Paglipay Gikan sa Diyos sa Kalinaw
“Magpadayon kamo sa paglipay sa usag usa niining mga pulonga.”—1 TESALONICA 4:18.
SI Pablo, ang apostol, dulot matinguhaon nga matagamtam sa Kristohanong kongregasyon ang kalinaw. Sa ingon, 13 sa iyang mga sulat, ingong gitipigan alang kanato diha sa dinasig nga Kasulatan, gibuksan uban sa hangyong kadtong gitumong niana makatagamtam untag kalinaw gikan sa Diyos. Pananglitan, ngadto sa bag-ong kongregasyon sa Tesalonica, si Pablo misulat: “Hinaot unta mabatonan ninyo ang dili-takos nga kalulot ug ang kalinaw.” Sa hinapos nianang sulata mismo, siya mihangyo: “Hinaot ang Diyos mismo sa kalinaw magabalaan kaninyo sa bug-os. Ug nga maayo sa tanang bahin hinaot ang espiritu ug kalag ug lawas ninyong mga igsoon matipigan sa dili-salawayong paagi sa presensiya sa atong Ginoong Jesu-Kristo.”—1 Tesalonica 1:1; 5:23.
2. (a) Unsang matang sa pagkabalaka sa kongregasyon ang gipasundayag ni Pablo? (b) Sa unsang paagi masundog sa Kristohanong mga ansiano karong adlawa ang panig-ingnan ni Pablo?
2 Si Pablo ug iyang mga kauban wala magpahigawas sa ilang kaugalingon sa ‘paghago ug pagbudlay’ taliwala niadtong bag-ong mga magtutuo. Matud ni Pablo: “Kami nagmaluluton sa inyong taliwala, ingon sa nagapasusong inahan nga nagaalima sa kaugalingon niyang mga anak. Busa, kay may malumong pagbati alang kaninyo, kami nagakalipay pag-ayo sa pagpaambit kaninyo, dili lamang sa maayong balita sa Diyos, kondili sa among kaugalingong mga kalag usab, tungod kay kamo nahimo mang among mga minahal.” Dili ba atong masabot nianang mga pulonga ang kabalaka, ang tinuod, halalom nga gugma nga gibati ni Pablo alang nianang kongregasyona? Sa pagkamatuod, kini usa ka hulad sa matang sa gugma nga ginapadayag sa Kristohanong mga ansiano diha sa mga 50,000 ka kongregasyon sa mga Saksi ni Jehova sa tibuok yuta karong adlawa.—1 Tesalonica 2:7-9; Juan 13:34, 35; 15:12-14.
3. (a) Sa unsang paagi si Timoteo nakahatag kaayohan sa kongregasyon sa Tesalonica? (b) Kini katumbas sa unsa karong adlawa?
3 Ang Manenental, si Satanas, nagpatunghag mga kasakitan niadtong mga Kristohanon sa Tesalonica. Busa gipadala ni Pablo si Timoteo ngadto kanila, aron ‘sa paglig-on kanila ug paglipay kanila alang sa ilang pagtuo.’ Si Timoteo mibalik kang Pablo sa Atenas uban ang madasigong taho mahitungod sa ilang pagkamatinumanon ug gugma. Ang tanan nalipay kaayong nahibalo sa pagtuo ug integridad sa usag usa, ug sila nagpadayon sa pagpangaliyupo sa Diyos sa pagbakwi sa bisan unsang kakulangan. (1 Tesalonica 3:1, 2, 5-7, 10) Kini, usab, nagabanaag sa teokratikanhong kahikayan karong adlawa, pinaagi sa paglig-on sa nagapanawng mga magtatan-aw sa mga kongregasyon, bisan sa dapit diin ang mga Saksi ni Jehova nagaalagad ilalom sa pagdili o sa mapait nga paglutos.—Isaias 32:1, 2.
‘Sa Iyang Presensiya’
4, 5. (a) Unsa ang hangyo dinhi ni Pablo, ug nganong kini linaing makapaikag kanato karon? (b) Nganong ang atong adlaw makahuloganon sa linain?
