Si Jesu-Kristo—Pinalanggang Anak sa Diyos

“Unya, dihay usa ka tingog gikan sa mga langit nga nag-ingon. ‘Kini mao ang akong Anak, ang pinalangga, nga akong giuyonan’”—MATEO 3:17.

 1, 2. (a) Unsang yanong kamatuoran ang gitudlo sa Bibliya bahin sa Diyos nga labing gamhanan ug kang Jesu-Kristo? (b) Unsay gitudlo sa mga relihiyon sa Kakristiyanohan?

Si Jesus-Kristo nabawtismohan sa edad 30 pinaagi sa pagtuslob kaniya sa tubig. Sa migawas siya sa tubig, ang usa ka tingog gikan sa langit nag-ingon: “Kini mao ang akong Anak, ang pinalangga, nga akong giuyonan.” (Mateo 3:17) Kadtong tingoga mao ang tingog sa Diyos. Sa laing higayon, sa pag-ampo sa Diyos, si Jesus miingon: “Amahan, himayaa ang imong ngalan.” Ug sa gisulti kana ni Jesus, ang “tingog sa Diyos migula gikan sa langit: ‘Gihimaya ko na kini ug pagahimayaon ko pag-usab.’”—Juan 12:28.

² Gikan niining mga asoya, bisan ang usa ka bata makasabot nga ang relasyon tali sa Diyos nga labing gamhanan ug ni Jesu-Kristo maoy sama sa usa ka amahan ug sa iyang pinalanggang anak, nga duha ka nagkalaing indibiduwal. Bisan pa niana, kining yanong kamatuoran sa Bibliya gilimod sa mga relihiyon sa Kakristiyanohan. Sila nagapugos nga si Jesu-Kristo mao ang Diyos nga Labing Gamhanan mismo, ang ikaduhang persona sa Trinidad, nga ang ikatulong persona mao ang balaang espiritu.

 3. Sa unsang paagi gipadayag ang kalibog bahin sa doktrinang Trinidad?

³ Ang maong pagtulon-an nakapahinabog dakong kalibog taliwala sa katawhan sa mga relihiyon sa Kakristiyanohan nga usa ka hinungdan nganong ang New Catholic Encyclopedia nagatawag sa Trinidad nga usa ka misteryo. Sa pagkamatuod, kini nagapahinabog kalibog bisan taliwala sa klero, kay ang maong ensiklopedia nagaingon usab: “May pipila ka magtutudlo sa teolohiyang Trinitaryan sa Romano Katolikong mga seminaryo nga wala masamok sa usa o laing panahon sa pangutanang, ‘Apan sa unsang paagi ginawali sa usa ang Trinidad?’ Ug kon ang pangutana maoy simtoma sa kalibog sa bahin sa mga estudyante, tingali kini simtoma usab sa susamang kalibog sa bahin sa ilang mga propesor.”

 4. Unsa ang opisyal nga pagtulon-an sa mga iglesya bahin sa Trinidad?

⁴ Kanang makalibog nga doktrina mao ang pangunang tinuohan sa Katoliko ug sa Protestanteng mga relihiyon. Ang The Catholic Encyclopedia nagaingon: “Ang Trinidad mao ang pulong gigamit sa pagpasabot sa pangunang doktrina sa Kristohanong relihiyon . . . Busa, sa mga pulong sa Kredong Athanasian: ‘ang Amahan maoy Diyos, ang Anak maoy Diyos ug ang Espiritu Santo maoy Diyos, ug bisan pa niana dili tulo ang Diyos kondili usa ang Diyos.’” Sa susama, sa usa ka kaso sa korte nga naglangkit sa mga Saksi ni Jehova sa Gresya ang Grego Ortodoksong Iglesya miingon: “Ang pundamental nga doktrina sa Kristiyanidad, nga niana ang tanang Kristohanon nag-angkong nagtuo . . . walay sapayan sa sekta o dogma mao . . . ang Trinidad, nga ang Diyos maoy Usa diha sa tulo ka persona.” Ang Gregong Ortodoksong Iglesya mipahayag usab: “Ang mga Kristohanon mao kadtong nagadawat kang Kristo ingon nga Diyos.” Kadto nag-ingon nga kadtong dili motuo sa Trinidad dili mga Kristohanon kondili mga erehes.

 5, 6. Nganong hinungdanon ang pagkahibalo sa kamatuoran bahin niini?

