Magmasinugtanon Niadtong Nagapanguna
“Magmasinugtanon niadtong nagapanguna taliwala kaninyo ug magpasakop kamo kanila, kay sila nagatukaw alang sa inyong mga kalag kay sila maghatag man unya ug husay.”—HEBREOHANON 13:17.
1. Sa unsang paagi makabaton kitag kaayohan gikan sa buluhaton sa Kristohanong mga magtatan-aw?
SI Jehova nagtaganag mga magtatan-aw alang sa iyang organisasyon niining “panahon sa kataposan.” (Daniel 12:4) Sila nagapanguna sa pag-atiman sa mga karnerohon, ug ang ilang pagdumala makahatag kapahulayan. (Isaias 32:1, 2) Dugang pa, ang mahigugmaong pagdumala sa mga ansiano kinsa nagatagad sa panon sa Diyos uban sa kalumo nagaalagad ingong panalipod gikan kang Satanas ug niining daotang sistema sa mga butang.—Buhat 20:28-30; 1 Pedro 5:8; 1 Juan 5:19.
2. Sa unsang paagi gilantaw sa pipila si apostol Pablo, apan unsang paglantaw ngadto sa mga ansiano ang angay?
2 Apan unsay imong paglantaw sa mga ansiano? Diha sa imong kasingkasing, moingon ka ba: ‘Dili ako moduol ug laing ansiano niining kongregasyona kon duna akoy problema, kay wala akoy pagsalig kang bisan kinsa kanila’? Kon mao kanay imong pagbati, imo bang gipadako ang ilang mga dili-kahingpitan? Diha sa karaang Corinto, ang uban miingon bahin kang apostol Pablo: “Ang iyang mga sulat maugdang ug gamhanan, apan mahuyang ang iyang pagkatawo ug dili maayong mosulti.” Bisan pa, gitudlo sa Diyos si Pablo sa ministeryo ug gigamit siya ingong “apostol sa mga nasod.” (2 Corinto 10:10; Roma 11:13; 1 Timoteo 1:12) Gilaoman, hinunoa, nga mobati ikaw ug sama sa usa ka sister kinsa miingon: “Kita nakabaton sa labing maayong lawas sa mga ansiano sa kalibotan. Sila ania ra gayod dinhi sa pagtabang kon gikinahanglan.”
Nganong Magmasinugtanon Kanila?
3. Aron ang Ginoo magauban sa espiritu nga atong ipakita, sa unsang paagi atong lantawon ang mga luyoluyong magbalantay nga Kristohanon?
3 Sanglit ang mga luyoluyong magbalantay nga Kristohanon gitagana sa Dakong Magbalantay, si Jehova nga Diyos, unsay imong hunahuna nga maoy iyang gusto nga atong pagalantawon sila? Siyempre, ang Diyos naglaom nga kita mosunod sa binase sa Bibliya nga pagtultol nga nadawat pinaagi sa mahigugmaong mga magtatan-aw ilalom sa pagdumala sa Nagamandong Lawas sa mga Saksi ni Jehova. Unya ‘ang Ginoo magauban sa espiritu nga atong ipakita,’ ug atong matagamtam ang kalinaw, ug kita mapalig-on sa espirituwal.—2 Timoteo 4:22; itandi ang Buhat 9:31; 15:23-32.
4. Sa unsang paagi atong ipadapat sa kaugalingon ang Hebreohanon 13:7?
4 Si Pablo miawhag: “Hinumdomi ang nagapanguna kaninyo, sila nga nanagsulti kaninyo sa pulong sa Diyos, ug samtang inyong palandongon ang gisangpotan sa ilang paggawi sunda ang ilang pagtuo.” (Hebreohanon 13:7) Taliwala sa unang mga Kristohanon, ang mga apostoles mao gayod ang nagapanguna. Karong adlawa, atong makita kadtong naglangkob sa Nagamandong Lawas sa mga Saksi ni Jehova, ang ubang dinihogang mga magtatan-aw, ug ang mga lalaki sa “dakong panon” nga maoy nagapanguna sa atong taliwala. (Pinadayag 7:9) Bisan pa nga kita wala awhaga sa pagsunod sa kalidad sa ilang tingog, postura, o ubang tawhanong mga kinaiya, kita makahimo sa atong paggawi nga maayo pinaagi sa pagsundog sa ilang pagtuo.
