Sa Unsang Paagi ang Kalinaw ni Kristo Mohari Diha sa Atong mga Kasingkasing?
“Paharia ang kalinaw ni Kristo diha sa inyong mga kasingkasing, kay kamo, sa pagkatinuod, gitawag alang niini diha sa usa ka lawas.”—COLOSAS 3:15.
1, 2. Sa unsang paagi “ang kalinaw ni Kristo” mohari diha sa kasingkasing sa usa ka Kristohanon?
ANG pulong paharia o kontrol makalagot alang sa daghan, tungod kay kini makapahinumdom ug pagpamugos ug pangimpluwensiya. Busa, ang tambag ni Pablo sa mga isigka-Kristohanon sa Colosas nga “Paharia ang kalinaw ni Kristo diha sa inyong mga kasingkasing,” mohatag ug impresyon sa uban ingong dili-makataronganon. (Colosas 3:15) Dili ba mga tawo man kita nga gihatagan ug kagawasan sa pagpili? Nganong tugotan man nato ang bisan unsa o bisan kinsa nga mohari sa atong mga kasingkasing?
2 Si Pablo wala magsugo sa mga taga-Colosas sa pagsurender sa ilang kagawasan sa pagpili. Ang Gregong termino nga gihubad ug “paharia” sa Colosas 3:15 nalangkit sa pulong alang sa reperi nga maoy mohatag sa ganti sa mga bangga sa dula sa maong panahon. Ang mga entrante may igong kagawasan sulod sa mga lagda sa dula, apan sa kataposan, ang reperi ang mohukom kon kinsay nagsubay sa mga lagda ug busa nakadaog sa bangga. Sa susama, kita adunay kagawasan sa paghimog daghang desisyon sa kinabuhi, apan sa maghimo kita ug desisyon, ang kalinaw ni Kristo angay nga mao gayod kanunay ang “reperi”—o, sama sa pagkahubad niini sa maghuhubad nga si Edgar J. Goodspeed, “ang impluwensiya nga nagagahom” diha sa atong mga kasingkasing.
3. Unsa “ang kalinaw ni Kristo”?
3 Unsa “ang kalinaw ni Kristo”? Kini mao ang kawalay-libog sa hunahuna, ang tawhay nga pagbati, nga atong maangkon sa dihang kita mahimong mga tinun-an ni Jesus ug sa pagkahibalo nga kita gihigugma ug giuyonan ni Jehova nga Diyos ug sa iyang Anak. Sa dihang hapit nang mobiya si Jesus sa iyang mga tinun-an, iyang gisultihan sila: “Ihatag ko kaninyo ang akong kalinaw. . . . Ayaw tugoti nga ang inyong mga kasingkasing mabalisa ni kini mokuyos sa kahadlok.” (Juan 14:27) Sa halos 2,000 ka tuig, kana nga kalinaw gitagamtam sa matinumanong dinihogan nga mga sakop sa lawas ni Kristo, ug gitagamtam usab kana karon sa ilang mga kauban, ang “ubang mga karnero.” (Juan 10:16) Kanang maong kalinaw angay nga maoy mogahom diha sa atong mga kasingkasing. Kon kita makaagom ug grabeng pagsulay, kini makatabang kanato aron dili madaog sa kahadlok o sa hingaping kaguol. Atong tan-awon kon unsa kini ka tinuod sa dihang makaatubang kita ug inhustisya, sa dihang mahupngan kita sa kabalaka, ug sa dihang kita mobati nga dili-takos.
Sa Dihang Makaatubang Kita ug Inhustisya
4. (a) Sa unsang paagi si Jesus nakaagom ug inhustisya? (b) Unsay reaksiyon sa mga Kristohanon sa pagkahimong mga biktima sa inhustisya?
4 Si Haring Solomon miingon: “Ang tawo nagmando sa tawo alang sa iyang kadaotan.” (Ecclesiastes 8:9) Si Jesus nahibalo nga tinuod kining mga pulonga. Samtang didto sa langit, iyang nakita ang grabeng inhustisya nga gipahamtang sa mga tawo sa usag usa. Sa yuta, iyang naagoman mismo ang kinadak-ang inhustisya sa dihang siya, ingong usa ka tawong walay sala, giakusar nga nanamastamas ug gipatay ingong usa ka kriminal. (Mateo 26:63-66; Marcos 15:27) Karon, daghan gihapon kaayo ang inhustisya, ug ang tinuod nga mga Kristohanon grabeng nag-antos, nga nahimong tumong sa ‘pagdumot sa tanang kanasoran.’ (Mateo 24:9) Apan, bisan pa sa makalilisang nga mga naagoman diha sa mga kampo sa kamatayon sa Nazi ug sa kampo sa pinugos nga trabaho sa Sobyet, bisan pa nga nahimong mga biktima sa kapintasan sa magubtanong panon sa mga tawo, sa bakak nga mga akusasyon, ug bakak nga mga pasangil, ang kalinaw ni Kristo nakapalig-on kanila. Ilang gisundog si Jesus, nga bahin kaniya atong mabasa: “Sa gisultihan siya ug pasipala, wala siya mobalos sa pagsultig pasipala. Sa nag-antos siya, wala siya manghulga, apan nagpadayon sa pagpiyal sa iyang kaugalingon ngadto sa usa nga nagahukom sa pagkamatarong.”—1 Pedro 2:23.