⁵ Ugaling, kon kining “pundamental” nga pagtulon-ang Trinidad sa Kakristiyanohan dili tinuod, kon kini usa ka bakak, nan ang kaatbang mao ang matuod. Ang matuod nga mga Kristohanon magsalikway niini. Kadtong mibulag sa Kristiyanidad manghawid niini. Unsang sangpotanan alang sa naulahing grupo? Sa kataposang basahon sa Bibliya, “usa ka pinadayag ni Jesu-Kristo, nga gihatag kaniya sa Diyos,” atong mabasa mahitungod niadtong dili takos sa kinabuhing dayon sa Gingharian sa Diyos: “Sa gawas mao ang mga iro ug kadtong nagabuhat sa espiritismo ug ang mga makihilawason ug mga mamumuno ug mga tigsimbag diyosdiyos ug tanan nga nahigugma ug nagabatasan sa pagpamakak.”—Pinadayag 1:1; 22: 15.

⁶ Tungod sa kahinungdanon niini, angay tang masayod kon diin gikan kining ideya sa Trinidad ug nganong kini mitungha. Kinsay tinuod nagpaluyo niini? Unsay ginaingon sa batid nga pagsusi sa Bibliya karong adlawa? Una hisgotan kining mga butanga, sa dugang atong susihon kon unsay ginaingon sa kaugalingong dinasig nga Pulong sa Diyos.—2 Timoteo 3:16, 17.

Dili ‘Diyos nga Anak’ Kondili “Anak sa Diyos”

 7. Unsay gipadayag sa dili-madapigong pagtuon sa Bibliya mahitungod kang Jesus?

⁷ Si Jesus wala gayod moangkon nga mao ang Diyos nga labing gamhanan mismo. Ang dili madapigong pagbasa sa Bibliya nga walay nahaunang mga ideya bahin sa Trinidad magpamatuod niana. Pananglitan, sa Juan 3:16, si Jesus miingon: “Kay gihigugma pag-ayo sa Diyos ang kalibotan nga iyang gihatag ang iyang bugtong nga Anak. ” Duha lamang ka bersikulo sa ulahi, si Jesus miingon na usab nga siya mao “ang bugtong Anak sa Diyos.” (Juan 3:18) Sa dihang ang mga Hudiyo nagbutangbutang nga si Jesus mapasipalahon, siya mitubag: “Kamo ba nagaingon kanako nga gibalaan sa Amahan ug gisugo sa kalibotan, ‘Ikaw nagpasipala,’ tungod kay ako miingon, Ako mao ang Anak sa Diyos?” (Juan 10:36) Si Jesus wala mag-ingon nga siya ‘Diyos nga Anak’ kondili nga siya mao ang “Anak sa Diyos.”

 8. Unsang pamatuod ang gihatag sa usa ka opisyal sa kasundalohan ug niadtong uban kaniya?

⁸ Sa namatay si Jesus, bisan ang Romanong mga sundalo nga nagtindog sa duol nasayod nga si Jesus dili mao ang Diyos: “Ang opisyal sa kasundalohan ug kadtong nag-uban kaniya nga nagbantay kang Jesus, sa ilang nakita ang linog ug ang mga butang nga nahitabo, nahadlok kaayo, nga miingon: ‘Tino nga kini mao ang Anak sa Diyos.’” (Mateo 27 :54) Sila wala moingon, ‘kini mao ang Diyos’ o ‘kini mao ang Diyos nga Anak,’ tungod kay si Jesus ug ang iyang mga tinun-an nagtudlo nga si Jesus mao ang Anak sa Diyos, dili Diyos nga Labing Gamhanan diha sa tawhanong dagway.

 9, 10. Unsang gamhanang pamatuod ang gihatag diha sa mga Ebanghelyo mahitungod sa relasyon tali sa Diyos ug kang Jesus?

