Mga Kaayohan sa Paghigugma sa Pulong sa Diyos
“Higugmaa [ang kaalam], ug kini manalipod kanimo. . . . Kini maghimaya kanimo tungod kay ikaw misagop niini.”—PROVERBIO 4:6, 8.
1. Unsay nalangkit sa tinuod nga paghigugma sa Pulong sa Diyos?
ANG pagbasa sa Bibliya hinungdanon alang sa usa ka Kristohanon. Apan, ang pagbasa lamang niana dili magpasundayag mismo ug gugma sa Pulong sa Diyos. Komosta kon dunay tawo nga mobasa sa Bibliya apan nagbuhat sa mga butang nga gisaway sa Bibliya? Dayag, wala siya mahigugma sa Pulong sa Diyos sa paagi nga gihigugma kini sa magsusulat sa Salmo 119. Ang paghigugma sa Pulong sa Diyos mitultol kaniya sa pagkinabuhi nga kaharmonya sa mga kinahanglanon niini.—Salmo 119:97, 101, 105.
2. Unsang mga kaayohan ang madawat gikan sa kaalam nga pinasikad sa Pulong sa Diyos?
2 Ang pagkinabuhi nga kaharmonya sa Pulong sa Diyos nagkinahanglan ug kanunayng pagpasibo sa hunahuna ug paagi sa pagkinabuhi sa usa ka tawo. Ang maong dalan nagbanaag ug diyosnong kaalam, nga nagkahulogan nga mohimog praktikal nga kapadapatan sa kahibalo ug pagsabot nga nabatonan gumikan sa pagtuon sa Bibliya. “Higugmaa [ang kaalam], ug kini manalipod kanimo. Pabilhi kini pag-ayo, ug kini magbayaw kanimo. Kini maghimaya kanimo tungod kay ikaw misagop niini. Sa imong ulo kini maghatag ug madanihong purongpurong; kini maghatag kanimo ug usa ka purongpurong nga matahom.” (Proverbio 4:6, 8, 9) Pagkadakong pagdasig nga ugmaron ang gugma sa Pulong sa Diyos ug magpagiya niana! Kinsay dili gustong panalipdan, bayawon, ug himayaon?
Gipanalipdan Gikan sa Dumalayong Kadaot
3. Labaw pa kay sukad masukad, nganong kinahanglang panalipdan ang mga Kristohanon, ug gikan kang kinsa?
3 Sa unsang paagi ang usa ka tawo mapanalipdan sa kaalam nga nabatonan gikan sa pagtuon ug pagpadapat sa Pulong sa Diyos? Ang usa ka paagi, siya mapanalipdan gikan kang Satanas nga Yawa. Gitudloan ni Jesus ang iyang mga sumusunod nga mag-ampo nga luwason gikan sa usa nga daotan, si Satanas. (Mateo 6:13) Karong adlawa, dako kaayo ang panginahanglan nga ilakip kining maong hangyo sa atong mga pag-ampo. Si Satanas ug ang iyang mga demonyo gitambog gikan sa langit human sa 1914, ug busa si Satanas dunay “dakong kasuko, kay nahibalo nga siya may mubo nga yugto sa panahon.” (Pinadayag 12:9, 10, 12) Niining kaulahiang panahon, hilabihan gayod ang iyang kasuko sanglit wala siya molampos sa pagpakiggubat niadtong “nagasunod sa sugo sa Diyos ug may buluhaton sa pagpanaksi bahin kang Jesus.”—Pinadayag 12:17.
