Kapitulo Onse

“Magpadayon sa Pagpangita Pag-una sa Gingharian”

 1. (a) Nganong giawhag ni Jesus ang iyang mga tigpaminaw nga unahon pagpangita ang Gingharian? (b) Unsang pangutana ang angay natong isukna sa atong kaugalingon?

KAPIN sa 1,900 ka tuig kanhi sa usa ka diskurso sa Galilea, giawhag ni Jesus ang iyang mga tigpaminaw: ‘Nan, magpadayon sa pagpangita pag-una sa gingharian ug sa pagkamatarong sa Diyos.’ Apan unsay hinungdan sa pagkadinalian niana? Dili ba ang panahon sa pagdawat ni Kristo sa gahom sa Gingharian dangtan pag daghang siglo? Oo, apan ang Mesiyanikong Gingharian maoy gamiton ni Jehova sa pagbayaw sa iyang pagkasoberano ug pagtuman sa iyang dakong katuyoan alang sa yuta. Bisan kinsa nga sa tinuoray nakasabot sa kahinungdanon nianang mga butanga magauna gayod sa Gingharian diha sa iyang kinabuhi. Kon tinuod kana sa unang siglo, unsa pa kaha karon, karon nga si Kristo naentrono na ingong Hari! Busa ang pangutana mao, Ang akong paagi sa kinabuhi nagpakita ba nga ako nagauna gayod sa Gingharian sa Diyos?​—Mateo 6:33.

 2. Unsang mga butanga ang maikagong gipangagpas sa mga tawo sa kinatibuk-an?

² Sa pagkatinuod, milyonmilyong tawo sa tibuok kalibotan karon nagapangita pag-una sa Gingharian. Gipakita nila ang ilang pagpaluyo sa pagmando sa Gingharian pinaagi sa pagsentro sa ilang kinabuhi sa pagbuhat sa kabubut-on ni Jehova, nga nagpahinungod sa ilang kaugalingon ngadto kaniya. Sa laing bahin, ang kinabag-an sa katawhan maikagon sa pagpangitag kalibotanong mga butang. Ang mga tawo nangagpas sa salapi ug mga kabtangan ug mga kalingawan nga mabayran sa salapi. O sila nanlimbasog pag-ayo sa pagpausbaw sa ilang mga karera. Mabanaag sa ilang paagi sa kinabuhi ang sobrang pagtagad sa ilang kaugalingon, materyal nga mga butang, ug mga kalingawan. Gibutang nila ang Diyos sa ikaduhang dapit, kon ugaling nagtuo man sila kaniya.​—Mateo 6:​31, 32.

 3. (a) Unsang matanga sa mga bahandi ang gidasig ni Jesus nga pangitaon sa iyang mga tinun-an, ug ngano? (b) Nganong dili angay nga sobrang mabalaka bahin sa materyal nga mga butang?

³ Apan, alang sa iyang mga tinun-an, si Jesus naghatag niining tambaga: “Hunong na kamo sa pagtigom ug mga bahandi alang kaninyo dinhi sa yuta,” kay walay usa sa maong mga kabtangan ang molungtad sa kahangtoran. “Hinunoa,” siya miingon, “pagtigom kamo ug mga bahandi alang kaninyo sa langit” pinaagi sa pag-alagad kang Jehova. Giawhag ni Jesus ang iyang mga sumusunod nga huptang “yano” ang ilang mata pinaagi sa pagsentro sa ilang pagtagad ug kusog sa pagbuhat sa kabubut-on sa Diyos. “Dili kamo mahimong ulipon sa Diyos ug sa Bahandi,” siya miingon kanila. Apan komosta na man ang materyal nga mga panginahanglan​—ang pagkaon, panapot, ug puy-anan? “Hunong na sa pagkabalaka,” tambag pa ni Jesus. Iyang gitumong ang ilang pagtagad sa mga langgam—​gipakaon sila sa Diyos. Gidasig ni Jesus ang iyang mga sumusunod sa pagkuhag pagtulon-an gikan sa kabulakan​—gibestihan sila sa Diyos. Dili ba ang intelihenteng tawhanong mga alagad ni Jehova mas bililhon pa kay niini nila? “Nan, magpadayon sa pagpangita pag-una sa gingharian ug sa iyang pagkamatarong,” matod ni Jesus, “ug kining tanang ubang [kinahanglanong] mga butang igadugang ra kaninyo.” (Mateo 6:19-34) Ang imong mga lihok nagpakita ba nga ikaw nagtuo niana?

