Ang Kaluwasan Pinaagi sa Gingharian sa Diyos Haduol Na!
“Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.”—MAT. 6:10.
1. Unsa ang pangunang pagtulon-an ni Jesus?
SA IYANG Wali sa Bukid, gilakip ni Jesu-Kristo ang usa ka sulondang pag-ampo nga nagsumaryo sa iyang pangunang pagtulon-an. Gitudloan niya ang iyang mga sumusunod sa pag-ampo ngadto sa Diyos: “Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.” (Mat. 6:9-13) Si Jesus “mipanaw gikan sa siyudad ug siyudad ug gikan sa balangay ug balangay, nga nagwali ug nagpahayag sa maayong balita sa gingharian sa Diyos.” (Luc. 8:1) Iyang giawhag ang iyang mga sumusunod: ‘Padayong pangitaa pag-una ang gingharian ug ang pagkamatarong sa Diyos.’ (Mat. 6:33) Samtang imong tun-an kining artikuloha, pangitag mga paagi nga imo kining mapadapat diha sa ministeryo. Pananglitan, tagda kon unsaon nimo pagtubag kining mga pangutanaha: Unsa ka hinungdanon ang mensahe sa Gingharian? Gikan sa unsa nga ang katawhan kinahanglang luwason? Sa unsang paagi magtaganag kaluwasan ang Gingharian sa Diyos?
2. Unsa ka hinungdanon ang mensahe sa Gingharian?
2 Si Jesus mitagna: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” (Mat. 24:14) Ang maayong balita mahitungod sa Gingharian sa Diyos mao gayod ang labing hinungdanong mensahe sa tibuok-kalibotan! Diha sa kapin sa 100,000 ka kongregasyon sa mga Saksi ni Jehova sa tibuok-kalibotan, mga pito ka milyon nga mga alagad sa Diyos ang nakigbahin sa kinadak-ang buluhaton sa pagsangyaw. Ilang gipahibalo sa uban nga ang Gingharian sa Diyos natukod na. Nagpasabot kini nga ang Diyos nagtukod ug usa ka kagamhanan didto sa langit nga maoy magmando dinhi sa yuta. Kini maoy usa ka maayong balita. Ubos sa pagmando sa Gingharian, ang kabubut-on ni Jehova matuman na unya sa yuta maingon man usab sa langit.
3, 4. Unsay kahimtang sa dihang matuman na ang pagbuot sa Diyos dinhi sa yuta?
3 Unsa unyay kahimtang sa katawhan sa dihang matuman na ang kabubut-on sa Diyos dinhi sa yuta? ‘Pagapahiran ni Jehova ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa.’ (Pin. 21:4) Ang tawo dili na masakit o mamatay tungod kay wala na ang napanunod nga sala ug pagkadi-hingpit. Ang mga patay nga anaa sa panumdoman sa Diyos makabatog kahigayonan nga mabuhing walay-kataposan, kay ang Bibliya nagsaad: “Aduna unyay pagkabanhaw sa mga matarong ug sa mga dili-matarong.” (Buh. 24:15) Mawala na ang gubat, sakit, gutom, ug ang yuta mahimo nang usa ka paraiso. Aduna na unyay pakigdait tali sa bangis nga mga hayop ug sa mga tawo.—Sal. 46:9; 72:16; Isa. 11:6-9; 33:24; Luc. 23:43.
4 Tungod sa kahibulongang mga panalangin nga ipahinabo sa Gingharian, dili ikatingala nga ang tagna sa Bibliya naghulagway niana sa makapahupayng mga pulong: “Ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.” Unsay mahitabo sa mga daotan? Ang Kasulatan nagtagna: “Sa dili na madugay, ug ang daotan mawala na.” Apan, “ang mga nagalaom kang Jehova mao ang magapanag-iya sa yuta.”—Sal. 37:9-11.