4. Sa unsang paagi napanalipdan ang mga Kristohanon gikan sa mga pagpit-os ug mga lit-ag ni Satanas?
4 Tungod sa iyang kasuko si Satanas nagpadayon sa pagpatunghag kasamok alang niining Kristohanong mga ministro ug sa pagpaluyo sa mapintas nga paglutos o pagpahinabog ubang mga babag sa ilang kalihokan. Buot usab niyang hayloon ang mga magwawali sa Gingharian sa pagtunong sa pagtagad sa mga butang sama sa pagkainila sa kalibotan, gugma sa kalingawan, pagbaton ug materyal nga mga kabtangan, ug pagpangagpas sa kalipayan, inay kay sa buluhatong pagsangyaw sa Gingharian. Unsay manalipod sa matinumanong mga alagad sa Diyos aron dili madala sa pagpit-os ni Satanas o mabitik sa iyang mga lit-ag? Siyempre, ang pag-ampo, suod nga personal nga relasyon uban kang Jehova, ug pagtuo nga seguradong matuman ang iyang mga saad maoy hinungdanon. Apan kining tanan nalangkit sa kahibalo ug determinasyon sa pagpatalinghog sa mga pahinumdom sa Pulong sa Diyos. Kining maong mga pahinumdom madawat pinaagi sa pagbasa sa Bibliya ug mga giya sa pagtuon sa Bibliya, pagtambong sa Kristohanong mga tigom, pagpatalinghog sa tambag sa Kasulatan gikan sa isigkamagtutuo, o pinaagi lamang sa mainampoong pagpamalandong sa mga prinsipyo sa Bibliya nga ipahinumdom sa espiritu sa Diyos.—Isaias 30:21; Juan 14:26; 1 Juan 2:15-17.
5. Sa unsang mga paagi ang kaalam nga gipasukad sa Pulong sa Diyos manalipod kanato?
5 Kadtong nahigugma sa Pulong sa Diyos gipanalipdan sa ubang mga paagi. Pananglitan, malikayan nila ang kaguol ug mga sakit nga moresulta sa mga buhat sama sa pag-abuso sa droga, pagtabako, ug seksuwal nga imoralidad. (1 Corinto 5:11; 2 Corinto 7:1) Dili sila modaot sa mga relasyon pinaagi sa pagtabi o sa dili-malulotong pinulongan. (Efeso 4:31) Ni sila mahulog sa pagduhaduha pinaagi sa pag-usisa sa malimbongong mga pilosopiya sa kaalam sa kalibotan. (1 Corinto 3:19) Pinaagi sa paghigugma sa Pulong sa Diyos, sila napanalipdan gikan sa mga butang nga maghikaw kanila sa ilang relasyon uban sa Diyos ug sa paglaom sa walay-kataposang kinabuhi. Sila puliki sa pagtabang sa ilang mga silingan nga mosalig sa kahibulongang mga saad nga anaa sa Bibliya, nga nahibalo nga sa ingon ilang ‘maluwas ang ilang kaugalingon ug kadtong mamati kanila.’—1 Timoteo 4:16.
6. Sa unsang paagi ang kaalam nga gipasukad sa Pulong sa Diyos manalipod kanato bisan ilalom sa malisod nga mga kahimtang?
6 Tinuod, ang tanan—bisan kadtong nahigugma sa Pulong sa Diyos—nailalom sa “panahon ug wala-damhang hitabo.” (Ecclesiastes 9:11) Dili kalikayan nga ang pipila kanato mahiagom sa kinaiyanhong mga katalagman, grabeng mga sakit, mga aksidente, o ahat nga kamatayon. Sa gihapon, kita gipanalipdan. Walay kalamidad nga magpahinabog dumalayong kadaot sa usa ka tawo nga tinuod nga nahigugma sa Pulong sa Diyos. Busa, dili kita angayng mabalaka pag-ayo kon unsa tingaliy mahitabo sa umaabot. Human nato himoa ang tanang makataronganong mga panagana, mas maayong itugyan ang mga butang sa mga kamot ni Jehova ug dili tugotan ang kawalay-kasegurohan karon sa kinabuhi nga mohikaw kanato sa kalinaw. (Mateo 6:33, 34; Filipos 4:6, 7) Hinumdomi nga seguradong matuman ang paglaom sa pagkabanhaw ug ang mas maayong kinabuhi sa dihang ang Diyos ‘magbag-o sa tanang butang.’—Pinadayag 21:5; Juan 11:25.
