Tanang Matuod nga Kristohanon Kinahanglang mga Ebanghelista
“Buhata ang buluhaton sa usa ka ebanghelista [o, misyonaryo].”—2 TIMOTEO 4:5, potnot.
1. Unsa ang maayong balita nga giwali sa mga ebanghelista sa unang siglo?
UNSAY kahulogan sa pagkahimong usa ka ebanghelista karong adlawa? Usa ka ba? Ang pulong “ebanghelista” nagagikan sa Gregong pulong eu·ag·ge·li·stesʹ, nga nagkahulogang “usa ka magwawali sa maayong balita.” Sukad sa pagkatukod sa Kristohanong kongregasyon sa 33 K.P., ang Kristohanong maayong balita nagpasiugda sa paagi sa Diyos sa kaluwasan ug nagmantala nga si Jesu-Kristo mobalik sa ulahi aron sa pagsugod sa iyang Gingharianong pagmando ibabaw sa katawhan.—Mateo 25:31, 32; 2 Timoteo 4:1; Hebreohanon 10:12, 13.
2. (a) Sa unsang paagi ang unod sa maayong balita napatugob sa atong adlaw? (b) Unsang obligasyon ang nabatonan sa tanang matuod nga mga Kristohanon karong adlawa?
2 Sukad sa 1914 paunahan, nagsugod sa pagtubo ang ebidensiya nga nagakatuman na ang ilhanan nga gihatag ni Jesus mahitungod sa iyang pagbalik ug dili-makitang presensiya. (Mateo 24:3-13, 33) Sa makausa pa, ang maayong balita mahimong maglakip sa pamulong “ang gingharian sa Diyos haduol na.” (Lucas 21:7, 31; Marcos 1:14, 15) Sa pagkamatuod, ang panahon miabot na aron ang tagna ni Jesus nga nahitala sa Mateo 24:14 makabaton ug dakong katumanan: “Kining maayong balita sa Gingharian igawali sa tibuok gipuy-ang yuta alang sa usa ka pamatuod sa tanang nasod; ug unya ang kataposan moabot.” Busa, ang pagwali sa maayong balita karon nagaapil sa madasigong pagpahayag sa natukod nga Gingharian sa Diyos ug sa mga panalangin nga duol nang ipatungha niini alang sa masinugtanong katawhan. Ang tanang Kristohanon nailalom sa sugo sa pagbuhat niining buluhatona ug sa “paghimog mga tinun-an.”—Mateo 28:19, 20; Pinadayag 22:17.
3. (a) Unsang dugang kahulogan ang nabatonan sa pulong “ebanghelista”? (Tan-awa ang Insight on the Scriptures, Tomo 1, panid 770, kolumna 2, parapo 2.) (b) Unsang mga pangutana ang gipatungha niini?
3 Dugang sa pagwali sa maayong balita sa katibuk-an, ang Bibliya nagagamit sa pulong “ebanghelista” sa usa ka espesyal nga diwa may labot niadtong mobiya sa ilang kaugalingong teritoryo aron sa pagsangyaw sa maayong balita diha sa mga dapit nga wala pa mawalihi. Sa unang siglo, may daghang misyonaryong mga ebanghelista, sama kang Filipe, Pablo, Bernabe, Silas, ug Timoteo. (Buhat 21:8; Efeso 4:11) Apan komosta ang atong linaing panahon sukad sa 1914? Ang katawhan ni Jehova karong adlawa naghimo ba sa ilang kaugalingon nga andam ingong lokal ug misyonaryo usab nga mga ebanghelista?
Pag-uswag Sukad sa 1919
4, 5. Unsa ang mga kalaoman sa buluhatong pagwali sa maayong balita tapos dayon sa 1914?
4 Sa dihang natapos ang Gubat sa Kalibotan I sa 1918, naagoman sa mga alagad sa Diyos ang midakong pagsupak gikan sa mga apostata ug sa klero sa Kakristiyanohan ug sa ilang politikanhong mga abyan. Ngani, ang tinuod Kristohanong pagwali sa maayong balita halos nahunong niadtong Hunyo 1918 sa dihang ang pangunang mga opisyales sa Watch Tower Society sa Tinipong Bansa nasentensiyahan ug 20 ka tuig nga pagkabilanggo pinasukad sa bakak nga mga sumbong. Ang mga kaaway sa Diyos ba milampos sa pagpahunong sa pagwali sa maayong balita?