5. Sa dihang kita makadungog nga morag dunay inhustisya sa kongregasyon, unsa ang angay natong palandongon una?
5 Sa mas gamayng sukod, tingali sa atong hunahuna adunay usa nga napahamtangan ug sayop nga hukom sulod sa Kristohanong kongregasyon. Sa ingon niana nga kahimtang, tingali mobati usab kita sama kang Pablo, kinsa miingon: “Kinsa man ang napandol, ug ako wala masuko?” (2 Corinto 11:29) Unsay atong himoon? Angayng pangutan-on nato ang atong kaugalingon, ‘Tinuod ba gayod nga adunay inhustisya?’ Kasagaran, kita wala mahibalo sa tanang hitabo. Tingali sobra ra kaayo ang atong reaksiyon human mamati sa usa ka tawong nangangkon nga nahibalo. May maayong katarongan nga ang Bibliya nag-ingon: “Si bisan kinsa nga walay kasinatian motuo sa tagsatagsa ka pulong.” (Proverbio 14:15) Busa kinahanglang mag-amping kita.
6. Unsay angay natong reaksiyon sa gituohang mga inhustisya sulod sa kongregasyon?
6 Apan, ingnon ta nga kita mismo nahimong biktima sa gituohan nga inhustisya. Unsa ang angayng reaksiyon sa usa ka tawo nga may kalinaw ni Kristo diha sa iyang kasingkasing? Tingali makita nato nga kinahanglang pakigsultihan ang tawo nga atong gituohan nga nakasala nato. Human niana, imbes isulti kanang butanga ngadto kang bisan kinsa nga mamati, nganong dili itugyan ngadto kang Jehova ang maong butang pinaagi sa pag-ampo ug sumalig kaniya nga ipatuman niya ang hustisya? (Salmo 9:10; Proverbio 3:5) Tingali, kay gitugyan na nato kini, magmakontento na lang kita sa pagpalinaw niining butanga diha sa atong kasingkasing ug “maghilom.” (Salmo 4:4) Sa kadaghanang kaso, ang tambag ni Pablo ikapadapat: “Magpadayon sa pag-antos sa usag usa ug kinabubut-on nga magpasaylo sa usag usa kon ang usa adunay reklamo batok sa lain. Ingon nga si Jehova kinabubut-on nga nagpasaylo kaninyo, buhata usab ninyo ang ingon.”—Colosas 3:13.
7. Unsay atong hinumdoman kanunay diha sa atong pagpakiglabot sa atong mga igsoon?
7 Apan, bisag unsay atong buhaton, kinahanglang atong hinumdoman nga bisan pag dili nato makontrolar ang nahitabo, makontrolar nato ang atong reaksiyon. Kon kita moreaksiyon sa dili-makataronganong paagi sa gituohan nga inhustisya, mahimong mopatungha kana ug mas makadaot nga epekto sa atong kalinaw kay sa inhustisya mismo. (Proverbio 18:14) Basig mapandol pa kita ug mohunong sa pagpakig-uban sa kongregasyon hangtod nga mobati kita nga napatuman na ang hustisya. Ang salmista nagsulat nga kadtong nahigugma sa mga kasugoan ni Jehova “walay kapandolan.” (Salmo 119:165) Ang tinuod mao, ang tanan makasinati usahay ug inhustisya. Ayaw itugot nga ang maong dili-maayong mga kasinatian magbalda sa imong pag-alagad kang Jehova. Hinunoa, pasagdi nga ang kalinaw ni Kristo mohari diha sa imong kasingkasing.