Pamatud-i ang Imong Kaugalingon nga “Maayong Yuta”
7. Unsang ilustrasyon ang giasoy ni Jesus sa mga panon nga namati kaniya?
7 Ang kahinungdanon sa pagbaton ug hustong panglantaw sa Pulong sa Diyos gipasiugda diha sa usa sa mga sambingay ni Jesus. Samtang giwali ni Jesus ang maayong balita sa tibuok Palestina, ang mga panon nagtigom sa pagpamati kaniya. (Lucas 8:1, 4) Apan, dili tanan ang nahigugma gayod sa Pulong sa Diyos. Sa walay duhaduha, daghan ang namati kaniya tungod kay buot nilang makakita ug mga milagro o tungod kay malingaw sila sa iyang kahibulongang paagi sa pagpanudlo. Busa, giasoy ni Jesus sa panon ang usa ka ilustrasyon: “Usa ka magpupugas miadto sa pagpugas sa iyang binhi. Buweno, sa nagpugas siya, ang pipila niini nahulog sa daplin sa dalan ug nayatakyatakan, ug ang mga langgam sa langit mituka niini. Ang pipila nahitugpa sa dakong-bato, ug, human sa paggitib, kini nalaya tungod kay walay kaumog. Ang pipila nahulog taliwala sa mga sampinit, ug ang mga sampinit nga mitubo uban niini nagtuok niini. Ang pipila nahulog diha sa maayong yuta, ug, human sa paggitib, kini mipatunghag bunga nga usa ka gatos ka pilo.”—Lucas 8:5-8.
8. Sa ilustrasyon ni Jesus, unsa ang binhi?
8 Ang sambingay ni Jesus nagpakita nga dunay lainlaing pagsanong sa pagsangyaw sa maayong balita, depende sa kahimtang sa kasingkasing sa naminaw. Ang binhi nga gipugas mao “ang pulong sa Diyos.” (Lucas 8:11) O, sumala sa giingon sa laing asoy sa sambingay, ang binhi mao ang “pulong sa gingharian.” (Mateo 13:19) Mahimong gamiton ni Jesus ang bisan hain nianang mga pulonga, sanglit ang tema sa Pulong sa Diyos mao ang langitnong Gingharian ilalom ni Jesu-Kristo ingong Hari nga pinaagi niana bayawon ni Jehova ang iyang pagkasoberano ug balaanon ang iyang ngalan. (Mateo 6:9, 10) Nan, sa pagkatinuod ang binhi mao ang mensahe sa maayong balita sa Pulong sa Diyos, ang Bibliya. Ang mga Saksi ni Jehova nagpasiugda niining mensahe sa Gingharian samtang nagpugas sila ug binhi sa pagsundog sa orihinal nga Magpupugas, si Jesu-Kristo. Unsang pagsanong ang ilang nakaplagan?
9. Unsay gihulagwayan sa binhi nga nahulog (a) sa daplin sa dalan? (b) sa dakong bato? (c) sa tunokon nga yuta?
9 Si Jesus miingon nga ang ubang mga binhi nahulog sa daplin sa dalan ug gitamaktamakan. Nagtumong kini sa mga tawong puliki kaayo nga dili makagamot ang binhi sa Gingharian diha sa ilang kasingkasing. Una pa sila makaugmad ug gugma sa Pulong sa Diyos, “ang Yawa miabot ug nagkuha sa pulong gikan sa ilang mga kasingkasing aron nga sila dili managpanuo ug mamaluwas.” (Lucas 8:12) Ang ubang binhi nahulog sa dakong bato. Nagtumong kini sa mga tawo nga nadani sa mensahe sa Bibliya apan wala magtugot niana nga moapektar sa ilang kasingkasing. Sa dihang motungha ang pagsupak o sa dihang malisdan sila sa pagpadapat sa tambag sa Bibliya, ‘sila mahulog’ tungod kay wala sila makagamot. (Lucas 8:13) Unya anaa kadtong nakadungog sa pulong apan nadaog sa “mga kabalaka ug mga bahandi ug mga kalipayan niining kinabuhia.” Ngadtongadto, samag mga tanom nga gilikosan sa mga tunok, ‘sila bug-os nga matuok.’—Lucas 8:14.
10, 11. (a) Kinsa ang gihulagwayan sa maayong yuta? (b) Unsay angay natong buhaton aron ‘mahuptan’ sa atong kasingkasing ang Pulong sa Diyos?
