Kinahanglang Kombinsido Ka nga Imong Nabatonan ang Kamatuoran

 1. Unsay atong gipasabot sa pulong nga “kamatuoran”?

“SA UNSANG paagi nakaplagan nimo ang kamatuoran?” “Gimatuto ka ba diha sa kamatuoran?” “Unsa na ka kadugay sa kamatuoran?” Tingali gipangutana ka na anâ. O tingali ikaw ang nangutana niana sa uban. Unsay atong gipasabot sa pulong nga “kamatuoran”? Sagad ang gipasabot nato mao ang atong pagtuo, atong paagi sa pagsimba, ug ang atong paagi sa pagkinabuhi. Ang mga tawo nga naa sa kamatuoran nahibalo kon unsay gitudlo sa Bibliya. Ug nagsunod sila sa mga prinsipyo niini. Ingong resulta, nahigawas sila sa bakak nga relihiyosong mga pagtulon-an ug malipayon kaayo sila bisag dili pa hingpit.​—Juan 8:32.

 2. Sumala sa Juan 13:34, 35, unsa tingali unang nakadani sa usa ka tawo ngadto sa kamatuoran?

² Unsay unang nakadani nimo sa kamatuoran? Tingali ang maayong panggawi sa katawhan ni Jehova. (1 Ped. 2:12) O tingali ang gugma nga ilang gipakita. Daghan ang nakamatikod niana sa unang pagtambong nila sa tigom, ug mas nahinumdom sila niana nga gugma kay sa bisan unsa nga ilang nadungog sa tigom. Dili ni ikatingala kay si Jesus miingon nga ang iyang mga tinun-an mailhan pinaagi sa ilang gugma sa usag usa. (Basaha ang Juan 13:34, 35.) Pero labaw pa ang gikinahanglan aron molig-on ang atong pagtuo.

 3. Unsay posibleng mahitabo kon ang atong pagtuo sa Diyos gibase lang sa Kristohanong gugma nga gipakita sa atong mga igsoon?

³ Ang atong pagtuo dili lang sa Kristohanong gugma angayng ibase. Ngano? Ibutang ta nga ang usa ka igsoon​—tingali ansiyano pa gani o kaha payunir—​nakahimog seryosong sala. O komosta kon napasakitan ka sa usa ka igsoon? O tingali dunay nahimong apostata nga moinsistir nga wala nato ang kamatuoran. Kon mahitabo na, mapandol ka ba ug mohunong sa pag-alagad kang Jehova? Kini ang leksiyon: Kon ibase lang nimo ang imong pagtuo sa kon unsay gibuhat sa uban imbes sa imong relasyon kang Jehova, ang imong pagtuo dili molig-on. Ang imong pagbati kang Jehova ug sa iyang katawhan makatabang nimo sa pagpalig-on sa imong pagtuo, pero importante sab kaayo nga imong tun-an pag-ayo ang Bibliya, sabton ang imong nakat-onan, ug mag-research aron makombinsir ka nga tinuod ang imong nakat-onan bahin kang Jehova.​—Rom. 12:2.

 4. Sumala sa Mateo 13:3-6, 20, 21, unsay mahitabo sa pipila dihang masulayan ang ilang pagtuo?

⁴ Si Jesus miingon nga ang pipila ‘malipayng’ modawat sa kamatuoran, pero ang ilang pagtuo mohuyang dihang masulayan. (Basaha ang Mateo 13:3-6, 20, 21.) Tingali wala nila masabti nga kadtong mosunod kang Jesus makasinatig mga kalisdanan. (Mat. 16:24) O tingali naghunahuna sila nga ang pagkahimong Kristohanon nagpasabot nga ang ilang kinabuhi pulos lang panalangin, walay problema. Pero niining kalibotana duna gyoy mga problema. Ang mga kahimtang mahimong mausab ug makuhaan ang atong kalipay.​—Sal. 6:6; Eccl. 9:11.

 5. Sa unsang paagi ang kadaghanan sa atong mga igsoon nagpamatuod nga kombinsido sila nga ilang nabatonan ang kamatuoran?

⁵ Ang kadaghanan sa atong mga igsoon nagpamatuod nga kombinsido sila nga ilang nabatonan ang kamatuoran. Sa unsang paagi? Ang ilang kombiksiyon dili mohuyang bisan pag dunay igsoon nga makapasakit nila o makasala. (Sal. 119:165) Sa matag higayon nga masulayan ang ilang pagtuo, kini mas molig-on imbes mohuyang. (Sant. 1:2-4) Sa unsang paagi maugmad nimo ang ingon niana ka lig-on nga pagtuo?