5 Nga wala dahoma, niadtong Marso 1919 ang opisyales sa Sosyedad gibuhian ug sa ulahi nahukmang walay sala sa bakak nga mga sumbong nga nakapapriso kanila. Uban sa ilang bag-ong-nakaplagan nga kagawasan, kining dinihogang mga Kristohanon nakaamgo nga may daghan pang buluhaton sa dili pa sila tigomon ngadto sa ilang langitnong ganti ingong kaubang mga manununod sa Gingharian sa Diyos.—Roma 8:17; 2 Timoteo 2:12; 4:18.
6. Unsay pag-uswag sa buluhaton sa pagwali sa maayong balita tali sa 1919 ug 1939?
6 Niadtong 1919 wala makaabot sa 4,000 ang mitaho nga nakig-ambit sa pagsabwag sa maayong balita. Sulod sa sunod duha ka dekada, ubay-ubayng mga lalaki nagtanyag sa ilang kaugalingon ingong misyonaryong mga ebanghelista, ug ang pipila gipadala ngadto sa mga nasod sa Aprika, Asia, ug Uropa. Sa pagka 1939, human sa 20 ka tuig nga pagwali sa Gingharian, ang mga Saksi ni Jehova mitubo ngadto sa kapin ug 73,000. Kining talagsaong pag-uswag, nga nahimo bisan pa sa dakong paglutos, maoy kaamgid sa nahitabo sa unang katuigan sa Kristohanong kongregasyon.—Buhat 6:7; 8:4, 14-17; 11:19-21.
7. Sa katuigang 47 K.P. ug 1939, unsang susamang kahimtang ang naglungtad mahitungod sa Kristohanong buluhaton sa pagwali sa maayong balita?
7 Bisan pa niana, ang kinabag-an sa mga Saksi ni Jehova niadtong panahona napundok sa Ingles-sinultihan Protestanteng kanasoran. Ngani, kapin ug 75 porsiento sa 73,000 ka magmamantala sa Gingharian maoy taga Australia, Britanya, Canada, New Zealand, ug sa Tinipong Bansa. Ingon nga matuod sa mga 47 K.P., may gikinahanglan aron sa pagdasig sa mga ebanghelista sa paghatag ug labaw nga pagtagad sa wala kaayo masangyawi nga kanasoran sa yuta.
8. Sa pagka 1992, unsay nalampos sa Tunghaan sa Gilead?
8 Ang mga pagpiot ug mga paglutos sa panahon sa gubat wala makapugong sa gamhanang balaang espiritu ni Jehova sa pagdasig sa iyang mga alagad sa pagpangandam alang sa dako pang kauswagan. Niadtong 1943, samtang labing init ang Gubat sa Kalibotan II, ang organisasyon sa Diyos nagtukod sa Watchtower Bible School of Gilead nga may tuyo nga isabwag ang maayong balita sa halayo pa. Sa pagka Marso 1992, ang maong tunghaan nagpadalag 6,517 ka misyonaryo ngadto sa 171 ka lainlaing mga nasod. Dugang pa, mga lalaki gibansay sa pag-atiman sa mga sangang-buhatan sa Watch Tower Society diha sa langyawng kayutaan. Sa pagka 1992, sa 97 ka koordinator sa Komite sa Sangang-Buhatan, 75 ang nabansay sa Gilead.
9. Unsang mga programa sa pagbansay ang adunay bahin sa pag-uswag sa buluhaton sa pagwali sa maayong balita ug paghimog tinun-an?
