Tabangi ang mga Tawo nga “Momata Gikan sa Pagkatulog”
“Kamo nasayod sa panahon, nga takna na aron kamo momata gikan sa pagkatulog.”—ROMA 13:11.
MAKAPATIN-AW KA BA?
Nganong hinungdanon nga magpabiling nagtukaw sa espirituwal ang mga Kristohanon?
Nganong hinungdanon nga magpabiling nagtukaw sa espirituwal ang mga Kristohanon?
Nganong hinungdanon ang kalulot ug kalumo diha sa atong ministeryo?
1, 2. Sa unsang diwa nga kinahanglang momata ang kadaghanang tawo?
KADA tuig, linibo ang nangamatay tungod kay giduka o nakatulog samtang nagdrayb. Ang uban nawad-ag trabaho kay wala kamatag sayo maong na-late o kaha nakatulog sa trabaho. Apan mas seryoso ang epekto sa espirituwal nga pagduka. Kanay rason nga ang Bibliya nag-ingon: “Malipayon ang usa nga pabiling magatukaw.”—Pin. 16:14-16.
2 Samtang nagsingabot ang dakong adlaw ni Jehova, ang kadaghanan nangatulog sa espirituwal nga diwa. Bisan ang mga lider sa Kakristiyanohan nag-ingon nga ang mga membro sa ilang simbahan nangatulog. Unsa ang espirituwal nga pagkatulog? Nganong hinungdanon nga ang matuod nga mga Kristohanon pabiling nagtukaw? Unsaon nato pagtabang ang uban nga momata gikan sa espirituwal nga pagkatulog?
UNSA ANG ESPIRITUWAL NGA PAGKATULOG?
3. Unsay kahimtang sa usa nga natulog sa espirituwal?
3 Ang tawong natulog sagad dili aktibo. Sa kasukwahi, kadtong natulog sa espirituwal mahimong puliki kaayo—apan dili sa espirituwal nga mga butang. Sila lagmit puliki kaayo alang sa adlaw-adlawng panginahanglan, kalingawan, kadungganan, o pagpangitag bahandi. Tungod niini, wala na sila magtagad sa ilang espirituwal nga mga panginahanglan. Apan kadtong nagtukaw sa espirituwal nahibalo nga kita nagkinabuhi “sa kataposang mga adlaw,” busa kutob sa mahimo sila puliki sa pagbuhat sa kabubut-on sa Diyos.—2 Ped. 3:3, 4; Luc. 21:34-36.
4. Unsay gipasabot sa tambag: “Dili kita mangatulog sama sa ginahimo sa uban”?
4 Basaha ang 1 Tesalonica 5:4-8. Dinhi si apostol Pablo nag-awhag sa iyang mga isigkamagtutuo nga dili “mangatulog sama sa ginahimo sa uban.” Unsay iyang gipasabot? Ang usa ka paagi nga kita ‘makatulog’ mao ang pagbalewala sa moral nga mga sukdanan ni Jehova. Ang laing paagi mao ang pagbalewala sa kamatuoran nga hapit nang laglagon ni Jehova ang mga daotan. Angay natong paneguroon nga dili kita maimpluwensiyahan sa paagi sa pagkinabuhi ug mga tinamdan sa maong daotang mga tawo.
5. Unsay tinamdan niadtong nakatulog sa espirituwal?
5 Ang pipila ka tawo naghunahuna nga walay Diyos nga maghukom kanila. (Sal. 53:1) Ang uban naghunahuna nga ang Diyos dili interesado kanato, busa dili kinahanglang mainteres kita kaniya. Ang uban usab mibating mahimo silang higala sa Diyos kon duna silay relihiyon. Kining mga tawhana nakatulog sa espirituwal ug kinahanglang makamata. Unsaon nato sila pagtabang?
ANGAY KITANG MAGPABILING NAGTUKAW
6. Nganong ang mga Kristohanon angayng maningkamot nga magpabiling nagtukaw?
6 Makapukaw lang kita sa uban kon kita mismo nagmata. Unsay nalangkit niana? Ang Bibliya naglangkit sa simbolikong pagkatulog sa “mga buhat nga iya sa kangitngit”—hudyaka, paghuboghubog, pakighilawas, malaw-ayng panggawi, panag-away, ug pangabugho. (Basaha ang Roma 13:11-14.) Tingali lisod likayan ang maong mga buhat. Gikinahanglan ang pagkamabinantayon. Kon dili seryosohon sa drayber ang kapeligrohan nga makatulog samtang nagdrayb, gipameligro niya ang iyang kinabuhi. Hinungdanon gayod nga ilhon kanunay sa usa ka Kristohanon nga ang espirituwal nga pagkatulog makamatay!