10 Sa kataposan, dunay binhi nga nahulog sa maayong yuta. Nagtumong kini sa mga tawo nga midawat sa mensahe “uban ang maanindot ug maayong kasingkasing.” Siyempre, ang matag usa kanato buot motuo nga naapil siya niining kategoriyaha. Apan, sa kataposang pag-usisa ang panglantaw sa Diyos mao ang hinungdanon. (Proverbio 17:3; 1 Corinto 4:4, 5) Ang iyang Pulong nag-ingon nga ang pagkabaton nato ug “maanindot ug maayong kasingkasing” kinahanglan natong pamatud-an sa atong mga lihok sukad karon hangtod sa atong kamatayon o hangtod nga taposon sa Diyos kining daotang sistema sa mga butang. Kon positibo ang atong pagsanong sa sinugdanan sa mensahe sa Gingharian, maayo kana. Apan, kadtong dunay maanindot ug maayong kasingkasing modawat sa Pulong sa Diyos ug ‘maghupot niini ug mamunga nga may paglahutay.’—Lucas 8:15.
11 Ang bugtong seguradong paagi nga mahuptan ang Pulong sa Diyos diha sa atong kasingkasing mao ang pagbasa ug pagtuon niana sa pribado ug samtang nakig-uban sa atong mga isigkamagtutuo. Naglakip kini sa pagpahimulos pag-ayo sa espirituwal nga pagkaon nga gitagana pinaagi sa kanal-galamiton nga gitudlo sa pag-atiman sa espirituwal nga mga intereses sa tinuod nga mga sumusunod ni Jesus. (Mateo 24:45-47) Pinaagi niana, kadtong maghupot sa Pulong sa Diyos diha sa ilang kasingkasing itukmod sa gugma sa ‘pagpamunga nga may paglahutay.’
12. Unsa ang bunga nga kinahanglang atong ipatungha uban ang paglahutay?
12 Unsang bunga ang ipatungha sa maayong yuta? Sa kinaiyahan, ang mga binhi mahimong mga tanom nga mamunga nga nasudlan sa mao gihapong matanga sa binhi, nga mahimong isabwag aron makapamunga pa. Sa susama, alang niadtong dunay maanindot ug maayo nga kasingkasing, ang binhi sa pulong motubo diha kanila, nga magpahinabo kanila sa pag-uswag sa espirituwal hangtod sila, sa ilang turno, makapugas sa binhi diha sa kasingkasing sa uban. (Mateo 28:19, 20) Ug ang ilang buluhaton nga pagpamugas dinuyogan sa paglahutay. Gipakita ni Jesus ang kahinungdanon sa paglahutay diha sa pagpamugas sa dihang miingon siya: “Siya nga nakalahutay hangtod sa kataposan mao ang maluwas. Ug kining maayong balita sa gingharian igawali sa tibuok gipuy-ang yuta ingong usa ka pagsaksi ngadto sa tanang kanasoran; ug unya moabot ang kataposan.”—Mateo 24:13, 14.
“Magapamunga sa Tanang Maayong Buhat”
13. Unsang pag-ampo ang gilitok ni Pablo nga naglangkit sa mga bunga sa kahibalo sa Pulong sa Diyos?
13 Si apostol Pablo usab naghisgot bahin sa panginahanglan nga mamunga, ug iyang gilangkit ang pagpamunga sa Pulong sa Diyos. Siya nag-ampo nga ang iyang mga isigkamagtutuo “unta mapuno sa tukmang kahibalo sa . . . kabubut-on [sa Diyos] diha sa tanang kaalam ug espirituwal nga panabot, aron magalakaw nga takos kang Jehova sa katuyoan nga makapahimuot kaniya sa bug-os samtang padayon kamong magapamunga sa tanang maayong buhat.”—Colosas 1:9, 10; Filipos 1:9-11.
14-16. Kaharmonya sa pag-ampo ni Pablo, unsang mga bunga ang gipatungha niadtong nahigugma sa Pulong sa Diyos?
