Makatabang nga Pagtulon-an Alang sa Atong Makuyaw nga mga Panahon
“Hibaloi kini, nga sa kataposang mga adlaw moabot ang makuyaw nga mga panahong lisod sagubangon. . . . Ang mga tawo nga tuman-kadaotan ug mga impostor mosamot pa kangil-ad, nagapahisalaag ug ginapahisalaag.”—2 TIMOTEO 3:1, 13.
1, 2. Nganong magmaikagon kita kon unsang mga pagtulon-ana ang atong pagasundon?
IKAW ba ginatabangan, o ikaw ba nasakitan? Nasulbad ba ang imong mga problema, o kini ba misamot? Pinaagi sa unsa? Pinaagi sa mga pagtulon-an. Oo, ang mga pagtulon-an makaapektar ug dako sa imong kinabuhi, alang sa ikaayo o alang sa ikadaot.
2 Tulo ka magkaubang propesor dili pa dugay nagtuon niining bahina ug gipresentar ang ilang mga nakaplagan diha sa Journal for the Scientific Study of Religion. Tinuod, tingali ikaw o ang imong pamilya wala nila tun-i. Bisan pa, ang ilang nakaplagan nagpakita nga nalangkit gayod ang mga pagtulon-an ug ang kalamposan, o kapakyasan, sa usa ka tawo sa pagsagubang sa atong makuyaw nga mga panahon. Sa sunod nga artikulo, atong hatagag linain nga pagtagad ang ilang nadiskobrehan.
3, 4. Unsa ang pipila ka ebidensiya nga kita nagkinabuhi na sa makuyaw nga mga panahon?
3 Una, hinunoa, palandonga kining pangutanaha: Mouyon ka ba nga kita nagkinabuhi sa mga panahong lisod sagubangon? Kon mao, nan tino nga makita nimo ang ebidensiya nga nagpamatuod nga kini mao ang “makuyaw nga mga panahong lisod sagubangon.” (2 Timoteo 3:1-5) Ang paagi nga naapektohan ang mga tawo nagkalainlain. Pananglitan, tingali may nahibaloan kang mga nasod nga hangtod karon nabahin ug nagusbat samtang ang nagkalainlaing mga pundok nag-awayay alang sa politikanhong pagmando. Sa laing dapit, nahitabo ang pinatyanay tungod sa mga kabingkilan sa relihiyon o rasa. Ang mga sundalo dili kay mao lamang ang nangadaot. Palandonga ang dili maihap nga kababayen-an ug mga batang babaye nga mapintasong gidagmalan o ang mga edaran nga gihikawan sa pagkaon, kainit, ug pinuy-anan. Dili maihap ang mga tawong nag-antos sa hilabihan, nga misangpot sa sobrang pagdaghan sa mga kagiw ug daghang nalangkit nga mga kalisod.
4 Ang atong mga panahon gitiman-an usab sa mga problema sa ekonomiya, nga miresulta sa pagsira sa mga pabrika, kawalay-trabaho, pagkawala sa mga benepisyo ug mga pensiyon, ang pag-us-os sa bili sa salapi, ug mas nagkanihit o nagkadiyutayng mga pagkaon. May ikadugang ka ba sa listahan sa mga problema? Malagmit. Ang ubang minilyon sa tibuok yuta nag-antos sa kanihit sa pagkaon ug mga sakit. Malagmit nakakita ka na ug makalilisang nga mga hulagway gikan sa Sidlakang Aprika nga nagpakita sa niwang kaayong mga lalaki, mga babaye, ug mga bata. Milyon-milyon sa Asia ang susamang nag-antos.
5, 6. Nganong ikaingon nga ang sakit usab maoy usa ka dakong bahin sa atong makuyaw nga mga panahon?
