“Maghigugmaay . . . sa Buhat ug sa Kamatuoran”

 1. Unsa ang kinalabwang matang sa gugma, ug nganong kini ang kinalabwan? (Tan-awa ang hulagway sa sinugdan sa artikulo.)

ANG gugma nga gibase sa matarong nga mga prinsipyo (a·gaʹpe) maoy regalo ni Jehova. Siya ang Tinubdan niini. (1 Juan 4:7) Kini ang kinalabwang matang sa gugma. Bisag apil niini ang pagmahal ug pagkamabination, kini ilabinang maila pinaagi sa dili mahakogong mga buhat nga makaayo sa uban. Sumala sa usa ka reperensiya, ang a·gaʹpe “maila lang pinaagi sa mga buhat niini.” Kon kita magpakita o pakitaan ug dili mahakogong gugma, ang atong kinabuhi mahimong mapuslanon ug malipayon.

2, 3. Giunsa pagpakita ni Jehova ang iyang dili mahakogong gugma sa katawhan?

² Si Jehova nahigugma na sa mga tawo bisan sa wala pa niya lalanga si Adan ug Eva. Iyang gihimo ang yuta aron puy-an sa tawo hangtod sa kahangtoran, diin ang tawo dili lang basta mabuhi kondili magmalipayon usab. Si Jehova naghimo niini para sa atong kaayohan, dili sa iyaha. Nagpakita sab siyag dili mahakogong gugma pinaagi sa pagpanalangin sa mga anak ni Adan ug paghatag nilag paglaom nga mabuhi sa walay kataposan sa Paraiso.

³ Human sa pagrebelde ni Adan ug Eva, si Jehova nagpakitag dili mahakogong gugma sa kinalabwang paagi. Mihimo siyag kahikayan aron lukaton ang umaabot nga kaliwat nianang duha ka rebelde. Masaligon siya nga dawaton sa pipila nila ka kaliwat ang Iyang gugma. (Gen. 3:15; 1 Juan 4:10) Gani, sa pagsaad ni Jehova bahin sa umaabot nga Manluluwas, giisip Niya nga nahimo na ang maong halad. Dayon, mga 4,000 ka tuig sa ulahi, si Jehova mihimog dakong sakripisyo pinaagi sa paghalad sa iyang bugtong Anak alang sa mga tawo. (Juan 3:16) Mapasalamaton gyod ta sa gugma ni Jehova!

 4. Bisag dili hingpit, nganong makapakita gihapon ang mga tawo ug dili mahakogong gugma?

⁴ Makapakita tag dili mahakogong gugma kay gilalang ta sa larawan sa Diyos. Lisod tingali ang pagpakita niana tungod sa atong pagkamakasasala, pero posible nga mahimo nato kana. Si Abel nagpakitag gugma sa Diyos pinaagi sa dili mahakogong paghalad sa iyang kinamaayohan. (Gen. 4:3, 4) Si Noe nagpakitag dili mahakogong gugma sa isigkatawo pinaagi sa pagsangyaw sa mensahe sa Diyos sulod sa daghang katuigan bisag walay naminaw. (2 Ped. 2:5) Giuna ni Abraham ang iyang gugma sa Diyos kay sa iyang pagbati dihang gisugo siya sa paghalad sa iyang anak, si Isaac. (Sant. 2:21) Parehas nianang matinumanong mga tawo, makapakita sab tag gugma bisag dili ni sayon.

 5. Sa unsang mga paagi ikapakita nato ang tinuod nga gugma?

⁵ Ang Bibliya nag-ingon nga ipakita nato ang tinuod nga gugma, “dili pinaagi sa pulong ni sa dila, kondili sa buhat ug sa kamatuoran.” (1 Juan 3:18) Nagpasabot ba kini nga dili na ta makapakita sa atong gugma pinaagi sa pulong? Wala! (1 Tes. 4:18) Hinunoa, nagpasabot kini nga ang atong gugma dili lang kutob sa pulong, ilabina sa mga panahon nga kinahanglang ipakita kini sa buhat. Pananglitan, kon ang atong igsoon sa pagtuo nagkalisodlisod, dili lang ang atong panghinaot ang ilang gikinahanglan. (Sant. 2:15, 16) Sa susama, ang atong gugma kang Jehova ug sa isigkatawo magpalihok nato nga bug-os makigbahin sa pagsangyaw, dili lang sa paghangyo sa Diyos sa ‘pagpadalag mga mamumuo’ aron sa pagpangani.​—Mat. 9:38.

