‘Ayaw Pagkatarog sa Madali sa Inyong Pangatarongan’
“Magahangyo kami kaninyo sa dili pagkatarog sa madali sa inyong pangatarongan ni makulbaan pinaagi sa dinasig nga pahayag o pinaagi sa binaba o sa sulat nga daw gikan kanamo.”—2 TESALONICA 2:1, 2.
MAKALIPAYNG handurawan ang motungha sa hunahuna kon kita ingong mga Kristohanon, magpalandong sa panahon sa atong unang pagkakat-on sa kamatuoran gikan sa Pulong sa Diyos. Kadto maoy matahom, makataronganon, matagbawon. Unsa ka dako sa pagbukad sa atong kasingkasing tungod sa pagpabili sa atong natun-an bahin kang Jehova ug sa iyang halandong mga hiyas, lakip sa iyang dakong gugma ug sa iyang kaluoy! Nalipay kita sa nakauban nato ang mga isigkamagtutuo nga nagpakitag tinuod Kristohanong gugma ug nagkinabuhi sa mga prinsipyo sa Bibliya.
2. Unsang palaabuton ang atong nabatonan ingong mga alagad ni Jehova, ug unsang espirituwal nga kahimtang nga atong napalgan ang atong kaugalingon?
2 Pagkadako sa atong pasalamat sa atong nakat-onan nga wagtangon sa dili madugay ni Jehova ang kasakit, kaguol, ug bisan ang kamatayon. (Pinadayag 21:3, 4) Handurawa, ang pagkinabuhi sa walay kataposan sa paraisong yuta, uban sa hingpit nga panglawas ug bug-os nga kalipay! Daw sobra ra kaayo kini nga katuohan. Apan tinuod kadto. Gipaluyohan kadto sa Pulong sa Diyos. Unsa ka kulba-hinam! Sa walay duhaduha, mibati kita sama sa mga disipulo ni Jesus sa mipakita siya ngadto kanila human sa iyang pagkabanhaw. Sila nagkanayon sa usag usa: “Dili ba ang atong mga kasingkasing nagdilaab man sulod kanato samtang nagsulti siya kanato diha sa dalan, samtang nagsaysay siya kanato sa Kasulatan?” (Lucas 24:32) Oo, sa pagkakat-on sa kamatuoran ug sa pagpahinungod sa atong kinabuhi kang Jehova, atong nakita ang atong kaugalingon diha sa espirituwal nga paraiso. Pagkadakong panalangin!
3. Sa unsang paagi ang Yawa ug ang ubang mga magsusupak nangitag paagi sa paghikaw kanato sa mga kaayohan sa espirituwal nga paraiso ni Jehova?
3 Apan ang pagkaanaa sa espirituwal nga paraiso dili usa ka butang nga atong ibale-wala. Nakadangat kita niining maong paraiso sa kinabubut-on; makahimo kita sa paggula (o ipagula) kon mawad-an kitag pagtuo o sa kinabubut-on magalapas sa matarong nga kabalaoran ni Jehova. Siyempre, dili kini mahitabo kon atong ipadayong malig-on ang ‘gugma nga atong nabatonan sa sinugdan,’ kon magpadayon kita sa pagpabili sa tanang mga tagana ni Jehova sa pagtipig kanatong malig-on sa espirituwal. (Pinadayag 2:4) Apan ang Yawa ug ang ubang mga kaaway sa matuod nga pagsimba batid sa panglimbong. Kinahanglang dili nato kalimtan nga sila andam kanunay sa pagbungkag sa atong integridad kon makaarang sila. Ang ilang propaganda gituyo sa pagpaluya sa atong pagtuo, sa pagpabugnaw sa atong gugma sa Diyos, sa pagpugas ug mga pagduhaduha diha sa atong mga hunahuna—oo, sa paghimo sa espirituwal nga paraiso nga daw dili paraiso.