Ayaw Tugoting Matuok ang Kamatuoran sa Gingharian

 4. Kon pabilhag maayo sa usa ka tawo ang materyal nga mga butang, unsay mahimong sangpotan?

⁴ Angay lang nga mabalaka bahin sa pagbaton ug igong salapi aron matagan-an ang materyal nga mga kinahanglanon alang sa kaugalingon ug sa pamilya sa usa. Apan, kon ang usa ka tawo sobrang mabalaka sa materyal nga mga butang, ang mga resulta mahimong makadaot. Bisan pag siya moangkon tingali nga nagtuo sa Gingharian, kon diha sa iyang kasingkasing iyang giuna ang ubang mga butang, ang kamatuoran sa Gingharian matuok. (Mateo 13:18-22) Pananglitan, sa usa ka okasyon ang usa ka sapiang batan-on nga magmamando nangutana kang Jesus: “Unsay kinahanglan ko nga buhaton aron makapanunod sa kinabuhing walay kataposan?” Siya nagkinabuhi nga hinlo sa moral ug maayong motratar sa uban, apan siya nawili pag-ayo sa iyang materyal nga mga kabtangan. Dili niya kadto mabiyaan aron mahimong sumusunod ni Kristo. Busa giusikan niya ang kahigayonan nga moagak unta kaniya nga mahiuban kang Kristo ngadto sa langitnong Gingharian. Si Jesus miingon niadtong higayona: “Pagkalisod gayod alang sa mga sapian ang pagsulod sa gingharian sa Diyos!”​—Marcos 10:17-23.

 5. (a) Unsang mga butanga ang gidasig ni Pablo kang Timoteo nga magmakontento, ug ngano? (b) Sa unsang paagi gigamit ni Satanas “ang gugma sa salapi” ingong usa ka malaglagong lit-ag?

⁵ Katuigan sa ulahi, si apostol Pablo misulat kang Timoteo, nga niadtong higayona didto sa Efeso, usa ka malamboong sentro sa negosyo. Gipahinumdoman siya ni Pablo: “Kita walay gidalang bisan unsa nganhi sa kalibotan, ug kita walay madala nga bisan unsa sa atong paggawas niini. Busa, kon kita adunay makaon ug ikabesti, kita magmakontento na niining mga butanga.” Tukma lamang nga motrabaho aron makataganag “makaon ug ikabesti” alang sa kaugalingon ug sa pamilya sa usa. Apan si Pablo nagpasidaan: “Sila nga determinadong madato mangahulog sa tentasyon ug sa lit-ag ug sa daghang binuang ug makadaot nga mga tinguha, nga nagbanlod sa mga tawo sa kalaglagan ug sa kadaotan.” Si Satanas malipatlipaton. Sa sinugdan basin danihon niya ang usa ka tawo sa ginagmayng mga paagi. Mahimong sundan kinig mas dakong pagpit-os, tingali usa ka kahigayonan nga moasenso sa trabaho o sa mas maayong trabaho nga mas dakog suweldo apan mogugol ug panahon nga kanhi gigahin alang sa espirituwal nga mga butang. Kon kita dili magbantay, “ang gugma sa salapi” makatuok sa labaw pang mahinungdanon nga intereses sa Gingharian. Kini ang pagpahayag niana ni Pablo: “Tungod sa pagpangab-ot niini nga gugma ang pipila nahisalaag gikan sa pagtuo ug nagtusaktusak sa ilang kaugalingon sa daghang kasakitan.”​—1 Timoteo 6:7-10.

 6. (a) Aron makalikay nga malit-agan sa materyalismo, unsay angay natong buhaton? (b) Unsang pasalig ang atong maangkon bisan pa sa kahimtang sa ekonomiya sa kalibotan karon?

