Ikaw ba May Katakos sa Pag-alagad?
“Ang paghimo kanamong may igong katakos nagagikan sa Diyos.”—2 CORINTO 3:5.
1. Ang Kristohanong kongregasyon walay dapit alang sa mga tawo sa unsang matang?
SI Jehova nga Diyos ug si Jesu-Kristo maoy mga magbubuhat. Matud ni Jesus: “Ang akong Amahan nagapadayon sa pagbuhat hangtod karon, ug ako nagapadayon sa pagbuhat.” (Juan 5:17) Ang Diyos dili mouyon sa mga tawo nga mobalibad sa pagbuhat; ni ang iyang pag-uyon anaa niadtong nagatinguhag responsabilidad aron makaangkon ug gahom ibabaw sa uban. Ang Kristohanong kongregasyon walay dapit alang sa mga tapolan o sa mahakogong ambisyoso.—Mateo 20:25-27; 2 Tesalonica 3:10.
2. Nganong karon adunay dakong panginahanglan sa mga lalaki aron mopas-an sa responsabilidad diha sa Kristohanong kongregasyon?
2 Ang mga Saksi ni Jehova may ‘daghan nga buluhaton diha sa Ginoo,’ ilabina karon nga daghan kaayong tawo nagaganayan nganha sa “bukid” sa matuod nga pagsimba. (1 Corinto 15:58; Isaias 2:2-4) May dakong panginahanglan sa mga lalaking may katakos sa espirituwal aron sa pagpas-an sa responsabilidad diha sa kongregasyon. Kay wala itukmod sa mahakogong ambisyon, ang maong mga lalaki nagabayaw kang Jehova, dili sa ilang kaugalingon. (Proverbio 8:13) Nahibalo sila nga ang Diyos nagatabang kanila aron mahimong may katakos alang sa mga katungdanan sa kongregasyon, maingon nga siya ‘nagahimong may igong katakos sa mga ministro sa bag-ong tugon.’—2 Corinto 3:4-6.
3. Sa panguna, unsa ang mga responsabilidad sa mga ansiano ug ministeryal nga mga alagad?
3 Karong adlawa, sama sa unang mga Kristohanon, ang mga lalaki gitudlo sa balaang espiritu ug pinaagi sa organisasyonal nga kahikayan ni Jehova aron mag-alagad nga mga ansiano ug ministeryal nga mga alagad. (Buhat 20:28; Filipos 1:1; Tito 1:5) Ang mga ansiano nagabantay sa espirituwal nga paagi sa panon sa Diyos, nga nagataganag mapanalipdanong pagdumala. Sila giabagan sa ministeryal nga mga alagad, kansang mga katungdanan wala maglangkit sa laktud sa espirituwal nga pagbantay. (1 Pedro 5:2; itandi ang Buhat 6:1-6.) Sama sa Anak sa Diyos, nga mianhi aron sa pag-alagad, ang maong mga tinudlo matinguhaon sa pag-alagad sa isigkamagtutuo. (Marcos 10:45) Kon ikaw usa ka Kristohanong lalaki, nakabaton ka ba nianang espirituha?
Mga Kuwalipikasyong Nabatonan sa Tanan
4. Diin ilabina nato makita ang mga talaan sa mga kuwalipikasyon niadtong gisaligan sa responsabilidad sa kongregasyon?
4 Ang mga kinahanglanon ilabina alang niadtong gisaligan sa responsabilidad sa kongregasyon gipadayag ni apostol Pablo sa 1 Timoteo 3:1-10, 12, 13 ug Tito 1:5-9. Samtang hisgotan nato ang maong mga kuwalipikasyon, nga pipila niana mapadapat sa mga ansiano ug ministeryal nga mga alagad, dili nato isipon sila sumala sa kalibotanong mga sukdanan. Hinunoa, atong sabton sila diha sa unang-siglong kahimtang ug ingong mapadapat taliwala sa katawhan ni Jehova. Ang pagkab-ot sa maong mga kinahanglanon wala mangayog kahingpitan, kay kon mao pa walay tawo ang takos. (1 Juan 1:8) Apan kon ikaw usa ka Kristohanong lalaki, kon kaha ikaw may mga katungdanan sa kongregasyon o wala, nganong dili analisahon ang personal nimong mga kuwalipikasyon?