5. Dinhi sa yuta karong adlawa, ngadto kang kinsa nga ang pangunang responsabilidad sa pag-atiman sa Kristohanong kongregasyon gipiyal, ug takos sila sa unsa?
5 Dinhi sa yuta karong adlawa, ang pangunang responsabilidad sa pag-atiman sa atong espirituwal nga mga panginahanglan gisalig sa “matinumanon ug maalamong ulipon.” Ang hawas nga Nagamandong Lawas niini nagapanguna ug nakigkoordinar sa tibuok-kalibotang buluhaton sa pagsangyaw sa Gingharian. (Mateo 24:14, 45-47) Ilabinang lantawon kining dinihogan-sa-espiritu nga mga ansiano ingong espirituwal nga mga gobernador, kay ang Hebreohanon 13:7 mahimong hubaron: “Magmahunahunaon kamo niadtong nagamando . . . kaninyo.” (Kingdom Interlinear) Duyog sa kapin sa 60,000 ka kongregasyon ug kapin sa 3,500,000 ka magmamantala sa Gingharian, ang 12 ka ansiano nga nagaporma sa Nagamandong Lawas adunay ‘daghang buluhaton sa Ginoo.’ (1 Corinto 15:58) Tungod sa ilang hinatag sa Diyos nga buluhaton, sila takos sa atong bug-os nga kooperasyon, sama nga ang unang-siglong nagamandong lawas nakadawat sa kooperasyon sa unang mga Kristohanon.—Buhat 15:1, 2.
6. Unsa ang pipila ka butang nga gihimo sa mga ansiano alang sa kaayohan sa katawhan ni Jehova?
6 Ang mga magtatan-aw gitudlo-sa-espiritu sa pag-atiman sa espirituwal nga mga panginahanglan sa kongregasyon. (Buhat 20:28) Ilang gitino nga ang mensahe sa Gingharian mawali sa teritoryo sa lokal nga kongregasyon. Kining kuwalipikado sa Kasulatanhon nga mga lalaki nagatagana usab ug espirituwal nga paggiya sa mahigugmaong paagi. Sila nagapanambag, nagalipay, ug nagapamatuod sa ilang espirituwal nga mga brader ug sister, sa katuyoan nga sila makapadayon sa paglakaw nga takos sa Diyos. (1 Tesalonica 2:7, 8, 11, 12) Bisan kon adunay mahiligas sa kalapasan nga wala siya makamatikod niana, kining mga lalakiha maningkamot sa pagpahiuli kaniya “uban sa espiritu sa kalumo.”—Galacia 6:1.
7. Unsang tambag ang gihatag ni Pablo sa Hebreohanon 13:17?
7 Ang atong mga kasingkasing mapukaw sa pagtabang sa mahigugmaong mga magtatan-aw. Angay kini, kay si Pablo misulat: “Magmasinugtanon niadtong nagapanguna taliwala kaninyo ug magpasakop kamo kanila, kay sila nagatukaw alang sa inyong mga kalag kay sila maghatag man unya ug husay; aron kini ilang pagabuhaton uban sa kalipay ug dili uban sa kasubo, kay kini makadaot kaninyo.” (Hebreohanon 13:17) Sa unsang paagi atong sabton kining tambaga?
8, 9. (a) Sumala sa Hebreohanon 13:17, nganong magmasinugtanon kita niadtong nagapanguna? (b) Ang atong pagkamasinugtanon ug pagkamasinakopon dunay unsang maayong mga epekto?