⁹ Ang Diyos mismo nagpamatuod nga si Jesus mao ang iyang pinalanggang Anak, sumala sa gipahayag sa magsusulat sa Bibliya si Mateo sa dihang si Jesus gibawtismohan. (Mateo 3:17) Ang ubang magsusulat sa Bibliya nagpahayag sa sama. Misulat si Marcos: “Ang usa ka tingog migula sa mga langit: ‘Ikaw ang akong Anak, ang pinalangga; giuyonan ko ikaw.’” (Marcos 1:11) Miingon si Lucas: “Ang usa ka tingog migula sa langit: ‘Ikaw ang akong Anak, ang pinalangga; giuyonan ko ikaw.’ ” (Lucas 3:22) Ug si Juan Bawtista, kinsa maoy nagbawtismo kang Jesus, nagpamatuod: “Ako nagpamatuod nga kini siya [Jesus] mao ang Anak sa Diyos.” (Juan 1:34) Busa ang Diyos mismo, tanang upat ka magsusulat sa Ebanghelyo, ug si Juan Bawtista tin-awng nag-ingon nga si Jesus mao ang Anak sa Diyos. Ug sa wala madugay sa ulahi, sa transpigurasyon o pagkabalhin sa dagway ni Jesus, ang susamang butang nahitabo: “Ang usa ka tingog [iya sa Diyos] migula gikan sa panganod, nga nag-ingon: ‘Kini mao ang akong Anak, ang usa nga napili, Patalinghogi ninyo siya.’ ”—Lucas 9:35.

¹⁰ Niining mga asoya, ang Diyos nag-ingon ba nga siya mao ang iyang kaugalingong anak, nga iyang gipadala ang iyang kaugalingon, ug iyang giuyonan ang iyang kaugalingon? Wala, ang Diyos nga Amahan, ang Maglalalang, maoy nag-ingon nga iyang gipadala ang iyang Anak si Jesus, usa ka separadong indibiduwal, sa pagbuhat sa buluhaton sa Diyos. Busa, sa tibuok Gregong Kasulatan ang mga pulong “Anak sa Diyos” gigamit sa pagtumong kang Jesus. Apan bisan kas-a kita dili makakita sa pamulong ‘Diyos nga Anak,’ tungod kay si Jesus dili man Diyos nga labing gamhanan. Siya mao ang Anak sa Diyos. Sila maoy duha ka lahing mga persona, ug walay teolohikanhong “misteryo” ang makausab nianang kamatuorana.

Ang Amahan Labaw sa Anak

11. Giunsa pagpakita ni Jesus nga ang Diyos labaw kaniya?

¹¹ Si Jesus nasayod nga siya dili sama sa iyang Amahan apan sa tanang paagi anaa sa ubos nga posisyon. Siya nasayod nga siya usa ka pinalanggang Anak nga may lalom nga gugma sa iyang Amahan. Kana ang hinungdan, matag karon ug unya, si Jesus nagpahayag sama sa mosunod: “Ang Anak dili makabuhat sa usa ka butang sa iyang kaugalingong pagbuot, apan kon unsa lamang nga iyang makita nga ginabuhat sa Amahan.” (Juan 5:19) “Ako nanaog gikan sa langit aron sa pagbuhat, dili sa akong kabubut-on, kondili sa kabubut-on sa nagpadala kanako.” (Juan 6:38) “Ang akong ginatudlo dili akoa, kondili iya sa nagpadala kanako.” (Juan 7:16) “Ako nakaila kaniya [Diyos], tungod kay ako usa ka hawas gikan kaniya, ug Siya nagpadala kanako.” (Juan 7:29) Ang usa nga nagapadala mao ang labaw. Ang usa nga gipadala mao ang ubos, ang alagad. Ang Diyos mao ang nagpadala. Si Jesus mao ang gipadala. Sila dili managsama. Sumala sa pagpahayag niini ni Jesus: “Ang usa ka ulipon dili labaw kay sa iyang agalon, ni ang usang gipadala labaw kay sa nagpadala kaniya.”—Juan 13: 16.

12. Unsang ilustrasyon ang nagapasundayag sa ubos nga posisyon ni Jesus kay sa Amahan?

¹² Kini gitin-aw usab diha sa usa ka ilustrasyong gihatag ni Jesus. Iyang gipanig-ingon ang iyang Amahan, si Jehova nga Diyos, ngadto sa tag-iya sa usa ka parrasan nga mipanaw sa halayo ug nagbilin sa parrasan aron atimanon sa mga saop—nga dayag nagahulagway sa Hudiyong klero. Sa nahaigong panahon, gipadala sa tag-iya ang usa ka ulipon aron makakuha sa pipila sa bunga gikan sa parrasan, apan gibunaIan siya sa mga saop ug ilang gipapauli walay dala. Dayon gipadala sa tag-iya ang ikaduhang ulipon, ug nahitabo ang samang butang. Iyang gipadala ang ikatulong ulipon, nga nakadawat sa samang tratasyon. Dayon ang tag-iya (Diyos) miingon: “Akong ipadala ang akong anak [Jesus] nga pinalangga. Lagmit nga ilang tahoron siya.” Apan ang daotang mga saop miingon: “ ‘Kini mao ang manununod; patyon ta siya, aron maato ang kabilin.’ Niana ilang gilabog siya sa gawas sa parrasan ug gipatay siya.” (Lucas 20:9-16) Sa makausa pa, kini nagatin-aw nga si Jesus nailalom sa Amahan, nga gipadala sa Amahan aron sa pagbuhat sa kabubut-on sa Amahan.