9 Gawas sa Tunghaan sa Gilead, ang ubang programa sa pagbansay nagsangkap sa katawhan ni Jehova sa pagpalapad ug pagpauswag sa ilang buluhaton sa pagwali sa maayong balita. Pananglitan, ang Tunghaan sa Teokratikanhong Ministeryo nagalihok diha sa mga kongregasyon sa mga Saksi ni Jehova sa tibuok nga yuta. Kining kahikayana, duyog sa senemanang Tigom sa Pag-alagad, nagbansay sa minilyong magmamantala sa Gingharian nga mahimong epektibo sa katilingbanong pagsangyaw. Anaa usab ang Tunghaan sa Ministeryo sa Gingharian, nga nagataganag bililhong pagbansay alang sa mga ansiano ug mga ministeryal nga alagad aron sila makaatiman sa labi pang maayo sa nagdaghang mga kongregasyon. Ang Tunghaan sa Payunir nga Pag-alagad nakatabang sa daghang bug-os-panahong mga ebanghelista aron mahimong mas epektibo sa ilang buluhaton sa pagwali. Mas bag-o pa, ang Tunghaan sa Ministeryal nga Pagbansay naglihok na sa lainlaing mga nasod aron sa pagtabang sa ulitawong mga ansiano ug ministeryal nga alagad aron mahimong modernong-adlaw nga mga Timoteo.
10. Unsa ang sangpotanan sa tanang ekselenteng pagbansay nga gitagana pinaagi sa organisasyon sa Diyos? (Iapil ang impormasyon diha sa kahon.)
10 Unsa ba ang sangpotanan niining tanang pagbansay? Niadtong 1991, ang mga Saksi ni Jehova nakaabot sa kinatas-ang ihap nga kapin ug upat ka milyong magmamantala sa Gingharian nga aktibo diha sa 212 ka nasod. Hinunoa, lahi sa kahimtang nga naglungtad sa 1939, kapin ug 70 porsiento kanila nagagikan sa Katoliko, Ortodokso, dili-Kristohanon, o ubang kayutaan, diin ang Ingles dili mao ang pangunang pinulongan.—Tan-awa ang kahong “Pag-uswag Sukad sa 1939.”
Kon Nganong Malamposon
11. Kang kinsa gipasidungog ni apostol Pablo ang iyang kalamposan ingong usa ka ministro?
11 Wala angkona sa mga Saksi ni Jehova ang dungog alang sa maong pag-uswag. Hinunoa, giisip nila ang ilang buluhaton sa paagi sa pag-isip ni apostol Pablo, sumala sa iyang gipatin-aw diha sa iyang sulat ngadto sa mga taga-Corinto. “Nan, unsa ba, diay, si Apolos? Oo, unsa ba si Pablo? Mga ministro nga pinaagi kaniya kamo nahimong mga magtutuo, sumala sa gitugot sa Ginoo sa matag usa. Ako ang nagtanom, si Apolos ang nagbisibis, apan Diyos ang nagpatubo niini; busa ni siya nga nagatanom ang may bili ni siya nga nagabisibis, apan ang Diyos nga nagapatubo. Kay kita mga kaubang magbubuhat sa Diyos. Kamo nga katawhan mao ang uma sa Diyos nga giugba, ang tinukod sa Diyos.”—1 Corinto 3:5-7, 9.
12. (a) Unsang papel ang gidula sa Pulong sa Diyos diha sa kalamposan sa Kristohanong pagwali sa maayong balita? (b) Kinsay natudlo nga Ulo sa Kristohanong kongregasyon, ug unsa ang usa ka importanteng paagi sa pagpasundayag sa atong pagpasakop sa iyang pagkaulo?
12 Walay duhaduha nga ang talagsaon nga pag-uswag nga nasinati sa mga Saksi ni Jehova maoy tungod sa panalangin sa Diyos. Kini maoy buluhaton sa Diyos. Sa pagkaamgo niining kamatuorana, sila nagapadayon sa pagkugi sa regular nga pagtuon sa Pulong sa Diyos. Gibase nila sa Bibliya ang tanan nga ilang ginatudlo diha sa ilang buluhaton sa pagwali. (1 Corinto 4:6; 2 Timoteo 3:16) Ang laing yawi sa ilang malamposong pagwali sa maayong balita mao ang ilang bug-os nga pag-ila sa Usa si kinsa gitudlo sa Diyos ingong Ulo sa kongregasyon, ang Ginoong Jesu-Kristo. (Efeso 5:23) Ang unang-siglong mga Kristohanon nagpadayag niini pinaagi sa pakigtambayayong sa mga gitudlo ni Jesus ingong mga apostoles. Kining mga tawhana, uban sa ubang mga ansiano sa kongregasyon sa Jerusalem, nahimong unang-siglong Kristohanong nagamandong lawas. Gikan sa langit gigamit sa Ginoong Jesu-Kristo kining pundoka sa hamtong nga mga Kristohanon sa paghusay sa mga suliran ug pagdumala sa buluhaton sa pagwali sa maayong balita. Ang madasigong pakigtambayayong ni Pablo sa maong balaang kahikayan misangpot sa mga pag-uswag diha sa mga kongregasyon nga iyang giduaw. (Buhat 16:4, 5; Galacia 2:9) Mao usab karong adlawa, pinaagi sa hugot nga pagsunod sa Pulong sa Diyos ug madasigong pakigtambayayong sa pagdumala nga nagagikan sa Nagamandong Lawas, ang Kristohanong mga ebanghelista makasalig sa kalamposan diha sa ilang ministeryo.—Tito 1:9; Hebreohanon 13:17.
