Pagmaya Kamo Diha sa Paglaom sa Gingharian!

“Pagmaya kamo diha sa paglaom. Antosa ninyo ang kasakitan.”—ROMA 12:12.

 1. Nganong malipay kitang magpakig-uban kang Jehova, ug unsay giawhag ni apostol Pablo nga buhaton sa mga Kristohanon?

“ANG malipayong Diyos.” (1 Timoteo 1:11) Pagkamaayong pagkahubit niini si Jehova! Ngano? Tungod kay ang tanan niyang mga binuhatan nakahatag dakong kalipay kaniya. Sanglit si Jehova mao man ang Tuboran sa tanang maayo ug makapalipay nga mga butang, ang tanan niyang intelihenting mga linalang makakaplag kalipay sa ilang pagpakig-uban kaniya. Sa tukma, giawhag ni apostol Pablo ang mga Kristohanon sa pag-apresyar sa ilang malipayong pribilehiyo sa pagkaila kang Jehova nga Diyos, magmapasalamaton sa Iyang tanang katingalahang mga gasa sa paglalang, ug sa pagmaya sa mahigugmaong-kalulot nga Iyang gipakita kanila. Si Pablo misulat: “Pagmaya kamo kanunay diha sa Ginoo. Usbon ko ang pag-ingon, Pagmaya kamo!”​—Filipos 4:4; Salmo 104:31.

 2. Unsang paglaom ang nakahatag ug dakong kalipay, ug unsay gidasig nga buhaton sa mga Kristohanon labot niining paglaoma?

² Gisunod ba sa mga Kristohanon kining tambaga nga gihatag ni apostol Pablo? Oo ilang gisunod kini! Ang espirituwal nga mga igsoon ni Jesu-Kristo nagmangayaon sa mahimayaong paglaom nga gibuksan sa Diyos alang kanila. (Roma 8:19-21; Filipos 3:20, 21) Oo, sila nahibalo nga sila makaambit sa pagtuman sa dakong paglaom alang sa umaabot sa katawhan, diha sa buhi ug sa patay, pinaagi sa pag-alagad uban kang Kristo diha sa iyang langitnong kagamhanan sa Gingharian. Handurawa lang ang ilang dakong pagmaya sa ilang mga pribilehiyo ingong kaubang mga manununod, nagaalagad ingong mga hari ug mga saserdote! (Pinadayag 20:6) Pagkadakong kalipay unya ang ilang maangkon samtang ginatabangan nila ang matinumanong katawhan nga makabaton sa kahingpitan ug motabang sa paggiya sa pagpasig-uli sa Paraiso sa atong yuta! Sa pagkatinuod, ang tanang mga alagad sa Diyos may “pasikaranan sa paglaom sa kinabuhing walay kataposan nga gisaad sa Diyos, nga dili arang makabakak, sa wala pa ang kapanahonan.” (Tito 1:2) Tungod niining dakong paglaom, gidasig ni apostol Pablo ang tanang mga Kristohanon: “Pagmaya kamo diha sa paglaom.”​—Roma 12:12.a

Ang Tinuod nga Kalipay—Usa ka Kinaiya sa Kasingkasing

 3, 4. (a) Unsay kahulogan sa terminong “pagmaya,” ug unsa ka subsob magmaya ang mga Kristohanon? (b) Unsa ang tinuod nga kalipay, ug nagadepende kini sa unsa?

³ “Ang pagmaya” nagkahulogan sa pagbati ug sa pagpahayag sa kalipay; kini wala magkahulogan nga anaa kanunay sa kahimtang sa pagkalipay, o pagsaya. Ang mga berbo nga katumbas sa Hebreohanon ug Gregong mga pulong nga gigamit sa Bibliya alang sa “kalipay,” “kasadya,” ug “pagmaya” nagapaila sa sulod nga pagbati ug gawasnong pagpakita sa kalipay. Ang mga Kristohanon gidasig nga “magpadayon sa pagmaya,” “magmangayaon kanunay.”​—2 Corinto 13:11; 1 Tesalonica 5:16.

