Ang Hunahuna sa Bibliya

Unsa ang Maalamong Panglantaw sa Salapi?

“ANG salapi usa ka panalipod,” nag-ingon ang Bibliya. (Ecclesiastes 7:12) Tungod kay pinaagi niini ikaw makapalit ug pagkaon, besti, ug kapuy-an, ang salapi makapanalipod batok sa mga kalisdanan nga nalangkit sa kakabos. Sa pagkatinuod, halos tanang materyal nga mga butang mapalit sa salapi. Kini “ang magatubag sa tanang butang,” matod sa Ecclesiastes 10:19.

Ang Pulong sa Diyos nagdasig kanato sa pagkugi sa pagtrabaho aron atong matagan-an ang atong mga panginahanglan ug sa atong mga pamilya. (1 Timoteo 5:8) Mobati ka gayod ug katagbawan, kadungganan, ug kasegurohan kon ikaw matinud-anon ug kugihan.—Ecclesiastes 3:12, 13.

Dugang pa, ang atong pagkakugihan magpaarang kanato nga magmahinatagon sa pinansiyal nga paagi. Si Jesus nag-ingon: “Adunay labaw nga kalipay sa paghatag kay sa pagdawat.” (Buhat 20:35) Atong matagamtam ang maong kalipay kon atong gigamit ang atong salapi sa pagtabang sa mga nanginahanglan, ilabina sa atong mga isigka-Kristohanon, o sa pagpalit ug usa ka gasa alang sa atong minahal.—2 Corinto 9:7; 1 Timoteo 6:17-19.

Gidasig ni Jesus ang iyang mga sumusunod nga magmahinatagon, dili lang sa pipila ka higayon kondili batasanon kini, ingong paagi sa pagkinabuhi. “Batasana ang paghatag,” matod niya. (Lucas 6:38) Ang mao ra gihapong prinsipyo mapadapat sa paghatag aron sa pagpalambo sa intereses sa Gingharian sa Diyos. (Proverbio 3:9) Sa pagkatinuod, ang atong pagkamahinatagon niining paagiha motabang kanato sa ‘pagpakighigala’ kang Jehova ug sa iyang Anak.—Lucas 16:9.

Pagbantay sa “Gugma sa Salapi”

Ang hakog nga mga tawo talagsa rang manghatag, ug kon sila manghatag man, lagmit kini adunay nagpahiping motibo. Kasagaran, ang ilang problema mao ang gugma sa salapi, nga sukwahi sa ilang gidahom, subsob maghatag ug kagul-anan. “Ang gugma sa salapi maoy gamot sa tanang matang sa makadaot nga mga butang, ug tungod sa pagpangab-ot niini nga gugma ang pipila nahisalaag gikan sa pagtuo ug nagtusaktusak sa ilang kaugalingon sa daghang kasakitan,” matod sa 1 Timoteo 6:10. Nganong ang gugma sa salapi dili gayod makapatagbaw ug makapaguol pa gani?

Ang usa ka rason mao nga ang tinguha sa usa ka hakog nga tawo alang sa bahandi dili matagbaw. “Ang mahigugmaon lamang sa salapi dili matagbaw sa salapi,” matod sa Ecclesiastes 5:10. Busa, ang mga mahigugmaon sa salapi “nagtusaktusak sa ilang kaugalingon” sa daw way-kataposang kagul-anan. Dugang pa, ang ilang kahakog mao usay nakaingon sa dili maayong mga relasyon, dili malipayong kinabuhi sa pamilya, ug kawalay-igong pahulay pa gani. “Matam-is ang pagkatulog sa usa nga nagaalagad, walay sapayan kon diyutay o daghan ang iyang gikaon; apan ang kadagaya sa dato dili magpakatulog kaniya.” (Ecclesiastes 5:12) Labaw sa tanan, ang gugma sa salapi dili makapahimuot sa Diyos.—Job 31:24, 28.