4. Unsay moresulta kon atong tugotang paluyahon ang atong pagtuo ug pasagdang molambo ang seryosong mga pagduhaduha?
4 Sumala sa gipamulong sa panultihon, mahimong makadangat kita sa punto diin malisdan kita, o kaha imposible gani, sa pagkakita sa lasang sa espirituwal nga paraiso tungod sa pagtutok sa dili-hingpit tawhanong mga kahoy karon nga anaa niana. Ang kaikag nga atong nabatonan sa pagkakat-on sa kamatuoran sa Pulong sa Diyos, sa dakong paglaom nga nakadangat kita sa pagbaton, sa gugma nga atong napalambo alang sa Diyos ug sa atong espirituwal nga mga igsoon, sa kasibot nga atong nabatonan sa pag-alagad ni Jehova, mahimong mapalong. Kon walay dinaliang mga lakang nga buhaton sa pag-usab sa bisan unsang espirituwal nga pagkadaot, sa dili madugay ang mahigugmaong tagana ni Jehova mahimong mapiuton. Ang maayong espirituwal nga pagkaon gikan sa “matinumanon ug maalamong ulipon” daw mahimong talamayon, ug ang panag-igsoonay sa mahigugmaong mga alagad ni Jehova daw mahimong panimalay sa mga kaaway. Dayon ang bugtong katagbawan, nga daotan, moabot sa pagsugod sa pagpamospos sa masigkaulipon pinaagi sa pagdaot kanila ug sa pagsulti sa mga butang nga dili bug-os kamatuoran.—Mateo 24:45-51.
5. Sa unsang paagi ang pagkawala sa usa mahimong ikatandi sa giwala ni Adan ug Eva nga miresulta sa ilang pagpalagpot gikan sa Paraiso sa Eden?
5 Oo, dili lamang mawala ang atong mga panalangin sa espirituwal nga paraiso karon kondili, sa mas seryoso, makawala usab sa paglaom sa pagkinabuhi sa walay kataposan sa yutan-ong Paraiso. Ug mahimong mawala usab kita sa samang katarongan nga nawala ni Adan ug Eva ang Paraiso sa Eden. Ilang nabatonan ang tanang butang nga ilang gikinahanglan aron mabug-os ang kalipay ug mahimong mabuhi sa walay kataposan. Apan ang pagkinaugalingon—nga sa pagkatinuod maoy usa ka lahi nga pagtulon-an—mas importante kanila kay sa pagsunod kang Jehova ug sa mga panalangin sa Eden. Nalimbongan si Eva. Samtang wala malimbongi si Adan, iyang gitugotan ang puwersa sa mga sirkumstansiya, lakip sa dakong impluwensiya sa iyang asawa, sa pagpakasala usab. Busa, gipagawas sila sa Paraiso, sa pagkinabuhi ug miserableng kinabuhi hangtod sa ilang kamatayon. Ilang nawala ang palaabutong kinabuhing walay kataposan alang sa ilang kaugalingon ug nakahatag ug panulondon sa sala ug kamatayon sa ilang mga anak. (Genesis 3:1-7, 14:19, 24; 1 Timoteo 2:14; Roma 5:12) Pagkadakong bili ang gibayad alang sa ilang gitawag nga pagkinaugalingon!
6. (a) Unsang kabalaka ang gipahayag ni Pablo mahitungod sa pila sa kongregasyon sa Corinto? (b) Sa unsang paagi kining samang kabalaka gipakita sumala sa gisulat didto sa kongregasyon sa Tesalonica?
6 Si apostol Pablo mipahayag niini nga kabalaka: “Nahadlok ako nga maingon nga si Eva hinglimbongan sa bitin pinaagi sa lipatlipat niini, sa ingon ang inyong mga panghunahuna basin madaot gikan sa pagkamaminatud-on ug pagkaputli nga takos kang Kristo.” (2 Corinto 11:3) Nakita ni Pablo ang panginahanglan sa pagsulat bahin sa pila ka sayop nga mga pagtulon-an nga mikaylap sa iyang adlaw. Sa iyang ikaduhang sulat sa kongregasyon sa Tesalonica, siya misulat: “Magahangyo kami kaninyo sa dili pagkatarog sa madali sa inyong pangatarongan ni makulbaan bisan pinaagi sa dinasig nga pahayag o sa binaba nga balita o sa sulat nga daw gikan kanamo, nga magaingon nga ang adlaw ni Jehova ania na. Ayaw kamo palimbong sa bisan unsang paagi.”—2 Tesalonica 2:1-3.