13. Unsang tin-awng mga pamulong sa Bibliya ang nagapakitang ang Diyos labaw kang kang Jesus?

¹³ Si Jesus mismo miingon: “Ang Amahan labaw kanako.” (Juan 14:28) Angay natong tuohan si Jesus, kay siya tinong nasayod sa kamatuoran bahin sa iyang relasyon sa iyang Amahan. Nasayod usab si apostol Pablo nga ang Diyos labaw kay kang Jesus, ug siya miingon: “Ang Anak [Jesus] mismo magapasakop usab sa iyang kaugalingon sa . . . Diyos.” (1 Corinto 15:28) Kini dugang makita sa pamulong ni Pablo sa 1 Corinto 11:3: “Ang ulo ni Kristo mao ang Diyos.” Giila ni Jesus nga siya may labaw nga Diyos sa miingon siya ngadto sa iyang mga tinun-an: “Ako moadto sa akong Amahan ug inyong Amahan ug ngadto sa akong Diyos ug inyong Diyos.”—Juan 20:17.

14. Unsang ubang kasulatan ang nagapakitang si Jesus dili mao ang Diyos nga Labing Gamhanan?

¹⁴ Gihisgotan ni Jesus ang pagkalabaw sa Diyos sa dihang ang inahan sa duha ka tinun-an mihangyo nga ang iyang mga anak makalingkod nga ang usa sa tuo ug ang lain sa wala ni Jesus sa dihang siya makaabot na sa iyang Gingharian. Siya mitubag: “Kining pagpalingkod sa akong tuo nga kamot ug sa akong wala dili ako ang pagtugot.” (Mateo 20:23) Kon si Jesus mao pa ang Diyos nga labing gamhanan siya makahatag unta niana. Apan dili siya makahatag. Ang iyang Amahan mao ang magatugot niana. Sa samang paagi, sa nag-asoy sa iyang tagna mahitungod sa kataposan niining sistema sa mga butang, si Jesus miingon: “Mahitungod nianang adlawa o taknaa walay nahibalo, bisan ang mga manulonda sa langit ni ang Anak, kondili ang Amahan lamang.” (Marcos 3:32) Kon si Jesus mao pa ang Diyos nga Labing Gamhanan, siya mahibalo unta nianang adlawa ug taknaa. Apan siya wala mahibalo kay siya dili man mao ang Diyos nga nahibalo sa tanan. Siya mao ang Anak sa Diyos ug wala mahibalo sa tanang butang nahibaloan sa iyang Amahan.

15. Sa dihang si Jesus hapit nang mamatay,giunsa niya pagpakita ang pagpasakop sa Diyos?

¹⁵ Sa hapit nang mamatay si Jesus, siya nagpakitag pagpasakop sa iyang Amahan diha sa pag-ampo: “Amahan, kon buot mo, kuhaa kining kopa gikan kanako. Bisan pa niana, pasagdi nga, dili ang akong kabubut-on, kondili ang imoha ang mamatuman.” (Lucas 22:42) Kang kinsa man si Jesus miampo? Sa iyang kaugalingon? Dili, siya nag-ampo ngadto sa iyang Amahan sa langit. Kini tin-awng gipakita sa iyang pag-ingon: “Pasagdi nga, dili ang akong kabubut-on, kondili ang imoha mao ang mamatuman.” Ug unya, sa iyang pagkamatay, si Jesus mituwaw: “Diyos ko, Diyos ko, nganong gibiyaan mo ako?” (Marcos 15:34) Kang kinsa man si Jesus mituwaw? Sa iyang kaugalingon? Dili, siya mituwaw ngadto sa iyang Amahan nga atua sa langit.

16. Sa unsang paagi ang pagkamatay ug pagkabanhaw ni Jesus nagapakitang siya dili mahimong mao ang Diyos nga labing gamhanan mismo?

