LEKSIYON 59
Makaya Nimo ang Paglutos
Moabot gyod ang panahon nga ang tanang Kristohanon makasinatig pagsupak, ug paglutos pa gani. Angay ba tang mahadlok ana?
1. Nganong makadahom ta nga moabot ang paglutos?
Ang Bibliya klarong nag-ingon: “Ang tanan nga nagkinabuhi nga nahiusa kang Kristo Jesus ug may debosyon ngadto sa Diyos lutoson sab.” (2 Timoteo 3:12) Si Jesus gilutos kay dili siya bahin sa kalibotan ni Satanas. Dili pod ta bahin sa kalibotan, maong dili ikatingala kon lutoson ta sa mga gobyerno ug sa mga relihiyon sa kalibotan.—Juan 15:18, 19.
2. Unsay atong himoon aron makapangandam ta sa paglutos?
Kinahanglang palig-onon nato karon ang atong pagsalig kang Jehova. Paggahin ug panahon kada adlaw sa pag-ampo kaniya ug sa pagbasa sa iyang Pulong. Tambong nga regular sa mga tigom sa kongregasyon. Kining tanan maghatag nimog kusog nga imong gikinahanglan aron maisogon nimong maatubang ang bisan unsang paglutos, bisan pag membro sa imong pamilya ang molutos nimo. Si apostol Pablo, nga kadaghan gilutos, misulat: “Si Jehova ang akong magtatabang; dili ko mahadlok.”—Hebreohanon 13:6.
Mahimo pod tang mas maisogon kon regular tang mosangyaw. Ang pagsangyaw magtudlo nato nga mosalig kang Jehova ug pinaagi niini mawala pod ang atong kahadlok sa tawo. (Proverbio 29:25) Kon naa kay kaisog karon sa pagsangyaw, maandam ka pag-ayo nga padayong mosangyaw bisan pag idili sa gobyerno ang atong buluhaton.—1 Tesalonica 2:2.
3. Unsay kaayohan kon molahutay ta dihang lutoson?
Siyempre dili ta ganahang lutoson, pero kon molahutay ta mas molig-on ang atong pagtuo. Mas masuod ta kang Jehova kay maeksperyensiyahan nato ang iyang tabang dihang mobati ta nga dili na nato kaya. (Basaha ang Santiago 1:2-4.) Masakitan si Jehova nga magtan-aw natong nag-antos, pero malipay siya dihang makita niya nga milahutay ta. Ang Bibliya nag-ingon: “Kon molahutay mo sa kalisdanan tungod sa pagbuhat ug maayo, makapalipay kini sa Diyos.” (1 Pedro 2:20) Ang tanan nga molahutay gantihan ni Jehova ug kinabuhing walay kataposan sa bag-ong kalibotan diin wala nay mga magsusupak sa matuod nga pagsimba.—Mateo 24:13.
TUN-IG DUGANG
Sayra kon nganong posible nga magpabiling matinumanon kang Jehova bisan dihang lutoson ta. Sayra pod kon unsaon ta niya pagganti.
4. Makalahutay ka kon supakon ka sa imong pamilya
Si Jesus nahibalo pag-ayo nga posibleng naay mga membro sa atong pamilya nga dili gustong moalagad ta kang Jehova. Basaha ang Mateo 10:34-36, ug dayon hisgoti kini nga pangutana:
Kon ang usa moalagad kang Jehova, unsa tingali ang isulti o himoon sa mga membro sa iyang pamilya?
Ingong pananglitan niini, i-play ang VIDEO, ug dayon hisgoti ang mosunod nga pangutana:
Unsay imong himoon kon pugngan ka sa imong paryente o higala sa pag-alagad kang Jehova?
Basaha ang Salmo 27:10 ug Marcos 10:29, 30. Human mabasa ang matag teksto, hisgoti kini nga pangutana:
Nganong makatabang ni nga saad dihang supakon ka sa imong pamilya o higala?
5. Padayong simbaha si Jehova bisan pa sa paglutos
Nagkinahanglag kaisog ang pag-alagad kang Jehova dihang pugngan ta sa uban. I-play ang VIDEO, ug dayon hisgoti ang mosunod nga pangutana:
Sa unsang paagi ang mga ehemplo niini nga video nakapalig-on kanimo?
Basaha ang Buhat 5:27-29 ug Hebreohanon 10:24, 25. Human mabasa ang matag teksto, hisgoti kini nga pangutana:
Nganong importante kaayo nga padayon natong simbahon si Jehova bisan pag idili ang pagsangyaw o ang mga tigom?
6. Tabangan ka ni Jehova nga makalahutay
Ang mga Saksi ni Jehova sa tibuok kalibotan, batan-on man o tigulang, padayong nag-alagad kang Jehova bisan dihang gilutos sila. Aron imong makita kon unsay nakatabang nila, i-play ang VIDEO. Dayon hisgoti ang mosunod nga pangutana:
Sa video, unsay nakatabang niini nga mga Saksi nga makalahutay?
Basaha ang Roma 8:35, 37-39 ug Filipos 4:13. Human mabasa ang matag teksto, hisgoti kini nga pangutana:
Sa unsang paagi kini nga teksto nagpasalig nimo nga malahutay nimo ang bisan unsang pagsulay?
Basaha ang Mateo 5:10-12, ug dayon hisgoti kini nga pangutana:
Nganong posible gihapon kang magmalipayon bisan pag gilutos?
Minilyong Saksi ni Jehova ang padayong nag-alagad kaniya nga matinumanon bisan pa sa mga pagsupak. Mahimo pod na nimo!
ANG UBAN MOINGON: “Dili nako makaya kon lutoson ko.”
Unsa kaha nga mga teksto ang makadasig nila?
SUMARYO
Pabilhan ni Jehova ang atong mga paningkamot sa pag-alagad kaniya bisag gilutos. Pinaagi sa iyang tabang, makaya nato ang paglutos!
Review
Nganong angayng dahomon sa mga Kristohanon ang paglutos?
Unsay imong mahimo karon aron maandam ka sa paglutos?
Unsay makatabang nimo aron mobati ka nga kaya nimong mag-alagad kang Jehova bisan pa sa mga pagsulay?
SUSIHA
Tan-awa kon giunsa pagtabang ni Jehova ang batan-ong brader aron makalahutay siya dihang gipriso siya tungod sa neyutralidad.
Sayra kon unsay nakatabang sa usa ka magtiayon nga matinumanong makaalagad kang Jehova sa daghang katuigan bisag gisupak.
Sayra kon unsay himoon aron maisogon nimong maatubang ang paglutos.
“Pangandam Karon Alang sa Paglutos” (Ang Bantayanang Torre, Hulyo 2019)
Unsay angay natong panghunahuna kon supakon ta sa atong pamilya, ug unsay atong himoon aron mamentinar ang kalinaw ug makapabilin tang matinumanon kang Jehova?
“Ang Kamatuoran Magdalag Espada, Dili Pakigdait” (Ang Bantayanang Torre, Oktubre 2017)