 6. Sa unsa gibase sa mga tinun-an sa unang siglo ang ilang pagtuo?

⁶ Ang mga tinun-an sa unang siglo nagpalig-on sa ilang pagtuo pinaagi sa ilang kahibalo sa Kasulatan ug sa mga pagtulon-an ni Jesu-Kristo, nga mao, “ang kamatuoran sa maayong balita.” (Gal. 2:5) Kini nga kamatuoran mao ang tanan natong gituohan ingong mga Kristohanon, apil na ang bahin sa halad lukat ni Jesus ug sa iyang pagkabanhaw. Si apostol Pablo kombinsido nga tinuod kini nga mga pagtulon-an. Ngano? Tungod kay gigamit niya ang Kasulatan sa pagpamatuod “pinaagig mga pangutlo nga ang Kristo kinahanglang mag-antos ug banhawon.” (Buh. 17:2, 3) Ang mga tinun-an sa unang siglo midawat sa maong mga pagtulon-an ug misalig sa balaang espiritu sa pagtabang kanila nga masabtan ang Pulong sa Diyos. Nag-research sila aron maseguro nga kini nga mga pagtulon-an gibase sa Kasulatan. (Buh. 17:11, 12; Heb. 5:14) Wala nila ibase ang ilang pagtuo sa pagbati lang, ug wala sila mag-alagad kang Jehova tungod lang kay malipay sila dihang makig-uban sa mga igsoon. Hinunoa, ang ilang pagtuo gibase sa “tukmang kahibalo sa Diyos.”​—Col. 1:9, 10.

 7. Sa unsang paagi makatabang kanato ang atong pagtuo sa mga kamatuoran sa Bibliya?

⁷ Ang mga kamatuoran sa Pulong sa Diyos dili mausab. (Sal. 119:160) Pananglitan, kini dili mausab kon ang usa ka igsoon makapasakit nato o makahimog seryosong sala. Ug dili ni mausab dihang makasinati tag mga kalisdanan. Busa kinahanglan nga nakasabot kaayo ta sa mga pagtulon-an sa Bibliya ug kombinsido nga tinuod ni. Ang atong lig-ong pagtuo nga gibase sa mga kamatuoran sa Bibliya makatabang nga dili ta matarog panahon sa mga pagsulay, sama ra nga ang angkla makatabang nga dili matarog ang barko panahon sa kusog nga bagyo. Sa unsang paagi mapalig-on nimo ang imong kombiksiyon nga imong nabatonan ang kamatuoran?

 8. Ingon sa gipakita sa 2 Timoteo 3:14, 15, sa unsang paagi nakombinsir si Timoteo nga iyang nabatonan ang kamatuoran?

⁸ Si Timoteo kombinsido nga iyang nabatonan ang kamatuoran. Nganong kombinsido siya? (Basaha ang 2 Timoteo 3:14, 15.) Ang iyang mama ug lola maoy unang nagtudlo niya “sa balaang mga sinulat.” Pero walay duhaduha nga siya mismo naggahin ug panahon ug naningkamot sa pagtuon niana nga mga sinulat. Ingong resulta, ‘nakombinsir’ siya nga kana ang kamatuoran. Sa ulahi, si Timoteo, iyang mama, ug iyang lola nakakat-on sa Kristohanong mga pagtulon-an. Segurado nga nakadayeg si Timoteo sa gugma nga gipakita sa mga sumusunod ni Jesus ug gusto kaayo niyang makig-uban ug motabang sa mga igsoon. (Filip. 2:19, 20) Pero ang iyang pagtuo wala ibase sa iyang gugma sa mga tawo kondili sa mga kamatuoran nga nakapasuod niya kang Jehova. Busa kinahanglan sab nimong tun-an ang Bibliya ug makombinsir nga tinuod ang gitudlo niini bahin kang Jehova.

 9. Unsang tulo ka importanteng kamatuoran ang kinahanglan nimong pamatud-an sa imong kaugalingon?

⁹ Aron mahimo kana, kinahanglan nimong pamatud-an sa imong kaugalingon ang labing menos tulo ka importanteng kamatuoran. Una, kinahanglang kombinsido ka nga si Jehova nga Diyos ang Maglalalang sa tanang butang. (Ex. 3:14, 15; Heb. 3:4; Pin. 4:11) Ikaduha, kinahanglang pamatud-an nimo sa imong kaugalingon nga ang Bibliya mao ang mensahe sa Diyos para sa mga tawo. (2 Tim. 3:16, 17) Ug ikatulo, kinahanglan nimong seguroon nga si Jehova dunay organisadong grupo sa katawhan nga nagsimba kaniya ubos sa pagpanguna sa Kristo, ug nga kanang grupoha mao ang mga Saksi ni Jehova. (Isa. 43:10-12; Juan 14:6; Buh. 15:14) Ang pagpamatuod sa imong kaugalingon niana nga mga kamatuoran wala magpasabot nga nahibalo ka na sa tanan bahin sa Bibliya. Angay nga ang imong tumong mao ang paggamit sa imong “gahom sa pagpangatarongan” aron mapalig-on ang imong kombiksiyon nga nabatonan nimo ang kamatuoran.​—Roma 12:1.