5. Unsay mahitabo niining presenteng sistema?
5 Aron kini matuman, kinahanglan unang wagtangon ang nanagbangi nga mga gobyerno, relihiyon, ug komersiyal nga sistema sa atong panahon. Mao gayod kana ang himoon sa langitnong kagamhanan. Ang manalagnang si Daniel nagtagna bahin niini: “Sa mga adlaw nianang mga haria ang Diyos sa langit magatukod ug usa ka gingharian nga dili gayod malumpag. Ug ang maong gingharian dili igapasa ngadto sa lain nga katawhan. Kini magadugmok ug magatapos niining tanang [presenteng] gingharian, ug kini mobarog hangtod sa panahong walay tino.” (Dan. 2:44) Ang bag-ong langitnong kagamhanan, ang Gingharian sa Diyos, magmando sa usa ka bag-ong katilingban dinhi sa yuta. Aduna unyay “bag-ong mga langit ug usa ka bag-ong yuta . . . , ug niini magpuyo ang pagkamatarong.”—2 Ped. 3:13.
Ilabinang Gikinahanglan ang Kaluwasan Karon
6. Giunsa paghubit sa Bibliya ang pagkadaotan sa kalibotan?
6 Sa dihang si Satanas ug ang unang magtiayon mirebelde batok sa Diyos ug mihimog ilang kaugalingong sukdanan sa maayo ug sa daotan, nagsugod ang makapasubong kasaysayan sa katawhan. Sulod sa kapig 1,600 ka tuig una pa ang Lunop, “ang pagkadaotan sa tawo dagaya diha sa yuta ug ang matag kiling sa mga hunahuna sa iyang kasingkasing daotan lamang sa tanang panahon.” (Gen. 6:5) Mga 1,300 ka tuig ang milabay, nakita ni Solomon ang hilabihang pagkadaotan mao nga siya misulat: “Gipahalipayan ko ang mga patay nga namatay na kay sa mga buhi nga buhi pa. Busa mas maayo pa kay kanilang duha ang usa nga wala pa motungha, nga wala makakita sa malisod nga buluhaton nga ginabuhat ilalom sa adlaw.” (Eccl. 4:2, 3) Mga 3,000 ka tuig sa ulahi, ang pagkadaotan padayong nagdagsang hangtod sa atong adlaw.
7. Nganong ilabinang gikinahanglan ang kaluwasan pinaagi sa Gingharian sa Diyos karon?
7 Sanglit ang pagkadaotan padayong naglungtad sa dugay nang panahon, ilabina gayong gikinahanglan ang kaluwasan pinaagi sa Gingharian sa Diyos karon. Ang kahimtang sa milabayng usa ka gatos ka tuig padayong nagkagrabe. Pananglitan, ang Worldwatch Institute mitaho: “Tulo ka pilo ang gidaghanon sa mga tawo nga namatay sa gubat sa [ika-20ng] siglo kay sa tanang gubat sukad sa unang siglo AD ngadto sa 1899.” Sukad sa 1914, kapin sa usa ka gatos ka milyon ang namatay tungod sa gubat! Ang usa ka encyclopedia nagbanabana nga mokabat ug 60 milyones ang namatay sa Gubat sa Kalibotan II. Tungod sa nukleyar nga mga armas sa ubang mga nasod, makahimo na ang tawo sa pagkalas ug hilabihan ka daghang kinabuhi pinaagi niana. Bisan pa sa mga kalamboan sa siyensiya ug medisina, ang gutom padayong mipatay ug mga lima ka milyon nga mga bata kada tuig.—Tan-awa ang kapitulo 9 sa librong Unsay Tinuod nga Gitudlo sa Bibliya?
8. Unsay bug-os napamatud-an sa linibo ka tuig nga pagmando sa tawo?
8 Ang mga paningkamot sa tawo wala gayod makapahunong sa pagkadaotan. Ang politikal, komersiyal, ug relihiyosong mga institusyon niining kalibotana, napakyas sa pagtaganag pangunang panginahanglan sa tawo sa kalinaw, kalamboan, ug maayong panglawas. Inay sulbaron ang dagkong mga problema, ila hinuon kining gipasamot. Ang linibo ka tuig nga pagmando sa tawo nagpamatuod gayod nga tinuod kining mga pulonga: “Dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.” (Jer. 10:23) Oo, “ang tawo nagmando sa tawo alang sa iyang kadaotan.” (Eccl. 8:9) Dugang pa, “ang tibuok kalalangan duyog nga nagpadayon sa pag-agulo ug anaa sa kasakitan.”—Roma 8:22.