Ayaw Pakig-atubang sa mga Apostata
7. (a) Unsang mga pangutana ang mobangon kon makadawat ug basahon gikan sa apostata diha sa buson? (b) Kon bahin sa pagpanalipod sa kaugalingon gikan sa impluwensiya sa mga apostata, nganong peligroso ang sobrang pagsalig sa kaugalingon?
7 Karon, unsay imong buhaton kon makaatubang kamog apostatang pagtulon-an—malalangong mga pangatarongan—nga mag-ingon nga ang imong gituohan ingong usa sa mga Saksi ni Jehova dili mao ang kamatuoran? Pananglitan, unsay imong buhaton kon makadawat kamog sulat o mga basahon, ug buksan kana, ug makakita nga gikan kini sa usa ka apostata? Maaghat ka ba sa pagbasa niana tungod sa imong pagkamaukiton-ukiton, aron lamang masuta kon unsay iyang gipamulong? Tingali mangatarongan ka: ‘Dili ako madala niini; malig-on kaayo ako sa kamatuoran. Ug, gawas pa, kon ania nato ang kamatuoran, wala kitay kabalak-an. Ang kamatuoran makabarog sa pagsulay.’ Sa paghunahuna niining paagiha, gipakaon sa uban ang ilang mga hunahuna ug apostatang pangatarongan ug mahimong biktima sa seryosong pagduhaduha ug katahap. (Itandi sa Santiago 1:5-8.) Busa hinumdomi ang pasidaan sa 1 Corinto 10:12: “Siya nga nagdahom nga maayo na niyang pagkabarog magbantay basig mapukan siya.”
8. Unsang tabang ang gikinahanglan sa pila nga nadaog sa mga pagduhaduha?
8 Pinaagi sa mahigugmaong tabang gikan sa matinagdanong mga igsoon, ang uban nga gipugasan ug pagduhaduha sa mga apostata naulian human sa usa ka yugto sa espirituwal nga kagubot ug kalibog. Apan malikayan unta kining maong kasakit. Diha sa Proverbio 11:9 kita gisultihan: “Pinaagi sa iyang baba ang apostata makalaglag sa iyang isigkatawo, apan pinaagi sa kahibalo maluwas ang matarong.” Gisultihan ni Santiago ang isigka-Kristohanon sa “pagpadayon sa pagpakitag kaluoy sa uban nga may mga pagduhaduha; luwasa sila pinaagi sa pagsakmit kanila gikan sa kalayo.” (Judas 22, 23) Gitambagan ni Pablo ang magtatan-awng si Timoteo sa pagpanudlo “uban sa kalumo sa mga masinupakon; kay tingali itugot sa Diyos nga sila maghinulsol nga moagak sa tukmang kahibalo sa kamatuoran, ug mahibalik sa ilang hustong pangisip ug makaikyas gikan sa lit-ag sa Yawa, sa pagkakita nga sila nadakpang buhi kaniya sumala sa iyang kabubut-on.”—2 Timoteo 2:25, 26.
9. Unsa ang makasubong resulta niadtong mibulag sa tinuod nga pagsimba?
9 Makasubo, ang uban midangat sa bug-os nga kangitngitan, mibalik gani sa sayop nga mga pagtulon-an sa Kakristiyanohan. Si apostol Pedro misulat bahin sa makasubong resulta sa uban sa unang paglakaw sa kamatuoran apan sa ulahi mibulag. Siya miingon: “Kay kon tapos sila makaikyas gikan sa kahugawan sa kalibotan pinaagi sa ilang tukmang kahibalo sa atong Ginoo ug Manluluwas nga si Jesu-Kristo, ug malangkit sila pag-usab niining mga butanga ug madaog, ang ulahing kahimtang nila labi pa unyang mangil-ad kay sa nahauna.” Si Pedro miingon nga sama sila sa iro nga gibalikan ang iyang suka ug sa naligoang baboy sa pagbalik sa paglunang sa yanang.—2 Pedro 2:20, 22.