Pag-isip nga ang Uban Maoy Labaw
13, 14. (a) Unsang tambag ang gihatag ni apostol Pablo sumala sa nahitala sa Filipos 2:1-4? (b) Nganong hinungdanon ang paghinumdom ning tambaga samtang makigbahin sa buluhatong pagwali sa maayong balita?
13 Si apostol Pablo nagpakitag tinuod nga gugma alang sa mga nangita sa kamatuoran ug wala magpadayag ug labaw o mapihigon-sa-rasa nga tinamdan. Busa, siya nakatambag sa kaubang mga magtutuo sa ‘pag-isip nga ang uban maoy labaw.’—Filipos 2:1-4.
14 Sa samang paagi, ang matuod nga Kristohanong mga ebanghelista karong adlawa wala magbaton ug tinamdan sa pagkalabaw sa dihang makiglabot sa mga katawhan sa lainlaing mga rasa ug mga kagikanan. Usa sa mga Saksi ni Jehova nga taga Tinipong Bansa nga naasayn sa pagbuhat ingong misyonaryo sa Aprika,miingon: “Ako nasayod gayod nga kami dili labaw. Tingali kami mas daghag salapi ug sa gitawag pormal nga edukasyon, apan sila [ang lokal nga katawhan] adunay mga hiyas nga molabaw sa amoa.”
15. Sa unsang paagi kadtong naasayn sa pagbuhat diha sa langyawng mga nasod makapasundayag ug tiunay nga pagtahod alang sa umaabot nga mga tinun-an?
15 Sa pagkatinuod, pinaagi sa pagpadayag ug tiunay nga pagtahod alang niadtong pakig-ambitan sa maayong balita, atong himoong mas sayon nga madawat nila ang mensahe sa Bibliya. Makatabang usab sa dihang ang usa ka misyonaryong ebanghelista magpakita nga siya malipayon sa pagpuyo taliwala sa katawhan nga kanila siya naasayn sa pagtabang. Usa ka malamposong misyonaryo nga nakagugol sa miaging 38 ka tuig sa Aprika mipatin-aw: “Gibati ko sa akong kahiladman nga kini mao ang akong pinuy-anan, ug ang taga kongregasyon diin ako giasayn maoy akong mga igsoong lalaki ug babaye. Sa diha nga mipauli ako sa Canada alang sa bakasyon, ako wala gayod mobati sa pagkainato. Sa kataposang semana o kapin pa sa Canada, ako maikagon kaayo nga makabalik. Kana mao kanunay ang akong pagbati. Sultihan ko ang akong mga estudyante sa Bibliya ug mga igsoong lalaki ug mga babaye nga malipayon kaayo ako nga nahibalik, ug sila nagapasalamat nga ako buot nga mahauban kanila.”—1 Tesalonica 2:8.
16, 17. (a) Unsang hagit ang gidawat sa daghang misyonaryo ug lokal nga mga ebanghelista aron mahimong mas epektibo sa ilang ministeryo? (b) Unsang kasinatian ang nabatonan sa usa ka misyonarya tungod sa pagsulti sa lokal nga pinulongan?