6, 7. (a) Unsa ang gugma nga dili salingkapaw? (b) Unsa ang pipila ka pananglitan sa mini nga gugma?

⁶ Si apostol Juan misulat nga kinahanglan tang maghigugmaay “sa buhat ug sa kamatuoran.” Busa, ang atong gugma kinahanglang “walay pagkasalingkapaw,” o dili salingkapaw. (Roma 12:9; 2 Cor. 6:6) Nagpasabot kini nga dili ta makapakitag tinuod nga gugma samtang nagpakaaron-ingnon, nga morag nagsul-ob ug maskara. Makapangutana tingali ta, ‘Naa ba diay gugma nga salingkapaw?’ Wala. Kini dili tinuod nga gugma kondili mini nga gugma.

⁷ Konsideraha ang pipila ka pananglitan sa mini nga gugma. Sa tanaman sa Eden, nagpakaaron-ingnon si Satanas nga naghunahuna sa kaayohan ni Eva, pero ang iyang gibuhat nagpakita nga siya hakog ug salingkapaw. (Gen. 3:4, 5) Sa panahon ni David, ang pagpakighigala ni Ahitopel sa hari napamatud-ang salingkapaw. Si Ahitopel nahimong traydor dihang gibati niya nga makabentaha siya. (2 Sam. 15:31) Karon usab, ang mga apostata ug uban pa nga nagpahinabog pagkabahinbahin sa kongregasyon naggamit ug “maulog-ulogong mga pulong ug madayegong sinultihan” aron ingnon nga mahigugmaon sila, pero sa tinuoray, kaugalingon ray ilang gihunahuna.​—Roma 16:17, 18.

 8. Unsay angay natong ipangutana sa kaugalingon?

⁸ Daotan ang salingkapaw nga gugma. Sukwahi kini sa diyosnong hiyas nga nagsakripisyo sa kaugalingong gugma. Posibleng malimbongan niini ang mga tawo, pero dili si Jehova. Gani, si Jesus miingon nga ang mga salingkapaw silotan sa “hilabihan gayod.” (Mat. 24:51) Siyempre, dili gyod gustong magpakitag salingkapaw nga gugma ang mga alagad ni Jehova. Pero, kinahanglan natong pangutan-on ang kaugalingon, ‘Pirme bang tinuod ang akong gugma, nga wala masagolig kahakog ug panglimbong?’ Atong konsiderahon ang siyam ka paagi nga makapakita tag gugma nga dili salingkapaw.

 9. Ang tinuod nga gugma magpalihok nato sa pagbuhat sa unsa?

⁹ Mag-alagad nga malipayon bisag dili makita sa uban. Kinahanglang andam tang mohimog mga buhat sa gugma para sa atong mga igsoon diha “sa tago,” o dili makita sa uban, kon posible. (Basaha ang Mateo 6:1-4.) Wala nâ mahimo ni Ananias ug Sapira. Gusto nilang mahibaloan sa uban ang ilang donasyon, namakak sila bahin sa kantidad niana, ug sila gisilotan tungod sa ilang pagkasalingkapaw. (Buh. 5:1-10) Sa laing bahin, kon tinuod ang atong gugma, malipay ta sa pag-alagad sa atong mga igsoon, bisag walay mahibalo o modayeg nato. Pananglitan, wala magpaila ang mga igsoon nga nagtabang sa Nagamandong Lawas sa pagtaganag espirituwal nga pagkaon. Dili nila gustong mapokus kanila ang atensiyon o isulti ang mga proyekto nga gipatrabaho kanila.

