Padayong Palig-ona ang Imong Paglaom

 1. Unsang paglaom ang gihatag ni Jehova kanato?

GIHATAGAN ta ni Jehova ug nindot kaayong paglaom nga mabuhi hangtod sa hangtod. Ang uban naay paglaom nga mabuhi sa langit hangtod sa hangtod ingong imortal nga espiritung linalang. (1 Cor. 15:50, 53) Pero ang kadaghanan naay paglaom nga mabuhi sa yuta hangtod sa hangtod, nga malipayon ug naay hingpit nga panglawas. (Pin. 21:3, 4) Naghinamhinam man ta nga mabuhi hangtod sa hangtod sa langit o sa yuta, importante kaayo nato ang atong paglaom.

 2. Asa gibase ang atong paglaom, ug nganong makaingon ta ana?

² Ang pulong “paglaom,” sumala sa pagkagamit sa Bibliya, puwedeng magkahulogan ug “pagdahom nga moabot ang maayong mga butang.” Segurado tang matuman ang atong gilaoman kay naggikan ni kang Jehova. (Roma 15:13) Nahibalo ta kon unsay iyang gisaad, ug nahibalo ta nga tumanon gyod niya ang iyang mga saad. (Num. 23:19) Kombinsido ta nga gusto gyod ni Jehova nga tumanon ang tanan niyang gisaad, ug kaya gyod nâ niyang himoon. Busa ang atong paglaom dili imahinasyon o pangandoy lang; tinuod ni nga paglaom nga gibase sa ebidensiya.

 3. Unsay atong hisgotan niining artikuloha? (Salmo 27:14)

³ Gihigugma ta sa atong langitnong Amahan, ug gusto niya nga mosalig ta niya. (Basaha ang Salmo 27:14.) Kon molaom gyod ta sa mga saad ni Jehova, malahutay nato ang mga pagsulay ug magmalipayon ta ug dili mahadlok bisag unsa pay mahitabo. Konsiderahon nato kon sa unsang paagi ang atong paglaom manalipod nato. Ato unang hisgotan kon nganong ang paglaom samag angkla ug helmet. Dayon atong hisgotan kon unsaon nato pagpalig-on ang atong paglaom.

 4. Nganong ang paglaom gipakasamag angkla? (Hebreohanon 6:19)

⁴ Sa sulat ni apostol Pablo sa mga Hebreohanon, ang atong paglaom iyang gipakasama sa angkla. (Basaha ang Hebreohanon 6:19.) Pirme siyang mosakayg barko, maong nahibalo siya nga ang angkla gigamit aron dili mapadpad ang barko. Dihay higayon nga nagsakay siyag barko ug naabtan siyag kusog kaayong unos. Niadtong panahona, iyang nakita ang mga marinero nga nag-ariya sa mga angkla aron ang barko dili mapadpad ug masangyad sa dagkong bato. (Buh. 27:29, 39-41) Sama nga ang angkla motabang aron dili mapadpad palayo ang barko, ang atong paglaom motabang sab nga dili ta mapadpad palayo kang Jehova dihang duna tay samag unos nga mga problema. Ang atong lig-ong paglaom motabang nato nga magpabiling kalmado bisan pa sa mga problema kay kombinsido ta nga moarang-arang ra ang kahimtang. Hinumdomi nga gipasidan-an ta ni Jesus nga lutoson ta. (Juan 15:20) Busa ang pagpamalandong sa ganti nga gisaad ni Jehova makatabang nato nga makapadayon sa pag-alagad kaniya.