14 Busa gipakita ni Pablo nga ang pagbaton ug kahibalo sa Bibliya dili mao lamang ang tumong. Hinunoa, ang gugma alang sa Pulong sa Diyos magtukmod kanato nga “magalakaw nga takos kang Jehova” pinaagi sa pagpadayon sa ‘pagpamunga sa tanang maayong buhat.’ Unsang maayong buhat? Ang pagsangyaw sa maayong balita sa Gingharian mao ang talagsaong asaynment alang sa mga Kristohanon niining kataposang mga adlaw. (Marcos 13:10) Dugang pa, kadtong nahigugma sa Pulong sa Diyos naghimo sa labing maayo sa paghatag ug makanunayong pinansiyal nga suportar niining buluhatona. Malipay sila niining pribilehiyoa, nga nahibalo nga “gihigugma sa Diyos ang usa ka masayahong maghahatag.” (2 Corinto 9:7) Ang ilang mga amot ibayad sa galastohan sa pagpalihok sa kapin sa usa ka gatos ka pasilidad sa Bethel nga maoy nagtultol sa kalihokan sa pagsangyaw sa Gingharian ug ang pipila nagpatik ug mga Bibliya ug mga literatura sa Bibliya. Ang ilang mga amot motabang usab sa pagbayad sa galastohan sa dagkong Kristohanong mga kombensiyon ug sa pagpadala ug nagapanawng mga magtatan-aw, misyonaryo, ug ubang bug-os-panahong mga ebanghelisador.
15 Ang ubang maayong mga buhat naglakip sa pagtukod ug pag-atiman sa mga sentro alang sa matuod nga pagsimba. Ang gugma alang sa Pulong sa Diyos magpalihok sa iyang mga magsisimba sa pagseguro nga ang mga Assembly Hall ug mga Kingdom Hall dili mapasagdan. (Itandi ang Nehemias 10:39.) Sanglit ang ngalan sa Diyos makita sa atubangan sa maong mga tinukod, hinungdanon nga sa sulod ug gawas kini huptang hinlo ug maanindot ug ang panggawi niadtong nagasimba sa sulod sa maong mga tigomanan dili salawayon. (2 Corinto 6:3) Ang ubang mga Kristohanon makahimog labaw pa. Ang gugma alang sa Pulong sa Diyos magpalihok kanila sa pagbiyahe ngadto sa lagyong mga dapit aron makapakig-ambit sa pagtukod ug bag-ong mga dapit sa pagsimba sa mga bahin sa kalibotan diin dunay panginahanglan tungod sa kakabos o kakulang sa kahanas.—2 Corinto 8:14.
16 Ang ‘pagpamunga sa tanang maayong buhat’ naglakip usab sa pag-atiman sa mga obligasyon sa pamilya ug pagpakitag kaikag sa isigka-Kristohanon. Ang gugma alang sa Pulong sa Diyos magpalihok kanato nga mahimong sensitibo sa mga panginahanglan niadtong “iglabot nato sa pagtuo” ug “managgawi sa diyosnong pagkamahinalaron diha sa [atong] kaugalingong panimalay.” (Galacia 6:10; 1 Timoteo 5:4, 8) Bahin niini, maayong buluhaton nga duawon ang mga masakiton ug hupayon ang mga nagbangotan. Ug pagkamaayong buluhaton ang nalampos sa mga ansiyano sa kongregasyon ug sa mga Hospital Liaison Committee sa pag-abag sa mga tawo nga nag-atubang ug malisod nga medikal nga mga kahimtang! (Buhat 15:29) Unya anaa ang nagtubong gidaghanon sa mga katalagman—ang pipila niana kinaiyanhon ug ang uban gipahinabo sa kabuangan sa tawo. Sa tabang sa espiritu sa Diyos, ang mga Saksi ni Jehova nakabaton ug maayong rekord diha sa daghang dapit sa yuta sa pagtagana ug dinaliang hinabang ngadto sa mga isigkamagtutuo ug sa ubang mga biktima sa katalagman ug mga aksidente. Kining tanan maoy maayong mga bunga nga gipasundayag niadtong nahigugma sa Pulong sa Diyos.
Mahimayaong mga Kaayohan sa Umaabot
17, 18. (a) Unsay napalampos sa pagpugas sa binhi sa Gingharian? (b) Unsang makatay-og-sa-yuta nga mga hitabo ang masaksihan sa dili madugay sa mga mahigugmaon sa Pulong sa Diyos?
17 Ang pagpugas sa binhi sa Gingharian nagpadayon sa pagdala ug dagkong kaayohan sa katawhan. Sa di pa dugayng katuigan kapin sa 300,000 ka tawo matag tuig ang nagtugot nga mogamot ang mensahe sa Bibliya diha sa ilang kasingkasing hangtod nga ilang gipahinungod ang ilang kinabuhi ngadto kang Jehova ug gisimbolohan kini pinaagi sa pagpabawtismo sa tubig. Pagkamahimayaong palaaboton ang naghulat kanila!