10. Gawas sa pagkahibalo sa kamatuoran, unsa pay kinahanglan natong buhaton?

¹⁰ Dihang mapamatud-an na nimo sa imong kaugalingon ang tulo ka importanteng kamatuoran bahin sa Diyos, sa Bibliya, ug sa katawhan sa Diyos, kinahanglan nga makamao kang mogamit sa Kasulatan sa pagpamatuod niana ngadto sa uban. Ngano? Tungod kay ingong mga Kristohanon, atong responsibilidad nga itudlo ang mga kamatuoran nga atong nakat-onan niadtong maminaw kanato.b (1 Tim. 4:16) Samtang maningkamot ta sa pagkombinsir sa uban bahin sa mga kamatuoran sa Bibliya, mapalig-on nato ang atong kombiksiyon bahin niana nga mga kamatuoran.

11. Unsang ehemplo ang gipakita ni apostol Pablo ingong magtutudlo?

¹¹ Dihang si apostol Pablo magtudlo sa mga tawo, iyang ‘kombinsihon sila bahin kang Jesus pinasukad sa Balaod ni Moises ug sa basahon sa mga Propeta.’ (Buh. 28:23) Sa unsang paagi masundog nato si Pablo dihang magtudlo sa kamatuoran ngadto sa uban? Dili igo ang pagsulti lang kanila sa gitudlo sa Bibliya. Kinahanglang tabangan nato ang atong mga Bible study nga mangatarongan base sa Kasulatan samtang naningkamot sila nga masuod kang Jehova. Gusto natong dawaton nila ang kamatuoran, dili tungod kay nakadayeg sila kanato, kondili kay ilang gipamatud-an sa ilang kaugalingon nga tinuod ang ilang nakat-onan bahin sa atong mahigugmaong Diyos.

12-13. Sa unsang paagi matabangan sa mga ginikanan ang ilang mga anak sa pagpabilin diha sa kamatuoran?

¹² Mga ginikanan, seguradong gusto ninyo nga ang inyong anak magpabilin sa kamatuoran. Naghunahuna tingali mo nga kon duna silay maayong mga higala diha sa kongregasyon, mouswag sila sa espirituwal. Pero aron makombinsir ang inyong mga anak nga ilang nabatonan ang kamatuoran, nagkinahanglan silag labaw pa kay sa maayong mga higala. Kinahanglang masuod sila sa Diyos ug makombinsir nga tinuod ang gitudlo sa Bibliya.

¹³ Aron matudloan sa mga ginikanan ang ilang mga anak sa kamatuoran bahin sa Diyos, kinahanglang magpakita silag ehemplo pinaagi sa pagtuon pag-ayo sa Bibliya. Kinahanglang maggahin sila ug panahon sa pagpamalandong sa ilang nakat-onan. Kon ila nang himoon, makatudlo sila sa ilang mga anak sa pagbuhat sab niana. Kinahanglang tudloan nila ang ilang mga anak sa paggamit sa mga galamiton sa pagtuon sa Bibliya, sama sa pagtudlo nila sa ilang Bible study. Sa pagbuhat niana, matabangan nila ang mga anak sa paghigugma kang Jehova ug sa pagsalig sa gigamit ni Jehova sa pagtaganag espirituwal nga pagkaon​—“ang matinumanon ug maalamong ulipon.” (Mat. 24:45-47) Mga ginikanan, dili igo nga tudloan lang ninyo ang inyong mga anak sa simpleng mga kamatuoran sa Bibliya. Tabangi sila sa pag-ugmad ug lig-ong pagtuo pinaagi sa pagtudlo kanila bahin sa “lawom nga mga butang sa Diyos,” nga haom sa ilang edad ug katakos.​—1 Cor. 2:10.

14. Nganong angay natong tun-an ang mga tagna sa Bibliya? (Tan-awa sab ang kahong “Makapatin-aw Ka ba Niining mga Tagnaa?”)

¹⁴ Ang mga tagna sa Bibliya maoy importanteng bahin sa Pulong sa Diyos nga makatabang nato sa pagpalig-on sa atong pagtuo kang Jehova. Unsa nga mga tagna ang nakapalig-on sa imong pagtuo? Tingali moingon ka nga ang mga tagna bahin sa “kataposang mga adlaw.” (2 Tim. 3:1-5; Mat. 24:3, 7) Pero unsa pang natuman nga mga tagna ang makapalig-on sa imong kombiksiyon? Pananglitan, ikapatin-aw ba nimo kon sa unsang paagi natuman ug padayong nagakatuman ang mga tagna sa Daniel kapitulo 2 o sa Daniel kapitulo 11?c Kon ang imong pagtuo lig-ong gibase sa Bibliya, ang imong pagtuo dili mohuyang. Tagda ang ehemplo sa atong mga igsoon nga nag-antos sa grabeng paglutos sa Germany panahon sa Gubat sa Kalibotan II. Bisag wala nila bug-os masabti ang mga tagna sa Bibliya bahin sa kataposang mga adlaw, lig-on ang ilang pagtuo sa Pulong sa Diyos.

