Nganong Angay Kitang Moampo nga Walay-Hunong?
“Pag-ampo nga walay-hunong. Pagpasalamat sa tanang butang.”—1 TESALONICA 5:17, 18.
1, 2. Sa unsang paagi gipakita ni Daniel nga iyang gipabilhan ang pribilehiyo sa pag-ampo, ug unsay epekto niana diha sa iyang relasyon sa Diyos?
NABATASAN sa manalagnang si Daniel ang pag-ampo ngadto sa Diyos katulo sa usa ka adlaw. Siya moluhod duol sa bentana sa iyang lawak sa atop, nga mag-atubang sa siyudad sa Jerusalem, ug motanyag sa iyang mga pag-ampo. (1 Hari 8:46-49; Daniel 6:10) Bisan pag sa dihang ang usa ka mando sa hari nagdili sa pag-ampo kang bisan kinsa gawas kang Dario, ang hari sa Media, si Daniel wala gayod magduhaduha. Nagpameligro man kini o wala sa iyang kinabuhi, kining tawo nga nagbatasan sa pag-ampo nangaliyupo kang Jehova nga walay-hunong.
2 Giunsa paglantaw ni Jehova si Daniel? Sa dihang ang manulondang si Gabriel miabot aron sa pagtubag sa usa sa mga pag-ampo ni Daniel, iyang gihubit ang manalagna ingong “tilinguhaon kaayo” o “gihigugma pag-ayo.” (Daniel 9:20-23; Maayong Balita Bibliya) Sa tagna ni Ezequiel, gitawag ni Jehova si Daniel ingong usa ka tawong matarong. (Ezequiel 14:14, 20) Sa tibuok niyang kinabuhi, ang mga pag-ampo ni Daniel misangpot sa usa ka suod nga relasyon uban sa Diyos, usa ka kamatuoran nga giila bisan ni Dario.—Daniel 6:16.
3. Ingon sa gipakita sa eksperyensiya sa usa ka misyonaryo, sa unsang paagi ang pag-ampo nagtabang kanato sa paghupot sa integridad?
3 Ang regular nga pag-ampo makatabang usab kanato sa pag-atubang sa grabeng mga pagsulay. Pananglitan, tagda ang kaso ni Harold King, usa ka misyonaryo sa Tsina nga gisentensiyahan ug lima ka tuig nga pagkabilanggo sa bartolina. Mahitungod sa iyang kasinatian, si Brader King miingon: “Nahimulag man ako sa akong mga isigkatawo, apan walay makapahimulag kanako gikan sa Diyos. . . . Busa, nga makita ni bisan kinsa nga moabay sa akong selda, ako moluhod katulo sa usa ka adlaw ug mag-ampo ug kusog, nga maghinumdom kang Daniel, nga gihisgotan sa Bibliya. . . . Sa maong mga okasyon daw ang espiritu sa Diyos naggiya sa akong hunahuna ngadto sa labing mapuslanong mga butang ug nagpakalma kanako. Pagkadakong espirituwal nga kusog ug kahupayan ang gihatag kanako sa pag-ampo!”
4. Unsang mga pangutana mahitungod sa pag-ampo ang atong hisgotan niining artikuloha?
4 Ang Bibliya nag-ingon: “Pag-ampo nga walay-hunong. Pagpasalamat sa tanang butang.” (1 Tesalonica 5:17, 18) Tungod niining maong tambag, tagdon nato ang mosunod nga mga pangutana: Nganong angay natong hatagan ug pagtagad ang atong mga pag-ampo? Unsay atong mga rason sa pagduol kang Jehova kanunay? Ug unsay angay natong buhaton kon mobati kita nga dili takos nga moampo sa Diyos tungod sa atong mga kasaypanan?
