Ang Gilead Nagpadalag mga Misyonaryo “Ngadto sa Kinalay-ang Dapit sa Yuta”

KAPIN sa tunga sa siglo na karon, ang Watchtower Bible School of Gilead nagpadalag mga misyonaryo. Sa Septiyembre 11, 1999, ang ika-107 nga klase sa Gilead migraduwar. Kini gilangkoban ug 48 ka estudyante gikan sa 11 ka nasod, ug sila gipang-asayn sa pag-alagad sa 24 ka lainlaing kayutaan. Sila moduyog sa libolibong uban pang mga misyonaryo, kinsa nagdulag hinungdanong papel sa pagtuman sa kataposang mga pulong ni Jesus una pa mokayab sa langit. Siya mitagna nga ang iyang mga tinun-an “mahimong mga saksi [niya] . . . ngadto sa kinalay-ang dapit sa yuta.”​—Buhat 1:8.

Ang programa sa graduwasyon, nga gihimo sa Watchtower Educational Center sa Patterson, New York, maoy usa ka dakong okasyon diha sa matahom nga palibot. Ang mograduwar nga mga estudyante nalipay kaayo nga nanambong ang mga paryente, suod nga mga higala, ug mga bisita. Lakip niadtong naminaw ug nanan-aw pinaagig audio ug video nga mga koneksiyon ngadto sa mga tinukod sa Brooklyn ug Wallkill, ang bug-os nga gidaghanon sa nanambong maoy 4,992.

Pag-alagad nga Matinumanon Kang Jehova ug sa Isigkatawo

“Kinsa ang Dapig Kang Jehova?” Mao kana ang tema sa pangbukas nga pakigpulong ni Carey Barber, usa ka membro sa Nagamandong Lawas ug tsirman sa programa sa graduwasyon. Iyang gipatin-aw nga mao kini ang isyu nga giatubang sa mga Israelinhon sa adlaw ni Moises. Ang mograduwar nga mga estudyante ug kadtong nanambong gipahinumdoman nga daghan sa mga Israelinhon ang nawad-an sa ilang kinabuhi diha sa kamingawan tungod kay wala sila magpabiling maunongon dapig kang Jehova. Human mabiktima sa idolatriya, sila “nanglingkod sa pagkaon ug sa pag-inom. Unya sila nanindog aron maglipaylipay.” (Exodo 32:1-29) Gipasidan-an ni Jesus ang mga Kristohanon sa samang kapeligrohan: “Tagda ang inyong kaugalingon nga ang inyong mga kasingkasing dili gayod mabug-atan sa pagpalabig kaon ug pagpalabig inom ug sa mga kabalaka sa kinabuhi, ug sa kalit kanang adlawa dihadiha modangat nganha kaninyo.”​—Lucas 21: 34-36.

Ang sunod nga mamumulong, si Gene Smalley, sa Departamento sa Pagsulat, nangutana sa mograduwar nga mga estudyante: “Kamo ba Mapamatud-ang Usa ka Paregoric?” Iyang gipatin-aw nga ang Gregong pulong nga pa·re·go·riʹa gisagop ngadto sa Iningles ingong ngalan sa tinim­pla nga medisina nga makahupay sa sakit. Apan, gigamit ni apostol Pablo kining makahuloganong Gregong pulong sa Colosas 4:11 sa paghubit sa iyang mga isigkamagbubuhat. Diha sa Bag-ong Kalibotan nga Hubad, kining pulonga gihubad nga “makapalig-on nga tabang.”

Diha sa ilang mga asaynment ang mograduwar nga mga misyonaryo mahimong modernong-adlaw nga mga paregoric diha sa praktikal kaayong paagi pinaagi sa pagkahimong makapalig-on nga tabang sa mapaubsanong paagi ngadto sa lokal nga mga igsoong lalaki ug babaye ug pinaagi sa pagpabanaag sa matinabangon ug mahigugmaong espiritu sa pagpakig-uban sa mga isigkamisyonaryo.

Si Daniel Sydlik, usa ka membro sa Nagamandong Lawas, sunod nga mihisgot bahin sa ulohang “Ang Bulawanong Lagda nga Pagasundon.” Iyang gipatin-aw nga ang tinuboy nga prinsipyo nga gipahayag ni Jesus sa Mateo 7:12, nga “ang tanang butang nga buot ninyo nga buhaton sa mga tawo nganha kaninyo, kamo usab kinahanglang magbuhat sa ingon ngadto kanila,” naglangkit sa pagbuhat ug positibong mga butang alang sa uban, dili lamang paglikay sa pagbuhat ug makadaot.

