Usa ka Sagradong Tinagoan Nadayag

“Ang sagradong tinagoan niining diyosnong debosyon sa pagkamatuod dako gayod.”—1 TIMOTEO 3:16.

1. Unsa nga tinagoan ang gihubit sa 1 Timoteo 3:16?

INTERESADO ka ba sa mga misteryo? Malingaw ka ba nga moutingkay sa mga tinagoan? Ang kadaghanan kanato malingaw! Nan, duyog kanamo sa pag-usisa sa usa sa labing-dako sa tanang mga tinagoan—usa ka tinagoan nga natago diha sa Pulong sa Diyos sa libo-libo na nga katuigan. Kining sagradong tinagoan nagaapektar sa atong mga kinabuhi, karon ug sa umaabot. Kini mao ‘ang sagradong tinagoan sa diyosnong debosyon,’ nga gihubit kanato sa 1 Timoteo 3:16. Pagkamapasalamaton nato kang Jehova, “ang Tigpadayag sa mga tinagoan,” nga malulutong gibutyag kanato kining hamiling tinagoan ug ang interpretasyon niini!—Daniel 2:28, 29.

2. (a) Kanus-a nga unang naghisgot si Jehova sa usa ­ka sagradong tinagoan, ug unya unsay iyang gisaad? (b) Unsang mga pangutana ang nagkinahanglag mga tubag?

² Si Jehova unang mihisgot sa usa ka sagradong tinagoan human nga gilimbongan sa Bitin si Eva, ug si Adan misunod kaniya sa pagrebelde. Unya ang Diyos misaad nga ang “binhi,” o kaliwat, modugmok sa ulo sa Bitin. (Genesis 3:15) Kinsa kining Binhi? Sa unsang paagi mabuntog niya ang Bitin? Bayawon ba kaha niya ang pagkamatinud-anon sa Diyos ug ang Iyang katuyoan niining yutaa?

3. Ang balaang mga tagna naghatag ug unsang mga ilhanan bahin kon kinsa ug bahin sa buluhaton sa Binhi?

³ Sa milabay ang panahon, ang sagradong mga tagna nagbutyag sa mga ilhanan kon kinsa siya ug sa umaabot nga kalihokan sa Binhi. Siya maoy kaliwat ni Abraham, magapanunod sa gingharian ni David, ug pagatawgong Prinsipe sa Pakigdait. ‘Sa kadagaya sa iyang harianong pagmando ug sa pakigdait walay kataposan.’ (Isaias 9:6, 7; Genesis 22:15-18; Salmo 89:35-37) Apan ingon sa gipamulong sa Roma 16:25, kanang sagradong tinagoan “gitipigan sa hilom sa hataas nga panahon.”

Pagsulbad sa Misteryo

4. Sa unsang paagi ang sagradong tinagoan nagsugod sa pagpadayag sa 29 K. P.?

⁴ Sa kataposan, human sa upat ka milenyo mitungha ang kadan-agan! Sa unsang paagi? Sa 29 K. P., gibawtismohan ni Juan si Jesus nga Nazaretnon sa Suba sa Jordan, ug gikan sa langit ang tingog sa Diyos miingon: “Kini ang akong Anak, nga pinalangga, nga akong giuyonan.” (Mateo 3:17) Ah, ania na sa kataposan ang gisaad nga Binhi! Ang sagradong tinagoan misugod na sa pagpadayag sa tanang mahimayaong bahin niini, apil ang bahin sa diyosnong debosyon.

5. Unsa ang “diyosnong debosyon,” ug sa unsang paagi kini nagaapektar niadtong nagabatasan niini?

⁵ Unsay nasabtan nato sa “diyosnong debosyon”? Diha sa Kristohanong Gregong Kasulatan, ang ekspresyon makita 20 ka besis lamang, ang kapin sa katunga niini anaa sa duha ka sulat ni Pablo ngadto kang Timoteo. Ang publikasyong Insight on the Scriptures naghubit sa “diyosnong debosyon” ingong “pagtahod, pagsimba, ug pag-alagad sa Diyos, uban ang pagkamaunongon sa iyang unibersohanong pagkasoberano.” Ang pagtahod nagagikan sa ­kasingkasing nga mopasuod sa Diyos, sa kataha sa iyang pagkahalangdon, sa iyang pagkawalay-kataposan, ug sa pagkadaghan sa iyang dagkong mga kalalangan, uban ang pagkamapasalamaton sa espirituwal ug materyal nga mga gasa nga iyang ginapaulan diha sa mapabilhong katawhan. Sa pagkamatuod, ang matag usa kanato nga nagabatasan sa diyosnong debosyon makasulti, sa gisulti sa salmista sa Salmo 104:1: “Dayegon mo si Jehova, Oh kalag ko. Oh Jehova nga akong Diyos, dako ka sa hilabihan. Ikaw nabistihan sa kadungganan ug pagkahalangdon.”

6. (a) Sa unsang paagi ang mga magsisimba ni Jehova lahi gikan sa mga maninimba sa Kakristiyanohan? (b) Unsay gipamulong ni Pablo sa Roma 11:33, 34, ug busa unsang mga pangutana ang gibangon?

⁶ Ang atong debosyon sa Diyos kinahanglang ipahayag, ug kini mahimo pinaagi sa mga lihok. Niining bahina, ang mga magsisimba sa matuod nga Diyos, si Jehova, lahi kaayo gikan sa mga magsisimba sa nagakawalang mga simbahan sa Kakristiyanohan. Alang sa kadaghanang mga tawo sa yuta, ang relihiyon—kon sila aduna may relihiyon—maoy pormalismo na lamang, usa ka bisti nga isul-ob aron diyosnon silang tan-awon samtang nagkinabuhi sila sa kinabuhi nga nagpahiuyon sa daotang kalibotan nga nagalibot kanila. Sila wala gani mahibalo kon kinsa ang Diyos. Sa pagkamatuod, kining mga tawhana kinahanglang magpalandong sa mga pulong ni Pablo sa Buhat 17:23, sa dihang siya miingon sa mga taga-Atenas kinsa nagasimba “sa Wala-hiilhing Diyos”: “Kining inyong ginasimba nga wala ninyo hiilhi, kini mao ang akong ginamantala kaninyo.” Mahitungod nianang halangdong Diyos, si Pablo miingon sa Roma 11:33, 34: “Oh hilabihan gayod ang kadagaya ug kaalam ug kahibalo nga iya sa Diyos! Pagkadili-matugkad ang iyang mga paghukom ug pagkadili-matukib ang iyang mga paagi! Kay ‘kinsa bay nasayod sa hunahuna ni Jehova, o kinsa bay iyang magtatambag?’” Nan, sa unsang paagi kita makadangat sa kahibalo sa mga paagi sa Diyos? Kini maoy pinaagi sa pagtuon ‘sa sagradong tinagoan sa diyosnong debosyon.’ Apan unsaon nato pagbuhat kana?

