Unsa ang Yawi sa Tinuod nga Kristiyanidad?
KARONG adlawa, daghang tawo ang nag-angkon nga sakop sa Kristiyanidad kay sa bisan unsang laing relihiyosong grupo. Apan ang mga pagtuo niining nagpatindog-sa-kaugalingong mga Kristohanon nagkasumpaki, sila walay panaghiusa, ug usahay sila magpatyanay pa sa usag usa. Tin-aw, daghan maoy dili tinuod nga mga Kristohanon. Si Jesus miingon nga sa atong adlaw, daghan ang moingon kaniya, “Ginoo, Ginoo,” sa laing mga pulong, nag-angkong mga Kristohanon, apan siya moingon kanila: “Wala ako makaila kaninyo! Pahilayo kamo kanako, kamong mga mamumuhat sa kalapasan.” (Mateo 7:21, 23) Sa pagkamatuod, walay mausa kanato ang buot maapil niining grupoha! Busa sa unsang paagi atong maila kon kita tinuod nga mga Kristohanon?
Ang kamatuoran mao, daghang butang ang gikinahanglan aron mahimong usa ka tinuod nga Kristohanon. Ang tinuod nga Kristohanon kinahanglag magbatog lig-ong pagtuo kay “kon wala ang pagtuo dili mahimo ang pagpahimuot pag-ayo [sa Diyos].” (Hebrews 11:6) Ang maong lig-ong pagtuo kinahanglang duyogan sa matarong nga mga buhat. Ang disipulo nga si Santiago nagpasidaan nga “ang pagtuo nga walay mga buhat maoy patay.” (Santiago 2:26) Dugang pa, kinahanglang maila sa usa ka Kristohanon ang awtoridad sa “matinumanon ug maalamong ulipon.” (Mateo 24:45-47) Apan ang yawi sa tinuod nga Kristiyanidad maoy butang nga gawas niining mga butanga.
Unsa ang yawi? Si apostol Pablo nagpatin-aw diha sa iyang unang sulat ngadto sa mga taga-Corinto: “Kon ako magasulti sa mga pinulongan sa mga tawo ug sa mga manulonda apan walay gugma, ako mahisama sa masaba nga agong o piyangpiyang nga nagatagingting. Ug kon ako may gasa sa pagpanagna ug nahibalo sa tanan nga balaang tinago ug sa tanan nga kahibalo, ug kon akong nabatonan ang bug-os nga pagtuo aron sa pagbalhin ug mga bukid, apan ako walay gugma, ako walay kapuslanan. Ug kon akong igahatag ang tanan kong katigayonan aron ipakaon sa uban, ug kon itugyan ko ang akong lawas, aron ako makapasigarbo, apan walay gugma, ako dili gayod makapulos.”—1 Corinto 13:1-3.
Busa ang gugma mao ang yawi sa tinuod nga Kristiyanidad. Ang pagtuo, mga buhat, ug matarong nga panag-uban maoy hinungdanon, bililhon kaayo. Apan kon walay gugma, ang ilang bili dili mabatonan. Ngano man kana?
Sa panguna, tungod sa matang sa Diyos nga atong ginasimba. Gibatbat ni apostol Juan si Jehova, ang Diyos sa matuod nga Kristiyanidad, niining mga pulonga: “Ang Diyos gugma.” (1 Juan 4:8) Si Jehova adunay daghang laing hiyas, sama sa gahom, hustisya, ug kaalam, apan sanglit siya labaw sa tanan Diyos sa gugma, unsang matang sa mga tawo buot niyang mamao ang iyang mga magsisimba? Tino gayod, mga indibiduwal nga nagasundog kaniya ug nagaugmad sa gugma.—Mateo 5:44, 45; 22:37-39.
