Gihimo Nila Kini Tungod sa Gugma
USA ka matinumanon, maabiabihong biyuda sa Canada nagpadako ug upat ka batan-ong anak babaye ingong matuod nga mga Kristohanon. Ang mga ansiano sa kongregasyon nakamatikod nga ang iyang balay nagkinahanglag dako nga pag-ayo. Siya walay kuwarta ni maantigo siya sa pagtrabaho niini sa iyang kaugalingon. Busa sumala sa prinsipyo nga gihatag diha sa 1 Timoteo 5:9, 10, ang mga ansiano maalamong mihikay sa pagbuhat sa trabaho alang kaniya. Sa unsang paagi?
Ang mga plano gihikay alang sa biyuda ug sa iyang mga anak nga malayo sa balay sulod sa lima ka adlaw. Kapin sa 80 diha sa kongregasyon ang mihatag sa ilang kinasingkasing nga tabang, miamot ug mga materyales, kuwarta, ug panahon. Sa dihang nakalakaw ang pamilya, gihugopan sa maikagong mga trabahante ang balay samag mga buyog. Ang sulod sa tibuok balay giayo. Ang mga bungbong gitapakan ug gipintalan. Ang mga salog gilihaan ug gipasinaw. Gitaod ang bag-ong baldosa sa salog ug alpombra. Ang tanang gikinahanglang elektrikal ug mga suga giilisan. Bisan ang daan nang mga muwebles gipulihan. Ang pag-ayo sa tibuok balay natapos sa lima lamang ka adlaw!
Ang atmospera sa kalipay ug pagtrabaho nakapukaw sa pagtagad sa kasilinganan. Usa ka 80-anyos nga silingan natandog kaayo sa mga paningkamot sa mga Saksi nga iyang gidala ang iyang brotsa sa pintal ug miinsister sa pagtabang. Ang amo sa usa sa mga boluntaryo miamot ug tabon sa bentilasyon alang sa lutoan sa kusina. Laing amo miamot ug bag-ong despinsilya. Usa ka tawo nakadayeg kaayo nga siya buot nga mokat-on pag dugang bahin sa mga Saksi ni Jehova. Maikagon niyang gidawat ang publikasyong Ikaw Mabuhing Walay Kataposan sa Paraiso sa Yuta.
Dayag kaayong makita ang nakurat nga mga panagway sa biyuda ug sa iyang mga anak nga babaye sa ilang paghiuli. Mitubod ang daghang luha, mga katawa, ug mga halog—usa ka dili makalimtang yugto sa Kristohanong gugma ug pagbati. Sa pagkatinuod, ang tiunayng gugma ug kabalaka alang sa nanginahanglang mga sakop sa kongregasyon maoy usa ka timaan sa matuod nga Kristiyanidad, kay si Pablo nagsulat: “Nan, sa pagkatinuod, samtang kita may panahong paborable alang niini, buhaton nato ang maayo ngadto sa tanan, apan ilabina kanilang iglabot nato sa pagtuo.”—Galacia 6:10.