Magmaikagon sa Uban
“Magmaikagon, dili lamang sa imong kaugalingong kaayohan, kondili sa kaayohan usab sa uban.”—FILIPOS 2:4.
1, 2. Unsa ang pipila ka katarongan nga magmaikagon sa uban?
KITA adunay maayong mga katarongan sa pagpakitag kaikag sa uban. Pananglitan, makaiikag kanato ang isigkatawo tungod kay lahi kita sa usa ug usa. Ang genetikanhon nga materyal sa atong mga selula sa lawas nagdala ug plano sa atong napanunod nga pagkagama. Lahi kaayo kini nga ang mga ahensiya nga nagapaniktik sa krimen nakadugang ug genetikanhon nga “fingerprinting” sa ilang nagkalainlaing mga paagi sa pag-ila.
2 Adunay ubang mga katarongan kon nganong kita lahi ug makaiikag nga mga indibiduwal. Gikan pa sa pagsamkon, ilalom kita sa impluwensiya sa atong palibot. Dunay daghang ebidensiya nga ang mga bata nga gisabak pa moreaksiyon sa nagakahitabo sa gawas sa matris. Unya, human nga makasulod kita sa kalibotan ingong independente nga mga tigginhawa, o mga kalag, ang kaisipan sa atong mga ginikanan ug mga paagi nagaapektar kanato. Sa magdako kita, tingali bugtong kitang anak o dunay mga igsoong lalaki o babaye ug nakaambit sa pag-atiman kanila. Kini nga mga pag-ubanay o kakulang niana dunay kalabotan sa atong kaugmaran. Ang atong mabasa, ginatudlo sa tunghaan, ug ginatan-aw sa telebisyon makaimpluwensiya usab sa atong hunahuna ug mga lihok.
3. Nahiuyon sa Filipos 2:4, nganong ilabinang magmaikagon kita sa uban?
3 Busa, ang atong pagkahimong lahi makapalambo sa kaikag sa usa ug usa. Apan maoy anaa sa hunahuna ni apostol Pablo ang mas dakong katarongan sa pagpakitag kaikag sa uban. Busa, iyang giawhag ang isigka-Kristohanon nga ‘magmaikagon, dili lamang sa ilang kaugalingong kaayohan, kondili sa kaayohan usab sa uban.’ (Filipos 2:4) Inay maikag sa atong kaugalingong bentaha, kita ilabinang angay maikag sa uban sa espirituwal. Nan, unsa ang pila ka paagi nga kita makapakitag kaikag sa uban?
Espirituwal nga Interes ug Kalainan sa Personalidad
4. Sumala sa Efeso 4:22-24, unsang kausaban ang makapauswag sa atong espirituwal nga kaikag sa uban?
4 Ang atong espirituwal nga kaikag sa uban mapalambo kon atong ipadapat sa kaugalingon ang kahibalo sa Kasulatanhong kamatuoran ug magtuon sa pagsunod sa panig-ingnan ni Jesu-Kristo. (1 Pedro 2:21) Ingong tinuod nga mga Kristohanon, atong ‘hukason ang daang personalidad nga dala pa sa atong karaang paggawi sa kinabuhi’ ug maningkamot nga sul-oban kini sa “bag-ong personalidad nga gibuhat sumala sa kabubut-on sa Diyos diha sa matuod nga pagkamatarong ug pagkamaunongon.” (Efeso 4:22-24) Busa, ang hakog nga mga tinamdan anam-anam nga masul-oban sa maluluton, mahunahunaong kabalaka sa uban.—Isaias 65:25.