7. Sa unsang paagi ang sayop nga panglantaw bahin sa mga tawo makaapektar kanato?
7 Pananglitan, ang usa ka Kristohanon lagmit maghunahuna nga ang tanan diha sa iyang teritoryo dili na gyod modawat sa maayong balita. (Prov. 6:10, 11) Siya lagmit moingon, ‘Kon wala na gyoy mosanong, nganong maghago pa man sa pagtabang sa mga tawo?’ Tinuod daghan karon ang natulog sa espirituwal, apan mahimong mausab ang ilang kahimtang ug tinamdan. Ang uban makamata ug mosanong. Ug makatabang kita kanila kon kita mismo pabiling nagtukaw, sama sa pagsulay ug bag-o ug madanihong mga paagi sa pagsangyaw. Aron makapabiling nagtukaw, kinahanglan natong hinumdoman kon nganong hinungdanon ang atong ministeryo.
NGANONG HINUNGDANON ANG ATONG MINISTERYO?
8. Nganong hinungdanon kaayo ang atong ministeryo?
8 Hinumdomi nga bisag unsa pay sanong sa mga tawo, ang atong pagsangyaw nagpasidungog kang Jehova ug dunay papel sa katumanan sa iyang katuyoan. Sa dili madugay, kadtong dili modawat sa maayong balita pagalaglagon. Ang sanong sa mga tawo sa atong pagsangyaw maoy basehan sa paghukom. (2 Tes. 1:8, 9) Dugang pa, sayop ang paghunahuna nga dili na ta kinahanglang magkugig sangyaw total “aduna [may] pagkabanhaw sa mga matarong ug sa mga dili-matarong.” (Buh. 24:15) Atong nakat-onan sa Bibliya nga kadtong gihukman nga “kanding” makaagom ug “walay kataposang kalaglagan.” Ang atong pagsangyaw nagpadayag sa kaluoy sa Diyos, nga naghatag ug kahigayonan sa mga tawo nga magbag-o ug makabatog “kinabuhing walay kataposan.” (Mat. 25:32, 41, 46; Roma 10:13-15) Kon dili kita mosangyaw, unsaon man pagkadungog sa mga tawo sa mensahe nga makaluwas sa ilang kinabuhi?
9. Sa unsang paagi ang pagsangyaw sa maayong balita nakabenepisyo kanimo ug sa uban?
9 Kita usab nakabenepisyo sa pagsangyaw sa maayong balita. (Basaha ang 1 Timoteo 4:16.) Dili ba ang paghisgot bahin kang Jehova ug sa paglaom sa Gingharian nakapalig-on sa imong pagtuo ug gugma sa Diyos? Dili ba nakatabang kini kanimo sa pag-ugmad sa Kristohanong mga hiyas? Dili ba ang pagsangyaw nakadugang sa imong kalipay? Daghan ang nalipay dihang ang ilang gitun-an sa Bibliya gitabangan sa balaang espiritu sa pagbag-o sa ilang kinabuhi.
MAGMAPANIIRON
10, 11. (a) Giunsa pagpakita ni Jesus ug Pablo nga sila alerto ug mapaniiron? (b) Iilustrar kon sa unsang paagi ang pagkaalerto ug pagkamapaniiron makapauswag sa atong ministeryo.
10 Ang interes sa mga tawo sa maayong balita mahimong mapukaw sa lainlaing paagi. Busa ang mga Kristohanon angayng abtik nga maniid. Si Jesus ang atong panig-ingnan. Kay hingpit, iyang nakita ang gitagong kasuko sa usa ka Pariseo, ang sinserong paghinulsol sa usa ka makasasalang babaye, ug ang pagsakripisyo sa usa ka babayeng balo. (Luc. 7:37-50; 21:1-4) Si Jesus makatagana sa espirituwal nga panginahanglan sa matag usa. Hinuon, ang usa ka alagad sa Diyos dili kinahanglang hingpit aron mahimong maayong tigpaniid. Gipakita kana ni apostol Pablo. Gipailin-ilin niya ang iyang presentasyon aron matabangan ang tanang matang sa tawo.—Buh. 17:22, 23, 34; 1 Cor. 9:19-23.
11 Kon kita alerto ug mapaniiron sama ni Jesus ug Pablo, mahibalo kita kon unsaon pagpukaw sa interes niadtong atong mahibalag. Pananglitan, dihang moduol sa mga tawo, panid-i ang ilang kultura, interes, o kahimtang sa pamilya. Tingali imong mamatikdan kon unsay ilang ginabuhat ug matinahorong komentohan kana aron makasugod ug panaghisgot.