 5. Sa unsang paagi ang paglaom nakatabang kang Jesus sa hapit na siyang mamatay?

⁵ Konsideraha kon sa unsang paagi ang paglaom nakatabang kang Jesus nga magpabiling matinumanon bisan pag nahibalo siya nga hapit na siyang makaagom ug sakit nga kamatayon. Niadtong Pentekostes 33 C.E., gikutlo ni apostol Pedro ang tagna sa basahon sa Salmo nga naghisgot kon unsa ka kalmado ug ka masaligon si Jesus: “Magpuyo ko nga may paglaom; kay dili ko nimo biyaan sa Lubnganan ug dili nimo itugot nga madunot ang unod sa maunongon kanimo. . . . Pun-on ko nimog tumang kalipay diha sa imong atubangan.” (Buh. 2:25-28; Sal. 16:8-11) Bisag nahibalo si Jesus nga mamatay siya, lig-on ang iyang paglaom nga banhawon siya sa Diyos ug bation unya niya ang kalipay kay makauban niya pag-usab ang iyang Amahan sa langit.​—Heb. 12:2, 3.

 6. Unsay giingon sa usa ka brader bahin sa paglaom?

⁶ Ang atong paglaom nakatabang sa daghang igsoon nga makalahutay. Konsideraha ang ehemplo ni Leonard Chinn, usa ka matinumanong brader sa England. Niadtong Gubat sa Kalibotan I, gipriso siya kay dili siya magsundalo. Duha ka bulan siyang gibartolina, ug dayon gipugos nga mohimog bug-at kaayong trabaho. Siya miingon: “Tungod sa akong naeksperyensiyahan, nakita nako nga importante kaayo ang paglaom aron makalahutay. Naa ang mga ehemplo ni Jesus, mga apostoles, ug sa mga propeta. Ug naa pod ang nindot nga mga saad sa Bibliya. Kining tanan makahatag natog paglaom sa umaabot ug makapalig-on nato nga molahutay.” Ang paglaom nagsilbing angkla kang Leonard, ug magsilbi pod ning angkla nato.

 7. Nganong ang mga pagsulay makapalig-on sa atong paglaom? (Roma 5:3-5; Santiago 1:12)

⁷ Dihang malahutay nato ang mga pagsulay ug maeksperyensiyahan ang tabang ni Jehova, makita nato nga iya tang giuyonan. Tungod niini, mas molig-on ang atong paglaom. (Basaha ang Roma 5:3-5; Santiago 1:12.) Busa ang atong paglaom mas lig-on na kay sa niadtong una natong nakat-onan ang kamatuoran. Gusto ni Satanas nga madaog ta sa mga pagsulay, pero ato ning malahutay sa tabang ni Jehova.

 8. Nganong ang paglaom samag helmet? (1 Tesalonica 5:8)

⁸ Sa Bibliya, ang atong paglaom gipakasama pod sa helmet. (Basaha ang 1 Tesalonica 5:8.) Ang sundalo magsul-ob ug helmet aron dili maunsa ang iyang ulo dihang atakehon siya sa kaaway. Sa atong pagpakig-away kang Satanas, kinahanglan natong panalipdan ang atong hunahuna. Naggamit siyag lainlaing paagi aron tentalon ta ug impluwensiyahan ang atong panghunahuna. Sama nga ang helmet manalipod sa ulo sa sundalo, ang atong paglaom manalipod sab sa atong panghunahuna aron makapabilin tang matinumanon kang Jehova.

 9. Unsay kahimtang sa mga tawo nga walay paglaom?

⁹ Ang atong paglaom nga mabuhi sa walay kataposan motabang nato sa paghimog maalamong mga desisyon. Pero kon mohuyang ang atong paglaom ug magpokus na ta sa atong mga tinguha, posibleng mawala sa atong hunahuna ang saad nga kinabuhing walay kataposan. Konsideraha ang nahitabo kaniadto sa ubang Kristohanon sa Corinto. Nawad-an silag pagtuo sa importante kaayong saad sa Diyos​—ang paglaom sa pagkabanhaw. (1 Cor. 15:12) Si Pablo nag-ingon nga kadtong wala magtuo sa pagkabanhaw nagpokus lang sa ilang presenteng kinabuhi. (1 Cor. 15:32) Daghan karon ang wala magtuo sa mga saad sa Diyos, ug tungod niana nagpokus lang sila sa ilang kinabuhi karon ug gipahimuslan nila ang bisan unsa nga makahatag nilag kalipay. Pero lahi ta kay may pagsalig ta sa mga saad sa Diyos. Ang atong paglaom samag helmet nga manalipod sa atong hunahuna ug motabang nato nga dili magpatuyang sa atong kinabuhi, nga makadaot sa atong relasyon kang Jehova.​—1 Cor. 15:33, 34.