8 Giawhag kita ni Pablo sa pagsunod niadtong nagamando kanato sa espirituwal. Kita gisugo nga “magpasakop,” sa pagsugot niining mga luyoluyong magbalantay. Ngano? Tungod kay ‘sila nagatukaw sa atong mga kalag,’ o sa mga kinabuhi nga gipahinungod sa Diyos. Ug sa unsang paagi sila “nagatukaw”? Dinhi ang presente aktibo indikatibo sa Gregong berbong a·gru·pneʹo sa literal nagkahulogan nga ang mga ansiano “nagpugong sa pagkatulog.” Kini makapahinumdom kanato sa nag-inusarang magbalantay kinsa nagdumili sa pagkatulog aron sa pagpanalipod sa iyang panon gikan sa mga kapeligrohan sa kagabhion. Ang mga ansiano usahay walay katulog magabii diha sa mainampoong kabalaka sa panon sa Diyos o sa paghatag espirituwal nga tabang sa isigkamagtutuo. Pagkadako sa atong apresasyon alang sa ilang matinumanong pag-alagad! Sa pagkamatuod, dili kita gustong mahisama sa “mga tawong dili-diyosnon” sa mga adlaw ni Judas kinsa ‘nanagsalikway sa awtoridad ug nagapasipala sa mga halangdon,’ ang dinihogang Kristohanong mga ansiano nga dunay hinatag sa Diyos nga himaya, o dungog, nga gitugyan diha kanila.—Judas 3, 4, 8.
9 Si Jehova dili-malipay kon kita mapakyas sa pagsunod ug sa pagpasakop sa Kristohanong mga magtatan-aw. Kini maoy palas-anon alang kanila ug makadaot kanato sa espirituwal. Kon kita dili motabang, atimanon sa mga ansiano ang ilang mga katungdanan nga masub-anon, tingali diha sa espiritu sa kaluya nga mahimong mosangpot sa pagkawala sa kalipay diha sa atong Kristohanong mga kalihokan. Apan ang atong pagkamasinugtanon ug pagkamasinakopon mopalambo sa diyosnong paggawi ug makalig-on sa atong pagtuo. ‘Ang Ginoo magauban sa espiritu nga atong ipakita,’ ug ang kalipay molambo diha sa usa ka klima sa kooperasyon, kalinaw, ug panaghiusa.—2 Timoteo 4:22; Salmo 133:1.
10. Sumala sa 1 Timoteo 5:17, nganong kadtong nagadumala sa maayong paagi takos tahuron?
10 Ang atong pagkamasinugtanon ug pagkamasinakopon sa mga ansiano sa kongregasyon wala magkahulogan nga kita mga mapahimut-anon ug mga tawo. Kana dili-kasulatanhon, kay ang unang-siglong Kristohanong mga ulipon gisugo sa pagsugot sa ilang mga agalon, “dili sa pag-alagad kon dunay magtan-aw, ingon sa magapahimuot sa mga tawo lamang, kondili uban sa tim-os nga kasingkasing, uban ang kahadlok kang Jehova.” (Colosas 3:22; Efeso 6:5, 6) Ang mga magtatan-aw nga ‘nagadumala sa maayong paagi ug nagapangabudlay sa pagwali ug sa pagpanudlo’ takos sa pagtahod ilabina tungod kay ang ilang pagpanudlo gibase man sa Pulong sa Diyos. Si Pablo misulat: “Pasagdi nga ang mga tigulang nga maayo sa ilang pagdumala kinahanglan pagaisipon nga takos sa dobli nga pagtahod, ilabina kadtong nagapangabudlay sa pagwali ug sa pagpanudlo. Kay ang kasulatan nagaingon man: ‘Dili mo pagbusalan ang baba sa baka sa magagiuk kini sa trigo’; ug: ‘Ang mamumuo takos sa pagdawat sa iyang suhol.’”—1 Timoteo 5:17, 18.
11. Sa unsang paagi ang “dobli nga pagtahod” modangat sa usa ka ansiano, apan unsa ang kinahanglang likayan?
11 Ang mga pulong ni Pablo nga mao pay pagkutlo nagpakita nga ang materyal nga tabang sa tukma mahimong ihatag niadtong nagaatiman sa espirituwal nga mga intereses sa uban. Apan, kini wala magpasabot nga ang mga ansiano magdawat ug suweldo, ug ang “dobli nga pagtahod” sa pagkamatuod dili usa ka butang nga pangayoon sa usa ka ansiano. Kini magagikan sa mga sakop sa kongregasyon sa kinabubut-on, apan dili gayod niya gamiton ang iyang tinudlong-buluhaton sa pagbaton ug gahom o materyal nga mga kabtangan. Kinahanglan dili siya mangita alang sa iyang kaugalingong kadungganan o makig-uban diha lamang sa mga sapian alang sa materyal nga bentaha ug mapasagdan ang uban. (Proverbio 25:27; 29:23; Judas 16) Hinunoa, ang usa ka magtatan-aw kinahanglan magbantay sa panon sa Diyos sa ‘kinabubut-on, dili alang sa gugma sa malimbongon nga ganansiya, kondili inubanan sa kadasig.’—1 Pedro 5:2.