12. Samtang nagsangyaw, nganong mag-amping kita sa atong pagpakig-estorya sa atong partner?
12 Ang abtik nga tigpaniid maglikay sa mga kabaldahan. Samtang naa sa ministeryo, makapadasig ang pagpakig-estorya sa atong partner. Apan atong hinumdoman nga kita nakig-ambit sa ministeryo aron sangyawan ang uban. (Eccl. 3:1, 7) Busa dihang magpadulong sa sunod nga balay, angay kitang mag-amping nga ang atong pag-estoryahay dili makabalda sa atong ministeryo. Ang usa ka paagi nga mapokus kanunay ang atong hunahuna sa ministeryo mao ang paghisgot kon unsay isulti ngadto sa atong mahibalag. Ug bisag makatabang usahay ang cellphone diha sa ministeryo, paneguroon nato nga dili kini makabalda sa atong pagpakig-estorya sa tagbalay.
IPAKITA ANG PERSONAL NGA INTERES
13, 14. (a) Unsaon nato pagkahibalo kon unsay makapainteres sa usa ka tawo? (b) Unsa kahay makapukaw sa interes sa mga tawo bahin sa espirituwal nga mga butang?
13 Ang mga ministro nga nagtukaw ug alerto maminaw pag-ayo sa ilang kaestorya. Unsay imong ipangutana sa tagbalay aron ikapahayag niya ang iyang pagbati? Nabalaka ba siya sa pagdaghan sa relihiyon, sa kapintasan sa ilang lugar, o sa kapakyasan sa gobyerno? Mapukaw ba nimo ang iyang interes bahin sa Diyos pinaagi sa paghisgot sa talagsaong disenyo sa buhing mga butang o kon unsa ka praktikal ang mga tambag sa Bibliya? Ang pag-ampo nakapainteres sa halos tanang tawo, bisan gani sa pipila ka ateyista. Daghan ang naghunahuna kon duna bay namati sa mga pag-ampo. Ang uban nainteres niini nga mga pangutana: Dunggon ba sa Diyos ang tanang pag-ampo? Kon dili, unsay atong himoon aron dunggon kita sa Diyos?
14 Daghan kitag makat-onan bahin sa pagsugod ug mga panaghisgot pinaagi sa pagpaniid sa hanas nga mga magmamantala. Matikdi kon giunsa nila paglikay nga dili hunahunaon sa tagbalay nga sila gisukitsukit. Sa unsang paagi ang ilang tingog ug ekspresyon sa nawong nagpakita nga sila interesado sa opinyon sa tagbalay?—Prov. 15:13.
KALULOT UG KAHANAS
15. Nganong angayng magpakitag kalulot dihang magsangyaw?
15 Kon ikaw nahinanok, ganahan ka bang pukawon? Daghan ang masuko kon kaliton silag pukaw. Sagad gusto nilang hinayhinayon lang. Susama usab niini ang pagpukaw sa mga tawong natulog sa espirituwal. Pananglitan, kon ang tagbalay nasuko sa imong pagduaw, sagad unsay maayong buhaton? Sabta ang iyang gibati, pasalamati siya, ug kalmadong mobiya. (Prov. 15:1; 17:14; 2 Tim. 2:24) Ang imong kalulot lagmit magpalihok kaniya nga positibong mosanong kon may Saksi nga moduaw pag-usab.
16, 17. Sa unsang paagi kita makapakitag pagkamasinaboton diha sa ministeryo?
16 Sa ubang kahimtang, mahimo nimong buntogon ang negatibong reaksiyon. Basin may moingon, “Salamat na lang. Duna na koy relihiyon” o, “Dili ko interesado,” aron lang taposon ang panaghisgot. Apan uban ang kahanas ug kalulot, makasukna kag pangutana nga makapukaw sa interes sa tagbalay bahin sa espirituwal nga mga butang.—Basaha ang Colosas 4:6.
17 Usahay dihang makahibalag kitag mga tawo nga walay panahong mamati, mas maayong sabton ang ilang kahimtang ug mobiya. Apan may mga higayon nga pwede kang mosultig mubo ug makapainteres nga mensahe. Ang ubang igsoon makabasag usa ka makapahinuklog nga teksto ug makabilig pangutana sa tagbalay—nga tanan wala ray usa ka minuto. Usahay ang ilang mubong presentasyon nakapukaw pag-ayo sa interes sa tagbalay ug gusto pa niining ipadayon ang panaghisgot. Nganong dili nimo kini sulayan kon itugot sa kahimtang?
18. Unsay atong himoon aron mas epektibo kita sa di-pormal nga pagsangyaw?
18 Kon andam kitang mosangyaw sa di-pormal nga paagi, kita makatabang sa mga tawo nga atong mahibalag kada adlaw nga mainteres sa maayong balita. Daghang igsoon ang nagbutag mga basahon diha sa ilang bulsa o handbag. Duna sab silay giandam nga teksto kon dunay kahigayonan sa pagbasa niana. Mahimo kang mangutana sa magtatan-aw sa pag-alagad o sa mga payunir sa inyong kongregasyon kon unsaon kini paghimo.