7. Nganong kini ikaingon nga “ang sagradong tinagoan niining diyosnong debosyon dako gayod”?

⁷ Diha sa 1 Timoteo kapitulo 3, unang gilatid ni apostol Pablo kon unsay gikinahanglan sa responsabling mga alagad sa panimalay sa Diyos, nga gihubit sa bersikulo 15 ingong “ang kongregasyon sa buhi nga Diyos, usa ka haligi ug panalipod sa kamatuoran.” Dayon si Pablo midugang, sa bersikulo 16: “Ang sagradong tinagoan niining diyosnong debosyon sa pagkamatuod dako gayod.” Tinuod nga dako gayod kay gipadala ni Jehova ang iyang bugtong Anak sa yuta aron ibutyag kining maong tinagoan, aron ipasundayag kon unsa gayod ang diyosnong debosyon ug sa unsang paagi kini kinahanglan, hinungdanon, sa matuod nga pagsimba. Ang sagradong tinagoan niining diyosnong debosyon gipabanaag diha sa kurso sa kinabuhi ni Jesus dinhi sa yuta. Ang tanang nahigugma kang Jehova angay nga magtukod sa ilang pagtuo ug sa ilang mga kinabuhi diha kang Kristo, nga sulondan sa diyosnong debosyon. Nan, sa unsang paagi gitin-aw ni Jesus ang sagradong tinagoan sa diyosnong debosyon?

Ang Unom ka Bahin

8. (a) Unsa ang unom ka bahin sa sagradong tinagoan nga gihubit ni Pablo diha sa 1 Timoteo 3:16? (b) Kinsa ang “Siya” nga gipadayag?

⁸ Pinaagi sa balaan nga pagdasig, gitubag ni Pablo kanang pangutanaha. Dinhi sa 1 Timoteo 3:16, iyang gihubit ang unom ka bahin niining sagradong tinagoan, nga nag-ingon: “Siya [1] gipadayag diha sa lawas, [2] gipahayag nga matarong sa espiritu, [3] mipakita sa mga manulonda, [4] giwali sa kanasoran, [5] gituohan dinhi sa kalibotan, [6] gibayaw ngadto sa himaya.” Kinsa ang “Siya” nga gipadayag? Sa matin-aw, “Siya” mao ang gisaad nga Binhi, si Jesus, kinsa mianhi sa pagtuman sa kabubut-on sa Diyos. Siya ang dugokan sa sagradong tinagoan, naghimo niini nga dako gayod.

9. Unsay pamatuod nga ang 1 Timoteo 3:16 dili husto nga mabasa: “Ang Diyos gipadayag diha sa lawas”?

⁹ Gisulayan sa pagpalubog sa mga trinitaryanhon ang pagsabot sa sagradong tinagoan pinaagi sa pag-ingon nga ang “Siya” diha sa 1 Timoteo 3:16 mao ang Diyos mismo. Ilang gibase kini diha sa King James nga Bibliya, nga mabasa: “Ang Diyos gipadayag diha sa lawas.” Apan, unsay gipamulong sa labing kasaligan Gregong mga manuskrito? Sa tukma, ilang gigamit ang pronombre nga “Siya” imbes nga “Diyos.” Ang mga kritiko sa kasulatan karon miuyon nga ang pagdugang sa “Diyos” niining tekstoha maoy sayop sa pagkopya. Busa, ang mas bag-ong mga hubad, sama sa American Standard Version, The New English Bible, ug ang New World Translation, tukmang mabasa: ‘Siya [o, Siya nga] gipadayag diha sa lawas.’ Dili, dili ang Diyos mismo ang nagpakita “diha sa lawas.” Hinunoa, kadto ang iyang pinalanggang Anak mismo ug ang unang linalang, nga bahin kaniya si apostol Juan misulat: “Ug ang Pulong nahimong unod ug mipuyo ipon kanato, ug kita nakakita sa iyang himaya, usa ka himaya nga ang ingon iya lamang sa bugtong anak nga gikan sa Amahan; ug siya puno sa dili-takos nga kalulot ug kamatuoran.”—Juan 1:14.

“Gipadayag Diha sa Lawas”

10. (a) Sa unsang paagi ang unang bahin sa sagradong tinagoan nadayag diha sa bawtismo ni Jesus? (b) Nganong si Jesus nahimong “ang kataposang Adan”?

¹⁰ Diha sa bawtismo ni Jesus ang unang bahin sa sagradong tinagoan nadayag: Si Jesus “gipadayag diha sa lawas” ingong dinihogang Anak sa Diyos. Gibalhin ni Jehova nga Diyos ang kinabuhi sa iyang Anak gikan sa langit ngadto sa tagoangkan ni Maria aron nga si Jesus igapanganak diha sa lawas ingong usa ka hingpit nga tawo. Busa, sumala sa gipakita sa 1 Corinto 15:45-47, si Jesus nahimong ikaduha, o “kataposan,” nga Adan, usa ka hingpit tawhanon nga kalag nga katumbas gayod sa unang Adan. Alang sa unsang katuyoan? Ang 1 Timoteo 2:5, 6 nagpunting ngadto “sa kataposang Adan” ingong “usa ka tawo, si Kristo Jesus, kinsa mihalad sa iyang kaugalingon ingong katumbas nga lukat alang sa tanan.” Niining legal nga pasikaranan sa usa ka hingpit tawhanon nga halad, si Jesus ang nagpataliwala sa bag-ong pakigtugon alang sa 144,000 ka tawo nga mahimong kaubang mga manununod niya sa iyang Gingharian.—Pinadayag 14:1-3.