5. Nganong adunay nagkalahi nga mga personalidad sa Kristohanong kongregasyon, nga nakabangon ug unsang mga pangutana?
5 Bisan tuod dunay talagsaong kausaban sa personalidad taliwala sa katawhan ni Jehova, ang makasasalang mga kiling nagapabilin gihapon. Bisan si Pablo miadmiter: “Sa dihang buot kong buhaton ang maayo, ang daotan duol kanako.” (Roma 7:21) Sa pagkamatuod, ang atong napanunod ug naugmad nga mga kinaiya naglungtad, ug kini ang mopaila kanato. Ang uban may pagkaartistiko, ang uban matukion. Samtang ang uban hilomon ug pormal, ang uban mahigalaon ug mangayaon. Nan, sa unsang paagi ang panaghiusa sa Kristohanong kongregasyon mahuptan bisan sa mga kalainan sa personalidad?
6. Unsa ang angay natong paglantaw sa panaglahi sa personalidad, ug sa unsang paagi imong ikailustrar kini?
6 Kon kita gisugo nga magpakitag espirituwal nga kaikag sa uban ug mapatunhay ang Kristohanong panaghiusa, kita angay nga magmarealistiko ug masinabtanon. Sanglit wala man magpangayo ang Diyos kanato ug kahingpitan, angay nga dili kita magapangayo niana gikan sa atong Kristohanong mga kauban. Dugang pa, si Jehova wala magpaabot nga magkaparehas ang tanan niyang mga alagad. Diha sa Kristohanong kongregasyon, kitang tanan dunay dapit ug makagamit sa atong napanunod, hinatag sa Diyos nga mga hiyas sa pagpalambo sa iyang buluhaton. (1 Corinto 12:12-26) Kon kita magmapuliki sa pagbuhat ubos sa pagdumala sa Ulo sa kongregasyon, si Jesu-Kristo, kita walay panahon sa pagtan-aw sa usa ug usa sa hinawayon nga paagi. (1 Corinto 4:1-4) Sama sa nahibaloan sa hanas nga mamumuo, ang matag hiramenta gidesinyo sa pagbuhat alang sa usa ka trabaho. Ang martilyo ba makahimog gamayng lungag sama sa mahimo sa usa ka barina? Ang sipilya nga gamiton sa pagporma sa kahoy epektibo bang makapadulot ug tornilyo diha niana? Dili, kay ang matag usa ka hiramenta dunay iyang angay nga gamit.
7. Samtang makigbahin kita sa pag-alagad sa Gingharian, unsa ang kinahanglang isilsil nato sa hunahuna?
7 Pagkatinuod sa mga pulong sa alawiton sa Gingharian nga “Malipayong Pag-alagad”! Kini nag-awhag kanato: “Mag-alagad nga malipayon sa Diyos uban sa tanang hiyas ug katakos.” Matuod, kita tingali walay talagsaong mga katakos. Apan, atong giuna diha sa hunahuna ang buluhaton nga gitudlo kanato ingong mga Saksi ni Jehova ug bug-os kasingkasing nga atong gipahinungod ang atong kaugalingon niana. Sumala sa sumpay sa alawiton: “Bisan ang pagsilbi ta diyutay, apan katim-os ug gugma ta napamatud-an.”—Mag-awit ug mga Pagdayeg Kang Jehova, alawiton 130.
Isipa ang Uban nga Mas Maayo
8. Sa unsang paagi ang panaghiusa mapalambo pinaagi sa pagpadapat sa gipamulong ni Pablo diha sa Filipos 2:1-3?
8 Ang panaghiusa molambo pinaagi sa pag-isip sa uban nga mas maayo kay kanato. Si Pablo misulat: “Busa, kon adunay pagdasig diha kang Kristo, kon adunay kahupayan sa gugma, kon adunay pakig-ambitay sa espiritu, kon adunay malulot nga pagmahalay ug pagkinaloy-anay, hingpita ninyo ang akong kalipay pinaagi sa pagbaton ninyo ug usa ra ka hunahuna ug adunay samang gugma, nga giusa diha sa kalag, mga nagabaton ug usa ra ka paghunahuna.” Matikdi nga ang apostol midugang: “Dili magbuhat sa tuyo sa pagpakigbingkil o sa pagpagarbo, hinunoa uban sa pagpaubos isipa ang uban nga mas maayo kay kanimo.”—Filipos 2:1-3.