⁶ Uban ang tim-os nga gugma sa iyang Kristohanong igsoon, si Pablo nag-awhag kang Timoteo: “Kalagiw gikan niining mga butanga” ug, “Pakigbugno sa maayong pakigbugno sa pagtuo.” (1 Timoteo 6:​11, 12) Kinahanglang makigbisog aron kita makalikay nga madaldal sa materyalistikong paagi sa kinabuhi sa kalibotan alirong nato. Apan kon kita makigbisog nga nahiuyon sa atong pagtuo, si Jehova dili gayod magsalikway kanato. Way sapayan sa mahal nga mga palaliton ug kaylap nga kawalay-trabaho, iyang tinoon nga mabatonan nato ang ato gayong gikinahanglan. Si Pablo misulat: “Himoa ang inyong paagi sa pagkinabuhi nga mahigawas sa gugma sa salapi, samtang kamo magmakontento sa presenteng mga butang. Kay [ang Diyos] nag-ingon: ‘Dili ko gayod ikaw pagabiyaan ni sa bisan unsang paagi pagatalikdan.’ Sa ingon kita magmaisogon ug makaingon: ‘Si Jehova ang akong magtatabang; dili ako mahadlok. Unsay arang mabuhat sa tawo kanako?’” (Hebreohanon 13:​5, 6) Ug si Haring David misulat: “Batan-on ako kaniadto, ako natigulang na usab, apan wala ako makakita ug matarong nga gibiyaan sa bug-os, ni sa iyang kaliwat nga nagapangita ug tinapay.”​—Salmo 37:25.

Unang mga Tinun-an Nagtaganag Sumbanan

 7. Unsang mga instruksiyon bahin sa pagsangyaw ang gihatag ni Jesus ngadto sa iyang mga tinun-an, ug nganong kadto nahiangay?

⁷ Human ihatag ni Jesus sa iyang mga apostoles ang nahiangayng pagbansay, iyang gipadala sila ngadto sa Israel aron sa pagsangyaw sa maayong balita ug nagpahayag: “Ang gingharian sa mga langit haduol na.” Makapahinam gayod kadto nga mensahe! Si Jesu-Kristo, ang Mesiyanikong Hari, didto sa ilang taliwala. Sanglit ang mga apostoles nagdeboto sa ilang kaugalingon sa pag-alagad sa Diyos, si Jesus nag-awhag kanila nga magmasaligon nga ang Diyos moatiman kanila. Busa siya miingon: “Ayaw pagdalag bisan unsa alang sa panaw, sungkod man ni puyo sa pagkaon, ni tinapay ni salaping plata; ni maghupot ug duha ka pang-ilalom nga besti. Apan inigsulod ninyo sa usa ka balay, magpabilin kamo didto ug panglakaw kamo gikan didto.” (Mateo 10:5-10; Lucas 9:1-6) Gitino ni Jehova nga ang ilang mga panginahanglan itagana sa mga isigka-Israelinhon, diin maoy ilang naandan ang pagkamaabiabihon sa mga estranyo.

 8. (a) Wala madugay sa dayon na sa iyang kamatayon, nganong si Jesus naghatag ug bag-ong mga instruksiyon sa pagsangyaw? (b) Sa gihapon unsa ang kinahanglang anaa sa unang dapit sa mga kinabuhi sa mga sumusunod ni Jesus?

⁸ Sa ulahi, sa dayon na sa iyang kamatayon, si Jesus nagpasidaan sa iyang mga apostoles sa kamatuoran nga sa umaabot sila magsangyaw ubos sa nausab nga mga kahimtang. Ingong sangpotanan sa opisyal nga pagsupak sa ilang buluhaton, ang pagkamaabiabihon tingali dili dayon ikapakita ngadto kanila diha sa Israel. Sa dili madugay dad-on usab nila ang mensahe sa Gingharian ngadto sa Hentil nga kayutaan. Niadtong higayona kinahanglang sila magdala ug “usa ka puntil” ug “puyo sa pagkaon.” Bisan pa niana, kinahanglang ilang unahon ang pagpangita sa Gingharian ni Jehova ug ang iyang pagkamatarong, nga masaligon nga ang Diyos magpanalangin sa ilang mga panikaysikay aron mabatonan ang gikinahanglang pagkaon ug besti.​—Lucas 22:35-37.

 9. Giunsa ni Pablo pag-una ang Gingharian sa iyang kinabuhi samtang nag-atiman sa iyang pisikal nga mga kinahanglanon, ug unsang tambag ang iyang gihatag bahin niining butanga?