5 Kitang tanan nakadungog bahin sa makahahadlok nga mga sakit nga karon nagdaghan. Niadtong Enero 25, 1993, ang The New York Times nag-ingon: “Milambo tungod sa seksuwal nga kamahilayon, pagkasalingkapaw ug hinarasharas nga panagana, ang epidemya sa AIDS sa Latin Amerika molabaw pa unya nianang sa Tinipong Bansa . . . Ang dakong pagtubo maoy tungod sa pagkaylap sa impeksiyon diha . . . sa mga babaye.” Niadtong Oktubre 1992, ang U.S.News & World Report nag-ingon: “Kawhaan pa lamang ka tuig ang milabay nga gipasidunggan sa siruhano heneral sa T.B. ang usa sa labing-dako nga kadaogan nga nakab-ot sukad labot sa panglawas sa katilingban, nag-ingon nga panahon na sa ‘paghunong sa pagkabalaka bahin sa mananakod nga mga sakit.’” Unsay ikasulti karon? “Ang mga ospital gibahaan pag-usab sa mga biktima sa mga hampak nga nabuntog na unta. . . . Ang mga kagaw nagahimog labi pang abtik nga henetikanhong mga paagi nga nagpakusog kanila sa pag-ugmad kay sa pag-ugmad sa bag-ong mga antibiyotiko. . . . ‘Kita nagasulod sa bag-ong panahon sa mananakod nga sakit.’”
6 Ingong usa ka pananglitan, ang Newsweek sa Enero 11, 1993, nagtaho: “Ang mga parasito sa malaria karon nagatakboy sa gibanabanang 270 ka milyong tawo matag tuig, nga nagapatay hangtod sa 2 ka milyon . . . ug nagapahinabog labing menos 100 ka milyong kaso sa grabeng mga sakit. . . . Sa samang panahon, ang sakit labi pang dili na madutlan sa kanhi makaayong mga tambal. . . . Ang pipila ka sakit sa dili madugay dili na matambalan.” Kini makapakurog kanimo sa kahadlok.
7. Unsay pagsanong sa daghan karong adlawa sa malisod nga mga panahon?
7 Tingali nakamatikod ka nga niining makuyaw nga mga panahon nga lisod sagubangon, daghan ang nagapangita ug tabang sa pagsulbad sa ilang mga problema. Palandonga, pananglitan, kadtong midangop sa mga basahon bahin sa pagsagubang sa kalisod o sa pipila ka bag-ong sakit. Ang uban nagapangitag tambag bahin sa nagakabungkag nga kaminyoon, bahin sa pag-atiman ug bata, bahin sa mga suliran sa alkohol o droga, o bahin sa kon unsaon sa pagbalanse sa mga panginahanglan sa ilang trabaho ug sa mga kalisod nga ilang gibati diha sa balay. Oo, sila nagkinahanglan gayod ug tabang! Ikaw ba nagapakigbisog sa usa ka personal nga problema o nagasinatig pipila ka suliran nga gipahinabo sa gubat, gutom, o katalagman? Bisan kon ang usa ka mabug-at nga problema daw dili masulbad, ikaw may katarongan nga mangutana, ‘Nganong kita nakadangat niining makuyaw nga kahimtang?’
8. Nganong modangop kita sa Bibliya alang sa pagsabot ug paggiya?
8 Sa dili pa kita epektibong makasagubang ug makakaplag ug katagbawan sa kinabuhi karon ug sa umaabot, kinahanglang masayod kita kon nganong nagaatubang kita niining maong makuyaw nga mga panahon. Sa pagkatinuod, kana mohatag katarongan sa matag usa kanato sa pagtagad sa Bibliya. Nganong kita mopunting ngadto sa Bibliya? Tungod kay kini lamang ang naundan sa tukmang mga tagna, kasaysayan nga gisulat nga abante, nga nagapakita sa mga katarongan sa atong kahimtang, kon asa na kita karon sa lakat sa panahon, ug kon unsay atong umaabot.
Usa ka Leksiyon Gikan sa Kasaysayan
9, 10. Sa unsang paagi ang tagna ni Jesus sa Mateo kapitulo 24 natuman sa unang siglo?
9 Ang Bantayanang Torre sa Pebrero 15, 1994, nagtaganag hinungdanong pagrepaso sa tin-aw nga tagna ni Jesus diha sa Mateo kapitulo 24. Kon imong buksan ang imong Bibliya niana nga kapitulo, imong makita diha sa bersikulo 3 nga ang mga apostoles ni Jesus nangayog usa ka ilhanan bahin sa iyang umaabot nga presensiya ug sa konklusyon sa sistema sa mga butang. Unya, sa mga bersikulo 5 ngadto sa 14, gitagna ni Jesus ang mini nga mga Kristo, mga gubat, kanihit sa pagkaon, paglutos sa mga Kristohanon, pagkamalapason, ug kaylap nga pagsangyaw bahin sa Gingharian sa Diyos.