10. (a) Unsay gipamulong ni Jehova bahin sa pagpamati sa mga apostata? (b) Ang pagbasag apostatang basahon sama ra nga nagbuhat ug unsa?
10 Kon sultihan kita sa isigkatawo, ‘Ayawg basaha kini’ o, ‘Ayawg pamatia kana,’ tingali madala kita sa dili pagtagad sa iyang tambag. Apan hinumdomi, niining bahina si Jehova mao ang Usa nga nagsulti kanato diha sa iyang Pulong kon unsay buhaton. Ug unsay iyang gipamulong bahin sa mga apostata? “Likayi sila” (Roma 16:17, 18); “ayaw na pakig-uban” kanila (1 Corinto 5:11); ug “ayaw gayod [sila] pasak-a sa inyong balay o ayaw gayod ninyo [sila] pangomostoha” (2 Juan 9, 10). Maugdang nga mga pulong kini, tin-awng mga sugo. Kon, tungod sa pagkamaukit-ukiton, mobasa man kita sa basahon sa usa ka nailhang apostata, dili ba sama ra kana sa pagdapit sa kaaway sa tinuod nga pagsimba ngadto sa atong balay sa palingkod uban kanato ug sa pagsaysay sa iyang apostatang mga ideya?
11, 12. (a) Unsang ilustrasyon ang gihatag aron matabangan kita sa pagsabot nga dili kita makabasag basahon sa apostata nga dili maapektohan? (b) Sa unsang paagi aplikado kini sa kabalaka ni Jehova sa iyang katawhan?
11 Atong iilustrar kining mga butanga niining paagiha: Ingnon ta nga ang imong tin-edyer nga anak nga lalaki nakadawat ug pornograpikong materyal diha sa buson. Unsay imong buhaton? Kon mokiling siya sa pagbasa niana tungod sa pagkamaukit-ukiton, moingon ka bang: ‘Oo, anak, sige padayon sa pagbasa niana. Dili kana makadaot kanimo. Kay sukad pa sa pagkabata gitudloan ka na namo nga daotan ang imoralidad. Gawas pa, angay usab nga masayod ikaw kon unsay nagakahitabo niining kalibotana aron imong makita kon unsa gayod ang daotan’? Mangatarongan ka bag ingon niana? Dili gayod! Hinunoa, imo gayod nga ipatin-aw ang mga kapeligrohan sa pagbasa ug pornograpikong basahon ug mosugo nga sunogon kana. Ngano? Tungod kay bisan unsa pa ka lig-on ang tawo sa kamatuoran, kon iyang pakan-on ang iyang hunahuna sa mahilayng mga ideya nga makita niining mga matanga sa basahon, ang iyang hunahuna ug kasingkasing maakeptohan. Ang daotang pangibog nga matisok sa kailaloman sa kasingkasing sa ulahi moresultag mahilay seksuwal nga pangibog. Ang resulta? Si Santiago miingon nga kon mogulang ang daotang pangibog, kini makapanganak ug sala, ug ang sala motultol sa kamatayon. (Santiago 1:15) Busa nganong sugdan ang sunodsunod nga reaksiyon?
12 Buweno, kon molihok dayon kita sa pagpanalipod sa atong mga anak batok sa pagkaladlad sa pornograpiya, dili ba malaoman usab nato nga ang atong mahigugmaon langitnong Amahan sa ingon mopasidaan usab kanato ug mopanalipod kanato gikan sa espirituwal nga pakighilawas, lakip sa apostasiya? Siya miingon, Pahilayo gikan niana!
13. Unsay buhaton kon may mobangong mahagitong mga pangutana, binase sa gipahayag o gisulat sa mga apostata, sa makigbahin kita sa buluhatong pagsangyaw?