Pag-ugmad ug Panaghigalaay Pinaagi sa Pag-ampo
5. Ang pag-ampo motabang kanato sa pagpahimulos sa unsang talagsaong panaghigalaay?
5 Buot ba nimong isipon ka ni Jehova ingong iyang higala? Mao kanay iyang pagtawag sa patriarkang si Abraham. (Isaias 41:8; Santiago 2:23) Buot ni Jehova nga ugmaron nato ang maong matang sa relasyon uban kaniya. Sa pagkatinuod giawhag niya kita sa pagpakigsuod kaniya. (Santiago 4:8) Dili ba ang maong pag-awhag angayng magtukmod kanato sa pagpalandong sa talagsaong tagana sa pag-ampo? Lisod kaayong mohimog kahikayan nga makigkita sa usa ka importanteng opisyal sa gobyerno aron makigsulti kaniya, labi na ang pagpakighigala kaniya! Bisan pa niana ang Maglalalang sa uniberso nagdasig kanato sa pagduol kaniya nga walay pagpanuko diha sa pag-ampo, bisan kanus-a nga gusto nato o kinahanglan natong mobuhat niana. (Salmo 37:5) Ang atong walay-hunong nga mga pag-ampo makapahimo kanatong suod nga higala ni Jehova.
6. Unsay gitudlo kanato sa panig-ingnan ni Jesus bahin sa panginahanglan nga “mag-ampo nga mapinadayonon”?
6 Apan, pagkadaling mapasagdan nato ang pag-ampo! Ang pagsagubang lamang sa mga kapit-os sa adlaw-adlaw nga pagkinabuhi makakuha ug dakong bahin sa atong pagtagad nga dili na kita maningkamot sa pagpakigsulti sa Diyos. Gidasig ni Jesus ang iyang mga tinun-an sa ‘pag-ampo nga mapinadayonon,’ ug gibuhat niya mismo kana. (Mateo 26:41) Bisan tuod kanunay siyang puliki gikan sa buntag hangtod sa gabii, naggahin siyag panahon sa pagpakigsulti sa iyang langitnong Amahan. Usahay, si Jesus momata “sayo sa buntag, samtang ngitngit pa,” aron mag-ampo. (Marcos 1:35) Sa laing mga higayon, miadto siya sa mingaw nga dapit sa dihang nagkilumkilom na aron makigsulti kang Jehova. (Mateo 14:23) Si Jesus kanunayng naggahin ug panahon sa pag-ampo, ug angay usab natong buhaton kana.—1 Pedro 2:21.
7. Unsang mga sirkumstansiya ang angayng magtukmod kanato sa pagpakigsulti sa atong langitnong Amahan kada adlaw?
7 Dunay daghang angayan nga mga yugto alang sa pribadong pag-ampo kada adlaw samtang kita nag-atubang ug mga problema, nasugamak sa mga tentasyon, ug naghimog mga desisyon. (Efeso 6:18) Sa dihang mangayo kita sa giya sa Diyos diha sa tanang bahin sa atong kinabuhi, ang atong pakighigalaay kaniya tinong mas molambo pa. Kon ang duha ka higala duyog nga moatubang sa mga problema, dili ba molig-on pa ang bugkos sa ilang panaghigalaay? (Proverbio 17:17) Mahitabo usab kana kanato kon kita mosalig kang Jehova ug makaeksperyensiya sa iyang tabang.—2 Cronicas 14:11.
8. Gikan sa mga panig-ingnan ni Nehemias, Jesus, ug Ana, unsay atong makat-onan bahin sa gitas-on sa atong personal nga mga pag-ampo?
8 Pagkamalipayon nato nga ang Diyos wala maglimite kon unsa ka dugay o unsa ka subsob nga kita makapakigsulti kaniya diha sa pag-ampo! Si Nehemias militok dayon ug hilom nga pag-ampo sa wala pa mohangyo sa hari sa Persia. (Nehemias 2:4, 5) Si Jesus nagtanyag usab ug mubo nga pag-ampo sa dihang iyang gihangyo si Jehova nga hatagan siya ug gahom sa pagbanhaw kang Lazaro. (Juan 11:41, 42) Si Ana, sa laing bahin, “nagpadayon sa pag-ampo atubangan ni Jehova” sa dihang iyang gibubo ang iyang kasingkasing ngadto kaniya. (1 Samuel 1:12, 15, 16) Ang atong personal nga mga pag-ampo mahimong mubo o taas sumala sa panginahanglan ug sa mga sirkumstansiya.