⁹ Si apostol Pablo maoy maayong panig-ingnan sa usa nga mipadapat sa tambag ni Jesus. Gihimo ni Pablo ang ministeryo nga pangunang butang sa iyang kinabuhi. (Buhat 20:​24, 25) Sa dihang miadto siya sa usa ka dapit aron sa pagsangyaw, giatiman niya ang iyang materyal nga mga panginahanglan, nga nanahi pa gani ug tolda. Wala siya maglaom nga atimanon siya sa laing tawo. (Buhat 18:1-4; 1 Tesalonica 2:9) Apan, mapasalamaton niyang gidawat ang mga kamaabiabihon ug mga gasa sa dihang gipahayag sa uban ang ilang gugma niining paagiha. (Buhat 16:​15, 34; Filipos 4:15-17) Gidasig ni Pablo ang mga Kristohanon nga dili magpasagad sa ilang mga obligasyon sa pamilya aron lang makasangyaw kondili magmatimbang sila sa ilang nagkadaiyang mga kaakohan. Iyang gitambagan sila sa pagtrabaho, paghigugma sa ilang mga pamilya, ug pagpaambit sa uban. (Efeso 4:28; 2 Tesalonica 3:7-12) Iyang giawhag sila nga mosalig sa Diyos, dili sa materyal nga mga kabtangan, ug sa paggamit sa ilang kinabuhi sa paagi nga nagpakita nga ila gayong nasabtan ang mas hinungdanong mga butang. Kaharmonya sa mga pagtulon-an ni Jesus, nagpasabot kadto sa pagpangita pag-una sa Gingharian sa Diyos ug sa iyang pagkamatarong.​—Filipos 1:9-11.

Unaha ang Gingharian sa Imong Kinabuhi

10. Unsay ipasabot sa pagpangita pag-una sa Gingharian?

¹⁰ Sa unsang gilapdon nga kita sa personal makapaambit sa maayong balita sa Gingharian ngadto sa uban? Sa usa ka bahin, nag-agad kana sa atong mga kahimtang ug sa katim-os sa atong pagkamapasalamaton. Hinumdomi nga si Jesus wala mag-ingon, ‘Pangitaa ang Gingharian kon wala ka nay laing himoon.’ Kay nahibalo sa kahinungdanon sa Gingharian, iyang gipahayag ang kabubut-on sa iyang Amahan, nga nag-ingon: “Pangitaa nga mapinadayonon ang iyang gingharian.” (Lucas 12:31) Bisan tuod ang kadaghanan kanato kinahanglang motrabaho aron atimanon ang mga panginahanglan sa atong kaugalingon ug sa atong mga pamilya, kon kita adunay pagtuo, ang atong mga kinabuhi matugob sa buluhaton sa Gingharian nga gihatag kanato sa Diyos. Sa samang panahon, atimanon nato ang atong mga kaakohan sa pamilya.​—1 Timoteo 5:8.

11. (a) Giunsa pag-ilustrar ni Jesus nga dili tanan makahimog samang gidak-on sa pagpakaylap sa mensahe sa Gingharian? (b) Unsang mga kahimtanga ang makaapektar sa gidak-on nga arang mahimo sa usa?

¹¹ Ang uban kanato makagugol ug mas daghang panahon kay sa uban sa pagsangyaw sa maayong balita sa Gingharian. Apan sa iyang sambingay bahin sa nagkalainlaing matang sa yuta, gipakita ni Jesus nga ang tanan kansang mga kasingkasing samag maayong yuta mamunga gayod. Sa unsang gilapdon? Magkalahi ang mga kahimtang sa mga indibiduwal. Ang pangedaron, panglawas, ug mga kaakohan sa pamilya tanan makaapektar. Apan kon dunay tim-os nga pagpabili, dako ang mahimong malampos.​—Mateo 13:23.

12. Unsang maayong espirituwal nga tumong ang ilabinang gidasig nga tagdon sa mga batan-on?

¹² Maayo ang pagbaton ug mga tumong nga motabang nato sa pagpalapad sa atong bahin diha sa ministeryo sa Gingharian. Ang mga batan-on kinahanglang ugdang nga maghunahuna bahin sa ekselenteng panig-ingnan sa masibotong batan-ong Kristohanon nga si Timoteo. (Filipos 2:19-22) Duna pa bay mas maayo kay sa mosulod sila sa bug-os panahong ministeryo inigkahuman sa ilang pagtungha? Ang mga edaran makabatog kaayohan usab pinaagi sa pagbutang ug maayong espirituwal nga mga tumong.

13. (a) Kinsay magdesidir kon unsay atong personal nga mahimo diha sa pag-alagad sa Gingharian? (b) Kon unahon gayod nato pagpangita ang Gingharian, unsay atong mapamatud-an?