16 Inigkakaplag nila ug dakong pundok sa katawhan nga langyawg pinulongan diha sa ilang lokal nga mga teritoryo, ang pipila naningkamot sa pagkat-on sa pinulongan, nga nagapadayag pinaagi niana nga giisip nila ang uban nga labaw. “Sa habagatang Aprika,” mipahayag ang usa ka misyonaryo, “usahay anaa ang pagbati sa kawalay-salig tali sa katawhan nga may Aprikanhong kagikan ug mga tawo nga may Uropanhong kagikanan. Apan ang atong pagsulti diha sa lokal nga pinulongan daling mopapas sa maong pagbati.” Ang pagsulti sa pinulongan niadtong si kinsa atong gipakig-ambitan sa maayong balita maoy usa ka dakong tabang sa pag-abot sa ilang mga kasingkasing. Nagkinahanglan kanag dakong kahago ug mapaubsanong pagkamalahutayon. Usa ka misyonaryo sa usa ka nasod sa Asia misaysay: “Ang kanunay nga pagkasayop samtang kanunay nga kataw-an tungod sa imong mga sayop mahimong usa ka pagsulay. Morag sayon ang pag-undang na lang.” Bisan pa niana, ang gugma sa Diyos ug silingan nakatabang sa maong misyonaryo sa paglahutay.—Marcos 12:30, 31.
17 Hisabtan, ang mga tawo matandog sa dihang ang usa ka langyaw maningkamot sa pagpaambit sa maayong balita diha sa ilang pinulongan mismo. Usahay mosangpot kini sa wala-dahomang mga panalangin. Usa ka misyonarya sa Aprikanhong nasod sa Lesotho nagsulti diha sa Sesotho ngadto sa laing babaye, nga nagtrabaho sa usa ka buhatan ug karpet. Usa ka opisyal sa gobyerno sa laing Aprikanhong nasod naglibot sa buhatan ug nakadungog sa estoryahay. Siya miduol ug mainitong midayeg kaniya, nga unya siya misulti ngadto sa opisyal sa gobyerno diha sa iyang pinulongan mismo. “Nganong dili ka moadto sa [akong nasod] ug magbuhat taliwala sa among katawhan, sanglit kahibalo ka man diay usab ug Swahili?” siya nangutana. Sa mataktikanhon, ang misyonarya mitubag: “Maayo kaayo unta kana. Apan ako usa sa mga Saksi ni Jehova, ug sa pagkakaron ang among buluhaton gidili sa inyong nasod.” “Palihog,” mitubag siya, “ayaw pagbati nga kaming tanan supak sa inyong buluhaton. Daghan kanamo pabor sa mga Saksi ni Jehova. Tingali sa usa ka adlaw makapanudlo kamo nga walay babag taliwala sa among katawhan.” Sa wala madugay, ang misyonarya nalipay sa pagkahibalo nga ang mga Saksi ni Jehova gihatagag kagawasan sa pagsimba sa mao mismong nasod.
Andam nga Mahikawan sa mga Katungod
18, 19. (a) Sa unsang hinungdanong paagi si Pablo naningkamot sa pag-awat sa iyang Agalon, si Jesu-Kristo? (b) Pag-asoy ug usa ka kasinatian (ang anaa sa parapo o imong kaugalingon) sa pagpakita sa kahinungdanon sa paglikay sa bisan unsang hinungdan sa pagpandol niadtong si kinsa atong gipakig-ambitan sa maayong balita.
18 Sa dihang misulat si apostol Pablo: “Mahimong mga maawaton kanako, maingon nga ako nagmaawaton kang Kristo,” siya bag-o pang naghisgot sa panginahanglan sa paglikay nga pandolon ang uban, nga miingon: “Kon kaha kamo nagakaon o nagainom o nagabuhat sa bisan unsa, buhata ang tanang butang alang sa himaya sa Diyos. Paglikay kamo nga mahimong mga hinungdan sa pagkapandol ngadto sa mga Hudiyo ingon man sa mga Grego ug ngadto sa kongregasyon sa Diyos, maingon nga ako nagapahimuot sa tanang tawo diha sa tanang butang, nga wala magtinguha sa akong kaugalingong kaayohan kondili sa kaayohan sa daghan, aron nga sila unta mamaluwas.”—1 Corinto 10:31-33; 11:1.