11. Ngadto kang kinsa gipaabot ang mga kaayohan sa halad lukat ni Jesus?

¹¹ Ang uban ba usab makabaton ug kaayohan sa sinakripisyong kamatayon ni Jesus? Sa pagkamatuod oo! Ang 1 Juan 2:2 nag-ingon nga si Jesu-Kristo “maoy halad-pasighiuli sa atong mga sala [nga mao, ang mga sala sa dinihogang mga Kristohanon sama kang Juan], apan dili lamang sa ato rang mga sala kondili sa mga sala usab sa tibuok kalibotan.” Ang mga kaayohan sa halad lukat ni Jesus sa ingon gipaabot gawas pa sa 144,000 ka dinihogang mga Kristohanon ngadto sa tibuok kalibotan sa katawhan. “Usa ka dakong panon” nga karon buhi ug ang kaliboan ka minilyon nga pagabanhawon sa Paraisong yuta makadawat sa walay kataposang kinabuhi pinasukad sa ilang pagtuo sa halad lukat ni Jesus. Bisan karon, sumala sa gitagna sa Pinadayag 7:9, 10, ang dakong panon nagalaba na sa ilang mga bisti ug gipaputi kini pinaagi sa pagtuo sa giula nga dugo sa Kordero, si Jesu-Kristo. Sila giisip nga matarong ingong mga higala sa Diyos. Uban sa kalipay, ilang nakat-onan ang nagkalainlaing bahin sa sagradong tinagoan ug nagpasundayag sa diyosnong debosyon nga uyon sa panig-ingnan ni Jesus!

Ang Ubang mga Bahin

12. Sa unsang paagi si Jesus “gipahayag nga matarong sa espiritu”?

¹² Nan, unsay ikasulti mahitungod sa ikaduhang bahin sa 1 Timoteo 3:16? Si Jesus “gipahayag nga matarong sa espiritu.” Apan sa unsang paagi? Pinaagi sa pagbanhaw ni Jehova sa iyang maghuhupot-sa-integridad nga Anak gikan sa mga patay ngadto sa espirituhanong kinabuhi. Kini katumbas ra sa pagdeklarar sa Diyos nga si Jesus matarong ug takos sa dugang binayaw nga mga katungdanan. Sumala sa pagkapahayag niini sa Roma 1:4, si Jesus “gipadayag nga Anak sa Diyos sumala sa espiritu sa pagkabalaan pinaagi sa pagbanhaw kaniya gikan sa mga patay.” Sa pagpamatuod niini, gisultihan kita ni Pedro diha sa iyang unang sulat, sa kapitulo 3, bersikulo 18: “Kay si Kristo namatay sa makausa lamang tungod sa atong mga sala, ang matarong alang sa mga dili matarong, aron sa pag-agak kanato ngadto sa Diyos, siya gipatay ingon nga unod, apan gibuhi diha sa espiritu.” Ang panig-ingnan ba ni Jesus sa pagpakitag diyosnong debosyon nag-agak kanimo ngadto sa Diyos?

13. Ang nabanhawng Jesus nagpakita ngadto sa unsang mga manulonda, ug unsang matang sa mensahe ang iyang giwali kanila?

¹³ Sa pagpadayon sa 1 Timoteo 3:16, sunod nga gihisgotan ni Pablo ang ikatulong bahin sa sagradong tinagoan, nga nag-ingon nga si Jesus “mipakita sa mga manulonda.” Kinsa kaha kining mga manulondaa? Mahitungod kang Jesus, nga karon “gibuhi diha sa espiritu,” si Pedro misulat diha sa 1 Pedro 3:19, 20: “Niining kahimtanga usab siya miadto ug nagwali sa mga espiritu nga nabilanggo, nga misupil kaniadto samtang ang pailob sa Diyos naghulat pa sa mga adlaw ni Noe.” Sumala sa Judas 6, kadtong mga espirituha maoy “mga manulonda nga wala magpabilin sa ilang orihinal nga nahimutangan ug mibiya sa ilang kaugalingong puloy-anan” sa mga langit. Sila nanagsul-ob ug mga lawas nga tawhanon aron nga magpahimulos sa gidiling pakigrelasyon sa sekso uban sa mga babaye. Sa dihang ang Baha nagpugos niadtong mga manulondaa sa pagbalik sa gingharian sa espiritu, sila gitambog ngadto sa Tartaro, usa ka kahimtang sa tuman nga kaut-otan. (2 Pedro 2:4) Ang nabanhawng Jesus nagwali kanila. Apan kadto ba maoy mensahe sa kaluwasan? Dili gayod! Hinunoa, gitunglo ni Jesus ang ilang pagkadaotan nga sukwahi sa diyosnong debosyon. Ang bisan kinsa sa katawhan sa Diyos karong adlawa nga makigdula uban sa seksuwal nga imoralidad angay magbantay sa gipahayag nga paghukom niadtong mga manulondaa!

14. Sa unsang paagi gisugdan nga “giwali taliwala sa mga nasod” si Jesus?

¹⁴ Ang ikaupat nga bahin sa 1 Timoteo 3:16 mao nga si Jesus “giwali sa kanasoran.” Sa unsang paagi kini natuman? Sa wala pa dakpa, gisultihan ni Jesus ang mga apostoles: “Sa pagkatinuod, magaingon ako kaninyo, Siya nga motuo kanako, mohimo usab sa mga buhat nga akong ginabuhat; ug labi pa unya kadako nga mga buhat ang iyang pagabuhaton, kay moadto man ako sa akong Amahan.” (Juan 14:12) Wala madugay human niadto, sa Pentekostes 33 K. P., gibubo ni Jesus ang balaang espiritu diha sa iyang mga disipulo, ug ang makapakurat nga mga balita nga “kining Jesus nga gibanhaw sa Diyos” unang giwali ngadto sa mga Hudiyo. Sa ulahi, ang mga Samarianhon midawat usab sa pulong sa Diyos ug nagpakadawat sa balaang espiritu. (Buhat 2:32; 8:14-17) Dayon, sa 36 K. P., si Pedro miwali kang Cornelio ug sa ubang mga Hentil nga nagtigom sa iyang balay. Busa, ang maayong balita mahitungod kang Jesus gisugdan nga “giwali taliwala sa mga nasod,” nga mao, taliwala sa mga dili-Hudiyo, kinsa gidihogan usab sa balaang espiritu.