¹⁶ Sa pagkamatay ni Jesus, siya didto sa lubnganan sulod sa mga tulo ka adlaw. Kinsay nagbanhaw kaniya? Sanglit siya patay man, Dili mahimong siya ang nagbanhaw sa iyang kaugalingon. Apan kon siya dili tinuod nga patay, nan siya dili makabayad sa lukat sa sala ni Adan. Apan siya namatay gayod, ug wala maglungtad sulod sa mga tulo ka adlaw. Si apostol Pedro nagsugilon kanato kon kinsay nagbanhaw kang Jesus: “Ang Diyos nagbanhaw kaniya pinaagi sa paglangkat sa mga kasakit sa kamatayon.” (Buhat 2:24) Ang labaw, ang Diyos nga Labing Gamhanan, nagbanhaw sa usa nga ubos, ang iyang pinalanggang Anak, si Jesus, gikan sa mga patay. Sa pag-ilustrar: Sa gibanhaw ni Jesus si Lasaro gikan sa mga patay, kinsa man ang labaw? Si Jesus mao ang labaw, sanglit siya nakapabuhi man ni Lasaro gikan sa mga patay. (Juan 11:41-44) Kadto sama sa dihang ang Diyos nagbanhaw kang Jesus. Ang Diyos mao ang labaw, sanglit siya nakapabuhi kang Jesus gikan sa mga patay.

17. Unsa ang laing ebidensiya nga si Jesus dili mao ang Diyos?

¹⁷ Si Jesus dili mahimong mao ang Diyos mismo, kay si Jesus gilalang man sa Diyos. Matikdi giunsa sa paghubad sa Emphatic Diaglott ni Benjamin Wilson ang Apocalipsis (Pinadayag) kapitulo 3 bersikulo 14: “Kining mga butanga ginaingon sa Amen, ang matinumanon ug matuod nga saksi [Jesus], ang sinugdanan sa kalalangan sa Diyos.” Sa susama, ang Colosas 1:15, 16 nagaingon bahin kang Jesus: “Siya mao ang dagway sa Diyos nga dili makita, ang panganay sa tanang linalang; tungod kay pinaagi kaniya ang tanan ubang butang nalalang sa mga langit ug sa ibabaw sa yuta. Ang tanang ubang butang nalalang pinaagi kaniya ug alang kaniya.” Busa sa langit ang Diyos nga labing gamhanan direktang naglalang sa iyang Anak ug dayon “pinaagi kaniya,” o “agi kaniya,” naglalang sa ubang butang, sama ra nga ang usa ka batid nga maghubuhat tingali may usa ka nabansay nga empliyado sa pagbuhat alang kaniya. Kadtong mga butang nga gilalang “pinaagi kaniya” wala mag-apil kang Jesus mismo, kay ang Diyos naglalang na kaniya. Busa, siya gitawag ang “panganay,” ang “bugtong inanak.” Kon ang usa ka anak mao ang panganay, ang hugtong inanak, kini wala gayod magkahulogang ang anak mao ra ang amahan. Kini sa tanang panahon nagkahulogang adunay duha ka nagkalaing mga personalidad nga nalangkit, ang amahan ug anak.

Balaang Espiritu—Usa ka Persona o Aktibong Gahom?

18. Unsay gitudlo sa Bibliya bahin sa balaang espiritu?

¹⁸ Komosta ang giingong ikatulong persona sa Trinidad, ang balaang espiritu, nga giingong sama sa gahom, substansiya, ug kawalay-kataposan sa amahan ug sa Anak? Sa bisan diin sa Bibliya ang balaang espiritu wala hisgoti uban sa Diyos ug kang Kristo ingong sama kanila. Pananglitan, sa panahon sa pagbawtismo kang Jesus, ang Marcos 1:10 nagaingon nga ang balaang espiritu nanaog diha kang Jesus “sama sa usa ka salampati,” dili sa tawhanong dagway. Ang balaang espiritu dili usa ka persona nga miabot kang Jesus kondili mao ang aktibong gahom sa Diyos. Ang maong gahom gikan sa Diyos nakapaarang kang Jesus sa pag-ayo sa masakiton ug pagbanhaw sa patay. Sumala sa ginaingon sa Lucas 5:17 diha sa Diaglott: “Ang Dakong Gahom sa Ginoo [Diyos] diha kaniya [Jesus] aron sa pagpang-ayo.” Sa ulahi, sa Pentekostes, ang mga apostol gihatagan usab ug gahom gikan sa Diyos aron sa pagpang-ayo sa masakiton ug pagbanhaw sa mga patay. Kadto ba naghimo kanilang bahin sa “diyosnong kinaiya” o godhead? Wala, sila yanong gihatagag gahom gikan sa Diyos, pinaagi ni Kristo, aron sa pagbuhat sa butang dili kasagarang mabuhat sa mga tawo.