5. Unsay kahulogan sa pagkahimong dili-salawayon?
5 Dili salawayon; may maayong pamatuod gikan sa mga tawo sa gawas; nahigawas sa sumbong. (1 Timoteo 3:2, 7, 8, 10; Tito 1:6, 7) Sa dihang gitudlo ug samtang nagaalagad, ang ministeryal nga mga alagad ug mga ansiano kinahanglang dili salawayon, nga mao, dili ikasumbong ug dili kinahanglang badlongon tungod sa makataronganong sumbong sa daotang kagawian o pagtulon-an. Ang dili-tinuod nga mga sumbong sa “mini nga mga igsoon” o sa uban dili maghimo sa usa ka tawo nga salawayon. Nga ang usa ka lalaki mahimong dili takos sa pag-alagad diha sa kongregasyon, ang sumbong kinahanglang dili kay wayhinungdan, ug kapamatud-an nga nahiuyon sa Kasulatanhong mga sukdanan. (2 Corinto 11:26; 1 Timoteo 5:19) Ang usang gitudlo diha sa kongregasyon “kinahanglan usab nga may maayong pamatuod gikan sa mga tawo sa gawas, aron siya dili mahulog sa kaulawan ug sa lit-ag sa Yawa.” Kon ang usa ka lalaki nakakomitir ug seryosong sala sa nangagi, siya ikatudlo lamang kon siya nakapapas na sa kaulawan ug nakahimog maayong ngalan sa iyang kaugalingon.
6. Ang pagkahimong bana sa usa ka asawa nagkahulogan sa unsa?
6 Bana sa usa ka asawa. (1 Timoteo 3:2, 12; Tito 1:6) Kini wala magpasabot nga ang mga lalaking minyo lamang ang mahimong ministeryal nga mga alagad ug mga ansiano. Hinuon, kon minyo ang usa ka lalaki kinahanglang magbatog usa lamang ka buhing asawa ug magmaunongon kaniya. (Hebreohanon 13:4) Lahi sa daghang dili-Kristohanong mga lalaki sa unang siglo, siya dili mahimong daghag asawa.a
7. (a) Ang pisikal nga edad ba ang magkuwalipikar sa usa ka lalaki aron mahimong ansiano? (b) Unsay nalangkit sa pagdumala sa usa ka panimalay sa maayong paagi?
7 Nagadumala sa iyang panimalay sa maayong paagi, uban sa mga anak nga nagapasakop. (1 Timoteo 3:4, 5, 12; Tito 1:6) Ang pipila tingali mobating ang mga ansiano kinahanglang labing menos 30 anyos, apan ang Bibliya wala magbutang ug minimong edad. Bisan pa niana, siya kinahanglang molihok nga usa ka tigulang nga lalaki sa espirituwal nga diwa. Ang ministeryal nga mga alagad ug mga ansiano kinahanglang edaran na nga magbatog mga anak. Kon minyo, ang usa ka lalaki dili mahimong may katakos kon siya molihok sa diyosnong paagi sa ubang dapit apan diktador sa panimalay. Kinahanglang maangkon niya ang pagtahod aron magdumala sa iyang panimalay sumala sa mga prinsipyo sa Bibliya, ug ang iyang tumong mao nga magmalamposon sa espirituwal nga paagi sa matag sakop sa pamilya. Ingong katibuk-ang lagda, ang usa ka ansiano nga usa ka amahan angay magbatog maayog-pamatasang menor-de-edad nga mga anak nga “nagtuo.” Mahimong sila nagauswag ngadto sa pagpahinungod sa Diyos o sila bawtismado nang mga Saksi ni Jehova. Ang usa ka lalaking dili makaugmad ug pagtuo diha sa iyang mga anak lagmit dili makaugmad niana diha sa uban.