10. Sa unsang paagi manguna ta sa pagpasidungog sa uban?

¹⁰ Manguna sa pagpasidungog sa uban. (Basaha ang Roma 12:10.) Si Jesus nagpakitag ehemplo sa pagpasidungog sa uban pinaagi sa paghimo sa ubos kaayong mga trabaho. (Juan 13:3-5, 12-15) Basin kinahanglan tang maningkamot aron mahimong mapainubsanon ug makaalagad sa uban. Gani, ang mga apostoles bug-os lang nakasabot sa gipangbuhat ni Jesus dihang nadawat nila ang balaang espiritu. (Juan 13:7) Mapasidunggan nato ang uban kon dili ta mobating labaw tungod sa atong edukasyon, kabtangan, o pribilehiyo sa pag-alagad kang Jehova. (Roma 12:3) Ug imbes masina niadtong nakadawat ug pagdayeg, malipay ta uban nila bisag gibati nato nga angayan pod ta sa maong pasidungog o nakaamot ta sa ilang kalamposan.

11. Nganong kinahanglang sinsero ang atong komendasyon?

¹¹ Maghatag ug sinserong komendasyon sa mga igsoon. Kinahanglang andam ta sa paghatag ug komendasyon kay kana “makapalig-on” sa uban. (Efe. 4:29) Pero, kinahanglang sinsero ta. Kay kon dili, kita nag-ulog-ulog lang o naglikay sa obligasyon sa paghatag ug gikinahanglang tambag. (Prov. 29:5) Kon atong komendahan ang usa ka tawo ug dayon libakon siya, kita salingkapaw. Si apostol Pablo naglikay niana ug naghatag ug panig-ingnan sa pagpakitag tinuod nga gugma diha sa iyang paghatag ug komendasyon. Pananglitan, sinsero niyang gikomendahan ang mga Kristohanon sa Corinto sa ilang maayong nahimo. (1 Cor. 11:2) Pero dihang dili sila angayan sa komendasyon, iyang gipatin-aw ang rason diha sa maayo ug klarong paagi.​—1 Cor. 11:20-22.

12. Unsaon nato pagpakitag tinuod nga gugma dihang kita mag-abiabi?

¹² Magmaabiabihon. Si Jehova nagsugo nato nga magmahinatagon sa atong mga igsoon. (Basaha ang 1 Juan 3:17.) Pero, kinahanglang himoon nato ni uban ang hustong motibo, nga dili maghunahuna sa kaugalingong bentaha. Kinahanglan natong pangutan-on ang kaugalingon: ‘Giabiabi lang ba nako tong akong mga suod, ilado, o kadtong makaabiabi pod nako? O nangita ba kog paagi sa pag-abiabi sa mga igsoon nga wala kaayo ko kaila o kadtong dili makaabiabi nako?’ (Luc. 14:12-14) O unsa kaha kon magkalisodlisod ang igsoon tungod sa iyang sayop nga mga desisyon, o wala siya makapasalamat sa atong pagkamaabiabihon? Niana nga mga situwasyon, kinahanglan natong sundon ang tambag: “Magmaabiabihon sa usag usa nga walay pagmulo.” (1 Ped. 4:9) Kon sundon nâ nimo, magmalipayon ka tungod sa paghatag uban ang hustong motibo.​—Buh. 20:35.

13. (a) Sa unsang mga kahimtang nga malisdan ta sa pagtabang sa mga maluya? (b) Sa unsang paagi ta makatabang sa mga maluya?

¹³ Suportahi ang maluya. Masulayan ang katinuod sa atong gugma pinaagi sa pagsunod sa sugo nga ‘buligi ang mga maluya ug magpailob sa tanan.’ (1 Tes. 5:14) Bisag daghang maluya ang nalig-on ra sa ulahi, ang uban nagkinahanglan sa atong pailob ug padayong pagsuportar. Makatabang ta pinaagi sa pagdasig kanila gamit ang Bibliya, pagpakigpartner nila sa pagsangyaw, o pagpaminaw kanila. Dugang pa, imbes maghunahuna nga ang igsoon “lig-on” o kaha “maluya,” angayng hinumdoman nga kitang tanan may kalig-on ug kaluyahon. Bisag si apostol Pablo miangkon nga siya may mga kaluyahon. (2 Cor. 12:9, 10) Busa, makabenepisyo tang tanan sa tabang sa atong mga igsoon sa pagtuo.