4 Gitapos ni apostol Pablo kining bahina sa iyang sulat pinaagi sa hangyo: “Hinaot ang Ginoo magapatubo, oo, magapadagaya kaninyo, sa gugma sa usag usa ug sa tanan, maingon sa among ginabuhat kaninyo; aron siya makapalig-on sa inyong mga kasingkasing, nga walay ikasaway sa pagkabalaan atubangan sa atong Diyos ug Amahan sa presensiya sa atong Ginoong Jesus uban sa tanan niyang balaan.”—1 Tesalonica 3:12, 13.
5 Si Pablo nagpanan-aw sa umaabot, sa panahon sa kang Jesus nga “presensiya ug sa kataposan sa sistema sa mga butang” dihang “ang Anak sa tawo moabot sa iyang himaya, ug ang tanang manulonda uban kaniya.” Ang atong langitnong Hari miabot sa 1914. Gikan sa iyang mahimayaong dili-makitang trono, si Jesus karon nagahukom sa kanasoran ug sa mga katawhan sa yuta, nga nagabulag sa mapaubsanon, karnerohong mga tawo aron luwason sa “dakong kasakitan” ug alang sa kinabuhing walay kataposan sa usa ka paraisong yuta.—Mateo 24:3-21; 25:31-34, 41, 46.
Mga Lagda sa Atong Kaayohan
6. Unsang tambag ni Pablo ang kinahanglang atong sundon karon?
6 Ikaw usa ba nga matinguhaon nianang tumong nga kinabuhing walay kataposan? Kon mao, kinahanglang pamatian mo ang gisulat ni Pablo sa mga taga-Tesalonica: “Sa kataposan, mga igsoon, kami nagahangyo ug nagaawhag kaninyo pinaagi sa Ginoong Jesus, maingong kamo nagdawat sa tugon gikan kanamo mahitungod sa kon unsaon sa pagkinabuhi ug sa pagpahimuot sa Diyos, sumala sa inyo nang ginabuhat, nga kamo magpadayon sa pagbuhat niana sa labi pang bug-os. Kay kamo nahibalo sa mga lagda nga among gihatag kaninyo pinaagi sa Ginoong Jesus.” (1 Tesalonica 4:1, 2) Unsa ang pipila sa “mga lagda” nga gipasiugda dinhi ni Pablo?
7. (a) Unsang hinungdanong ‘lagda’ ang gihatag dinhi? (b) Kay nakadawat sa espiritu sa Diyos, nganong dili gayod nato irelaks ang atong pagbantay?
7 Ang unang ‘lagda’ may kalabotan sa maayong kagawian. Si Pablo prangkang mipahayag: “Kini ang pagbuot sa Diyos, ang pagbalaan kaninyo, nga kamo molikay sa pakighilawas; nga ang matag usa kaninyo mahibalo gayod sa unsang paagi mapanag-iya ang iyang kaugalingong panudlanan diha sa pagkabalaan ug kadungganan, dili sa maibogong gana sa sekso sama nianang nabatonan usab nianang mga nasod nga wala makailag Diyos.” Ikalipay, kita “nakaila” sa Diyos ug sa iyang Anak, si Jesu-Kristo, ug nagatinguha sa kinabuhing walay kataposan. Makauulaw gayod unya kaayo kon atong itugot nga kita maganoy balik sa kalibotanong lunangan sa imoralidad! Ikasubong isulti, ang pipilang nakalahutay sa katuigan sa mga kampo konsentrasyon ug sa mga prisohan, o nakagugol sa tibuok kinabuhi sa madasigong misyonaryong buluhaton, nga unya sa ulahi nagtugot nga sila hisakpan sa Manenental kon bahin sa moralidad. Kay nakadawat sa balaang espiritu sa Diyos, hinaot kita dili gayod ‘magapaguol’ niini pinaagi sa seksuwal nga kadaotan!—1 Tesalonica 4:3-8; Juan 17:3; 1 Corinto 10:12, 13; Efeso 4:30.
8, 9. (a) Unsa ang “inigsoong gugma”? (b) Sa unsang paagi atong maugmad kanang gugmaha, ug uban ang unsang kaayohan?
