Unsay Ihatag ni Jehova Aron Matuman Nato ang Iyang Kabubut-on?

 1. Unsay mahimo ni Jehova aron matuman ang iyang kabubut-on?

SI Jehova mahimong bisan unsa nga gikinahanglan sa pagtuman sa iyang katuyoan. Pananglitan, si Jehova nahimong Magtutudlo, Maghuhupay, ug Ebanghelisador, sa paghisgot lag pipila sa iyang mga papel. (Isa. 48:17; 2 Cor. 7:6; Gal. 3:8) Pero sagad, mogamit siyag mga tawo sa pagtuman sa iyang mga katuyoan. (Mat. 24:14; 28:19, 20; 2 Cor. 1:3, 4) Si Jehova makahatag sab kang bisan kinsa kanato sa kaalam ug kusog nga atong gikinahanglan aron mahimo tang bisan unsa nga gikinahanglan sa pagtuman sa iyang kabubut-on. Kining tanan apil sa kahulogan sa ngalan ni Jehova, sumala sa gisugyot sa ubay-ubayng mga eskolar.

 2. (a) Nganong magduhaduha ta usahay kon gigamit ba ta ni Jehova? (b) Unsay atong hisgotan niining artikuloha?

² Gusto natong tanan nga mahimong mapuslanon kang Jehova, pero ang uban nagduhaduha kon gigamit ba sila ni Jehova. Ngano? Tungod kay gibati nila nga nalimitahan sila sa ilang edad, sirkumstansiya, o katakos. Sa laing bahin, ang uban tingali kontento na sa ilang ginahimo ug mibati nga dili na sila kinahanglang mohimog labaw pa. Niining artikuloha, hisgotan nato kon unsaon ta pagtabang ni Jehova aron atong matuman ang iyang katuyoan. Dayon, hisgotan nato ang mga asoy sa Bibliya kon giunsa paghatag ni Jehova sa iyang mga alagad​—mga lalaki ug babaye—​ang tinguha ug kusog nga mobuhat sa iyang gusto. Ato pong hisgotan kon sa unsang paagi tugotan nato si Jehova sa paggamit kanato para sa iyang katuyoan.

 3. Sa unsang paagi hatagan ta ni Jehova sa tinguha nga mobuhat sa iyang gusto, ingon sa iyang gisaad sa Filipos 2:13?

³ Basaha ang Filipos 2:13.b Si Jehova makahatag nato sa tinguha nga mobuhat sa iyang gusto. Unsaon niya kana paghimo? Tingali nakadungog ta nga may panginahanglan diha sa atong kongregasyon. O tingali ang mga ansiyano nagbasag sulat gikan sa sangang buhatan nga nagpahibalo kanato bahin sa panginahanglan diha sa teritoryo sa ubang kongregasyon. Tungod niana, basin mangutana ta sa atong kaugalingon, ‘Unsa kahay akong mahimo aron makatabang?’ O tingali gihatagan tag lisod nga asaynment, ug naghunahuna ta kon mahimo ba nato kini. O human makabasag pipila ka teksto sa Bibliya, tingali namalandong ta, ‘Unsaon nako paggamit kining tekstoha sa pagtabang sa uban?’ Dili ta pugson ni Jehova sa pagbuhat ug bisan unsa. Pero dihang makita ni Jehova nga namalandong ta kon unsay atong mahimo, hatagan ta niya sa tinguha nga buhaton ang atong gihunahuna.