Usa ka Matarong nga Motibo
Oo, tungod sa gugma ang mga Kristohanon buot mahisama sa Diyos nga ilang ginasimba. Nagkahulogan kini nga ang ilang mga motibo maoy susama sa mga motibo sa Diyos. Unsang motibo labaw sa tanan ang nagdasig kang Jehova nga Diyos sa pagpadala kang Jesus sa yuta aron hatagan kitag higayon nga makabaton ug kinabuhing dayon? Gugma. “Gihigugma pag-ayo sa Diyos ang kalibotan nga iyang gihatag ang iyang bugtong nga Anak, aron ang matag usa nga motuo kaniya dili unta malaglag kondili makabaton ug kinabuhing walay kataposan.” (Juan 3:16) Nan, angay unsa ang atong motibo sa pagbuhat sa kabubut-on sa Diyos. Sa makausa pa, gugma. “Kini ang kahulogan sa paghigugma sa Diyos, nga atong bantayan ang iyang mga sugo.”—1 Juan 5:3.
Posible ba ang pag-alagad sa Diyos nga may sayop nga motibo? Oo. Gihisgotan ni Pablo ang pipila sa iyang adlaw nga nag-alagad tungod sa kasina ug panag-indig. (Filipos 1:15-17) Kana mahimong mahitabo kanato. Kining kalibotana maindigon kaayo, ug ang maong espiritu mahimong mag-apektar kanato. Basin kita magarbohon sa paghunahuna nga kita mas maayong mamumulong o makapahimutang ug daghang basahon kay sa uban. Basin itandi nato ang atong mga pribilehiyo sa pag-alagad niadtong gipahimuslan sa lain ug mahimong magpakaimportante-sa-kaugalingon—o masinahon. Ang usa ka ansiano basin abughoan sa iyang katungdanang may awtoridad, bisan sa punto nga babagan ang usa ka batan-ong lalaki nga may katakos sa paghimog pag-uswag. Ang tinguha sa personal nga kaayohan basin magdasig nato sa pag-ugmad sa pakighigala uban sa mas datong mga Kristohanon samtang dili magtagad sa mga kabos.
Kining mga butanga mahimong mahitabo kay kita dili hingpit. Bisan pa niana, kon—sama kang Jehova—himoon nato nga ang gugma ang atong pangunang motibasyon, atong pukgoon ang maong mga kiling. Ang kahakog, ang tinguha sa pagdayeg sa atong kaugalingon, o mapangahasong garbo makapahiklin sa gugma, mao nga kita “dili gayod makapulos.”—Proverbio 11:2; 1 Corinto 13:3.
Gugma Diha sa Mahakogong Kalibotan
Si Jesus miingon nga ang iyang mga sumusunod “dili bahin sa kalibotan.” (Juan 17:14) Sa unsang paagi makalikay kita nga dag-on sa impluwensiya sa kalibotan alirong nato? Ang gugma makatabang. Pananglitan, karong adlawa ang mga tawo maoy “mga mahigugmaon sa mga kalingawan inay sa Diyos.” (2 Timoteo 3:4) Si Juan nagpasidaan kanato nga dili mahisama niana. Siya miingon: “Ayaw ninyo higugmaa ang kalibotan o ang mga butang sa kalibotan. Kon may mahigugma sa kalibotan, ang gugma sa Amahan wala diha kaniya; tungod kay ang tanan sa kalibotan—ang tinguha sa unod ug ang tinguha sa mga mata ug ang mapagawalong pasundayag sa pangabuhi sa usa—dili gikan sa Amahan, kondili gikan sa kalibotan.”—1 Juan 2:15, 16.
Bisan pa niana, dili sayon ang pagsalikway sa bug-os sa “tinguha sa unod” ug “tinguha sa mga mata.” Kining mga butanga gihigugma kay kini tinong madanihon kaayo sa atong unod. Dugang pa, adunay mas daghan ug nagkadaiyang mga kalingawan nga mapahimuslan karong adlawa kay sa adlaw ni Juan, busa kon ang tinguha sa mga mata maoy usa ka suliran niadto, kini labaw na karon.