15. Unsay mga pamatuod nga ang unang-siglong mga Kristohanon nahibalo kaayo sa sagradong tinagoan sa diyosnong debosyon?

¹⁵ Sumala sa gitaho sa Buhat 12:24, “ang pulong ni Jehova mitubo ug mikaylap.” Ang Buhat 17:6 nag-asoy nga sa amihanang Gresya ang mga magsusupak nanagsinggit, sama sa ilang gibuhat gihapon didto hangtod karon: “Kining mga tawhana nga nagapagubot sa kalibotan ania nanganhi usab dinhi.” Sulod sa 30 ka tuig, si Pablo nakasulat gikan sa Roma nga ang maayong balita “gikawali ngadto sa tanang mga binuhat sa silong sa langit.” (Colosas 1:23) Ang mga Kristohanon niadtong panahona nahibalo kaayo sa sagradong tinagoan sa diyosnong debosyon. Pagkamadasigon nilang gipadapat kana! Ug hinaot nga kita usab magtuon ug ipadapat kana niining kinatayoktokang adlaw sa pagsangyaw sa Gingharian!

16. Unsa ang ikalimang bahin sa sagradong tinagoan, ug unsang mga kalihokan ang napadayag niini?

¹⁶ Ingong pagsanong sa unang-siglong pagsangyaw, ang ikalimang bahin sa sagradong tinagoan sa 1 Timoteo 3:16 labi pang nadayag. Si Jesus karon “gituohan dinhi sa kalibotan.” Kini maoy resulta sa samag-Kristo nga diyosnong debosyon sa madasigong mga misyonaryo, apil kang Pablo ug Timoteo. Ilang gidala ang maayong balita ngadto sa Asia Minor ug sa Uropa, tingali hangtod sa Espanya, ug sa Silangang Aprika pinaagi sa baba sa nabawtismohang Ethiopianhon, samtang si Pedro nag-alagad sa Babilonya.

17. Nganong si Jesus gituohan sa tibuok modernong kalibotan?

¹⁷ Komosta man sa atong adlaw? Sukad sa 1919 ang dinihogang nanghibilin nagpakitag sulondang diyosnong debosyon. Kining maong mga dinihogan lig-on nga natukod diha sa patukoranan sa pagtuo nga gipahimutang ni Jesus. Ilabina sukad niadtong 1935, sila misugod sa pagpanigom sa dakong panon, kinsa malipayon sa palaabuton sa paglabang “sa dakong kasakitan” ug sa pagtagamtam sa walay kataposang kinabuhi sa paraiso sa yuta. (Pinadayag 7:9, 14) Busa, ang maayong balita nga nasentro kang Jesus gituohan sa tibuok modernong kalibotan. Diha sa diyosnong debosyon, kapin sa 3,700,000 ka mga Saksi ni Jehova karon ang nagasangyaw ug nagauswag sa tibuok globo!

18. Sa unsang paagi si Jesus “gibayaw ngadto sa himaya”?

¹⁸ Ang usa pa ka bahin sa sagradong tinagoan ang nagpabilin, ang ikaunom: Si Jesus “gibayaw ngadto sa himaya.” Sulod sa 40 ka adlaw human nga gibanhaw diha sa espiritu, si Jesus nagsul-ob ug unodnong mga lawas, ug mipakita sa iyang mga disipulo ug gisultihan sila “sa mga butang mahitungod sa gingharian sa Diyos.” Dayon siya mikayab sa langit. (Buhat 1:3, 6-9) Ang iyang pag-ampo, nga gisulat diha sa Juan 17:1-5, sa ingon gitubag: “Amahan, . . . pasidunggi ang imong anak, aron ang imong anak magpasidungog kanimo . . . Gipasidunggan ko ikaw dinhi sa kalibotan . . . Ug karon, Amahan, pasidunggi ako uban kanimo nianang kadungganan nga gihuptan ko kaniadto uban kanimo sa wala pa ang kalibotan.”

19. Unsay misugat sa pagbalik ni Jesus sa langit?

¹⁹ Pagkadakong kalipay ang miduyog sa pagbalik ni Jesus sa langit! Sayo pa kaayo niini, sa dihang gitukod ni Jehova ang kalibotan, “ang tanang mga anak sa Diyos misugod sa pagsinggit sa kalipay.” (Job 38:7) Labi pa nga nalipay ang panon sa mga manulonda sa pagdawat pag-usab sa ilang taliwala sa maunongong Manlalaban sa pagkasoberano ni Jehova!

20. Nganong napanunod ni Jesus ang halangdong ngalan, ug unsay iyang gihimo samtang dinhi pa sa yuta?

²⁰ Diha sa Hebreohanon 1:3, 4, si Pablo miingon sa madaogong Jesus: “Sa nahimo na niya ang pagpanghinlo sa atong mga sala siya milingkod sa tuong kamot sa Halangdon sa kahitas-an. Busa nahimo siyang labaw pa sa mga manulonda, kay nadawat man niya ang ngalan nga labaw pa ka halangdon kay sa ilaha.” Si Kristo nakadawat nianang ngalana tungod sa iyang kadaogan batok sa pagkadili-matarong. Kining Anak sa Diyos sa pagkamatuod nagpasiga sa dalan sa diyosnong debosyon dinhi sa yuta. Siya usab naghatag panig-ingnan alang sa uban pa nga makadawat ug kinabuhing walay kataposan. Uban sa pagbayaw kang ­Jesus diha sa tuo nga kamot sa Diyos sa langit, ang sagradong tinagoan niining diyosnong ­debosyon gibutyag uban ang tanang bahin niini.

Pagkat-on sa Sagradong Tinagoan sa Diyosnong Debosyon

“Bisan si Kristo miantos alang kaninyo, nagbilin kaninyog usa ka panig-ingnan aron suod ninyong sundon ang iyang mga tunob.”—1 PEDRO 2:21.