8 Ang sunod nga ‘lagda’ ni Pablo mao ang may kalabotan sa phil·a·del·phiʹa, ang “inigsoong gugma.” (1 Tesalonica 4:9, 10) Kini linaing pagpadayag sa may-prinsipyong gugma, ang a·gaʹpe, nga mainitong ginasugyot usab ni Pablo dinhi sa bersikulo 9, ingon man diha sa kapitulo 3, bersikulo 6 ug 12. Ang phil·a·del·phiʹa maoy suod kaayong pagbati, sama sa dayag naglungtad tali kang Jesus ug Pedro, ug tali kang David ug Jonathan. (Juan 21:15-17; 1 Samuel 20:17; 2 Samuel 1:26) Kini ikadugang sa a·gaʹpe sa pag-ugmad ug suod nga panag-uban, sumala sa makita, pananglitan, sa mutuwal nga kalipay sa pagpakig-uban nga hikaplagan sa mga Saksi ni Jehova sa payunir nga ministeryo ug sa ubang teokratikanhong kalihokan.
9 Si Pablo miingon: “Magpadayon sa pagbuhat niini sa labi pang bug-os.” Kita makapauswag kanunay sa atong inigsoong gugma. Kining maong maayong hiyas ilabinang magaawas dihang ang mga ansiano ug ministeryal nga mga alagad manguna sa madasigong pag-alagad sa Gingharian. Dihang ang tanan sa kongregasyon mapuliki sa ‘pagpangita pag-una sa Gingharian,’ ang mga kabingkilan tungod sa tawhanong pagkadili-hingpit, mga panagbangi tungod sa personalidad, ug susamang suliran mahimong ikaduha. Atong ipunting kanunay ang atong mga mata sa tumong!—Mateo 6:20, 21, 33; 2 Corinto 4:18.
10. Sa unsang paagi kita, ingong mga Kristohanon, ‘magkinabuhing maligdong’?
10 Gilangkit ni Pablo dinhi ang laing ‘lagda’—nga himoon natong tumong ang pagkinabuhing malinawon, dili manghilabot sa uban, ug magbuhat pinaagi sa atong mga kamot. Samtang kita sa ingon ‘magalakaw nga maligdong’ sa atong matag-adlawng mga kinabuhi, nga magpasundayag sa may-prinsipyong gugma ug inigsoong pagbati, ang tanan natong panginahanglan igatagana.—1 Tesalonica 4:11, 12; Juan 13:35; Roma 12:10-12.
Gilipay sa Paglaom sa Pagkabanhaw
11. (a) Nganong sa maong panahon gihisgotan ni Pablo ang ulohang pagkabanhaw? (b) Sa unsang paagi kita apektado niining tambag ni Pablo?
11 Sunod gihisgotan sa apostol ang talagsaong paglaom sa pagkabanhaw. Apan nganong ipasulod ni Pablo kining ulohana? Buot niyang lig-onon ang iyang mga igsoon aron makaagwanta sa mga paglutos nga moabot kanila. May kapeligrohang sila mawad-an sa ilang kinabuhi. Mopatim-awng niadtong panahona ang pipila kanila nangatulog sa kamatayon. Ang isigkamagtutuo nagkinahanglan sa paglipay. (1 Tesalonica 2:14-20) Kay naghunahunang duol na ang “presensiya” ni Kristo, sila nahibulong kon unsay mahitabo niadtong nangamatay na. Ang gisulat ni Pablo karon motagana dili lamang sa paglipay alang niadtong mga Kristohanong nawad-ag mga minahal kondili pagdasig usab sa pag-antos hangtod moabot ang “adlaw” ni Jehova. Ang tambag ni Pablo angay magtabang kanatong tanan sa pagpakitag espirituwal nga kalig-on samtang kita mopadayon sa pagpahayag sa maayong balita, sa pagpaabot sa bug-os nga kataposan niining sistema sa mga butang.—2 Tesalonica 1:6-10.