Makaiikag, daghan sa mga kalingawan karon nga ginatanyag sa kalibotan dili daotan sa kaugalingon. Walay daotan sa pagbatog dakong balay, nindot nga kotse, telebisyon, o stereo. Ni magalapas sa usa ka balaod sa Bibliya ang paghimog tagdugay, makaiikag nga mga biyahe ug magbatog kulbahinam nga mga bakasyon. Nan, unsa ang tuyo sa pasidaan ni Juan? Sa usa ka butang, kon kanang mga butanga mahimong hinungdanon kaayo kanato, kana mag-ugmad sa atong kahiladman sa espiritu sa kahakog, materyalismo, ug garbo. Ug ang paningkamot sa pagpangita sa salapi aron mabatonan kana makababag kanato sa atong pag-alagad kang Jehova. Bisan ang pagpahimulos nianang mga butanga kinahanglag panahon, ug samtang ang rasonableng paglingawlingaw makaparepresko, ang atong panahon maoy limitado, tungod sa atong obligasyon sa pagtuon sa Bibliya, pagpakigtigom uban sa isigka-Kristohanon alang sa pagsimba, ug pagsangyaw sa maayong balita sa Gingharian.—Salmo 1:1-3; Mateo 24:14; 28:19, 20; Hebreohanon 10:24, 25.
Niining materyalistikong panahon, kinahanglag determinasyon sa ‘pagbutang nga una sa Gingharian sa Diyos’ ug pagsukol sa ‘pagpahimulos sa bug-os niining kalibotana.’ (Mateo 6:33; 1 Corinto 7:31) Ang lig-ong pagtuo makatabang. Apan ilabina, ang tinuod nga gugma alang kang Jehova ug alang sa atong mga silingan maglig-on kanato sa pagsukol sa mga panghaylo nga, bisan tuod dili daotan sa kaugalingon,basin magpugong nato sa ‘pagtuman sa bug-os sa atong ministeryo.’ (2 Timoteo 4:5) Kon wala ang maong gugma, ang atong ministeryo dali nga mous-os ngadto sa basta lamang nga paningkamot.
Gugma Diha sa Kongregasyon
Gipasiugda ni Jesus ang kahinungdanon sa gugma sa miingon siya: “Pinaagi niini ang tanan makaila nga kamo akong mga tinun-an, kon kamo may gugma sa inyong taliwala.” (Juan 13:35) Nganong ang mga ansiano mogugol ug daghan kaayong panahon sa pag-atiman ug pagtabang sa isigka-Kristohanon kon sila walay gugma kanila? Nganong ang kongregasyon moantos sa mga kahuyangan sa ilang mga kauban—apil ang mga ansiano—kon dili pa tungod sa gugma? Ang gugma magtukmod sa mga Kristohanon sa pagtabang sa usag usa sa pisikal nga paagi sa dihang sila makadungog nga ang uban anaa sa kawalad-on. (Buhat 2:44, 45) Sa mga panahon sa paglutos, ang mga Kristohanon nagapanalipod sa usag usa ug nagapakamatay pa alang sa usag usa. Ngano man? Tungod sa gugma.—Juan 15:13.
Usahay ang labing dagkong mga pamatuod sa gugma maoy sa ginagmayng mga butang. Ang usa ka ansiano, nga napit-osan na tungod sa daghan kaayong trabaho, tingali duolon sa isigka-Kristohanon nga may reklamo na sab nga morag dili kaayo importante sa tan-aw sa ansiano. Angay ba nga masuko ang ansiano? Inay itugot nga kini mahimong hinungdan sa pagkabahin, siya magmapailobon ug magmaluluton sa iyang igsoon. Ilang hisgotan sa tingob ang butang, ug usab napalig-on ang ilang panaghigalaay. (Mateo 5:23, 24; 18:15-17) Inay nga ang matag usa magmapugsanon sa iyang mga katungod, ang tanan angayng maningkamot sa pag-ugmad sa pagkadako sa kasingkasing nga gisugyot ni Jehova, nga andam magpasaylo sa ilang mga igsoon “kapitoag-pito ka panahon.” (Mateo 18:21, 22) Busa, ang mga Kristohanon maningkamot pag-ayo sa pagsul-ob sa gugma, “kay kini hingpit nga bugkos sa panaghiusa.”—Colosas 3:14.