9. Unsay kahulogan sa pagkamabikilon ug pagkamahambogon, ug sa unsang paagi atong malikayan kining mga gawia?
9 Dili mag-isip sa uban nga mas maayo, ang tawong mabikilon magpakita “sa kasagaran ug masupilon ug makalaay nga kiling sa mga panag-away ug mga panaglalis.” (Webster’s New Collegiate Dictionary) Kining kinaiyaha makita diha sa “mga pakiglantugi bahin sa mga pulong.” (1 Timoteo 6:4) Sa pagkamatuod, ang espiritu sa luyo sa mga pulong ug sa mga hunahuna nga ilang ipahayag angay hatagag dakong pagtagad. Busa likayi nga maanad ka sa pagsulti ug mga ekspresyong gigamit sa binaba o sa sinulat nga materyal. Apan komosta kon may mopahayag kanimo ug lahi nga hunahuna bahin sa pila ka pagtulon-an? Maunongong pagpabilin sa Kasulatanhong impormasyon nga gitagana sa Diyos pinaagi sa “matinumanon ug maalamong ulipon.” (Mateo 24:45-47) Labot pa, mao kanang paagiha nga atong nakat-onan ang kamatuoran sa sinugdan. Ang pagdawat niini makatabang kanato nga dili mahimong mahambogon, sa ato pa, adunay sobrang pagbati sa bili sa kaugalingon.
Ugmara ang Kaikag sa Uban
10. Unsang pagpadapat sa Filipos 2:4 ang angay himoon sa kongregasyon?
10 Hinumdomi nga giawhag kita ni Pablo nga ‘magmaikagon, dili lamang sa atong kaugalingong kaayohan, kondili sa kaayohan usab sa uban.’ (Filipos 2:4) Unsay kahulogan niini? Bisan ang pagkamapaniiron lamang sa atong palibot makatabang kanato diha sa pag-alagad sa kanataran, busa ang pagpakitag kaikag sa kaayohan sa uban diha sa kongregasyon mohatag kanato ug mga higayon sa paglig-on sa bugkos sa gugma nga nagapahiusa kanato. Ilabinang may responsabilidad ang mga ansiano sa pagpakitag kaikag sa isigkamagtutuo, kay ang proverbio nag-ingon: “Angay kang mahibalo sa kahimtang sa imong panon.” (Proverbio 27:23) Sa pagkamatuod, kitang tanan angay magmatinagdanon sa mga panginahanglan sa atong isigkamagtutuo.—1 Pedro 2:17.
11. Nganong kinahanglang mamati kita sa dihang makigsulti sa atong espirituwal nga mga igsoong lalaki ug mga igsoong babaye?
11 Laing paagi nga mapalambo ang panaghiusa ug maugmad ang kaikag sa uban mao ang paggahin ug panahon sa pakigkomunikar ug maayo sa imong espirituwal nga mga igsoong lalaki ug mga babaye. Susiha kon unsay ilang hunahuna. Mahimo kini inigduaw nimo sa ilang mga balay, sa dili pa magsugod ug sa tapos na ang mga tigom sa Kingdom Hall, ug tali sa mga sesyon sa atong mga asembliya. Ug pamati pag-ayo sa dihang mosulti sila. Mahimong magkahulogan kini nga atong madunggan ang mga kalisod nga ilang ginaatubang, ug tingali makatabang kita sa pagpas-an sa ilang mga palas-anon ug busa nagatuman sa kasugoan ni Kristo. (Galacia 6:2) Bisan pa, adunay labaw pa kay sa pakigsulti sa atong mga igsoon ang makapanalipod sa panaghiusa sa kongregasyon. Unsa man kana?