10 Ang kasaysayan nagpamatuod nga kadtong mga butanga mismo nahitabo sa konklusyon sa Hudiyohanong sistema sa mga butang. Kon ikaw buhi pa niadto, dili ba kadto lisod nga mga panahon? Bisan pa niana, ang mga butang nagapadulong ngadto sa usa ka kataposan, usa ka kasakitan nga wala pa mahitabo sukad sa Jerusalem ug sa Hudiyohanong sistema. Sa bersikulo 15 atong mabasa kon unsay nahitabo human nga miatake ang mga Romano sa Jerusalem niadtong 66 K.P. Kadtong hitaboa natapos sa kasakitan nga gihisgotan ni Jesus sa bersikulo 21—ang kalaglagan sa Jerusalem niadtong 70 K.P., ang labing grabeng kasakitan nga nahitabo sukad sa siyudad. Bisan pa, nasayod ka nga ang kasaysayan wala matapos niadto, ni miingon si Jesus nga kana matapos. Diha sa bersikulo 23 ngadto sa 28, iyang gipakita nga human sa kasakitan sa 70 K.P., mahitabo ang ubang mga butang.
11. Sa unsang paagi ang unang-siglong katumanan sa Mateo kapitulo 24 nalangkit sa atong adlaw?
11 Ang pipila karong adlawa tingali dili lang magpakabana niining mga butanga pinaagi sa pag-ingon ‘ingon ba gayod kana ka hinungdanon?’ Sayop unya kana. Ang katumanan sa mga tagna balik niadto hinungdanon gayod. Ngano? Buweno, ang mga gubat, mga kagutom, mga linog, mga hampak, ug paglutos sa panahon sa konklusyon sa Hudiyohanong sistema nagpabanaag sa mas dakong katumanan human matapos “ang tinudlong mga panahon sa mga nasod” sa 1914. (Lucas 21:24) Daghang buhi karon nagpakakita sa Gubat sa Kalibotan I sa dihang nagsugod kining modernong katumanan. Apan bisan pa kon ikaw natawo human sa 1914, ikaw nakakita nga nagakatuman ang tagna ni Jesus. Ang mga hitabo niining ika-20ng siglo maoy dakong pamatuod nga kita karon nagkinabuhi na sa konklusyon niining presenteng daotang sistema.
12. Sumala kang Jesus, unsa pay atong pagadahomon nga makita?
12 Kini nagpasabot nga “ang kasakitan” sa Mateo 24:29 anaa sa atong atubangan. Maglakip unya kinig langitnong mga hitabo nga lisod handurawon. Ang bersikulo 20 nagpadayag nga ang mga tawo makakita unya ug usa ka lahi nga ilhanan—usa nga magpamatuod nga haduol na ang kalaglagan. Sumala sa samang asoy sa Lucas 21:25-28, nianang umaabot nga panahon, ‘ang mga tawo panguyapan tungod sa kahadlok ug sa pagpaabot sa mga butang nga moabot ibabaw sa yuta.’ Ang asoy ni Lucas nag-ingon usab nga ang mga Kristohanon unya mohangad sa ilang mga ulo tungod kay ang ilang kaluwasan haduol na.
13. Unsa ang duha ka pangunang mga punto nga nagkinahanglan sa atong pagtagad?
13 ‘Mouyon ako niana,’ moingon ka tingali, ‘apan abi nakog ang isyu maoy kon unsaon ko sa pagsabot ug pag-atubang sa atong malisod nga mga panahon?’ Husto. Ang atong unang punto mao ang pag-ila sa pangunang mga problema ug sa pagtan-aw kon sa unsang paagi makalikay kita niana. Nalangkit niana mao ang ikaduhang punto, kon sa unsang paagi ang pagtulon-an sa Kasulatan makatabang kanato sa pagtagamtam ug mas maarang-arang nga kinabuhi karon. Niining bahina, buksi ang imong Bibliya sa 2 Timoteo kapitulo 3, ug tan-awa kon sa unsang paagi ang mga pulong ni apostol Pablo makatabang kanimo sa pagsagubang sa malisod nga mga panahon.