⁴ Apan sa unsang paagi ang usa magmangayaon kanunay? Posible kini tungod kay ang tinuod nga kalipay maoy usa ka kinaiya sa kasingkasing, usa ka lalom pangsulod nga hiyas, usa ka espirituwal nga kinaiya. (Deuteronomio 28:47; Proverbio 15:13; 17:22) Kini maoy usa ka bunga sa espiritu sa Diyos, nga gilista ni Pablo sunod sa gugma. (Galacia 5:22) Ingong pangsulod nga hiyas, kini wala magadepende sa mga butang sa gawas, dili bisan diha sa atong mga igsoon. Apan kini nagadepende sa balaang espiritu sa Diyos. Ug kini nagagikan sa lalom sulod nga katagbawan sa pagkahibalo nga nabatonan nimo ang kamatuoran, ang paglaom sa Gingharian, ug nga ginabuhat mo ang butang nga nakapahimuot kang Jehova. Busa, ang kalipay dili kay usa lamang kini ka kinaiya sa atong pagkatawo; kini maoy bahin sa “bag-ong pagkatawo,” ang panagtipon sa mga kinaiya nga nagapaila kang Jesu-Kristo.​—Efeso 4:24; Colosas 3:10.

 5. Kanus-a ug sa unsang paagi mapasundayag sa gawas ang kalipay?

⁵ Bisan pag ang kalipay maoy usa ka kinaiya sa kasingkasing, kini mahimong ikapasundayag sa gawas panalagsa. Unsa kining panalagsa, gawasnong pagpasundayag sa kalipay? Kini mahimong bisan unsa gikan sa malinawon nga panagway ngadto sa aktuwal nga paglukso sa kalipay. (1 Hari 1:40; Lucas 1:44; Buhat 3:8; 6:15) Nan, kini ba nagkahulogan nga ang tawong dili-hinulti o dili-hingatawa walay kalipay? Dili! Ang tinuod nga kalipay dili maila pinaagi sa kanunay nga pagtabi, pagkatawa, o pagpahiyom, o pagngisi. Ang mga kahimtang mopahimo sa kalipay sa pagpadayag sa nagkalainlaing paagi. Dili kalipay lamang ang mopahimo kanatong makigsanduroton diha sa Kingdhom Hall, kondili, ang atong inigsoong pagbati ug gugma.

 6. Nganong ang mga Kristohanon mahimong magmangayaon kanunay bisag nagaatubang sila ug dili-maayong mga kahimtang?

⁶ Ang mapinadayonong bahin sa kalipay mao ang sulodnon nga pagkapermanente niini ingong tinuod nga kinaiya sa bag-ong pagkatawo sa Kristohanon. Kini ang nagpaposible sa pagmaya kanunay. Siyempre, may mga panahong mahasol kita bahin sa usa ka butang, o kaha makaatubang kita ug dili-maayong mga kahimtang. Apan makabaton gihapon kitag kalipay sa atong kasingkasing. Ang ubang unang mga Kristohanon maoy mga ulipon, nga adunay mga agalon nga lisod pahimut-an. Ang maong mga Kristohanon ba mahimong magmangayaon kanunay? Oo, tungod sa ilang paglaom sa Gingharian ug sa kalipay sa ilang mga kasingkasing.​—Juan 15:11; 16:24; 17:13.

 7. (a) Unsay giingon ni Jesus mahitungod sa pagkalipay bisag ginalutos? (b) Unsay makatabang kanato sa paglahutay ilalom sa kasakitan, ug kinsa ang naghatag ug labing maayong panig-ingnan niining bahina?