14. Unsay andam natong himoon aron mamentinar ang kalinaw uban sa atong mga igsoon?

¹⁴ Makigdait. Maningkamot ta pag-ayo aron mamentinar ang kalinaw uban sa mga igsoon, bisan pag mibati tang nasaypan tag sabot o wala tratara nga patas. (Basaha ang Roma 12:17, 18.) Ang pagpangayog pasaylo makatabang para sa nasakitan, pero kinahanglang sinsero kini. Pananglitan, imbes moingon, “Sori nga kanay imong gibati,” puwede nimong angkonon ang imong sayop pinaagi sa pag-ingon, “Sori ha nga nasakitan ka sa akong gisulti.” Importante kaayo ang kalinaw ilabina diha sa kaminyoon. Ang magtiayon kinahanglang dili magpakaaron-ingnong nagminahalay atubangan sa uban pero sa pribado dili magtinagdanay, sakit manulti, o bayolente.

15. Unsaon nato pagpakita nga tinuod ang atong pagpasaylo?

¹⁵ Magmapinasayloon. Kon may makasala nato, ato siyang pasayloon ug wad-on ang atong kasuko. Kon kita “mag-inantosay sa usag usa diha sa gugma, sa matinuoron manlimbasog nga mosunod sa pagkausa sa espiritu sa nagahiusang bugkos sa pakigdait,” mapasaylo nato bisan kadtong wala mahibalo nga nakapasakit sila kanato. (Efe. 4:2, 3) Aron tinuod ang atong pagpasaylo, kinahanglan natong kontrolahon ang atong hunahuna aron “dili [ta] maghupot ug talaan sa kadaot.” (1 Cor. 13:4, 5) Kon magdumot ta, mahimong madaot ang atong relasyon sa mga igsoon ug ilabina kang Jehova. (Mat. 6:14, 15) Mapakita sab nato nga sinsero ang atong pagpasaylo pinaagi sa pag-ampo alang niadtong nakasala kanato.​—Luc. 6:27, 28.

16. Unsaon nato pag-isip ang atong mga pribilehiyo sa pag-alagad kang Jehova?

¹⁶ Isakripisyo ang kaugalingong kaayohan. Kon makadawat tag pribilehiyo sa pag-alagad kang Jehova, kinahanglang isipon nato ni nga kahigayonan sa pagpakita sa katinuod sa atong gugma pinaagi sa “pagpangita, . . . dili sa [atong] kaugalingong kaayohan, kondili nianang sa laing tawo.” (1 Cor. 10:24) Pananglitan, diha sa atong mga asembliya ug kombensiyon, ang mga atendant makasulod na sa pasilidad samtang ang uban dili pa. Imbes isipon ang ilang asaynment ingong kahigayonan nga makapilig kinamaayohang lingkoranan para nila ug sa ilang pamilya, daghang atendant ang mipili ug dili kaayo komportableng mga lingkoranan sa seksiyon diin sila naasayn. Sa paghimo niana, gipakita nila ang tinuod nga gugma kay wala sila maghunahuna sa ilang kaugalingong kaayohan. Unsaon nimo sila pagsundog?

17. Ang tinuod nga gugma magpalihok sa nakasala sa pagbuhat sa unsa?

¹⁷ Itug-an ug biyai ang tinagong sala. Ang pipila ka Kristohanon nga nakahimog seryosong sala misulay pagtago niini aron sila dili maulawan o makadismayar sa uban. (Prov. 28:13) Pero dili kana mahigugmaon kay makadaot kana sa nakasala ug sa uban. Makababag kana sa pag-agos sa balaang espiritu ug makatugaw sa kalinaw sa kongregasyon. (Efe. 4:30) Ang tinuod nga gugma magpalihok sa nakasalang igsoon sa pagduol sa mga ansiyano aron matabangan nila siya.​—Sant. 5:14, 15.

18. Unsa ka importante ang tinuod nga gugma?

¹⁸ Gugma ang kinalabwan sa tanang hiyas. (1 Cor. 13:13) Kana magpaila kanato ingong mga sumusunod ni Jesus ug mga tigsundog ni Jehova​—ang Tinubdan sa gugma. (Efe. 5:1, 2) Si Pablo miingon: “Kon ako . . . walay gugma, ako walay kapuslanan.” (1 Cor. 13:2) Hinaot padayon natong ipakita ang gugma, dili lang “sa pulong,” kondili “sa buhat ug sa kamatuoran.”