19. Nganong dili posible nga ang balaang espiritu mao ang ikatulong persona sa Trinidad?

¹⁹ Kanang samang aktibong gahom gihisgo-tan sa Efeso 5:18, diin si Pablo nagatambag: “Padayon nga kamo mapuno sa espiritu.” Sa susama, ang Buhat 7:55 nagaingong si Esteban “napuno sa balaang espiritu.” Ug sa Pentekostes, ang mga sumusunod ni Jesus “tanan napuno sa balaang espiritu.” (Buhat 2:4) Ang usa ka tawo ba mapuno sa laing persona? Dili, apan siya mapuno sa gahom nga nagagikan sa Diyos. Kanang balaang espiritu mao ang samang gahom nga gigamit sa Diyos sa paglalang sa uniberso. Sumala sa ginaingon sa Genesis 1:2: “Ang aktibong gahom sa Diyos naglihok ngadto nganhi sa ibabaw sa katubigan.”

20. Unsang panan-awon ang nakita ni Esteban nga dugang nagapasundayag nga ang Trinidad dili matuod?

²⁰ Human sa pagkabanhaw ni Jesus, si Esteban nakabaton sa usa ka panan-awon sa langit ug “nakakita sa himaya sa Diyos ug kang Jesus nga nagtindog sa tuo nga kamot sa Diyos.” (Buhat 7:55) Busa, duha ka separadong persona ang didto sa langit: (1) ang Diyos ug (2) ang nabanhawng si Jesu-Kristo. Walay balaang espiritu ang gihisgotan sa maong panan-awon tungod kay kadto dili man ikatulong persona sa Trinidad. Ang balaang espiritu, kay mao ang aktibong gahom sa Diyos, magagikan sa Diyos apan dili ingong separadong persona. Kana ang hinungdan si Esteban nakakitag duha lamang ka persona, dili tulo.

21, 22. (a) Unsay giangkon sa usa ka relihiyosong ensiklopedia bahin sa balaang espiritu? (b) Unsang punto ang iapil sa among sunod nga artikulo?

²¹ Bahin sa balaang espiritu, ang New Catholic Encyclopedia nagaangkon: “Ang D[aang] T[estamento] tin-awng wala maghulagway sa espiritu sa Diyos ingong persona, diha kaha sa estriktong pinilosopong diwa, ni sa Semitikong diwa. Ang espiritu sa Diyos yanong mao ang gahom sa Diyos. Kon kini usahay ihulagway ingong lahi sa Diyos, tungod kini kay ang gininhawa ni Yahweh nagalihok sa gawasnong paagi.” Kini nagaingon usab: “Ang kinabag-an sa mga teksto sa B[ ag-ong] T[estamento] nagapadayag sa espiritu sa Diyos ingong usa ka butang, dili nga persona; kini makita ilabina diha sa pagtumbas sa espiritu ug sa gahom sa Diyos.”

²² Tungod niining tanang kamatuoran, kining “pundamental” nga doktrinang Trinidad sa Kakristiyanohan dili mahimong tinuod. Ang kaugalingong Pulong sa Diyos nagapanghimakak nianang pangangkona. Kini tin-awng nagapakita nga si Jehova nga Diyos mao ang mahigugmaong Amahan ug nga si Jesu-Kristo mao ang iyang pinalanggang Anak, usa ka Anak nga may dakong gugma sa iyang Amahan nga siya andam magmasinugtanon hangtod sa kamatayon. Ugaling, ang pipila nagpatuo nga adunay kasulatan nga daw nagapaluyo sa Trinidad, busa sa among sunod nga artikulo, among susihon ang pipila kanila. Gawas pa, hisgotan namo kon nganong kining doktrinaha nahimong dakong bahin sa Kakristiyanohan ug kon diin kini gikan.

Unsa ang Imong Tubag?

◻ Unsay gitudlo sa Bibliya bahin sa Diyos ug kang Jesus?

◻ Giunsa pagpakita sa Kasulatan ang relasyon sa Amahan ug sa Anak?

◻ Unsa ang pila ka kasulatan nga nagapakitang ang Diyos labaw kay kang Jesus?

◻ Nganong ang balaang espiritu dili usa ka bahin sa Trinidad?

[Hulagway sa panid 13]

Si Jesus nagpahayag: “Ang Amahan labaw kanako”