12. Unsang tinuod nga paglipay ang atong mabatonan inigkamatay sa usa ka minahal, ug gikan sa unsang tinubdan?
12 Si Pablo miingon: “Mga igsoon, dili namo buot nga kamo mawalay kabangkaagan mahitungod niadtong nangatulog sa kamatayon; aron kamo dili managsubo sama sa uban usab nga walay paglaom.” (1 Tesalonica 4:13) Dako gayong paglipay ug kalinaw sa hunahuna ang mabatonan tungod sa paglaom sa pagkabanhaw! Mga lima ka tuig sa ulahi, gipailaila ni Pablo ang iyang ikaduhang sulat ngadto sa mga Kristohanon sa Corinto pinaagi sa pag-ingon: “Hinaot kamo may dili-takos nga kalulot ug kalinaw gikan sa Diyos nga atong Amahan ug sa Ginoong Jesu-Kristo. Bulahan ang Diyos ug Amahan sa atong Ginoong Jesu-Kristo, ang Amahan sa malumong mga kaluoy ug ang Diyos sa tanang paglipay, kinsa nagalipay kanato sa tanan natong kasakitan, aron kita makalipay unta niadtong anaa sa bisan unsang matang sa kasakitan pinaagi sa paglipay nga niana kita ginalipay sa Diyos.”—2 Corinto 1:2-4.
13, 14. (a) Nganong buot ni Pablo nga mahibalo ang mga Kristohanon bahin sa kahulogan sa kamatayon? (b) Sumala sa ginapakita sa Kasulatan unsa ang kahimtang sa mga patay?
13 Dili buot sa apostol nga kita mawalay kabangkaagan kon bahin sa kahimtang sa mga patay. Sa dili madugay, mosulod ang dakong apostasiya taliwala sa nag-angkong mga Kristohanon, mao nga sila mobalik sa Babilonyanhon ug Gregong mga pilosopiya. Dawaton sa maong mga apostata ang Platonikong doktrina sa kinaiyanhong pagkadili-mamatay sa kalag—karon pangunang pagtulon-an sa tibuok imperyo sa bakak nga relihiyon sa kalibotan. Ang misteryo nga nagalibot sa “sunod nga kinabuhi,” bisan kono didto sa langit, purgatoryo, o sa usa ka dapit sa walay-kataposang pagsakit, dili mohatag ug tinuod nga paglipay. Dugang pa, ang kinaiyanhong imortalidad nagasupak sa doktrina sa pagkabanhaw, kay sa unsang paagi ang usa pagabanhawon sa kinabuhi kon ang kalag dili mamatay?
14 Si Pablo dinhi nagsulat “mahitungod niadtong nangatulog sa kamatayon.” Oo, “nangatulog.” Ang usa ka tawong natulog walay kahibalo sa bisan unsa ug dili makabuhat sa bisan unsang mga buluhaton. (Itandi ang Ecclesiastes 9:5, 10.) May usa ka higayon panahon sa ministeryo ni Jesus dihang siya miingong si Lasaro “mipahulay” ug siya, si Jesus, “magpukaw kaniya gikan sa pagkatulog.” Dihang ang mga tinun-an ni Kristo wala makasabot nianang mga pulonga, “si Jesus miingon kanila sa prangka: ‘Si Lasaro namatay.’” Ang mga igsoong babaye ni Lasaro, si Marta ug si Maria, nalipay tungod sa paglaom sa pagkabanhaw, ug gidad-an sila ni Jesus ug dugang paglipay. Ug nalig-on gayod ang ilang pagtuo dihang gibanhaw ni Jesus ang iyang higala, nga patay na sa upat ka adlaw, gikan sa pagkatulog sa kamatayon!—Juan 11:11-14, 21-25, 43-45.
15. (a) Sa unsang paagi gilig-on ang atong paglaom sa pagkabanhaw? (b) Sa unsang paagi kita matabangang makapasibo sa pagkamatay sa usa ka minahal?
15 Kadtong milagroha, duyog sa ubang buhat ni Jesus sa pagbanhaw sa mga patay, ug labaw sa tanan ang pagbanhaw ni Jehova kang Jesus mismo—tanan kining gipamatud-an pag-ayong mga hitabo nagalig-on sa atong pagsalig sa kahibulongang paglaom sa pagkabanhaw. (Lucas 7:11-17; 8:49-56; 1 Corinto 15:3-8) Matuod, ang kamatayon mopatunghag kasubo ug mga luha, ug lisod ang pagpasibo sa pagkawala sa usa ka minahal. Apan pagkadakong paglipay ug kusog ang atong maangkon sa pasalig nga ang Soberanong Ginoong Jehova “maglamoy sa kamatayon sa walay kataposan, ug . . . magapahid sa mga luha gikan sa tanang nawong”! (Isaias 25:8; Pinadayag 21:4) Ang usa sa labing maayong mga tambal sa kasubo mao ang pagpabiling puliki sa pag-alagad sa Diyos sa kalinaw, nga magahatag sa uban sa makalipayng paglaom sa Gingharian nga ato mismong nadawat nga mapasalamaton kaayo.—Itandi ang Buhat 20:35.