19 Ang mga ebanghelista nga sama kang Pablo, kinsa andam mohimog mga sakripisyo sa kaayohan niadtong ilang ginawalihan, nagaani ug mga panalangin. Pananglitan, sa usa ka Aprikanhong nasod, usa ka misyonaryong magtiayon nangadto sa usa ka lokal nga hotel aron mangaon sa pagsaulog sa anibersaryo sa ilang kasal. Sa sinugdan nagplano sila sa pagorder ug bino kauban sa pagkaon, sanglit ang kasarangang pag-inom ug alkoholikong ilimnon wala man sawaya diha sa Bibliya. (Salmo 104:15) Apan unya ang maong magtiayon mihukom nga dili na mopalit niana kay basin makapasilo sa lokal nga katawhan. “Usa ka panahon sa ulahi,” nahinumdom ang bana, “nahibalag namo ang usa ka lalaki nga usa ka kusinero niadto nga hotel, ug nasugdan namo ang usa ka pagtuon sa Bibliya uban kaniya. Sa kaulahian pa gayod siya mitug-an kanamo: ‘Nakahinumdom ba mo sa dihang nanganha kamo sa hotel aron mangaon? Kaming tanan nagpaluyo sa pultahan sa kusina nga nagbantay kaninyo. Abi ninyo, ang mga misyonaryo sa simbahan nagsulti kanamo nga daotan nga kami moinom. Apan, sa dihang sila moanha sa hotel, sila magpagusto sa pag-order ug bino. Busa mihukom kami nga kon kamo moorder ug ilimnong alkoholiko, kami dili mamati kaninyo inigsangyaw ninyo kanamo.’” Karong adlawa, ang maong kusinero ug uban pa nga nagtrabaho sa hotel maoy bawtismadong mga Saksi.
Daghan pa nga Buluhaton
20. Nganong bililhon nga kita molahutay ingong madasigong mga magwawali sa maayong balita, ug unsang makalipayng pribilehiyo ang gipahimuslan sa daghan?
20 Samtang tulin nga nagsingabot ang kataposan niining daotang sistema, daghan pa nangandoy nga makabati sa maayong balita, ug labi pang dinalian kay sukad masukad nga ang matag Kristohanon molahutay ingong matinumanong ebanghelista. (Mateo 24:13) Mapauswag ba nimo ang imong bahin niining buluhatona pinaagi sa pagkahimong usa ka ebanghelista sa espesyal nga diwa sama kang Filipe, Pablo, Bernabe, Silas, ug Timoteo? Daghan nagabuhat sa susamang butang pinaagi sa pagduyog sa ranggo sa mga payunir ug nagahimo sa ilang kaugalingon nga andam sa pag-alagad diha sa mga dapit diin mas dako ang panginahanglan.
21. Sa unsang paagi “ang usa ka dakong pultahan nga motultol sa buluhaton” naablihan alang sa katawhan ni Jehova?
21 Sa bag-o pa, ang luag nga mga nataran sa pagwali sa maayong balita nabuksan diha sa kanasoran sa Aprika, Asia, ug Silangang Uropa, diin ang buluhaton sa mga Saksi ni Jehova sa nangagi gipiotan. Sama sa nahitabo kang apostol Pablo, “ang usa ka dakong pultahan nga motultol sa buluhaton naablihan” alang sa katawhan ni Jehova. (1 Corinto 16:9) Pananglitan, ang misyonaryong mga ebanghelista nga bag-ong nangabot sa Aprikanhong nasod sa Mozambique walay igong panahon sa pagtuon sa tanang tawo nga buot ug mga pagtuon sa Bibliya. Pagkamalipayon nato nga ang buluhaton sa mga Saksi ni Jehova nalegal na nianang nasora niadtong Pebrero 11, 1991!
22. Kon kaha ang atong lokal nga teritoryo maayong pagkakobre o dili, kinahanglang kitang tanan madeterminado sa pagbuhat sa unsa?
22 Diha sa kayutaan diin sa kanunay kita may kagawasan sa pagsimba, ang atong mga igsoon nagapahimulos usab ug padayong mga pag-uswag. Oo, bisan diin kita nagapuyo, aduna pay “daghan nga buluhaton sa Ginoo.” (1 Corinto 15:58) Kay kana ang kahimtang, magpadayon kita sa paggamit nga maalamon sa nahibiling panahon samtang ang matag usa kanato ‘magabuhat sa buluhaton sa ebanghelista, nga bug-os magatuman sa atong ministeryo.’—2 Timoteo 4:5; Efeso 5:15, 16.