Pagpakitag Tawhanong Pagbati
12. Nganong magpakita kita ug pagkamabination?
12 Ang pagkamabination makapalambo usab sa Kristohanong panaghiusa. Uban sa daghang kalisdanan sa kinabuhi, kitang tanan angay magpakita niining hiyasa. Hinaot nga dili kita sobra ka matinguhaon nianang anaa sa atong hunahuna ug mapakyas na hinoon kita sa pagtagad sa mga pagbati sa uban. Ingon nga pananglitan: Sa dihang miabot ang usa ka igsoon nga dunay bahin sa Service Meeting, dihadiha nga nakigsulti ang ansiano kaniya bahin sa butang nga ipahibalo. Sa kakurat ug sa kaulaw sa ansiano, gitan-aw siya sa igsoon, ug mipahiyom, ug miingon: “Una, Brader, maayong gabii!” Ang butang nga ipahibalo gihisgotan human nga nagbayloay sila ug mahigalaon nga pangomosta ug ang igsoon narelaks. Pagkamaayong leksiyon ang nakat-onan sa ansiano! Ayaw pagdalidali, nga dili na lang magpakabana sa mga pangatahoran nga makapahimo sa imong relasyon sa uban nga makalilipay.
13. Ang pagkamabination mopukaw sa mga ansiano sa pagbuhat ug unsa sa dihang makiglabot sa ilang Kristohanong mga kauban?
13 Ang pagkamabination makapukaw sa mga ansiano sa pagpakitag kahangawa ug ubang maayong mga hiyas. Usahay, kining mga tawhana kinahanglan magmaluloton, “sama sa usa ka inahang nagapasuso nga nagaalima sa iyang kaugalingong mga anak.” (1 Tesalonica 2:7) Ang pagtabang ug mga indibiduwal nagkinahanglan ug dakong pailob ug mahigugmaong pagpaluyo. Kadtong kinsa ‘mibiya sa gugma nga ilang gibati sa sinugdan’ tingali nagkinahanglag pagdasig alang sa mas dako nga kalihokan ug tabangan sa pagsabot sa pagkadinalian sa atong panahon. (Pinadayag 2:4; 2 Timoteo 4:2; Hebreohanon 6:11, 12) Sama kang Pablo, ang mga ansiano adunay “malumong pagbati” sa Kristohanong mga kauban, nagapanambag ug nagalipay kanila ‘sa katuyoan nga sila magpadayon sa pagkinabuhi nga takos sa Diyos.’—1 Tesalonica 2:8, 11, 12.
14. Unsang ebidensiya ang gipakita ni Pablo nga siya mabination?
14 Si Pablo nagbilin sa mga ansiano ug maayong panig-ingnan kon unsaon sa pagpakitag mahigugmaong kabalaka sa kaayohan sa espirituwal nga mga igsoong lalaki ug sa igsoong mga babaye. Siya misulat: “Gawas sa uban pang mga butang, anaa ang adlaw-adlaw nga pagpiit kanako, ang akong kabalaka alang sa tanang kongregasyon.” Tungod kay si Pablo aduna niini nga kabalaka, siya nakapangutana: “Kinsa bay mahuyang, ug dili ba ako mahuyang? Kinsa may napandol, ug ako wala ba masuko?” Kon usa ikaw ka ansiano, ikaw ba mabination?—2 Corinto 11:28, 29.
Kabiga ang Imong Igsoon
15. Kon may motunghang seryosong mga problema taliwala sa mga igsoon, unsang tambag ni Jesus sa Mateo 18:15 ang angay sundon, ug unsa ang angay nga tumong?
15 Ang pagkamabination makapalambo sa panaghiusa taliwala sa mga alagad ni Jehova. Sa tagsaong mga higayon, hinunoa, may motunghang personal nga mga kabingkilan. Kon malangkit na ang seryosong butang, sundon sa mga Kristohanon ang tambag ni Jesus diha sa Mateo 18:15-17. Matikdi ang unang lakang. Kini mao ang pakigsulti sa imong igsoon nga kamo rang duha ug “padaygi siya sa iyang sayop.” Unsay imong tumong? Aw, ‘ang pagkabig sa imong igsoon’! Si Jesus miingon: “Kon maminaw siya kanimo, nakabig mo ang imong igsoon.” Sa makalilipay, ang pagpakigsulti nga kamo rang duha mao ray gikinahanglan aron mapasig-uli ang malinawong relasyon kanimo ug sa imong kaubang magsisimba ni Jehova.