8. Sa dili pa mahimong ansiano ang usa ka lalaking depamilya, unsay iyang kinahanglang makat-onan sa pagbuhat?
8 Sa dili pa ang usa ka lalaking depamilya mahimong ansiano nga takos motaganag espirituwal nga pagtan-aw diha sa kongregasyon, kinahanglang makatuon siya kon unsaon pagdumala sa iyang kaugalingong panimalay. ‘Kon ang usa ka lalaki dili mahibalo kon unsaon pagdumala ang iyang kaugalingong panimalay, unsaon man niya sa pag-atiman sa kongregasyon sa Diyos?’ (1 Timoteo 3:5) Tinuod, ang usa ka lalaki tingali supakon sa usa ka asawang dili magtutuo. (Mateo 10:36; Lucas 12:52) O usa sa iyang mga anak tingali masad-an sa seryosong sala, bisan pag ang uban maayog kahimtang sa espirituwal. Bisan pa niana, kon iyang nabuhat ang tanan nga madahom, ug ilabina kon siya may espirituwal nga kalamposan sa uban diha sa iyang panimalay, ang pagsalikway sa maayo niyang pagdumala sa usa ka sakop sa pamilya dili gayod maghimo niyang dili takos nga mahimong ministeryal nga alagad o ansiano.
9. Unsang pag-amping ang himoon sa usa ka ansiano o ministeryal nga alagad bahin sa alkoholikong ilimnon?
9 Dili huboghubogan nga palaaway o palainom ug daghang bino. (1 Timoteo 3:3, 8; Tito 1:7) Ang usa ka ministeryal nga alagad o ansiano kinahanglang dili mapatuyangon sa alkoholikong ilimnon. Ang pagkagiyan kanila mahimong mosangpot sa pagkawala sa pagpugong sa mga hunahuna ug mga emosyon, nga mosangpot sa hinubog nga mga away o mga sukmagay. Siya angay dili ‘palainom ug daghang bino’ o magbaton sa dungog sa pagka nabatasan o kusog nga palainom. (Proverbio 23:20, 21, 29-35) Makasubo gayod sa dihang ang usa ka pagduaw isip magbalantay madaot tungod sa pagpatuyang! Kon moinom man ugaling ang usa ka igsoong lalaki, dili angay niyang himoon kana inigpakig-ambit sa mga tigom, sa ministeryo, o sa ubang balaang pag-alagad.—Levitico 10:8-11; Ezekiel 44:21.
10. Nganong ang mga mahigugmaon sa salapi ug kadtong dalo sa malimbongong ganansiya dili makakuwalipikar nga mga ansiano o ministeryal nga mga alagad?
10 Dili mahigugmaon sa salapi o dalo sa malimbongong ganansiya. (1 Timoteo 3:3, 8; Tito 1:7) Ang mga mahigugmaon sa salapi anaa sa espirituwal nga kapeligrohan, ug ang “mga tawong dalo” dili magapanunod sa Gingharian sa Diyos. Busa, ang maong mga tawo dili takos mahimong mga ansiano o ministeryal nga mga alagad. (1 Corinto 6:9, 10; 1 Timoteo 6:9, 10) Ang lintunganay nga pulong sa Grego gihubad nga “malimbongon” sa panguna nagkahulogan nga “makauulaw,” ug ang pulong gihubad nga “ganansiya” nagatumong sa bisan unsang matang sa tubo o bentaha. (Filipos 1:21; 3:4-8) Hinuon, ang usa ka tawo kang kansang kinaiya nagapaila nga limbongan niya ang “mga karnero” sa Diyos dili takos sa responsabilidad sa kongregasyon. (Ezekiel 34:7-10; Buhat 20:33-35; Judas 16) Ang panginahanglan sa pagbantay sa paghimog mga rekomendasyon molabaw pa sa diha nga makaamgo kitang ang usa ka tawo, sa dihang matudlo, basin saligan sa pondong salapi ug matental nga mangawat sa bahin sa salapi.—Juan 12:4-6.