1. Unsa ang katuyoan ni Jehova mahitungod ‘sa sagradong tinagoan sa diyosnong debosyon’?

“ANG sagradong tinagoan niining diyosnong debosyon” dili na usa ka tinagoan! (1 Timoteo 3:16) Pagkalahi kini gikan sa mga tinagoan sa bakak nga relihiyon, sama sa misteryosong Trinidad, nga nagpabiling tinagoan! Walay usa ang nakasabot kanila. Apan, katuyoan ni Jehova nga ang sagradong tinagoan nga gibutyag diha sa pagkatawo ni Jesu-Kristo angayng hatagan sa kinadak-ang posibilidad nga publisidad. Si Jesus mismo nahimong talagsaong panig-ingnan sa usa ka madasigong magmamantala sa Gingharian sa Diyos. Kita makakat-on ug dako gikan sa iyang mensahe ug paagi sa pagsangyaw, ingon sa atong makita karon.

2. Nganong ang pagpang-alagad ni Jesus nahauna kay sa lukat? (Mateo 20:28)

² Niining higayona, atong hatagan ug dugang pagtagad si Jesus nga “gipadayag diha sa lawas.” (1 Timoteo 3:16) Sa Mateo 20:28 mabasa nato nga si Jesus “mianhi, dili aron siya pagaalagaron, kondili sa pag-alagad ug sa paghalad sa iyang kinabuhi ingong usa ka lukat alang sa daghan.” Kini ang naghimo sa iyang pagpang-alagad nga una kay sa lukat. Ngano man? Buweno, balik sa Eden gilalis sa malalangong Bitin ang may katungod nga pagkasoberano ni Jehova ibabaw sa katawhan, ug nagpasabot nga ang kalalangan sa Diyos depektoso ug nga ubos sa pagsulay walay tawo ang makapabiling maunongon sa Labing Hataas. (Itandi ang Job 1:6-12; 2:1-10.) Ang walay ikasaway nga ministeryo ni Jesus ingong usa ka hingpit nga tawo, “ang kataposang Adan,” nagpakita nga ang maghahagit nga si Satanas maoy usa ka daotang bakakon. (1 Corinto 15:45) Dugang pa, bug-os nga gipamatud-an ni Jesus ang iyang kuwalipikasyon sa pag-alagad sa Diyos ingong “Pangulong Ahente ug Manluluwas” ug sa “paghukom sa ginapuy-ang yuta diha sa pagkamatarong,” alang sa kabayawan sa pagkasoberano ni Jehova.—Buhat 5:31; 17:31.

3. Sa unsang paagi bug-os nga natubag ni Jesus ang hagit ni Satanas?

³ Bug-os nga natubag ni Jesus ang mabiaybiayong hagit ni Satanas! Sa tibuok kasaysayan, walay tawo niining yutaa ang nakaalagad sa Diyos nga debotado kaayo—bisan pa sa mga pagtamay, mga pagkastigo, ug mga pagsakit sa pisikal ug sa mental. Giantos ni Kristo ang mapasipalahong mga pagbiaybiay ingon nga Anak sa Diyos. Latas niining tanan—bisan sa madagmalon ug makauulaw nga kamatayon—siya malig-on, dili-matarog sa pagkamaunongon ngadto sa iyang Amahan. Diha sa Filipos 2:8, 9, si Pablo misulat nga tungod kay si Jesus nagmasinugtanon man ‘hangtod sa kamatayon, oo, kamatayon diha sa kahoy sa pagsakit, ang Diyos nagbayaw kaniya ug naghatag kaniya sa ngalan nga labaw sa tanang ubang ngalan.’ Gibutyag ni Jesus si Satanas ingong malala nga bakakon!

4. Nganong si Jesus nakaingon kang Pilato nga siya mianhi sa kalibotan aron sa panghimatuod sa kamatuoran?

⁴ Busa, sa kataposan sa pipila lamang ka tuig sa subsob nga pagsangyaw, si Jesus lig-ong nakapamatuod ngadto kang Poncio Pilato: “Sumala sa giingon mo nga ako hari. Alang niini ako nagpakatawo, ug alang niini mianhi ako sa kalibotan, aron magapanghimatuod ako sa kamatuoran. Ang tanang dapig sa kamatuoran magapatalinghog sa akong tingog.” (Juan 18:37) Gipasundayag ni Jesus ang hataas kaayo nga diyosnong debosyon sa pagmantala sa kamatuoran sa Gingharian sa Diyos sa tibuok Palestina. Iyang gibansay ang iyang mga disipulo aron mahimong masibutong mga magwawali usab. Pagkamakapadasig sa iyang panig-ingnan kanato sa pagsunod sa iyang mga tunob karong adlawa!

Pagkat-on Gikan sa Atong Sulondan

5. Unsay atong makat-onan bahin sa diyosnong debosyon pinaagi sa maikagong pagtutok kang Jesus?

⁵ Pinaagi sa atong diyosnong debosyon sa pagbuhat sa kabubut-on ni Jehova, hinaot nga kita usab makapamatuod nga bakakon ang Yawa. Bisan unsa pang mga pagsulay ang atong antoson, wala gayoy makatupong sa mga pag-antos ug mga pagpakaulaw ang nahiagoman ni Jesus. Busa, angayng magtuon kita gikan sa atong Sulondan. Sama sa giawhag kanato sa Hebreohanon 12:1, 2, hinaot nga dalaganon nato nga malahutayon ang lumba nga atong ginaapilan “samtang kita maikagong nagatutok sa Pangulong Ahente ug Maghihingpit sa atong pagtuo, si Jesus.” Lahi kang Adan, kinsa napakyas sa dihang gisulayan sa diyosnong debosyon, si Jesus nahimo nga mao ang usa ka tawo sa yuta nga hingpit nga nakalabang sa tanang mga pagsulay. Hangtod sa kamatayon, siya nakapamatuod nga “maunongon, walay sala, walay lama, linain gikan sa mga makasasala.” (Hebreohanon 7:26) Diha sa walay ikasaway nga pagkamaunongon, siya nakaingon sa iyang mga kaaway: “Kinsa ba kaninyoy makapamatuod nga ako nakasala?” Gisumbalik ni Jesus ang hagit ni Satanas, nga nag-ingon: “Ang magmamando niining kalibotana . . . walay gahom kanako.” Ug sa gitapos ang iyang kataposang pakigpulong sa iyang mga disipulo sa wala pa ang pagbudhi ug pagdakop kaniya, siya miingon kanila: “Magmaisogon! Gidaog ko na ang kalibotan.”—Juan 8:46; 14:30; 16:33.

6. (a) Nganong si Jesus nahibalo kon unsang matanga sa pahulay ang gikinahanglan sa katawhan? (b) Ngadto sa unsang sukod nga gipasundayag ni Jesus ang diyosnong kahadlok?