12. Unsay ibutang diha sa hunahuna nga kita matabangan sa pagsunod niadtong nagapanguna sa atong taliwala?
12 Kita matabangan sa pagsugot ug sa pagtahod niadtong nagapanguna kon atong hinumdoman nga ang Diyos mismo ang nagatagana sa mga ansiano. (Efeso 4:7-13) Sanglit kining mga tawhana dinihogan man sa espiritu ug ang organisasyon sa Diyos dunay hinungdanong dapit sa mga kinabuhi sa mga Saksi ni Jehova, siyempre gusto natong ipasundayag ang atong pasalamat ug pagtahod alang sa teokratikanhon nga mga kahikayan. Dugang pa, kita makatabang sa mga bag-ohan sa pag-ugmad niining hunahunaa kon kita magpakitag maayong panig-ingnan sa pagsugot ug mapinasakopon niadtong nagapanguna sa atong taliwala.
Nganong Pabilhan ang Ilang Pag-alagad?
13. (a) Unsang nagkasumpaking mga hunahuna sa pagkapangulo ang naglungtad sa kalibotan ug sa organisasyon sa Diyos? (b) Kita dunay unsang maayong mga katarongan sa pagsalig sa mga lalaki nga nagapanguna sa atong taliwala? (c) Imbes padakoon ang mga dili-kahingpitan sa kugihang mga ansiano, unsay atong buhaton?
13 Diha sa kalibotan, adunay usa ka tendensiya sa pagsalikway sa pagpangulo. Sama sa gipamulong sa usa ka lekturero: “Ang pagtaas sa lebel sa edukasyon nakapauswag sa abilidad nga tungod niini ang mga sumusunod nangahimong hinawayon kaayo nga sila halos imposible nang dumalahon.” Apan ang espiritu sa pagkinaugalingon nga paghunahuna wala maglungtad sa organisasyon sa Diyos, ug kita dunay maayong mga katarongan sa pagsalig diha sa mga lalaki nga nagapanguna sa atong taliwala. Pananglitan, kadto lamang nakaabot sa mga kinahanglanon sa Kasulatan ang igatudlo ingong mga ansiano. (1 Timoteo 3:1-7) Sila gibansay nga mahimong maluluton, mahigugmaon, ug matinabangon, apan malig-on sa paglaban sa matarong nga mga sukdanan ni Jehova. Ang mga ansiano nagapabilin sa kamatuoran sa Kasulatan, ‘nangupot nga malig-on sa kasaligang pulong, aron sila makahimo sa pagpanambag sa mahimsog nga pagtulon-an.’ (Tito 1:5-9) Siyempre, dili nato padakoon ang ilang tawhanong mga dili-kahingpitan, kay kitang tanan dili man hingpit. (1 Hari 8:46; Roma 5:12) Imbes mobatig kaluya sa ilang mga limitasyon ug dili na lang kaayo magtagad sa ilang tambag, atong pabilhan ug dawaton ang binase-sa-Bibliya nga pagtultol sa mga ansiano ingon nga nagagikan sa Diyos.