 4. Sa unsang paagi hatagan ta ni Jehova sa kusog aron atong mabuhat ang iyang gusto?

⁴ Si Jehova makahatag sab nato sa kusog aron atong mabuhat ang iyang gusto. (Isa. 40:29) Pinaagi sa iyang balaang espiritu, iyang mapauswag ang atong natural nga mga katakos. (Ex. 35:30-35) Pinaagi sa iyang organisasyon, tudloan ta ni Jehova kon unsaon paghimo ang pipila ka buluhaton. Kon dili ka segurado unsaon pagtuman ang imong asaynment, pangayog tabang. Puwede nimong pangayoon sa atong mahinatagong langitnong Amahan ang “gahom nga labaw sa kasarangan.” (2 Cor. 4:7; Luc. 11:13) Ang Bibliya dunay daghang pananglitan kon sa unsang paagi gitabangan ni Jehova ang iyang mga alagad​—lalaki man o babaye—​pinaagi sa paghatag kanila sa tinguha ug kusog nga buhaton ang iyang gusto. Samtang hisgotan nato ang pipila niini nga mga asoy, hunahunaa ang mga paagi nga puwede kang gamiton ni Jehova sa paghimo sa mga butang nga ilang nahimo.

 5. Unsay atong makat-onan maylabot sa kon sa unsang paagi ug kon kanus-a gigamit ni Jehova si Moises sa pagluwas sa Iyang katawhan?

⁵ Gihimo ni Jehova si Moises nga manluluwas sa mga Israelinhon. Pero kanus-a siya gigamit ni Jehova nianang paagiha? Niadto bang gibati ni Moises nga kuwalipikado siya kay “natudloan [siya] sa tanang kaalam sa mga Ehiptohanon”? (Buh. 7:22-25) Dili. Ayha pa gigamit ni Jehova si Moises human niya kini tabangi nga mahimong mapaubsanon ug lumo nga tawo. (Buh. 7:30, 34-36) Gihatagan ni Jehova si Moises ug kaisog sa pag-atubang sa labing gamhanang magmamando sa Ehipto. (Ex. 9:13-19) Unsay atong makat-onan maylabot sa kon sa unsang paagi ug kon kanus-a gigamit ni Jehova si Moises? Si Jehova naggamit niadtong naningkamot sa pagsundog sa iyang mga hiyas ug nagsalig niya alang sa kusog.​—Filip. 4:13.

 6. Unsay atong makat-onan sa paagi nga gigamit ni Jehova si Barzilai sa pagtabang kang Haring David?

⁶ Gatosan ka tuig sa ulahi, gigamit ni Jehova si Barzilai sa pagtabang kang Haring David. Si David ug ang iyang mga tawo “gigutom ug gikapoy ug giuhaw” samtang nangalagiw gikan kang Absalom nga iyang anak. Si Barzilai, nga tigulang na nianang panahona, nagpameligro sa iyang kinabuhi kauban ang ubang tawo aron matabangan si David ug ang mga kauban niini. Wala maghunahuna si Barzilai nga kay tigulang na siya, dili na siya mapuslanon kang Jehova. Iya hinuong gigamit kon unsay naa niya aron matabangan ang mga alagad sa Diyos nga nanginahanglan. (2 Sam. 17:27-29) Unsay atong makat-onan niana? Bisan unsa pay atong edad, puwede tang gamiton ni Jehova sa pagtabang sa atong mga igsoon nga nanginahanglan, sa ato mang lugar o sa laing nasod. (Prov. 3:27, 28; 19:17) Bisag dili ta personal nga makatabang nila, puwede tang mohatag ug donasyon sa worldwide work aron dunay magamit sa pagtabang sa atong mga igsoon nga nanginahanglan.​—2 Cor. 8:14, 15; 9:11.

