PUBLIKONG PAGBASA

Ang pagbasa sa makusog aron makadungog ang usa ka pundok sa mga tawo. Sa Hudiyohanong mga sinagoga dihay publikong pagbasa sa usa ka bahin sa Balaod sa panahon sa Igpapahulay. Sa susama, sa mga tigom sa Kristohanong kongregasyon, dihay publikong pagbasa sa inspiradong Kasulatan.

Ang Gregong pulong nga a·na·gi·noʹsko, nga sa panguna nagkahulogang “nahibaloan pag-ayo” (2Co 1:13), gihubad nga “basa” o “nagbasa sa makusog” ug kini gigamit maylabot sa pribado ug publikong pagbasa sa Kasulatan. (Mat 12:3; Luc 4:16; Buh 8:28; 13:27) Ang nombre nga a·naʹgno·sis gihubad nga “publikong pagbasa.”​—Buh 13:15; 1Ti 4:13.

Ang publikong pagbasa maoy usa ka hinungdanong paagi nga gigamit ni Jehova aron sa pagtudlo ug sa pag-edukar sa iyang gipakigsaaran nga katawhan maylabot sa iyang mga katuyoan ug mga kinahanglanon. Ang maong pagbasa unang gihisgotan diha sa Exodo 24:​7, diin gibasa ni Moises “ang basahon sa pakigsaad” sa igdulungog sa tibuok nga katawhan. Busa, ang mga Israelinhon nakasabot pag-ayo sa ilang pagpakigsaad kang Jehova sa pagtuman sa Balaod. Pipila lamang ka kopya sa Kasulatan ang mabatonan sa mga adlaw sa karaang Israel; busa ang mga saserdoteng Levihanon gisugo: “Pagabasahon mo kining balaod atubangan sa tibuok nga Israel sa ilang igdulungog.” Gisugo sila ni Moises sa pagbasa sa Balaod atubangan sa tibuok katawhan, batan-on ug tigulang, lalaki ug babaye, Israelinhon ug langyawng pumoluyo, sa matag tuig nga Igpapahulay panahon sa Pista sa mga Balongbalong.​—Deu 31:9-12.

Human makasulod ang Israel sa Yutang Saad, gibasa sa makusog ni Josue ngadto sa katawhan “ang tanang pulong sa balaod, ang panalangin ug ang maldisyon.” (Jos 8:33-35) Si Haring Jehosapat nagpadalag mga prinsipe, mga Levihanon, ug mga saserdote sa pagtudlo diha sa mga siyudad sa Juda (2Cr 17:7-9), ug ang maong pagtudlo sa walay duhaduha naglakip sa publikong pagbasa. Kasiglohan sa ulahi gibasa ni Josias sa igdulungog sa tibuok nga katawhan “ang basahon sa balaod ni Jehova nga gihatag pinaagi sa kamot ni Moises” nga nakaplagan ni Hilkias nga saserdote sa panahon sa pag-ayo sa templo, sa walay duhaduha ang orihinal nga basahon sa Balaod nga gisulat ni Moises. (2Ha 23:2; 2Cr 34:14) Kini miresulta sa paghinlo sa tibuok nasod gikan sa pagsimba sa demonyo. Human makabalik gikan sa pagkadestiyero, si Esdras, uban sa pagpaluyo ni Gobernador Nehemias, mibasa sa Balaod ngadto sa katawhan sukad sa pagbanagbanag hangtod sa kaudtohon. Gawas sa pagbasa, kini gipatin-aw, o gipasabot ang kahulogan.​—Neh 8:​3, 8; tan-awa ang HEBREOHANON, II (Kanus-a Mikunhod ang Paggamit sa Hebreohanong Pinulongan?).

Sa mga Sinagoga. Nabatasan ni Jesus ang publikong pagbasa diha sa sinagoga sa panahon sa Igpapahulay; dayon iyang gitabangan ang iyang mga mamiminaw pinaagi sa pagpatin-aw sa iyang gibasa. (Luc 4:16) Gibuhat kini sulod sa daghang katuigan. “Kay sukad sa karaang kapanahonan aduna nay nagmantala kang Moises sa siyudad ug siyudad, tungod kay ang iyang basahon ginabasa sa makusog diha sa mga sinagoga sa matag igpapahulay.” (Buh 15:21) Ang maong publikong pagbasa sa Balaod ug sa Mga Manalagna maoy batasan sa sinagoga ug, sumala sa rabbinikong mga tinubdan, nagsunod niini nga programa: Una, basahon ang Shema, o ang katumbas sa pagpahayag sa mga Hudiyo sa ilang pagtuo, nga gikuha gikan sa Deuteronomio 6:4-9; 11:13-21 ug Numeros 15:37-41. Sunod basahon ang usa ka bahin sa Torah o Balaod, ang Pentateuko, nga sa daghang kahimtang dangtan ug usa ka tuig. Sa kataposan, basahon ang mga kinutlo gikan sa Mga Manalagna o mga haftarah, nga lakipan sa nahiangay nga pagpatin-aw. Sa pagkatapos sa publikong pagbasa, ihatag ang usa ka pakigpulong o tambag. Human sa samang publikong pagbasa didto sa sinagoga sa Antioquia sa Pisidia, si Pablo gidapit nga mamulong ug siya mihatag ug pakigpulong o pagtambag ug pagdasig ngadto niadtong nagkatigom.​—Buh 13:15.

Sa Kristohanong Kongregasyon. Sa unang siglo, pipila lamang ang adunay mga kopya sa daghang linukot nga basahon sa Bibliya, nga tungod niana gikinahanglan ang publikong pagbasa. Si apostol Pablo nagsugo nga ang iyang mga sulat basahon sa publiko diha sa mga panagkatigom sa Kristohanong mga kongregasyon ug nagsugo nga kini ibaylo sa iyang mga sulat ngadto sa ubang mga kongregasyon aron kini usab mabasa. (Col 4:16; 1Te 5:27) Gitambagan ni Pablo ang batan-on nga Kristohanong magtatan-aw nga si Timoteo nga magmakugihon “sa publikong pagbasa, sa pagpanambag, sa pagpanudlo.”​—1Ti 4:13.

Ang publikong pagbasa angayng himoon uban ang pagkalarino. (Hab 2:2) Sanglit ang publikong pagbasa maoy aron maedukar ang uban, ang usa ka publikong magbabasa kinahanglang bug-os nga nakasabot sa iyang gibasa ug tin-awng nakasabot sa intensiyon sa magsusulat, nga mag-amping sa pagbasa aron malikayan nga makahatag ug sayop nga ideya o impresyon ngadto sa mga mamiminaw. Sumala sa Pinadayag 1:​3, kadtong nagabasa sa makusog sa maong tagna, ingon man usab kadtong nagapatalinghog sa mga pulong ug nagatuman niini, magmalipayon.