9. Nganong ang atong mga pag-ampo angayng maglakip ug pagdayeg ug mga pasalamat alang sa tanan nga gihimo ni Jehova alang kanato?
9 Daghang pag-ampo diha sa Bibliya ang nagpahayag ug kinasingkasing nga apresasyon sa supremong posisyon ni Jehova ug sa iyang kahibulongang mga buhat. (Exodo 15:1-19; 1 Cronicas 16:7-36; Salmo 145) Sa usa ka panan-awon, si apostol Juan nakakita ug 24 ka ansiyano—ang kompletong gidaghanon sa dinihogang mga Kristohanon diha sa ilang langitnong puwesto—nga nagdayeg kang Jehova, nga nag-ingon: “Takos ikaw, Jehova, nga among Diyos, nga modawat sa himaya ug sa dungog ug sa gahom, tungod kay imong gilalang ang tanang butang, ug tungod sa imong kabubut-on sila milungtad ug nalalang.” (Pinadayag 4:10, 11) Kita usab dunay rason nga modayeg kanunay sa Maglalalang. Pagkamalipayon sa mga ginikanan sa dihang ang ilang anak magpasalamat kanila nga kinasingkasing tungod sa usa ka butang nga ilang nahimo alang kaniya! Ang pagpalandong nga mapabilhon sa mga kalulot ni Jehova ug ang pagpahayag sa atong kinasingkasing nga pagpasalamat alang niana maoy maayong paagi sa pagpauswag sa kalidad sa atong mga pag-ampo.
“Pag-ampo nga Walay-Hunong”—Ngano?
10. Unsay bahin sa pag-ampo diha sa pagpalig-on sa atong pagtuo?
10 Ang regular nga pag-ampo hinungdanon sa atong pagtuo. Human iilustrar ang panginahanglan nga “mag-ampo kanunay ug dili moundang,” si Jesus nangutana: “Inig-abot sa Anak sa tawo, makakaplag ba gayod siyag pagtuo dinhi sa yuta?” (Lucas 18:1-8) Ang makahuloganon, kinasingkasing nga pag-ampo makapalig-on sa pagtuo. Sa dihang ang patriarkang si Abraham nagkatigulang na ug wala pa makabaton ug anak, siya nakigsulti sa Diyos bahin sa maong butang. Sa pagtubag, si Jehova mihangyo una kaniya sa paghangad sa kalangitan ug pag-ihap sa mga bituon, kon maihap ba niya kana. Dayon gipasaligan sa Diyos si Abraham: “Mahimong ingon niana ang imong binhi.” Unsay resulta? Si Abraham “nagbutang ug pagtuo kang Jehova; ug iyang giisip kini kaniya ingong pagkamatarong.” (Genesis 15:5, 6) Kon atong buksan ang atong kasingkasing ngadto kang Jehova diha sa pag-ampo, dawaton ang iyang mga pasalig gikan sa Bibliya, ug tumanon siya, siya magpalig-on sa atong pagtuo.
11. Sa unsang paagi ang pag-ampo motabang kanato sa pagsagubang sa mga problema?
11 Ang pag-ampo makatabang usab kanato sa pagsulbad sa mga problema. Kita ba nabug-atan sa atong adlaw-adlaw nga pagkinabuhi ug nalisdan sa pag-antos sa mga sirkumstansiya nga atong giatubang? Giingnan kita sa Bibliya: “Itugyan ang imong palas-anon kang Jehova, ug siya magasapnay kanimo. Dili gayod niya itugot nga matarog ang matarong.” (Salmo 55:22) Sa dihang nag-atubang ug malisod nga mga desisyon, atong masundog ang panig-ingnan ni Jesus. Iyang gigugol ang tibuok gabii diha sa pribadong pag-ampo sa wala pa niya itudlo ang iyang 12 ka apostoles. (Lucas 6:12-16) Ug sa bisperas sa iyang kamatayon, si Jesus sinsero kaayong nag-ampo nga “ang iyang singot nahimong sama sa mga tinulo sa dugo nga nangatagak sa yuta.” (Lucas 22:44) Unsay resulta? “Gidungog siya nga may pag-uyon tungod sa iyang diyosnong kahadlok.” (Hebreohanon 5:7) Ang atong mainiton ug walay-hunong nga mga pag-ampo motabang kanato sa pagsagubang sa makapahigwaos nga mga situwasyon ug malisod nga mga pagsulay.