⁶ Ingong tawo dinhi sa yuta, naeksperyensiyahan ni Jesus ang kahulogan sa pagkahimong tawo, “nga ubos lamag diyutay kay sa mga manulonda.” (Hebreohanon 2:7) Siya sinati sa tawhanong mga kahuyangan ug busa kuwalipikado kaayo nga mag-alagad ingong Hari ug Maghuhukom sa katawhan sa usa ka libo ka tuig. Kining Anak sa Diyos, kinsa miingon, “Umari kanako, kamong tanan nga nabudlayan ug nabug-atan, ug papahulayon ko kamo,” nasayod kon unsang matanga sa pahulay ang gikinahanglan sa katawhan. (Mateo 11:28) Ang Hebreohanon 5:7-9 nagaingon kanato: “Sa mga adlaw sa tawhanon niyang kinabuhi si Kristo nagtanyag ug mga pag-ampo ug usab mga pangamuyo ngadto sa Usa nga arang makaluwas kaniya gikan sa kamatayon, uban ang makusog nga mga pagsinggit ug paghilak, ug siya gidungog tungod sa iyang diyosnong kahadlok. Ug bisan tuod siya Anak, siya nakakat-on sa pagkamasinugtanon pinaagi sa mga butang nga iyang giantos; ug sa nahimo siyang hingpit [sa pagkamasinugtanon] siya nahimong tuboran sa dayong kaluwasan alang sa tanang magasugot kaniya.” Si Jesus wala matarog, bisan tuod nga miantos siya hangtod sa punto nga naeksperyensiyahan niya ang kasakit sa tawhanong kamatayon sa pagdawat sa ‘samad sa tikod’ gikan sa madumtanong Bitin. (Genesis 3:15) Sama kang Jesus, hinaot nga atong ipasundayag kanunay ang diyosnong kahadlok, bisan hangtod sa kamatayon kon gikinahanglan, masaligon nga si Jehova nga Diyos mopatalinghog sa atong mga pangamuyo ug motagana kanatog kaluwasan.

‘Pagkinabuhi Ngadto sa Pagkamatarong’

7. Sumala sa 1 Pedro 2:21-24, unsang panig-ingnan ang gibilin ni Jesus alang kanato, ug sa unsang paagi ang iyang dalan nakaapekto kanato?

⁷ Samtang gipadayag diha sa lawas, maunongong gibutyag ni Jesus ang sagradong tinagoan sa diyosnong debosyon. Atong mabasa sa 1 Pedro 2:21-24: “Bisan si Kristo miantos alang kaninyo, nagbilin kaninyog usa ka panig-ingnan aron suod ninyong sundon ang iyang mga tunob. Siya walay nahimong kasal-anan, walay hikaplagang limbong diha sa iyang baba. Sa gipasipalahan siya, wala siya mobalos sa pagpasipala. Sa nag-antos siya, wala siya manghulga, kondili gisalig lamang niya ang tanan sa usa nga nagapanghukom sa pagkamatarong. Siya ang mipas-an sa atong mga sala diha sa iyang kaugalingong lawas diha sa kahoy, aron nga kita mamatay ngadto sa sala ug mabuhi ngadto sa pagkamatarong.” Samtang atong palandongon ang kinabuhi ni Jesus, pagkamakapadasig niini alang kanato sa pagpangita sa diyosnong debosyon, ug sa paghupot sa integridad, ug mabuhi ngadto sa pagkamatarong sama sa iyang gibuhat!

8. Sa unsang paagi kita mabuhi ngadto sa pagkamatarong sama sa gibuhat ni Jesus?

⁸ Si Jesus tinuod nagkinabuhi sa pagkamatarong. Ang Salmo 45:7 nagtagna bahin kaniya: “Gihigugma mo ang pagkamatarong ug gidumtan mo ang pagkadaotan.” Gipadapat kadtong mga pulonga kang Jesus, si apostol Pablo miingon sa Hebreohanon 1:9: “Gihigugma mo ang pagkamatarong ug gidumtan mo ang pagkamalapason.” Sumala sa kahayag sa atong pagsabot sa sagradong tinagoan niining diyosnong debosyon, hinaot nga mahisama kita kang Jesus nga kanunay nahigugma sa pagkamatarong ug nagadumot sa daotan. Sa Kristohanong moral, nga grabeng giatake karong adlawa sa kalibotan ni Satanas, ug sa tanan natong mga pakiglabot uban niadtong anaa sa sulod ug sa gawas sa organisasyon sa Diyos, magmasingkamoton kita nga magkinabuhi sa pagkamatarong, nga magalaban sa matarong nga mga prinsipyo ni Jehova. Ug magpadayon kita sa pagkombira sa Pulong sa Diyos aron makabaton sa diyosnong pagsabot nga gikinahanglan kaayo aron makasukol sa Yawa ug sa iyang mga laang!

9. Unsay nakadugang sa kasibot ni Jesus sa ministeryo, ug kini naglangkit ug unsa mahitungod sa bakak relihiyosong mga magbalantay?

⁹ Adunay dugang nakatukbil kang Jesus nga magmasiboton sa iyang ministeryo. Unsa man kadto? Diha sa Mateo 9:36 atong mabasa: “Ug sa pagkakita niya sa panon siya naluoy kanila, kay sila gipanitan ug nagkatibulaag sama sa mga karnero nga walay magbalantay.” Busa si Jesus “misugod sa pagtudlo kanila sa daghang mga butang.” (Marcos 6:34) Kay kinahanglan, kini naglakip sa pagyagyag sa pagkadaotan ug pagkamalapason sa mga magbalantay sa bakak nga relihiyon. Sumala sa Mateo 15:7-9, si Jesus miingon sa pipila kanila: “Kamong mga maut, tukma kaayo ang tagna ni Isaias mahitungod kaninyo, sa iyang pag-ingon, ‘Kining mga tawhana nagapasidungog kanako pinaagi sa ilang mga ngabil, apan halayo kanako ang ilang mga kasingkasing gikan kanako. Kawang lamang ang ilang pagsimba kanako, tungod kay ilang gitudlo ingon nga mga doktrina ang mga balaod nga hinimo lamang sa tawo.’”