9. Unsang mga kahimtang ang gidahom sa tinuod nga mga Kristohanon nga mahitabo sa “kataposang mga adlaw”?
9 Ang Bibliya nagtagna sa kahimtang sa atong panahon: “Sa kataposang mga adlaw moabot ang makuyaw nga mga panahong lisod sagubangon.” Human hisgoti ang mga kahimtang sa pagmando sa tawo, ang tagna nagpadayon: “Ang mga tawong daotan ug mga impostor mosamot pa kangil-ad.” (Basaha ang 2 Timoteo 3:1-5, 13.) Alang sa mga Kristohanon, tinuod gayod kini sanglit “ang tibuok kalibotan nailalom sa gahom sa usa nga daotan,” si Satanas. (1 Juan 5:19) Apan sa dili madugay ang Diyos magaluwas sa mga nahigugma kaniya gikan sa kalibotan nga misamot kadaotan. Kini maoy usa ka maayong balita.
Ang Bugtong Kasaligang Tinubdan sa Kaluwasan
10. Nganong si Jehova ang bugtong Tinubdan sa kaluwasan?
10 Samtang imong isangyaw ang maayong balita, ipakita nga si Jehova ang bugtong kasaligang Tinubdan sa kaluwasan. Siya lamang ang may gahom ug tinguha sa pagluwas sa iyang mga alagad gikan sa lisod nga mga kahimtang. (Buh. 4:24, 31; Pin. 4:11) Makaseguro kita nga si Jehova magaluwas gayod sa iyang katawhan ug magatuman sa iyang mga katuyoan, kay siya misaad: “Tino nga sumala sa akong gihunahuna, kini mahitabo gayod.” Ang iyang pulong “dili mobalik [kaniya] nga walay sangpotanan.”—Basaha ang Isaias 14:24, 25; 55:10, 11.
11, 12. Unsang pasalig ang gihatag sa Diyos ngadto sa iyang mga alagad?
11 Si Jehova mipasalig nga iyang luwason ang iyang mga alagad sa dihang siya maghukom sa mga daotan. Sa dihang iyang gisugo si Jeremias sa pagpasidaan nga maisogon sa mga tawong hilabihan ka makasasala, ang Diyos miingon: “Ayaw kahadlok.” Ngano? Kay “ako nagauban kanimo sa pagluwas kanimo.” (Jer. 1:8) Ingon usab niana ang kahimtang kaniadto sa dihang hapit na niyang laglagon ang Sodoma ug Gomora, siya nagpadalag duha ka manulonda aron sa pag-uban kang Lot ug sa iyang pamilya paingon sa usa ka luwas nga lugar. “Unya si Jehova nagpaulan ug asupre ug kalayo . . . nganha sa Sodoma ug nganha sa Gomora.”—Gen. 19:15, 24, 25.
12 Bisan sa tibuok-kalibotan, si Jehova makahimo usab sa pagluwas niadtong nagtuman sa iyang kabubut-on. Sa dihang iyang gilaglag ang karaang daotang sistema pinaagi sa Lunop, iyang ‘giluwas si Noe, nga usa ka magwawali sa pagkamatarong, uban sa pito pa.’ (2 Ped. 2:5) Busa luwason na usab ni Jehova ang mga matarong sa dihang iyang laglagon kining daotang kalibotan. Ang iyang Pulong nag-ingon: “Pangitaa ninyo si Jehova, kamong tanang maaghop sa yuta . . . Pangitaa ang pagkamatarong, pangitaa ang pagkamaaghop. Tingali kamo pagatagoan sa adlaw sa kasuko ni Jehova.” (Sof. 2:3) Ingong resulta sa maong tibuok-kalibotang kalaglagan, ‘ang mga matul-id magapuyo sa yuta, apan ang mga daotan pagaputlon gikan niana.’—Prov. 2:21, 22.