 7. Sa unsang paagi gigamit ni Jehova si Simeon, ug nganong makapadasig nâ kanato?

⁷ Si Jehova nagsaad kang Simeon, usa ka maunongong tigulang sa Jerusalem, nga dili siya mamatay hangtod dili niya makita ang Kristo. Seguradong napalig-on pag-ayo si Simeon sa maong saad, kay dugay na siyang nagpaabot sa Mesiyas. Gipanalanginan siya tungod sa iyang pagtuo ug paglahutay. Usa ka adlaw niana, “ilalom sa paggiya sa espiritu,” siya misulod sa templo. Didto iyang nakita ang batang si Jesus, ug gigamit ni Jehova si Simeon aron magtagna bahin sa bata nga maoy mahimong Kristo. (Luc. 2:25-35) Bisag namatay si Simeon lagmit sa wala pa sugdi ni Jesus ang iyang ministeryo sa yuta, siya mapasalamaton sa maong pribilehiyo, ug sa umaabot siya makadawat pag daghang panalangin. Sa bag-ong kalibotan, makita niining matinumanong tawo kon sa unsang paagi ang pagmando ni Jesus magdalag panalangin sa tanang pamilya sa yuta. (Gen. 22:18) Mapasalamaton sab ta sa bisan unsang pribilehiyo nga ihatag ni Jehova kanato sa pag-alagad kaniya.

 8. Sa unsang paagi mahimo tang gamiton ni Jehova sama sa iyang paggamit kang Bernabe?

⁸ Sa unang siglo C.E., dihay usa ka mahinatagong tawo, si Jose, nga andam magpagamit kang Jehova. (Buh. 4:36, 37) Lagmit kay maayo siyang mohupay sa uban, ang mga apostoles nagtawag niyag Bernabe, nga nagkahulogang “Anak sa Paghupay.” Pananglitan, dihang si Saulo nahimong magtutuo, daghang igsoon ang nahadlok nga moduol niya tungod sa iyang paglutos kanhi sa mga kongregasyon. Pero, ang mabinationg si Bernabe mitabang kang Saulo, ug seguradong naapresyar pag-ayo ni Saulo ang iyang kaayo. (Buh. 9:21, 26-28) Sa ulahi, nakita sa mga ansiyano sa Jerusalem nga kinahanglang dasigon ang mga igsoon nga nagpuyo sa layo, didto sa Antioquia sa Sirya. Kinsay ilang gipadala? Si Bernabe! Sakto ang ilang pagpili kaniya. Ang Bibliya nag-ingon nga “gidasig [ni Bernabe] silang tanan nga padayong magmaunongon sa Ginoo uban ang determinadong kasingkasing.” (Buh. 11:22-24) Karon sab, puwede tang tabangan ni Jehova nga mahimong “anak sa paghupay” ngadto sa atong mga igsoon. Pananglitan, mahimong gamiton ta niya sa paghupay niadtong namatyag mga minahal. O tingali palihokon ta niya sa pagbisita o pagtawag niadtong nasakit o na-depress aron makahatag ug paghupay. Tugotan ba nimo si Jehova sa paggamit kanimo sama sa iyang paggamit kang Bernabe?​—1 Tes. 5:14.

 9. Unsay atong makat-onan sa paagi nga gitabangan ni Jehova si Vasily aron mahimong kuwalipikadong espirituwal nga magbalantay?

⁹ Si Jehova nagtabang sa usa ka brader nga si Vasily aron mahimong kuwalipikadong espirituwal nga magbalantay. Dihang si Vasily nahimong ansiyano sa edad nga 26, nahadlok siya nga basig dili siya kuwalipikadong motabang sa kongregasyon sa espirituwal nga paagi, ilabina niadtong nakasinatig kalisdanan. Pero, nakadawat siyag mapuslanong pagbansay gikan sa eksperyensiyadong mga ansiyano ug sa Kingdom Ministry School. Naningkamot siya pag-ayo nga mouswag. Pananglitan, naghimo siyag listahan sa iyang gagmayng tumong. Samtang nakab-ot niya ang matag usa niana, anam-anam nga nawala ang iyang kahadlok. Karon siya miingon: “Ang nakapahadlok nako kaniadto nakapalipay na nako karon. Dihang tabangan ko ni Jehova nga makakitag haom nga teksto sa paghupay sa usa ka brader o sister sa kongregasyon, malipay kaayo ko.” Mga brader, kon sama kang Vasily, andam mong magpagamit kang Jehova, tabangan mo niya aron inyong maabaga ang mas dakong responsibilidad diha sa kongregasyon.