Sa Dihang Kita Mahupngan sa Kabalaka
8. Unsa ang pipila ka butang nga makahatag ug kabalaka, ug unsay mahimong moresulta sa kabalaka?
8 Ang kabalaka maoy usa ka tinuod nga bahin sa kinabuhi niining “kataposang mga adlaw.” (2 Timoteo 3:1) Tinuod, si Jesus miingon: “Hunong na sa pagkabalaka bahin sa inyong kalag kon unsay inyong kan-on o bahin sa inyong mga lawas kon unsay inyong isul-ob.” (Lucas 12:22) Apan dili tanang kabalaka maoy tungod sa pagkabalisa sa materyal nga mga butang. Si Lot “naguol pag-ayo” tungod sa kahilayan sa Sodoma. (2 Pedro 2:7) Si Pablo gihasol sa “kahingawa sa tanang kongregasyon.” (2 Corinto 11:28) Gibati ni Jesus ang ingon niana nga kasakit sa gabii una pa siya mamatay nga tungod niana ang “iyang singot nahimong sama sa mga tinulo sa dugo nga nangatagak sa yuta.” (Lucas 22:44) Tin-aw, dili tanang kabalaka maoy ilhanan sa usa ka mahuyang nga pagtuo. Apan, kon unsa may hinungdan niini, kon grabe ang gibating kabalaka ug dugayng mawala, hikawan kita niini sa atong kalinaw. Ang uban nadaog sa kabalaka, nga nagpabati kanila nga dili makapadayon sa pagdumala sa mga responsibilidad labot sa pag-alagad kang Jehova. Ang Bibliya nag-ingon: “Ang pagkamabalak-on diha sa kasingkasing sa usa ka tawo maoy magpatikuko niini.” (Proverbio 12:25) Nan, unsay atong mahimo kon kita gihasol sa kabalaka?
9. Unsa ang pipila ka praktikal nga lakang nga mahimong himoon aron mahupayan sa kabalaka, apan unsay mga hinungdan sa kabalaka ang dili makuha?
9 Sa ubang mga situwasyon, kita tingali makahimo ug praktikal nga mga lakang. Kon suliran sa panglawas ang hinungdan sa atong mabalak-ong kahimtang, maalamon nga tagdon kini, bisan pag ang maong mga butang personal nga desisyonan.a (Mateo 9:12) Kon kita nabug-atan sa daghang responsibilidad, mahimong itugyan ngadto sa uban ang pipila niini. (Exodo 18:13-23) Apan, komosta kadtong—sama sa mga ginikanan—kinsa dunay mabug-at nga mga responsibilidad nga dili ikatugyan sa uban. Komosta ang usa ka Kristohanon nga nagpuyo uban sa usa ka kapikas nga magsusupak? Komosta kadtong nagkapangkapangka o nagpuyo sa dapit nga naggubatay? Matin-aw, dili nato mawagtang ang tanang hinungdan sa kabalaka niining sistemaha sa mga butang. Bisan pa niana, atong mapatunhay ang kalinaw ni Kristo diha sa atong mga kasingkasing. Sa unsang paagi?
10. Unsa ang duha ka paagi diin ang Kristohanon makakitag kahupayan sa kabalaka?
10 Ang pagpangitag kahupayan diha sa Pulong sa Diyos maoy usa ka paagi. Si Haring David nagsulat: “Sa dihang ang makapatugaw nga mga hunahuna midaghan sa akong kahiladman, ang imong mga paghupay mihapohap sa akong kalag.” (Salmo 94:19) Ang “mga paghupay” ni Jehova makaplagan diha sa Bibliya. Ang pagbasa kanunay sa dinasig nga Basahon makatabang sa pagpatunhay sa kalinaw ni Kristo diha sa atong mga kasingkasing. Ang Bibliya nag-ingon: “Itugyan ang imong palas-anon kang Jehova, ug siya magasapnay kanimo. Dili gayod niya itugot nga matarog ang matarong.” (Salmo 55:22) Sa susama, si Pablo nagsulat: “Ayaw kabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.” (Filipos 4:6, 7) Ang kinasingkasing ug makanunayong pag-ampo makatabang sa pagpatunhay sa atong kalinaw.
11. (a) Sa unsang paagi si Jesus maoy usa ka maayong panig-ingnan may kalabotan sa pag-ampo? (b) Unsay angay natong panglantaw sa pag-ampo?