11. Nganong ang “usa ka lalaking bag-ong kinabig” dili angay irekomendar alang sa responsabilidad sa kongregasyon?
11 Dili bag-ong kinabig; nasulayan kon bahin sa pagkaangayan. (1 Timoteo 3:6, 10) Ang usa ka lalaking bag-ong bawtismado wala pa makabatog panahon aron sa pagpamatuod nga atimanon niyang matinumanon ang gitudlo nga mga buluhaton. Basin siya walay simpatiya sa mga sinakit o nagkinahanglag kaalam sa pagtabang sa isigkamagsisimba ug basin makatamay pa sa uban. Busa, ang pagkarekomendado nga ministeryal nga alagad ug ilabina usa ka ansiano, ang usa ka lalaki kinahanglang “nasulayan kon bahin sa pagkaangayan” ug angay maghatag ebidensiya sa maayong panghukom ug pagkakasaligan. Walay tinong panahon ang gihatag alang sa maong pagsulay, ug ang mga indibiduwal magkalahi sa gikusgon sa espirituwal nga pagtubo. Apan ang mga ansiano dili angay morekomendar dayon sa usa ka bag-ohan “kay basi siya moburot sa garbo ug mahulog sa paghukom nga gipahamtang diha sa Yawa.” Pasagdi nga siya magpasundayag una sa samag-Kristong pagkamapaubsanon.—Filipos 2:5-8.
Gihatagag Pagtagad ang Ministeryal nga mga Alagad
12. Ang mga kinahanglanon ba nga gitala alang sa ministeryal nga mga alagad kab-oton nila lamang?
12 Ang pila ka kinahanglanon gitala alang sa ministeryal nga mga alagad. Apan, kon ang maong mga kinahanglanon wala usab makab-ot sa mga ansiano, sila dili takos sa pag-alagad. Ingong Kristohanong lalaki, ikaw ba takos niining mga bahina?
13. Unsay kahulogan nga mahimong ugdang?
13 Ugdang. (1 Timoteo 3:8) Ang usa ka lalaki nga mahimong takos sa pag-alagad nga ministeryal nga alagad dili mahimong dili matinagdanon sa responsabilidad. Angay nga siya magagawi sa halangdong paagi nga makaangkon sa pagtahod. Bisan tuod dalawaton ang panagsang pasiaw, siya dili mahimong takos kon siya kanunay nga magpasiaw.
14. (a) Ang pagkahimong dili duhag-sinultihan nagbaton sa unsang kahulogan? (b) Ang pagbatog mahinlong tanlag nagkinahanglan sa unsa?
14 Dili dobleg-sinultihan; may mahinlong tanlag. (1 Timoteo 3:8, 9) Ang ministeryal nga mga alagad (ug mga ansiano) kinahanglang matinud-anon, dili tabian o malansison. Sanglit sila dili dobleg-sinultihan, sila kinahanglang sa kasalingkapaw dili mosulti sa usa ka butang ngadto sa usa ka tawo ug sa kaatbang ngadto sa lain. (Proverbio 3:32; Santiago 3:17) Kining mga tawhana kinahanglan usab hugot nga mga tigpaluyo sa gipadayag nga kamatuoran, “nga mangupot sa balaang tinagoan sa pagtuo nga may mahinlong tanlag.” Sa atubangan sa Diyos, ang tanlag sa maong tawo angay magpamatuod nga siya matul-id ug dili magabuhat sa bisan unsang sinuwitik o makapahugaw. (Roma 9:1; 2 Corinto 1:12; 4:2; 7:1) Walay mausa ang takos sa pag-alagad sa panon sa Diyos gawas kon siya manghawid sa kamatuoran ug sa diyosnong mga prinsipyo.
Pagsentro sa mga Kuwalipikasyon sa mga Ansiano
15. Kansang mga kuwalipikasyon ang karon gisusi, ug nagalangkit kini ilabina sa unsa?
15 Ang pila ka kuwalipikasyon mapadapat ilabina sa mga ansiano ug may kalabotan sa ilang buluhaton ingong mga magbalantay ug mga magtutudlo. Ingong Kristohanong lalaki, nakab-ot ba nimo kining mga kinahanglanona?