14. Sumala sa 1 Timoteo 1:12, sa unsang paagi pagalantawon sa usa ka ansiano ang ministeryo nga gitudlo kaniya?
14 Si Pablo, nga usa ka tawong mapabilhon, miingon: “Ako mapasalamaton kang Kristo Jesus nga atong Ginoo, nga naghatag kanako sa kalig-on, tungod kay ako iya man nga giila nga kasaligan nga tungod niana ako iyang gitudlo sa ministeryo.” (1 Timoteo 1:12) Kana nga ministeryo, o pag-alagad, nag-apil sa buluhatong pagsangyaw ug sa pag-alagad sa kaubang mga magtutuo. Bisan pa nga dunay tinudlong-buluhaton ang usa ka magtatan-aw pinaagi sa balaang espiritu sa pag-alagad ingong magbalantay, kini dili angay mopabati kaniya nga labaw sa uban, kay siya mismo maoy bahin sa samag-karnerong panon sa Diyos. (1 Pedro 5:4) Hinunoa, siya angay magpasalamat nga ang Ulo sa kongregasyon, si Jesu-Kristo, nagaisip kaniya nga takos sa pag-alagad sa mga sakop sa panon ug nga ang Diyos maoy naghimo kaniyang takos pinaagi sa paghatag kaniya ug usa ka sukod sa kahibalo, kaalam, ug salabotan. (2 Corinto 3:5) Sanglit ang ansiano dunay katarongan nga magpasalamat sa hinatag-sa-Diyos nga mga pribilehiyo, angay pasalamatan sa ubang mga sakop sa kongregasyon kining ministeryoha, o pag-alagad.
15. Unsa ang kahulogan sa tambag ni Pablo sa 1 Tesalonica 5:12, 13?
15 Ang mga Saksi ni Jehova mapasalamaton sa organisasyon nga gitukod sa Diyos niining kataposang mga adlaw, ug kana nga apresasyon makapukaw kanato sa pagtahod sa mga ansiano. Kita malipay sa pagkooperar sa bug-os sa mga kahikayan nga ilang himoon alang sa atong kaayohan. Si Pablo miingon: “Karon kami nagahangyo kaninyo mga igsoon, nga inyong pasidunggan sila nga nagapangabudlay diha kaninyo ug nagapangulo kaninyo diha sa Ginoo ug nagatambag kaninyo; ug sa paghatag kanila ug labaw sa kasarangan nga konsiderasyon diha sa gugma tungod sa ilang buhat.” (1 Tesalonica 5:12, 13) Ang pagpadapat niini nga tambag mohatag kalipay ug panalangin ni Jehova.
Magmaabtik sa Pagpadapat sa Tambag
16, 17. Unsang tambag nga tingali ihatag sa mga ansiano mahitungod sa kaminyoon, ug unsay mosangpot sa pagsunod niana?
16 Gidasig ni Pablo si Tito sa ‘padayon sa pagmaymay ug sa pagpamadlong uban sa bug-os nga kagahom.’ (Tito 2:15) Sa susama, ang mga hawas sa Diyos karong adlawa nagtultol kanato sa mga prinsipyo ug sa mga balaod sa Bibliya. Dunay maayong mga katarongan sa pagdawat sa balikbalik nga pahamatngon sa pagpadapat sa tambag ug sa pagtultol sa organisasyon ni Jehova ug sa tinudlo nga mga ansiano.
17 Sa pag-ilustrar: Tingali giawhag sa mga ansiano ang usa ka Kristohanon sa pagsunod sa tambag sa Bibliya sa pagminyo “diha lamang sa Ginoo.” (1 Corinto 7:39; Deuteronomio 7:3, 4) Hayan ilang ipunting nga ang pakigminyo sa usa ka tawo nga walay-bawtismo motultol ug seryosong mga problema, sama sa dakong sala nga nahimo ni Haring Solomon pinaagi sa pagkuha ug langyaw nga mga asawa, kinsa nagbuyo sa iyang kasingkasing sa bakak nga mga diyosdiyos ug napalayo gikan kang Jehova. (1 Hari 11:1-6) Ang mga ansiano tingali mosaysay usab nga gisugo ni Esdras ang Hudiyohanong mga lalaki sa pagbulag sa ilang paganong mga asawa, ug si Nehemias miingon nga kadtong nakigminyo ug mga dili-magtutuo ‘nakahimog dakong kalapasan sa paglihok nga dili-matinumanon batok sa Diyos.’ (Nehemias 13:23-27; Esdras 10:10-14; tan-awa Ang Bantayanang Torre, Septiyembre 15, 1982, panid 31; Nobyembre 15, 1986, panid 26-30.) Ang mga panalangin ug ang katagbawan nga nakapahimuot kang Jehova mosangpot gikan sa pagpadapat niining tambag sa Kasulatan nga ihatag sa mahigugmaong mga ansiano.