PUKAWA ANG MGA PARYENTE SA MALUMONG PAAGI
19. Nganong dili kita mohunong sa pagtabang sa atong mga paryente?
19 Siyempre gusto natong tabangan ang atong mga paryente nga modawat sa maayong balita. (Jos. 2:13; Buh. 10:24, 48; 16:31, 32) Kon wala sila mosanong sa atong unang paningkamot, tingali magpanuko na ta sa pagtabang nila pag-usab. Lagmit maghunahuna ta nga wala na tay mahimo o masulti nga makapausab sa ilang tinamdan. Apan basin may mga hitabo nga nakapausab sa kinabuhi o panglantaw sa imong mga paryente. O kaha mas hanas ka na sa pagpatin-aw sa kamatuoran, nga tingali magpatungha karon ug positibong resulta.
20. Sa unsang paagi kita magmataktikanhon dihang makigsulti sa mga paryente?
20 Kinahanglang sensitibo kita sa pagbati sa atong mga paryente. (Roma 2:4) Dili ba angay usab kitang malulotong makig-estorya kanila sama sa atong mahibalag sa pagsangyaw? Pakigsulti sa malumo ug matinahorong paagi. Bisan dili nimo sila pirmeng sangyawan, ipakita kon sa unsang paagi ang kamatuoran dunay maayong epekto kanimo. (Efe. 4:23, 24) Ipakita nga nahimong mas makahuloganon ang imong kinabuhi kay natudloan ka ni Jehova. (Isa. 48:17) Mahimong panig-ingnan sa Kristohanong pagkinabuhi ngadto sa imong mga paryente.
21, 22. Iasoy ang usa ka kasinatian nga nagpakita kon nganong hinungdanon nga dili kita mohunong sa pagtabang sa mga paryente.
21 Di pa dugay, usa ka sister ang misulat: “Pirme nakong sangyawan ang akong 13 ka igsoon pinaagi sa pulong ug panggawi. Kada tuig, nagapadala kog sulat sa matag usa kanila. Apan sulod sa 30 ka tuig, ako ra gihapon ang Saksi sa among pamilya.”
22 Ang sister mipadayon: “Usa ka adlaw niana, gitawgan nako ang akong magulang nga babaye nga nagpuyo sa layong lugar. Iya kong giingnan nga mihangyo siya sa ilang lider sa simbahan nga tudloan siya sa Bibliya, apan wala siya tudloi niini. Dihang ako siyang giingnan nga gusto kong motabang niya, siya miingon: ‘Sige, pero prangkahan tika: Dili gyod ko mag-Saksi.’ Human nako siya padad-i sa librong Unsay Tinuod nga Gitudlo sa Bibliya?, manawag ko niya matag pipila ka adlaw. Apan wala pa niya mabasa ang libro. Sa kataposan, akong gipakuha niya ang libro, ug sulod sa mga 15 minutos diha sa telepono, among gibasa ug gihisgotan ang pipila sa gikutlong mga teksto. Pipila pa ka tawag human niadto, gusto na niyang magtuon ug labaw pa sa 15 minutos. Dayon siya nay manawag nako aron magtuon, usahay mao pay pagmata nako ug usahay kaduha sa usa ka adlaw. Pagkasunod tuig, siya nabawtismohan, ug paglabayg usa ka tuig, siya nagpayunir.”
23. Nganong padayon natong pukawon ang mga tawo gikan sa espirituwal nga pagkatulog?
23 Gikinahanglan nato ang kahanas ug kamapinadayonon sa pagpukaw sa mga tawo gikan sa espirituwal nga pagkatulog. Daghan gihapon ang misanong sa atong mga paningkamot nga pukawon sila. Sa aberids, kapin sa 20,000 ang nabawtismohan kada bulan. Busa atong ipadapat ang tambag ni Pablo kang Arquipo sa unang siglo: “Bantayi kanunay ang ministeryo nga imong gidawat diha sa Ginoo, nga imong matuman kini.” (Col. 4:17) Hisgotan sa sunod artikulo kon unsay kahulogan sa pagsangyaw uban ang pagkadinalian.
[Kahon sa panid 13]
KON SA UNSANG PAAGI KA MAKAPABILING NAGTUKAW
▪ Magmapuliki sa pagbuhat sa kabubut-on sa Diyos
▪ Likayi ang mga buhat nga iya sa kangitngit
▪ Ilha ang kapeligrohan sa espirituwal nga pagkatulog
▪ Magmapositibo sa mga tawo sa imong teritoryo
▪ Sulayi ang bag-ong mga paagi sa pagsangyaw
▪ Hinumdomi ang kahinungdanon sa imong ministeryo