16. Unsay angay buhaton kon makamatikod ka nga may gikasuk-an ang imong igsoon kanimo?
16 Kon nakamatikod ka nga ang imong igsoon may gikasuk-an kanimo, sunda ang tambag ni Jesus ug “pakig-uli sa imong igsoon.” (Mateo 5:24) Estoryahi ang problema sa kalmado, malulutong paagi, sabta ang panghunahuna sa usa ug usa. Niining paagiha, ang mga butang masulbad ra ug ang kalinaw sa kongregasyon magpabilin.
Pagkabig sa mga Dili-Magtutuo
17, 18. Unsang tambag ang gihatag ni Pedro sa Kristohanong mga asawa nga nagpuyo diha sa nabahin sa relihiyon nga mga panimalay?
17 Ang usa sa labing malisod nga kahimtang sa pagpadapat sa mga prinsipyo sa Kasulatan mao kanang anaa sa nabahin sa relihiyon nga panimalay. Daghang Kristohanon matinumanong nanlimbasog samtang ginabuntog ang mga kaguol ug mga kalisod nga gipahinabo sa kakulang ug espirituwal nga panaghiusa sa ilang kaminyoon. Sa unsang paagi sila matabangan?
18 Tungod kay maikagon sa uban, ang mga ansiano malipayong nagataganag espirituwal nga tabang niadtong nagpuyo sa mga panimalay nga nabahin sa relihiyon. Pananglitan, mahimong hisgotan ang tambag ni Pedro bahin sa paggawi sa Kristohanong mga asawa niining kahimtanga. Iyang gisultihan sila nga magpasakop sa ilang mga bana, bisan pa kon sila dili mga magtutuo ug “wala magatuo sa pulong.” Nganong magpasakop? “Aron nga . . . sila madani [o makabig] nga walay sulti pinaagi sa gawi sa ilang mga asawa.” (1 Pedro 3:1; Kingdom Interlinear) Apan unsa ba ka epektibo ang pagpadapat niining tambaga?
19. Paghatag pananglitan sa pag-ilustrar sa kaayohan sa pagpadapat sa 1 Pedro 3:1.
19 Ang usa ka babaye nga ginganlag Vera miadmiter nga sa sinugdan sa dihang nahimo siyang Kristohanon, kanunay siyang makighisgot sa iyang bana bahin sa kamatuoran sa Bibliya, ug ang iyang bana gipul-an niana. “Gisunod ang Kasulatanhong tambag nga nadawat gikan sa usa ka ansiano,” siya midugang, “nakahukom ako nga mas maayong magmataktikanhon ug maghulat ug maayong mga higayon sa pagpresentar niini.” Busa, gipadapat ni Vera ang 1 Pedro 3:1, apan mihimo siyag paagi sa pag-agda sa iyang bana, si Barry, sa paghisgot sa mga prinsipyo sa Bibliya. Ang bana sa ulahi miasoy: “Sa milabay ang mga tuig, nakamatikod ako nga ang Awake! [kauban nga basahon sa Ang Bantayanang Torre] makita sa tagsaong mga lugar sa balay. Naundan kini ug mga artikulo nga praktikal ug usahay una pa sa balita.” Ingong resulta, human sa 20 ka tuig sa kawalay-panaghiusa, si Barry ug Vera malipayon nga nahiusa sa pag-alagad kang Jehova.