12. Sa unsang paagi ang pag-ampo nag-ilustrar sa personal nga interes ni Jehova kanato?
12 Ang laing rason sa pagpakigsuod kang Jehova pinaagi sa pag-ampo mao nga siya, sa baylo, makigsuod kanato. (Santiago 4:8) Sa dihang atong buksan ang atong kasingkasing ngadto kang Jehova diha sa pag-ampo, dili ba nato bation nga siya interesado sa atong mga panginahanglan ug malumong nag-atiman kanato? Atong maeksperyensiyahan mismo ang gugma sa Diyos. Wala idelegar ni Jehova sa lain ang responsibilidad sa pagpamati sa matag pag-ampo nga gitanyag sa iyang mga alagad ngadto kaniya ingong ilang langitnong Amahan. (Salmo 66:19, 20; Lucas 11:2) Ug giawhag niya kita sa ‘pagtugyan kaniya sa tanan natong kabalaka kay siya may kahingawa kanato.’—1 Pedro 5:6, 7.
13, 14. Unsay atong mga rason sa pag-ampo nga walay-hunong?
13 Ang pag-ampo makahatag kanato ug dakong kasibot alang sa publikong ministeryo ug makapalig-on kanato sa dihang kita tingali morag gusto nang moundang tungod sa kawalay-pagtagad o pagsupak. (Buhat 4:23-31) Ang pag-ampo manalipod usab kanato batok “sa malipatlipatong kaugdahan sa Yawa.” (Efeso 6:11, 17, 18) Sa dihang nakigbisog sa pagsagubang sa adlaw-adlaw nga mga pagsulay, kanunay kitang makahangyo sa Diyos nga palig-onon kita. Ang modelong pag-ampo ni Jesus naglakip sa hangyo nga si Jehova ‘magluwas kanato gikan sa usa nga daotan,’ si Satanas nga Yawa.—Mateo 6:13.
14 Kon kita magpadayon sa pag-ampo alang sa tabang sa pagkontrolar sa atong makasasalang mga hilig, maeksperyensiyahan nato ang tabang ni Jehova. Gipasaligan kita: “Ang Diyos kasaligan, ug dili niya itugot nga tentalon kamo nga labaw sa inyong maantos, apan uban sa tentasyon siya usab magtaganag kalingkawasan aron kamo makahimo sa pag-antos niini.” (1 Corinto 10:13) Si apostol Pablo mismo nakaeksperyensiya sa makapalig-ong pag-atiman ni Jehova sa nagkalainlaing mga sirkumstansiya. “Sa tanang butang ako adunay kusog pinaagi kaniya nga naghatag ug gahom kanako,” siya miingon.—Filipos 4:13; 2 Corinto 11:23-29.