18. Sumala sa gisulat ni Pablo sa 1 Corinto 5:9-13, unsa ang angay natong reaksiyon kon ang usa ka sakop sa pamilya mapalagpot?
18 Angay usab tahuron ang hudisyal nga mga desisyon sa mga ansiano. Gisultihan ni Pablo ang mga Kristohanon sa Corinto sa “hunong na sa pagpakig-uban kang bisan kinsa nga nagtawag mga igsoon kinsa makihilawason o dalo o tigsimbag mga diyosdiyos o tigpasipala o palahubog o tikasan, dili, bisan na lang sa pagpakigsalo kaniya sa pagpangaon.” Sila gisugo sa ‘pagpalagpot sa tawong daotan gikan sa ilang taliwala.’ (1 Corinto 5:9-13) Apan unsay imong buhaton kon ang imong mga paryenti mapalagpot? Samtang dunay panginahanglan alang sa limitado nga pakigkita aron maatiman ang mga butang may kalabotan sa pamilya, ang tanang espirituwal nga pag-ubanay uban sa napalagpot nga paryenti kinahanglang putlon. (Tan-awa ang Ang Bantayanang Torre, April 15, 1988, panid 26-31.) Sa pagkamatuod, ang pagkamaunongon sa Diyos ug sa iyang organisasyon mopukaw kanato sa pagtahod sa hudisyal nga mga desisyon sa mga magtatan-aw.
19. Unsay atong buhaton kon ang mga ansiano mopakita kanato nga kita nagalakaw sa sayop nga dalan sa espirituwal?
19 Dili masayon ang pagpabilin sa hiktin nga dalan padulong sa kinabuhi. Sa pagbuhat niini, kinahanglan atong sundon ang pagtultol nga gihatag sa Pulong sa Diyos ug pinaagi niadtong gisaligan sa mga responsabilidad sa pagkamagbalantay sa iyang organisasyon. (Mateo 7:13, 14) Kon kita mobiyahe gikan sa usa ka siyudad ngadto sa lain pinaagig awto ug masayop sa pagliko, aksiyon ang gikinahanglan sa pagbag-o sa atong dalan. Kay kon dili, kita dili gayod makaabot sa atong destinasyon. Sa susama, kon ipakita kanato sa mga ansiano nga nagapaingon kita sa sayop nga dalan sa espirituwal, tingali pinaagi sa pagpangulitawo ug dili-magtutuo, atong ipadapat dayon ang ilang Kasulatanhong tambag. Kini maoy usa ka paagi sa pagpakita nga kita tinuod gayod may “pagsalig kang Jehova.”—Proverbio 3:5, 6.
Pagtahod Bisan sa Gagmay nga mga Butang
20. Ang pagbangon sa atong kaugalingon ug unsang mga pangutana ang makatabang kanato sa pagpakitag pagtahod sa pagtultol sa mga ansiano bisan sa gagmay nga mga butang?
20 Kinahanglan nga magpakita kitag pagtahod sa pagtultol sa mga ansiano bisan sa gagmay nga mga butang. Busa maayong atong pangutan-on ang atong kaugalingon: ‘Matinabangon ba ako kon mohangyo ang mga ansiano sa pagduaw sa masakiton o sa pagbansay sa mga bag-ohan diha sa pag-alagad sa kanataran? Ginadawat ba nako ang mga asaynment sa mga tigom ug nagaandam pag-ayo niana? Masanongon ba ako kon maghatag ang mga ansiano ug giya bahin sa paggahin ug lingkoranan diha sa mga kombensiyon, sa atong paagi sa pamiste, ug uban pa? Mokooperar ba ako kon sila mohangyo kanato sa pagtabang sa paglimpiyo sa Kingdom Hall, sa pagtaho dayon sa atong pag-alagad sa kanataran, o sa pag-abot sa mga tigom sa untop nga oras?’