13. Sa unsang paagi pagaluwason ni Jehova ang iyang mga alagad nga namatay na?
13 Hinunoa, daghan sa mga alagad sa Diyos ang namatay tungod sa sakit, paglutos, ug uban pang mga hinungdan. (Mat. 24:9) Nan, sa unsang paagi pagaluwason niya silang tanan? Sama sa gipakita na, “aduna unyay pagkabanhaw sa mga matarong.” (Buh. 24:15) Makapahupay gayod ang pagkahibalo nga wala gayoy makapugong kang Jehova sa pagluwas sa iyang mga alagad!
Usa ka Matarong nga Kagamhanan
14. Nganong makasalig kita nga ang Gingharian sa Diyos maoy usa ka matarong nga kagamhanan?
14 Diha sa pagsangyaw, mahimo nimong isaysay nga ang langitnong Gingharian ni Jehova maoy usa ka matarong nga kagamhanan. Tinuod kini kay mabanaag diha niana ang kahibulongang mga hiyas sa Diyos, sama sa hustisya, pagkamatarong, ug gugma. (Deut. 32:4; 1 Juan 4:8) Iyang gitudlo si Jesu-Kristo, ang labing takos sa pagmando sa yuta, ingong Hari sa maong Gingharian. Katuyoan usab ni Jehova nga ang 144,000 nga dinihogang mga Kristohanon kuhaon sa yuta ug banhawon ngadto sa langit ingong kaubang mga manununod ni Kristo sa pagmando sa yuta.—Pin. 14:1-5.
15. Isaysay ang kalainan sa Gingharian sa Diyos ug sa pagmando sa tawo.
15 Dako gayod ug kalainan ang pagmando ni Jesus uban sa 144,000 kon itandi sa pagmando sa mga tawong dili hingpit! Ang mga magmamando sa atong panahon sagad mapintas ug nag-awhag sa ilang mga ginsakpan sa pagpakiggubat, nga tungod niini, minilyon ang nangamatay. Busa ang Kasulatan nagtambag nga dili nato ibutang ang atong pagsalig sa tawo, “nga kaniya walay kaluwasan”! (Sal. 146:3) Apan mabanaag diha sa pagmando ni Jesus ang iyang maayong mga hiyas! Siya miingon: “Umari kanako, kamong tanang nabudlayan ug nabug-atan, ug ako magapalagsik kaninyo. Isangon diha kaninyo ang akong yugo ug magtuon gikan kanako, kay ako malumog-buot ug mapainubsanon sa kasingkasing, ug kamo makakaplag ug kahayahay alang sa inyong mga kalag. Kay ang akong yugo masayon ug ang akong luwan magaan.”—Mat. 11:28-30.
Ang Kataposang mga Adlaw Haduol Nang Matapos!
16. Sa unsang paagi pagataposon ang kataposang mga adlaw?
16 Sukad sa 1914, ang kalibotan anaa na sa kataposang mga adlaw o sa “kataposan sa sistema sa mga butang.” (Mat. 24:3) Sa dili madugay, mahitabo na ang gitagna ni Jesus nga “dakong kasakitan.” (Basaha ang Mateo 24:21.) Ang maong dili-hitupngan nga kasakitan magtapos sa kalibotan ni Satanas. Apan sa unsang paagi magsugod ang dakong kasakitan? Ug sa unsang paagi kana matapos?
17. Unsay gipaila sa Bibliya bahin sa pagsugod sa dakong kasakitan?
17 Sa kalit magsugod ang dakong kasakitan. Ang “adlaw ni Jehova” moabot nga wala damha “sa dihang sila magaingon: ‘Kalinaw ug kasegurohan!’” (Basaha ang 1 Tesalonica 5:2, 3.) Kini magsugod sa dihang ang mga nasod magtuo nga hapit na nilang masulbad ang pipila sa ilang dagkong mga problema. Daghan gayod ang matingala sa kalit nga kalaglagan sa “Dakong Babilonya,” ang tibuok-kalibotang imperyo sa bakak nga relihiyon. Ang mga hari ug uban pang mga tawo mahingangha gayod sa dihang ipahamtang na ang paghukom sa Dakong Babilonya.—Pin. 17:1-6, 18; 18:9, 10, 15, 16, 19.