11 Si Jesus maoy usa ka maayong panig-ingnan niining bahina. Usahay, siya mainampoong nakigsulti sa iyang langitnong Amahan sulod sa daghang oras sa usa ka higayon. (Mateo 14:23; Lucas 6:12) Ang pag-ampo nakatabang kaniya sa pag-antos sa kinagrabehang mga pagsulay. Sa gabii una pa siya mamatay, ang iyang pagkabalisa misamot sa hilabihan. Ang iyang reaksiyon? Siya miampo nga “labi pang matinuoron.” (Lucas 22:44) Oo, ang hingpit nga Anak sa Diyos maoy usa ka tawong mainampoon. Nan, labaw na gayod nga angayng ugmaron sa iyang dili-hingpit nga mga sumusunod ang batasan nga pagkamainampoon! Gitudloan ni Jesus ang iyang mga tinun-an nga “mag-ampo kanunay ug dili moundang.” (Lucas 18:1) Ang pag-ampo maoy tinuod ug hinungdanong pagpakigsulti ngadto sa Usa nga mas nahibalo kanato kay sa atong pagkahibalo sa atong kaugalingon. (Salmo 103:14) Kon buot natong mapatunhay ang kalinaw ni Kristo diha sa atong mga kasingkasing, kita “mag-ampo nga walay-hunong.”—1 Tesalonica 5:17.
Pagbuntog sa Atong mga Limitasyon
12. Sa unsang mga katarongan nga mibati ang pipila nga kulang ang ilang pag-alagad?
12 Gilantaw ni Jehova ang matag usa sa iyang mga alagad ingong tilinguhaon, nga maoy butang bililhon. (Haggeo 2:7) Bisan pa niana, daghan ang nalisdan sa pagdawat niini. Ang pipila tingali nangaluya tungod sa katigulangon, nagkadakong mga obligasyon sa pamilya, o pagkadaot sa panglawas. Ang uban tingali mibati nga nadisbentahaan tungod kay nagtubo sa alaot nga pagkabutang. Ang lain pang uban tingali gitulisok sa konsensiya tungod sa nahimong kasaypanan sa miagi, nga nagduhaduha kon pasayloon pa ba sila ni Jehova. (Salmo 51:3) Unsay mahimong buhaton alang niini nga mga pagbati?
13. Unsa ang Kasulatanhong panghupay alang niadtong mibating nagkulang?
13 Ang kalinaw ni Kristo magpasalig kanato sa gugma ni Jehova. Atong mapasig-uli kanang maong kalinaw diha sa atong mga kasingkasing pinaagi sa pagpalandong sa kamatuoran nga wala gayod moingon si Jesus nga ang atong bili gisukod pinaagi sa pagtandi sa atong ginahimo uban sa ginahimo sa uban. (Mateo 25:14, 15; Marcos 12:41-44) Ang iyang gipasiugda hinuon mao ang pagkamaunongon. Iyang giingnan ang iyang mga tinun-an: “Siya nga nakalahutay hangtod sa kataposan mao ang maluwas.” (Mateo 24:13) Si Jesus mismo “gitamay” sa mga tawo, apan wala siya magduhaduha nga gihigugma siya sa iyang Amahan. (Isaias 53:3; Juan 10:17) Ug iyang gisultihan ang iyang mga tinun-an nga sila gihigugma usab. (Juan 14:21) Sa pagpasiugda niini, si Jesus miingon: “Dili ba ang duha ka goryon ikabaligya man sa usa ka sensilyo nga gamay ug bili? Bisan pa niana, walay usa kanila ang mahulog sa yuta nga dili mahibaloan sa inyong Amahan. Apan ang mismong mga buhok sa inyong ulo naihap ang tanan. Busa ayaw kamo kahadlok: kamo labaw pag bili kay sa daghang goryon.” (Mateo 10:29-31) Pagkamainiton nga pasalig sa gugma ni Jehova!
14. Unsay atong pasalig nga ang matag usa kanato bililhon kang Jehova?
14 Si Jesus usab miingon: “Walay tawo nga makaari kanako gawas kon ang Amahan, kinsa nagpadala kanako, magkabig kaniya.” (Juan 6:44) Sanglit gikabig kita ni Jehova aron mosunod kang Jesus, dayag nga Siya nagtinguha nga kita maluwas. Gisultihan ni Jesus ang iyang mga tinun-an: “Dili tilinguhaong butang sa akong Amahan nga anaa sa langit nga malaglag ang usa niining mga gagmay.” (Mateo 18:14) Busa, kon ikaw bug-os kasingkasing nga nag-alagad, magmalipayon ka sa imong maayong mga buhat. (Galacia 6:4) Kon gitulisok ka sa konsensiya tungod sa nahimong kasaypanan sa miagi, makasalig ka nga si Jehova magpasaylo “sa madagayaon gayod” sa mga tawong tinuod nga naghinulsol. (Isaias 43:25; 55:7) Kon naluya ka tungod sa laing katarongan, hinumdomi nga “si Jehova haduol niadtong mga dugmok ug kasingkasing; ug siya magaluwas niadtong mga nahugno sa espiritu.”—Salmo 34:18.