Usa ka Tagna Bahin sa Atong mga Panahon
14. Nganong adunay katarongan sa pagtuo nga ang pagtagad sa 2 Timoteo 3:1-5 makahatag kaayohan kanato?
14 Gidasig sa Diyos si Pablo sa pagsulat ug daghang maayong tambag ngadto sa maunongong Kristohanon nga si Timoteo nga mitabang kaniya nga matagamtam ang mas malamposon ug mas malipayong kinabuhi. Ang bahin sa gisulat ni Pablo ilabinang aplikado sa atong adlaw. Bisan kon gibati nimo nga nahibalo ka na kaayo niini, sunda pag-ayo karon ang matagnaong mga pulong sa 2 Timoteo 3:1-5. Si Pablo misulat: “Hibaloi kini, nga sa kataposang mga adlaw moabot ang makuyaw nga mga panahong lisod sagubangon. Kay ang mga tawo unya maoy mahigugmaon sa kaugalingon, mga mahigugmaon sa salapi, mapasiatabon-sa-kaugalingon, mapahitas-on, mga tigpasipala, dili-masinugtanon sa mga ginikanan, dili-mapasalamaton, dili-maunongon, walay kinaiyanhong pagbati, dili ikasabot sa bisan unsa, mga tigbutangbutang, walay pagpugong-sa-kaugalingon, mabangis, walay gugma sa pagkamaayo, mga mabudhion, gahig-ulo, managburot sa garbo, mga mahigugmaon sa kalipayan inay nga mga mahigugmaon sa Diyos, managbaton ug dagway sa diyosnong pagkamahinalaron apan nagapanghimakak sa gahom niini.”
15. Nganong ilabinang makapaikag kanato karon ang 2 Timoteo 3:1?
15 Palihog matikdi, nga dihay 19 ka butang ang gilista. Sa dili pa nato kini susihon ug makabatog kaayohan, hunong una makadiyut ug sabta ang katibuk-ang tagna. Tan-awa ang bersikulo 1. Si Pablo nagtagna: “Sa kataposang mga adlaw moabot ang makuyaw nga mga panahong lisod sagubangon.” Unsa nga “kataposang mga adlaw”? Dihay daghang kataposang mga adlaw, sama sa kataposang mga adlaw sa karaang Pompeii o ang kataposang mga adlaw sa usa ka hari o sa usa ka nagamandong pamilya. Bisan ang Bibliya naghisgot ug daghang kataposang mga adlaw, sama sa kataposang mga adlaw sa Hudiyohanong sistema. (Buhat 2:16, 17) Si Jesus, hinunoa, nagbutang ug pasikaranan aron kita makasabot “sa kataposang mga adlaw” nga gihisgotan ni Pablo nga nagpunting sa atong panahon.
16. Unsang kahimtang ang gitagna bahin sa sambingay sa trigo ug sa bunglayon sa atong panahon?
16 Gihimo kana ni Jesus pinaagi sa usa ka sambingay mahitungod sa trigo ug bunglayon. Kini sila gisabod diha sa usa ka uma ug gipasagdan sa pagtubo. Siya miingon nga ang trigo ug ang bunglayon naghulagway sa mga tawo—matuod ug bakak nga mga Kristohanon. Atong gihisgotan kini nga sambingay tungod kay kini nagpamatuod nga usa ka hataas nga yugto sa panahon ang molabay una pa ang konklusyon sa tibuok daotang sistema. Sa dihang moabot kana, usa ka butang ang bug-os na nga maugmad. Unsa kana? Ang apostasiya, o ang pagtalikod gikan sa matuod nga Kristiyanidad, nga mosangpot ug dakong ani sa pagkadaotan. Ang ubang mga tagna sa Bibliya nagpamatuod nga kini mahitabo sulod sa kataposang mga adlaw sa daotang sistema. Ania na kita niana karon, sa konklusyon sa sistema sa mga butang.—Mateo 13:24-30, 36-43.