15-17. Sa unsang paagi ang pagtuon sa Bibliya nakapalig-on sa atong mga igsoon nga gilutos sa mga Nazi?

¹⁵ Sa dihang nagmando pa ang Nazi sa Germany, libolibo sa atong mga igsoon ang gipadala sa mga kampo konsentrasyon. Si Hitler ug ang taas nga opisyal sa SS nga si Heinrich Himmler nagdumot sa mga Saksi ni Jehova. Sumala sa usa ka sister, si Himmler miingon sa grupo sa atong mga sister diha sa usa ka kampo konsentrasyon: “Tingali ang inyong Jehova maoy nagmando sa langit, pero dinhi sa yuta, kami ang nagmando! Tan-awon nato kon kinsay makalahutay, kamo o kami!” Unsay nakatabang sa katawhan ni Jehova sa pagpabiling matinumanon?

¹⁶ Ang maong mga Estudyante sa Bibliya nahibalo nga ang Gingharian sa Diyos nagsugod pagmando niadtong 1914. Wala sila matingala nga sila grabeng gilutos. Pero ang katawhan ni Jehova kombinsido nga walay tawhanong gobyerno nga makababag sa katuyoan sa Diyos. Si Hitler dili makawagtang sa matuod nga pagsimba o makatukod ug gobyerno nga mas gamhanan kay sa Gingharian sa Diyos. Kombinsido ang mga igsoon nga sa ngadtongadto matapos ra ang pagmando ni Hitler.

¹⁷ Wala gyod masayop ang mga igsoon. Wala madugay, ang gobyerno sa Nazi nahugno, ug si Heinrich Himmler​—ang tawong miingon nga “dinhi sa yuta, kami ang nagmando”—​nagtagotago. Samtang nagtagotago, nakita niya si Brader Lübke, usa ka piniriso kaniadto nga iyang nailhan. Minghoy na kaayo si Himmler ug nangutana siya kang Brader Lübke: “Estudyante sa Bibliya, unsa na may mahitabo ron?” Giingnan ni Brader Lübke si Himmler nga ang mga Saksi ni Jehova wala gyod magduhaduha nga mapakyas ang pagmando sa Nazi ug ang mga Saksi makabaton ug kagawasan. Sa una, si Himmler daghag gisulting dili maayo bahin sa mga Saksi ni Jehova, pero niining tungora wala siya katingog. Wala madugay human niadto, naghikog siya. Unsay leksiyon? Ang atong pagtuon sa Bibliya, apil sa mga tagna niini, makapalig-on sa atong pagtuo sa Diyos ug makatabang nato nga makabarog nga malig-on panahon sa pagsulay.​—2 Ped. 1:19-21.

18. Ingon sa gipakita sa Juan 6:67, 68, nganong gikinahanglan nato ang “tukmang kahibalo ug bug-os nga pagsabot” nga gihisgotan ni Pablo?

¹⁸ Ang matag usa kanato angayng magpakitag gugma​—ang ilhanan sa tinuod nga mga Kristohanon. Pero nagkinahanglan sab tag “tukmang kahibalo ug bug-os nga pagsabot.” (Filip. 1:9) Kay kon wala ta ana, puwede tang maimpluwensiyahan sa ‘matag hangin sa pagtulon-an pinaagi sa pagpanglingla sa mga tawo,’ hasta sa mga apostata. (Efe. 4:14) Sa dihang daghan sa mga tinun-an ni Jesus ang mihunong sa pagsunod kaniya, gipahayag ni apostol Pedro ang iyang lig-ong kombiksiyon nga naa kang Jesus ang “mga pulong nga motultol sa kinabuhing walay kataposan.” (Basaha ang Juan 6:67, 68.) Bisag niadtong panahona wala masabti ni Pedro ang tanang detalye sa maong mga pulong, nagpabilin siyang maunongon kay iyang nasabtan ang kamatuoran bahin sa Kristo. Mapalig-on sab nimo ang imong kombiksiyon nga tinuod ang gitudlo sa Bibliya. Kon buhaton nimo kana, ang imong pagtuo magpabiling lig-on bisag unsay mahitabo, ug makatabang ka sa pagpalig-on sa pagtuo sa uban.​—2 Juan 1, 2.