18. Unsay himoon ni Jehova sa dihang atakehon ni Satanas ang Iyang mga alagad?
18 Sa usa ka tinong yugto, aduna unyay “mga ilhanan sa adlaw ug sa bulan ug sa mga bituon,” ug “ang ilhanan sa Anak sa tawo mopakita sa langit.” Kon mahitabo na kini, atong ‘ihangad ang atong mga ulo, tungod kay ang atong kaluwasan haduol na.’ (Luc. 21:25-28; Mat. 24:29, 30) Dayon, atakehon ni Satanas o Gog uban sa iyang mga puwersa ang katawhan sa Diyos. Apan bahin kanila nga moatake sa iyang matinumanong mga alagad, si Jehova miingon: “Siya nga nagahilabot kaninyo nagahilabot sa kalimutaw sa akong mata.” (Zac. 2:8) Busa si Satanas dili gayod molampos sa paglaglag kanila. Ngano? Tungod kay molihok dayon si Jehova sa pagluwas sa iyang mga alagad.—Ezeq. 38:9, 18.
19. Nganong makasalig kita nga ang langitnong mga puwersa sa Diyos maglaglag sa sistema ni Satanas?
19 Sa dihang siya molihok na batok sa mga nasod, ‘sila makaila gayod nga siya mao si Jehova.’ (Ezeq. 36:23) Iyang ipadala ang iyang panon sa mga manulonda ilawom sa pagpanguna ni Kristo Jesus aron sa paglaglag sa nahibiling sistema ni Satanas dinhi sa yuta. (Pin. 19:11-19) Atong mahinumdoman ang usa ka panghitabo diin ang usa lang ka manulonda “mipatay sa usa ka gatos ug kawaloag-lima ka libo” nga mga kaaway sa Diyos sulod lamang sa usa ka gabii. Busa, makasalig gayod kita nga sa Armagedon wagtangon sa langitnong mga puwersa ang tanang lama sa sistema ni Satanas sa yuta. (2 Hari 19:35; Pin. 16:14, 16) Si Satanas ug ang iyang mga demonyo itambog sa kahiladman sulod sa usa ka libo ka tuig, ug human niana, sila pagalaglagon.—Pin. 20:1-3.
20. Unsay mapalampos ni Jehova pinaagi sa Gingharian?
20 Ang pagkadaotan mawala na, ug ang mga matarong magpuyo sa yuta sa walay kataposan. Pamatuod unya kini nga si Jehova usa ka Dakong Manluluwas. (Sal. 145:20) Pinaagi sa Gingharian siya magbayaw sa iyang pagkasoberano, magbalaan sa iyang ngalan, ug magtuman sa iyang dakong katuyoan alang sa yuta. Hinaot nga masinati nimo ang dakong kalipay samtang imong imantala kining maayong balita ug tabangan kadtong mga “hustong nakiling alang sa kinabuhing walay kataposan” aron ilang masabtan nga ang kaluwasan pinaagi sa Gingharian sa Diyos haduol na!—Buh. 13:48.
Nahinumdom Ka Ba?
• Sa unsang paagi gipasiugda ni Jesus ang kahinungdanon sa Gingharian?
• Nganong ilabinang gikinahanglan ang kaluwasan karon?
• Unsang mga panghitabo ang atong gidahom panahon sa dakong kasakitan?
• Sa unsang paagi pamatud-an ni Jehova nga siya ang Dakong Manluluwas?
[Mga hulagway sa panid 12, 13]
Ang Pulong sa Diyos nagtagna sa kinadak-ang pagsangyaw nga buluhaton sa atong adlaw
[Hulagway sa panid 15]
Sama nga si Jehova nagluwas kang Noe ug sa iyang pamilya, Siya usab makaluwas kanato
[Hulagway sa panid 16]
‘Pahiran ni Jehova ang tanang luha . . . , ug ang kamatayon mawala na.’—Pin. 21:4