Usa ka Dulumtanang Misteryo

10. Karong adlawa, “ang misteryo sa kalapasan” nagpunting kang kinsa, ug sa unsa nga sila sad-an?

¹⁰ Sama nga gisaway ni Jesus ang mga lider sa bakak nga relihiyon, sa ingon dumtan usab nato karon ang misteryo nga lahi kaayo sa sagradong tinagoan sa diyosnong debosyon. Diha sa 2 Tesalonica 2:7, gitawag kini ni Pablo nga “ang misteryo sa kalapasan.” Kadto maoy usa ka misteryo sa unang siglo K. P. tungod kay kadto wala ibutyag bisag dugay nang nangamatay ang mga apostoles. Karong adlawa, nagpunting kini diha sa klero sa Kakristiyanohan, nga mas interesado sa politika kay sa pagmantala sa maayong balita sa matarong nga Gingharian sa Diyos. Ang pagminaut kaylap diha kanila. Ang mga ebanghelisador sa telebisyon sa mga sekta sa Protestante sa Kakristiyanohan maoy dayag nga pananglitan: mga witwitan kinsa nagapanapi sa ilang mga panon, nagtukod ug multimilyong-dolyar nga mga imperyo, nakig-uban sa mga pampam, magpahilakhilak kon sila mismo mayagyag, ug sigeng nagapangayog kuwarta, kanunayng dugang kuwarta. Ang Batikano sa Romano Katolisismo nagpakitag sama ka ngil-ad nga hulagway, uban sa walay-prinsipyong mga kaanib sa politika, salingkapaw nga pagpagawal, ug hiwi nga mga paagi sa bangko.

11. Unsa unyay mahitabo sa mga klero sa Kakristiyanohan ug sa tanan sa Dakong Babilonya?

¹¹ Dili ikahibulong nga ang klero nga matang sa Kakristiyanohan maila nga mao “ang tawo sa kalapasan”! (2 Tesalonica 2:3) Kining dakong bahin sa samag-bigaon nga Dakong Babilonya bug-os nga igabutyag ug pagalaglagon, duyog sa tanang nahibilin sa bakak nga relihiyon. Sama sa atong mabasa sa Pinadayag 18:9-17, ang mga politiko ug mga magpapatigayon (ug ang ilang mga magbabangko) managbakho unya: “Alaot, alaot, ikaw nga bantogang siyudad!” Ang Dakong Babilonya ug ang iyang mga misteryo pagahuboan, nga lahi kaayo sa tanan nga nagadan-ag sa sagradong tinagoan sa diyosnong debosyon.

12. Ang paghigugma ni Jesus sa pagkamatarong mitultol kaniya sa pagbuhat sa unsa?

¹² Ang paghigugma ni Jesus sa pagkamatarong ug pagdumot sa pagkadaotan mitultol kaniya sa bug-os nga pagkugi alang sa matuod nga pagsimba. Sa iyang unang pagduaw sa Jerusalem ingong dinihogang Anak sa Diyos, gibugaw ni Kristo ang mga magpapatigayon ug ang mga tigbaylog kuwarta gawas sa templo, nga nagaingon: “Kuhaa ninyo dinhi kining mga butanga! Ayaw ninyo himoang tiyanggihan ang balay sa akong Amahan!” (Juan 2:13-17) Sa ulahi nga pagduaw sa templo, giingnan ni Jesus ang masinupakong mga Hudiyo: “Kamo gikan sa inyong Amahan nga mao ang Yawa, ug ang inyong tinguha mao ang pagtagbaw sa mga pangibog sa inyong amahan. Siya maoy usa ka mamumuno sukad pa sa sinugdan, ug siya walay labot sa kamatuoran kay ang kamatuoran wala man diha kaniya. Inigpamakak niya, siya magasulti tukma sa iyang kaugalingong kinaiya, kay siya bakakon man ug mao ang amahan sa mga bakak.” (Juan 8:44) Pagkadako sa kaisog ang gipakita ni Jesus ngadto sa mga relihiyonista sa direktang pagsulti kanila nga sila mga bakakon ug mga anak sa Yawa!

13. (a) Diin ilabina gipahayag ni Jesus ang iyang kasilag sa pagkamalapason? (b) Nganong ang malapasong mga klero takos sa samang paghukom nga gipahayag ni Jesus sa mga eskriba ug mga Pariseo?

¹³ Ang kasilag ni Jesus sa pagkamalapason maayo kaayong pagkapahayag kay sa iyang masakit nga mga pulong sa pagsaway sa samag-bitin nga mga eskriba ug mga Pariseo, ingon sa girekord sa Mateo kapitulo 23. Didto iyang gipahayag ang pito ka pilong “kaalaotan,” nga nagtandi kanila nga ‘pinaputi nga mga lubnganan—nga puno sa tanang matang sa kahugawan, pagminaut, ug pagkamalapason.’ Pagkadako sa tinguha ni Jesus sa pagluwas sa dinaogdaog nga katawhan gikan nianang pagkamalapason! “Jerusalem, Jerusalem,” siya mipatugbaw, “sa makadaghan gipangandoy ko ang pagtigom unta sa imong mga anak, maingon sa himungaan nga nagatigom sa iyang mga piso ilalom sa iyang mga pako! Apan nagadumili kamo. Tan-awa, mabiniyaan ang inyong balay.” (Bersikulo 37, 38) Ang malapasong mga klero sa atong adlaw takos sa samang paghukom tungod kay, sa mga pulong sa 2 Tesalonica 2:12, ‘sila wala magatuo sa kamatuoran apan nahimuot sa pagkadili-matarong.’ Ang ilang kalapasan mao ang mismong katugbang sa diyosnong debosyon nga maunongong gipasundayag ni Jesus samtang dinhi pa sa yuta.