16. (a) Unsay gikinahanglan aron mahimong kasarangan sa mga batasan? (b) Sa unsang paagi mahuptan padayon sa usa ka ansiano ang pagpugong-sa-kaugalingon?
16 Kasarangan sa mga batasan; mapugnganon-sa-kaugalingon. (1 Timoteo 3:2; Tito 1:8) Ang usa ka ansiano angay nga kasarangan, dili ulipon sa daotang mga bisyo. Sa dihang siya moatubang ug mga pagsulay, ang Diyos motabang kaniya sa paghupot sa katimbang kon siya moampo sama sa salmista: “Ang mga kasakitan sa akong kasingkasing midaghan; Oh kuhaon mo unta ako gikan sa mga kagul-anan.” (Salmo 25:17) Ang usa ka magtatan-aw angay moampo usab alang sa espiritu sa Diyos ug ipasundayag ang mga bunga niini, apil ang pagpugong-sa-kaugalingon. (Lucas 11:13; Galacia 5:22, 23) Ang pagpugong sa mga hunahuna, sinultihan, ug mga lihok makapaarang sa usa ka ansiano sa paglikay sa mga hingapin samtang ginatagana niya ang espirituwal nga giya alang sa kongregasyon.
17. Unsay nalangkit sa pagkahimong maayog panghunahuna?
17 Maayog panghunahuna. (1 Timoteo 3:2) Ang usa ka ansiano kinahanglang maayog panabot, mabinantayon, ug maalam. Siya angay may-katuyoan ug makataronganon sa sinultihan ug linihokan. Ang iyang mapaubsanon, timbang nga panghunahuna gibase sa diyosnong kaalam ug sa makapahimsog nga mga pagtulon-an sa Pulong ni Jehova, nga niana siya angay mahimong kugihang estudyante.—Roma 12:3; Tito 2:1.
18. Ang pagkamahapsay nagkinahanglan sa unsa gikan sa usa ka ansiano?
18 Mahapsay. (1 Timoteo 3:2) Ang Gregong pulong gigamit dinhi gihubad nga “maayong-pagkahikay” sa 1 Timoteo 2:9. Busa ang usa ka ansiano angay magbatog desente, maayong-pagkahikay nga pagkinabuhi. Pananglitan, siya angay nga mauntop sa oras. Ang unang-siglong mga Kristohanon lagmit wala maghimong dakong butang sa paghupot ug rekord, ug ang magtatan-aw karong adlawa dili kinahanglang mahimong ekspertong accountant o eskribiyente. Ang ministeryal nga mga alagad makaatiman sa mga butang gikinahanglan niining mga bahina. Apan ang Gregong pulong alang sa “mahapsay” mahimong magpasabot sa maayong kagawian, ug ang usa ka lalaki tinong dili takos mahimong ansiano kon siya badlongon o samokan.—1 Tesalonica 5:14; 2 Tesalonica 3:6-12; Tito 1:10.
19. Kay siya maabiabihon, unsay ginabuhat sa usa ka ansiano?
19 Maabiabihon. (1 Timoteo 3:2; Tito 1:8) Ang usa ka ansiano ‘nagasunod sa dalan sa pagkamaabiabihon.’ (Roma 12:13; Hebreohanon 13:2) Ang Gregong pulong alang sa “maabiabihon” literal nagkahulogan nga “mahinangop sa mga estranghero.” Busa, ang maabiabihong ansiano magadawat sa mga bag-ohan sa Kristohanong mga tigom, nga magapakitag samang kaikag diha sa kabos maingon man sa dato sa materyal. Siya maabiabihon niadtong nagabiyahe sa intereses sa Kristiyanidad ug nagapalarga kanila “sa paagi nga takos sa Diyos.” (3 Juan 5-8) Sa pagkamatuod, ang usa ka ansiano nagapakitag pagkamaabiabihon ngadto ilabina sa isigkamagtutuo sumala sa ilang mga panginahanglan ug sumala sa itugot sa iyang mga sirkumstansiya.—Santiago 2:14-17.