10. Unsay gihimo ni Abigail, ug unsay imong makat-onan kaniya?

¹⁰ Si David ug kadtong maunongon kaniya gigukod ni Haring Saul, ug nanginahanglan silag tabang. Ang mga tawo ni David nangayog diyutayng pagkaon gikan sa datong Israelinhon nga si Nabal. Gibati nila nga puwede ra silang mangayo kay ilang gipanalipdan ang kahayopan ni Nabal didto sa kamingawan. Pero ang hakog nga si Nabal wala mohatag nilag bisan unsa. Nasuko pag-ayo si David ug gusto niyang patyon si Nabal ug ang tanang lalaki sa iyang panimalay. (1 Sam. 25:3-13, 22) Pero ang guwapang asawa ni Nabal nga si Abigail maalamon. Si Abigail maisogong miluhod sa tiilan ni David ug mihangyo kaniya nga dili manimalos aron dili siya mahimong sad-an sa dugo. Malumo niyang gisugyotan si David nga isalig kang Jehova ang tanan. Ang mapainubsanong mga pulong ni Abigail ug ang iyang pagkamaalamon nakatandog sa kasingkasing ni David. Naamgohan ni David nga si Jehova ang nagpadala kang Abigail. (1 Sam. 25:23-28, 32-34) Naugmad ni Abigail ang mga hiyas nga nakapahimo niyang mapuslanon kang Jehova. Sa susama, ang mga sister nga nakaugmad ug kalumo ug kaalam puwedeng gamiton ni Jehova sa pagpalig-on sa ilang pamilya ug sa uban diha sa kongregasyon.​—Prov. 24:3; Tito 2:3-5.

11. Unsay gihimo sa mga anak nga babaye ni Salum, ug kinsa karon ang nagsundog kanila?

¹¹ Gatosan ka tuig sa ulahi, ang mga anak nga babaye ni Salum apil niadtong gigamit ni Jehova sa pagtukod pag-usab sa paril sa Jerusalem. (Neh. 2:20; 3:12) Bisag prinsipe ang ilang amahan, andam silang mobuhat nianang lisod ug peligrosong trabaho. (Neh. 4:15-18) Lahi ra gyod sila sa prominenteng mga tawo sa Tekoa, nga “wala magpaubos ug wala motabang” sa buluhaton! (Neh. 3:5) Hunahunaa lang ang kalipay sa mga anak ni Salum dihang nahuman ang proyekto sulod lang sa 52 ka adlaw! (Neh. 6:15) Karon sab, may mga sister nga andam ug malipay nga motabang diha sa linaing klase sa sagradong pag-alagad​—ang pagtukod ug pagmentinar sa mga bilding nga gipahinungod kang Jehova. Ang ilang kahanas, kadasig, ug pagkamaunongon importante aron magmalamposon kining buluhatona.

12. Sa unsang paagi mahimo tang gamiton ni Jehova sama sa iyang paggamit kang Tabitha?

¹² Si Jehova nagpalihok kang Tabitha sa paghimog daghang “maayong buhat ug gasa sa kaluoy,” ilabina para sa mga babayeng balo. (Buh. 9:36) Tungod sa iyang talagsaong pagkamahinatagon ug pagkamaayo, daghan ang nanghilak dihang siya namatay. Pero nalipay kaayo sila dihang gibanhaw siya ni apostol Pedro. (Buh. 9:39-41) Unsay atong makat-onan kang Tabitha? Kita man bata o tigulang, lalaki o babaye, makahatag ta ug praktikal nga tabang sa atong mga igsoon.​—Heb. 13:16.