Ang Biblikanhon ug sekular nga kasaysayan naghisgot ug daghang pananglitan sa mga tawo nga nangawat, nagtuis sa hustisya, namampam, nagbuno, nagluib sa uban, ug namakak—aron lang makasapi. (Josue 7:1, 20-26; Miqueas 3:11; Marcos 14:10, 11; Juan 12:6) Panahon sa ministeryo ni Jesus dinhi sa yuta, gidapit niya ang usa ka ‘dato kaayo’ nga batan-ong magmamando nga mahimong iyang sumusunod. Ikasubo, gibalibaran niya ang maong talagsaong imbitasyon tungod kay kini makaapekto ug dako sa iyang pinansiyal nga pagkabutang. Agig sanong, si Jesus miingon: “Pagkalisod gayod alang niadtong may salapi nga makasulod sa gingharian sa Diyos!”—Lucas 18:23, 24.

Panahon sa “kataposang mga adlaw,” ang mga Kristohanon kinahanglang magbantay gayod tungod kay ang mga tawo sa katibuk-an, sumala sa gitagna, maoy ‘mahigugmaon sa salapi.’ (2 Timoteo 3:1, 2) Ang matuod nga mga Kristohanon nga padayong mahunahunaon sa ilang espirituwal nga panginahanglan wala maimpluwensiyahi niining kiling sa kahakog, tungod kay sila nagbaton ug usa ka butang nga mas maayo kay sa salapi.

Butang nga Mas Maayo kay sa Salapi

Bisan tuod siya miingon nga ang salapi usa ka panalipod, si Haring Solomon midugang nga “ang kaalam usa ka panalipod” tungod kay kini “nagatipig nga buhi sa mga nanag-iya niini.” (Ecclesiastes 7:12) Unsay iyang gipasabot? Si Solomon naghisgot dinhi sa kaalam nga gipasukad sa tukmang kahibalo sa Kasulatan ug sa hustong matang sa pagkahadlok sa Diyos. Labaw pa kini sa salapi, kay ang maong kaalam makaluwas sa usa ka tawo gikan sa daghang lit-ag sa kinabuhi ug bisan sa ahat nga kamatayon. Lain pa, sama sa usa ka purongpurong, ang usa ka tawo nga adunay matuod nga kaalam ginabayaw ug ginatahod. (Proverbio 2:10-22; 4:5-9) Ug tungod kay kini makatabang aron maangkon ang pag-uyon sa Diyos, kini gitawag nga “kahoy sa kinabuhi.”—Proverbio 3:18.

Kadtong porsigidong makabaton sa maong kaalam ug kinabubut-ong mangita niini makaamgo nga kini dili lisod mabatonan. “Anak ko, . . . kon ikaw magasangpit sa pagsabot ug ikaw magapatugbaw sa imong tingog alang sa katakos sa pag-ila, kon ikaw magapadayon sa pagpangita niini ingon sa plata, ug ingon sa tinagong mga bahandi ikaw magapadayon sa pagpangita niini, nan imong masabtan ang pagkahadlok kang Jehova, ug imong makaplagan ang mismong kahibalo sa Diyos. Kay si Jehova magahatag ug kaalam; sa iyang baba nagagikan ang kahibalo ug ang katakos sa pag-ila.”—Proverbio 2:1-6.

Tungod kay ang matuod nga mga Kristohanon mas nagpabili man sa kaalam kay sa salapi, sila nakatagamtam ug kalinaw, kalipay, ug kasegurohan nga wala mabatoni sa mga mahigugmaon sa salapi. Ang Hebreohanon 13:5 nag-ingon: “Himoa ang inyong paagi sa pagkinabuhi nga mahigawas sa gugma sa salapi, samtang kamo magmakontento sa presenteng mga butang. Kay [ang Diyos] nag-ingon: ‘Dili ko gayod ikaw pagabiyaan ni sa bisan unsang paagi pagatalikdan.’” Ang salapi dili makahatag sa maong kasegurohan.

NAHIBULONG KA BA?

◼ Nganong ang salapi usa ka panalipod?—Ecclesiastes 7:12.

◼ Nganong ang diyosnong kaalam labaw pa kay sa salapi?—Proverbio 2:10-22; 3:13-18.

◼ Nganong kinahanglan natong likayan ang gugma sa salapi?—Marcos 10:23, 25; Lucas 18:23, 24; 1 Timoteo 6:9, 10.