⁷ Human nga miingon si Pablo: “Pagmaya kamo diha sa paglaom,” siya midugang: “Antosa ninyo ang kasakitan.” (Roma 12:12) Naghisgot usab si Jesus bahin sa kalipay ilalom sa kasakitan dihang siya miingon diha sa Mateo 5:11, 12: “Malipayon kamo sa dihang panamastamasan ug pagalutoson kamo sa mga tawo . . . Managmaya ug lumukso kamo sa kalipay, kay dako ang inyong balos didto sa langit.” Ang pagmaya ug paglukso sa kalipay dinhi dili kinahanglang usa ka literal gawasnong pagpasundayag; kini sa panguna maoy lalom sulod nga katagbawan nga nakapahimuot ang usa kang Jehova ug Jesu-Kristo dihang nagabarog nga malig-on ilalom sa pagsulay. (Buhat 5:41) Sa pagkatinuod, ang kalipay maoy makatabang kanato sa paglahutay ilalom sa kasakitan. (1 Tesalonica 1:6) Bahin niini, si Jesus naghatag sa labing maayong panig-ingnan. Ang Kasulatan nag-ingon kanato: “Tungod sa kalipay nga gibutang sa iyang atubangan nga iyang giantos ang kahoy sa pagsakit.”—Hebreohanon 12:2.

Pagmaya Kamo Diha sa Paglaom Bisan pa sa mga Problema

 8. Unsang mga problema ang maatubang sa mga Kristohanon, apan nganong ang mga problema dili makakuha sa kalipay sa Kristohanon?

⁸ Ang pagkahimong alagad ni Jehova wala magpalibre sa usa gikan sa mga problema. Tingalig may mga problema sa pamilya, sa mga kalisod sa pangabuhi, dili-maayong panglawas, o kamatayon sa mga minahal. Samtang kining mga butanga makahatag kaguol, kini dili makakuha sa atong basehanan sa pagmaya diha sa paglaom sa Gingharian, ang sulod nga kalipay nga anaa sa atong kasingkasing.​—1 Tesalonica 4:13.

 9. Unsa ang mga problema ni Abraham, ug sa unsang paagi nahibalo kita nga siya may kalipay sa iyang kasingkasing?

⁹ Palandonga, pananglitan si Abraham. Ang kinabuhi dili sa tanang panahon maayo alang kaniya. Siya may mga problema sa pamilya. Ang iyang puyopuyo, si Hagar, ug ang iyang asawa, si Sarah, dili magkasinabot. Dihay panag-away. (Genesis 16:4, 5) Giyagayagaan ni Ismael si Isaac, gilutos siya. (Genesis 21:8, 9; Galacia 4:29) Sa ulahi, ang minahal nga asawa ni Abraham, si Sarah, namatay. (Genesis 23:2) Bisan pa sa mga problema, siya nalipay sa paglaom sa Binhi sa Gingharian, ang Binhi ni Abraham, nga pinaagi kaniya ang tanang mga pamilya sa yuta pagapanalanginan. (Genesis 22:15-18) May kalipay sa iyang kasingkasing, iyang giantos diha sa pag-alagad ni Jehova ang usa ka gatos ka tuig human nga gibiyaan ang iyang puloy-anan sa siyudad sa Ur. Busa kini ang nahisulat mahitungod kaniya: “Siya nagpaabot sa siyudad nga adunay tinuod nga mga patukoranan, kansang magtutukod ug magbubuhat mao ang Diyos.” Tungod sa pagtuo ni Abraham sa pag-abot sa Mesiyanikong Gingharian, ang Ginoong Jesus, dihang gitudlo sa Diyos ingong Hari, nakaingon: “Si Abraham . . . mangayaon kaayo sa palaabuton sa pagkakita sa akong adlaw, ug siya nakakita niini ug nagmangayaon.”​—Hebreohanon 11:10; Juan 8:56.

10, 11. (a) Unsa ang atong pagpakigbugno ingong mga Kristohanon, ug sa unsang paagi kita giluwas? (b) Unsay nakabawi sa atong pagkawalay-ikasarang sa bug-os nga pagpakig-away batok sa atong makasasalang unod?

¹⁰ Ingong mga tawong dili-hingpit, may pakigbisogan usab kita sa atong makasasalang unod, ug kini nga pakigbugno sa pagbuhat sa matarong makapabalaka kaayo. Ang atong pagpakig-away sa atong mga kahuyangan wala magkahulogan, hinunoa, nga kita wala nay paglaom. Nasubo si Pablo bahin niini nga pagpakigbugno, ug siya miingon: “Kinsa bay moluwas kanako gikan niining lawasa sa kamatayon? Salamat sa Diyos pinaagi kang Jesu-Kristo nga atong Ginoo!” (Roma 7:24, 25) Pinaagi ni Jesu-Kristo ug sa lukat nga iyang gitagana, kita giluwas.​—Roma 5:19-21.