10. Sa unsang paagi ang paglaom manalipod nato sa sayop nga panghunahuna?

¹⁰ Ang atong helmet sa paglaom manalipod sab nato batok sa panghunahuna nga dili gyod nato mapalipay si Jehova. Pananglitan, ang uban tingali moingon: ‘Dili gyod ko maapil niadtong hatagan ug kinabuhing walay kataposan. Dili ko angayan niini. Dili gyod nako maabot ang mga sukdanan sa Diyos.’ Hinumdomi nga ingon ana pod ang panghunahuna sa dili tinuod nga maghuhupay ni Job nga si Elipaz. Siya miingon kang Job: “Kinsa bay tawo nga putli?” Ug bahin sa Diyos, siya miingon: “Wala gani siyay pagsalig sa iyang mga balaan, ug bisan ang kalangitan dili hinlo sa iyang mga mata.” (Job 15:14, 15) Pagkadakong bakak! Hinumdomi nga panghunahuna kana ni Satanas. Nahibalo siya nga kon mao nay pirme natong hunahunaon, mohanap ang atong paglaom. Busa ayaw tuohi ang maong mga bakak, ug pagpokus sa mga saad ni Jehova. Ayaw gyod pagduhaduha nga gusto niya nga mabuhi ka hangtod sa hangtod ug nga tabangan ka niya nga makab-ot nâ.​—1 Tim. 2:3, 4.

11. Nganong angay tang magpailob samtang naghulat nga matuman ang atong gilaoman?

¹¹ Gusto nato nga pirmeng lig-on ang atong paglaom. Pero dili nâ kanunayng sayon. Basin mawad-an tag pailob samtang naghulat nga tumanon sa Diyos ang iyang mga saad. Pero si Jehova walay sinugdanan ug walay kataposan, mao nga ang iyang panglantaw sa panahon lahi sa atoa. (2 Ped. 3:8, 9) Iyang tumanon ang iyang katuyoan sa kinamaayohang paagi, pero tingali dili sa panahon nga atong gidahom. Unsay makatabang aron magpabiling lig-on ang atong paglaom samtang mapailobon tang naghulat nga tumanon sa Diyos ang iyang mga saad?​—Sant. 5:7, 8.

12. Base sa Hebreohanon 11:1, 6, sa unsang paagi ang paglaom konektado sa pagtuo?

¹² Magpabiling lig-on ang atong paglaom kon suod ta pirme kang Jehova kay siya ang motuman sa atong gilaoman. Gipakita sa Bibliya nga aron naa tay paglaom, kinahanglan tang motuo nga si Jehova tinuod ug nga siya maoy “tigganti sa mga sinserong nangita kaniya.” (Basaha ang Hebreohanon 11:1, 6.) Kon motuo ta nga tinuod gyod si Jehova, mas molig-on ang atong pagsalig nga tumanon niya ang tanan niyang saad. Hisgotan nato ang mga paagi nga mas masuod ta kang Jehova aron molig-on ang atong paglaom.

13. Unsay atong himoon aron masuod ta sa Diyos?

¹³ Pag-ampo kang Jehova, ug basaha ang iyang Pulong. Bisag dili nato makita si Jehova, puwede tang masuod niya. Puwede tang makig-estorya niya pinaagi sa pag-ampo ug makasalig ta nga maminaw siya. (Jer. 29:11, 12) Makapaminaw ta sa Diyos pinaagi sa pagbasa sa iyang Pulong ug pagpamalandong niini. Dihang mabasa nato kon giunsa pag-atiman ni Jehova ang iyang maunongong mga alagad sa una, mas molig-on ang atong paglaom. Ang tanan diha sa Pulong sa Diyos “gisulat aron tudloan ta, aron nga pinaagi sa atong paglahutay ug pinaagi sa paghupay gikan sa Balaang Kasulatan kita makabatog paglaom.”—Roma 15:4.