17. Unsang samang impormasyon ang gitagana sa 2 Timoteo 3:1-5 mahitungod sa konklusyon sa sistema sa mga butang?
17 Nasabtan ba nimo ang kahulogan? Ang 2 Timoteo 3:1-5 naghatag kanato ug samang ilhanan nga sa panahon sa konklusyon sa sistema sa mga butang, o sa kataposang mga adlaw, ang mga kahimtang sa taliwala sa mga Kristohanon mahimong daotan. Si Pablo wala mag-ingon nga ang 19 ka butang nga gilista mao ang pangunang paagi nga magpamatuod nga miabot na ang kataposang mga adlaw. Hinunoa, siya nagpasidaan bahin sa kon unsay atong pakigbisogan sa panahon sa kataposang mga adlaw. Ang bersikulo 1 naghisgot bahin sa “makuyaw nga mga panahong lisod sagubangon.” Kana nga ekspresyon maoy gikan sa Grego, ug kini sa literal nagkahulogang “tinudlong mga panahong mapintas.” (Kingdom Interlinear) Dili ka ba mouyon nga ang “mapintas” tukmang naghubit sa atong ginaatubang karong adlawa? Kining dinasig nga pulong nagpadayon sa paghatag kanato sa diyosnong pagsabot sa atong panahon.
18. Unsa pa ang atong hatagag pagtagad samtang tun-an nato ang matagnaong mga pulong ni Pablo?
18 Ang atong kaikag niining tagnaa mopahimo kanato sa pag-ila sa makasubo nga mga pananglitan kon unsa gayod ka kuyaw, o kapintas, sa atong panahon. Hinumdomi ang atong duha ka pangunang mga punto: (1) sa pag-ila sa mga problema nga naghimo sa atong mga panahon nga malisod ug sa pagtan-aw kon sa unsang paagi makalikay niini; (2) sa pagsunod sa mga pagtulon-an nga tinuod nga praktikal ug nga makatabang kanato sa pagtagamtam ug mas maarang-arang nga kinabuhi. Busa inay ipasiugda ang mga negatibong butang, atong hatagag pagtagad ang mga pagtulon-an nga makatabang kanato ug sa atong mga pamilya niining mga panahong malisod sagubangon.
Aniha ang Tugob nga mga Kaayohan
19. Unsang ebidensiya ang imong nakita nga ang mga tawo mahigugmaon sa ilang kaugalingon?
19 Si Pablo nagsugod sa iyang listahan pinaagi sa pagtagna nga sa kataposang mga adlaw, “ang mga tawo unya maoy mahigugmaon sa kaugalingon.” (2 Timoteo 3:2) Unsay iyang gipasabot? Ikaw husto sa pag-ingon nga sa tibuok kasaysayan dihay mga mapahitas-on, nag-alagad-sa-kaugalingong mga lalaki ug mga babaye. Bisan pa, walay duhaduha nga kining depektoha komon kaayo karong adlawa. Kini grabe pa diha sa daghang tawo. Kini halos maoy normal sa kalibotan sa politika ug sa komersiyo. Gipangagpas sa mga lalaki ug babaye ang gahom ug dungog bisan unsa pay bili. Kasagaran kana adunay bili sa uban, kay ang maong mahigugmaon sa kaugalingon dili magpakabana kon sila nakadaot sa ubang mga tawo. Dali sila nga mokiha o manikas sa uban. Masabtan nimo kon nganong daghan ang nagtawag niini nga ang “ako nga kaliwatan.” Daghan kaayo ang mga tawong lisod ikasabot ug hambogiro.
20. Sa unsang paagi ang tambag sa Bibliya lahi sa nangibabaw nga tinamdan sa paghigugma sa kaugalingon?
20 Dili kita kinahanglang pahinumdoman sa mapait nga mga kasinatian nga atong naagian sa pagpakiglabot sa mga tawong “mga mahigugmaon sa kaugalingon.” Hinuon, tinuod nga pinaagi sa prangkang pag-ila niining maong problema, ang Bibliya nagatabang kanato, kay kini nagtudlo kanato kon unsaon paglikay niining bitika. Mao kini ang ginaingon niini: “Ayaw pagbuhat ug bisan unsa tungod sa hinakog nga ambisyon o tungod sa kawang nga tinguha sa pagpagarbo, hinunoa magmapainubsanon ngadto sa usag usa, nga kanunayng isipon ang uban nga mas maayo kay sa inyong kaugalingon. Ug tan-awa ang kaayohan sa uban, dili lamang sa imong kaugalingon.” “Ayaw paghunahuna sa imong kaugalingon ug labaw kay sa imong hunahunaon. Hinunoa, magmakasaranganon sa imong panghunahuna.” Kanang ekselenteng tambag makita diha sa Filipos 2:3, 4 ug Roma 12:3, ingon sa paghubad sa Today’s English Version.