Han-ay sa Pagkabanhaw
16, 17. (a) Sa unsang paagi “ang kataposang kaaway” pagalaglagon? (b) Unsang kahan-ayan sa pagkabanhaw ang karon ginapatin-aw ni Pablo?
16 Ang atong pagtuo lig-on nga si Kristo, “ang unang mga bunga” sa pagkabanhaw ug karon gientrono sa tuo nga kamot sa Diyos sa mga langit, magatuman sa bug-os sa mga katuyoan ni Jehova maylabot sa mahimayaong mga katuyoan. (Hebreohanon 6:17, 18; 10:12, 13) Sumala sa gipahayag ni Pablo sa laing sulat: “Siya [Jesu-Kristo] magamando nga hari hangtod igabutang sa Diyos ang tanang kaaway sa ilalom sa iyang mga tiil. Ingong kataposang kaaway, ang kamatayon pagawad-on.” Sa unsang paagi? Sa bahin pinaagi sa pagkabanhaw ug paghanaw sa mga epekto sa Adamikong kamatayon. Bag-o pang gipatin-aw kini sa apostol niining paagiha: “Sanglit ang kamatayon maoy pinaagi sa usa ka tawo, ang pagkabanhaw sa mga patay maoy pinaagi usab sa usa ka tawo. Kay maingong diha kang Adan ang tanan mamatay, diha usab kang Kristo ang tanan mabuhi. Apan ang matag usa sa iyang kaugalingong ranggo: Si Kristo ang unang mga bunga, human niana kadtong iya ni Kristo panahon sa iyang presensiya.” (1 Corinto 15:20-26) Mao kining han-aya sa pagkabanhaw nga gihisgotan sunod ni Pablo sa iyang unang sulat ngadto sa mga taga-Tesalonica, nga miingon:
17 “Kon ang atong pagtuo mao nga si Jesus namatay ug mibangon pag-usab, busa, usab, kadtong nangatulog sa kamatayon pinaagi kang Jesus pagadad-on sa Diyos uban kaniya. Kay kini ang among isulti kaninyo pinaagi sa pulong ni Jehova, nga kitang mga buhi nga mabuhi pa hangtod sa presensiya sa Ginoo dili gayod mauna niadtong nangatulog sa kamatayon; tungod kay ang Ginoo mismo mokanaog gikan sa langit uban ang nagasugo nga panawag, uban ang tingog sa arkanghel ug uban ang trompeta sa Diyos, ug kadtong nangamatay nga nahiusa kang Kristo mobangon pag-una.”—1 Tesalonica 4:14-16.
18. Kanus-a gibanhaw ang mga dinihogang “nangatulog sa kamatayon”?
18 Tapos sa 1914, panahon sa “presensiya” ni Jesus diha sa gahom sa Gingharian, siya, ingong arkanghel, magahatag sa langitnong sugo nga tigomon kadtong “nahiusa kang Kristo.” Sa kahimtang sa maong mga dinihogang “nangatulog sa kamatayon,” kining samag-trompetang mga panawag nagpasabot sa ilang espirituwal nga pagkabanhaw ngadto sa mga langit. Ang Bantayanang Torre dugay nang nagpahayag sa pagtuo nga kining pagkabanhaw sa dinihogang mga Kristohanon gikan sa kamatayon nagsugod sa tuig 1918.
19. Kanus-a ug sa unsang paagi kadtong nahibilin “pagasakgawon sa mga panganod,” ug alang sa unsang katuyoan?
19 Ugaling, komosta ang nahibiling dinihogang mga Kristohanon sa yuta, nga karon nagkagamay nga pundok nga menos na sa 10,000? Kini sila, usab, kinahanglang magtapos sa ilang yutan-ong pagkinabuhi nga matinumanon. Nga maorag siya uban kanila panahon sa presensiya ni Kristo, si Pablo misulat: “Human niana kita nga mga buhi pa, uban kanila, pagasakgawon sa mga panganod sa pagtagbo sa Ginoo sa kahanginan; ug sa ingon kita mahauban sa kanunay sa Ginoo.” (1 Tesalonica 4:17; itandi ang Pinadayag 1:10.) Busa, sa nahaigong panahon, ang tanang 144,000 pagabanhawon aron mag-alagad nga mga saserdote ug mga hari sa langitnong Bukid Sion uban sa Kordero, si Jesu-Kristo. “Kini mao ang unang pagkabanhaw.” (Pinadayag 14:1, 4; 20:4, 5) Apan unsay nagapaabot sa binilyong katawhan nga karon anaa sa ilang mga lubnganan?