20. Sa unsang mga paagi ang usa ka ansiano mahimong takos sa pagtudlo?
20 May katakos sa pagtudlo. (1 Timoteo 3:2) Ang abilidad sa usa ka ansiano ingong espirituwal nga magtutudlo dili sangpotanan sa katakos sa pangutok o kalibotanong kaalam. (1 Corinto 2:1-5, 13) Kini motungha tungod kay siya “hugot nangupot sa kasaligang pulong mahitungod sa iyang arte [o, paagi] sa pagtudlo, aron siya makaarang sa pagpanambag pinaagi sa pagtulon-an nga maayo ug pagbadlong niadtong nagasupak.” (Tito 1:9; itandi ang Buhat 20:18-21, 26, 27.) Siya kinahanglang ‘makapanudlo uban sa kalumo niadtong masinupakon.’ (2 Timoteo 2:23-26) Bisan pag ang usa ka ansiano dili labing maayong mamumulong sa publiko diha sa kongregasyon, angay nga siya tigtuon pag-ayo sa Pulong sa Diyos nga siya may igong kahanas sa pagtudlo ug pagtambag sa mga magtutuo, nga nagatuon usab sa Bibliya. (2 Corinto 11:6) Kinahanglang siya may katakos sa pagpasa sa “maayong pagtulon-an” nga nagatabang sa mga pamilya ug mga indibiduwal sa pagkinabuhig diyosnong mga kinabuhi.—Tito 2:1-10.
21. (a) Nganong ikaingon nga ang usa ka ansiano dili tigpanukmag? (b) Unsay kahulogan nga mahimong makataronganon? (c) Ang pagkahimong dili palaaway nagkahulogan sa unsa?
21 Dili tigpanukmag, apan makataronganon, dili palaaway. (1 Timoteo 3:3; Tito 1:7) Kay makigdaiton, ang usa ka ansiano dili manuntok sa pisikal sa mga tawo o magdaogdaog nila pinaagi sa pagsultig mapasipad-anon o sakit nga mga pulong. (Itandi ang 2 Corinto 11:20.) (Ang nag-unang pahayag nga siya “dili huboghubogan nga palaaway” nagapadayag nga siya nagalikay sa pag-abusar sa alkohol nga kasagaran gayong mosangpot sa away.) Kay “makataronganon” (o, “mauyonon”), dili awtoritaryan ug lisod pahimut-an, dili niya himoong isyu ang ginagmayng mga butang. (1 Corinto 9:12; Filipos 4:5; 1 Pedro 2:18) Sanglit ang usa ka ansiano dili palaaway, o mabingkilon, siya nagalikay sa mga away ug “dili makiling sa kasuko.”—Tito 3:2; Santiago 1:19, 20.
22. Unsay gipaila sa kamatuoran nga ang usa ka ansiano kinahanglang dili mabuutbuuton?
22 Dili mabuutbuuton. (Tito 1:7) Sa literal, kini nagkahulogang “dili tigpahimuot-sa-kaugalingon.” (Itandi ang 2 Pedro 2:10.) Ang usa ka ansiano kinahanglang dili dogmatiko kondili angay magbaton ug mapaubsanong hunahuna sa iyang mga abilidad. Kay dili maghunahunang siya mas maayong modumala sa mga butang kay sa uban, mapaubsanon niyang ipakig-ambit ang responsabilidad sa uban ug ginapabilhan ang kapid-ang mga magtatambag.—Numeros 11:26-29; Proverbio 11:14; Roma 12:3, 16.
23. (a) Unsaon nimo pagbatbat ang “mahigugmaon sa pagkamaayo”? (b) Ang pagkahimong matarong nagkahulogan sa unsa?