¹³ Inay sawayon kadtong gibati natong makahimo pag mas daghan, sa personal angay kitang mapalihok pinaagi sa pagtuo nga maningkamot nga mouswag aron kita makaalagad sa Diyos sa bug-os nga sukod nga itugot sa atong kaugalingong mga kahimtang. (Roma 14:10-12; Galacia 6:​4, 5) Sumala sa gipakita sa kaso ni Job, si Satanas namasangil nga ang atong pangunang mga interes mao lamang ang atong materyal nga mga kabtangan, atong kaharuhay, ug atong personal nga kaayohan ug nga ang atong motibo sa pag-alagad sa Diyos maoy hinakog. Apan kon kita tinuod gayod nga nagauna sa pagpangita sa Gingharian, kita nagapakigbahin sa pagpamatuod nga ang Yawa dakong bakakon. Kita nagapamatuod nga ang una gayod sa atong mga kinabuhi mao ang pag-alagad sa Diyos. Sa pulong ug buhat, mapamatud-an nato ang atong halalom nga gugma kang Jehova, ang atong maunongong pagpaluyo sa iyang pagkasoberano, ug ang atong gugma sa mga isigkatawo.​—Job 1:9-11; 2:​4, 5; Proverbio 27:11.

14. (a) Nganong mapuslanon ang usa ka eskedyul alang sa ministeryo sa kanataran? (b) Sa unsang gilapdon nakigbahin sa ministeryo sa kanataran ang daghang Saksi?

¹⁴ Ang usa ka eskedyul makatabang nato nga makahimog dako pa kay sa atong mahimo tingali. Si Jehova dunay “tinudlong panahon” sa pagtuman sa iyang katuyoan. (Exodo 9:5; Marcos 1:15) Kon mahimo, maayo ang pagpakigbahin sa ministeryo sa kanataran sa usa o labaw pang tinudlong mga panahon kada semana. Ginatos ka linibong Saksi ni Jehova sa tibuok kalibotan nagpalista ingong mga oksilyare payunir, nga naggugol ug mga duha ka oras kada adlaw sa pagsangyaw sa maayong balita. Ginatos ka linibong uban pa ang nagaalagad ingong mga regular payunir, nga naggamit ug mga duha ug tunga ka oras kada adlaw sa pagwali sa mensahe sa Gingharian. Ang mga espesyal payunir ug mga misyonaryo naggugol ug mas dakong panahon diha sa pag-alagad sa Gingharian. Makapangita usab kitag mga kahigayonan sa pagpaambit sa paglaom sa Gingharian sa di-pormal ngadto sa tanang maminaw. (Juan 4:7-15) Ang atong tinguha mao gayod ang bug-os nga pagpakig-ambit sa maong buluhaton segun sa itugot sa atong mga kahimtang, kay si Jesus nagtagna: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.”​—Mateo 24:14; Efeso 5:15-17.

15. Maylabot sa atong ministeryo, nganong gibati nimong tukma sa panahon ang tambag sa 1 Corinto 15:58?

¹⁵ Sa panaghiusa, diha sa tanang bahin sa yuta, way sapayan sa nasod nga ilang gipuy-an, ang mga Saksi ni Jehova nakigbahin niining pribilehiyoa sa pag-alagad. Gipadapat nila sa ilang kaugalingon ang inspiradong tambag sa Bibliya: “Magmalig-on, dili matarog, nga kanunayng puliki diha sa buluhaton sa Ginoo, nga nahibalo nga ang inyong paghago dili makawang may kalabotan sa Ginoo.”​—1 Corinto 15:58.

Repasong Panaghisgot

• Sa pag-ingon ni Jesus nga “magpadayon sa pagpangita pag-una sa Gingharian,” unsay iyang gipasabot nga angayng ibutang sa ikaduhang dapit?

• Unsay angay natong panglantaw bahin sa pag-atiman sa pisikal nga mga panginahanglan sa atong kaugalingon ug sa atong mga pamilya? Unsang tabang ang ihatag sa Diyos kanato?

• Unsang mga bahina sa pag-alagad sa Gingharian nga kita makapakigbahin?

[Hulagway sa panid 107]

Sa tanang nasod, ang mga Saksi ni Jehova karon nagasangyaw sa maayong balita, sa dili pa moabot ang kataposan