Pagpadako sa Atong Gugma sa Usag Usa
Oo, ang gugma mao ang matarong nga motibo sa pag-alagad kang Jehova. Ang gugma molig-on kanato aron magpabiling bulag sa kalibotan, ug ang gugma magtino nga ang kongregasyon magpabiling tinuod nga Kristohanon. Bisan tuod dili magpakubos sa pagkamahanason, kini magtabang niadtong anaa sa awtoridad nga dili mahimong labihan ka mahunahunaon sa pagkamahanason nga sila mahikalimot sa kalulot ug kalumo sa pagpakiglabot sa uban. Ang gugma magtabang kanatong tanan nga “magmasinugtanon niadtong nagapanguna . . . ug magmapasakopon.”—Hebreohanon 13:17.
Si apostol Pedro miawhag kanato nga magbatog “mainitong gugma” sa usag usa tungod kay “ang gugma magatabon sa kapid-an ka sala.” (1 Pedro 4:8) Sa unsang paagi atong mahimo kini? Ang tawo gilalang sa dagway sa Diyos ug sa ingon may kinaiyanhong katakos sa paghigugma. Apan ang matang sa gugma nga atong gihisgotan dinhi nagkinahanglag butang ekstra. Ngani, kini mao ang pangunang bunga sa espiritu sa Diyos. (Galacia 5:22) Busa, sa pag-ugmad sa gugma, kinahanglang mabantang kita sa espiritu sa Diyos. Sa unsang paagi? Pinaagi sa pagtuon sa Bibliya, nga gidasig sa espiritu ni Jehova. (2 Timoteo 3:16) Pinaagi sa pag-ampo alang sa espiritu ni Jehova aron malig-on ang atong gugma kang Jehova ug sa atong mga igsoon. Ug pinaagi sa pagpakig-uban sa Kristohanong kongregasyon, diin ang espiritu dagaya nga nagaagos.
Kinahanglan usab nga susihon nato ang atong kaugalingon aron matiktikan ang bisan unsang dili-mahigugmaong mga buhat o mga hunahuna. Hinumdomi, ang gugma maoy usa ka hiyas sa kasingkasing, ug “ang kasingkasing labi pang maluibon kay sa bisan unsa pa ug nawad-ag paglaom.” (Jeremias 17:9) Bisan pa sa tanang tabang nga ginahatag ni Jehova, usahay kita molihok sa dili-mahigugmaong paagi. Tingali kita mosulti nga may way-hinungdang kahait ngadto sa isigka-Kristohanon, o tingali kita masuko ug masilo sa butang napamulong. Busa, maayong ipalanog nato ang pag-ampo ni David: “Susiha ako sa bug-os, Oh Diyos, ug hibaloi ang akong kasingkasing. Susiha ako, ug hibaloi ang akong mga hunahunang gubot, ug tan-awa kon anaa ba kanako ang bisan unsang makapaguol nga paagi, ug tultoli ako sa dalan sa panahong walay katinoan.”—Salmo 139:23, 24.
Sumala sa ginaingon sa Bibliya, “ang gugma dili mapakyas.” (1 Corinto 13:8) Kon bansayon nato ang paghigugma sa usag usa, dili gayod kita makaplagang may kakulang sa mga panahon sa pagsulay. Ang gugma nga nagalungtad taliwala sa katawhan sa Diyos dakog amot sa espirituwal nga paraiso nga nagalungtad karong adlawa. Kadto lamang nahigugma sa usag usa nga mainiton gikan sa kasingkasing ang magkalipay sa pagpuyo sa bag-ong kalibotan. Busa, sundoga si Jehova sa pagpahayag sa maong gugma ug sa ingon lig-ona ang bugkos sa panaghiusa. Ugmara ang gugma, ug batoni ang yawi sa tinuod nga Kristiyanidad.