13 Apan komusta kon sa magsangyaw kita sa maayong balita ug magpabangon ug mga pangutana ang mga tawo o mga pagsupak nga kaamgid niadtong gibangon sa mga magsusupak? Siyempre, kon dili sinsero ang tawo ug buot lamang makigdebate, labing maayong manamilit na lang kita ug mopadayon sa sunod pultahan. Apan kon dunay usa nga sinserong mangutana bahin sa pila ka pangangkon sa mga apostata, unsay buhaton? Una, kita makapangutana, sa tukma, kon unsay hinungdan sa kabalaka. Tingali sa usa o duha lamang kini ka punto. Dayon magpabilin kita niini ug tubagon gikan sa Kasulatan, sa mga publikasyon sa Sosyedad, ug sa atong tinuod nga nahibaloan bahin sa maong ulohan. Dili kinahanglang basahon pa nato ang libro o pulyeto nga puno sa pagbutangbutang ug dili bug-os kamatuoran aron makatubag sa bakak nga mga pangangkon ug mga pagtulon-an sa mga magsusupak.
Salig Kang Jehova
14. Unsang mahigugmaong tagana ang gihatag sa atong langitnong Amahan alang kanato, ug nganong bug-os kitang makasalig kaniya?
14 Samtang magpadayon kita, sa pagpalig-on sa pagtuo ug sa pagkahimong okupado sa pag-alagad sa Gingharian, kita bug-os nga makasalig kang Jehova, sa pagkasayod nga, ingong atong mahigugmaon langitnong Amahan, nagtinguha siya sa labing maayo alang kanato. Ang Diyos nagtudlo kanato; siya nagpasidaan kanato. Iyang gihimo kini pinaagi sa iyang Pulong ug pinaagi sa klarong giya nga gitagana sa iyang makitang organisasyon. Kon mangayo kita sa usa ka mahigugmaong ginikanan ug tinapay ug isda, dili gayod siya mohatag kanatog bato o bitin. Ni binuangan o limbongan kita sa Diyos. (Mateo 7:7-11) Apan, dili kita bug-os mapanalipdan sa Diyos gikan sa mga tentasyon o sa malalangong kabakakan ug yawan-ong propaganda. Siya nag-ingon sa iyang kaugalingon: “Ako, si Jehova, nga imong Diyos, ang Usa nga nagatudlo kanimo sa makaayo kanimo, ang Usa nga nagapalakaw kanimo sa dalan diin ikaw angay moagi.” (Isaias 48:17) Oo, si Jehova ‘nagatudlo kanato sa makaayo kanato.’ Siya nagsugo kanato sa pagpalayo gikan sa mga apostata ug sa ilang pagtulon-an, ug kini maoy alang sa atong kaugalingong panalipod. Kini nagkahulogan sa atong kinabuhi.
15. Unsang mga pasidaan ang gihatag ni apostol Pablo bahin sa pila nga naningkamot sa pagpangabig mga disipulo?
15 Gipasidan-an ni apostol Pablo ang isigkamagtatan-awng Kristohanon: “Gikan sa inyong taliwala may manindog nga mga tawo nga magasultig mga binalit-ad aron sa pagpangabig ug mga tinun-an ngadto kanila.” (Buhat 20:30) Kon magpadayon kita sa pagpamati sa malalangong mga argumento ug daw maayong pangatarongan, ang “binalit-ad nga mga butang” mahimong matarong nga pamation. Sa sigeg tan-aw ni Eva sa gidiling bunga sa kahoy ug sa namati sa binalit-ad nga pangatarongan sa Yawa, labi pa siyang nadani nga husto ang Yawa. Si Pablo mipasidaan: “Pagbantay: kay tingali adunay magabihag kaninyo ingong iyang biktima pinaagi sa pilosopiya ug malimbongong pagpatuotuo sumala sa tradisyon sa tawo, sumala sa pasiunang mga butang sa kalibotan ug dili sumala ni Kristo.” (Colosas 2:8) Gipakita usab sa apostol nga “pinaagi sa matam-is nga mga pulong ug sa mga pag-ulog-ulog [mga apostata] ilang madani ang mga kasingkasing sa mga inosente.” (Roma 16:17, 18; itandi sa 2 Corinto 11:13-15.) Siyempre, ang kamatuoran nga daghan ang nakabig nianang matanga sa propaganda wala magpasabot nga sundon nato sila. Bisan pa, kinahanglang padayon kitang magmaigmat.