¹¹ Ang halad lukat ni Kristo maoy mobawi sa atong pagkawalay-ikasarang sa bug-os nga pagpakig-away. Malipay kita niini nga lukat tungod kay gipaposible niini ang usa ka mahinlong konsensiya ug kapasayloan sa atong mga sala. Diha sa Hebreohanon 9:14, si Pablo naghsigot bahin sa “dugo ni Kristo” nga may gahom sa “paghinlo sa atong mga konsensiya gikan sa patay nga mga binuhatan.” Busa, ang mga konsensiya sa mga Kristohanon dili kinahanglang mabug-atan sa pagkahinukman ug sa mga pagbating sad-an. Kini, uban sa paglaom nga atong nabatonan, nahimong usa ka malig-ong puwersa alang sa masadyaong kalipay. (Salmo 103:8-14; Roma 8:1, 2, 32) Magapalandong sa atong paglaom, kitang tanan madasig sa pagpakig-away nga malamposon.

Nagabutang sa Hunahuna sa Atong Paglaom

12. Unsang paglaom ang mapalandong sa dinihogang mga Kristohanon?

¹² Hinungdanon alang sa dinihogan-sa-espiritu ug sa ubang mga karnero sa pagbutang diha sa hunahuna sa ilang “paglaom sa kaluwasan,” isul-ob kini ingong salokot sa pagpanalipod. (1 Tesalonica 5:8) Ang dinihogang mga Kristohanon makapalandong sa kahibulongang pribilehiyo sa pagkabaton ug imortalidad sa langit, nga makaduol kang Jehova nga Diyos, ug makatagamtam ug personal nga panag-uban duyog sa gihimayang Jesu-Kristo ug sa mga apostol ug sa tanang 144,000, kinsa nagahupot sa ilang integridad sa daghang kasiglohan. Pagkadili-mahubit nga bahandi sa panag-unabay!

13. Unsa ang pagbati sa mga dinihogang ania pa sa yuta bahin sa ilang paglaom?

¹³ Unsay gibati sa pipila ka dinihogan nga ania pa sa yuta bahin sa ilang paglaom sa Gingharian? Kini mahimong ikapadayag sa pipila ka pulong ni F. W. Franz, presidente sa Watch Tower Society, nga gibawtismohan niadtong 1913: “Ang atong paglaom maoy usa ka segurado nga butang, ug kini bug-os nga matuman diha sa matag usa sa kataposan sa 144,000 ka membro sa gamayng panon sa usa ka sukod nga dili gayod nato mahanduraw. Kita nga mga nahibilin nga presente sa tuig 1914, dihang kitang tanan naglaom nga mosaka sa langit, wala kawad-i sa pagpabili niana nga paglaom. Apan kita malig-on gihapon alang niana sama kaniadto, ug labi pa natong kining gipabilhan bisan dugay kitang naghulat alang niana. Kini maoy usa ka butang nga takos nga pagahulaton, bisag mokabat pa kinig milyonmilyong katuigan. Labi pa nakong gipabilhan ang atong paglaom sukad masukad, ug dili gayod ako buot nga mawala ang akong apresasyon alang niana. Ang paglaom sa gamayng panon naghatag usab ug pasalig nga ang ginapaabot sa dakong panon sa ubang mga karnero, nga walay posibilidad nga mapakyas, matuman gayod nga dili nato bug-os nga mahanduraw. Maoy hinungdan nga kita nagapagpabiling malig-on hangtod niining taknaa, ug kita magpadayong magpabiling malig-on hangtod nga ang Diyos aktuwal nga mapamatud-an nga siya matinud-anon sa iyang ‘bililhon ug dagkong mga saad.”​—2 Pedro 1:4; Numeros 23:19; Roma 5:5.