21, 22. (a) Unsang dako nga ebidensiya nga ang maong tambag napamatud-ang makatabang karong adlawa? (b) Unsay epekto sa tambag sa Diyos diha sa normal nga mga indibiduwal?
21 Tingali adunay mosupak, ‘Morag maayo kanang pamation, apan dili kana praktikal.’ Aw, oo, praktikal kana. Kana mahimong mosaler, ug tinuod nga mosaler, sa normal nga mga tawo karon. Niadtong 1990 gipatik sa magpapatik sa Oxford University ang The Social Dimensions of Sectarianism. Ang kapitulo 8 nag-ulohang “Mga Saksi ni Jehova Diha sa Usa ka Katolikong Nasod,” ug giasoy niini ang usa ka pagtuon sa Belgium. Atong mabasa: “Sa pagliso sa positibong pangdani aron mahimong usa ka Saksi, gawas pa sa pagkadani ‘sa Kamatuoran’ mismo, ang mga hingtungdan usahay mohisgot usab ug labaw pa kay sa usa ka kinaiya. . . . Ang kainit, pagkamahigalaon, gugma, ug panaghiusa mao ang labing masubsob nga mahisgotang mga hiyas, apan ang pagkamatinud-anon, ug personal nga gawi sa ‘pagpadapat sa mga prinsipyo sa Bibliya’ maoy mga hiyas usab nga gipakahamili sa mga Saksi.”
22 Mahimong atong ikatandi ang maong panglantaw sa usa ka letrato nga gikuha sa wide-angle nga lente; apan, kon mogamit ka ug zoom o telephoto, nga lente, imong makita ang duol nga mga kuha, daghang tinuod-kinabuhing mga kasinatian. Apil na niini ang mga lalaki nga kaniadto mga mapahitas-on, mahariharion, o hakog kaayo apan karon mas maaghop, nahimong mga bana ug mga amahan nga nagapakitag mas malumong pagbati ug kalulot sa ilang mga kapikas, mga anak, ug sa uban. Apil na usab niini ang mga babaye nga kaniadto mga dominante o walay pagbati ug karon nagatabang sa uban nga makakat-on sa dalan sa matuod nga Kristiyanidad. Adunay gatosan ka linibo sa maong mga pananglitan. Karon, palihog magmaprangka. Dili ba mas maayo nga mahiuban sa mga tawong sama niana kay sa kanunay nga makaatubang ug mga lalaki ug mga babaye nga nahigugma lamang sa ilang kaugalingon? Dili ba kana magpasayon sa pagsagubang sa atong makuyaw nga mga panahon? Busa dili ba ang pagsunod sa maong mga pagtulon-an sa Bibliya mopahimo kanimong mas malipayon?
23. Nganong bililhon ang paghatag ug dugang pagtagad sa 2 Timoteo 3:2-5?
23 Apan, atong natagad lamang ang unang hiyas diha sa listahan ni Pablo nga narekord sa 2 Timoteo 3:2-5. Komosta man ang uban? Ang imong mainampingon nga pagsusi niini motabang ba usab kanimo sa pag-ila sa pangunang mga problema sa atong panahon aron makalikay niini ug magpaarang kanimo sa pagsabot kon unsang dalana ang magdala kanimo ug sa imong mga minahal ug mas dakong kalipay? Ang mosunod nga artikulo motabang kanimo sa pagtubag niining mga pangutanaha ug sa pagbatog dagayang panalangin.
Mga Punto nga Hinumdoman
◻ Unsa ang pipila ka ebidensiya nga kita nagkinabuhi sa makuyaw nga mga panahon?
◻ Nganong kita makatino nga kita nagkinabuhi sa kataposang mga adlaw?
◻ Unsang duha ka pangunang mga punto ang atong makuha gikan sa pagtuon sa 2 Timoteo 3:1-5?
◻ Niining panahona nga daghan kaayo ang mahigugmaon sa ilang kaugalingon, sa unsang paagi ang mga pagtulon-an sa Bibliya nakatabang sa katawhan ni Jehova?
[Picture Credit Line sa panid 8]
Hulagway sa ibabaw nga wala: Andy Hernandez/Sipa Press; hulagway sa ubos tuo: Jose Nicolas/Sipa Press