13. Sa unsang paagi gigamit ni Jehova ang maulawong sister nga si Ruth, ug unsay iyang giingon?

¹³ Ang usa ka maulawong sister nga si Ruth gustong magmisyonarya. Sa bata pa siya, magdalidali siya sa paghatag ug mga tract samtang mamalaybalay. “Ganahan kaayo ko ani nga buluhaton,” siya miingon. Pero lisod kaayo para niya ang pagpakig-estorya sa mga tawo bahin sa Gingharian sa Diyos. Bisag maulawon, si Ruth nagregular payunir pag-edad niyag 18. Niadtong 1946, mieskuwela siya sa Watchtower Bible School of Gilead ug sa ulahi naasayn sa Hawaii ug Japan. Gigamit siya ni Jehova sa talagsaong paagi sa pagpakaylap sa maayong balita sa maong mga nasod. Paglabayg mga 80 ka tuig nga pagpakigbahin sa ministeryo, si Ruth miingon: “Kanunay kong gipalig-on ni Jehova. Gitabangan ko niya nga mawala ang akong pagkamaulawon. Puwede gyong gamiton ni Jehova si bisan kinsa nga mosalig kaniya.”

14. Sumala sa Colosas 1:29, unsay angay natong buhaton aron gamiton ta ni Jehova?

¹⁴ Latas sa kasaysayan, gigamit ni Jehova ang iyang mga alagad sa lainlaing paagi. Sa unsang paagi gamiton ka ni Jehova? Nagdepende gyod kana kon unsa ka ka andam nga maghago. (Basaha ang Colosas 1:29.) Kon andam kang magpagamit, puwede kang himoon ni Jehova nga madasigong ebanghelisador, epektibong magtutudlo, maayong maghuhupay, hanas nga magbubuhat, matinabangong higala, o bisan unsa nga iyang gikinahanglan sa pagtuman sa iyang kabubut-on.

15. Sumala sa 1 Timoteo 4:12, 15, unsang tabang ang angayng pangayoon sa batan-ong mga brader kang Jehova?

¹⁵ Komosta kamong batan-ong mga brader nga hapit nang mohamtong? Gikinahanglan kaayo ang lagsik nga mga brader nga motabang sa kongregasyon ingong ministeryal nga mga alagad. Sa daghang kongregasyon, mas daghan ang mga ansiyano kay sa mga ministeryal. Puwede ba ninyong ugmaron ang tinguha nga moabagag dugang nga responsibilidad sa kongregasyon? Usahay may mga brader nga moingon, “Kontento na kong mag-alagad ingong regular nga magmamantala.” Kon kanay inyong gibati, hangyoa si Jehova nga tabangan mong maugmad ang tinguha nga mokuwalipikar ingong ministeryal nga alagad ug hatagan mog kusog sa paghimo sa tanan ninyong maarangan sa pag-alagad kaniya. (Eccl. 12:1) Gikinahanglan namo ang inyong tabang!​—Basaha ang 1 Timoteo 4:12, 15.

16. Unsay angay natong pangayoon kang Jehova, ug ngano?

¹⁶ Puwede kang himoon ni Jehova nga bisan unsa nga iyang gikinahanglan sa pagtuman sa iyang kabubut-on. Busa hangyoa siya nga hatagan ka sa tinguha nga himoon ang iyang buluhaton, ug hangyoa sab siya nga hatagan ka sa kusog nga imong gikinahanglan. Bata ka man o tigulang, gamita ang imong panahon, kusog, ug mga nabatonan sa pagpasidungog kang Jehova karon. (Eccl. 9:10) Ayaw tugoti nga tungod sa kahadlok o pagbating dili takos, palabyon nimo ang bililhong mga kahigayonan sa paghimo sa tanan nimong maarangan sa pag-alagad kang Jehova. Pribilehiyo kaayo natong tanan nga makahimo sa bisan unsa nga atong maarangan, bisag gamay ra, sa paghatag sa atong mahigugmaong Amahan sa pasidungog nga angay kaniya!