20, 21. (a) Unsa ang palaaboton sa binilyong katawhang anaa sa ilang lubnganan? (b) Unsang pundoka ang dili na gayod mamatay sa yuta, ug ngano? (c) Kon mamatay ugaling ang pipila niining grupoha, unsang makalipayng palaaboton ang ilang nabatonan?
20 Bisan tuod si Pablo wala tinong maghisgot niini diha sa iyang unang sulat sa mga taga-Tesalonica, ang Pinadayag 20:12 nagapasalig kanatong “ang mga patay, ang dagko ug ang gagmay,” pagabanhawon aron mobarog sa atubangan sa tronong hukmanan sa Diyos. (Tan-awa usab ang Juan 5:28, 29.) Hinuon, karong adlawa ang “usa ka dakong panon” nga moabot sa minilyon natigom na atubangan nianang tronoha. Ingong grupo, kini sila maluwas nga buhi latas sa umaabot nga “dakong kasakitan.” Sila pagaatimanon sa Kordero ug pagatultolan ngadto sa “mga tuboran sa mga tubig sa kinabuhi,” mao nga sila dili na gayod mamatay sa yuta. Apan tungod sa pagkatigulang o wala mahibaloi daang hitabo, ang pipila kanila tingali mamatay panahon sa “presensiya” sa Ginoo. (Pinadayag 7:9, 14, 17; Ecclesiastes 9:11) Unsay ikasulti bahin niini nila?
21 Ang malipayong paglaom sa sayong pagkabanhaw anaa sa unahan alang sa tanan nianang “ubang mga karnero.” (Juan 10:16) Ang ilang pagtuo ug mga buhat, sama niadtong iya ni Abraham sa karaan, nagdala na kanila ngadto sa pakighigala sa Diyos. Sama niadtong mga lalaki ug mga babaye sa pagtuo nga gibatbat sa Hebreohanon kapitulo 11, kining modernong-adlawng “ubang mga karnero” nakaantos sa mga pagsulay. Makataronganong sila, usab, makaagom sa “maarang-arang nga pagkabanhaw,” pihong sa sinugdanan sa human-Armageddon nga yugto. (Hebreohanon 11:35; Santiago 2:23) Sa pagkamatuod, ang matag usa si kinsa, sa pagtuo, ‘mikaon sa unod ni Jesus ug miinom sa iyang dugo’ makaambit sa pagkatuman sa iyang saad: “Siya . . . adunay kinabuhing walay kataposan, ug siya akong pagabanhawon sa kataposang adlaw.”—Juan 6:54; Roma 5:18, 21; 6:23.
22. Sa unsang paagi kita mahimong maglipay sa usag usa?
22 Tapos sa paghisgot sa mahimayaong paglaom sa pagkabanhaw, si Pablo mitambag: “Magpadayon sa paglipay sa usag usa niining mga pulonga.” (1 Tesalonica 4:18) Dayon iyang gihisgotan sa dugang ang hinungdanong mga butang mahitungod sa “presensiya sa atong Ginoong Jesus.” (1 Tesalonica 5:23) Unsa ba kini sila? Tan-awa ang artikulong “Kalinaw Gikan sa Diyos—Kanus-a?”
Ingong Sumaryo—
◻ Unsang mga hangyo ang gihimo ni Pablo alang sa mga Kristohanon?
◻ Unsang “mga lagda” ang gihatag sa apostol alang sa atong kaayohan?
◻ Sa unsang paagi ang Pulong sa Diyos nagalipay kanato bahin sa mga patay?
◻ Unsang kahan-ayan sa pagkabanhaw ang gibatbat ni Pablo?
1. Unsang mga hangyo ni Pablo ang nagpakita sa iyang interes sa kalinaw?