:9) Dihang moampo ta kang Jehova, mas masuod ta kaniya ingong higala.
Halos tanang butang puwede natong iampo. Siyempre, aron tubagon sa Diyos ang atong mga pag-ampo, kinahanglang uyon ni sa iyang kabubut-on. “Bisan unsay atong pangayoon uyon sa . . . kabubut-on [sa Diyos], maminaw siya nato.” (1 Juan 5:14) Si Jesus naghatag ug mga pananglitan kon unsay puwede natong iampo. (Basaha ang Mateo 6:9-13.) Gawas sa pag-ampo bahin sa personal nga mga butang, dili nato angayng kalimtan ang pagpasalamat sa Diyos sa iyang gihimo para nato ug ang paghangyo kaniya nga tabangan ang uban.
2. Unsaon nato pag-ampo?
Gidasig ta sa Bibliya nga “ibubo ang [atong] kasingkasing [sa Diyos].” (Salmo 62:8) Busa ang atong pag-ampo kinahanglang sinsero ug kinasingkasing. Puwede tang moampo ug kusog o hilom sa bisan unsang posisyon nga nagpakitag pagtahod kang Jehova. Makaampo ta bisan kanus-a ug bisan asa.
3. Sa unsang paagi tubagon sa Diyos ang atong mga pag-ampo?
Tubagon na niya sa lainlaing paagi. Gihatag ni Jehova ang iyang Pulong, ang Bibliya, diin sagad makita nato ang tubag sa atong mga pangutana. Ang pagbasa sa Pulong sa Diyos “[makahimo nga] maalamon sa walay kasinatian.” (Salmo 19:7; basaha ang Santiago 1:5.) Hatagan ta niyag kalinaw sa hunahuna dihang naa tay mga problema. Ug palihokon niya ang iyang mga alagad sa pagtabang nato dihang manginahanglan tag tabang.
TUN-IG DUGANG
Sayra kon unsaon nimo pag-ampo sa paagi nga makapalipay sa Diyos ug kon sa unsang paagi ang pag-ampo makahatag nimog kaayohan.
4. Kon unsay gusto sa Diyos bahin sa pag-ampo
Unsay basehan sa Diyos aron iyang dawaton ang atong mga pag-ampo? I-play ang VIDEO.
Gusto ni Jehova nga moampo ta kaniya. Basaha ang Salmo 65:2, ug dayon hisgoti kini nga mga pangutana:
Sa imong hunahuna, ang “Tigpatalinghog [ba] sa pag-ampo” gusto nga moampo ka kaniya? Nganong kanay imong tubag?
Kinahanglang maningkamot ta nga magkinabuhi subay sa mga sukdanan sa Diyos kon gusto nato nga dunggon niya ang atong mga pag-ampo. Basaha ang Miqueas 3:4 ug 1 Pedro 3:12, ug dayon hisgoti kini nga pangutana:
Unsaon nato pagseguro nga paminawon ni Jehova ang atong mga pag-ampo?
Panahon sa giyera, ang magkaaway parehong mag-ampo aron modaog. Makadahom ba ta nga tubagon sa Diyos ang ilang mga pag-ampo?
5. Ang atong iampo kinahanglang gikan sa kasingkasing
Ang uban gitudloan nga balikbalikon ang samang mga pulong diha sa ilang pag-ampo. Pero ingon ana ba ang gusto sa Diyos nga paagi sa pag-ampo? Basaha ang Mateo 6:7, ug dayon hisgoti kini nga pangutana:
Unsay imong himoon aron dili nimo ‘balikbalikon ang samang mga pulong’ diha sa imong pag-ampo?
Kada adlaw, puwede kang maghunahuna ug usa ka espesipikong panalangin sa imong kinabuhi ug dayon pasalamati si Jehova niana. Kon himoon nimo ni kada adlaw sulod sa usa ka semana, makaampo na kag pito ka lainlaing butang.
Gusto sa usa ka maayong amahan nga isulti sa iyang anak kaniya kon unsa gyoy naa sa iyang kasingkasing. Sa susama, gusto ni Jehova nga iampo nato kaniya kon unsa gyoy naa sa atong kasingkasing
6. Ang pag-ampo regalo gikan sa Diyos
Sa unsang paagi ang pag-ampo makatabang nato, ilabina sa lisod nga mga panahon sa atong kinabuhi? I-play ang VIDEO.
Ang Bibliya nagsaad nga ang pag-ampo makatabang nato nga makabaton ug tinuod nga kalinaw sa hunahuna. Basaha ang Filipos 4:6, 7, ug dayon hisgoti kini nga mga pangutana:
Usahay naa gihapon ang problema bisag mag-ampo ta. Pero sa unsang paagi makatabang ang pag-ampo?
Unsa ang mga butang nga gusto nimong iampo?
Nahibalo ba ka?
Ang pulong nga “amen” nagkahulogang “matuman kana” o “segurado.” Sukad pa sa panahon sa Bibliya, ang “amen” ginasulti sa kataposan sa mga pag-ampo.—1 Cronicas 16:36.
7. Paggahin ug panahon sa pag-ampo
Usahay tungod sa ka-busy, malimot ta sa pag-ampo. Unsa ka importante kang Jesus ang pag-ampo? Basaha ang Mateo 14:23 ug Marcos 1:35, ug dayon hisgoti kini nga mga pangutana:
Unsay gihimo ni Jesus aron makagahin siyag panahon sa pag-ampo?
Kanus-a ka makagahin ug panahon sa pag-ampo?
ANG UBAN MOINGON: “Usik-usik lang sa panahon ang pag-ampo kay wala may maminaw ana. Pangpagaan lang na sa gibati.”
Unsay imong isulti?
SUMARYO
Ang sinserong mga pag-ampo makapasuod nato sa Diyos, makahatag natog kalinaw sa hunahuna, ug makahatag nato sa kusog nga atong gikinahanglan aron mapalipay si Jehova.
Review
Kang kinsa ta angayng moampo?
Sa unsang paagi ta angayng moampo?
Unsa ang mga kaayohan sa pag-ampo?
SUSIHA
Sayra ang tubag sa komon nga mga pangutana sa mga tawo bahin sa pag-ampo.
Sayra kon nganong angay kang moampo ug kon unsaon pagpauswag ang imong mga pag-ampo.
Sayra ang gitudlo sa Bibliya bahin sa kon kang kinsa ta angayng moampo.
Niini nga music video, matikdi kon importante ba kon asa o kanus-a ta moampo.