Pagmantala sa mga Paghukom sa Diyos

14. Ang apresasyon alang sa sagradong tinagoan sa diyosnong debosyon angay moagda kanato sa pagbuhat ug unsa?

¹⁴ Ang atong apresasyon alang sa sagradong tinagoan sa diyosnong debosyon angay motultol kanato kanunay sa suod nga pagsunod sa mga tunob ni Jesus. Sama kaniya, kita angay magmasibuton sa pagmantala sumala sa gihubit sa Isaias 61:2 ingong “ang tuig sa maayong kabubut-on uban kang Jehova ug sa adlaw sa pagpanimalos sa atong Diyos.” Ug hinaot nga kita madasigong magabuhat sa atong bahin “sa paglipay niadtong tanang nagabalata.” Sama sa panahong dinhi pa si Jesus sa yuta, nagkinahanglag kaisog alang kanato karong adlawa sa pagmantala sa mga paghukom sa Diyos, apil ang kusganong mga mensahe sa prangkang mga artikulo sa Ang Bantayanang Torre ug sa librong Pinadayag—Ang Hingpit nga Sangkoanan Niini Haduol Na! Kita angayng mosangyaw nga may kaisog ug sa mataktikanhon, ang atong mga sinultihan “tinimplahan ug asin” aron nga lamian alang kanilang may kiling sa pagkamatarong. (Colosas 4:6) Kay nakakat-on gikan sa panig-ingnan ni Jesus sa diyosnong debosyon, hinaot nga kita makataho sa tinudlong panahon nga atong natapos ang buluhaton nga gihatag ni Jehova kanato nga pagabuhaton.—Mateo 24:14; Juan 17:4.

15. Kon bahin sa sagradong tinagoan sa Diyos, unsay nahitabo sukad niadtong 1914?

¹⁵ Samtang gipadayag diha sa lawas, pagkamaayong Sulondan si Jesus! Pagkatin-aw nga natuman diha kaniya ang sagradong tinagoan sa diyosnong debosyon! Pagkamaisogon nga gibayaw niya ang ngalan ni Jehova! Ug pagkakatingalahan nga gigantihan si Jesus sa iyang Amahan tungod sa iyang paghupot-sa-integridad nga dalan! Apan aduna pay labaw sa sagradong tinagoan sa Diyos. Sukad niadtong 1914 kita nagkinabuhi na “sa mga adlaw sa Ginoo.” (Pinadayag 1:10) Sumala sa gipamulong sa Pinadayag 10:7, kini mao ang panahon nga ‘ang sagradong tinagoan sa Diyos sumala sa maayong balita pagataposon.’ Ang langitnong mga tingog karon nagamantala na: “Ang gingharian sa kalibotan nahimo nang gingharian sa atong Ginoo [Jehova] ug sa iyang Kristo, ug siya magamando ingong hari sa walay kataposan.” (Pinadayag 11:15) Gipalingkod ni Jehova ang Mesiyanikong Hari, si Jesu-Kristo, sa iyang mahimayaong trono aron mahimong kaubang-magmamando uban Kaniya!

16. Sa unsang paagi ang bag-ong naentronong Hari, si Jesu-Kristo, nagpakita dayon sa iyang pagtamod sa pagkadiyosnon didto sa langit?

¹⁶ Ingong kaubang-magmamando uban sa Diyos sa bag-ong natawong Gingharian, si Jesus gitawag usab ug Miguel (nagkahulogan, “Kinsay Sama sa Diyos?”). Walay rebelde ang molampos nga mahisama sa Diyos, ug gipasundayag dayon kini sa bag-ong naentronong Hari pinaagi sa pagtambog sa orihinal nga Bitin, si Satanas, ug sa iyang mga manulonda dinhi sa yuta. (Pinadayag 12:7-9) Oo, si Jesus may pagtamod sa pagkadiyosnon sa langit, sama sa iyang pagpasundayag sa diyosnong debosyon samtang dinhi pa sa yuta. Ang gihimayang Jesu-Kristo dili mopahulay hangtod nga iyang malaglag ang bakak nga relihiyon ug bug-os mahanaw ang organisasyon ni Satanas, makita man ug dili-makita.

17. Sukad sa 1914, unsay nahitabo ingong katumanan sa Mateo 25:31-33?

¹⁷ Sukad sa 1914 ang katumanan sa kaugalingong tagna ni Jesus sa Mateo 25:31-33 madan-agong nagbanwag sa sagradong tinagoan sa Diyos. Didto si Jesus miingon: “Ug inig-abot na sa Anak sa tawo diha sa iyang himaya, ug sa tanang manulonda uban kaniya, siya molingkod diha sa iyang mahimayaong trono. Ug sa iyang atubangan pagatapukon ang tanang kanasoran, ug iyang pagalainon ang katawhan gikan sa usa ug usa, maingon sa magbalantay sa mga hayop nga magalain sa mga karnero gikan sa mga kanding. Ug ang mga karnero iyang pagapinigon sa tuo, apan ang mga kanding anha sa iyang wala.” Gikan sa iyang bantaaw nga dapit sa mga langit, kining mahimayaong Hari, Maghuhukom, ug Maglalaban sa diyosnong debosyon manimalos, una diha sa tawo sa kalapasan ug sa uban nga mga pundok sa Dakong Babilonya, ug unya diha sa tanang nahibilin nga mga elemento ug sa samag-kanding nga mga tigpaluyo sa daotan yutan-ong organisasyon ni Satanas. Si Satanas unya igatambog ngadto sa bung-aw. (Pinadayag 20:1-3) Apan ang samag-karnero nga “mga matarong” mangadto sa kinabuhing walay kataposan. (Mateo 25:46) Hinaot nga ang imong pagpangita sa diyosnong debosyon mopahimutang kanimo nianang matarong nga grupo!

18. Unsa ang atong malipayong pribilehiyo maylabot sa sagradong tinagoan sa diyosnong debosyon?

¹⁸ Ang Pinadayag 19:10 nagdasig kanato sa “pagsimba sa Diyos.” Ug ngano? Ang kasulatan nagpadayon: “Kay ang pagpanghimatuod ni Jesus maoy nagadasig sa propesiya.” Daghan kaayong dinasig nga mga tagna sa karaang mga panahon nagpanghimatuod kang Jesus! Ug samtang nagakatuman kining mga tagnaa, ang sagradong tinagoan sa Diyos mitin-aw kaayo. Busa, malipayon kita nga nasayod sa sagradong tinagoan niining diyosnong debosyon nga gipersonipikar diha kang Jesus. Pagkatagsaon sa atong pribilehiyo kon mosunod kita sa iyang mga tunob ingong mapainubsanong mga ministro sa Gingharian sa Diyos. Oo, kadungganan nato ang pakig-ambit sa pagsabot ug sa pagmantala sa tanang sagradong tinagoan sa Diyos sumala sa maayong balita!