Makapatin-aw Ka Ba?
◻ Unsa ang usa ka ebanghelista?
◻ Sa unsang paagi ang unod sa maayong balita napatugob tapos sa 1914?
◻ Unsay pag-uswag sa buluhaton sa pagwali sa maayong balita sukad sa 1919?
◻ Unsang pangunang mga hinungdan ang nakaamot sa kalamposan sa buluhatong pag-ebanghelyo?
[Kahon sa panid 19]
Pag-uswag Sukad sa 1939
Tagda ang mga pananglitan gikan sa tulo ka kontinente diin gipadala ang mga misyonaryo nga nabansay sa Gilead. Niadtong 1939 may 636 lang ka magmamantala sa Gingharian nga nagtaho gikan sa Kasadpang Aprika. Sa pagka 1991 kining gidaghanona miuswag ngadto sa kapin ug 200,000 diha sa 12 ka nasod sa Kasadpang Aprika. Ang mga misyonaryo nakaamot usab sa talagsaong mga pag-uswag diha sa mga nasod sa Amerika del Sur. Ang usa mao ang Brazil, nga miuswag gikan sa 114 ka magmamantala sa Gingharian niadtong 1939 ngadto sa 335,039 niadtong Abril 1992. Ang susamang pagtubo misunod sa pag-abot sa mga misyonaryo sa mga nasod sa Asia. Panahon sa Gubat sa Kalibotan II, ang diyutayng gidaghanon sa mga Saksi ni Jehova sa Hapon grabeng gilutos, ug ang ilang buluhaton nahunong. Dayon, niadtong 1949, 13 ka misyonaryo miabot sa pagtabang sa pag-organisar pag-usab sa buluhaton. Niadtong tuiga sa pag-alagad, wala pay napulo ka lumad nga magmamantala mitahog pagsangyaw sa kanataran alang sa tibuok Hapon, samtang niadtong Abril 1992 ang katibuk-ang gidaghanon sa mga magmamantala miabot ug 167,370.
[Kahon sa panid 21]
Kakristiyanohan ug ang Suliran sa Pinulongan
Pipila sa mga misyonaryo sa Kakristiyanohan naningkamot ug maayo sa pagkakat-on ug langyaw nga pinulongan, apan daghan nagdahom nga ang lokal nga katawhan mosulti sa ilang Uropanhong pinulongan. Sumala sa gipatin-aw ni Geoffrey Moorhouse diha sa iyang librong The Missionaries:
“Ang suliran mao nga ang pagkamahibalo sa usa ka lumad nga pinulongan subsob kaayong gisabot ingon nga paagi lang sa paghubad sa Kasulatan. Diyutay lang nga paningkamot ang gigugol, sa mga indibiduwal kaha o sa mga sosyedad nga nagpatrabaho kanila, sa pagseguro nga ang usa ka misyonaryo makapakigsulti ngadto sa usa ka lumad diha sa iyang pinulongan mismo uban sa kalarino nga mao lamay makapatungha ug halalom nga pagsinabtanay tali sa duha ka tawo. Matag misyonaryo makatuon ug tinagdiyutay nga pulong sa lokal nga pinulongan . . . Gawas niana, ang komunikasyon sa linangkob gihimo diha sa makapakurat ug nadaot nga paningog sa giingong pidgin Ingles, uban sa paghunahuna nga ang Aprikanong lumad kinahanglang mopahiuyon sa pinulongan sa Ingles nga bisita. Sa labing daotan, kini lain pang timailhan sa rasanhong pagkasuperyor.”
Niadtong 1922 ang Tunghaan sa Sidlakan ug Aprikanhong mga Pagtuon sa London mipatik ug taho mahitungod sa suliran sa pinulongan. “Ang among opinyon,” miingon ang taho, “mao nga ang aberids nga sukod sa kahanas nga nakab-ot sa mga misyonaryo diha sa lokal nga pinulongan . . . maoy mubo nga makapasubo ug makuyaw pa.”
Ang mga misyonaryo sa Sosyedad sa Watch Tower sa kanunay nag-isip sa pagkat-on sa lokal nga pinulongan ingong usa ka kinahanglanon, nga motabang sa pagpatin-aw sa ilang kalamposan diha sa misyonaryong natad.