18 Sa dili madugay, ang mga tawong nahigugma sa Pulong sa Diyos nahibalo nga si Jehova nga Diyos motindog aron sa pagbayaw sa iyang ngalan. Ang “Dakong Babilonya,” ang tibuok-kalibotang imperyo sa bakak nga relihiyon, pagalaglagon. (Pinadayag 18:2, 8) Unya, kadtong modumili sa pagkinabuhi nga kaharmonya sa Pulong sa Diyos pagapatyon sa Hari, si Jesu-Kristo. (Salmo 2:9-11; Daniel 2:44) Human niana, ang Gingharian sa Diyos magdala ug dumalayong kahupayan gikan sa krimen, gubat, ug ubang mga katalagman. Walay nay panginahanglan sa paghupay sa mga tawo tungod sa kasakit, balatian, ug kamatayon.—Pinadayag 21:3, 4.
19, 20. Unsang mahimayaong palaaboton ang gitagana alang niadtong tinuod nga nahigugma sa Pulong sa Diyos?
19 Pagkamahimayaong maayong mga buluhaton ang mapalampos niadtong nahigugma sa Pulong sa Diyos! Ang mga makalabang-buhi sa Armagedon magsugod sa makalipayng tahas sa paghimo niining yutaa nga usa ka paraiso. Mabatonan nila ang kulbahinam nga pribilehiyo sa pag-andam sa mga panginahanglan sa nangamatay nga mga tawo nga nagpahulay karon sa lubnganan ug anaa sa panumdoman sa Diyos uban ang paglaom nga malakip sa pagbanhaw sa mga patay. (Juan 5:28, 29) Nianang panahona, ang mga molupyo sa yuta hingpit nga tultolan sa Soberanong Ginoo, si Jehova, pinaagi sa iyang gibayaw nga Anak, si Jesu-Kristo. ‘Buksan ang basahong-linukot,’ nga magpadayag sa mga instruksiyon ni Jehova alang sa pagkinabuhi sa bag-ong kalibotan.—Pinadayag 20:12.
20 Sa gitakdang panahon ni Jehova, ang bug-os nga lawas sa matinumanong dinihogang mga Kristohanon bangonon ngadto sa ilang langitnong ganti ingong “kaubang mga manununod ni Kristo.” (Roma 8:17) Sulod sa Usa ka Libo ka Tuig nga Pagmando ni Kristo, ang tanang tawo sa yuta nga nahigugma sa Pulong sa Diyos pauswagon ngadto sa kahingpitan sa hunahuna ug lawas. Human makapamatuod nga matinumanon ilalom sa kataposang pagsulay, gantihan sila ug kinabuhing walay kataposan ug makatagamtam sa “mahimayaong kagawasan sa mga anak sa Diyos.” (Roma 8:21; Pinadayag 20:1-3, 7-10) Pagkakahibulongang panahon unya kana! Tinuod, naghatag man si Jehova kanato ug langitnon o yutan-ong paglaom, ang malahutayong gugma sa iyang Pulong ug ang determinasyon nga magkinabuhi sumala sa diyosnong kaalam manalipod kanato. Ug sa umaabot kini ‘maghimaya kanato tungod kay atong gisagop kini.’—Proverbio 4:6, 8.
Makapatin-aw Ka Ba?
◻ Sa unsang paagi ang gugma alang sa Pulong sa Diyos manalipod kanato?
◻ Unsa ang binhi sa ilustrasyon ni Jesus, ug sa unsang paagi kini napugas?
◻ Sa unsang paagi mapamatud-an natong kita maoy “maayong yuta”?
◻ Unsang mga kaayohan ang mapaabot sa mga mahigugmaon sa Pulong sa Diyos?
[Hulagway sa panid 16]
Ang binhi sa ilustrasyon ni Jesus naghulagway sa mensahe sa maayong balita nga anaa sa Pulong sa Diyos
[Credit Line]
Garo Nalbandian
[Hulagway sa panid 17]
Ang mga Saksi ni Jehova nagsundog sa Dakong Magpupugas
[Mga hulagway sa panid 18]
Ang mga makalabang-buhi sa Armagedon makatagamtam sa mga abot sa yuta