14. Nganong maayo nga pamalandongon nato ang gihimo ni Jehova para sa uban?

¹⁴ Pamalandonga kon giunsa pagtuman ni Jehova ang iyang mga saad. Pananglitan, hunahunaa ang gihimo sa Diyos para kang Abraham ug Sara. Tigulang na kaayo sila aron manganak. Pero ang Diyos nagsaad kanila nga manganak sila. (Gen. 18:10) Unsay reaksiyon ni Abraham sa maong saad? Ang Bibliya nag-ingon: “Siya . . . mituo nga mahimo siyang amahan sa daghang kanasoran.” (Roma 4:18) Bisan pag sa panglantaw sa tawo imposible tong mahitabo, masaligon si Abraham nga tumanon ni Jehova ang Iyang saad. Ug wa gyod mapakyas ang iyang pagdahom. (Roma 4:19-21) Ang ingon ini nga mga estorya sa Bibliya nagpasalig nato nga tumanon gyod ni Jehova ang iyang mga saad, bisan pag morag imposible ni para nato.

15. Nganong angay natong pamalandongon ang tanang gihimo sa Diyos para nato?

¹⁵ Pamalandonga ang tanang gihimo ni Jehova para nimo. Hunahunaa kon sa unsang paagi ka personal nga nakabenepisyo sa katumanan sa mga saad nga naa sa Pulong sa Diyos. Pananglitan, si Jesus nagsaad nga ang iyang Amahan magtagana sa imong mga panginahanglan. (Mat. 6:32, 33) Gipasaligan pod ka ni Jesus nga si Jehova mohatag nimog balaang espiritu dihang imo ning pangayoon. (Luc. 11:13) Gituman ni Jehova ang maong mga saad. Tingali naa pa kay mahunahunaan nga ubang saad nga iyang gituman para nimo. Pananglitan, siya nagsaad nga iya kang pasayloon, hupayon, ug tagan-an sa imong espirituwal nga panginahanglan. (Mat. 6:14; 24:45; 2 Cor. 1:3) Dihang pamalandongon nimo ang tanang gihimo sa Diyos para nimo, mas molig-on ang imong paglaom nga tumanon niya ang iyang mga saad para nimo sa umaabot.

16. Nganong ang paglaom espesyal nga regalo?

¹⁶ Ang atong paglaom nga mabuhi sa walay kataposan maoy espesyal nga regalo gikan sa Diyos. Naghinamhinam ta sa usa ka nindot nga kaugmaon nga seguradong mahitabo. Kini nagsilbing atong angkla, nga nagtabang nato nga magmatinumanon bisan sa mga pagsulay, paglutos, ug kamatayon. Kini nagsilbing atong helmet, nga nanalipod sa atong panghunahuna aron atong masalikway ang sayop ug mahimo ang husto. Ang atong paglaom nga gibase sa Bibliya mas nakapasuod nato sa Diyos ug nagpakita kon unsa ka dako ang iyang gugma kanato. Makabenepisyo gyod ta kon paningkamotan nato nga magpabiling sanag ug lig-on ang atong paglaom.

17. Nganong ang atong paglaom makahatag ug kalipay?

¹⁷ Sa sulat ni apostol Pablo sa mga taga-Roma, iya silang gidasig: “Paglipay tungod sa paglaom.” (Roma 12:12) Naay rason si Pablo nga malipay kay segurado siya nga kon magmatinumanon siya, madawat niya ang kinabuhing walay kataposan sa langit. Kita pod naay rason nga maglipay tungod sa atong paglaom kay segurado ta nga tumanon ni Jehova ang iyang mga saad. Sama sa giingon sa salmista, “malipayon [ang tawo] kansang paglaom anaa kang Jehova nga iyang Diyos, . . . ang Usa nga kanunayng matinumanon.”​—Sal. 146:5, 6.