21. Ang atong pagpakitag pagtahod sa mga ansiano makapahinumdom sa unsang mga pulong ni Jesus?
21 Pabilhan sa mga magtatan-aw sa kongregasyon ang atong kooperasyon, ug kini mosangpot ug dakong kaayohan. Sa pagkamatuod, ang atong pagkahimong matinahuron ug pagkamatinabangon bisan sa gagmay nga mga butang makapahinumdom sa mga pulong ni Jesus: “Ang tawo nga kasaligan sa gagmay nga butang kasaligan usab sa dagko.” (Lucas 16:10) Siyempre, kita gustong pagaisipong kasaligan.
Padayon sa Pagsanong sa Mahigugmaong Pagdumala
22. Unsa ang pipila ka kaayohan ang mosangpot gikan sa mahigugmaong pagdumala sa matinumanong ulipon ug sa mga ansiano sa kongregasyon?
22 Ang mga kaayohang mosangpot gikan sa mahigugmaong pagdumala sa matinumanong ulipon ug sa mga ansiano sa kongregasyon nagpamatuod nga ang tugob nga panalangin ni Jehova anaa sa iyang yutan-ong organisasyon. Dugang pa, ang batid nga pagtultol sa mga ansiano mobagay sa ilang mga katakos ug mopalambo sa panaghiusa sa atong taliwala. Kini mosangpot usab ug binuligay ug malamposong paningkamot sa pagpauswag sa mga intereses sa Gingharian. Sa pagkamatuod, ang usa ka positibong sangpotanan sa atong mapabilhong pagsanong sa pagdumala niadtong nagapanguna mao nga panalanginan sa Diyos ang atong buluhaton sa pagsangyaw ug sa paghimog-tinun-an. (Mateo 28:19, 20) Ang atong kooperasyon uban sa mga ansiano nagaandam usab kanato alang sa kinabuhing walay kataposan diha sa bag-ong sistema sa mga butang.
23. Sumala sa kahayag sa 1 Juan 5:3, mapukaw kita sa pagbuhat ug unsa?
23 Sanglit atong gihigugma si Jehova, ang pagsunod kaniya dili maoy usa ka makahasol nga buluhaton. Si apostol Juan misulat: “Kay mao kini ang paghigugma sa Diyos, nga atong pagabantayan ang iyang mga sugo; ug ang iyang mga sugo dili mabug-at.” (1 Juan 5:3) Ang maunongong mga Kristohanon malipayong mosunod sa mga sugo ni Jehova ug mapukaw sa pagkooperar niadtong iyang gisaligan sa pagtan-aw sa kongregasyon. Pagkadako sa atong pasalamat nga kita anaa sa organisasyon sa Diyos ug sa pagkabaton niining “mga gasa sa mga lalaki”! (Efeso 4:8) Nan, uban sa bug-os nga pagsalig nga ang Diyos mao ang nagaagak sa iyang katawhan, magmasinugtanon kita kanunay niadtong nakabaton sa pribilehiyo sa pagpanguna taliwala sa mga Saksi ni Jehova.
Unsay Imong mga Komento?
◻ Nganong magmasinugtanon niadtong nagapanguna sa atong taliwala?
◻ Unsang hunahuna ang angay natong huptan mahitungod sa pag-alagad nga gihatag sa kugihang mga ansiano?
◻ Nganong magmaabtik sa pagpadapat sa tambag nga ihatag sa mga ansiano?
◻ Unsang mga kaayohan ang madawat gikan sa atong mapabilhong pagsanong sa mahigugmaong pagdumala?
[Kapsiyon sa panid 24]
Ikaw ba motabang sa mga ansiano pinaagi sa pagdawat ug mga asaynment sa mga tigom, sa pagtabang sa paglimpiyo sa Kingdom Hall, sa pagtaho dayon sa imong pag-alagad sa kanataran, ug sa ubang mga paagi?
[Hulagway sa panid 23]
Si Pablo nalipay sa pagwali sa maayong balita ug sa pag-alagad sa isigkamagtutuo. Ingong ansiano, ikaw ba mapasalamaton sa imong hinatag-sa-Diyos nga mga pribilehiyo sa pag-alagad?