Isipa ang Uban nga Mas Labaw

11. Kon may pagpihig sa bisan unsang matang diha sa Kristohanong kasingkasing, unsay iyang buhaton?

¹¹ Sa laing bahin, kon mapihigon ang Kristohanon sa usa ka rasa o nasyonalidad, tingali iyang ipakita kini pinaagi sa mga pulong o sa mga buhat. Sa baylo, mopahinabo kinig samdang mga pagbati, ilabina diha sa kongregasyon nga gilangkoban sa mga tawo sa nagkalainlain ug etnikong mga kagikan. Siyempre, walay Kristohanon nga mohatag ug kadaot sa panaghiusa sa katawhan sa Diyos. (Salmo 133:1-3) Busa kon naglungtad kining pagpihig diha sa kasingkasing sa usa ka Kristohanon, maayong mag-ampo siya: “Susiha ako, Oh Diyos, ug hibaloi ang akong kasingkasing. Sulayi ako, ug hialoi ang akong makatugaw nga mga hunahuna, ug tan-awa kong kanako aduna bay dalan sa pagkadaotan, ug tultoli ako sa dalan nga walay kataposan.”​—Salmo 139:23, 24.

12. Nganong dili kita angay magpasgarbo sa tong kaugalingon o sa uban sa atong etnikong kagikan?

¹² Maayong huptan ang realistikanhong hunahuna nga kitang tanan maoy mga tawong dili-hingpit nga wala untay maayong baroganan sa Diyos kon dili pa sa halad ni Jesu-Kristo. (1 Juan 1:8–2:2) Nan, unsay nakapalahai kanato sa uban? Sanglit kita wala may butang nga wala nato madawat, nganong ipasigarbo man nato o sa uban ang atong etnikong kagikan!​—Itandi sa 1 Corinto 4:6, 7.

13. Sa unsang paagi makaamot kita sa panaghiusa sa kongregasyon, ug unsay makat-onan gikan sa Filipos 2:1-11?

¹³ Makaamot kita sa panaghiusa sa kongregasyon kon atong dawaton ug magpakitag apresasyon sa maayong mga hiyas sa uban. Ang Hudiyohanong apostol Pablo mihatag kanatong tanan ug butang nga angay palandongon sa dihang iyang gisultihan ang mga Hentil nga taga Filipos: “Hingpita ninyo ang akong kalipay pinaagi sa inyong samang hunahuna ug sa pagbaton sa samang gugma, nga giusadiha sa kalag, nga nagabaton sa usa ra ka hunahuna, dili magbuhat ug bisan unsa sa tuyo sa pagbahinbahin o sa pagpagarbo sa kaugalingon, hinunoa uban sa pagpaubos isipa ang uban ingon nga mas labaw kanimo.” Ang hustong tinamdan alang kanato nga ipakita sa isigkatawo sa bisan unsang rasa o nasyonalidad makita diha kang Jesu-Kristo. Bisag usa siya ka gamhanang espiritu nga linalang, siya “nahimong sama sa tawo” ug nagpaubos sa iyang kaugalingon hangtod sa punto sa pagkamatay diha sa kahoy sa pagsakit alang sa makasasalang mga tawo sa tanang rasa ug nasod. (Filipos 2:1-11) Ingong mga sumusunod ni Jesus, nan, dili ba angay magmahigugmaon, magmapainubsanon, ug magmaluloy-on kita, ilhon ang uban nga mas labaw kanato?

Pamati ug Paniid

14. Sa unsang paagi matabangan kita sa pag-isip sa uban nga mas labaw kanato?

¹⁴ Matabangan kita sa paglantaw sa uban nga mas labaw kanato kon mamati gayod kita sa dihang mosulti sila ug panid-an pag-ayo ang ilang batasan. Pananglitan, tingali, kinasingkasing natong admitihon sa atong kaugalingon nga ang usa ka kaubang ansiano​—tingali sa laing rasa—​nakalabaw kanato sa katakos sa paghatag epektibong tambag diha sa Teokratikong Ministeryong Tunghaan. Tingali nakamatikod kita nga ang iyang espirituwalidad, dili ang iyang linitokan o paagi sa pagsulti, ang nakahimo kaniya sa pagbaton ug maayong mga resulta sa pagtabang sa kaubang mga magtutuo nga mahimong batid nga mga magwawali sa Gingharian. Ug dayag nga gipanalanginan ni Jehova ang iyang mga paningkamot.

15. Unsay atong mamatikdan sa dihang mamati kita sa mga pahayag sa kaubang mga magsisimba?

¹⁵ Sa dihang makigsulti kita sa atong mga igsoong lalaki ug babaye o mamati sa ilang mga komento diha sa mga tigom, tingali makaalinggat kita nga ang pila kanila mas maayog pagsabot sa pila ka kamautoran sa Kasulatan kay kanato. Tingali nakamatikod kita nga ang ilang inigsoong gugma daw mas lig-on, sila daw may dugang paguto, o kaha nagapakita sila nga mas dako ang ilang pagsalig kang Jehova. Busa kon sila man sama kanatog etnikong kagikan o dili, sila nagadasig kanato sa paghigugma ug sa maayong mga binuhatan, nagatabang sa paglig-on sa atong pagtuo, ug mopalihok kanato sa dugang pagsalig sa atong langitnong Amahan. (Proverbio 3:5, 6; Hebreohanon 10:24, 25, 39) Si Jehova sa dayag suod kanila, ug angay nga kita usab.​—Itandi ang Santiago 4:8.

20. Sa unsang paagi ang atong pagtahod alang sa atong kaubang mga magtutuo sa tanang rasa ug nasod mapalambo?

²⁰ Sa tino, gipanalanginan ug gilig-on ni Jehova ang iyang mga saksi sa tanang nasod ug rasa. Siya walay pinalabi, ug ingong iyang dedikadong mga alagad, kita walay kipasangil o katarongan sa pagpakitag pagpihig. Dugang pa, ang atong pagtahod sa atong mga igsoong lalaki ug igsoong babaye sa tanang rasa ug nasod molambo pa kon magpalandong kitag mga paagi nga diin sila mas labaw kanato. Ilang gipadapat usab ang langitnong kaalam, nga dili mapihigon kondili nagahatag maayong bunga. (Santiago 3:13-18) Oo, ug ang ilang kalulot, pagkamahinatagon, gugma, ug ubang diyosnong mga hiyas nagahatag kanatog maayong mga pananglitan.