Aron mahimo kini nga malamposon, tulo ka butang ang gikinahanglan: makakita nga mata, maluluy-ong kasingkasing, ug matinabangong kamot. Sa pagsumaryo, siya miingon: “Kon atong bation ang tinguha sa pagtabang, kita kinahanglang motabang dayon. Kita kinahanglang maningkamot sa pagbuhat alang sa uban sa kon unsa ang buot natong buhaton nila alang kanato.” Kini tinuod ilabina sa mga misyonaryong moadto sa ubang kayutaan sa pagtabang sa mga tawo sa pagsubay sa tinuod nga Kristiyanidad.

Ang mga Instruktor Naghatag ug Mainitong mga Pahinumdom

Ang instruktor sa Gilead nga si Karl Adams nagdasig sa mograduwar nga mga misyonaryo nga “Magpadayon sa Pagtubo.” Maylabot sa unsa? Una, sa kahibalo ug sa katakos sa paggamit niinig maayo. Sa Gilead, ang mga estudyante nakakat-on sa paghimog panukiduki aron makuha ang kasaysayan ug kahimtang sa mga asoy sa Bibliya. Sila gidasig sa paghunahuna kon sa unsang paagi ang matag asoy kinahanglang mag-apektar sa ilang kinabuhi. Sila gidasig sa pagpadayon sa pagbuhat niini.

“Ikaduha, magpadayon sa pagtubo diha sa gugma. Ang gugma maoy usa ka butang nga, kon amomahon, motubo. Sa dihang pasagdan, kini mamatay,” matod ni Brader Adams. (Filipos 1:9) Karon, ingong mga misyonaryo, sila kinahanglang motubo sa gugma ubos sa lainlaing mga kahimtang. Ug ikatulo: “Padayon sa pagtubo sa dili-takos nga kalulot ug kahibalo sa atong Ginoo ug Manluluwas nga si Jesu-Kristo.” (2 Pedro 3:18) “Mao kini ang kahibulongang kalulot nga gipakita ni Jehova pinaagi sa iyang Anak,” matod sa mamumulong. “Samtang kita motubo sa pagpabili sa maong dili-takos nga kalulot, ang atong kalipay motubo sa pagbuhat sa kabubut-on sa Diyos ug sa pagtuman sa iyang ginapahimo kanato.”

Ang laing instruktor sa Gilead, si Mark Noumair, naghisgot sa temang “Dawata Kini Uban ang Gugma, ug Ikaw Makalahutay.” Siya mitambag: “Tun-ing dawaton ang malisod nga mga kahimtang sa misyonaryong kinabuhi uban ang gugma, ug ikaw makalahutay. Ginadisiplina lamang ni Jehova kadtong iyang ginahigugma. Bisan pag imong gibati nga ang usa ka tambag dili-maayong pagkahatag, makutikutihon, o mapihigon, ang gugma kang Jehova ug ang imong relasyon kaniya motabang kanimo sa paglahutay.”

Gipatin-aw ni Brader Noumair nga ang misyonaryong pag-alagad naglakip ug daghang buluhaton. “Apan ang pagtuman sa mga buluhaton nga walay gugma maghimo kanimo nga dili-kontento. Kon walay gugma, ang imong mga buluhaton sa panimalay​—sama sa pagluto, pagpamalit, paghinlo sa prutas, pagpabukal sa tubig—​mahimong laay kaayo. Angay kang mohunong ug mangutana sa imong kaugalingon, ‘Ngano bang ginabuhat ko kini?’ Buweno, kon imong sultihan ang imong kaugalingon nga, ‘Ang akong mga paningkamot nagaamot sa kahimsog ug kalipay sa akong mga isigkamisyonaryo,’ nan dili kini malisod nga buhaton.” Sa pagsumaryo, siya miawhag: “Kon kaha maylabot sa pagdawat ug disiplina, pagtuman sa imong mga buluhaton ingong misyonaryo, o pag-atubang sa mga di-pagsinabtanay, ang pagdawat niini uban sa gugma magpaarang kanimo sa paglahutay diha sa imong asaynment. ‘Ang gugma dili gayod mapakyas.’”​—1 Corinto 13:8.

Ang instruktor sa Gilead nga si Wallace Liverance sunod nga nagdumala sa pagpasundayag sa pipila ka makapahimuot nga mga kasinatian nga naeksperyensiyahan sa mga estudyante samtang nakig-uban sa lokal nga mga kongregasyon. Dugang pa sa pagpamalaybalay, ilang gigamit ang ilang misyonaryong pagbansay sa pagpangitag mga tawo sa mga hunonganan ug mga trak, labhanan, estasyonan sa tren, ug ubang mga dapit.

