Mga Pangutana Gikan sa mga Magbabasa
◼ Aduna bay minimum nga edad aron ang usa ka Kristohanong lalaki irekomender ingong ministeryal nga alagad sa kongregasyon?
Wala, ang Bibliya wala magbutang ug minimum nga edad.
Sa karaang Israel, adunay pipila ka kaso nga gipiho sa Diyos ang pangedaron. Ang mga lalaki nga girehistro alang sa militaryong serbisyo kinahanglan dili mokubos sa 20 anyos; ang mga bata pa nga lalaki dili ipadala sa gubat, ingon sa ginahimo karon sa daghang dapit. Ang pangedaron gitagad usab sa mga Levihanon. Ang mga anak ni Coath nga nag-alagad sa tabernakulo kinahanglan sa panuigon nga gikan sa 30 ngadto 50 sa edad. Ngano? Kining pagkutoha gihisgotan maylabot sa “bug-at nga serbisyo ug ang serbisyo sa pagdala sa mga lulan sa balongbalong nga pagatigoman.” (Numeros 4:3, 47) Mopatim-awng ang mga Levihanon makasugod sa pagbuhat sa magaan nga buluhaton sa panuigong 25, apan sila kinahanglang may panuigong 30 sa dili pa makig-ambit sa bug-at nga buluhaton ug dugang bug-at nga mga pribilehiyo sa pagbungkag, paghakot, ug paghugpong pag-usab sa tabernakulo. (Numeros 8:24-26) Kanang maong bug-at nga buluhaton sa ulahi wala na kinahanglana sa templo, busa ang mga Levihanon sa maong panahon misugod sa pag-alagad sa panuigong 20.—1 Cronicas 23:24.
Apan sa dihang si Jehova mihunong na sa paggamit sa unodnong Israel ug misugod sa paggamit sa espirituwal nga Israel, siya ba nagtino sa usa ka minimum nga edad alang sa ministeryal nga mga alagad (mga diakono) sa Kristohanong kongregasyon?
Ang usa basin maghunahuna niana, subay sa rekord sa ulahing mga siglo. Sa Romano Katolikong Simbahan, ang diakono maoy “usa ka ordinadong ministro, nga dihadiha ubos ug ranggo kay sa pari, diha sa balaanong pagkatudlong han-ay sa herarkiya sa Simbahan.” Ang Bingham’s Antiquities of the Christian Church nagaingon: “Ang mga obispo ug mga presbiteryo [mga ansiano] . . . dili kasagarang ordinahan sa dili pa ang panuigong trayenta; apan ang mga diakono mahimong ordinahan sa panuigong bayente-singko, ug dili mokubos niana. Kini mao ang pangedaron nga gitino sa sibil ug sagradong balaod . . . Kita dili makakita sa usa nga giordinahan sa dili pa ang panuigong bayente-singko, diha sa tibuok kasaysayan sa Simbahan.”
Apan, unsa na man ang mga kuwalipikasyon nga hikaplagan diha sa Bibliya? Ang mga kuwalipikasyong gihisgotan lamang mao ang makita sa 1 Timoteo 3:8-10, 12, 13: “Ang mga ministeryal nga alagad kinahanglang magmaugdang, dili duhag sinultihan, dili tig-inom ug daghang bino, dili maikag sa pagpanapig limbong, nga magabaton sa sagradong tinagoan sa pagtuo uban ang mahinlong konsensiya. Usab, kinahanglan nga sila pagasulayan una, dayon paalagara sila ingong mga diakono kon hikaplagan silang dili masaway. Ang mga diakono kinahanglang tagsa ray asawa, nga maayong modumala sa mga anak ug sa ilang mga panimalay. Kay silang nagaalagad sa maayong paagi nakapanag-iya alang sa ilang kaugalingon sa maayong dungog ug sa dakong kagawasan sa pagsulti diha sa pagtuo nga anaa kang Jesu-Kristo.”
Atong makita dinhi nga walay minimum nga edad ang gitino aron itudlo ang usa ka ministeryal nga alagad. Busa sa dihang magtigom ang mga ansiano aron hisgotan ang mga kuwalipikasyon sa mga igsoong lalaki sa kongregasyon, ilang hinumdoman nga walay Biblikanhong basehanan nga kab-oton sa usa ka Kristohanong lalaki ang pangedaron nga 20, 25, o 30 sa dili pa siya irekomendar ug mag-alagad. Ang Bibliya nagapunting niadtong kinsa nakabaton niining maong pribilehiyo ingong “mga lalaki nga nag-alagad,” busa kita dili makalaom nga sila maoy bag-o pang natin-edyer o mga tin-edyer. Nagapamatuod niini, ang Bibliya nagaingon nga ang maong ministeryal nga mga alagad malagmit may asawa ug mga anak sa ilang kaugalingon.
Dugang pa, ang mga lalaki nga irekomendar ingong ministeryal nga mga alagad “pagasulayan pa kon angay ba,” nga naghatag ebidensiya sa pagbatog salabotan sa responsabilidad. Dili buot ingnon nga sila magaalagad sa tagal nga siya mapanid-an. Hinunoa, sila kinahanglang nagpakita nag Kristohanong pagkahamtong sa makataronganong gidugayon (nga nabawtismohan sa dili mokubos usa ka tuig), ingong mga lalaki nga andam ug may kaarangan nga moatiman sa mga kaakohan nga gitugyan kanila. Kon ang “ugdang” batan-ong lalaki nagpakita niining mga hiyasa, ug siya mapainubsanon ug nakaabot sa ubang mga kinahanglanon, ang mga ansiano mahimong magrekomendar kaniya bisan tuod nga siya wala pa sa panuigong 20 anyos. Ang ubang mga lalaki malagmit mas tigulang pa sa dihang nagpakita sila sa tin-aw nga ilang nakab-ot ang mga kinahanglanon ‘nga nagaalagad sa maayong paagi, nga nakabaton alang sa ilang kaugalingon sa maayong dungog ug sa dakong kagawasan sa pagsulti.’