15. (a) Sa unsang paagi si Satanas naningkamot sa pagkuha sa atong kalinaw? (b) Sa unsang paagi makasalig kita kang Jehova?
15 Walay laing gitinguha si Satanas kondili kuhaan ka sa imong kalinaw. Siya ang tuboran sa napanunod nga sala nga gipakigbisogan natong tanan. (Roma 7:21-24) Buot gayod niya nga imong bation nga ang imong pagkadili-hingpit naghimo sa imong pag-alagad nga dili dalawaton sa Diyos. Ayaw itugot nga mapaluya ka sa Yawa! Pagbantay sa iyang malalangong mga laraw, ug tugoti nga kana nga pagkamabinantayon maghimo kanimong determinado nga molahutay. (2 Corinto 2:11; Efeso 6:11-13) Hinumdomi, “ang Diyos mas labaw kay sa atong mga kasingkasing ug nahibalo sa tanang butang.” (1 Juan 3:20) Si Jehova makakita dili lamang sa atong mga kahuyangan. Makakita usab siya sa atong mga motibo ug mga tinguha. Busa, makabaton ka ug kahupayan sa mga pulong sa salmista: “Si Jehova dili motalikod sa iyang katawhan, ni mobiya siya sa iyang panulondon.”—Salmo 94:14.
Nahiusa Diha sa Kalinaw ni Kristo
16. Sa unsang paagi kita wala mag-inusara samtang naningkamot kita nga makalahutay?
16 Si Pablo nagsulat nga angay natong paharion ang kalinaw ni Kristo diha sa atong mga kasingkasing tungod kay kita “gitawag alang niini diha sa usa ka lawas.” Ang dinihogang mga Kristohanon nga maoy gisulatan ni Pablo gitawag aron mahimong bahin sa lawas ni Kristo, ug ang mga nahibilin usab sa mga dinihogan karon. Ang ilang mga kauban nga “ubang mga karnero” nahiusa uban kanila ingong “usa ka panon” ilalom sa “usa ka magbalantay,” si Jesu-Kristo. (Juan 10:16) Duyog kanila, usa ka tibuok-kalibotang “panon” sa minilyon nagtugot sa kalinaw ni Kristo nga mohari diha sa ilang mga kasingkasing. Ang pagkahibalo nga kita wala mag-inusara motabang kanato nga makalahutay. Si Pedro nagsulat: “Barog kamo batok [kang Satanas], malig-on sa pagtuo, kay nahibalo nga ang samang mga butang maylabot sa mga pag-antos nagakahitabo diha sa tibuok kapunongan sa inyong mga igsoon dinhi sa kalibotan.”—1 Pedro 5:9.
17. Unsay atong pangpadasig aron mohari ang kalinaw ni Kristo diha sa atong mga kasingkasing?
17 Nan, hinaot nga kitang tanan magpadayon sa pag-ugmad sa kalinaw, kanang maong hinungdanong bunga sa balaang espiritu sa Diyos. (Galacia 5:22, 23) Kadtong makit-an ni Jehova nga walay-lama, walay-buling, ug anaa sa kalinaw sa ulahi panalanginan ug kinabuhing walay kataposan diha sa paraisong yuta, diin magapuyo ang pagkamatarong. (2 Pedro 3:13, 14) Kita adunay katarongan gayod sa pagtugot sa kalinaw ni Kristo nga mohari diha sa atong mga kasingkasing.
[Footnote]
a Sa ubang mga kahimtang, ang kabalaka tingali gipahinabo o gipasamot sa mga suliran sa panglawas, sama sa clinical depression.
Nahinumdom Ka Ba?
• Unsa ang kalinaw ni Kristo?
• Sa unsang paagi ang kalinaw ni Kristo mohari diha sa atong mga kasingkasing kon makaatubang kita ug inhustisya?
• Sa unsang paagi ang kalinaw ni Kristo motabang kanato sa pagsagubang sa kabalaka?
• Sa unsang paagi ang kalinaw ni Kristo makahupay kanato kon kita mobati nga dili-takos?
[Hulagway sa panid 15]
Atubangan sa iyang mga tigsumbong, gitugyan ni Jesus ang iyang kaugalingon ngadto kang Jehova
[Hulagway sa panid 16]
Sama sa mabinationg halog sa usa ka mahigugmaong amahan, ang mga paghupay ni Jehova makahupay sa atong kabalaka
[Hulagway sa panid 18]
Ang paglahutay bililhon kaayo sa Diyos