16. Ang pagpadapat sa unsang espirituwal nga mga pasidaan ang makatabang kanato sa pagsukol sa paningkamot ni Satanas sa paglimbong ug sa pag-agak sa katawhan palayo sa tinuod nga pagsimba?
16 Ang mga paagi sa Yawa wala mausab sukad pa sa Eden. Iyang gamiton ang malalangong pagduhaduha ug mangdani sa interes sa kaugalingon. Si Pedro misulat: “Adunay mini nga mga propeta usab sa taliwala kaninyo. Kini sila sa tago magpasulod ug malaglagong mga sekta . . . Gani, tungod sa kadalo kamo ilang pahimuslan pinaagi sa tinumotumong mga pulong.” (2 Pedro 2:1-3) Ang usa ka butang nga tinumotumo gidesinyong tinuod tan-awon o pamation. Diha sa 2 Timoteo 2:14-19, gipasiugda ni Pablo ang bili sa paggamit sa Pulong ni Jehova sa pagtul-id sa mga butang apan nagpasidaan sa panginahanglan sa paglikay sa mga apostata, diin ang ilang ‘walay pulos nga mga pulong nagalapas sa kon unsa ang balaan,’ kay, matud pa niya, ang “ilang pulong mokatay ingon sa kangrena.”
17, 18. (a) Sa unsang paagi samag kangrena ang apostatang pagtulon-an? (b) Unsang pasidaan ang gihatag ni apostol Pedro bahin niadtong mosulay sa pagpabulag kanato gikan sa tinuod nga pagsimba? (c) Unsang mga pangutana ang tubagon sa sunod nga pagtuon?
17 Pagkatukma nga kaamgiran! Sama sa kangrena, walay lain ang mahatag sa apostatang pangatarongan kondili ang daling mokatay nga espirituwal nga kamatayon. Ug sanglit ang mga sakop sa kongregasyon kaamgid man sa usa ka lawas, mameligro ang uban nga matakdan. Kon ang usa nga nagpakaylap sa apostatang mga pagtulon-an dili mapasig-uli sa espirituwal nga panglawas pinaagi sa mahigugmaon apan malig-ong pagpadapat sa balsamo sa Pulong sa Diyos, ang pagputol niining sakopa (pagpalagpot) mao lamang ang kapilian aron mapanalipdan ang ubang mga sakop sa lawas. (Itandi sa Tito 1:10, 11.) Ayaw pagpatakod sa makamatayng kangrena sa espirituwal nga matang! Pagbaton ug mahimsog espirituwal nga panglawas pinaagi sa paglikay nga matakdan sa apostatang panghunahuna. Sunda ang maayong tambag sa 2 Pedro 3:17, 18: “Busa, kamo mga hinigugma, sa nasayod na kamong daan niini, magbantay kamo nga basi unyag madala kamo kanila sa kasaypanan sa tawong masupilon ug mangahulog kamo tungod sa inyong pagkawalay kalig-on. Dili, apan magatubo hinoon kamo sa dili-takos nga kalulot ug kahibalo sa atong Ginoo ug Manluluwas nga si Jesu-Kristo.”
18 Apan sa unsang paagi atong mapanalipdan ang atong kaugalingon batok sa apostasiya? Sa unsang paagi atong matipigan ang atong mga kasingkasing nga makasukol sa apostatang pangatarongan? Kining mga pangutanaha tagdon sa sunod artikulo.
Makahinumdom Ka Ba?
◻ Sa unsang paagi mawala kanato ang mga kaayohan sa espirituwal nga paraiso ni Jehova?
◻ Nganong ang pagbasag apostatang mga publikasyon kaamgid sa pagbasag pornograpikong basahon?
◻ Unsay buhaton kon pangutan-on kita bahin sa pila ka pangangkon sa mga apostata?
◻ Nganong sama sa kangrena ang mga pagtulon-an sa apostata?
1. Unsang makalipayng handumanan ang motungha sa hunahuna kon magpalandong kita sa panahon sa una pa natong pagkakat-on sa kamatuoran?
[Hulagway sa panid 12]
Sa maalamon sunogon ba nimo ang apostatang basahon?