Lahutay sa Pag-ampo Bisan pa sa mga Kasaypanan
15. Unsay mahimong mahitabo kon dili nato tumanon ang mga sukdanan sa Diyos?
15 Aron patalinghogan ang atong mga pag-ampo, kinahanglang dili nato isalikway ang tambag sa Pulong sa Diyos. “Bisan unsay atong pangayoon atong madawat gikan kaniya,” misulat si apostol Juan, “tungod kay atong ginabantayan ang iyang mga sugo ug ginabuhat ang mga butang nga makapahimuot sa iyang mga mata.” (1 Juan 3:22) Apan, unsa kahay mahitabo kon dili nato tumanon ang mga sukdanan sa Diyos? Si Adan ug Eva nanago human sila makasala didto sa tanaman sa Eden. Kita usab motago tingali “gikan sa nawong ni Jehova” ug mohunong sa pag-ampo. (Genesis 3:8) “Akong namatikdan nga ang halos kanunay nga unang dili-maalamong lakang nga gihimo niadtong naanod palayo kang Jehova ug sa iyang organisasyon mao nga sila mohunong sa pag-ampo,” matod ni Klaus, usa ka eksperyensiyadong nagapanawng magtatan-aw. (Hebreohanon 2:1) Mao kini ang nahitabo kang José Ángel. Siya miingon: “Sulod sa duolan sa walo ka tuig, panagsa ra kong moampo kang Jehova. Gibati nakong dili-takos nga makigsulti kaniya, bisan tuod giisip gihapon nako siya nga akong langitnong Amahan.”
16, 17. Paghatag ug mga pananglitan kon sa unsang paagi ang regular nga pag-ampo makatabang kanato sa pagbuntog sa kahuyangan sa espirituwal.
16 Ang uban kanato mobati tingaling dili-takos nga moampo tungod sa kahuyangon sa espirituwal o tungod kay kita nakasala. Apan mao gayod kini ang panahon nga kinahanglan natong magpahimulos sa tagana sa pag-ampo. Si Jonas milikay sa iyang asaynment. Apan ‘tungod sa iyang mga kasakit, si Jonas misangpit kang Jehova, ug Siya mitubag kaniya. Gikan sa tiyan sa Sheol, si Jonas nagpakitabang, ug si Jehova nagpatalinghog sa iyang tingog.’ (Jonas 2:2) Si Jonas nag-ampo, si Jehova nagtubag sa iyang pag-ampo, ug si Jonas naulian sa espirituwal.
17 Si José Ángel mainiton usab nga nag-ampo alang sa tabang. Siya nahinumdom: “Akong gibuksan ang akong kasingkasing ug mihangyo sa kapasayloan sa Diyos. Ug gitabangan gayod niya ako. Sa akong hunahuna dili ko makabalik sa kamatuoran kon wala pa ang tabang sa pag-ampo. Karon kanunay na akong mag-ampo sa matag adlaw, ug maghinamhinam akong magpaabot niining mga higayona.” Kita angayng dili gayod magpanuko sa pagpadayag ngadto sa Diyos sa atong mga sayop ug mapaubsanong mangayo sa iyang kapasayloan. Sa dihang gisugid ni Haring David ang iyang mga kalapasan, gipasaylo ni Jehova ang iyang mga sala. (Salmo 32:3-5) Si Jehova gustong motabang kanato, dili aron sa paghukom kanato. (1 Juan 3:19, 20) Ug ang mga pag-ampo sa mga ansiyano sa kongregasyon makatabang kanato sa espirituwal, kay ang maong mga pag-ampo adunay “dakong puwersa.”—Santiago 5:13-16.
18. Unsang pagsalig ang mabatonan sa mga alagad sa Diyos bisan unsa pa ka layo nga sila nahisalaag?
18 Kinsa nga amahan ang mosalikway sa iyang anak nga mapaubsanong midangop kaniya alang sa tabang ug tambag human masayop? Ang sambingay sa anak nga mausikon nagpakita nga bisan unsa pa ka layo ang atong pagkahisalaag, ang atong langitnong Amahan magmaya sa dihang kita mobalik kaniya. (Lucas 15:21, 22, 32) Giawhag ni Jehova ang tanang nakasala sa pagsangpit kaniya, “kay siya magpasaylo sa madagayaon gayod.” (Isaias 55:6, 7) Bisan tuod si David nakahimog ubay-ubayng bug-at nga mga sala, siya misangpit kang Jehova, nga nag-ingon: “Patalinghogi, Oh Diyos, ang akong pag-ampo; ug ayaw pagtago sa imong kaugalingon gikan sa akong hangyo alang sa pabor.” Miingon usab siya: “Gabii ug buntag ug udto ako kanunayng nabalaka ug nagaagulo, ug . . . madungog [ni Jehova] ang akong tingog.” (Salmo 55:1, 17) Pagkamakapadasig gayod kana!