20. Unsang tabang ang mahatag sa mga ansiano sa Kristohanong mga bana diha sa nabahin sa relihiyon nga mga panimalay?
20 Ang magtutuo nga bana makaatubang ug dakong mga kalisdanan kon supak ang iyang asawa sa matuod nga Kristiyanidad ug impluwensiyahan ang iyang mga anak nga mobatok kaniya. Pakitaig kaikag ang maong tawo, mahimong hisgotan sa mga ansiano ang makatabang nga mga prinsipyo sa Bibliya. Pananglitan, mahimong ipunting nga bisan pa sa pagsupak sa iyang asawa, siya mao ang ulo sa panimalay ug angay hatagan niya ang iyang mga anak ug Kasulatanhong pagtudlo. (Efeso 6:4) Mahimong dasigon siya sa pagpuyo uban sa iyang asawa “sumala sa kahibalo,” magpakitag kaikag sa iyang ginahimo ug tabangan siya sa mga buluhaton sa panimalay ug sa pag-atiman sa mga anak. (1 Pedro 3:7) Labaw sa tanan, ang magtutuong bana ug amahan angay dasigon sa paghimo sa mga linya sa komunikasyon nga bukas aron siya mahibalo kon unsay anaa sa kasingkasing sa matag usa sa iyang pamilya. Ang mga ansiano mahimo usab nga modasig kaniya sa padayon sa pagsulay sa pagtabang sa iyang asawa pinaagi sa mga pulong nga “tinimplahan ug asin,” mataktikanhon nga ipahayag ang kamatuoran sa Kasulatan diha kaniya sa nahiangay nga panahon.—Colosas 4:6.
21. Sa unsang paagi ang dili-magtutuong asawa matabangan sa pagpakitag interes sa kamatuoran?
21 Ang pagpakitag kaikag sa mga paryenti sa Kristohanon diha sa nabahin sa relihiyon nga mga panimalay usahay makapukaw ug pagsanong sa mensahe sa Gingharian. Sa pag-ilustrar: Ang usa ka Kristohanong lalaki nawad-ag paglaom tungod kay daghang tuig nga gisupak kaayo siya sa iyang asawa. Usa ka ansiano mitanyag sa pagduaw ug sa pagtabang sa panaghisgot sa Bibliya. Sa dihang miabot sa balay, malipayong gipangomosta sa ansiano ang asawa ug nangutana: “Gusto ka bang molingkod uban kanamo?” Kadto nga mahigalaon nga pagdapit nakadayeg kaayo sa babaye nga siya malipayong miduyog sa panaghisgot. Wala magdugay siya midawat sa kamatuoran ug misugod sa pagsangyaw sa uban.
22. Nganong magmaikagon sa usa ug usa?
22 Nan, ingong mga Saksi ni Jehova, atong ‘buhaton ang tanan alang sa maayong balita.’ (1 Corinto 9:23) Sa pagkamatuod, “sa mabatonan ta ang kahigayonan, buhaton ta ang maayo ngadto sa tanang mga tawo, ilabina kanila nga mga sakop sa panimalay sa pagtuo.” (Galacia 6:10) Hinaot nga magmaikagon kita sa usa ug usa aron ang gugma molambo diha sa atong tibuok-kalibotan nga panag-igsoonay.
Unsay Imong Pagtubag?
◻ Ngano, ilabina, nga magmaikagon kita sa uban?
◻ Sa unsang paagi atong maugmad ang kaikag sa kaubang mga magtutuo?
◻ Sa unsang paagi ikapakita sa mga ansiano ang pagkamabination?
◻ Unsay mahimong mosangpot gikan sa atong pagpakitag kaikag sa mga dili-magtutuo?
[Hulagway sa panid 16, 17]
Samtang ang matag usa ka hiramenta gidesinyo sa pagbuhat ug usa ka trabaho, ang tanan diha sa Kristohanong kongregasyon makagamit sa hinatag sa Diyos nga mga katakos sa pagpauswag sa buluhaton sa Diyos
Aron mapalambo ang Kristohanong panaghiusa, pagpakitag kaikag sa uban
[Hulagway sa panid 18]
Si Pablo nagbilin sa mga ansiano ug maayong panig-ingnan kon unsaon sa pagpakitag mahigugmaong kabalaka sa isigkamagtutuo