23 Mahigugmaon sa pagkamaayo; matarong. (Tito 1:8) Aron mokuwalipikar nga ansiano, ang usa ka lalaki kinahanglang mahigugma sa pagkamaayo ug matarong. Ang mahigugmaon sa pagkamaayo nahigugma kon unsay maayo sa panan-aw ni Jehova, nagabuhat sa maluluton ug matinabangong mga buhat, ug nagapakitag pagpabili sa kaayo sa uban. (Itandi ang Lucas 6:35; itandi ang Buhat 9:36, 39; 1 Timoteo 5:9, 10.) Ang pagkamatarong nagkahulogan sa pagsunod sa mga balaod ug mga sukdanan sa Diyos. Apil sa uban pang mga butang, ang maong tawo dili madapigon ug nagapalandong sa matarong, maputli, ug maligdong nga mga butang. (Lucas 1:6; Filipos 4:8, 9; Santiago 2:1-9) Sanglit ang pagkamaayo lahi sa pagkamatarong sa pagkaaging kini molapaw sa kon unsay gikinahanglan sa hustisya, ang mahigugmaon sa pagkamaayo nagabuhat ug labaw alang sa uban kay sa gikinahanglan gikan kaniya.—Mateo 20:4, 13-15; Roma 5:7.
24. Ang pagkamaunongon nagkinahanglan sa unsa?
24 Maunongon. (Tito 1:8) Ang usa ka lalaking kuwalipikado nga ansiano nagbaton sa dili-mabugtong debosyon ngadto sa Diyos ug nagasunod sa balaang kasugoan, bisan pag unsaon pagsulay ang iyang integridad. Siya nagabuhat kon unsay gidahom kaniya ni Jehova, ug kini nagaapil sa pag-alagad nga matinumanong magmamantala sa Gingharian.—Mateo 24:14; Lucas 1:74, 75; Buhat 5:29; 1 Tesalonica 2:10.
Pagkab-ot sa mga Kuwalipikasyon
25. Ang mga kuwalipikasyon nga bag-o pang gihisgotan gikinahanglan gikan ni kinsa, ug sa unsang paagi makab-ot ang maong mga kuwalipikasyon?
25 Ang kadaghanan sa mga kuwalipikasyon nga bag-o pang gihisgotan nagalangkit sa mga butang gikinahanglan sa matag Saksi ni Jehova ug makab-ot pinaagi sa pagpanalangin sa Diyos sa pagtuon, paningkamot, maayong pakig-uban, ug pag-ampo sa matag usa. Ang mga indibiduwal tingali mas lig-on sa pila ka kuwalipikasyon kay sa uban. Apan sa igoigong gidak-on, ang ministeryal nga mga alagad ug mga ansiano kinahanglang makakab-ot sa tanang kinahanglanon alang sa ilang linaing pribilehiyo.
26. Nganong ang Kristohanong mga lalaki nagahimo sa ilang kaugalingon nga andam alang sa responsabilidad sa kongregasyon?
26 Ang tanang Saksi ni Jehova angay magtinguha sa pagbuhat sa tanang butang posible diha sa pag-alagad sa Diyos. Kining espirituha nagadasig sa Kristohanong mga lalaki sa paghimo sa ilang kaugalingon nga andam alang sa responsabilidad sa kongregasyon. Ikaw ba dedikado, bawtismadong lalaki? Kon mao, paninguha ug paningkamot sa pagkahimong takos sa pag-alagad!
[Footnote]
a Tan-awa ang Bantayanang Torre, Septiyembre 15, 1983, panid 29, ubos sa ubos-ulohang “Kasulatanhong Diborsiyo.”
Unsay Imong Tubag?
◻ Nganong adunay dakong panginahanglan karon sa bawtismadong mga lalaki aron modawat sa responsabilidad sa kongregasyon?
◻ Unsa ang pipila ka kuwalipikasyon nga kinahanglang makab-ot sa ministeryal nga mga alagad?
◻ Unsa ang pipila ka kuwalipikasyon nga kinahanglang makab-ot sa mga ansiano?
◻ Nganong ang usa ka ansiano kinahanglang mahibalong modumala sa iyang panimalay?
◻ Unsay nagadasig sa Kristohanong mga lalaki sa paghimo sa ilang kaugalingon nga andam alang sa mga katungdanan sa kongregasyon?
[Hulagway sa panid 24, 25]
Ang mga ansiano ug ministeryal nga mga alagad angay magdumala sa ilang mga panimalay sumala sa mga prinsipyo sa Bibliya