19. Nganong dili kita angayng mohinapos nga ang morag wala tubaga nga mga pag-ampo maoy pamatuod sa dili-pag-uyon sa Diyos?
19 Komosta kon ang atong pag-ampo wala dayon matubag? Nan kinahanglang tinoon nato nga ang atong hangyo kaharmonya sa kabubut-on ni Jehova ug gitanyag sa ngalan ni Jesus. (Juan 16:23; 1 Juan 5:14) Ang disipulong si Santiago naghisgot sa pipila ka Kristohanon kansang mga pag-ampo wala tubaga tungod kay sila “nangayo sa sayop nga katuyoan.” (Santiago 4:3) Sa laing bahin, kita dili angayng mohinapos dayon nga ang morag wala tubaga nga mga pag-ampo maoy kanunayng pamatuod sa dili-pag-uyon sa Diyos. Usahay si Jehova magtugot sa matinumanong mga magsisimba sa pagpadayon una sa pag-ampo bahin sa usa ka butang sa dili pa madayag ang iyang tubag. “Padayon sa pagpangayo, ug igahatag kini kaninyo,” miingon si Jesus. (Mateo 7:7) Busa, kita kinahanglang ‘molahutay sa pag-ampo.’—Roma 12:12.
Kanunayng Mag-ampo
20, 21. (a) Nganong kinahanglan kitang mag-ampo nga walay-hunong niining “kataposang mga adlaw”? (b) Unsay atong madawat kon kita adlaw-adlawng moduol sa trono ni Jehova sa dili-takos nga kalulot?
20 Ang mga kapit-os ug mga problema nagkadaghan niining “kataposang mga adlaw,” nga gitiman-an sa “makuyaw nga mga panahong lisod sagubangon.” (2 Timoteo 3:1) Ug ang mga pagsulay dali rang makalinga sa atong hunahuna. Apan, ang atong walay-hunong nga mga pag-ampo motabang kanato sa pagsentro sa atong pagtagad sa espirituwal nga butang bisan pa sa makanunayong mga problema, tentasyon, ug kahigawad. Ang atong adlaw-adlaw nga mga pag-ampo kang Jehova makatagana sa hinungdanong pagpaluyo nga atong gikinahanglan.
21 Si Jehova, ang “Tigpatalinghog sa pag-ampo,” dili gayod puliki kaayo nga dili na maminaw kanato. (Salmo 65:2) Hinaot nga dili kita puliki kaayo nga dili na makigsulti kaniya. Ang atong pakighigalaay sa Diyos mao ang labing bililhong kabtangan nga atong mabatonan. Hinaot nga dili nato pakamenoson kana. “Busa, uban ang kagawasan sa pagsulti manuol kita sa trono sa dili-takos nga kalulot, aron makadawat kita ug kaluoy ug makakaplag ug dili-takos nga kalulot ingong tabang sa hustong panahon.”—Hebreohanon 4:16.
Unsaon Nimo Pagtubag?
• Unsay atong makat-onan gikan kang manalagnang Daniel bahin sa bili sa pag-ampo?
• Sa unsang paagi mapalig-on nato ang atong pakighigala kang Jehova?
• Nganong kinahanglan kitang moampo nga walay-hunong?
• Nganong ang mga pagbati sa pagkadili-takos dili angayng mopugong kanato sa pag-ampo kang Jehova?
[Hulagway sa panid 16]
Si Nehemias militok ug mubo, hilom nga pag-ampo sa wala pa makigsulti sa hari
[Hulagway sa panid 17]
Si Ana “nagpadayon sa pag-ampo atubangan ni Jehova”
[Mga hulagway sa panid 18]
Si Jesus nag-ampo sa tibuok gabii sa wala pa itudlo ang iyang 12 ka apostoles
[Mga hulagway sa panid 20]
Dunay daghang kahigayonan sa pag-ampo sa tibuok adlaw