Pagmaya Kamo Karon Diha sa Paglaom sa Gingharian

14. Unsang paglaom ang angay isilsil sa hunahuna sa dakong panon?

¹⁴ Kining mga ekspresyon sa masadyaong pagtuo nagahatag sa sakop sa dakong panon sa ubang mga karnero ug dagkong mga katarongan sa pagmaya. (Pinadayag 7:15, 16) Angay nilang isilsil sa hunahuna ang paglaom nga maluwas sa Armageddon. Oo, lantawa sa unahan ang pagkakita nga mabayaw ang pagkasoberano ni Jehova nga Diyos sa uniberso ug mabalaan ang iyang mahimayaong ngalan pinaagi sa pagpakanaog sa dakong kasakitan, nga maoy mohinlo sa yuta sa mga daotan nga niini ang Yawa mao ang diyos. Pagkadakong kalipay nga maluwas sa dakong kasakitan!​—Daniel 2:44; Pinadayag 7:14.

15. (a) Unsang buluhaton sa pagpang-ayo ang gihimo ni Jesus sa dinhi pa siya sa yuta, ug ngano? (b) Unsa unya ang mga panginahanglan sa panglawas sa mga mangaluwas sa Armageddon, ug nganong lahi sila gikan sa mga pagabanhawon?

¹⁵ Mahitungod sa dakong panon, ang Pinadayag 7:17 ang-ingon: “Ang Kordero . . . magabantay kanila, ug magatultol kanila ngadto sa mga tuboran sa mga tubig nga nagahatag ug kinabuhi. Ug pagapahiran sa Diyos ang tanang luha sa ilang mga mata.” Bisan pa nga kining tagnaa adunay espirituwal nga katumanan karon, ang mangaluwas sa Armageddon makakita niana nga matuman sa literal. Sa unsang paagi? Buweno, unsay gihimo ni Jesus sa dihang dinhi pa siya sa yuta? Iyang giayo ang mga piang, gipalakaw ang mga bakol, gibuksan ang igdulongog sa mga bungol ug gibuka ang mga mata sa mga buta, ug iyang giayo ang gisanla, paralitiko, ug “tanang sakit ug balatian.” (Mateo 9:35; 15:30, 31) Dili ba mao man kana ang gikinahanglan sa mga Kristohanon karon? Madala sa dakong panon ang mga depekto sa lawas ug mga sakit sa daang kalibotan ngadto sa bag-ong kalibotan. Unsay atong malaoman nga buhaton sa Kordero labot niana? Ang mga panginahanglan sa mga mangaluwas sa Armageddon lahi unya kaayo gikan sa mga panginahanglan sa mga pagabanhawon. Lagmit kadtong pagabanhawon lalangon-pag-usab nga may tibuok, walay-sakit, mahimsog nga panglawas, apan dili pa makaabot sa tawhanong pagkahingpit. Tungod sa milagro sa pagkabanhaw, sila dayag nga dili na magkinahanglang ayohon pa sa mga depekto sa lawas kanhi pinaagi sa milagro sa pagpang-ayo. Sa laing bahin, tungod sa ilang talagsaong kasinatian sa pagkalabang-buhi sa Armageddon, ang milagrosong pagkaayo maoy gikinahanglan ug madawat sa kadaghanan sa dakong panon. Dayag, ang pangunang katuyoan sa pagpang-ayo ni Jesus maoy sa paglarawan aron madasig ang dakong panon sa masadyaong palaabuton nga dili lamang sila maluwas kondili sila mangaayo sa sakit human niana.

16. (a) Kanus-a mahitabo ang milagrosong pagpang-ayo sa mga mangaluwas sa Armageddon, ug uban sa unsang resulta? (b) Diha sa unsang paglaom nga magpadayon kitang magmangayaon sa panahon sa Milenyo?