Eksperyensiyadong mga Misyonaryo Mihatag ug mga Pasalig

Sa dihang ang bag-ong mga misyonaryo moadto sa usa ka langyawng nasod, kinahanglan bang mabalaka? Ila bang masagubang ang mga problema sa langyawng asaynment? Unsay ginahimo sa mga sangang buhatan sa pagtabang niining bag-ong nangabot aron magmalamposon? Aron matubag kini ug ang ubang mga pangutana, si Steven Lett, sa Departamento sa Pag-alagad, ug si David Splane, sa Departamento sa Pagsulat, miinterbiyo sa mga igsoong lalaki nga niadtong tungora nanambong sa tunghaan alang sa sanga didto sa Watchtower Educational Center. Ang mga igsoong giinterbiyo nag-alagad sa mga komite sa sanga sa Espanya, Hong Kong, Liberia, Benin, Madagascar, Brazil, ug Hapon.

Kining eksperyensiyadong mga alagad ni Jehova, nga daghan kanila nag-alagad ingong mga misyonaryo sulod sa mga dekada, nagpasalig sa mograduwar nga mga estudyante maingon man sa ilang mga ginikanan ug mga paryente nga nanambong. Pinasikad sa ilang personal nga kasinatian ug nianang sa mga isigkamisyonaryo, ilang gipakita nga ang mga problema ug mga kabalaka mahimong maatubang nga malamposon. Tingali dako ang problema nga ilang atubangon, “apan kini masulbad, ug ang Sosyedad motabang kanato,” mikomento si Raimo Kuokkanen, usa ka misyonaryo sa Madagascar. “Wala namo pilia ang asaynment, amo kining nadawat,” matod ni Östen Gustavsson, nga karon nag-alagad sa Brazil. “Busa kami nakahukom sa paghimo sa among labawng maarangan sa pagpabilin niini.” Si James Linton, nga nag-alagad sa Hapon, miingon nga ang nakatabang kaniya mao “ang presensiya sa mga igsoong dugay nang nag-alagad sa misyonaryong asaynment.” Ang misyonaryong pag-alagad maoy usa ka makapalipay ug makapatagbawng paagi sa pag-alagad kang Jehova ug sa pag-atiman sa iyang karnero.

Paglikay sa Hampak nga Mopatay sa Espirituwalidad

Si Theodore Jaracz, usa ka membro sa Nagamandong Lawas, kinsa migraduwar mismo sa ikapitong klase sa Gilead sa 1946, mihatag sa paniklop nga pakigpulong, sa temang “Ang Hagit sa Pagpabiling Buhi sa Espirituwal.” Nag-ila una sa grabeng mga kabangis nga nagakahitabo sa nagkadaiyang mga bahin sa kalibotan, siya nagpatin-aw nga sa pagkatinuod, mas grabe pang mga kadaot ang nagakahitabo sa katawhan.

Nagtumong sa Salmo 91, gipaila ni Brader Jaracz ang “kamatay” ug “kalaglagan” nga sa espirituwal nakadaot ug nakapatay sa minilyon sa atong palibot. Ang Yawa ug ang iyang daotang sistema naggamit ug samag-kamatay nga propaganda, nga binase sa intelektuwalismo ug materyalismo, sa pagpaluya ug pagpatay sa espirituwalidad, apan si Jehova nagpasalig kanato nga kining maong hampak dili makaduol “kang bisan kinsa nga nagapuyo sa tagong dapit sa Labing Hataas.”​—Salmo 91:1-7.

“Ang hagit,” matod ni Brader Jaracz, “mao ang pagpabiling mahimsog diha sa pagtuo, ang pagpabilin diha sa dapit sa kasegurohan. Dili kita mahisama sa mga mayubiton nga ‘walay espirituwalidad.’ Mao kini ang problema karong adlawa. Kini maatubang natong tanan sulod sa organisasyon. Kini usab mahimong maatubang ninyo diha sa inyong misyonaryong asaynment.” (Judas 18, 19) Apan ang mograduwar nga mga misyonaryo gisultihan nga sila malamposong makahupot sa ilang espirituwalidad diha sa ilang mga asaynment. Sila giawhag sa pagtagad, pananglitan, kon sa unsang paagi nagalahutay ang atong kaigsoonan sa Rusya, sa Asia, ug sa Aprikanhong kayutaan​—bisan pa sa mga pagdili, grabeng pagsupak, pagbiaybiay, ateyistikong propaganda, ug bakak nga mga sumbong. Ug, sa daghang kaso, gipun-an pag mga sakit, nga gipahinabo sa etnikong mga panag-away ug kakulang sa mga kinahanglanon.