¹⁶ Kining milagrosong pagpang-ayo sa makataronganon mahitabo diha sa mga mangaluwas sa Armageddon sa dili magdugay human sa Armageddon ug sa dili pa magsugod ang pagkabanhaw. (Isaias 33:24; 35:5, 6; Pinadayag 21:4; itandi ang Marcos 5:25-29.) Ilabay na unya sa mga tawo ang mga antipara, mga sungkod, crutches, wheelchair, postiso, hearing aid, ug ang susama niini. Pagkadakong katarongan sa pagmaya! Pagkanahiangay kini sa unang buhat sa pagpang-ayo ni Jesus diha sa papel sa mga mangaluwas sa Armageddon ingong pundasyon sa bag-ong yuta! Ang makapaluya nga mga sakit wagtangon aron ang mga mangaluwas makapadayon sa unahan nga may kalagsik, mahinamong magapaabot sa katingalahang kalihokan sa Milenyo nga sangkad sa unahan kanila, nga dili mabalda sa mga kasakitan nga gipaagom kanila sa daang kalibotan. Ug sa tibuok panahon sa Milenyo, sila managmaya diha sa paglaom sa pagkab-ot sa kabug-osan sa hingpit nga tawhanong kinabuhi sa kataposan sa usa ka libo ka tuig.

17. Unsang mga kalipay ang mabatonan samtang magapadayon ang buluhaton sa pagpasig-uli sa Paraiso?

¹⁷ Kon mao kana ang imong paglaom, palandonga usab ang kalipay nga makabahin sa pagpasig-uli sa Paraiso sa yuta. (Lucas 23:42, 43) Sa walay duhaduha ang mga mangaluwas sa Armageddon motabang sa paghinlo sa yuta ug busa nagatagana ug matahom nga mga lugar diin dinhi pagabanhawon ang mga patay. Ang mga paglubong pulihan sa mga kahikayan sa pagdawat niadtong pagabangonon sa pagkabanhaw, apil ang atong mga minahal mismo nga nangamatay. Ug palandonga ang makapadasig nga panag-ubanay duyog sa matinumanong mga lalaki ug mga babaye gikan sa kasiglohang nangagi. Kinsa ang gusto nimong pakigsultihan? Si Abel ba, si Enoch, Noe, Job, Abraham, Sarah, Isaac, Jacob, Jose, Moises, Josue, Rahab, Deborah, Samson, David, Elias, Eliseo, Jeremias, Ezekiel, Daniel, o Juan Bawtista? Buweno, kining maanindot kaayo nga palaaboton maoy bahin usab sa imong paglaom. Ikaw makahimo sa pagpakigsulti kanila, makakat-on gikan kanila, ug sa pagtrabaho uban kanila sa paghimo sa tibuok yuta nga usa ka paraiso.

18. Unsang dugang mga panalangin nga atong mapalandong?

¹⁸ Handurawa, usab, ang lamiang pagkaon, lunsay nga tubig, limpiyong hangin, uban sa atong yuta nga napasig-uli sa hingpit nga pagkatimbang niini sa ekolohiya sa paagi nga pagkalalang ni Jehova niana. Ang kinabuhi unya, dili kay tagamtamon lamang ang kahingpitan nga walay-buhaton, kondili kini maoy usa ka aktibo ug makahuloganong pagpakigbahin sa malipayong mga kalihokan. Palandonga ang tibuok-yuta nga katilingban sa katawhan nga libre gikan krimen, pagkamaakohon, kasina, panag-away​—usa ka panag-igsoonay nga diin ang bunga sa espiritu ginaugmad ug ginapakita sa tanan. Pagkakulba-hinam!​—Galacia 5:22, 23.

Paglaom nga Nagahatag Kahulogan sa Kinabuhi

19. (a) Kanus-a matagamtam ang pagmaya nga gihisgotan sa Roma 12:12? (b) Nganong magmatinguhaon kita nga dili tugotang ang mga palas-anon sa kinabuhi magpahiklin sa atong paglaom?

¹⁹ Ang kalaoman nga matuman dili na paglaom, busa ang pagmaya nga gidasig ni Pablo diha sa Roma 12:12 pagatagamtamon karon. (Roma 8:24) Bisan ang pagpalandong lang sa umaabot nga mga panalangin nga ipatungha sa Gingharian sa Diyos maoy usa na ka katarongan nga kita magmangayaon nianang paglaoma karon. Busa magmatinguhaon nga dili tugotang mapahiklin sa mga palas-anon sa kinabuhi sa dunot nga kalibotan ang imong mahimayaong paglaom. Ayaw padala ug padaog sa kaluya, mawad-an sa panan-aw sa paglaom sa unahan. (Hebreohanon 12:3) Ang pagbiya sa Kristohanong dalan dili makasulbad sa imong mga suliran. Hinumdomi, kon may usa nga mohunong sa pag-alagad sa Diyos tungod sa tanang mga palas-anon sa kinabuhi karon, magpabilin gihapon kaniya kining mga palas-anona, ug siya mapildihan ug paglaom ug busa mawad-an sa posibilidad sa pagmaya diha sa katingalahang mga palaabuton sa unahan.

20. Unsa ang epekto sa paglaom sa Gingharian diha sa nagadawat niana, ug ngano?

²⁰ Ang katawhan ni Jehova adunay katarongan sa pagbaton ug malipayong mga kinabuhi. Ang ilang masanag, makadasig nga paglaom nagapahimo sa kinabuhi nga makahuloganon. Ug wala nila hupti kining malipayong paglaom diha sa ilang kaugalingon lamang. Wala, sila maikagon sa pagpaambit niini ngadto sa uban. (2 Corinto 3:12) Busa kadtong nagadawat sa paglaom sa Gingharian maoy mga tawong masaligon, ug sila nagapanlimbasog sa pagdasig sa uban pinaagi sa pagsulti kanila mahitungod sa maayong balita nga gikan sa Diyos. Kini nagatagana sa kinabuhi niadtong nagadawat sa mensahe ug labing katingalahang paglaom nga wala pa sukad ikahatag ngadto sa katawhan sa katibuk-an​—ang paglaom sa Gingharian nga mopasig-uli sa Paraiso sa yuta. Kon dili modawat niana ang mga tawo, kita magpadayon gihapon sa pagmaya tungod kay atong nabatonan ang paglaom. Kadtong magpakabungol mao ang alakansi; dili kita.​—2 Corinto 4:3, 4.

21. Unsa ang haduol na, ug sa unsang paagi angay natong timbangon ang atong paglaom?

²¹ Ang saad sa Diyos mao: “Tan-awa! Ginabag-o ko ang tanang mga butang.” (Pinadayag 21:5) Ang bag-ong kalibotan uban sa tanang makalilipay ug walay kataposang mga panalangin haduol na. Ang atong paglaom​—alang sa kinabuhi sa langit o diha sa usa ka paraisong yuta​—bililhon; pabilin diha niana. Niining malisod kataposang mga adlaw, sukad masukad, lantawa kini “ingong usa ka angkla alang sa kalag, seguro ug malig-on.” Uban sa atong paglaom nga nakaangla kang Jehova, “usa ka bato nga walay kataposan​—ang Bato nga magpabilin hangtod sa hangtod,” tino nga kita adunay malig-on ug makalilipay nga katarongan karon mismo sa “pagmaya diha sa paglaom” nga gibutang sa atong atubangan.​—Hebreohanon 6:19; Isaias 26:4, The Amplified Bible.

[Footnote]

Mga Pangutana Alang sa Repaso

◻ Unsa ang labing dakong paglaom sa katawhan?

◻ Unsa ang tinuod nga kalipay?

◻ Kanus-a lagmit mahitabo ang milagrosong pagpangayo sa mga mangaluwas sa Armageddon?

◻ Nganong dili nato tugotang mapahiklin sa mga palas-anon sa kinabuhi ang atong paglaom?

◻ Unsang mga kalipay ang imong ginapaabot diha sa bag-ong kalibotan?

[Hulagway sa panid  9]

Dili ba mapuno sa kalipay ang inyong kasingkasing nga makasaksi sa matang sa mga pagpang-ayo nga gihimo ni Jesus?

[Hulagway sa panid 10]

Kadtong nagakalipay sa Gingharian nagadasig sa uban pinaagig pagpaambit sa ilang paglaom