Kon adunay pagkunhod sa espirituwalidad, “kinahanglan nga atubangon ang hinungdan sa problema ug dayon sulbaron kini, nga naggamit sa tambag sa Pulong sa Diyos.” Gihatag ang mga panig-ingnan sa Bibliya. Si Josue gidasig sa pagbasa sa iyang kopya sa Kasugoan diha sa hinayng tingog matag adlaw. (Josue 1:8) Sa dihang nakaplagan ang basahon sa Kasugoan sa adlaw ni Josias, gipanalanginan ni Jehova ang matinumanong pagpadapat sa mga instruksiyon niini. (2 Hari 23:2, 3) Si Timoteo nahibalo sa balaang mga sinulat gikan sa pagkamasuso. (2 Timoteo 3:14, 15) Ang mga taga-Berea dili lamang kay maayong mga mamiminaw; sila giila nga “hamilig-hunahuna” tungod kay ilang gisusi ang Kasulatan adlaw-adlaw. (Buhat 17:10, 11) Ug si Jesu-Kristo mao ang pangunang pananglitan sa usa nga nahibalo ug naggamit sa Pulong sa Diyos.​—Mateo 4:1-11.

Sa pagtapos, si Brader Jaracz mainitong nagtambag sa bag-ong mga misyonaryo: “Karon kamo andam na nga himoon ang inyong misyonaryong asaynment. Ug kamo moadto sa laing nasod, sa literal gayod nga diwa, ngadto sa daghang lainlain nga dapit sa yuta. Kon atong atubangon ang hagit sa pagpabiling buhi sa espirituwal, nan dili nato tugotan ang bisan unsa nga makalinga kanato sa paghimo sa kon unsay atong gihukom nga buhaton. Kamo magasangyaw nga may kasibot, magdasig sa uban sa pagsundog sa inyong pagtuo, ug kami magaampo duyog kaninyo nga kadtong inyong pagatudloan, pagabuhion ni Jehova sama sa iyang nahimo kanato. Ug sa ingon daghan pa ang makalingkawas sa espirituwal nga kalaglagan nga nagapadayon karon sa tibuok kalibotan. Magkadaghan sila nga moduyog kanato sa paghimo sa kabubut-on ni Jehova. Ug hinaot si Jehova magapanalangin kaninyo sa maong katuyoan.”

Human mabasa sa tsirman ang mga pangomosta gikan sa lainlaing mga nasod sa tibuok kalibotan, miabot ang panahon sa paghatag sa mograduwar nga mga estudyante sa ilang mga diploma. Dayon misunod ang pagbasa sa mainitong sulat sa apresasyon nga gihimo sa mga estudyante. Pagkamapasalamaton nila kang Jehova ug sa iyang organisasyon tungod sa linaing pagbansay nga ilang nadawat ug sa ilang tagsatagsa ka asaynment ingong mga misyonaryo nga moadto “ngadto sa kinalay-ang dapit sa yuta”!​—Buhat 1:8.

[Kahon sa panid 29]

Estadistika sa Klase

Gidaghanon sa mga nasod nga gihawasan: 11

Gidaghanon sa mga nasod nga gipadalhan: 24

Gidaghanon sa mga estudyante: 48

Gidaghanon sa mga magtiayon: 24

Aberids nga edad: 34

Aberids nga katuigan sa kamatuoran: 17

Aberids nga katuigan sa bug-os-panahong ministeryo: 12

[Hulagway sa panid 26]

Ika-107 nga Migraduwar nga Klase sa Watchtower Bible School of Gilead

Sa listahan sa ubos, ang mga laray ginumerohan gikan sa atubangan ngadto sa likod, ug ang mga ngalan gilista gikan sa wala ngadto sa tuo sa matag laray.

 1. Peralta, C.; Hollenbeck, B.; Shaw, R.; Hassan, N.; Martin, D.; Hutchinson, A. 2. Edwards, L.; Vezer, T.; Ceruti, Q.; Entzminger, G.; D’Aloise, L.; Baglieri, L. 3. Knight, P.; Krause, A.; Kasuske, D.; Rose, M.; Friedl, K.; Nieto, R. 4. Rose, E.; Backus, T.; Talley, S.; Humbert, D.; Bernhardt, A.; Peralta, M. 5. D’Aloise, A.; Humbert, D.; Dunn, H.; Gatling, G.; Shaw, J.; Ceruti, M. 6. Baglieri, S.; Krause, J.; Hollenbeck, T.; Martin, M.; Bernhardt, J.; Hutchinson, M. 7. Backus, A.; Dunn, O.; Gatling, T.; Vezer, R.; Knight, P.; Hassan, O. 8. Nieto, C.; Talley, M.; Friedl, D.; Kasuske, A.; Edwards, J.; Entzminger, M.